لقراء وقارئات المنبر العام غير الأعضاء ...... معرفة رأيكم تهمنا

Quote: الاخ ناذر تحية طيبة الموضوع ده اهداء خاص لاخونا ود دياب لانه الموضوع كورة وكدى وبعدين الاهداء مستمر الى كل معجبى الكورة فى المنبر زمان كنا بنلعب فى اندية طرفية وكان الحلم ان نلعب فى اندية القمة هلال –مريخ ببكى واتحسر عليك ومابقول العشنا كان المهم دخلنا الى معترك الحياة وتزوجنا والحمد لله رزقنا بالبنين اثنين والبنات واحدة ودى ست ابوها ومدخلانى ليك فى الركن مع الشباب وبعض الاحيان المداقرة من امها عديل كدى اصلا مابقدر اقول ليها لا- اصلوا هى طلباتها معقولة جدا ده الشايفوا انا كدى ولوقالت دايرة لبن الطير برضو بكون طلب معقول لانه هى مابتطلبه الا لما تكون عارفه انا بجيبوا ليها والموضوع مافيه اى حاجة متعلقة بالابتزاز او الحنية الزائدة كما يدعو الصبيان على اختهم -ديل وصلوا مرحلة قالوا انها اكلت راسى عديل كدى وكان ماخائف الكضب امهم قالت الزولة دى كاتبنى ليك عديل - وهى كان عرفت شيخها ده وين كان عملت اللازم المهم وصلوا لعقد اتفاقيات سرية بانه هى تصبح المندوب السامى لطلباتهم طرف سعادتنا لكن هى كانت شغالة بنظام العميل المزدوج وانا برضو مبسوط سقط عنوة برنامج الكورة ومتابعة الكورة من كل اجندة حياتى اليومية الى ان اتى يوم الموضوع جاط واتلخبط على الاخر لم افطن يوما انه الشباب مرضانين بالكورة الى ان سمعت ليك شمطة لرب السماء بعد كورة هلال –مريخ ومافهمت اى حاجة من الكلام كلهم بتكلموا فى وقت واحد وسامع امهم شغالة حكم وتحاول تهدئة اللعب لكن لا حياة لمن ينادى المهم بعد ان هدأت الاحوال نسبيا الا من شوتات مرة مرة تاتى لواحد بكون اتذكر حاجة كانت حارقهو وعندما جلست مع المدام شنو الحاصل البيت مالو والدنيا جايطة قالت وهى تضحك ولدك الكبير وبنتك هلالاب والصغير مريخابى طيب ومالوا ماكل زول اشجع البعجبوا المهم اخذنا فترة اصبحت مجبرا ان اعرف الهلال لاعب مع منو والمريخ لاعب مع منو والمهم ثم المهم جدا لازم اعرف يوم كورة هلال –مريخ لازم اكون فى البيت قبل نصف ساعة من المباراة لزوم نضاير العدة من محل التلفزيون وماتخلى اى كباية او صحن لابد من عمل كنس نظيف حتى المخدات بنشيلها من المحل بتاع التلفزيون يوم هلال مريخ بعد كدة انزوى فى ركن بعيد يمكننى من سماع مجريات الاحداث لكن مع كل التدابير الامنية ينفلت عقد الامن ودائما الكثرة تغلب الشجاعة قعدت مع المدام عشان نصل الى حل فى هذا الموضوع قلت ليها شوفى انتى من الليلة مريخابية كان عجبك ولا ما عجبك تبقى مريخابية عديل كدى ومن اسة تقومى تذاكرى تشوفى منو حارس المرمى ومنو الباكات والسنتر فرويد ومنو راس الحربة والاحتياطى وانا بشترى ليك جريدة المريخ والصدى واهم حاجة غلبتوهم متين وغلبوكم متين والجاب الاقوان منو وبينى وبين نفسى قلت المراة دى كانت ابت تبقى مريخابية ماتبقى مصيبة كبيرة خلاص –قلت ليها كدى فكرى شوية يازول قمت صليت ركعتين لله وقريت يسن وانشاء الله تقبل- اصلى زعلان على الولد الحتالة الجماعة غالبينو بالكترة المهم يازول المدام ما اتكلمت كلو كلو وانا اقول ليها اسة عاجبك الولد الصغير ده يكون مهضوم وسط اخوانه وبتعملى ليه عقدة قامت قالت لى ماتبقى انت مريخابى قلت ليها ماعندى مشكلة لكن انتى بترضى انا اقيف مع المفعوصين ديل ويلامضونى فى الكلام انا اخترتك انتى لانك صاحبتهم وهم بتونسوا معاك كثير خلينى انا حكم احسن على قول تبارك شيخ الدين المهم وافقت وفى اليوم الثانى اعلنت عن انها مريخابية من زمان من زمن ناس ماجد وجقدول وتعال شوف الصغير كيف الله اكبر ظهر الحق وقايليننا هيننين ولا هيننين ومشى فى التصريح اكثر من كدى بانه هو متاكد انه ابوه زاتو مريخابى لكن داسيها يازول وانا راجع من المكتب شايف ليك علم فى راس البيت يهبهب –ياربى ده بيتنا ولا بيت تانى –يازول دخلت البيت وعلم المريخ معلق فى اعلى حتة فى البيت تعال ياولد ده شنو انت فى البيت ده مافى الا مريخاب ببساطة شديدة جدا قال لى فى زول منعهم يطلعوا يعلقوا علمهم المشكلة انه الولد الكبير عندو رهاب من الاماكن المرتفعة دى تتحل كيف؟؟ المهم علم المريخ اصبح معلق فى راس البيت وبقى يوصفو بيه ياخى امشى بس لما تلف هناك بتشوف علم المريخ فوق بس ده بيتهم (واحدين بقولوا علم الصهاينة –الا ياود دياب شنو يعنى علم الصهاينة دى) والعجب بتاعين الركشات مرة جاى بالليل قلت من الزلط اركب ركشة اها ياولد تودينى بكم وين ياحاج وصفت ليه البيت بدون ذكر العلم وين للبيت الفيه علم المريخ فى السماء داك بس ياهو ياولدى اتفقنا بالفين وفى الطريق دقينا الحنك لما عرف انى سيد البيت قال لى والله قايلك ضيف جاى للجماعة ديل لا ياولدى انا سيد البيت وصلنا خشم الباب ماعندى فكة اديته ورقة ام خمسة الف رجع لى الف ياولد انحنا ما متفقين - قال لى دى حقة الزعل فى العلم المعلق ده - ياحاج فى زول يعلق ليه علم زى ده فى السماء السابع -قلت شنو ياحاج قلت ليه موافق امشى الله يفتح عليك والله ليوم الليلية ماعرفت بتاع الرقشة دة هلالابى ولا مريخابى طبعا بعد ما المدام بقت مريخابية عديل كدى وحافظة اى حاجة بقيت انا ذاتى فى امر ضيق اول هام انا بقيت متهم بالتؤاطو مع الهلالاب لانه البنت هلالابية وانا مع بنتى وده دليل اكيد على انى هلالابى والا ليه ماقاعد انهرها واديها العين الحمرة ثانى هام لازم اخد حصة قبل النوم لما المريخ يكون لاعب مع اى جهة انشاء الله تمرين فرقتين لابد يورونى الخطة المتوقعة والتشكيلة حتكون كيف ثالث هام لما المريخ يلعب لابد من التاكيد بانه الكوتش وضع التيم زى ماالمدام قالت وبعد المداولات والمشاورات وصلنا لاتفاق انه انا والله لا هلالابى ولا مريخابى اما يوم النزال بين هلال مريخ اصبح الوضع لا يطاق ولازم ارجع البيت قبل الكورة ماتنتهى بخمسة دقائق طبعا ده تغير رئيسى فى موضوع الحضور السابق –زمان كنت بنهر الاولاد لما صوتهم يرتفع –اسة المدام زاتها صوتها فوق مع الشباب وهى مابتتنهر واخوانا الهلالاب يقوموا يكوركو فى التحكيم وانه الحكم مع المريخاب عديل كدى قلنا من باب اولى نخليهم يكوركوا زى مادايرين والواحد يستحمل اخر خمسة دقائق واخر حاجة توصلنا ليها برضا كل الاطراف فى يوم كورة هلال مريخ انا مع المغلوب ابوشاكوش