الشعبية نجمة تزين سماء مدينة الخرطوم بحري

Quote: عندنا في الحلة اخوان اتنين ... ( حليتي وكداس ) مارضين الحلة مرض جد ، وجع قلب ... عذاب ... ياخ ديل امهم ( التومة ) ما بتريدم خليك من ناس الحلة . المهم يوم الجوز ديل دافرين في سوق الشعبية وكل واحد شايل لي نبلة وطيرتين ده غير الجراد وكيس مليان قمري و 15 كدندار . تقوم تلاقيهم في السوق ( عايدة شمار ) بوصفها احسن من يرسلك ويكلفك بمهام شاقة !! عايدة شمار : تعالوا يا مطاليق شيلوا السمك ده ودوه بيتنا بتلقوا اختي ( السرة ) . قولوا ليها ( عيودة ) مرسلا _ طبعا بتدلع في نفسها _ خلوها تحمر السمك وتجيهو لاني ماشة الطاحونة وباخد ونستي وبجي البيت ، ودايرة افطر بيو لانو الدكتور منعني من اللحوم عشان القاوت والكلوسترول مرتفع وكدة !! حليتي : ياخي نحن مافاضين ، شوفي زول تاني يمشي ليك نحن عندنا مشوار ! عايدة شمار : مافاضين انتوا دكاترة ؟ امشوا تمشي بطنكم ، مشواركم مش الكوشة ولا حتة تانية !! طيروا من قدامي يا وهم . كداس : ياحجة نحن عندنا قنص .. سمك شنو وصارقيل شنو ؟ فكينا ياخ !! عايدة شمار : حجة تحج لي تل ابيب ياود الحرام !! انا قدر امك المفنوسة ديك!! ... خلاص هاكم ال 500 دي واشتروا بيها تسالي وقزقزوا تلقوا نفسكم في البيت !! ... المهم الاشرار سمعوا الكلام بعد الضحاكات وشالوا كيس السمك ( تنقش ،،، تنقش ) وهم في نص المشوار جاتم خاطرة شريرة ، وكل واحد عاين لي اخو ( في اللحظة ديك ابليس لملم اطرافو وقال انا دوري انتهي وكلو الا عايدة شمار دي !! و الاشرار ديل ما محتاجين لي ) . الاشرار اتفقوا علي المكيدة ونكشوا شعرهم واقرب مزيرة بالموية في راسهم واطمبجوا بالطين ( تمويه وكدة ) . وشالوا السمك بيتهم لامهم ( التومة ) وقالوا ليها الله فتحا علينا بفضل دعواتك و الصيد كان وفير !!! امهم صدقت القصة قصاد كمية السمك البلطي !! وظبطت العضة وضربوا المشاوي هي والاشرار وابو الاشرار،،، وبدون رغيف كمان !! بعد شوية تجي ( عايدة شمار ) البيت تلاقي اختها ( السرة ) راقدة في السرير وهي بتقرا مجلة سيدتي . عايدة شمار : الله يسد نيتك راقدة لا جيهتي السمك لا حمرتي مالك !! راقدة زي الجنازة ترقدي في احمد شرفي !! و يجيك عريس كيف انت يالخملة !! السرة : سمك شنو انت طاير ليك !!؟ تقول انت معرسة واولادك في الجامعة ( في سرها طبعا ) !! ... عايدة شمار تجي فترانة و عيونا مطششة طوالي علي التلاجة تأخد حقنة الانسولين !! المهم عرفت انو الجوز ماجابو السمك !! السرة : لكن قبيل جاني ( حليتي ) وشحدني دكوة وليمون وقال لي الليلة عندنا فطرة كاربة ابوي جاب لينا سمك من الموردة ، تعالي افطري معانا لانو شايف اختك لافة في السوق زي كلب الحر و احسن ليك تجي تأكلي وهي شديدة علي روحا بعدين تأكلي نيم !! ... عايدة شمار وهي تزبد وترغي شالت توبا ومرقت علي جيرانا ،، وهي تسب وتلعن ،، دكوة الله يدك عليهم الواطة !! انا كلب الحر ولا هم المطاليق اولاد الحرام !! وفي الشارع بدأت تشم في ريحة السمك حقها .. وبقت تدمع . جنب الباب شافت موية السمك مدفوقة كضبت الشينة وقالت : ده بيكون ترتر ساي ما قشر السمك وانا عشان الانسولين عيوني مطششة !! واي شئ شايفا سمك ،، سمك !! لمن وصلت بيت الاشرار كررو دفرت الباب ونادت ام الاشرار ،،، التومة ،، يا التومة !! عايدة شمار : اولادك عملوا كيت وكيت !! انت ما سالتيهم جابوا السمك ده من وين ؟؟ التومة : ما صادو من البحر يعني من وين جابو من الغابة !! عايدة شمار : بحر ابليس ، ان شاء الله ياكلك الحوت ياعفنة ، ياام العفنين . ... ناس الحلة اتلموا بالجوطة ،،، وجابو الشفع الاشرار قالوا سمك عايدة شمار اكلوا منهم كلب الغفير بتاع المدرسة السعران ، وسمكنا ده صدناو من البحر !! وبعدين هي زاتا سمكا كان نص كيلو بس !! وكان ما مصدقانا امشي شوفي كلب الغفير تلقيو عمل ليو جضيمات !! عايدة شمار لمن خلاااص قنعت من سمكا ، و السكري طلع ليها في راسا وخشمها بقي ملح ملح !! قالت : طيب خلاص يااولاد الكلب ما فضلتوا ولا راس ، ادوني ليو اعملوا شوربة ولا صينية سمك !! الله يقطع راسكم زي ما قطعتوا راسي !! همسة : تم نقل السيدة / عايدة شمار الي الحوادث بمستشفي بحري وهي تعاني من صدمة سكري حادة وتبرطم براها : ( سمك ، سمك !! عين سمكة في رجلينكم يا مطاليق ) . ... شوهد ( حليتي ) في واحدة من اعماله الشريرة وهو يشتري علبة ساردين ويضعها بجوار سرير عايدة شمار عوضا عن السمك البلطي ،، ولسان حالو ( كعب العدم يا عيودة ) !! همسة الهمسة : ... يا ريت يا ود العباسية لو اتناولت ليك شوال ( صير ) لي عايدة شمار عشان ماتجيها حاجة !!

(عدل بواسطة hajhamad on 02-09-2008, 06:49 PM)