السراي الصفراء ..

Quote: نديك عربون بالمناسبة دي : واحد صاحبنا - ما بوكر فيس كلو كلو - لما لقى اوراقو مكشوفة قام قدم اوراق اعتماده " حبيب دائم و موفض قلبي فوق العادة " .. قامت قالت ليو : شكراً سألني هل دا يعتبر ( شاكوش )؟ قلت ليو بعرف لي دكتورة متخصصة في الحالات المستعصية دي . اسي انا برفع ليكم الحالة لاجراء اللزم فما فتواكم دام عزكم د. عز

عليك الله ما تدفع حق الكشفية ... كلم التمرجي قول ليهو جايني في موضوع اراضي لووووووووووولز
بس عموما براءة الزول ده ما مشوكش ..أكرر ... زولك ما مشوكش صدر تحت توقيعي و مباركتي الرفيعة وارجو اتخاذ اللازم ...
من الشواكيش ما قتل وصدقني وقت حكى ليك هو زاتو عارف ما مشوكش .. يحمد الله و يحكي في القصة
ولكن سؤالك بيتيح لي الفرصة اني افك هذا اللبس ... هناك لبس دائم بين الشاكوش و كرفيس المشاعر العرضي أو المزمن ..
العرضي ياهو نوع زولك القالو ليهو شكرا أو دايرة أقرى في أحوال أخرى ... غايتو البت دي حبت في البلاط و قرت في الراهبات ..
في بنات بيقولن شتات يا فردة! ولا بالعدم تفك ضحكة مجلجلة في وشو زي الترتيب، وهذا شأن آخر بنجيهو بالمهلة ...
البت قالت ليهو شكرا؟ وتيب؟ ... التصرف الطبيعي للحاقة الساقعة ايه؟ لوووووووولز
يعني مفروض تعمل شنو لو ما عندها كرت الدو في الحالة دي؟
عدد واحد شكرا افتكر مناسبة، موش؟
رد راقي مهزب مرتب يطيب امامو الجلوس
مافي اي موية اتدفقت
لا صور ترجع لا ذكريات تنمحى لا شماتة لا عزّال ... كلين كت .. بدون دماء

الشاكوش له اسباب محددة لا لبس فيها، أولن، تكون في علاقة وطيدة بين الجاني و الضحية، و معيط نجيلة في الجناين و ميس كولات نص الليل و يا بت مرقتي وين؟
وليه فلان عاين ليك؟ الطرحة دي شفافة و الاسكيرتي ده مالو ضيق كده؟ وباقي الوهمة وهي تقطع قلبو بالسؤال التقليدي "حمادة انت بتحبني بالجد جد؟" (جيم جا جبنة جا جرجير)
وهو يا ضناي الكبكبة (آآآآآآآآآآآي يا سوسو انا بريدك ياخ ... انا مكتول هواك يا سوسو) اها وغالبا الضحية بيكون شايف الدنيا بمبي و ابني عشى يا قماري قشة قشة و نادو لينا البنا ..
اها قومي يا بت القى ود جاهز لا قش لا قال كش والشقة جاهزة و الشيلة 12 و 12 موش زي الضحية الكان جاي بمحبتو و غرويد عيونو واقصى وعد انو يبطل السعوط بعد العرس ...
يعني حملتو الانتخابية ما مصروف عليها كويس.. المهم انو الشاكوش لا يقع إلا يكون في غريم آخر في ساحة الزواج أكرر الزواج .. لانو ترك عصفور من أجل عصفور آخر
محض عدم شغلة و شتيت للطاقة الايجابية فيما لا ينفع ...

حتما سأعود لحالة (شكراً) دي