|
|
 Re: ناسنا.. (Re: محمد المرتضى حامد)
|
أخي الكريم الأستاذ محمد المرتضى .. كما وعدتك أن أضم لقائمة ناسنا نفر من أهلنا البواسل في توتي ومنهم على سبيل المثال لا الحصر :
الأستاذالكبير ومعلم الأجيال رحمه الله : الأستاذ محمد حمزة رجل التعليم المعروف والمناضل الجسور في ملحمة محاولة إنتزاع توتي أيام الحكم البريطاني وأحد أعضاء لجنة الستة التي فاوضت ماكنتوش الذي قرر نزع جزء من أرضنا في توتي فتصدى له الأهل بكل جسارة وبهذه المناسبة أرجو أن تسمح لي أن أنقل لك تفاصيل تلك الملحمة الرائعة في صورة شعرية صاغها شاعر توتي المغمور عليه رحمة الله الشيخ عمر الضو وهو أيضا من ناسنا وفيها أسماء لجنة الستة (بقيادة الزعيم المناضل رحمه الله مصطفى خالد وصحبه الميامين ) وتفاصيل الملحمة الشعرية وهي بعنوان توتي الأرض والتاريخ - ثورة توتي ضد الإنجليز - وبعدها نواصل لنحكي لكم عن ناسنا في توتي وما جاورها :
توتي ... الأرض و التّاريخ
ثورة توتي ضد الإنجليز
لقد قرّرت الحكومة الإنجليزيّة انتزاع
ثلاثمائة و خمسين فدّاناً من أراضي جزيرة
توتي .. ساد هرج و مرج و لكنّ المناقشات
الحادّة تمخّضت عن اتّفاق ، كان العمدة قد
أخبرهم بأنّ مدير المديريّة قد طلب مقابلة
ستة أشخاص يمثّلون الأهالي ، فكان الاتّفاق
على اختيار هؤلاء الستّة .
* * *
بعد صلاة العشاء في ذلك اليوم الكئيب
اجتمعت اللجنة المختارة بالمسيد للتّشاور
حول الغد المنتظر ، و في تلك اللّحظات دخل
عليهم العابد ذلك الرّجل الصّالح الذي اعتاد
ارتيادالمسجد في ذلك الوقت للتعبّدو الابتهال
و إحياء اللّيل فاندهش لوجود أشخاص بالمسجد
المشهد الأول
المكان :
المسيد (مسجد توتي)
الزّمان :
الجمعة 14/4/1944م .
الشّخصيّات :
* ستّة من أهالي جزيرة توتي :-
(1) مصطفى خالد .
(2) الحسن الفكي أحمد .
(3) عباس علي طيّب الأسماء .
(4) الأمين بابكر .
(5) عثمان ابراهيم .
(6) أحمد عبد القادر .
* ماكنتوش (مدير المديريّة ) .
* عبد الله الشّفيع (القمندان) .
* المراسلة .
* ثائران من أهالي توتي .
اللّوحة الأولى
مصطفى : بسم الله الرّحمن الرّحيم
نحن باكر نمشيلو و لا بدّ من نتصدّى
و نوقّفو في حدودو ما دام بدور اتعدّى
الحسن : أقول ليكم رايي
ما نمشيلو تب ما دام اللعين اتحدّى
و كان راجل اللّجى يشيلا شيلة شدّة
نحن رجال ما بنخاف و لا بنتهدّ
و نقولّو تعال قوام قبّال تطول المدّة
العبّاس : يا سلام
دا ضروري نحن نمشيلو و ناخد الزّبدة
لكن كمان الفي راسو قالو أدّا العمدة
الحسن : نان العمدة ليه ما ردّ ؟
العبّاس : و الله الرّاجل جاى من الزّعل
لا أخد لا أدّا
الحسن : النّصراني ود أم زردة
العبّاس : قالّيه داب اشتهيت الغمدة
باكر الرّجال إجوك
نخاف مكتبك انسدّا
عثمان : نحن النّاس سوّونا قيادة
كلامنا يكون أبينا لا نقص لا زيادة
ما بندّى المجال إبني البيوت الفاسدة
و لا هي محل ملاهى
طاهرة و مجاهدة و زاهدة
مصطفى : عفيت منّكم
كلامنا مع النّصراني ما متجانس
كلامكم عديل
ما فيهو زايد و ناقص
نحن ضروري نمشيلو
نقدر نوقّفو خالص
تاريهو اللّعين
لي توتي لابد و قانص ؟!
الأمين : ما دام اتّفقتوا كلّكم
و الكلام بقى عندكم
اللبقى رئيسنا الفارس
الحسن : الفارس منو يا زول ؟
الأمين : أنا قلت المصطفى
راجل مجال و مجالس
نحن تاني و تالت و رابع و خامس
ندّيهو الوكالة
يفاصحن و ينافس
عثمان : يعنى نحن نبقى لبّس لابس ؟
الأمين : خلاص اللبقى المصطفى رئيس اللّجنة
و يا مصطفى قرارو ما أزعجنا
انت براك عارف النّصراني
داير إلهجنا
مصطفى : شكراً على الثّقة الأوليتوني إيّاها
توتي إحنا جدودا إحنا بناها
يا إنزل قرار
يقولوا المدير خلاها
ولا يدوس جثثنا
نموت و أرواحنا فداها
الأمين : ملاحظة
الملاحظة إمكن الحكومة تحمى النّاس
المعدا
الحسن : تحميهن ليه ؟
الأمين : بتخاف البرق عبّادي إرعد رعدة
الحسن : و دحين ؟
الأمين : النّاس اتوزّعوا بالشّرق و الغرب
المراكب راقدة
و إتلمّوا في المديريّة
محل الرّجال متواعدة
( هنا يدخل العابد يصلّي تحيّة المسجد ثم يلتفت
إليهم و يسألهم )
العابد : سلام ناس المسيد
ها ناس … دي ساعة ونسة ؟
العبّاس : منو القالّيك دي ونسة آ سيدنا ؟
العابد : سوّيتوني ما بعرف الونسة ؟
نان شن بتسوّوا لى هسّة ؟
العبّاس : دا اجتماع لجنة
العمدة قال كوّنوها من ستّة
العابد : ما فهمت آ العبّاس
العبّاس : ها سيدنا إنت كبرت ؟
الحلّة من أمس مقلوبة دعاية
قالو فى ورقةً جاية
هسّع وصلت
العابد : شن فيها آ ولدى ؟
العبّاس : فيها تلتميّة و خمسين فدّان من توتي
نزعوها و قالوا انفصلت ؟
العابد :الله حي …!
و شن جايين تسوّوا بعد الحكاية الحصلت ؟
العبّاس : تراها اللّجنة ماشّالو
و لسّة ما اتّصلت
العابد : و قال ليكم متين الجلسة ؟
العبّاس : قال باكر الجلسة
العابد : إجلسوا في النّار الكفّار أكان مسوين
لنا مغسة
إنتو رجال ؟
المجموعة : نعم بالحيل
العابد : ما دام في الرّجال شرفنا ما بتمسّا
قوموا يا أولادي
هسّع اللّيل هوّد
اللّيل اتمسّا
باكر بعد الصّلاة
ناخد لنا حصّة
و نشرب القهوة
و نمرق نحضر الجلسة
أحمد : إنت يا سيدنا ما تعدّي
أكرب السّبحة و الفاتحة
ما تعدّي
العابد : دا يا أحمد
لو عندك لو عندي
الحسن : السّبحة أخير لينا
أكرب السّبحة
(ستار)
(في هذه الأثناء يبقى العابد بالمسجد كعادته
حتى صلاة الصّبح ،ظلام في المسرح ثمّ أصوات
الدّيوك ،أذان الصّبح ، إضاءة في المسرح مع
السّجدة الأخيرة ثم الرّفع و السّلام )
ينهض العابد
العابد : سويتوا الباقيات ؟
عثمان : في شنو آ سيدنا ؟
العابد : أكان سويتو الباقيات نرفع ايدينّا
أقروا الفاتحة
المجموعة : آمين ..
العابد : يا ربّي كفّ الشّينة
النّصراني دا مبارينا
قاعدين لا صحّة لا مصحّة
ما طالبنا بي تحسينا
نتعب
نشقى
نزرع
ندفع
ندفع القطعان
برضو الكلب ساكّينا !
الأمين : الخيرة قالت شنو آ سيدنا ؟
العابد : الخيرة قالت تقولوا أبينا
حكومة النّصارى
حد الله بينّا و بينها
التّرك بى تجاربهم شن لينا ؟
عثمان : إنت يا سيدنا ما تعدّي
أكرب السّبحة ما تعدّي
العابد : قتّ كدي ؟
المجموعة : أي بالحيل
العابد : أها ناس الخدار
قالوا ببيعوا جرجيرهم
و قالوا بجوا إحضروا الجلسة
بي حميرهم
و امشوا يا أولادي
ودعتكم الله
و ما تمشوا في فد درب
اتوزّعوا بالشّرق و الغرب
و أنا هنا بدرجوا ليكم الكلب
إن شاء الله الكلب إنغلب
اللّوحة الثّانية
(مؤثّرات صوتيّة : صوت النيل ، المديريّة ،
ماكنتوش يضغط الجرس فيحضر المراسلة )
ماكنتوش : ولد كلّم أبد الله أفندي
يجي أنا آوزو
عبد الله أفندي : قود مورننق
ماكنتوش : سباه الكير
النّهار دا أنا إندو إجتماع
مئا ناس توتي
ناس توتي ناس تكيان
إذا همّ آوز يأمل تلس ملس
عبد الله أفندي : ما يقدروا يعملوا حاجة
ماكنتوش : عبد الله أفندي شوف
أنا لما أقول كلاس
ما فيش كلام تاني
أنا آرف كلّ هاجة إيه
عبد الله أفندي : حاضر حاضر
المراسلة : سعادتك في ناس توتي برّة
ماكنتوش : كتير ؟
المراسلة : ما عدّيتهم
عبد الله أفندي : بليد روح عدّهم
المراسلة : سعادتك ستّة
ماكنتوش : كليهم يكشّوا
سباه الكير .. قود مورننق ،
أهلاً .. أهلاً
إتفدّل … الليمونات الموية قوام
إنتوا ناس توتي أنا كلّمو أمبارح
ألشان يجي
ناس توتي الستّة ؟
مصطفى : و دا خبر شنو دا النّشرتو إتّ ؟
ماكنتوش : الكبر مش نشرو أنا
لا .. لا …
الكبر نشرو هكومة
هكومة آوز يشيل
تلتميّة و كامسين فدّان
في أهسن هتّة
ألشان آوز يأمل تجارب
هسب الكتّة
ها … ها …. ها …
ألشان كدا …. ها … أنا قلت
آوز ستة … ها …
(يرفضون شراب الماء بعد إحضاره )
مصطفى : سعادة المدير
ديل مزارعين
عاملوهم بالحسنى
هسّع دي حمرة عين
المجموعة : ما هينة شيلة الطّين
(ماكنتوش يشير بأصبعه إلى مصطفى خالد
و يسأل عبد الله أفندي)
ماكنتوش : أبد الله أفندي ..
هو إز هي ؟
عبد الله أفندي : دا مصطفى خالد
زعيم أهالي توتي
ماكنتوش : فدّل مستفى متأسّف
مصطفى : دي حمرة عين
ثائر : بهتف بأعلى صوتي
عاش الوطن
بهتف بأعلى صوتي
و أفضّل موتي
و لا أديك شبر من توتي
ما بتقدر تشيل حقّي
الورثتو من جدّي من حبّوبتي
بموت كمداً معاك
ما بندفن بغبينتي
عبد الله أفندي : اترمي يا همجي
إنت البتزعق دا
في ستّة هنا بتكلّموا بإسمكم
(يلتفت إلى أعضاء اللّجنة)
يا أخوانّا يا ناس توتي
يا أهلنا
الموية كنتوا تشربوها
تبلّوا حلوقكم
القانون حكم
هم الإشيلوا حقّهم
و إنتوا شيلوا حقوقكم
الحسن : يا ودّ الشّفيع
الإنجليز ربّوكم
و الدّرب العديل
و الله منّو عموكم
عبد الله أفندي : و الله يا عم
أنا خايف عليكم
ما يجلوكم
ولا يجيب عساكرو
و يجو يكشّوكم
الحسن : يا ودّ الشّفيع كلامك لمو
و ماكنتوش دا الإحفظ دمّو
سجن .. موت … ناس توتي
ما بهتمّوا
عبد الله أفندي : جزيرة ناس ود حامد
الشّالوها منهم
إنتو ما زيّهم ؟
الحسن : ما زيّهم
مصطفى : ما زيّهم … ما زيّهم
عبد الله أفندي : طيّب يا ناس توتي
يا أهلنا
نزلاء اللّكوندا
قالو توتي بتكتّحنا
أخلوها خلّوها جنّة
كلّنا تفسّحنا
مصطفى : يا ولد بالله لا تجرّحنا
ناس ود حامد القاموا
اليوم في محنة
عبد الله أفندي : لكن ددد …
مصطفى : كفى لم باقي الكلام
و تاني ما تفاصحنا
عبد الله أفندي : بس أنا بدور …
مصطفى : بتدورو يعوم في النّيل
و يحوم في رمالي
عشان إزرع زهور
و جلب اللواتي ليالي
ما بندّيو شبر
الانسحب طوالي
و نحن مصمّمين
الستّة ما بنبالي
ثائر : أنا ودّ توتي المزارع
ما بشتغل زبّالي
ما بخلّيك تشيل أرضي
و أشغل بالي
و لا أدّيك جرفي
و أخلّي عيالي
بموت في حقّي
رأسي مرفوع عالي
و إن ضرب الرّصاص
ثابت و ساتر حالي
ماكنتوش : ولد دي بقول … موت …
رساس
شيلو كتّو في السّجن
كلامي واحد بس
قرار توتي منزوء أمس
مصطفى : ماكنتوش ..
ما تنسى إحنا محس
أسحب كلامك دا
ولا هسة دي بتندس
كدي تاوق في النّاس
شوف فيهم من بتونّس
والله إكّان لقوك
يمصّوا دمّك مص
و كان مغالط
أنزل ..
و سوق معاك حرس
ماكنتوش : أنا إم إم ..
مدير مديريّة
مش تلتميّة و كامسين
فدّان مستفى أفندي ..
بالدّبت أنا ممكن أشيل
توتي كلّو دى الوكت
مصطفى : كضّاب
و كلامك كلّو غلط
و حكاية تجاربك
قلناها توتي أبت
مفتّشك إتظلّت
و إن درت الضّرب
هسّع بتتكفّت
ما بندّيك
و ما بنطلع رجالة
و إن قمنا نتمشّط
الأمين : نقوم نمش وين ؟
توتي الجنّة
فيها الفرض و فيها
السنّة
هيّ أملنا فيها أهلنا
ثابتين كالجبال
مهما الزّمن محنّا
يا سجّان تعال أسجنّا
و يا تاريخ كمان سجّلنا
ما تجهلنا
ماكنتوش : كلام كتير
شيل النّاس دي برّة
قرار توتي منزوء
مش آوز كلام بالمرّة
العبّاس : قرارك حار .. قرارك نار ..
قرارك جمرة …
ما فيش فايدة
المصطفى
لا بدّ من الثّورة
مصطفى : يا ماكنتوش اللّيلة
نط الحوش
ضوق الدقّة
شوف الزرّة
الرّاوي : شوف الزرّة …
اللّيلة وين يا ماكنتوش
وين بتطير
وين هنري و هنفري و جفري ؟
ساعة الحارّة جات
و الحارّة بتورّي
شوف الزرّة ..
طريت (24) و فتحة الكبري
و منع النّاس تعدّي
لا البقعة لا بحري
طريت الشّدر
و رفع السّلاح البدري
و العسكر في الفروع
تحلف تقول القمري
طريت المكسيم و الإنجليز تجري
مشوا على الجّريف
و إندسّوا في برّي
الله أكبر
ماكنتوش : كلام فارغ كتير
برّة ..
مستفى أفندي
الهكومة مقرّة
مصطفى : و توتي مصرّة
تدّيك درس و تدّيك عبرة
بتخوض المعارك
مهما كانت خطرة
البتسوّوا سوّوا
الرّاوي : البتسوّوا سوّوا
كانت نبرة كانت سخنة كانت أحرّا
البتسوّوا سوّوا
واحدنا بهزم عشرة
الله أكبر
الله أكبر
البتسوّوا سوّوا العكّاز قصاد أبو عشرة
البتسوّوا سوّوا
طارت شرارة لمصرا
ماكنتوش : مستفى أفندي بقول سوّي سوّي
(يهرب)
(مؤثرات صوتيّة : الله أكبر - عاش الوطن)
الرّاوي : الله أكبر
وقع الضّرب
بين الرّجال و العسكر
اللّهم أهزم جنود الشّر
القيد انكسر و التّواتي انتصر
بالعكّاز … بالعود …
بفروع الشّجر
الله أكبر
نحن ما بنفشّر
و توتي ما بتقصّر
فيها الرّجال
الضّاربو المستعمر
الإيمان شعارنا
و الله أكبر تهدر
هجموا على البنادق
و وقعوا فيها تكسّر
الله أكبر
بخيت الشّجاع
لسانو سليط
ترجم للخواجة
قال ليهو : إنت جنيت
قلناها بصراحة
توتي قالت أبيت
ما بتخاف
لا من جن و لا عفريت
أسرع يا بخيت ..
أسرع يا بخيت ...
هجموا على العساكر
و ضربوه ضرب مميت
لكن الإله
أولى العناية بخيت
الزّين صاح : "عاش الوطن"
هيّج الواقفين
و العلم البرفرف
قطّعو لفتين
و خارج نفسو قاب قوسين
يا توتي الّيلة
أظهري و اتجلّي
صباح الجمعةموت
ضرب .. رصاص
مزمزي و اتسلّي
فيك الرّجال
أمثال ولد عصملّي
زيد في صلاتك
و على رسولك صلّي
المفتّش اتحنفش وقف
جاى متدلّي
اتصدّالو عصملي
أدّاهو حتّة كف
و قالوا الخواجة نزف
و قالوا الخواجة قضف
عاش ود عصملّي
الإيدو ما بتجلّي
فضل الله البطل
ضرب السّواري رماهو
هو و حصانو
بى رجلو اتوطّاهو
و عكّاز السّواري
الضمري ما خلاه
اتلقّاهو
كان قاصد البطل
الله الكريم نجاهو
ود أبّكر قبض الباب
هو يجر و العسكري يدفر
هو يجر و العسكري يدفر
و الله العظيم
نطّ تقول صقر
جدعو هناك يشخر
و دمّو يخر
ودّ الحفّان
قلع البندقيّة
و هجّج الميدان
قال ليهم : أكشّكم ؟
شوفو يا أخوان
الموت في الفضيلة
و حبّ الوطن ايمان
المك الصّميم
و الله ما فيك شك
الخبتّو ما تحرّك
و الخمشتو ما بنفك
ألحق يا الفكي
حصّل هناك عمّك
عمّك الصّديق
اتلمّوا فيهو و يضحك
بختك يا بطل
ود الإمام ازيّك
التّاريخ كتب
و اعترف ببسالتك
ود حمد النّيل محلّك
شفناهو رافع رايتك
يا راجل يا عظيم
الليلة أمش اتدلّك
و نور الجليل أحذر ديل
يا سلام
هجمت عليهو الخيل
معليش يا بطل
أصبح نهارك ليل
و لولاكم يا رجال
كنّا بنروح بالميل
و ود همزة عليهو أجرو
هدّدو بالسّلاح و ختّ الطبنجة
في صدرو
صاح فيهو الكفاح
شيل السّلاح يا نقرو
عبد الانجليز نوعك دا
بنجيب خبرو
نحن عارفنّكم
ماكن رجال تنسترو
عبد الوهاب
عبد الرّزاق
عبد السّيد
و جملة شباب يا حسين
الليلة اتحزّم
و الله العظيم شمّينا ريحة الدّم
اللهم ما في ندم
الشّعار : عود الخضار
العندو يتقدّم
خلّونا النّموت
و خلّوا النّفوس تنجم
(مؤثّرات صوتيّة : صوت رصّاص)
إيه الخبر يا إخوان ؟
أحمد محمد يوسف سليمان
كتلو الحكمدار بأمر القمندان
(مؤثّرات صوتيّة : موسيقى حزينة -
حمل الجثمان - نغمة حزينة تتبع اكسسوار)
و وكتين مات أصبح تارو أمراً واجب
و السّخط الشّديد علي المدير و الحاجب
النّاس تنادي الموت و وكتو مناسب
الموت في الحقّ كرامة و الجبن عندو عواقب
أحمد مات و أدّى الواجب
* * *
العابد : عوك … عوك … يا أرباب العقايد
النّصراني اتعنّت
خبارك ساكت و الدّقايق تمت
أولادك نفوسهم كشّت
و بناتك دموعهن بشّت
و دم الرّجال
بيهو الأرض اتنشّت
الفاتحة على روح الشّهيد
البروش اتفرشت
و السّجون اتفتحت
و المدافع رشّت
الموت في الفضيلة
و لا الكرامة اتخدشت
ما بنرتاح كان ما جبنا تارنا
و بطونّا اتفشّت
ما بنرتاح كان ما جبنا تارنا
و بطونّا اتفشّت
رصاصة ود يوسف تقول
قدّت قلوبنا و خشّت
يا الشّيخ خوجلي ..
يا أبو الجاز
توتيك أمس ما اتعشّت
شن بتسوّي تاني
بعد الرّصاص اتشتّت
أولادك في ظلم
و الإنجليز تتفلّت
ما بنجيك هناك
يقولو فيك اتحوّت
براك تعال
أكشف السّحابة الغمّت
الأطراف هناك برّي .. شمبات
و العيلفون و الأطراف رجالو
مع الرّجال اتلمّت
و حلال المحس بالقضيّة اهتمت
تعال يا أبو الجاز
أكشف السّحابة الغمّت
* * *
الرّجال سلطو
باقي الرّجال سلطو باقي الرّجال سـلطو
الفاتحين صدورهـم للسّلاح ثــبـــتــو
يا بنات زغردو
أبواتكـن يا بنـات لا رجفوا لا اترقطوا
قالوا الحارّة جـات و الموت خلاص وكتـو
وقـــع اللـقـــط اتلقطوا و اتخبـتـو
لاح عــود الخـدار ختّ الحصـان تحـتو
عـــزم الرّجـــال يا أهلنا برهـنتـو
ماكـنتوش هــــرب ياأخوانا وين إنتو
جـات ساعـة الضّرب إنتو الحدود فـتّــو
مافيـــش نص شـبر اتفقعوا و انشـرطـو
كــان بالـقــلـع ما بتقدرو تـخرتوا
الـفـايت حــــدّو صوفو بنـــحـتّـــو
في مــيدان الضّرب المعركة خسرتـــــو
قـولوا أسلمتــوا بالله لا تسكتـــوا
|
|
 
|
|
|
|
|
| العنوان |
الكاتب |
Date |
| ناسنا.. | محمد المرتضى حامد | 11-24-07, 09:36 AM |
 Re: ناسنا.. | tmbis | 11-24-07, 09:49 AM |
| Re: ناسنا.. | Emad Abdulla | 11-24-07, 10:48 AM |
| Re: ناسنا.. | Ishraga Mustafa | 11-24-07, 10:54 AM |
| Re: ناسنا.. | الزاكى عبد الحميد | 11-24-07, 11:25 AM |
| Re: ناسنا.. | محمد المرتضى حامد | 11-24-07, 12:24 PM |
| Re: ناسنا.. | خالد علي محجوب المنسي | 11-24-07, 12:47 PM |
| Re: ناسنا.. | محمد المرتضى حامد | 11-25-07, 10:27 AM |
 Re: ناسنا.. | عبداللطيف حسن علي | 04-25-08, 04:33 PM |
| Re: ناسنا.. | محمد المرتضى حامد | 05-31-08, 11:32 AM |
| Re: ناسنا.. | محمد المرتضى حامد | 11-24-07, 03:34 PM |
| Re: ناسنا.. | abubakr | 11-24-07, 12:53 PM |
| Re: ناسنا.. | محمد عثمان | 11-24-07, 12:54 PM |
| Re: ناسنا.. | abubakr | 11-24-07, 12:57 PM |
| Re: ناسنا.. | محمد المرتضى حامد | 11-24-07, 01:36 PM |
| Re: ناسنا.. | abubakr | 11-24-07, 01:19 PM |
| Re: ناسنا.. | حيدر حسن ميرغني | 11-24-07, 04:10 PM |
| Re: ناسنا.. | Osman Musa | 11-24-07, 04:44 PM |
| Re: ناسنا.. | فضيلي جماع | 11-24-07, 04:48 PM |
| Re: ناسنا.. | Moawia Mohammed | 11-24-07, 04:55 PM |
| Re: ناسنا.. | خالد علي محجوب المنسي | 11-24-07, 05:21 PM |
| Re: ناسنا.. | هند محمد | 11-24-07, 05:28 PM |
| Re: ناسنا.. | محمد المرتضى حامد | 11-24-07, 09:18 PM |
| Re: ناسنا.. | معتصم عبدالرحيم | 11-25-07, 00:06 AM |
| Re: ناسنا.. | الطيب شيقوق | 11-25-07, 10:15 AM |
| Re: ناسنا.. | محمد المرتضى حامد | 11-27-07, 09:48 AM |
| Re: ناسنا.. | محمد المرتضى حامد | 11-28-07, 00:49 AM |
| Re: ناسنا.. | الطيب شيقوق | 11-25-07, 11:18 AM |
| Re: ناسنا.. | abubakr | 11-25-07, 05:50 PM |
 Re: ناسنا.. | mamkouna | 11-25-07, 11:29 AM |
| Re: ناسنا.. | Ahmed al Qurashi | 11-25-07, 05:03 PM |
| Re: ناسنا.. | abubakr | 11-25-07, 05:43 PM |
| Re: ناسنا.. | abubakr | 11-25-07, 05:46 PM |
| Re: ناسنا.. | خضر حسين خليل | 11-25-07, 05:19 PM |
| Re: ناسنا.. | محمد المرتضى حامد | 11-25-07, 07:38 PM |
| Re: ناسنا.. | Muna Khugali | 11-25-07, 07:44 PM |
| Re: ناسنا.. | munswor almophtah | 11-25-07, 07:59 PM |
| Re: ناسنا.. | محمد المرتضى حامد | 11-29-07, 11:03 AM |
| Re: ناسنا.. | الطيب شيقوق | 11-25-07, 08:04 PM |
| Re: ناسنا.. | محمد المرتضى حامد | 11-25-07, 08:45 PM |
| Re: ناسنا.. | هشام هباني | 11-25-07, 09:19 PM |
| Re: ناسنا.. | هشام هباني | 11-25-07, 09:29 PM |
| Re: ناسنا.. | هشام هباني | 11-25-07, 09:41 PM |
| Re: ناسنا.. | هشام هباني | 11-26-07, 07:12 AM |
| Re: ناسنا.. | الطيب شيقوق | 11-25-07, 09:50 PM |
| Re: ناسنا.. | هشام هباني | 11-26-07, 07:28 AM |
| Re: ناسنا.. | هشام هباني | 11-26-07, 01:16 PM |
| Re: ناسنا.. | محمد المرتضى حامد | 11-25-07, 09:40 PM |
| Re: ناسنا.. | محمد المرتضى حامد | 11-28-07, 04:41 PM |
| Re: ناسنا.. | Tumadir | 11-25-07, 09:59 PM |
| Re: ناسنا.. | الطيب شيقوق | 11-25-07, 10:04 PM |
| Re: ناسنا.. | محمد المرتضى حامد | 11-25-07, 10:59 PM |
| Re: ناسنا.. | الزاكى عبد الحميد | 11-26-07, 05:46 AM |
| Re: ناسنا.. | الزاكى عبد الحميد | 11-26-07, 05:52 AM |
| Re: ناسنا.. | هشام هباني | 11-26-07, 11:16 PM |
| Re: ناسنا.. | محمد أبوالعزائم أبوالريش | 11-26-07, 06:39 AM |
| Re: ناسنا.. | هشام هباني | 11-26-07, 11:28 PM |
| Re: ناسنا.. | د.محمد حسن | 11-26-07, 06:54 AM |
| Re: ناسنا.. | محمد المرتضى حامد | 11-26-07, 09:18 AM |
| Re: ناسنا.. | الفاتح الجنيد | 11-26-07, 10:19 AM |
| Re: ناسنا.. | محمد المرتضى حامد | 11-26-07, 11:57 AM |
| Re: ناسنا.. | saif addawla | 12-08-07, 08:12 AM |
| Re: ناسنا.. | abubakr | 11-26-07, 12:25 PM |
| Re: ناسنا.. | هشام هباني | 11-27-07, 06:57 AM |
| Re: ناسنا.. | maia | 11-26-07, 12:50 PM |
| Re: ناسنا.. | mamkouna | 11-26-07, 03:04 PM |
| Re: ناسنا.. | فضيلي جماع | 11-26-07, 04:50 PM |
| Re: ناسنا.. | هشام هباني | 11-29-07, 03:56 PM |
| Re: ناسنا.. | فضيلي جماع | 11-26-07, 04:50 PM |
| Re: ناسنا.. | فضيلي جماع | 11-26-07, 04:50 PM |
| Re: ناسنا.. | abubakr | 11-26-07, 06:31 PM |
| Re: ناسنا.. | محمد المرتضى حامد | 11-26-07, 08:38 PM |
| Re: ناسنا.. | Moawia Mohammed | 11-27-07, 05:18 AM |
| Re: ناسنا.. | محمد أبوالعزائم أبوالريش | 11-27-07, 07:05 AM |
| Re: ناسنا.. | الطيب شيقوق | 11-27-07, 10:26 AM |
| Re: ناسنا.. | maia | 11-27-07, 10:26 AM |
| Re: ناسنا.. | abubakr | 11-27-07, 11:01 AM |
| Re: ناسنا.. | hameem | 11-27-07, 01:15 PM |
| Re: ناسنا.. | abubakr | 11-27-07, 04:03 PM |
| Re: ناسنا.. | abubakr | 11-27-07, 04:10 PM |
| Re: ناسنا.. | REEL | 11-27-07, 02:24 PM |
| Re: ناسنا.. | معتصم عبدالرحيم | 11-27-07, 09:09 PM |
| Re: ناسنا.. | محمد المرتضى حامد | 11-27-07, 09:15 PM |
| Re: ناسنا.. | محمد المرتضى حامد | 11-27-07, 09:53 PM |
| Re: ناسنا.. | محمد المرتضى حامد | 11-27-07, 09:53 PM |
| Re: ناسنا.. | محمد أبوالعزائم أبوالريش | 11-28-07, 05:35 AM |
| Re: ناسنا.. | الطيب شيقوق | 11-28-07, 07:49 AM |
| Re: ناسنا.. | abubakr | 11-28-07, 08:26 AM |
| Re: ناسنا.. | mamkouna | 11-28-07, 07:42 AM |
| Re: ناسنا.. | اسعد الريفى | 11-28-07, 07:43 AM |
| Re: ناسنا.. | محمد المرتضى حامد | 11-28-07, 09:42 AM |
| Re: ناسنا.. | الطيب شيقوق | 11-28-07, 10:43 AM |
| Re: ناسنا.. | saif addawla | 11-28-07, 12:46 PM |
| Re: ناسنا.. | محمد المرتضى حامد | 12-05-07, 07:42 PM |
| Re: ناسنا.. | abubakr | 11-28-07, 04:43 PM |
| Re: ناسنا.. | noon | 11-28-07, 07:38 PM |
| Re: ناسنا.. | محمد المرتضى حامد | 11-29-07, 08:56 AM |
| Re: ناسنا.. | abubakr | 11-28-07, 07:40 PM |
| Re: ناسنا.. | abubakr | 11-28-07, 07:57 PM |
| Re: ناسنا.. | محمد المرتضى حامد | 11-28-07, 11:53 PM |
| Re: ناسنا.. | عمار زكي | 04-26-08, 09:19 AM |
|
| |
فيس بوك
تويتر
انستقرام
يوتيوب
بنتيريست