شحدة اتموسفيرية.... عاجل

Quote: الدكتورة بيان عندها كمبيوتر من زمن حفروا البحر زي ما كانت بتقول حبوبتي الله يرحمها اها ودت الكمبيوتر للصيانة وطلع سعر الصيانة قريب من سعر كمبيوتر جديد وبرضها مصرة علي صيانته وانا كم مرة قلت ليها حقو تشتري ليكي كمبيوتر جديد الكمبيوتر ده اكل منه الدهر وشبع ابت تب قالت هي متعودة على الكمبيوتر العجوز ده وما دايره تفارقه ابدا مهما كلفها من ثمن الظاهر الدكتورة مقتنعة بالمثل البقول الشجر الكبار فيهو صمغ اها قلت مادام ده رأي الدكتورة وما دام انحن ناس كبار وفينا صمغ قلت ليها طيب عرسي لينا بناتك اها وياريتني لو ما قلت ليها الكلام ده قامت بزعل شديد قالت لي انتو ناس كبار وما بتخجلوا الواحد فيكم داير يعرس ليهو واحدة لو عرس بدري شوية بتكون قدر بته وبناتي ديل صغار شديد عليكم كلهم مواليد الثمانينات احسن ليكم تمشو تشوفوا بنات الدراسات العليا بتاعين الدكتورة ديل مناسبات شديد معاكم اها من اليوم داك بقيت كله ما اجي ماري بجمب اي مراية اقنب اعاين علي روحي شديد في المراية والغريبة مرة اشوف روحي شباب لمن اقول وا حلاتي ومرة اقول الله يرحمك يا ايام شبابي كده خلوني اقول ليكم عمري كم بالضبط عشان تحكمو براكم وتشوفوا هل فعلا كبرت ولا فضل فيني باقي روح انا قبل ستة سنوات بالضبط عمري كان قدر عمر اخوي البكر قبل سبعة سنوات من التاريخ ده وكان عمره قبل السبعة سنوات دي ثلاثة وعشرين سنة بالتمام والكمال مع الجمعات والعطلات الرسمية هسي عليكم الله كده وروني هل انا كبرت لي درجة اني ما مفروض اعرس لي واحدة عمرها بين 18-22 سنة؟