ناس الزقازيق .. أجدع ناس .

Quote: أمونة بت حمد يوم ميلاده كان عرسا" كبير ... هيصة وضبايح ما ليها حد ويوم السماية اتيتمت ... حكم القدر فى الام نفد جرت السنين واتفاوتن ... عن ناسا" ما ليهم عدد آمونة كبرت واستوت ... فار الصدير شال النهد وبقت امل كل الشباب ... وجمالا فى بت ما اتوجد كانت شبيهه امها ... فى القدلة والعود الامد ويوم فى غفلة رفه قليبا ... يوم حبت قريب لفريق حمد وكمان اظن حباها هو ... وسوي الضلوع لحبو سد خايفين عيون الناس تشوفم ... والخبر يملا البلد والحب هناك عيبا" كبير ... لا بت بتبوحبو ولا ولد سنتين تلاتة مضن كمان ... والبت حياته بقت نكد وبرضو الولد ذي حالتا ... وقليبو دام مكتول كمد كاتمين غرامن فى القلوب ... ولع لهيبو وما برد خايفين يصارحو يقولو شئ ... ما يلقو للدايرنو رد ويوم ابوها ضحك كتير ... برم شواربو بلا الاسد ناداها آآآآمني تعالي جاي ... وفوق البرش ربع قعد قالتلو آآآآي جاياك خلاس ... وقليبا فـر وما رقد هابت عيونو قبال يقول ... شافت وشيهو عليهو جد حاج الخدر عارفاهو داك ؟؟ قالتلو آآآي ابو سند جانى الصباح طالب يديك ... داير نسب شيخ البلد وانا قلتلو مرحب بيك ... تعال يومين تلاتة تكون عقد راجل عظيم عندو القروش عندو الحرير راقد لبد وكمان كريم واخو رجال ماعونو فت يوم ما برد جرت الدموع من عينيها شوووو ... سكتت آبت تديهو رد خلاها قام زعلان لا سوا ولا كايس غرد وعند المغيرب تانى جاها ولمحاسن الحاج سرد داير يأسر فى قليبا ... والكان تقول تديهو رد وكتين غلب واحتار خلاس ... فسر سكوت البت رضا جاب زولو لـم الناس عقد المال مخمخم والحرير تحت الرجول مدوهو مد دق الدليب صحا العيون ... ما خلا فت مخلوق غمد وبقى البكان انوار تلوح ... نور الرتاين ما همد يوم الصفاح والناس تجوط ... وبالفرحة مقلوب البلد آمونة تبكى بكى السواد ... بدل الفرح جاها النكد وبـشــيـش قامت للمروق ... منسرقة ما حسابها حد كان الحبيب راقد حزين ... كم جــر للمسدار جبد وقفت قبالو بكت كتير ... لمن دميع العين جمد وقام جاها بشوقو الكتير ... وقليبو من حبها اتفرد قالتلو : ما بي يدى شئ ... ديل ناس ابويا وآبو سند اتلمو سوهو الكلام ... وانا لا رديت لا جبت رد داك عندو مالا" مو قليل ... ابويا شاف المال سجد ادانى للراجل العجوز المن عروقو الدم شرد قايلنى بسعد بالقروش ... ولا المراح الفات ورد لكن محال اسعد بلاك ... وتانى السماء الاتهــد هــد بديك قلبى وروحى ديل ... وهناك اعيش صورة وجسد اتراجعت دارت تصد ... وجيها تانى رجع رقد ومسكت دريبا" مو غريب ... كم بيهو صف بنوت ورد قاصدة البحر دارت تموت ... لا عيشة لا هم لا نكد اترددت وقفت كتير ... لمن قليبا خلاس صمد شافت مسار النيل حزين ... حتى النخيل حزنان خمد وبـشـيـش فكفكت الحرير ... لا زينة لا ربيط عقد ما دام حياتها بقت دموع ... وقليبا من زولو اتفرد قالت اخير ارتاح خلاس ... ارسى شقايا يلقالو حد وفى لحظة موج النيل علا ... وفى جوفو غابت للابد وفى جوفو غابت للابد .