يوميات الثورة السودانية – الجزء الثانى

Quote: عجبت كثيرًا للحديث المنسوب للرجل المحترم معتمد الخرطوم والذي أشار فيه إلى أن مجموعة من موظفي محليته استغلوا نفوذهم وسجلوا المحلات التجارية الواقعة بسوق ميدان جاكسون لأنفسهم ثم قاموا بعد ذلك بتأجيرها لتجار بواقع «3» آلاف جنيه في الشهر… «عليكم الله ياجماعة دا مش وضع يخلي الزول يقع علي رقبتو يكسرا كَشْ من الزعلة»، لكن برضو نرجع نقول الانتحار جريمة أكبر من جريمة ناس البيت اللِّقوا أبوهم بيضرب في الدلوكة، وقعدو يرقصو، ما مهم تاني إن كانوا سكرانين، أو كانو مشعْشعين ساكت، المهم إنهم قاعدين يرقصو، ومافيش حد غطى دقنو… لكن تاني نرجع نقول: خلاص هي بقت علي الكناتين ديل، ما ياهو دا التجنيب لي هسي شغال زي اللجان المنبثقة ما وقف كلو كلو، خليهو التجنيب الهبر الراسو عديل وقف، خليهو الهبر الراسو عديل، الاستثمارات الحزبية وقفت، كدي عليكم الله باركوها القصة والله أكبر من خيالي وخيالكم، الشغلة قلع والراجل اليفتح خشمو!! تخيّلوا معي موظفين في محلية يقع على عاتقهم التخطيط والتنظيم والتسجيل لسوق، فيقومون بتسجيل المحلات التجارية المراد تسجيلها للمواطنين بعدالة ووفقًا لعطاءات ومنافسة شريفة ونزيهة لأنفسهم وذويهم، ومعارفهم، أنا لا أستبعد أن يكون الواحد منهم سجَّل لنفسه أكثر من محل، ولا غبار في أن يكونوا برَّوا ذويهم وملَّكوا الأشقاء وأولاد العم والخال، والخالة والعمة، والنسائب محلات في مواقع رهيبة، وبقية خلق الله ياكلوا ظلط، مش الأقربون أولى بالمعروف، تاني في شنو؟. إن كانت ثمة ملاحظة فأقول: واضح إنو الناس ديل اشتغلو بقلب قوي لأنهم سامعين وشايفين إنو الموظف فلان دا كل كم شهر كدى ببني ليهو طابقين تلاتة، والموظف داك كل شهر شهرين داخل ليهو في استثمار جديد، وكلامو كلو بقى بالدولار والإسترليني، وفلان داك كلو يومين تلاتة ماشي ماليزيا، وتقارير المراجع العام بقت حاجة عادية جدًا ومافي زول فتح فيهم بلاغ ومافي زول حاكم زول، مش قلتا ليكم القصة أكبر من خيالنا، ديل مش بالدف ضاربًا ديل ضربو البلد كلها، وودوها في «60» داهية.