لقراء وقارئات المنبر العام غير الأعضاء ...... معرفة رأيكم تهمنا

Quote: السلام عليكم الاستاذ حيدر والاستاذ ناذر حقيقة فكرة البوست عبقرية شديد والله احييكم عليها . كنت رسلت لناذر رسالة ونشرها مشكورا واتذكرت اضافات لمن رجعت للبوست ولقيت ود شيقوق معلق ومتداخل ود شيقوق والله قلمك سنييين وكتاااااااب وشيخ عرب جد جد خاصة لمن حكيت فى بوست طرائف التدريس عن رحلتك من البردانه للدندر وبالمناسبة انا ساكن الكلاكلة وجنبنا قريبك اسمو الضو وعندو اخو اسمو سليمان ولمن لقيت كلامك انو ناس البردانه اشداء وبشتغلو فى دق الطوب وكبر الفحم وكثير من الاعمال الشاقة مشيت للضو وسالتو وحكى لى عن آلية كبر الفحم وصعوبتها وخطورتها وعن خطورة انو الكمينه تهبر وعن ماساى اناس راحو ضحايا تلك الكمائن وبالمناسبة الضو دا زول مكافح جدا جدا والله وبالجد جنو دق طوب ومع انو ضعيف البنيه الا انه وكما ذكرت انت عن شباب البردانه انهم اقوياء وناس اشغال شاقه فهو بالجد ذو صبر وجلد وزول قلبو ابيض وظريف جدا ودايما بحكى لينا عن السمسم والكعوك الذى يشفط السمسم من الجو دون يلمسه وضحكنا شديد لمن قال انو هو شدة ما ضعيف الناس بيقولو ليهو انت شاربك كعوك؟ والكلام دا كلو جنب دكان خالد جارنا وخالد دا من ابناء دوبا وهى قرية شرق نهر الدندر وهو ايضا مع صغر سنه الا انه موسوعه فى التراث فقد استفدت منه كثيرا فى معرفة عينات المطر من طرفه ونتره وخيرصان وما الى ذلك المهم كتير بشيل اللابتوب جنب دكان خالد دا وبورى الضو صورتك وهو كل مره بقولى اهلنا ديل تانى ما نزلو صور؟ --------------- كان الجزء اعلاه عن ودشيقوق والبردانه اما ما اريد اضافته هو عن بوست طرائف التدريس للاستاذ القدير والمربى الفاضل محمد احمد الخضر فقد فقع مرارتنا من الضحك خاصة قصة خليل عاشه وقصة الاستاذ البقوهو فكى وبقو يجيبوا ليهو العيان فى الحلة كلو وحقيقة موضوع رائع من استاذ جليل سكب فيه كل تجاربه وخبراته عبر السنين فلك التحية يا استاذنا الجليل اكتب اليك هذه الروايه وبجوارى كتاب "حكايات كانتربري السودانية" الذى قمتم بترجمته وهو كتاب ممتع ويكفى انه من ترجمة استاذ كبير ومخضرم من امثالكم وهذا سبب كافى لاقتنائه . تانى بشكر الاخوان محمد ابو العزائم ابو الريش على جمال بوستاته وايضا الاستاذ محمد المرتضى حامد صاحب بوست" ناسنا" المميز جدا المهم والله هناك قامات سامقه فى سودانيزاونلاين تستحق المتابعة وان والله سودانيزاونلاين بالنسبة لى شىء اساسى وكل المواقع البدخلها بالعدد ولكن اهمها سودانيزاونلاين وحقيقة الزول بيلقى فيهو اى شىء عايزو وقبل ما انسى عايز اشكر الاخت سالى والاخ دكتور امبده على بوست الكتب وحقيقة كانت فكرة جهنميه وحقيقة انا استفدت منو شديد ومنو عرفت كتاب حواديت المشاوير بتاع خالد الخميسى فوالله نزلته وقربت اخلصو هسى مع انو القرايه من الكمبيوتر صعبة لكن الكتاب ممتع جدا فللاخت سالى والاخ دكتور امبده التحية ولكل من شارك معهم فى ذلك البوست المميز. فى الختام بس ياجماعة كان شفتو لينا تزكيه عن بكرى دا يدينا باسوورد تكونو ما قصرتو فوالله الواحد يتمنى يكون عندو اشتراك فى هذا النتدى المميز الذى يمثل وطن قائم بذاته ولكم التحية ولكل صاحب بوست مميز نسيناه نرجو منه المعذره لانو حقيقة المبدعين كتار والذاكرة خربانه لكم منا التحية وارجو المعذرة ان كان فى الجزء الاول من هذه الرسالة موضوع شخصى فانا لا املك ايميل للاخ ودشيقوق لمراسلته لذلك اضريت لمراسلته هنا واخيرا ارجو من اى واحد من كتاب سودانيزاونلاين يخت ايميلو فى البروفايل بتاعو عشان يسهل التواصل معاهو والسلام عليكم -- وما كنت حجاماً ولكن احلنى بمنزلة الحجام بعدي عن الاهل