لقراء وقارئات المنبر العام غير الأعضاء ...... معرفة رأيكم تهمنا

Quote: الاخ ناذر تحية طيبة معليش استحملينى شوية المؤامرة اعتقد انحنا كشعب من اكثر الشعوب فى الدنيا تمسكا واعتقادا فى نظرية المؤامرة وفى الاتجاه المعاكس من اكثر الشعوب بخلا فى البوح عما بدواخلنا (كسرة من عالم النفس الفيلسوف الذى لايشق له غبار فى سبر اغوار النفس البشرية الاهو انا :ومن ناحية فلسفية وسايكولوجية فان عدم البوح يؤدى الى تراكمات تجعل المعاناة النفسية فى اسؤاء حالات الانحراف النفسى عن المستوى العقلى والذى يؤدى بدوره الى اعتناق نظرية المؤامرة لتصبح هى ديدن حياة الافراد)) منقول من كتاب الاستاذ انا باب نظرية المؤامرة صفحة صفر نادية وناذر انا كاتب الاسماء بتاعتكم هنا مخصوص وعندى احساس انكم ما بتشتكوا وتقولوا عاوزين تعويض وحق قدح وحق ذم وبعدين انا لسة موظف يعنى كان عملتوا فيها محاكم وحركات الموضوع مابكون فى صالحكم اضافة الى انه انا وبحكم انى عالم سايكولجى وكدى فان نظرتى لن تخيب فى انكم لن تقودونى الى ساحات القضاء الاسفيرى (( بس يانادية مايطلع الكلام بتاع اخو اخوان وشنو كدى يبقى كلام بجيب هواء بعدين )) ثم ثانيا انا ماعرفت الاسماء بالكامل ومستعد انكر عديل كدى انه انا ما قاصدكم وثالثا وحيث اننى لم استشير المحامى فى الكلام المكتوب ده اذا جاب هواء لاى زول فى اطار نظرية المؤامرة فانى اعتذر عن هنات القلم (كى بورد )بدور براهو فى بعض الاحيان نشوف كم حالة فى نظرية المؤامرة 1- مذيعة التلفزيون نادية فى المقابلة مع الاستاذ ولعت ليك النار بعد مامشت البيت وشافت الشريط بتاع المقابلة اصلوا مصور الكاميرا تو قام ركز فى حتة كدى على يدها الشمال وعمل زوم على اصبعها الوسطانى ولانه هى قبل المقابلة ظفرها بتاع اصبعها ده انكسر وهو كان واقف لما الطفر ده اتكسر عشان كدى تامر عليها وظهر الطفر المكسور وقامت على التيلفون وهاك ياضرب والدموع عشرة عشرة مع المخرج ماشفت فلان ده عمل معاى كيف والمخرج يروق فيها واصلوا ابت تسكت قام المخرج قال ليها ادينى فرصة خلينى اراجع الحتة دى وبعد فترة وهى تتنخج فى التليفون وقام قال ليها والله الزول ده بالغ عديل كدى والحتة دى لقطة فنية نادرة امكن بكرة بعد بكرة تبقى موضة وبعدين الزول ده ظهر جمال اضافرك بصورة مبالغة وانه اصابعك منسقات وجميلات وانه الطريقة العاملة بيها المنكير دى انا اصلا ماانتبهت انها جميلة بالدرجة دى لالا انت ماعارف هو خاتى عينهو على المذيعة فلانة ديك وكان اتكلم معاك عشان هى تقدم الحلقة دى ؟ اى لكن الزول ده انتى عارفاهو زول محترف وماقاعد يلخبط الكيمان بتاعة الشغل مع الحاجات الشخصية وهو زاتو اكتر من مرة قال للزولة دى الكلام ده فى حلقات تانية وهى زعلانة منو فى انه ما بعمل ليها الحاجات زى ماهى عايزاها كدى روقى وخلى الموضوع ده اسة وبكرة لما تجى الشغل بنتفاهم قفلت والدموع خليها ساكت قامت ضربت لصاحبتها المقربة جدا والتى تعمل معاها فى القناة وحكت ليها الحاصل وتعال شوف الردحى على اصوله من صاحبتها انا ماقلت ليك من زمان الزول ده قاصدك واصلوا لما يشتغل معاك طوالى بجيب ليك اكعب الصور وبحاول يبوظ ليك الحاجات تذكرى الحلقة ديك لما انتى قلتى الكلام الحلو داك والحلق المدلدل الجميل داك كان بتهز وبرقش مع الكاميرا قام حول اللقطة لجهة ثانية عشان الناس مايشوفوا الحلق - لالا هو قاصدك وانا كلمتك الا انتى ما بتسمعى الكلام وتقولى لى الزول ده الناس ديل كلهم مشيدين بالكفاءة بتاعته اه شوفى الكفاءة دى ودتك وين عارفين الاستاذة ماشافت الشريط على الهواء مباشرة وادوها كل اللقطات بتاعة الكاميرات الشغالة فى التسجيل وفى لحظة البث المباشر وفى اللحظة دى بالذات كانت شغالة كاميرا ون ونخلى زولتنا دى فى ردحيها ونعمل فلاش فى حتة ثانية ناذر بتكلم مع زميله الصحفى فى الموضوع الكتبه امس ومساهر الليل وجضموا ليك على اساس انه موضوع قنبلة والله الناس تتكلم فيه شهرين واول مادخل الجريدة جرى على صفحته ولدهشتة الشديدة الموضوع مامنشور اصيب بحالة من الاحباط الشديد وبس منتظر مدير التحري متين يجى وهاك شوف الكلام الداير بين نادر وروحه اسة يجى مدير التحرير يقول ليه رئيس التحرير قال ما ينزل السبب شنو والله عندو تحفظات على بعض الحاجات الفيه زى شنو يعنى ((اسة رئيس التحرير يقول ما يتنشر وبعد اسبوعين ثلاثة موضوعى ده زاتو بلقاه منشور باسمه بعد مايعمل ليه شوية بهارات وكدى ويقلب فى حاجات من فوق لتحت ويغير الهيكلة بتاعتو عشان ما اقدر اغالطوا ليك)) ياخى ده قبل كدى عملها مع فلان لمن فلان ده طشا من الجريدة وخلاها ليه واسة فلان القاعد ده هو لاطش منه كم مقال لكن هو زول مسكين وراضى كدى يمين بالله الدم ركب بالله شوف ده كمان بسكت ليه ولا بخليه يمين بالله انا الجرايد دى كلها بتتمنى انا اكتب فيها وكان طلعت من هنا الا افضحه ليك فضائح ده زول ما بختشى انا لحمى مر انا جدى العباس كمان لعب ولا لعب اول ماوصل مدير التحرير دخل معاه رئيس التحرير ومشوا على مكتب رئيس التحرير وكوركو لناذر الحقهم اول ما قعدوا رئيس التحرير اتلفت على ناذر ده كلام شنو الكاتبه ده انت داير تودينا فى ستين داهية ولا شنو وقول الحكومة خلتك الناس الجايب سيرتهم ديل والله ممتلكات الجريدة دى ماتتم نص مطالبتهم ولو ادونا ليها بالاقصاد قول 100 سنة حتى ندفع وعندما بدا ناذر فى اعادة قراءة ماكتب كان هنالك سيناريو اخر يدور فى الجهة الخلفية من الجريدة عليك الله اقراء كلام رئيس تحرير الجريدة دى الزول ده اسة مابنبذ فى جريدتنا عديل كدى يعنى مافضل ليه الا اكتب اسم جريدتنا دى بالخط العريض والله الاعمى يفهم انه قاصد شنو لازم نكلم رئيس التحرير يرد ليه ورد اقوى من كلامه ده هم ناسين حركاتهم البعملوا فيها ديك ولا قايليننا ماعارفين ما انحنا برضو قاعدين فى البلد دى وعارفين اى حاجة باخى تتذكر لما دايرين اعملوا الجريدة دى قروشهم ماكانت تامة والله اسال عمك فلان عارف ليك القصة وهم قاموا رفدوه عشان مايكون فى زول عارف اى حاجة وينط واحد داخل من هناك اسمعوا سمعتو الشمار ده والله قالوا الحكومة حتعمل قرار بحظر تصدير زيت النخيل الا الرخص القديمة بس الطلعت السنة الفاتت عارفين ليه قالوا اصلوا باقى رخصة واحدة بتاعة فلان وفيها كمية لم يتم تصديرها والزيت سعرو وقع فى الواطة دى والناس مالاقية ليها مشترى فى دار الرياضة (حاليا اسمها الاستاد) والله قال ليك الكورة مبيوعة عديل كدى لكن قال ليك رئيس نادى البرالمة ده شفت شفتنة ماعادية بعد ما اشترى حارس نادى الفناننين والباكات الاثنين برضو كان ملاوذ قام اشترى ليك الحكام والنتيجة معروفة غالب غالب وفى سودانيز اون لاين شفت ده كاتب شنو ياخى ديل بلمعوا فى روحهم كل واحد يكسر تلج فى الثانى ويقول فيه مالم يقل مالك فى الخمر عشان يعملوا انهم عندهم جمهور اسة بكرى ده زاتو شايت معاهم لما نطالب بتوقيف واحد انحنا شايفنه كتب كلام ماعديل ونقوم نطالب بكرى انه يوقفه الطناش بحصل بس اول ماانت ولا انا ولا اى واحد فينا (من شلتنا ) اكتب اى حاجة اللائحة تظهر نواجذها عشان تعرف انه الموضوع خيار وفقوس اسة شلتهم دى ورينا وقفو منها زول متين ما طوالى التوقيف ده عندنا هنا ياخى فلان داك ماشاغل ليك فلانة ديك عديل كدى عينك عينك والله ماسالوه بس انا لما قلت ليها شرط قالوا ده خروج على اللائحة وبعدين بعد مرات الموضوع بكون مسيس يعنى اول ماتهبش الحكومة كدى بتلقى الاشارات بقت حمراء وبعدين الجماعة بتاعين الحكومة اقولوا اى حاجة الاشارة اصلو ماتبقى صفراء خضراء طوالى وبعدين حتى لما يوقفوا زول منهم تلقى الجوه المنبر والبرة المنبر(ديل بكونا حاشدنهم) بطالبوا برجوع الجماعة الموقوفين والله لوا بلعبوا فى البرازيل مامفروض يرجعهم ولا والبزعل كمان بكرى مابرد ليك ولا بقول ليك عشان شنو اصلوا الناس ديل متامرين عديل كدى ابوشاكوش