السودانيون في مسقط .. منهم.. وإليهم (صور)

Quote: وتحية خاصة جدا للعم الجليل دهب خيرى والله خسارة كبيرة يا عم دهب عدم مشاركتك من زمان فى حوش بكرى الاسفيرى مخلينا مع ود شيقوق يتضرع ويتجدع فينا ليل نهارعلى كيفو ... ود شيقوق المسنوح على قولك.. هجوم عم دهب عليك عجبنى بالحيل ما ادس منك ما تجى ناطى فى حلقى وتقول لى ماك عروب زى يا بنية ؟؟ بالحيل عروب لكن وحات الخوة عندى ارتباط ازلى مع حبايبنا فى شمال الوادى عموما من محس حلفا سكوت لا تستطيع شيمة النيل الجارفة ان تزحزحه من دواخلى..هيع على قولك بعدين يا شيقا حلفا وتحديدا مصنع حلفا عشنا فيها 10 سنوات .. حفظنا القرى قرية قرية واكلنا الصلابيه والملوحه بانواعها وشربنا حنينهم المعبأفى قلوب الجميع ورقصنا عديلة.. وشتتنا شبالناحول خيوط الجرجار. وتب الفرح جوانى عن نفسى لم اكن محظوظه بتعلم اللهجه النوبيه نسبة لزيارتى لحلفا فى الاجازات فقط.. امااخوتى الصغار فكان لهم نصيب الاسد.. يعنى لو لاقاك عريبى من اخوتى الاتربوا فى حلفا الا تشوف ليك بلد تضاير فيه .. وانت ماشى بعيد ليه ؟ شقيقى زاهر جارك وصديقك ممكن يقعد فى مواعينك لو عرفك بتهجم على اهلوفى حلفا كلو شىء ولا حلفا دى بالله.. فيها ذكريات بعمق الحضارة النوبيه نرجع بالذكريات لسنوات الطفولة.. وكنا حينها فى القضارف الجميلة عشت وترعرعت وسط اهلنا المحس والسكوت .. يعنى من الصباح يا شيقا يوم الجمعه تحديدا وجبتنا للفطور لا يمكن تكون عصيده بس .. لانه فى فريق تانى يعشق الملوحه والقراصة شويه شويه انتصرنا على فريق العصيده .. اللى هم الوالده والوالد عليه رحمة الله بقى فطورنا ملوحه او التركين ..شويه شويه مشينا عشنا وسطهم فى حلفا التحيه للجميع وتحية محبة وحنين لاهلنا فى حلفا الجديدة وفى قضارف الخير ولك عمنا الاديب دهب الاحترام والتقدير ولكل المتداخلين فى هذا البوست خفيف الظل