|
|
 Re: اتحاد الصحافيين يستضيف بدر الدين السيمت ف (Re: Yasir Elsharif)
|
في هذه المداخلة أحب أن أحول ما جاء في شريحة فيديو الجلسة التي تقدم فيها الأخ بدر الدين السيمت بأسئلته إلى نص مكتوب لسهولة الرجوع إليه والاقتباس منه لمن يريد، كما أن هناك من قد لا يتبينوا الكلمات الصوتية لأي سبب من الأسباب. وسأعود بالتعليق فيما بعد:
ـــــــــــــ
سؤال 1و2 بدر الدين السيمت في الجلسة التي تعود إلى 1969 أو بداية السبعينات من الشريحة بعاليه:
المعروف عن المسيح، أنه أخلص الحواريين ليهو لمَّن جات ساعة محاكمته أنكروه.. فهل الإنكار دا برجع إلى أنه أصلاً الحواريين ما كانوا مؤمنين بيهو.. ودا أنا بستبعدو، لأنو إيمان الحواريين مؤكد في القرآن يعني، ( وإذ أوحيت إلى الحواريين أن آمنوا بي وبرسولي)، ولاَّ برجع إلى أنه تصرفات المسيح في الليلة ذاتها ال قبل المحاكمة، كانت شككت الحواريين في المسيح، منها أنه كان نعى ليهم نفسه.. فـ بعدين واحد من الحواريين قال، يعني قال: ما هذا الذي يقوله؟ هو قال أنه المسيح قال (ما جئت لأنقض الناموس إنما جئت لأكمل الناموس) فـ بعدين هم طبعاً كيهود بيفهموا أنه في التوراة، أنه المسيح إبن الإنسان سيظل إلى الأبد، فـ دي يعني أدتهم شك شوية!! .. بعدين تاني المسيح قال لمن سألوه الرهبان بتاعين.. أقصد الجماعة بتاعين اليهود.. قالوا ليهم عن الضرائب وكدا (مَا لِلّهِ لِلّهِ وَمَا لِقَيْصَرَ لِقَيْصَرَ) ديل برضو عندهم في التوراة أنو مَا لِقَيْصَر مَا لِقَيْصَر، أنو مفروض تكون في شريعة موسى.. فهل الأعمال دي خلتهم يشكوا في المسيح وكدا؟ دا سؤال.. بعدين السؤال الثاني: هل المسيح ما ولد من أب، دا برجع إلى أنها إعجاز، ولاَّ في حكمة مثلاً من المسألة دي، ولا الحكمة بس مجرد إعجاز؟
إجابة الأستاذ:
هو بطبيعة الحال المريدين والسالكين دائماً معرضين للشك! دي بتحصل، لكن ما أفتكر أنه، يعني ـ هو بطرس بصورة خاصة الأنكر المسيح في الموقف الحرج داك ـ ، والسبب بيكون، أنه في ساعة الحرج، وفي ساعة الضيق، الإيمان ما بستقر بيرفع، ليكون الإنسان في ساعة الضيق مالي مركزه، عايز أكثر من مجرد الإيمان، عايز اليقين.. ولو تذَّكروا في، أظنها، في وقعة هوازن، في وقعة هوازن الأصحاب كلهم جَروا، إلا النبي وأبو بكر وعمر وعلي والعباس. حتى عثمان جرى، بعدين نزل القرآن"إِنَّ الَّذِينَ تَوَلَّوْا مِنكُمْ يَوْمَ الْتَقَى الْجَمْعَانِ إِنَّمَا اسْتَزَلَّهُمُ الشَّيْطَانُ بِبَعْضِ مَا كَسَبُوا". أها هنا كأنو الخوف العنصري هو المترسب في قلوبنا، ما بيرفع إلا بعلم اليقين، الإيمان بغطي عليه، بعدين عند النكبة برتفع هو ويُرفع الإيمان. فيبقى الإنسان يتصرف بدوافع الخوف الغريزي القبيل. الحاجة اللي خلت بطرس، وهو أكبر الحواريين، ينكر المسيح أنو ما بلغ اليقين بالمسألة دي، بعدين ظل ندمان عليها طول وقته لغاية ما هو صُلب، زي ما صُلب المسيح، فطلب من الناس اللي صلبوه، أنه ما يصلبوه زي ما صلبو سيدو .. يصلبوه منكس.. المسيح صلبوه كدا ، هو طلب يصلبوه منكس رأسه لي تحت، وكان باستمرار يشعر بمرارة إنكاره للمسيح، وندمه عليها، زي ما كان عثمان يشعر بندمه على أنه فَرَّ في اليوم داك. فالمسألة هي بقى مسألة أنه لنكون نحن ثابتين، عند ساعة النكبة في ساعة الصفر، في الضيق، عايزين نكون فعلاً الأنوار مالية قلوبنا، والخوف خرج منها. ودي ما حصلت ليهم هم. على أنه مسألة الشك الخفيف في الدعوة بتحصل عند المريدين دائماً، دائماً بيحصل شئ، لكنه موش دا هو السبب!! بعدين نجي لسؤالك الثاني، اللي هو: كونه المسيح وُلد بدون أب، يعني ربنا أراد أن يجعله آية للناس، فهي إعجاز.
سؤال 3 من بتول مختار
في إنكار بطرس للمسيح، أنا سمعت من واحدة من المسيحيات أنه كان متفق عليه بيناتهم، أنه ينكره في اللحظة ديك، فهل دا وجه يمكن أن يكون محتمل.
إجابة الأستاذ:
بتول قالت أنها سمعت من واحدة من المسيحيات أنه في إتفاق بيناتهم أنه ينكره في اللحظة ديك. فـ دا ما صحيح.. ما صحيح. بل الحقيقة أنه المسيح قال ليه، بطرس يعني زي اللي كان عايز يفدِّي المسيح ببطولة ظاهرة، قال ليه إنت قبل ما يصيح الديك تنكرني مرتين، بعدين أنكره، وأنكره المرة التانية، حتى إتذكر كلام المسيح فندم. مافي إتفاق.
سؤال العم فضل:
زي سيدنا آدم جاء بلا أب وبلا أم، والمسيح جاء، عيسى، جاء من أم بلا أب. والاثنين كان الإعجاز فيهم [.....] فهل محمد الأخير، أو المسيح الأخير يكمل الدورة يجيء من أب وأم وأن يكون معجزته في حاجة تانية؟
إجابة الأستاذ:
هو ، على أي حال انحن نقدر نقول أنو مثلاً المسيح، ا، ما رفع روح وجسد ..وكونو القرآن نفى انهم صلبوهو او قتلوهو، موش معناهو ما مات.. مات.. المسيح مات ورفع روح.. بعدين بينزل روح.. وهو الوقت البجي فيهو المسيح هو في الحقيقة بعث الأرواح كلها.. موش المسيح وحدو البيبعث .. كل الأنبياء والأولياء والصالحين بيبعثوا لتملأ الأرض عدلاً كما ملئت جور.. ويبعثوا: بتجي أرواحهم في أجساد ماشة في الأرض هسع ( يُلْقِي الرُّوحَ مِنْ أَمْرِهِ عَلَى مَن يَشَاء مِنْ عِبَادِهِ لِيُنذِرَ يَوْمَ التَّلَاقِ ) .. ا من يشاء من عباده ، دا، فيهم الدرجات المختلفة: في ناس على قدم النبي وفي ناس على قدم موسى وفي ناس على قدم عيسى وفي ناس على .. بالصور دي.. المسيح الأخير بكون من أم وأب، في الأرض وبتكون معجزته في ناحية تانية، في كمالاتو- كمالات عقله وجسده.. كمالات خلقه.. كمالات مقدرته وقوته، علمه وإرادته وقدرته وحياته، هي البتكون المعجزة.
|
|
  
|
|
|
|
|
| العنوان |
الكاتب |
Date |
| اتحاد الصحافيين يستضيف بدر الدين السيمت في ندوة عن الأزمة السودانية | اعلانات سودانيزاونلاين | 06-25-18, 05:25 PM |
| Re: اتحاد الصحافيين يستضيف بدر الدين السيمت ف | Kostawi | 06-25-18, 07:15 PM |
 Re: اتحاد الصحافيين يستضيف بدر الدين السيمت ف | Yasir Elsharif | 06-27-18, 10:22 AM |
| Re: اتحاد الصحافيين يستضيف بدر الدين السيمت ف | Yasir Elsharif | 06-27-18, 10:51 AM |
| Re: اتحاد الصحافيين يستضيف بدر الدين السيمت ف | Yasir Elsharif | 06-27-18, 02:53 PM |
| Re: اتحاد الصحافيين يستضيف بدر الدين السيمت ف | Yasir Elsharif | 06-27-18, 05:32 PM |
| Re: اتحاد الصحافيين يستضيف بدر الدين السيمت ف | Yasir Elsharif | 06-27-18, 06:31 PM |
| Re: اتحاد الصحافيين يستضيف بدر الدين السيمت ف | Yasir Elsharif | 06-16-20, 12:51 PM |
| Re: اتحاد الصحافيين يستضيف بدر الدين السيمت ف | Yasir Elsharif | 06-22-20, 06:34 PM |
| Re: اتحاد الصحافيين يستضيف بدر الدين السيمت ف | Yasir Elsharif | 06-22-20, 11:17 PM |
| Re: اتحاد الصحافيين يستضيف بدر الدين السيمت ف | Yasir Elsharif | 06-22-20, 11:18 PM |
|
تعليقات قراء سودانيزاونلاين دوت كم على هذا الموضوع:
at FaceBook
| |
Yasir Elsharif
فيس بوك
تويتر
انستقرام
يوتيوب
بنتيريست