|
|
 Re: عبد العزيز الفاضلابى وعلى محمد الحسن أعضاء رابطة نيويورك يهددوننا ويحاولون الإعتداء علينا!! (Re: الصادق الزين)
|
محمد سليمان ,, لك التحية مرة اخرى.
نوضح وجهة نظرنا فيما عنيتنا به كمايلى:
Quote: هل تدري يا الفاضلابي أن منصب السفير هو منصب سياسي في المقام الاول ؟
هل تدري أن السفير هو ممثل حكومته رسميا ؟ |
OK يامحمد ماقلنا حاجة ,, بس ياخى السفير ده ووظائفه السياسية دى بتتبعوا فى اماكن تانية ما فى رابطة الجن دى ,, يعنى الحكومة مابعثته ليمثلها امام الرابطة السودانية الأمريكية ولاهو قرأ ستاشر سنة عشان يشتغل
ممثل لحكومة السودان فى الرابطة الأمريكية ,, وانا ده شخصيا ماشفت لى سفير جانا وقال لينا عاوزكم تعملوا معانا او تتعاونوا معانا او تقيفوا مع قضية حقتنا ,, ومش سفير وبس انا القدامك ده مافى اى زول من السفارة
طلب منى اقوم بواحدة من الأشياء الـلى ذكرتها ليك دى ولافى يوم مشيت السفارة وعرضت عليهم انى اشتغل معاهم ولا اعرف اى زول فى اللجنة التنفيذية قام بعمل كهذا واى مناسبة حضرتها وكان فيها ناس من السفارة
ماطلبوا مننا ولاناقشونا فى شئ سياسي ,, وانا ده شخصيا ماحصل مشيت السفارة دى الا عشان اطلع ياشهادة ميلاد ياتوكيل و مرة لما كانوا بوزعوا فى الأراضى وكانت امة محمد دى كلها فى السفارة ,, بل أكثر من ذلك انا قاعد فى البلد دى لى حوالى عشرين سنة ماحصل يوم واحد لاقيت جبهجى ساكت ,,
ولازول واحد بعرف إنه مؤتمر وطنى عديل كده ,, كل الناس البعرفهم انا بشتموا فى الحكومة ,, وإذا فى ناس من النوع ده قطعا ليس منهم من هو عضو فى اللجنة التنفيذية .. الشئ اللى انا فاهمو عن الرابطة دى اننا انشأناها
لتحقيق اهداف معينة تتلخص فى ترابـط اعضاءها وقيامهم بنشاط ثقافى , رياضى اجتماعى ومحاولة ربط اطفالهم بلغتهم الأم ,, وفى نظامها الأساسى نص يسمح للسودانيين الذين يتحدثون لغة سودانية غير العربية تدريس ابناءهم تلك اللغة مستفيدين من دار الجالية على قدم المساواة مع الآخرين.
والسفارة دى مافى يوم واحد ادتنا قروش مقابل شئ ,, ولو طلبوا مقابل ,, بنقول ليهم امسكوا قروشكم عليكم وده رأى كل الأعضاء دون استثناء ,, واهو ده اخونا معتصم معاك فى البورد ده اسأله ان كان يعرف واقعة واحدة السفارة ادتنا فيها قروش وطالبتنا بمقابل ,, ياخى نحن لو السفارة بتدينا قروش مابنقعد نلقط ايجار الدار ومصاريف المدرسة كل شهر من اعضاء اللجنة التنفيذية وبعضه هبات من الذين زادهم الله بسطة فى المال من السودانين جزاهم الله خيرا ,, وكل ذلك يتم بسبب تنفير الأعضاء من الرابطة
بتلك الرسائل السالبة وإشاعة ان اعضاء اللجنة التنفيذية مؤتمر وطنى .
نحن لو كنا مؤتمر وطنى كان خمشنا لينا خمشة كبيرة ولكانت لنا دارا ارحب من دارنا المتواضعة والتى هى عبارة عن شقة بغرفة وصالة نستعملها مدرسة ومكان إجتماعات. وبعد ده كلو عشمانين انو الناس تترك الخلافات جانبا وتضع يدها فى يد بعض للنهوض بالرابطة حتى تقوم بعملها المنوط بها ,,
أها نرجع لحكاية السفير دى تانى ,, السفير ده لما ندعوه ماداعينو لشخصه
كسفير داعينو باعتباره سودانى وعندنا عضة عازينو يجى يعضى معانا ,, ولو كنادايرينو لسياسة كان ناديناهو براهو والناس السياسين معاه ,, لكن نحن دعينا كل طاقم السفارة بمن فيهم المحاسبين وناس الإستقبال وديل ماعندهم شغلة بالسياسة ,, ودعيناهم يجوا يعضوا ويدعو لينا ويمشوا ,, والسفير ده زول جديد اها قال داير يقدم نفسو للناس ,, اها الناس المعارضة للكلام ده كان تنتظر كان قال ليهم كلاما ماعجبهم عندهم الحق يردوا ليهو ,, ويقولوا الدايرنو وكان فى زول منعهم تجوا تلومونا,,
وولاد دارفور الـلى طرشتوهم الفطور الفطروه معانا ده ماجوا عشان السفير الناس ديل جو عشان يشاركوا اخوانهم من باقى انحاء السودان يوم من ايام رمضان يلمنا فى الغربة دى وتتصافى نفوسنا ,, يقوم اسامة خلف الله نحن نقول ياهادى وفرحانين بى لمتنا على اختلاف مشاربنا يحاول يفرتكنا ,, ماقدرنا نبلعها. ولاد دارفور لقوا السفير قاعد او جاء بعدهم ,, يقوموا يتخارجوا ,, دى ماكانت حاتكون سمحة فى حقهم ,, والحمد لله طلعوا ناس مامتطرفين فى اراءهم وقعدوا الى النهاية مع اخوانهم ,, وإن شاء الله يتلموا معانا فى مقبل المناسبات والسودان ينعم بالسلام وارواح واعراض امهاتنا واخواتنا فى كل ربوع السودان محفوظة.
| Quote: هل تدري أن بين طاقم السفارة ضباط أمن مهمتهم جمع معلومات عن السودانيين في هذه الجاليات و رفعها في تقارير منتظمة و بموافقة و توصيا ت السفير؟؟ |
خليهم يجمعوا ويطرحوا زى ماهم دايرين ,, اكان لى اسامة خلف الله ده ما اظنو خفى عليهم ورحمة مالى السودان بركة اما الباقين مغتيين ورقهم وراجين الخمسين.
| Quote: أنتم جرثومة في مجتمعات السودانيين في دول المهجر .... تسهلون إختراق الحكومة لمجتمعات السودانيين بالخارج .... |
الحتة دى اتكلمت فيها فى المداخلة السابقة ,, واحب أؤكد ليك انو تجمعاتنا دى على قلتهالاعبة بخطة 6-2-2
| Quote: الأدهي و الأمر تدافع عن منح السفير فرصة الحديث لهذا المجتمع السوداني بحجة " حرية التعبير و حرية الرأي" ... هل حكومة السفير توفر بالمثل حرية التعبير و حرية الرأي بالسودان ؟؟!! |
خطأ الآخرين لايبرر لى ان أكون مثلهم.
..
| Quote: يا الفاضلابي ... أكتب أكثر ... حتي يراك السودانيين بالخارج .... |
ليرانى الناس كما يرونى ,, فأنا عندما أكتب لا اتعصب لرأى ورأيي عندى صواب يحتمل الخطأ ورأى غيرى خطأ يحتمل الصواب ,, وانا هنا ليس فى معركة مع احد لاحسمها لصالحى انما انا هنا فى حالة تبادل افكار لأستفيد وافيد ان استطعت. ولذلك ترانى هنا لا اميل الى الجهل على الآخرين الا عندما يتعدون حدودهم كما ترى فقد استثنيتك لأننى لم اعهدك جاهلا على احد فى هذا المنبر .
المهم عندى ان تكون لغة الحوار خالية من الجراثيم حتى نعيش جوا صحيا فى هذا المنبر.
إحترامى للجميع
|
|
 
|
|
|
|
عبدالعزيز الفاضلابى
فيس بوك
تويتر
انستقرام
يوتيوب
بنتيريست