|
Re: بارانويا .. (Re: Emad Abdulla)
|
موجوعة على الوطن المانامت فيهو العين لمن تشبع، موجوعة على اطفال فى الشارع كان ترياقاالجوع موجوعة على الزول العندو بنك فى البيت وما بقسم الحبه للمحتاج ، هجيت ، مرقت فجيت السحاب عشان ما لقيت السفنجة التكسى كراع جاهل فى ود البشير يا عماد ، وبكيت يوم داك مع صوصل ومجدى النور فى الحلة الماقامت الا بوجع اللحظة الكان فيها مجدى النور بجيب ستات العرقى يشاهدن مستورة ، موجوعة على الناس الحلم النابت وما تم ، وما ظنيت فى يوم انو يكمل ، حلم موجوع زى مجدى النور ، زى مجدى النور لمن قال لا ، وما داير ومشى ، زى عميرى لمن قال ما داير ومشى ، حسى يا عمدة القلب انتفخ متضخم من الشافو فى البلد السمح ، بكيت يوم يا عماد لمن كنت ماشة الروصيرص، القرى الجمب الخزان عدمانه اللمبة التوقد لشافع بكرة امتحانو ، ولا الشافع الرفعت ليهو ايدى فشان السلام رفع ايدو ناحية خشيمو داير اللقمة بكيت لمن قلت كفى ، ويوم مشيت مع ناس (صفر يا قطر )المسرحية ، وشفت اولاد ود البشير (المعسكرحق اللاجئين) لا مدرسة لا موية حفيانين ووسخانين وبشوفو مسرح ، قلت للشباب من العندنا ندى الجهال زول سمع كلامى مافى ، مشيت معسكر تانى فى نيالا ، التعب نفس التعب ، والوجع نفس الوجع كان فى نيالا ولا فى امدرمان ، المدارس مافى يا عمدة ، وزول عندو بنك فى الببت ما بدى زول محتاج !!! بدى الناس العندهن ملايين وما بدى زول محتاج ، وااااااى يا عمدة بكيت لمن شفقت على من البكا وصديت ، رجعت بلدا بعيد ، لكين الصورة فى القلب مرسومة زى نقش المروى القديم ولا بتنفك طلاسمو الا بالناس السمحين يجوا صادين ، اااااخ يا عماد وبكيت ولا هامانى شى ، كان البكا بشيل البنك من الزول المنتن دا ويديهيوللناس البستاهلو ، والناس البركبو الهامر فى شوارع الخرطوم تفيت عليهم وقلت ليهم دى بتبنى كم مدرسة وكم مستشفى للاطفال؟ وبكيت ومشيت لانو القلب ما راضى بالبتشوفو العين لمن تقوم من الصباح فى بلد خيرو يغرق العالم ، وتشوف الناس الواقفة بتشحد حق اليستر لون الوش الشاحب ، لما تقوم كل يوم تتمشى فى شارع النيل وتشوف الشفع الببيعو فى الجبنه جايين من الشرق ، ولمن تقرا فى عيون الناس الاسى المامنطوق ، لمن تسمع انة زولة بتسال الله انو عمرها يقصر لانو ما لاقية البستر روح الشفع جوه البيت ، لما ولما ، اخ ياعمدة ، هربت ، حقيقى هربت قبل ما اكتل لى زول ، حقيقى كنت حاكتل لى زول ، من الغبن الشفتو ، يا عمدة ، وبعد دا فى ناس ما شفتهن ، يا حلاتن ، شبان بجوا داخلين المستشفى بالليل ، اى زول ما عندو حق الدوا بختفو منو الروشته وبجيبوها من العدم ، وما بتعرف ديل منو ولا هن بقولو ليك ، ناس سمحين الله يغتيهم ،وفى ناس تانيين بقلعو نوم عينك منك ، ومازلت الزول الببكى من نمة حكامة فى نيالا او نمة من بنات الهوسا فى القضارف ، مشيت من نيالا الى الدمازين والروصيرص كسلا،مدنى ، الابيض وشفت الناس كيف بتموت بالايدز يوميا بالعشرات ، وناس بتموت من التخمة فى الخرطوم ؟؟؟ناس بتموت من السرطان من دنقلا الى امدرمان حتى صارت حالة دايرة دراسة ومافى زول مهتم،دا كلو ما حال ببكى
|
|
|
|
|
|
|
العنوان |
الكاتب |
Date |
بارانويا .. | Emad Abdulla | 03-02-07, 11:39 AM |
Re: بارانويا .. | محمد سنى دفع الله | 03-02-07, 11:56 AM |
Re: بارانويا .. | مامون أحمد إبراهيم | 03-02-07, 01:20 PM |
Re: بارانويا .. | عبدالكريم الامين احمد | 03-02-07, 01:38 PM |
Re: بارانويا .. | Emad Abdulla | 03-02-07, 07:57 PM |
Re: بارانويا .. | Emad Abdulla | 03-02-07, 07:52 PM |
Re: بارانويا .. | Emad Abdulla | 03-02-07, 07:42 PM |
Re: بارانويا .. | عبد المنعم سليمان | 03-02-07, 01:27 PM |
Re: بارانويا .. | Emad Abdulla | 03-02-07, 08:04 PM |
Re: بارانويا .. | بدر الدين الأمير | 03-02-07, 08:21 PM |
Re: بارانويا .. | Osman Musa | 03-02-07, 10:54 PM |
Re: بارانويا .. | Emad Abdulla | 03-03-07, 02:18 AM |
Re: بارانويا .. | Emad Abdulla | 03-03-07, 02:13 AM |
Re: بارانويا .. | بدر الدين الأمير | 03-03-07, 09:48 AM |
Re: بارانويا .. | سلمى الشيخ سلامة | 03-03-07, 01:18 AM |
Re: بارانويا .. | Emad Abdulla | 03-03-07, 01:38 AM |
Re: بارانويا .. | sudania2000 | 03-03-07, 02:27 AM |
Re: بارانويا .. | Emad Abdulla | 03-03-07, 08:41 PM |
Re: بارانويا .. | سلمى الشيخ سلامة | 03-03-07, 03:09 AM |
Re: بارانويا .. | تماضر الخنساء حمزه | 03-03-07, 10:59 AM |
Re: بارانويا .. | nourelhadi awad | 03-03-07, 12:39 PM |
Re: بارانويا .. | حبيب نورة | 03-03-07, 08:50 PM |
|
|
|