Post: #1
Title: نــدى القلعــة..و...الصــور الخليعــة" توجد صورة"
Author: سجيمان
Date: 06-25-2005, 11:27 PM
نان انتي ديمة يا ندى... نضيفة ومستحميه.....و تلمعي وتتلاصفي....وقدر ما الزول يكوس لي شي شين فيكي عشان يشنفو ما يلقاهو.. من راسك لي كرعيكي.....ال بيحمي الناس شنو.. ما يشيلو صورتك المتصوراها عند اهلك..ويحمو بها....ويشيلو حالك؟؟؟.......يا ندى عايني لي اخواتك الفنانات والما فنانات ديل.... الواحدة فيهن غبشا....مافي شي بي تلمع فيها علا الوشي براهو البي يلمع....يقولو ليها عندك حفلة..... تدّخل اصابعين ايدا الخمسة في علبة الكريم.. والكريم والعصيدة عندها وااااااحد.... وتجلط وشيها... وتقعد تدعك فيهو.... الزول لو جا ماشي بي برا العوضة الفيها الفنانة .... يسمع طبق طبق طبق.....يحلف يقول في زول قاعدين يكفتو فيهو بي جوا.....وقت يجي يعاين يلقى دي المطربة فلانة وقاعدة تمسح في وشيها بالكريم......وتمشي الحفلة وتغني في امان الله.. والمكسرين بالصف....السماحة الفايته الحد يا ندى كعبة...والجيهة الفايتة الحد برضو كعبة....اها تراهو حسي سو فيكي النضم الما راكب عدلو دا؟؟؟؟......
والله داك الليلة... شفت شريط فيديو مسجل لي مادونا..... بتعرفي مادونا؟.... اوعي تقولي لي اخت ماردونا.... في حوا وادم ما بيتلاقو....المهم مادونا دي طلعت المسرح.. ولابسه ومستورة من راسا لي كرعيها.... وانا براي استعجبت قلت يا ربي تكون ما دونا دي جنت.. واتحجبت؟....ما غنت لها غنيتين....علا اشوفها وبلا بسم الله.. ومنو وليها..قعدت تملص في هدومها.... قطعة قطعة....وتجدع فوق الجمهور..و اكان شفتي امة محمد دي تتخاطف في الهديمات....لي عند الهيديمات المافيهن فايدة ديك..ملصتن.. وقعدت ساااااااااكت.............وتغني في " طراوة يا سعد قشرة".....لافي زول نضم لا في زول شال حالا.......
غايتو انتي يا ندى ان دُرتي شورتي... انتي تاني.... حتى في بطن بيتك..... بطن بيتك دا شفتيهو؟.. تلبسي جلابية وقفطان..وتحومي... القدر مو معروف....
لاقاني نضم في الانترنت وقالو تسجيل ليكي.... قلتي فيهو انو الصورة صوّرك ليها ولدك بالموبايل....والموبايل اتسرق والزول السرقو لقى الصورة ووزعها.. التسجيل دا ان بقى صُح نضمك ..... تبقي اتلومتي في نفسك......يا ندى انتي جنيتي...؟.الدوندوهاب الوقع فيكي شنو؟....لي شنو ما نكرتي؟.... لي شنو ما قلتي دي ما انا؟......اول مرة اشوف لي فنانة ما كضابة......انكري ..وحات الله يصدقوكي.... وبعدين انتي عارفة حسي الصعاليك بقو... يلقو صورة راس زول..مرمية في واطة الله دي.... يجيبوها الكمبيوتر ويسو فيها الدايرنو.....يعني كان ممكن تنكري وتختيها فوق الكمبيوتر....انتي ماشفتي البنية اليمانية القالو اتقلبت كعوبية عشان رمت كتاب الله في الواطا؟... طلعت لا في بت اتقلبت ولاحاجة..كلو شغل كمبيوتر.....
انا غايتو خاسة نفسي.. ماني مصدق حتى ان انتي قلتي دي صورتي.... ماني مصدق ماني مصدق....وبعدين انا ما موجعاني ومزعلاني الصورة... الانا المزعلني.. الشيشة القاعدة تشربي فيها في الصورة دي.... لي شنو تشربي شيشة؟....وانتي مرا ما ساهلة وما هينة.. تشربي شيشة؟ شيشة يا ندى؟...................الصعوط مالو؟
صورة.. البت اليمانية.. القالو اتحولت لي كعوبية.....
|
Post: #2
Title: Re: نــدى القلعــة..و...الصــور الخليعــة
Author: Samer Osman
Date: 06-26-2005, 00:06 AM
Parent: #1
..و اكان شفتي امة محمد
سجيمان أفرز .. إتسجم غادي لكن ما تهبش أمة محمد برغم ما تعانيه من سجم ورماد حل فوق رؤسنا منذ أمد بعيد
التحية لك وأنت توزع الفرح كشاي الصباح في بيوت الأعراس أيام زمان
لكن شهيتونا في صورة ندى وهيأت شعوري مع جملة "توجد صورة" وبقيت أبلع في ريقي لحد ما لقيتا صورة ندى مسقط ..
|
Post: #5
Title: Re: نــدى القلعــة..و...الصــور الخليعــة
Author: سجيمان
Date: 06-26-2005, 02:27 AM
Parent: #2
سمير عثمان
كل البشر بعد الرسالة امة محمد حتى الما مسلمين..انا فهمي كدي غايتو
| Quote: التحية لك وأنت توزع الفرح كشاي الصباح في بيوت الأعراس أيام زمان |
حسي في بيت العرس مافي شاي صباح؟.. لا حول الله
|
Post: #3
Title: Re: نــدى القلعــة..و...الصــور الخليعــة" توجد صورة"
Author: حمزاوي
Date: 06-26-2005, 00:55 AM
Parent: #1
غايتو انتي يا ندى ان دُرتي شورتي
الشورت انواع يا اخوي سجيمان
ومن الشورت ما ستر
انت عندك فايض شورتات (تكبير شورات)
تعرف يا اخوي جموع الكثرة والف منتهى الجموع
على فكرة فين منتهى الرمحي
والفلجة في سنونك
أحي انا
ما تنفع معاها السفة
وغفرانك يا ربي في دار مالي
وقام السيرة لي كدباس
|
Post: #4
Title: Re: نــدى القلعــة..و...الصــور الخليعــة" توجد صورة"
Author: Dr Mahdi Mohammed Kheir
Date: 06-26-2005, 01:30 AM
Parent: #3
الأخ العزيز سجيمان
تحياتى الطيبة
الصورة التى أحضرتها أعلاه , وكانت أيضا تشكل مادة بوست سابق عن فتاة عمانية دنست القرآن " فسخطها الله " , أتضح أنها صورة من مجموعة تماثيل معروضة فى معرض للترفيه عن الأطفال .
ودمت
|
Post: #10
Title: Re: نــدى القلعــة..و...الصــور الخليعــة" توجد صورة"
Author: سجيمان
Date: 06-27-2005, 02:55 AM
Parent: #4
دكتور مهدي محمد خير
| Quote: الصورة التى أحضرتها أعلاه , وكانت أيضا تشكل مادة بوست سابق عن فتاة عمانية دنست القرآن " فسخطها الله " , أتضح أنها صورة من مجموعة تماثيل معروضة فى معرض للترفيه عن الأطفال . |
شفت يا دكتور..وممكن جدا تكون صور ندى ممنتجة ومسروقة من اي بكان
|
Post: #7
Title: Re: نــدى القلعــة..و...الصــور الخليعــة" توجد صورة"
Author: سجيمان
Date: 06-26-2005, 08:55 AM
Parent: #3
حمزاوي
| Quote: وقام السيرة لي كدباس |
انت عارف كدباس دي قاعدين يودو ليها الناس المجانين؟؟؟؟؟
|
Post: #6
Title: Re: نــدى القلعــة..و...الصــور الخليعــة" توجد صورة"
Author: waleedi399
Date: 06-26-2005, 03:55 AM
Parent: #1
يا دكتور سجيمان ..| Quote: لي شنو تشربي شيشة؟....وانتي مرا ما ساهلة وما هينة.. تشربي شيشة؟ شيشة يا ندى؟...................الصعوط مالو؟ |
والله كان دي ندى وبتشرب في الشيشه في الصورة وقالت دي انا والله ياها المبالغة بعينها ..
ليتها أنكرت .. والنت مليان عجايب .. والشهرة متاعب .. وزي ما قلت يا دكتور ..
ندى ما محتاجة لي كركار .. ولا فير ولا لفلي .. ولا امنجوي
دا جمال طبيعي .. والله ما مزور .. وهنيالك يا دكتور  
|
Post: #8
Title: Re: نــدى القلعــة..و...الصــور الخليعــة" توجد صورة"
Author: Maksab
Date: 06-26-2005, 12:43 PM
Parent: #6
سلام cj man انا عضو قديم هنا في المنبر و بوستاتي قليلة شديد.. مسال حي للكسل السوداني المزعوم.
لكن بعد ما قريت بوستك ده قلتا الا اضحك اونلاين
هاهاهاهاهاهاهاهاهاهاهاها
LOoooooooooooooooOOOOOOOOOOoooooooooooooooooooooOOOOOOOooooooooooooooooLZ
يدييك العافية
|
Post: #14
Title: Re: نــدى القلعــة..و...الصــور الخليعــة" توجد صورة"
Author: سجيمان
Date: 06-28-2005, 04:58 AM
Parent: #8
مكسب
| Quote: لكن بعد ما قريت بوستك ده قلتا الا اضحك اونلاين |
كويس.. اهو كدا اثبت انو السودانين ما كسلانين
|
Post: #11
Title: Re: نــدى القلعــة..و...الصــور الخليعــة" توجد صورة"
Author: سجيمان
Date: 06-27-2005, 12:35 PM
Parent: #6
وليد 399
Quote: ندى ما محتاجة لي كركار .. ولا فير ولا لفلي .. ولا امنجوي
دا جمال طبيعي .. |
وحسادها كتار....والناس ما بتريح
|
Post: #9
Title: Re: نــدى القلعــة..و...الصــور الخليعــة" توجد صورة"
Author: falcon
Date: 06-26-2005, 12:55 PM
Parent: #1
غايتو ياسجيمان باقي لي طرف السوط وصلك
ياها دي ندي القلعة المكسرة فيك اظنها شافت الصورة و قايلاك بتاع معسل و جراك
عليك الله خليك في كونزليزا بتاعتك دي احسن ليك و قالوا انت فتحت ليها قامت
عملت ليها مأمورية للشرق الاوسط و دخلت لسعودية في الرحله و الغرض سمعنا بدور عليك
لما واصلت هروبك منها عملت حجه انها جاية السودان تحضر تنصيب قرنق و بالمرة تشوف
نسابتها اهل سجيمان
لك التحية
|
Post: #15
Title: Re: نــدى القلعــة..و...الصــور الخليعــة" توجد صورة"
Author: سجيمان
Date: 06-28-2005, 09:40 AM
Parent: #9
فالكون
Quote: عملت حجه انها جاية السودان تحضر تنصيب قرنق و بالمرة تشوف
نسابتها اهل سجيمان |
عليك الله شوف المرا دي....دايرة تكلفنا وتسوينا في ضبايح كيفن؟
|
Post: #12
Title: Re: نــدى القلعــة..و...الصــور الخليعــة" توجد صورة"
Author: سجيمان
Date: 06-27-2005, 09:43 PM
Parent: #1
*
|
Post: #13
Title: Re: نــدى القلعــة..و...الصــور الخليعــة" توجد صورة"
Author: ابو يسرا
Date: 06-28-2005, 00:49 AM
Parent: #12
عزيزي ساد مان لك تحياتي
تعرف عندي صورة للبنت الحلوة ندي حاجة رهيبة رهيبة وانا متاكد لو ارسلتها لك ستخرجك من زهج الغربة
كان ممكن انزل الصورة قى هذا البوست لكنني خائف ان تلاقني ندي قضائياً وتقول ان هذه الصورة من دولابها لذلك اذا كنت تريد الصورة فاكتب لى على بريدي
[email protected]
|
Post: #16
Title: Re: نــدى القلعــة..و...الصــور الخليعــة" توجد صورة"
Author: سجيمان
Date: 06-28-2005, 02:15 PM
Parent: #13
ابو يسرا
| Quote: وتقول ان هذه الصورة من دولابها لذلك اذا كنت تريد الصورة فاكتب لى على بريدي |
طيب..... سمح
|
|