|
|
 Re: مسودة كتاب الشعبية الباب الثامن: أدبيـــات (Re: أمير قناوي)
|
قصص من الشعبية:-
شهاب شكوكو:-
عندنا في الحلة اخوان اتنين ... ( حليتي وكداس ) مارضين الحلة مرض جد ، وجع قلب ... عذاب ... ياخ ديل امهم ( التومة ) ما بتريدم خليك من ناس الحلة .
المهم يوم الجوز ديل دافرين في سوق الشعبية وكل واحد شايل لي نبلة وطيرتين ده غير الجراد وكيس مليان قمري و 15 كدندار .
تقوم تلاقيهم في السوق ( عايدة شمار ) بوصفها احسن من يرسلك ويكلفك بمهام شاقة !!
عايدة شمار : تعالوا يا مطاليق شيلوا السمك ده ودوه بيتنا بتلقوا اختي ( السرة ) .
قولوا ليها ( عيودة ) مرسلا _ طبعا بتدلع في نفسها _ خلوها تحمر السمك وتجيهو لاني ماشة الطاحونة وباخد ونستي وبجي البيت ، ودايرة افطر بيو لانو الدكتور منعني من اللحوم عشان القاوت والكلوسترول مرتفع وكدة !!
حليتي : ياخي نحن مافاضين ، شوفي زول تاني يمشي ليك نحن عندنا مشوار !
عايدة شمار : مافاضين انتوا دكاترة ؟ امشوا تمشي بطنكم ، مشواركم مش الكوشة ولا حتة تانية !! طيروا من قدامي يا وهم .
كداس : ياحجة نحن عندنا قنص .. سمك شنو وصارقيل شنو ؟ فكينا ياخ !!
عايدة شمار : حجة تحج لي تل ابيب ياود الحرام !! انا قدر امك المفنوسة ديك!!
... خلاص هاكم ال 500 دي واشتروا بيها تسالي وقزقزوا تلقوا نفسكم في البيت !!
... المهم الاشرار سمعوا الكلام بعد الضحاكات وشالوا كيس السمك ( تنقش ،،، تنقش ) وهم في نص المشوار جاتم خاطرة شريرة ، وكل واحد عاين لي اخو ( في اللحظة ديك ابليس لملم اطرافو وقال انا دوري انتهي وكلو الا عايدة شمار دي !! و الاشرار ديل ما محتاجين لي ) .
الاشرار اتفقوا علي المكيدة ونكشوا شعرهم واقرب مزيرة بالموية في راسهم واطمبجوا بالطين ( تمويه وكدة ) .
لمن وصلت بيت الاشرار كررو دفرت الباب ونادت ام الاشرار ،،، التومة ،، يا التومة !!
عايدة شمار : اولادك عملوا كيت وكيت !!
انت ما سالتيهم جابوا السمك ده من وين ؟؟
التومة : ما صادو من البحر يعني من وين جابو من الغابة !!
عايدة شمار : بحر ابليس ، ان شاء الله ياكلك الحوت ياعفنة ، ياام العفنين .
... ناس الحلة اتلموا بالجوطة ،،، وجابو الشفع الاشرار قالوا سمك عايدة شمار اكلوا منهم كلب الغفير بتاع المدرسة السعران ، وسمكنا ده صدناو من البحر !!
وبعدين هي زاتا سمكا كان نص كيلو بس !!
وكان ما مصدقانا امشي شوفي كلب الغفير تلقيو عمل ليو جضيمات !!
عايدة شمار لمن خلاااص قنعت من سمكا ، و السكري طلع ليها في راسا وخشمها بقي ملح ملح !!
قالت : طيب خلاص يااولاد الكلب ما فضلتوا ولا راس ، ادوني ليو اعملوا شوربة ولا صينية سمك !!
الله يقطع راسكم زي ما قطعتوا راسي !!
همسة : تم نقل السيدة / عايدة شمار الي الحوادث بمستشفي بحري وهي تعاني من صدمة سكري حادة وتبرطم براها : ( سمك ، سمك !! عين سمكة في رجلينكم يا مطاليق ) .
... شوهد ( حليتي ) في واحدة من اعماله الشريرة وهو يشتري علبة ساردين ويضعها بجوار سرير عايدة شمار عوضا عن السمك البلطي ،، ولسان حالو ( كعب العدم يا عيودة ) !!
مغامرات في الاجازة:-
الحاج حمد
هناك شلة من اولاد الشعبية كانوا (شفاتة) بالجد و عندهم مغامرات غريبة و أيام الاجازات يصحوا الصباح بدري و يشيلوا معاهم الجبادة و النبلة و يتجهوا غربا و طبعا اول حاجة يشقوا ليك العمارات التي تقع غرب حلتنا و يمروا ليك على (كوشة الألجات) أول حاجة لانو عندهم نظرية كوشة الالجات دي من الصباح بيكون فيها حاجات تمام و بعد عملية مسح للكوشة يواصلوا الاتجاه غربا و يشقوا المزارع و يصطادوا كم طيرة او قمرية و أضعف الايمان كم ود أبرق و ماشين لازم يمروا ليك على التمر أبونا و المسكيت يلقطوا ليك شوية من النوع الطازج و هم ماشين غربا يكونوا شغالين قزقزة بالتمر هندي الى أن ينتهي بهم المطاف في البحر و هناك طبعا يقوموا يعملوا شية للطيور التي تم اصطيادها و بعدها سباحة و يتجدعوا ليك على الرملة دي تقول الاولاد مصطافين في الاسكندرية و خلال هذه الفترة طبعا ونسة و بصوت عالي واحد في القيفة يتونس مع واحد في نص البحر و خلال هذه الفترة تلقى كم واحد شغال في الجبادة و واحد يفتش في الصارقيل و تسمع واحد يكورك : أمك و الله لقيت ليك صارقيلة دبيب بس! و تستمر مغامرتهم حتى قبل المغيب بقليل : يلا يا جماعة هووي الشمس غابت.. دقيقة بس غطسة غطستين و نمشي...أمك و الله محمود قبض ليهو سمكة كبيييييرة و كلهم يجروا على ناحية محمود و ينظروا للسمكة و محمود يمسك بالسنارة و لانو معجب بنصره المبين ما عاوز يطلع السمكة لازم يشوفه و هي بتنطط قدامو و هو ينظر للباقين نظرة المنتصر ..اليوم يومه فقد قبض أكبر سمكة من الصباح..و بعد داك ياخدوا ليهم غطسة نهائية لنظافة آثار البحر و اللعب و المغامرة ، و يجمعوا الأشياء التي تخصهم و تبدأ رحلة العودة الى الشرق Flat foot is going to East و رحلة العودة تتضمن كثير من المغامرات..احيانا و هم ماشين يظهر كلب من وسط المزارع و تسمع الليلة جاااااكم و يبدأ الجري و احيانا يكاد الكلب يلامس اطراف ملابس أحدهم و تسمع الباقين و هم جارين يضحكوا عليه الليييييييييلة يازول اديها نمرة 4 و يرتاحوا بعد ان يشعر الكلب أنه تجاوز حدوده الدولية و يرجع خائبا..اصلوا الجماعة جرايين..و هكذا الى ان يصلوا الحلة و قبل أن يدخل كل واحد لمنزله لابد من المرور على الجماعة (التعبانين) القاعدين جنب العمود عشان يحكوا ليهم مغامرات اليوم منو القبض أكبر سمكة و منو القرب كلب الخواجات يعضيهو و منو القرب يغرق و لحقناهو في الغطسة التانية..و منو اللقا ليهو منبه شغااال في كوشة الالجات..مغامرات
|
|
 
|
|
|
|
|
| العنوان |
الكاتب |
Date |
| مسودة كتاب الشعبية الباب الثامن: أدبيـــات | أمير قناوي | 12-25-09, 08:41 PM |
| Re: مسودة كتاب الشعبية الباب الثامن: أدبيـــات | أمير قناوي | 12-26-09, 09:46 PM |
| Re: مسودة كتاب الشعبية الباب الثامن: أدبيـــات | أمير قناوي | 12-26-09, 09:49 PM |
| Re: مسودة كتاب الشعبية الباب الثامن: أدبيـــات | أمير قناوي | 12-27-09, 10:07 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 06:51 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 08:07 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 09:25 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 12:42 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 03:29 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-30-09, 04:26 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-30-09, 08:37 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-31-09, 12:02 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-31-09, 12:21 PM |
| Re: مسودة كتاب الشعبية الباب الثامن: أدبيـــات | أمير قناوي | 01-01-10, 09:54 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-04-10, 06:33 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-04-10, 07:33 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-06-10, 12:20 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-06-10, 09:51 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-10-10, 06:54 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-11-10, 09:16 PM |
|
| |
فيس بوك
تويتر
انستقرام
يوتيوب
بنتيريست