إلى من يهمه الأمر...

Quote: أنا شخصِيًا بِتهِمني جِدًا حِكاية < ضِمْنِيًا > و< إعْطاء الإنْطِباع > ديل ، لأن البِكْتِب كلام ويِعْمِل رايِح مِن ذِكر المصدر أو يِقوم يِتْحرفن ويِسحب ليك كام كِلمة أو يِجدع ليك كام كِلمة كِده في معرض حديثو وكأن الأمر غَير ذي بال ، ده بِسْتغفلك وبِسْتحمرك وبِستقردك (مِن القِرد) أها نوع الإسْتِحمار البِمارسو السارِق فوقي ده ما بقدر أمرِرو ، وفي نوع سرِقات تاني أكتر حرفنه (والله لامِن يِكَيِفك) ... طَيِب ... النوع ده بعمل شنو؟ النوع ده يا سيدي الآمنت ليك بِِِقوم يِشرب ليك فِكرةٍ ما ويِعيد تدويرا مِن عِندِياتو ، وده في الغالب بِكون عِندو ملكات أدبِية عالية ، بس شاف النص العاد تدويرو بِسْتاهلو هو وخسارة ما يِكون حقو وكتيرة -حسب ظنو- إن النص ده يِكون حق فُلان الفُلاني ... وده برضو إسْتِحمار ... وفي الحقيقة الحِمار بِكون العاوِز يِسْتحمِر البشر ... ليه؟ لأنو مِن الغباوة الفوقو ، إنو ما بِتْوقع إنو في زول قرأ النص السارقو وفِهمو (بِالله ركِز لي على فِهْمو دي) لأن إعادة تدوير النص المسروق بِكون بِكلِمات تانِية وبِكبِر ليك فوقا اللفه يعني علشان يِوصل < سعد قِشرة > وهو ساكِن < أشلاق المزاد > بِقوم يِجُكْ بيك بِـ<المصانِع> فـ<كوبر> وبعدين <المحطة الوسطى بحري< وبعدين يِشق <سوق الخضار> وفجعه كِده تلقاهو في وسط <سعد قِشرة> مُتْصَوِر ، علشان كِده قُلت ليك (بِالله ركِز لي على فِهْمو دي) لأنك في النِهاية عارِف إنو زولك دايِر يِصل <سعد قِشرة> علشان كِده ما بِتْجُك معاهو ، لا لا ، بِترجاهو في <سعد قِشرة> بِكامِل هِنْدامك ، وهو يا حليلو بِصلك نفسو مقطوع ، وبِسْتعجب إنو لِقاك مُنْتظِرو في <سعد قِشرة> وما جكيت معاهو (مُش قلت ليك الزول غبي) هيا الجاكي يا الساكي يا الداكي يا الفاكي ، هُناك مَن يقرأ وبِهِ جُرأة وجسارة أن يقول لك قِف أنت مُعْتدي. أما النوع البِنقُل النص بِضُبانتو ويَوحي أو يِدي الإنْطِباع إنو النص حقو ، مِتِل ده بعلِق ليهو مشنقه في الإسْفير ومِحل يِقبِل بتْسلط عليهو ، لأنو مُش ما إحْترمني بس ، ده ما شايِفني مِن أصلو! وبرضو في نُقطة تانِية ، الزول البِيسرِق نص بِضُبانتو أو بِلفه كبيرة (التضمين/إعطاء الإنْطِباع) بِعْتمِد برضو في تمرير سِرقتو على حاجة تانِية ... بِعْتمِد على إنو إسمو في المُحيط البِلعب فوقو ، كبير ، وده هو بِفْتكِر إنو بديهو حاجتين : (1) المَوثوقِية (يعني مُناصِري أفكارِهِ وأحباب وزُملاء الدِراسة ومعْجبي كِتاباتو ، كُتار ، لِدرجة إنهم إتدروشو عدييييل بِنُصوصو) (2) حصانة إعْتقدها السارِق في رقبتو ، حصانه بِفْتكِر إنو إكْتسبها بِأقدِميتو أو مِن دِراستو أو مِن سلاطه لِسانو ... الحصانة دي هو بِفْتكِر بِتحميه مِن تِبِحِتْ البشر عن أصاله النص. وكِده