|
|
 تبقى آخر كلمة بينا..
|
بعد ماخلاس رجع قلبك من الأوهام؟؟
لوبرجع وأعاود ليك رجوع حيزوّد الآلام
وأنده تاني للاشواق..وأستناك؟؟
كيف ترجع تنادي الزول..بعد روّحتو ماهمّاك..
وكيف بتطيّب الخاطر ، بعد ضوّقتو مرّة قساك،
لو قال ليك ماأحلاك ، شفتك انت أحلى ملاك
لو حنانو شويّة جاك ، انت شلت الروح معاكَ
لو شايلو قلبك في علاك ياربي بس تفضل هناك
ويبقى يتواصل غُناك
انو واحد في سماك وانو لي بردك غُتاك
وماتمل الريد هناك ، وماتخليو بي وراك
أصلو عارف الفي قليبك ، مصيرو يتبدّل هواكَ
وان شاءالله تلقى الدايرو انت ،
وانت يتحقق مرادك
الريدة ياالبدّلت فيها أوفي للجايين ميعادك
خوفي تبقى الريدة عندك قصة مابتشغل حياتك
كل يوم يعشق قليبك ، انت تعشق فيها ذاتك
انت تهوى تكون لنفسك مابكون العشق زادك
واحنا نهوى نكون لغيرنا وغيرنا كان ياانت..
زاااتك
أمشي لي آخر طريقك ولسّه ازداد في عنادك
بس انت ماتبدّل عيونو زي عيون بدّلت ريدا
الغريبة تريد دروبو زي دروبنا الكان تريدا
والعجييبة تقول حروف لينا كم كنت بتعيدا
المشاعر الجاتنا منك ،جاتو زاتا وماغريبة
لو أخلصت في الريد عيونو برضو حتفارق تسيبا
ديمة حالك في تبدّل ديمة أحوالك عجيبة
مابفيد لو يبكي ريدتك ، عمرو ريدتك مابجيبا
انو قلبك مابيخلص ده البيحصل والحقيقة
مابدوم في ريدو زولاً فيهو أكتر من دقيقة
ومابتعرف غيرها روحك ، أحلى من أجمل عشيقة
وأبقى أعرف،
مامهم لو كنت جنبي،أو ألاقي معايّ بُعدك،
ومامهِم لو رِدتَ غيري،أو تضوق الدنيا شهدك
ماخلاس البينا روّح،وماعرفت الليلة قصدك
مش هويت ياريدي ريدو؟أيه يفيد لو قلتَ سببك
ماخلاس راحت مسافة كان تسوق في روحي دربك
ماخلاس راحت بسيمة كان بتمسح ديمة غضبك
بس.....
(هل لمستَ الليلة إيدو؟وهمستَ ليهو كتير بحبّك؟؟
هل نهلت الريد في قربو،هل سقيتو الليلة قربك؟
هل حضنتَ معاهو تعبو؟؟واستراح في حضنو..تعبك؟
هل قلتَ ليهو براك حبيبي،حضنت بي ايديهو قلبك؟
هل سماحتو كتيييرة دافقة؟هل جلس يوماتي جنبك؟)
الحقيقة..
رغم بعدك عنّي إنت، لسّه بشتاقك براكَ
ورغم سايق فيني ظلمك لسّه كايس لي رضاكَ
ورغم إنّك قاالوا مافي ، أنا كنتَ بتونّس معاكَ
وأنا كان بنادوني ال هنا..ألقاني جنبك بي هناكَ
مين بشيل منك صباحك وبرضو يشتاقك مساكَ
أنا خفتَ أتعوّد مجيكَ، أرجع أتعوّد أساكَ
البجرّب إعيش حنانك ، حرام تجرّعو مُر قساكَ
والبيعرف ريدك انتَ محال يكون في يوم نِساكَ
لكنّي جرّبتك قريب وانكويت بي هجرك انتَ
كأنّو مااتلاقت إيدينا، كأنّو ليّ ماكنتَ ردتَ
كأنو ماشفتَ المحبّة ولاحنانك برضو عشتَ
لمّا قلت الدنيا انت ، فجأة منّي رحلتَ فُتَّ
أبقى خليك في بعادك ،أنا بلتقيك في كل حتّة
وتبقى آخر كلمة بينا، ياريتني لو عنك بِعدتَ
وياريتني ليك الماسمعتَ
لاشفتَ
لافي يوم عرفتَ
ياريت هواك ماكان...... وكنتَ.
|
|
 
|
|
|
|
|
| العنوان |
الكاتب |
Date |
| تبقى آخر كلمة بينا.. | تماضر الخنساء حمزه | 10-25-08, 11:37 AM |
 Re: تبقى آخر كلمة بينا.. | ماجدة عوض خوجلى | 10-25-08, 12:00 PM |
| Re: تبقى آخر كلمة بينا.. | مجدي عبدالرحيم فضل | 10-25-08, 12:19 PM |
| Re: تبقى آخر كلمة بينا.. | تماضر الخنساء حمزه | 10-26-08, 10:11 AM |
| Re: تبقى آخر كلمة بينا.. | تماضر الخنساء حمزه | 10-26-08, 10:10 AM |
| Re: تبقى آخر كلمة بينا.. | محمد عثمان | 10-25-08, 12:51 PM |
| Re: تبقى آخر كلمة بينا.. | تماضر الخنساء حمزه | 10-26-08, 10:12 AM |
| Re: تبقى آخر كلمة بينا.. | انعام عبد الحفيظ | 10-25-08, 01:13 PM |
 Re: تبقى آخر كلمة بينا.. | عماد محمود علي | 10-25-08, 01:19 PM |
| Re: تبقى آخر كلمة بينا.. | تماضر الخنساء حمزه | 10-26-08, 10:16 AM |
 Re: تبقى آخر كلمة بينا.. | هاشم أحمد خلف الله | 10-25-08, 01:57 PM |
|
| |
فيس بوك
تويتر
انستقرام
يوتيوب
بنتيريست