قــوس قــزح *** إحتفاليـة تخصنـي

مرحبا Guest
اخر زيارك لك: 04-19-2024, 08:02 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة بلقيس عبدالله العبيد(ملكة سبأ)
نسخة قابلة للطباعة من الموضوع   ارسل الموضوع لصديق   اقرا المشاركات فى صورة مستقيمة « | »
اقرا احدث مداخلة فى هذا الموضوع »
04-29-2004, 12:51 PM

ملكة سبأ
<aملكة سبأ
تاريخ التسجيل: 06-18-2003
مجموع المشاركات: 3855

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
قــوس قــزح *** إحتفاليـة تخصنـي

    وهمسة ندسـها في منديل زول غشانا وفات ..
    زي نغمة من مسدار بعيد ..
    من سبأ هدهد جميل ..
    قال تعثر .. خانتو الكلمات ..
    غشانا وفات ..
    فرحانين نحن بي جيتو ..
    كفاية علينا قمـر طلَّ .. ضوى فينا شتات ..
    غشانا وفات ..
    ترك عطرا يعشرق ..
    وريشة جميلة ذكرى للزول السمح ..
    تديهـو الجمال والفال ..
    وراحة البال ..
    ودعوة لباب الكريم ..
    شمس تشرق .. وغابة ظلييييييييلة ..
    يجيها الولد المطر من ضهاري الشوق ..
    يقدل بالفرح طربان ..
    تتفجر سماهو .. يرويها ريد وكلام ..
    ينفتح خاطر الزمن دوبيت ..
    وتتواصل غناوي الريد أمـــل ..
    وتتحدد ملامح الأيـــام ..


    _________________________________

    بلقيس ..
    نواََّرة الفريق ..
    يا فرح في قلوبنا كبَّ ..
    يا نغم عالي العبارة ..
    يا نسيم في ديارنا هبَّ ..
    ليك مفروش الطريق ..
    بالأماني وبالمحبه ..
    ونحن فرحانين بيك وحاتك ..
    يا قمر في سمانا شبَّ ..
    يا ليالي طويلة حالمـه ..
    ويا رحيق في روحنا صبَّ ..
    ومعاكِ تاني ..
    نمشي لي زولا سمح ..
    نعزف الالحان أغاني ..
    ندِّيهو من نيلنا البشارة ..
    روعة الشوق والأماني ..
    يدينا من كفُّـو الاشارة ..
    تحية لمطر المعاني ..
    الولد المبسوط قليبو ..
    للحبايب ديمة داني ..
    وتحية للبلد الراقـــد هناك ..
    راقد هناك ..
    مجروح وهانيء ..

    ____________________________________

    بلقيس ..
    يا نون ..
    نغني ليك ..
    غنوة شايلاها الغمامة ..
    مكتوبة بي موية العيون ..
    مرسومة في صفحة قلوبنا ..
    مدسوسة بي رمش الجفون ..
    ومعاكي ننسى مشوار تعبنا ..
    نمشي ليك يا أحلى لون ..
    والزمان داسينو كلو ..
    نهديهو ليك يا ست الشجون ..
    لا فرح ندّخـرو منك ..
    لا وجع .. لاهمسة حنين ..
    كلو ملفوف ليك هدية ..
    مختومة بي عطر السنين ..
    تبقي عليهـا عشرة ..
    والأمانة مكتوب الجبين ..
    ومعاكي برضو ..
    نمشى للزول السمح ..
    نهديهو من مشوارنا وردة ..
    نلقاهو في وادي الغمام ..
    يختم المشوار ويبدا ..
    وللولد المطر ..
    نرسل الأشواق محبة ..
    دا الولد المليان قطارو ..
    بالقصائد والأحبة ..
    ولي نيلنا الحبيب قلوبنا ..
    كل دقة شوق ونبضـــه ..


    ___________________________________

    بلقيس ..
    ايه اقـول يا أحلى زول ..
    نغم حرفِك طلع مليان ..
    هـزَّ في جوَّانا عيد ..
    والحروف الجاية منك داخله فينا ..
    ليها لهفة زول بعيد ..
    فيها همـسـو وبسمتو ..
    فيها فرحو ووجعتو ..
    وكل ما قالـوه ريد ..
    ايه اقـول يا أحلى زول ..
    شَـتْـلَـتِـك مزروعة فينا ..
    نسقيها بي دمع الفرح ..
    دمعة .. دمعة ..
    تبقى أكبر ..
    قطرة .. قطرة ..
    تنمو أكثر ..
    والزمن راضي وشهيد ..
    والبرتكانة الكنتِ فيها ..
    تَعِــدِّى في حبات المطر ..
    كُـنَّا فى أعلى الفروع ..
    نزيد على الحبات درر ..
    نراقب سحرك وروعتك ..
    ننسج افراح العمر ..
    والسحاب القدام عيونك ..
    اديناهو من خاطرنا نسمة ..
    والمنديل البـين أناملك ..
    كل نظرة .. ليهو منك ..
    كانت في عينينا بسمة ..
    وليك يا شدو الأماني .. كل المشاعر العندنا ..
    بس ختينا ريشة عندك .. سحابة تحلم بالهنا ..
    ويلا نمشي للزول السمح ..
    نلقاهو يكتب فى الغنا ..
    ديمة مليانات ضفافو ..
    بالرحيق والسوسنة ..
    ونمشي للولد المطر ..
    داعي الفرح .. صوت المئذنة ..
    نديهو من خاطرنا ريد ..
    ويا نيلنا السلام ..

    __________________________________________
    حنانك يا البرتكانة
    القايمه لينا ..
    ريدك فينا يتحكَّر ..
    انت يا روعة هوانا ..
    رحيقك فينا يتقطَّر ..
    عيونك بالفرح تلمع ..
    صباحك فينا يتعطَّر ..
    حروفك للأمل تجمع ..
    جمالا لينا يتسطَّر ..
    نهاجر ليك ..
    نغازل فيك عيون الصيد ..
    نمسك القمرة بي ايدنا ..
    نهز شعاع العيد ..
    نخطف الصباح نجري ..
    نختو في ايديك ..
    ننادي الزمن يسمع ..
    مواسم الريدة تتفجـَّر ..
    قناديلك نورا يسحر ..
    مناديلك فيها نتبـحَّر ..
    نخت عينينا جوَّاها ..
    عشان بالفرحة ترعاها ..
    تنوم بالعافية والأحلام ..
    ونشيل الغنوة خطوة ..
    ندِّيها للزول السمح ..
    يدَّيها للولد المطر ..
    يغنوها ود وسلام ..


    ________________________________

    نسامحك مرتين ..
    كيف الملكة تبقى حاشية ؟
    وكيف "نعم" تبقى "لا" الناهية ؟
    وانت "ألف" الحروف ..
    "ضاد" اللغات ونون القافية ..
    نسامحك ..
    نسامحك ونحن طالبين السماح ..
    نفرش ليك فراش الروح ..
    نقابلك ديمة بالأفراح ..
    نشيل حبات المطر منك ..
    نفرد بيها رمش العين ..
    تنزل من عينينا دمعة فرح صدَّاح ..
    نغسل بيها لوح حِيران ..
    نشرب محاية العافية والطِيبة ..
    بركة الله والصُلَّاح ..
    وعندنا ما بنكسر ليك خاطر ..
    نشيلك دورق عطر فوَّاح ..
    ونفرح لي يوم لسة ما جانا ..
    بس ليالي العيد دليلا صباح ..
    مكانك في الفؤاد محفوظ ..
    طيفك غيمة في العيون ترتاح ..
    نسامحك ..
    ونحن أصلنا ما بنشيل الشين ..
    قلوب طريِّة من كريم فتَّاح ..
    شالت من الزول السمح طيبة ..
    ومن المطر رِقِّة برِق لوَّاح ..
    ويا نيلنا ليك سلام ..

    _______________________________________

    فوق نجم بعيد ..
    ضفايرو نيلية ..
    فوق قمر منوِّر ..
    خدودو ورديِّة ..
    فوق بحر هادر ..
    جواهو حوريَّة ..
    فوق .. الفوق ..
    جوة .. الجوه ..
    تلقينا غيمة شوق ..
    تسافر ليك ..
    لهفة صباح وعصريِّة ..
    نسافر ليك ..
    نشيل الزاد من جمال روحك ..
    نشيل النور من بريق عينيك ..
    نودع روحنا نعبر ليك ..
    ونحلف أصلو ما نرجع ..
    نهاجر في رحلة أبديَّة ..
    وليك يا شوق ..
    تتقطع أرواحنا عطش ..
    وما نشرب ..
    تتجمد مفاصلنا تعب ..
    وما نتعب ..
    وللنوق العصافير شايلانا زنديَّة ..
    وليك يا شوق ..
    عيون الغيمة والريدَه ..
    جمال اللحظة ومواعيدَه ..
    نهيم في بوادينا ..
    نعيد بالفرحة ترديدَه .. مواسمنا الخريفية
    وليك يا شوق ..
    طريقنا الما مشيناهو ..
    غنانا الما لقيناهو ..
    جداولنا ومشاتلنا ..
    قليبنا البكر نديان .. مشاعرنا الربيعية ..
    وليك يا شوق ..
    خطاوينا المسافرة لي زولا سمح ..
    ينفض من رموشا غبار ..
    يبارك روعة المشوار ..
    يديها للولد المطر ..
    يزرع في دروبه غيم ومطر ..
    شعاع الفرح والنور ..
    وتتبعثر أروحنا عيديَّة ..
    ويا نيلنا ..
    ألف سلام

    _____________________________________


    Quote: يبقي عيدك
    لم تلقى انسان يريدك
    تبقى عايش فى دواخلو
    ويبقى مشتول في وريدك


    تبقى كلمة في بريدو ..
    يبقي مقطع في قصيدك
    تبقى نظرة في عيونو
    يبقى لمسة في خدودك ..
    خصلة تايهه في خيالو ..
    غطَّاها فرحة بي ورودك ..
    بسمة مرسومة في مدارو
    لفتة تلمع من شرودك
    نغمة مكتوبة في نشيدو
    غنوة جاية من حدودك
    انت يا وجد الأماسي ..
    ضي عيونك لينا مرسى
    فيهو نصبح .. بيهو نمسى
    ليهو نفرح .. ليهو نأسى
    بيهو نبقي ممكن في جوف المستحيل ..
    ليهو نركب أمواج الأصيل ..
    نسير في ظلمة حالكة ..
    أصلو ما برهبنا ليل ..
    نلقاك في دنيانا قمر ..
    موشَّح بي جروف النيل ..
    يصب في عينينا نور ..
    نشوف الجنة .. نسكن الفردوس ..
    نقول يا الله يا قدُّوس ..
    يا الله ترعانا ..
    وتحفظ قمر دورين ..
    وهناك ..
    يجينا الزول السمح ..
    معاهو الولد المطر ..
    يملوا الساحة بالأفراح ..
    ننوم بالعافية مسرورين ..
    ويا نيلنا ..
    ألف سلام ..

    _____________________________________

    Quote: ماعارفـة اقـول شنـو ولا شنـو
    انا ممنونـة لك

    ما تقولي شي ..
    أنا ليك اقول ..
    أصلو الكلام حقك ..
    ما انت ست القول ..
    اهاجر لي جذر الكلام ..
    اجيب حرف يشبهك ..
    كلاما أصلو ما إتقال ..
    ليك اقول ..
    حروف نبعت من بريقك ..
    شربت من رحيقك ..
    فيها من معلوم ومن مجهول ..
    أقول ..
    "ممنونة لك"
    دا كلام؟
    ممنونة لي ..
    والله ما ممكن ولا معقول ..
    ويا ريت لو أقدر ..
    أسافر لي بحور الحور
    أهاجر في مرامي الطير ..
    أو أتلاشي في شواطي النور ..
    واجيك شعاع ينوِّر ليك ..
    ويتمدد في عينيك فصول وحقول ..
    ايه أقول ..
    قولي ..
    قولي لو جاني عيد ..
    طاف العمر .. والزمان
    أهداني ريد ..
    ما بنسى زول ..
    ادَّاني من جواهو زول ..
    فرهد كِبر زهور وشتول ..
    ايه أقول ..
    قولي ..
    قولي لي زولا سمح ..
    قولي للولد المطر ..
    قولي لي كل زول ..
    لما تحضني المعاني ..
    لما تنسجني الأماني ..
    واتلفَّح المجهول ..
    يجيني خيالو ياخدني ..
    لي عالم اكسجينو هواي ..
    مداه صداي ..
    صداه غناي ..
    وممدد في سواحل العين
    رؤياهو من رؤياي ..
    ويا نيلنا ..
    ألف سلام

    ________________________________________
    بلقيس ..
    في ربوة تشرب من حنانك ..
    ظَالِّيها الغمام ..
    راوْيـَاها حبات المطر ..
    والربوة في كفين حُنَان ..
    ترقد في سكون ..

    ________________________________________
    بلقيس .. يا شــدونـا .. يا بخـتـنـــا .. يا ما حصل
    ***************
    Quote: تأوهت عواجلُ الحنين شهقةً ..
    دا مقسوم على اثنين بيني وبين الملكة مع عطر الأشواق
                  

العنوان الكاتب Date
قــوس قــزح *** إحتفاليـة تخصنـي ملكة سبأ04-29-04, 12:51 PM
  Re: قــوس قــزح *** إحتفاليـة تخصنـي ملكة سبأ04-29-04, 01:05 PM
    Re: قــوس قــزح *** إحتفاليـة تخصنـي ملكة سبأ04-29-04, 01:12 PM
      Re: قــوس قــزح *** إحتفاليـة تخصنـي ملكة سبأ04-29-04, 01:24 PM
        Re: قــوس قــزح *** إحتفاليـة تخصنـي ايهاب04-29-04, 05:20 PM
          Re: قــوس قــزح *** إحتفاليـة تخصنـي ملكة سبأ04-29-04, 05:40 PM
        Re: قــوس قــزح *** إحتفاليـة تخصنـي جورج بنيوتي04-29-04, 05:37 PM
        Re: قــوس قــزح *** إحتفاليـة تخصنـي جورج بنيوتي04-29-04, 05:40 PM
          Re: قــوس قــزح *** إحتفاليـة تخصنـي ايهاب04-29-04, 05:48 PM
          Re: قــوس قــزح *** إحتفاليـة تخصنـي ملكة سبأ04-29-04, 05:52 PM
            Re: قــوس قــزح *** إحتفاليـة تخصنـي جورج بنيوتي05-02-04, 12:48 PM
              Re: قــوس قــزح *** إحتفاليـة تخصنـي ملكة سبأ05-02-04, 07:24 PM
  Re: قــوس قــزح *** إحتفاليـة تخصنـي ملكة سبأ05-02-04, 05:21 PM
    Re: قــوس قــزح *** إحتفاليـة تخصنـي ابو جهينة05-02-04, 05:28 PM
      Re: قــوس قــزح *** إحتفاليـة تخصنـي ملكة سبأ05-02-04, 07:34 PM
        Re: قــوس قــزح *** إحتفاليـة تخصنـي ملكة سبأ05-03-04, 06:13 PM
          Re: قــوس قــزح *** إحتفاليـة تخصنـي خالد الحاج05-15-04, 09:42 AM
  Re: قــوس قــزح *** إحتفاليـة تخصنـي Osman Hamad05-03-04, 06:27 PM
    Re: قــوس قــزح *** إحتفاليـة تخصنـي ابو جهينة05-05-04, 08:47 AM
      Re: قــوس قــزح *** إحتفاليـة تخصنـي جورج بنيوتي05-05-04, 11:18 AM
        Re: قــوس قــزح *** إحتفاليـة تخصنـي ابو جهينة05-08-04, 09:55 AM
          Re: قــوس قــزح *** إحتفاليـة تخصنـي المسافر05-08-04, 04:17 PM
  Re: قــوس قــزح *** إحتفاليـة تخصنـي صديق الموج05-08-04, 04:25 PM
    Re: قــوس قــزح *** إحتفاليـة تخصنـي lowmamba05-08-04, 05:08 PM
    Re: قــوس قــزح *** إحتفاليـة تخصنـي ملكة سبأ05-18-04, 03:48 PM
  Re: قــوس قــزح *** إحتفاليـة تخصنـي essam&amal05-08-04, 05:04 PM
    Re: قــوس قــزح *** إحتفاليـة تخصنـي ملكة سبأ05-08-04, 06:33 PM
      Re: قــوس قــزح *** إحتفاليـة تخصنـي Frankly05-09-04, 11:48 AM
  Re: قــوس قــزح *** إحتفاليـة تخصنـي THE RAIN05-09-04, 04:54 PM
    Re: قــوس قــزح *** إحتفاليـة تخصنـي ملكة سبأ05-09-04, 06:58 PM
      Re: قــوس قــزح *** إحتفاليـة تخصنـي ملكة سبأ05-14-04, 08:54 PM
    Re: قــوس قــزح *** إحتفاليـة تخصنـي ملكة سبأ05-18-04, 03:41 PM
  Re: قــوس قــزح *** إحتفاليـة تخصنـي hala guta05-15-04, 05:51 AM
    Re: قــوس قــزح *** إحتفاليـة تخصنـي Habib_bldo05-15-04, 09:05 AM
      Re: قــوس قــزح *** إحتفاليـة تخصنـي ملكة سبأ05-18-04, 03:11 PM
    Re: قــوس قــزح *** إحتفاليـة تخصنـي ملكة سبأ05-18-04, 02:40 PM
  Re: قــوس قــزح *** إحتفاليـة تخصنـي hala guta05-20-04, 08:12 AM
    Re: قــوس قــزح *** إحتفاليـة تخصنـي HAMZA SULIMAN05-20-04, 10:09 AM
      Re: قــوس قــزح *** إحتفاليـة تخصنـي haneena05-20-04, 05:11 PM
        Re: قــوس قــزح *** إحتفاليـة تخصنـي ملكة سبأ05-21-04, 12:39 PM
          Re: قــوس قــزح *** إحتفاليـة تخصنـي صديق الموج05-21-04, 12:51 PM
            Re: قــوس قــزح *** إحتفاليـة تخصنـي ملكة سبأ05-21-04, 01:16 PM
  Re: قــوس قــزح *** إحتفاليـة تخصنـي ملكة سبأ05-21-04, 12:58 PM


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de