Quote: عزاز شامي كتبت: عارفة يا د. سناء، السؤال الراودك ده ما غريب علي، مر علي بشكل أو بآخر كل ما الدنيا تختني في محل تقيم ممن لا أعرف – أكثر ممن أعرف- لأنو العرفة الجد جد بتلغي الحوجة للسؤال تلقائياً، لانو طالما في معرفة و صداقة – معناها انتي friendable * * كلمة نجر اخضر حقوق لغوسة الانجليزي محفوظة وهل كون رضا احد عن كوننا قابلين للصداقة بيضيف أي شيء لتقيمنا الشخصي لنفسنا؟ البديهي لأ .. لانو معرفتك لروحك سابقة لتعارفك بـ (الآخر) أياً كان ، و عليه رضا X أو Y لا يعني انو + ليك او العكس ... انت ياكا انت في نهاية اليوم ولما تحت راسك في المخدة ...
بس هل نحن بنصاحب الكل؟ هنا السؤال ... هل بنتفق مع الكل؟ بالطبع لأ ... كلامي واضح ولا عامل زي فلسفة النكتة بتاعت تفسير الفلسفة بربطها بسؤال "عندكم كلـــب؟ معناها انتو استقراطيين" لوووووولز فترانة احكيها .. العارفها يقولها بالله!
بعدين وش البامية بتاعنا ما بيكون ياهو مع الكل – بمعنى اكثر غموضا انو الشخص القدامنا يا بطلع اجمل ما فينا يا بيطلع "اللهم احفظنا" الجوّانا ومرات بنكون اجمل مع ناس معينين لانهم بيشوفوا اجمل ما فينا...
ومرات في ناس بتشوفنا بعين طبعهم زي ما بيقولوا الخليجيين يعني الفيك بادربو بمعني اكثر دقة ... قد يكون الفيهم البادروا بيهو جميل، وهنا بيكون حسن ظن محض و علينا اثباته، وده اجمل شيء انك تثبت انك عند حسن ظن و تجوّد رويحتك من جوّة وتهبش مكامن الخير فيك. و البعض يبادر بالفيهو من "الما جميل" وساعتها بتبقى عليك صعبة بالحيل لو قدرتي اعفي ليهم سوء الظن– ودي في حد ذاتها صنيع جميل و تدريب كويس للنفس – لو روحك سلبة توريهم حقائق الاشياء عنك – بغض النظر عن مدى ملائمتها لهم، وديل غالبا بتمرقي منهم خسرانة لأنو أصعب شيء انك تثبت سوء ظن ما ليك يد فيهو من الاساس ..!!
كلنا بنقع في فخ الانطباع الأول أو الانطباع ساي – لاننا بشر بصيرتنا محدودة – لو قدرنا نتخطى الانطباع ده بالعرفة الجد بنكون كسبانين في أغلب الاحيان – ويا اكدنا اطباعنا الأول يا عرفنا اننا كنا بنرمي طعمية الظن في زيت حار ...
المهم نرجع تاني للموضوع – هو كان شنو ذاتو؟ لوووولز
غايتو أمشى بالدرب البطابق فيه خطوك صوت حوافرك
في دروب بتلم اضداد وفي دروب بتفرّق متشابهين المهم الدرب يكون بشبهك انت .. انت فقط ولا أحد، لانو في النهاية سنكون عالقين مع روحنا لا مع احد لحل اللغز اللي هو احنا و الوجود ...
وحدي أَفتِّشُ شاردَ الخطوات عن. أَبديتي . لا بُدَّ لي من حَلِّ هذا. اللُغْز!
كما قال درويش اعلاه في جداريته وهو على اعتاب بداية الحياة الجد جد موش الاسفير أو المسرحية الكبيرة الاسمها "حياة"
بالنسبة لي يا سنوية، انتي بتتصاحبي بالحيل، و في دروب كتيرة بتلمنا
***أولا انا فقدت سوائل في المداخلة اعلاه واحتمال ارقد في المستشفى ثانياً، اعتذر عن النقة وبراي ماشة اشوف لي ضل من غير اي مقاومة عنيفة - ود البشرى اوعك تختني في قفة واحدة مع قيقا - سأحتفظ بحق الرد إن فعلت وأخيرا ... العارف هضبرتو مستريح كما قيل في الأثر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة