لقراء وقارئات المنبر العام غير الأعضاء ...... معرفة رأيكم تهمنا

Quote: الاخوة الاعزاء / حيدر وناذر وأعضاء المنبر المحترمين السلام عليكم ورحمة الله وبركاته وأسعد الله أوقاتكم في الحقيقة ترددت كثير قبل أن أكتب ليكم لأني ما شديد على الكتابة وما بجيدها لكن بما إنكم أديتونا فرصة قلنا نقول ليكم رأينا في البوست بتاع القراء ده و بصراحة أنا هوايتي القراءة ويمكن تكون موهبة كمان طبعاً ما أي واحد بيقرأ أي حاجة من طرف وكل إنسان بشوف الحاجة المناسبة ليه في القراءة شعر وأدب ولا علوم أو فنون أو غيره والموقع ده فيه كل شيء بس المشكلة إنه أي عضو بيكتب في أي حاجة يعني أنا بقيت عضو في الموقع معناه أكتب في السياسة والرياضة والطب والدين والأدب والإجتماع والفنون والجنون ويدلي بدلوه (بتاعة عزاز) في كل الآبار دي مثلاً البوست بتاع تدني الأخلاق في الوسط الفني (مع الاحترام للعضو كاتب البوست)، يعني بأمانة المواضيع جايطة وده يمكن معَني بيه أمين الموقع أكتر من سياسة أو قانون أولوائح الموقع وهو إعطاء عضوية لكل من هب ودب كما يقولون لدرجة إنه الأسماء بقت تتلخبط على القراء، بس أي عضو يزكي واحد ولا يفتح بوست يا بكري دكتور فلان في بابك ولا المبدع علان في شباكك وبعد يومين بتلقي الدكتور ولا المبدع ما عنده أي حاجة زول الله ساكت بس جاي للونسة طيب يا أخينا (بتاعة خضر) إنت ما تتونس زي الناس اللي بيجو يرمو ليهم كلمة كلمتين وتتخارج، ليه ماشي كاتب بوست عن الفلك وزراعة الفول في الخريف وأغاني الحقيبة والحزب الوطني والتراث الشعبي وإنت ما ناقش أبو النوم في المواضيع دي وأنا بصراحة بقيت لو لفتني عنوان بوست بشوف كاتبه منو وبعد ده بقرر اقرأ البوست ولا لا وبعدين بعض عناوين البوستات أو حتي الكلام المكتوب داخلهم بقي زي شريط التعليق الجاري في أسفل شاشة الفضائيات العربية زي يا عمري ومناي وشمسي الساطع وقمري المنير مبرووووووووووك عيد الميلاد # ود البلد – الهلال يتأهل يستاااااااااااااااهل هلالي وإفتخر--- بي كرامة البليلة قولو أحححححححححح (بتاعة وليد الشفت) – سلااااااااااااام لزهرة برشلونة من الولهان وحاجات زي دي كتيرة ده طبعاً الموضوع ده متعلق بالعلاقات والشلليات والمجاملات يعني بس تكتب عنوان وجماعتك يجوك بالصف (ولو ما جو تضرب ليهم) والله إنت أديب يا جميل يديك العافية – كلك ذوق يا راقي شكرا للمتابعة والمرور وإنت يادوب تكون بس كتبت العنوان ويمكن ما ترجع للبوست زاتو زي الأخ ملاسي ما بيعمل وتلقي الجماعة قايمين وقاعدين في شنو .......... زي الحاصل هسع في البوست بتاع هن لسن للسرير فقط (كان سميتوه هن رحمة لنا) ومن البوست ده طلع أكتر من بوست لنفس الموضوع ..........طبعاً ح يجي يوم كل واحد يكون عنده منبر براه وتكون إنت العضو الوحيد فيه تكتب وتقرأ وتعدل وتنبز وتشتم وتمدح وتقدح وتزغرد براك على كيفك وإحتمال تكون عندك فضائية حقتك برضو المانع شنو ...... المهم (بتاعة تبارك) ، حقيقة في أعضاء مميزين بآرائهم النيرة ونقاشهم بالتي هي أحسن دون الإساءة أو التجريح وديل بالجد بخلو الواحد يحترمهم وعلى سبيل المثال الحيدرين (قاسم وبدوي) kamalabas ده طبعاً في مجال السياسة (أكتر مجال فيه خلافات). العلاقات والشلليات والمجاملات حتي مع القراء زينا كده حاصل يعني هسع لو أنا مثلاً قلت والله أخونا هجو الأقرع ده راجل كريم ومضياف او يا داليا حافظ إنتي دايماً كلامك موزون وإنتي عسل بس ومبروك العرس ولا أقول يا د. بيان إنتي وعصام دهب كلامكم مية مية في موضوع تبيدي --- يقومو هجو وداليا وبيان وعصام يقولو ياأخي والله الزول ده يستاهل باسوورد ويلا يا بكري ود القاضي نحنا عايزنو هنا ---أها وبعدين يمكن أصنف كوز ولا موز ولا أي حاجة -------- أو مثلاً مثلاً أقول إنه أبو ساندرا ده زول اخو إخوان وبينا عيش وملح ومعرفة وكده وبعدين يطلعوك زول أحمر ويساري وبشوت بشماله --- طبعاً نحنا السوادنيين معروفين بقوة علاقاتنا الإجتماعية بس بصراحة نحنا صفر في كيفية إدارة هذه العلاقات وبنخلط الأمور ونجوطها كتير. لسة عندي كلام لكن الواحد مشغول شديد وشايفك يا أخ حيدر قررت إنه البوست أدي غرضه أو حاجة بالشكل ده يعني خلاص نفرتق نحن القراء ولا ممكن تاني نجي ننضم معاكم ؟؟؟؟؟؟؟ وعلى كل حال نبلغ سلامنا وتحياتنا للخال الفنان عماد عبد الله (شهادتي مجروحة فيه) وأولاده بشمبات والوالدة والاخوان والجيران بالديوم الشرقية والإمتداد والأهل بدنقلا والمحس وكذلك التحية والسلام لجميع الإخوة أعضاء هذا المنبر وخاصة لناس الدوحة الحلوين وعلى رأسهم طبعاً الخال صلاح عبد الله ونسيبي الجميل أبو شيبة وأتمني يا أبو شيبة تفتحوا بوست إنت أو الأخ نجدي أو أي إعلامي آخر عن الإعلام أو دور الإعلاميين في دول المهجر ومساهماتهم في الإعلام السوداني بدل كل إعلامي عامل ليه عمود في صحيفة أو ماسك مكرفون في فضائية وينظرو في أشياء ما ليها علاقة بالسودان أو الحاصل فيه. (بالمناسبة كاتلني معلق رياضي إسمه ياسر محجوب ....أخخخخ – وين الشباب اللي كانو في برنامج مشروع معلق بتاع قناة الجزيرة). وسلام خاص لأخونا أحمد أبو قوتة (زميل دراسة يا ناذر) وبارك يا أبو قوتة لبتنا لدن نجاحها وإحرازها 288 في مرحلة الأساس وكذلك الأخ علاء تمبس وعشان تعرفوا يا أخ حيدر إنه القراء بيتفاعلوا مع الحاصل مع الأعضاء أنا تمبس ده تعاطفت معاه أيام محنته مع العنصرية عام 2007 وضربت ليه تلفون وعرفته بنفسي ومشيت الرياض أكثر من مرة لكن ما تشرفت بلقاه وإنشاء الله يرجع بالسلامة. ثم دي فرصة طيبة عشان الواحد يسأل من الأخت العزيزة hozy هوزي وهي اول من دلتني لهذا الموقع عام 2002 ثم حضرنا حفل زواجها والأخ الفاتح في فندق جنة الخليج بالدوحة (زواج بوردابي)....... أنا زي ناس القاهرة ما بحب كلمة بورداب دي. صنفرة أخيرة يا ناذر لاحظت كمان لو عايز تشتهر في المنتديات السوادنية عامة يا تتكلم في الجنس يا تسب الدين ... شئ محير... نشكركم على هذا البوست جميل وانا أتمني أن أتواصل معكم عبر بريدكم الإلكتروني كلما سنحت لنا الفرصة ومعليش الافكار غير مرتبة ودمتم في رعاية الله. محمد محمد القاضي (حسين القاضي) الدوحة 07/05/09