المناضل كمال بشاشا...انت مدعو لندوة كبرى بواشنطون!

Quote: والله أنا بشوف مسألة مطالبة أعضاء سودانيزأون لاين باحضار قوائم لاقرباهم المشاركين في الحكومة ونشرها في البورد ومن ثم ادانتهم بصورة علنية ومذمتهم وكيل الشتائم ليهم موضوع سخيف وساذج ولا معنى له ...كونه الناس تمسك في تلابيب بعض عشان ما شتموا أهاليهم وهزأوهم في المنبر شيء يدل على عدم الموضوع وعدم المنطق ... بالجد مرات أنا بشوف المنبر ده زي مدرسة ابتدائية بدون مدير ولا غفير في حي مشهور بالجريمة... البلطجة ديدن تلاميذها وكل طالب فيهم فرح بما يصدر منه... كونك بتتبرأ من بعض أهلك المشاركين في النظام أو غيره حاجة تخصك لكن صدقني لو عاملها عشان الناس تتأكد من وطنيتك ورفضك للظلم أو مخالفتك للنظام حتصور نفسك عند البعض مجرد منافق وحتفقد احترام من يحترموك... الانسان لا يؤخذ بجريرة غيره حتى لو كان والده واحترامك لخيارات الآخرين من ذوي القربى دليل على فهمك واحترامك لحرية الاختيار.. يا أستاذ هشام ربنا قال فمن شاء فليؤمن ومن شاء فليكفر إنا اعتدنا للظالمين نارا احاط بهم سرادقها .. ده ربنا اللي هو الخالق والوحيد القادر على المحاسبة في الدنيا والآخرة... أعطى الانسان حرية الاختيار حتى لو كان اختيار خاطيء وبين ليه النتائج... انت منو عشان تحاسب غيرك؟ .. كل البتملكه في المنبر ده زيك زيي زي أي حد تاني هنا رأي فقط لا غير.. لا انت ولا بشاشا ولا غيركم عنده سلطة عشان يحاسب حد... ده منبر نقاش وليس محكمة ولا يوم قيامة... جد كرهتوا الناس النضال ذاته .. البوست ده بدأ بدعوة للمشاركة في ندوة ... سميتها (دعوة وطنية صادقة ستخرجنا الي افاق ارحب من جحور الاسافير الي الجماهير التي تحتاج الي الخطاب الثوري المباشر علي الهواء مباشر ة في صميم القضايا التي تتعلق بالتغيير)... بالله عليك هي منو الجماهير دي ومتين واشنطون بقت دار السلام أو أمبدة أو الديم .. البتعملوا فيه ده ومستلمين بيه سودانيز أون لاين ليس إلا مجرد كلام في كلام .. لازمك تكون في مسجد أهلك الانصار وتتعرض للضرب والرصاص المطاطي واستنشاق البمبان...مش تقضيه كلام في الاسافير وندوات في واشنطون... ده عشان تكون الآفاق ارحب .. وبعدين شنو يعني تراجي مشت اسرائيل وقابلت المهمشين؟ ياسلام؟ متين اسرائيل بقت جبال النوبة ولا جبل مرة؟ حقيقي كلام غريب وبشاشا الطالع نازل شالوم شالوم.... السلام عليكم عيبها شنو؟ كلها مجرد "حركات" بدون معنى مفيد...وكرهتونا كلمة هامش ومهمش...انتوا المهمشكم شنو في اميريكا وكندا؟ ما زي الفل عايشين ماكلين شاربين ومستمتعين بكل "الادفانتجيس" بتاعة الباسبورت والستزنشيب حتى لو كنتوا سائقي تكاسي ..كيف تكونوا الاقدر على الكلام عن المهمشين أكتر من غيركم....وطبعا البتجرأ يقول النصيحة يتسابق البعض في إظهار أطول قائمة عنده للكلام البذيء والشتائم المخجلة... بالجد الفرجة على بعض أعضاء سودانيز أون لاين تمحن الواحد...وكل واحد ماسك قلمه وواقف للناس للحساب والعقاب ... نافستوا عتيد ذاته في المراقبة والمتابعة وناسين خالص عتيدكم... كل ما الواحد يقرأ أكتر كلما ازداد يقين انه أمام السودانيين مشوار طويل عشان يحلوا عن رقاب بعض وينصرفوا لشيء أكثر ايجابية وفائدة... هشام كلامي ما مقصود بيه شخصك على سبيل التحديد بل مقصود بيه الطابع النضالي والجهادي بتاع سودانيز اون لاين... هسه الواحد لو غربل ما يكتب باسم النضال والوطنية والحقيقة هنا فكرك حيتصفى على شنو؟ إثارة الكراهية ضد بعضنا البعض؟ ثم ماذا؟ ...مجرد تجريم وتخوين بدل خطط وأهداف ، اجترار للكلام بدل أعمال ونتاج أفعال والأدهى والأمر لما تسمع البعض يهدد من لم يعجبه كلامه بنوع: "اصبر حنمشي نقوٍل لاصحابنا من ذوي النفوذ الخواجاتي وحيوروك" جد لما أقرا حاجات زي نوع الكلام ده والقى الشخص القائل موصوف بأحسن الاوصاف الخلقية لا أملك إلا أن اندهش لان القائل (والواصفه) ما قادر يشوف كيف بيصغروا في عيون الناس... والله دائما أقاوم التعليق على شاكلة بوستاتكم دي لكن كترتوها ياخي..