قصة الناقد سعيــد بوكرامي ...

Quote: ماشي علي وين ؟ سؤال طالما سألناه له حتي مل إجابته, ماشي اجيب لي طعميه للعشاء إنتو ما عندكم شغله غير قعاد المساطب و مباراة الغاشي و الماشي إنشاءالله تجي الطارة ترفعكم واحد واحد, و في طريق عودته من عوضيه ست الطعميه تراه يلتفت يمنة و يسرى كأن لفافة الجريده التي يحملها تحوي ممنوعات و ليست طعميه ... طويل في قامته حتي لكأنه إن مد يده إلي السماء حسبتها لامست قمة عمود الكهرباء عشر سنوات عمرنا في هذا الحي و هو في إرتداء دائم "للجلابية الانصاريه" من مناصري حزب الامه تجده مداوماً علي ندوة الاربعاء بدار الامه و احد معجبي الصادق المهدي و مردداً كل عبارة يتفوه بها يفتخر بان جده الامير حمدان ابوعنجه و يجدها متكئاً له حين يأتي الحديث عن من هم السكان الاصليين لام درمان, يرتشف كأساً ثم يأخذ نفسأ عميقاً بعدها يسترسل "إنتو عارفين أنا جدي منو"!! اها منو يااااا كباكه !! جدي الامير ابوعنجه جا عسكر بجنوده هنا في الخور القدامنا دا و من ديك و عيك, نردفه بسؤال ملح: طيب إنت حزب أمه جناح منو؟ فيرد في سخريته المعهوده: انا حزب أمه( جناح أم جكو) و يتبعها بكأس اخري ,و قبل ان يضع الكأس علي الارض نستدرجه إلي جانب اخر: كدي يا كباكه جلينا من السياسه الايام دي ناس المريخ قالو عايزين يسجلو الحارس بتاعكم .. ينتفض كالثور الهائج فهو مولع بحب ثلاثه اشياء و يفديها بدمه إذا استدعي الامر علي حد تعبيره (حزب الامه , نادي الهلال, صبري بائع العرقي) , الحارس العلبه دا خليهم يسجلو نحن ذاااتنا شطبناهو لسوء السلوك انتو قايلين الهلال دا لعبه ساي؟ نحنا في الهلال زي وزارة التربيه و التعليم , يعني التربيه قبل الرياضه , إنتو قايلين الكلام دا ونسه ؟ علي اليمين زمان الامير صديق منزول لمن كان كوتش جا ,واحد لابس برمودا و مسبسب شعرو و قال عايز يسجل في الهلال : لمن منزول شافو قال ليهو امشي العب بعيد يا ود هوي نحنا ما قاعدين نلعب اولاد مايعين . هو احد ظرفاء الحي و ليس في ذلك شك بيد انه احد القلائل الذين يحفظون امدرمان بكل ما تحتويه من أذقة و جخانين, أحترمه حد الثماله و يقدرني ايما تقدير فقد رمقني بعبارة ما إن أتذكرها يزاد احترامي له و انفجر من الضحك في ذات الحين, وهو عائد من عوضيه و نحن جلوس ننتظره قال لي( إنت البقعدك مع الكرور ديل شنو ديل اولاد ما جاهزين ).