هذه الأغنية عنصرية لا تليق بفنان(الملحمة) والثورة والحرية الاستاذ محمد الامين!!

Quote: حافظ الإمام محي الدين · كالغاري تعرف يا حاتم أنا تابعت لكثير من نقاشات هنا كنت أنت طرفاً فيها، وأراك دائما ما تستعمل بعض الإتهامات تحاول أن تهاجم بها محاورك علي شاكلة (دمك فاير مالو)، (نفسك قايم مالو) وهكذا متصوراً أنك قد جلبت من الحجج والأدله الدامغه ما جعل محاورك يفقد المنطق ويفلس وكأنك تريد أن تعلن نصراً وتنبِّه الناس له لأنهم لم يلاحظوه خلال النقاش. وبعدين شايفك كررت مسألة إسمي مرتين خطأ (لمام) بدلا من (الإمام )فماعارف دي نوع من الصعلكه وقلة الأدب القاعد تفور بيها دم الناس؟ أنا لغاية هسي بناقش فيك بإحترام رغم إنه مداخلتي الأولى كانت موجهه لصاحب البوست ولفحت إنت الكلام بس قلنا نآخد وندي معاك، أما إذا المسألة جابت ليها قلة أدب ح أتوقف من نقاشك لأنه ح يوديني لسكه أنا ماعايز أمشيها خاصه الأيام دي.

والله نحترمك طالما احترمت كرامة البشر، خلاف ذلك دمك يفور بس

والله أنا يادوبك بطرح في أسئلة من واقع مداخلاتك المضطربة والمتناقضة، فأنا لا جلبت حجج ولا أدلة دامغة، جلبتها انت براك، هسع في زول محترم بيردد كلام زي التحت دا في الزمن دا؟ Quote: وغالبا الغناء والشكر يتم عن طريق النساء اللاتي يكون لهن هذا التأثير القوي عند الرجال ويفعل مفعول السحر لبث الحماس وليس عند خدم أو عبيد لا يقدم غناءهم أو شكرهم ولا يؤخر +++ ليس لها أي علاقه بأوامر يطلقها الشاعر لأراذل القوم لكي يُمجِّدوا سادتهم لو شايف إنو كلامك الفوق دا محترم ومسنود بأي منطق أو أي قيمة أخلاقية تعلي من شأن الانسانية أو يضيف حل للمشكلة المطروحة هنا أو يجنبك تفوير الدم أجب لينا بوضوح على الأسئلة التحت دي، فنحن عايزين نعرف العقلية المستعلية دي بتأسس على شنو بالضبط في سبيل احساسها بسمو ونشوة لحظة إطلاق النعوت دي، هل هي الملامح واللون، مكتسبات ثقافية، قروش، إبل وبهايم، عيوش، أصول وعقارات، جالوص، لغة، دين، علم نافع، علم ما نافع، زندية ساكت، ولا شنو بالضبط؟ 1- تعريفك شنو (للخدم والعبيد) الغناهم ما بيقدم ولا بيؤخر ديل؟ 2- أراذل القوم ديل منو يا حافظ لمام؟ 3- هل الانتساب لقومية العرب حقيقة أو مجازاً يعطي أي تفوق مفترض؟ وعلى أي أساس يا حافظ؟ أنا شايف عباراتك بأنها نتاج عقلية مستعلية، ليه؟ لأنو من الواضح عدم احساسك بفداحة المصطلحات المستخدمة فيها وكأنك بتتكلم عن أشياء، إضافة لذلك، انت ما قاعد تاخد وتدي، بل انت مستنكر حتى استغراب الناس من ورود توصيفات مهينة في حق البشر وبتؤيد التعامل بها في العلن في هذا العام 2016. انت مصر تحصر الموضوع في أغنية واحدة، احتمال لأنك جهزت رد تظنه مقنع، ودا في حد ذاتو قصور وضيق أفق في تناول مشكلة عامة وضحت للناس بدليل النماذج المتتابعة الشاركوا بيها الناس هنا وكلها مخزية والمفروض دمك يفور في رفضها مش الدفاع عنها وتبريرها بالسؤال السمج (القرقد مالو؟ وفيها شنو لو أم قرقد دي شكرته؟). انت تصر على إنو ورود المصطلحات المسيئة في الأغاني (ليس استعلاء) بعكس كل الآراء الواردة هنا بل انت بنفسك بتستخدم توصيفاتك الأشد عنصرية من مفردات الأغاني، ربما لقناعة بأن هذا هو الوضع "الطبيعي" والأمثل للتداخل. انت بتتخيل إنو الآخرين في "ورطة" ما قادر حتى تصيغها بطريقة مفهومة أو تثبت على سبب واحد ليها من جملة سببين، والواضح إنو "الورطة" عندك انت تحديداً في عدم تقبلك استحقاق الكرامة الآدمية لآخرين تراها منقصة في حقك، وهذه حالة فصام وجزع غير مبررة، فلا شيء يقلل احترام الناس لشخصك إن أبديت بعض الانسانية تجاه البشر، فالله غفر لساقي الكلب، هذا إن كان مرجعك لتبريرك "الشين دا" الدين أيا كان. انت بتعتبر إنو الخطأ في اسمك (صعلكة وقلة أدب) لكن في ذات الوقت تصف بعض البشر بكل بجاحة بأنهم (خدم وعبيد) و (أراذل قوم) فهل ترى أن توصيفاتك "الشينة دي" تعتبر "مكرمة سامية" وأن سلوكك هذا لا يدخل ضمن التعبير (صعلكة وقلة أدب)؟ دمك فار لعجزك عن أن "تاخد وتدي" بالمعنى الحقيقي للأخذ والعطاء الذي تفتقده قولاً وعملاً، بالتحدث صراحة وتقديم حلول أو حتى مجرد إجابات على اسئلة بسيطة ومباشرة ومع ذلك تظن أنك تناقش و"تميز نفسك" بمجرد تأييدك هذا السلوك الشاذ غير المقبول اجتماعياً، فلا أظنك تقبل الوصف "أم قرقد" لنساء عشيرتك والأقربين. _____ دافع عن طرحك يا حافظ، ولو جاي بحقك كلمنا عشان نعتذر ليك قدام الناس ديل