ناس الزقازيق .. أجدع ناس .

Quote: الأخوان الأعزاء الزقازيقيين وضيوفنا من غير الزقازيقيين : بعض الناس من خلال عملهم أو هواياتهم لهم حكايات ممتعة ( يعني حكواتية ذي ما بقول جمال فارح ) ومصدر تلك الحكايات في الغالب الاحتكاك الكثير بالناس ومعرفة عدد كبير منهم ومثال لهولاء الحلاقين طبعاً أول حاجة بعدين الدبلوماسيين وبعدين المغنواتية ( على قول جمال فارح برضو ) . خليني أحكي ليكم بعض الأشياء الحلوة وأذكركم بحاجات حلوة ، أول حاجة عجبتني جداً طريقة الطيب صالح عن صديقه منسي ، رأيكم شنو أحكي ليكم عن أصحاب مشتركين بيني وبينكم على طريقة منسي ؟؟ أيه رأيكم أحكي ليكم عن عماد شريف ؟؟ عماد شريف ما قرأ في الزقايق لكن صرته دفنوها في الزقايق وانا شفت الدفنها !!! عماد شريف درس تربية في جامعة قناة السويس بالاسماعيلية ، عماد شريف للماعارفين هو وين الان ، عماد الان في مدينة ابها بالسعودية متزوج بنت خالتو وعندو بنية واحدة ربنا يخليها ليهو وخلا الموسيقى تماماً وطلقها بالثلاثة . أول مرة شفت عماد شريف كان في بروفة حفلة برالمة الاتحاد العام بالقاهرة كانت البروفة شغالة في دار الاتحاد في 16 شارع المقريزي منشية البكري . وانا جيت من الزقازيق وغشيت محمد جمال الدين في شقتو جنب الدار وإتأخرت بعدين جيت لقيت عماد خلال بعاين للساعة عشان السفر للاسماعيلية وقلت ليهو لازم ( أبرف ) وإتشاكلنا ، وبعدين إتصاحبنا صحبة عجيبة غير الكان الناس شايفنها على المسارح . جمعت أرواحنا حاجة جميلة جداً وكنا نعبر عن الاشياء بنفس واحد وبلغة واحدة . عماد شريف ود ظريف جا لمصر من عروس الرمال مدينة الابيض ومن خلاله عرفت تقريباً جميع ابناء الابيض في مصر وتربطني بأغلبهم صداقات حتى الان . ود مجنون بالمزيكا مشحون بكمية موهبة غير طبيعية، خالد الفحيل أشهر من عزف على الاورج في السودان خالو ، عماد شريف لمن كان صغير كان العازفين بتاعين عبد الرحمن عبد الله ينطوا جوا بيتهم بالليل ويشيلوهو وكان لسه ولد في الابتدائي والمتوسط ويختوهو فوق الحيطة واللي في الشارع ينزلوهو عشان يمشي يعزف لبعد الرحمن عبد الله ومسكين كان يقعد الحفلة كلها ما يشوف حاجة لانو الاكورديون اكبر منه ويفضل طول الحفة مصنقع ، على فكرة عماد اصلآ بيعزف على الاكورديون وانا شفتو مرة واحدة بيعزف عليهو وكانت حفلة مميزة جداً جداً على تاريخ الحركة الطلابية في مصر . المكان : كلية الهندسة – جامعة المنصورة . المناسبة : سقوط الكيزان بعد الانتفاضة في السودان . الحفل : يوسف الموصلي – منليك – شخصي الضعيف . كان يومها مع موصلي عازفين محترفين جو يسجلوا شريط في القاهرة ولمن جيت اغني بس إستأذنا عازف الاكورديون عشان عماد يعزف بدلو ويومها سمعت موسيقي ضنين الوعد تعزف خلفي شكيت ان هذه الموسيقي تعزف لي لاغني بعدها . وللحديث بقية .........