قصة الناقد سعيــد بوكرامي ...

Quote: والله مفروض الزول يكمل في الكلام دا .. خاصة بعد ماجاب ناس داخلين زي عادل وتراجي وكمان ما انسي صاحبي ثروت ثوار الدهب .. باين هو زعلان مني من يوم قلت ليهو عنصري لكن جانا الخبر بتاع اوكامبو وقراراته وبقينا نقول يارب نواصل والا نفضل نحسب ونمسك السبحة .. الليلة يوم خمسة وعشرين باقي 4+4 تمانية يوم الله لي يا يوم الاربعاء ما تسرع بعدين شوفها كيف الاربعاء اربعة مارس حا يكون مفصل كبير في التاريخ السوداني والدولي بالمناسبة... المهم انا قلت اني وقفت من حاجة اسمها بتاعين الدعوة والهجرة الباكستان والافغان ديلك وكان فيهم جزائريين وماليين وفيهم مجموعة من السودانيين الما ذكرتها انه خالي طوالي داوؤد واكبر مني تقريبا بخمسة سنوات بعد رجعنا كسلا كنت بحكي ليهو برنامج الناس الجميل دا وانهم كان مفروض يسوقوني افغانستان معاهم لكن سني صغيرة ورفضوا ووعدوني لو جو تاني بياخدوني معاهم بعد سنة .. كنت طبعا بجمل ليهو الوضع حتي اذكر اني اخبرته انهم قالوا لي لو مشيت افغانستان هناك امير الجماعة بيزوجك اغانية بيضاء ،،، رغم خراب الذاكرة الان فيما يخص داوؤد دا لكن بذكر حاجة واحدة بس انه كان من عينة الناس ديك الاهلك يقولوا ليك لو شفناك ماشي مع داوؤد بنقتلك امك تناديك يا ولد تعال هنا انت الموقفك مع داوؤد شنو والله تاني اشوفك الا اكلم ابوك يدقك ،،، يسكر ويسطل وبتاع بنات وكم مرة يمه ( مليكة ) قبضتو سارق من محفضتها طرادة وجنيه ومرة سرق غويشة امه ومشي باعها وعيييييك المهم باختصار بتاع مصايب .. مايجئ زول كمان يقول لي شلت حالو بعد كم شهر جو جماعة تاني بتاعين الدعوة ديل وطبعا انا انحبست في البيت وحموني امرق مرة واحدة الا داوؤد خالي مشي معاهم اها الجماعة قايلنو شهر شهرين زي كدة بعد يلف ويرجع وبعدين ياخد العلقة الفيها النصيب الا صدقوني ما شفناهو تاني الا بعد ستة سنوات ... ايوة مرقها في افغانستان جاهد قاتل وبقي قاعدة وطالبان وعرس وطلق ويجي يزور امه الهي حبوبتي الا لقاها تعيشوا انتو !!! داوؤد دا بالمناسبة وقبل ما ادخل الثانوي العالي وقت عرفنا انه في افغانستان بيجاهد الروس كنت بتساءل الموديهو شنو هناك ولغاية ما مشي انا عارف واحد من الاسباب هو عشان يعرس افغانية بيضاء وبعد ما رجع عرفت انه برضو كان سمع انه البنقو هناك علي قفا من يشيل .. داوؤد قعد في السودان لكن خارج البيت لانه سلوكه واحكامه ما كانت موضع ترحيب من الاسرة ولا اهل الحلة وبعد سنة ما سمعنا الا انه بقي مع جماعة بتمشي تدعو في القري النائية بشرق السودان وفي ارتريا للاسلام ومنها مشي الصومال وقت ضرب الامريكان وقعد فترة هناك بدون ما نعرف تفاصيل غير خطاب استلمو ابوي انه موجود في تنزانيا .. ثم بعدها رجع افغانستان وما سمعنا عنه توقعنا يجينا خبر انه في غوانتانمو ووقت ما سمعنا رجحنا انه مات وتقبلنا الوضع دون ان يحزن عليه احد - غيري طبعا - لاني عارفو زول حلو بس ضلّ الطريق .. اتفاجأت قبل سنة أنه موجود بالصومال وبيجاهد حتي اليوم ويسأل ربه الشهادة ... غايتو يا داوؤد شكيتك علي الله هسع بدل اقعد انضم مع الليبراليين ديل خليتنا نتكلم عنك .. اتمني انك ترجع مرة وتعود للطريق المستقيم وتبطل العبط دا .. او اقول ليك ياخ صلاح قوش قال نحن حا نجاهد اوكامبو وبالمناسبة السودان حا يبقي مرتع خصب ليك ولامثالك في حال تعنت الكيزان .. فبالله تعال راجع من هسع بعدين اعمل حسابك علي ود اختك المؤيد لاوكامبو ما تقول لي لا تاخذكم بهم رأفة ولو اولي قربي وما عارف شنو داك