أمثال سودانية من غرب السودان

أمثال سودانية

المثل العامي خاصة خلاصة تجربة أجيال وغرب السودان على وجه الخصوص يمتاز بهذا النوع من الأدب. وسأورد هنا بعض الأمثال من البيئة في غرب السودان .. كان عجبتكم بزيدكم وكان ما عاوزنها فنقول معليش للإزعاج

ألمي حامي ولا لعب قعونج: الموية السخنة لاتصلح للضفادع لتلعب فيها
فلان اللعرف لتنبله طقّة: فلان يدبر أمره بنفسه
دبرا في وووه جيبو حمار أكوه: الدبرة في الأسد .. لكن أكواالحمار
الجقموه قرطع: يعني أدوه شبر سواه متر
غلبها بني بيتها قعدت تطارد الكلاب: غلبها راجل جات تأدب حماها
جافلة وغزو ليها كلاعيت: معني عايرة وادوها سوط
الجلابة بعرفوا ركوب حميرهم: الشخص يعرف خلاصه بنفسه
الجفلن خلوهن أقرعوا الواقفات: ركّزواعلى القدامكم الفات خلوه
دوار جمل نسيبته كان لقاه بغني وكان ما لقاه بغني: في الحاتين إما فرح أو شامت عليها

دي العينة يا جماعة كان عجبتكم قولوا عوك وكان ما عجبتكم قولوا وقف ياعم كانتونا

السلام عليكم الاستاذ cantona

تسلم علي الامثال الجميله والشرح الواضح

ويا ريت نسمع من الزياده

فيك الخير
زيدنا من حكمة الشعب الفصيح

تسلم
و يلا المزيد
جد دا الدايرنو
كيف ما عجبتنا ديل انحنا و ديل كلماتنا الضيعناها
شكرا لك و انت تذكرنا ولو انو نصها جديد على
تسلم يا راقي

الأحباب عزّة ... محمد سيد أحمد .. وأمدرمان
شكرا ليكم وإليكم المزيد

دا ما كلام بطلعوا بيه الدرنقل: (الدرنقل هو السرير الدبل عند العرب الرحّل). المعنى أن هذا الكلام ما بملى اليد
الفولة بتتملي وبقارة بجو: يعني لابد وانك ستحتاج لي مرة أخرى
كراع البقر جيابة: نفس المعنى أعلاه
فلان فزع للموت بالريكة, (الريكة وعاء لنقل قناديل الذرة يمكن تعبئته وتفريعه بسهولة) والمعنى أن فلان سعى إلى حتفة بيده باسرع واسهل الطرق
اللحماية التريتا في اللحم تخنقك: الزول البتريده ما بجيك على المراد.. يعني يديك شاكوش ياأمدرمان
أرتع مشكل: حاسب على نفسك وكلامك
الحوض فيه بلومة: (البلوم نوع من الطيور الصغيرة وجميلة) : نفس المعنى أعلاه
البليلة بحجارها: نفس المعنى أعلاه
أم منقور كله قدوما أحمر, (ام منقور نوع من الطيور الجميلة في كردفان) ولون منقاره أحمر. المعنى: ان الجماعة كلهم رأيهم واحد لا يغرنّك إختلافهم المظهري
خصيمك يبين ليك في مدغ البليلة: المعنى القاصدك في الضلمة يحدر ليك
النية زاملة سيدا: الزاملة هي الركوبة سواء كانت حصان جمل او نيسان: فكلما كانت زاملتك جيدة ستصل إلى هدفك أي كلما كانت بيتك صافية ربنا بوفقك لغرضك
الجواد ما بربطوه في مربط البغل: المعنى ووضع السيف في موضع الندى مضر كوضع السيف في موضع الندى
الندى الأولى هي قطرات الماء والندى الثانية هي الكرم

كفاية كدا يا أمدرمان

الاستاذ كانتونا:
نحن في انتظار المزيد
وكتروا لينا من شغل التراث ده بالله
عشان نقدر تقول انو نحن سودانيين
دمت لنا ايها الرائع.

..
.
سلام ولد ابا
باقى اخوك متعجل
بس اشرح ليهم المثل دا تانى

دبرا في وووه جيبو حمار أكوه
او
الدبره فى الجواد جيبوا الحمار اكوه
باقى .... العندك دول ما بعرفوها ليك
الكلام دا الا بالتفصيل
وحمدو فى بطنو

بغشاك امباكر

سلام

العزيز كانتونا

لك خالص التحايا وأنت تتحفنا بكلام أهلنا العزاز في غرب السودان

حيث اشتهروا بالحكمة والشجاعة واسمح لي عبر هذه النافذة

أن أسطر بعض الأمثال

1- أم سلمبويتي ولا كدكاي زوول

2- الفي دبره عويش ولا بنطي قش

وسنواصل معك في هذا البوست الجميل لنعيد تلكم الأيام النواضر


ودمت

الجعلي

تسلم
يا كانتونا ياحبيب الناس
والطلبات كترت انا شايف

الحبيب كونتانا..وبقية الاحباب
الصقر كن وقع كتر البتابت عيب،وببساطة غير مخلة معناه اركز وشيل شيلتك..
شوف العين مابيكتل غزال، وهو مانيل المطالب بالتمني
ده في همه وده في جيزة امه، ويعادل الناس في شنو والحسانية في شنو..
ونسة بنات عدن بنات، عدن بمعنى قدمن اي تقديمة البنت لصاحبتها بعد الزيارة ومعناه كلام لا يحمل التزام
البي فارح الجيروات من هلبت ينخشنا..
البوقد ناره بيدفاها..
تقم كرايو وتقع ربايط..
العتيلة ما دوامه..
الخريف اللين من امبواتيرا بين
امسكني مرخي
و ماتقطع حبل البجلة
دمتم
كبر

الأحباب العزاز
تبلدينا .. kabar ... والجعلي

أولا الجعلي أنت باين عليك جعلي من إندنا .. يعني جعلي غرب لأنه الأمثال الأوردتها دي من عمق دارفور..وسأشرحها عشان أكيد الناس ما حتكون فهمت معناها.
كذلك سأشرح الأمثال التي أكرمنا بها أبناء العمومة كبار وتبلدينا.. طبعا ديل ناس كردفان الغرّا أم خيرا جوه وبرّا...

البي فارح الجيروات من هلبت ينخشنا..المعني: إذا تعاملت مع من هم دون مستواك فتحمل النتيجة.. ومن يلعب مع صغار الكلاب يعرّض نفسه للخربشة منها

البوقد ناره بيدفاها..المعنى: من يوقد نار الفتنة لابد وأن تحرقه هو

تقم كرايو وتقع ربايط..
ياكبار يأخي دي إلا أشرحها في مقال لأن المعاني بتاعة الكلمات ذاتها عايزة شرح... ودي نخلييها لأخونا أم درمان يشرحها لينا

العتيلة ما دوامه..المعنى: الغريب ما تعده من رجالك والدين ما تعده من مالك

الخريف اللين من امبواتيرا بين: أم بواتير هي الرعود والسحب الداكنة. المعنى انه كلما كانت الرعود كتيرة والسحب متراكمة الخريف بيكون تقيل وكويس للمزارعين والرعاة. وهذا المثل يعادل المثل القائل: الخريف من رشّته والعريس من بشته

امسكني مرخي... المعنى طوّل بالك وما تعصر علي
و ماتقطع حبل البجلة.. المعنى ما تقطع حبل المودة أوصلة الرحم

أم سلمبويتي ولا كدكاي زوول .. المعنى مطابق للمثل القائل: لالوبنا ولا تمر الناس
أم صلبوية هي الفأر الصغير ويسمى أم سي سي. والكدكاية هي فأر كبير يسمى الجقر... طبعا يا أمدرمان أكيد إنت ما ذقت شوربة حمام الشقوق .. ولاّ عاوز تقول لي كمان حمام الشقوق ذاتو إنت ما بتعرفو!

الفي دبره عويش ولا بنطي نار.. المعنى:الفي قلبه حرقص بقوم برقص

على حسب طلب الأخ تبلدينا المثل البقول: دبرا في وووه جيبوا حمار أو اكووه وفي كلمات أخرى: الدبرة في الحصان جيبوا الحمار أكووه.. المعنى: عينك في الفيل وتطعن في ظله

نلتقي في بوست آخر

عمكم كانتونا

السلام عليكم والرحمه
الاخ العزيز cantona
والله الععظيم خلتني اضحك زي المجنون علي العموم.


تقم كرايو وتقع ربايط..
انا كان قدرته علي شرح المثل ده انت شوف ليك مكان تاني اقعد فيهو

بعدين حمام الشقوق بعرفو كيف ما بعرفو . اكلتو وانا ماشي علي حلفا وتقريبا في (السندات) وكان ما تخوني الزاكره سنده رقم 6 ولك التحيه يا حبيب كانتونا وكل الاخوان

وعايزين نسمع كمان امثال جعلتيه شايقيه شمال جنوب شرغ يا شباب
شوف لينا الجلابه ديل يا كانتونا

كنتونا سلام
تبلدينا حبابك
كبر مرحب بيك ويا أخي افتح بريدك تلقي رسالة
والأمثال ماشاء الله برام برام بس الشرح عند الطلب
شوف العين ما بكتل غزال
الخريف اللين من تباشيرو بين
المرة كان فأس ما بتكسر الرأس
كان دارنك يسون قليلك فوت ولو أبنك يدعنك بالموت
الرجال دناقر ما كبر عناقر
الرجال شرادة ورادة
الدنيا أم قديد ولا المرة أم وليد
الرهيفة التنقد
الحبل بنقطع محل رقيق
المحرش ما بكاتل
الباباك في الخريف بقول ليك مليتني عجاج
طق القراف خلي الجمال تخاف
الدار بجاهدوا فيها أهلها
كسر جرا وقابل شرة
قانص لي الغزال لمن لقيت الفيل
ما باللحيل علي لحم السخيل هو باطل وسيدو بكاتل
كان ما فية شق ما بقول طق
النار تلدي الرماد
الجواب يكفيك عنوانة

وللمزيد إنشاء الله

بحيراوي

البحيراوي..كتر خيرك ورسالتك ما لميت فيها وأكيد زمانها جاية في الدرب وتوقع التواصل..معليش لطشنا بوست اخونا كونتاناون..
ومن بعض الامثال..
الفولة بتتملي وبقارة بيجوا..
ومعناها خلي ليك خط رجعة
العادة درجاوالكلام في سالفة..العرف مصدراحترام والسوابق معيار القياس..وهذا المثل يؤسس فكرة اعتماد السوابق القضائية كمصدر لتفسير القانون..
الدم بودر الخطا..يعني اذا اخطأ عليك احد لا تغالي في ردك والأ فقدت حقك..وهذا المثل يؤسس لقانون المسئولية التقصيرية..
تلصق الطين ما ببقى نعلي..
الرجال تحت الشوك..
يوم تاباك تغلب السلسل الجباد ويوم تدورك بحبل العنكبوت تنقاد..
ودمتم
كبر

.. الشباب العزيز... كبار البحيراوي .. أمدرمان.. كحلوش

البقول راسو موجعوا يربطوا لي رجلو
الزعلان جرابو يابس
أبالاي برقبتو بربطو من رجلو مالو؟
البفنقل بلباسو
البلقى الهبوب بضرّي
الصبر حبل لباس
شدرة كان مالت بنتكي في إخيتو
سيد الزاملة اولى بركوب قدام
بقرتك كان دايرة تموت بيعها لراجل أمّك
تسوي تندم ولا تخلي تندم
كان عندك قطران أمسح بيا جملك
الفتريتة ما بتبقى رغيف
عريان العرض الهدوم ما بتستره
زولين تدور غناهم .. راجل بتّك وصاحب دينك
الأبلم ما شقي .. شقي البتكلم معاه
الحس يجيب والجوع يقتل
دخانكم يدخّن وجوعكم يمحّن
أبوه جا ما محتاج لخاله

جراداية في لباس ولا بعضّي .. إلا قعادو ولا حلو

وإلى اللقاء

والله بوست لذيذ ومسلي ومفيد ومعلم ومذكر بكسر الكاف طبعا، وكأننا في راكوبة المهندس نشرب الباتيل، وكان جغمونا من بوشتهم كمان نقرطع

تعيشوا يا كنتونا وكبر وتبلدينا والجعلي وباقي العقد النظيم
باقي نحن عشان الزمن ضيق ما بنقرا الا الفيه الثمرة

كتر خيركم

الرجال شرادة ورادة
علي وزن الحرب كر وفر
جرادة في إيدك أخير ليك من ألف طايرة
أم جركم ما بتاكل خريفين
حارق لية وادي عشان جرادة
طق القراف خلي الجمال تخاف
قاعد في ظلة وميت بي غلة


بحيراوي

الرجال شرادة ورادة
علي وزن الحرب كر وفر
جرادة في إيدك أخير ليك من ألف طايرة
أم جركم ما بتاكل خريفين
حارق لية وادي عشان جرادة
طق القراف خلي الجمال تخاف
قاعد في ظلة وميت بي غلة


بحيراوي

ما تاخد ام الدرفون ، لوكان مدفون

العزيز كانتونا

اسمح لى ان ارحب بك اولا لانى لم التقيك قبلا فى اى بوست

اعجبنى جدا ما اوردته من امثلة ولعجبى ان معظم هذه الامثلة اصبحت متداولة فى اواسط السودان حتى فقدت هويتها او امتلكها كل اهل السودان فمثلا المثل الفائل الفولة بتتملى والبقارة بتجى واضح انه يخص البقارة ولكنه اصبح متداولا فى كل السودان وذلك يعنى تأثير اهل الغرب على بقية مواطنيهم..
ومن ذلك حداءهم وقد كانت هنالك اغنية فى ربوع السودان (لانى من اهل ذلك الزمان) اسمها البتولة لا احد يعرف هويتها رغم انها من الغرب وتقول الاغنية :

البتولة حلاتى يا زولة
البتول الاوضة قشوها
البتول السجادة فروها
البتول بالريحة رشوها
البتول الممتازه جابوها
البتول الضفيرة شقوها
أحب السادة انا روحى شاولها

مع عاطر تحياتى لكل ولك المشاركين سيدى والى الامام فالسودان وطن واحد يلتقى فى الكثير الكثير الذى يفوق ارهاصات الحاقدين..

حلةفي عجوز بموت

الأعزاء قرشو .. أهل العوض .. ديّامي
لكم الود والتحية..

النعالة أم قديد ولا المرا أم وليد
قصة المثل : الفولة بتنملي والبقارة بجوا...

المعروف عن قبائل البقارة - وليست قبيلة البقارة- انهم يمتلكون أعدادا مهولة من الأبقار - ما شاء الله- وفي فصل الخريف في الرحلة المشهورة تجاه الشمال تجنبا للذباب الذي يصيب الماشية بالأمراض يكثر المرعي الغني وتشبع الأبقار من العشب الأخضر وبالتالي تدر حليبا كثيرا- أقول حليب وليس لبن كما يقول ناس الخرطوم_ والإخوة في دول الخليج عرفوا الآن الفرق بين الحليب واللبن.
عندها تقوم النساء بهز اللبن الرايب وليس الحليب لينتج منه السمن والروابه - التي ليست هي الروب بلغة ناس الخرطوم. ومن هنا جاءت تسمية مدينة أم روابة في شرق كردفان , فالأرض في أم روابة رملية بيضاء تسر الناظرين خاصة في الليالي المقمرة.

عندما يكثر الروب لدى نساء البقارة يقمن بتبديله بالذرة والضرّابة- التي اسماها ناس الخرطوم الويكة- وبعض منتجات القرى المحيطة بمكان البقارة. وعادة ماتتم عملية البدل هذه إما أن تذهب البقارية بروانتها للقرية أو يحدث العكس.
وحدث ذات مرة والبقارة يستعدون للرحيل جنوبا بعد انتهاء الخريف أن جاءت إحدى القرويات تريد أن تبدل ما لديهامن سلع بالروابة. ولكن كان الجميع في شغل شاغل عنها..ولم يستجيبوا لطلبها ... وغادروا المكان وتركوها... عندها قالت قولتها المشهورة التي أصبحت مثلا الفولة بتنملي والبقارة بجوا)
طبعا الفولة هي الحفير الطبيعي الذي يخزن الماء للشرب.

لكن المثل انتشر في عموم السودان وتحرّف قليلا ليناسب اللسان السوداني

ألمي البارد بقد الدلو

أهلنا فى الغرب كلكم حكمه والله
و زيدونا من الكلام السمح ده
و كمان لو زادونا الشباب من شعر الحكامات تكونو ما قصرتو

السلام يا الزومة يا سنجك

كلام الحكامات راقد لكن داير تفسير كتير وإن شاء الله بعد تجميع بعض أقوال الحكامات وترجمتها ليفهما الكل سوف نمدكم بها

كمان ما تنسى جلسات البرامكة في وصف الشاهي- وليس الشاي- ومدحه فهو مجال ثر ملئ بكل ما هو جميل

لك التحايا والود... وإنت من الزومة أصلا ولاّ تايوان؟ عشان أنا عندي أصدقاء عزاز من الزومة

اخى كانتون

لعله من المفيد ان يعرف الناس ان بعض الاغانى الشائعة كان اصلها منطقة غرب السودان واورد هنا مقطع من اغنية سيرة من قرية ود عجالة جنوب شرقى النهود ارجو ان تقارن باغنية مشهورة ولم يشر يوما الى مصدرها وهى :

القشة عطشانة
البجرى نسيبه ومرته طلقانه
ياخوان البنات
البريده قدم الحمام
بقى قشة بدل الزمام
قال لى توب
انا ما بتوب


مع تحياتى

الأخ قرشو... بعد السلام مرحب حبابك عشرة بلا كشرة...
ما قلت لينا إنت قرشت شنو...

عزيزي حكاية السرقات الفنية من غنى (بضم الغين) الحكامات دي كتيرة... أظنك سمعت أغنية الفروسية المشهورة التي بها مقطع يقول:

دا البجري وبتر ما سوداني حر

دي برضها ياعزيزي كردفانية وأولها يقول:

ياالصبيان لعلكم ماجريتو...
إلى أن تصل الحكامة إلى القول ...
دا البجري وبتر ما تقلاوي حر

وأغنية اللبن أبو لي بيه التي يتغنى بها كمال ترباس... أصلها كردفاني بقاري ولكن حرّفها الرجل كما شاء لتتماشى مع هجين الخرطوم..

لكن آهو السودان كلو حتّة واحدة


ألمي البارد بقد الدلو

عزيزي كنتونا
اتحفتونا والله و قد قمت بطباعة هذه الأمثال حتى اتمتع بها اكثر
و باين عليكم عندكم الكتير
و الخريف اللين من تواتيبو بين
اخوك زومابي أصلي
و ما باقى لى الا اتشلخ لا ورا
و مين من اصدقائك من عندنا لو قريب منى اسه بوصلك

الأخ الزومة

الزوماب كتيرين لكنهم شاتين في الديار كباقي السودانيين وأهلهم الشايقية.. ومثالا لا حصرا:
د. حسن حسين بآثار الخرطوم
م. فاروق ميرغني بسلطنة عمان
م. إبراهيم خلف الله بسلطنة عمان
وكثيرون غيرهم

بس انا ما عارف إنت وين في الدنيا العريضة دي
لك التحايا

ألمي بارد بقد الدلو

كنتونا شىء جميل وامثال رائعة
جراداية فى لباس ولا بيعض الا قعادو ولا حلو مثل ما بعد حداثوى نهديه لاسامة الخواض
ام سلمبويتى ولا كدكاى زول من دارفور سمعنا بيهو من اصدقاء من دارفور فى اليمن
شدرة كان مالت بتكى فى اخيتو مثل مفعم بالانسانية والتعاضد الجميل
البنفتل بلباسو داير شرح
فى ثلاثة كدة فيها ظلم شديد للمرأة
1-الدنيا ام قديد ولا المره ام وليد
2-ما تاخد ام الدرفون لو كان مدفون
3-النعالة ام قديد ولا المره ام وليد
اجمل مثل ياريت لو كان شعار التعامل بين الاخوة فى البورد وهو
امسكنى مرخى
وفيك الخير يا كانتونا زيدنا

الأخ محمدسيد أحمد
لك التحية

البفنقل بلباسو: المعنى الكلاسيكي أن الشخص لا يمكن أن يرقد على قفاه ويرفع رجليه مالم يكن متأكدا من أنه يلبس لباسا داخليا يقيه... أما المعنى المقصود : أن من يقوم بمثل هذه الأعمال له ظهر يحميه...
السلام عليكم

ألمي البارد بقد الدلو

الأخ كانوتونا

التحية

كما عهدناك دايما تقدم لنا الجديد، .. الأمثال التي أوردتها والشرح هي شىء جميل جدا وتساعد على عملية التواصل التي نحن أحوج ما نكون لها بين مناطق السودان وقبائله... وأنا اشيد باعتزازك بأصولك ،وحسب معرفتي الشخصية بك ،أعلم تماماأن اعتزازك إعتزاز ايجابي ولا علاقة له بما وصفت به من عنصرية، تلك الكلمة البغيضة التي صار يرمى بها أي شخص يعرف بمنطقته. وما أبغضها من كلمة..

وعلى ذكر الكلام عن البقارة، أورد لك بيت شعر في أغنية من أغنيات الطمبور سمعتها قريبا يغنيها الفنان محمد جبارة وفيها مدح لقبيلة المسيرية(ولاد إحميد شكرهم في الطريق)، تقول الأبيات

ريحك شماليي
عينتك جنوبيي
عز المسيريي لابساهو طاقيي

أما مثل الفولة فقد استخدمه الشاعر حاتم حسن الدابي استخداما جميلا في قصيدة . وقد عمل الشاعر بهيئة توفير المياه بكردفان ودارفور، يقول في القصيدة

قدر ما درسنا فيهو درس واحد ما أفادو
تراها الفولة اتملت وليها تاني البقارة عادو


تحياتي وأرجو أن تتحفنا بالمزيد فنحن نبحث عن هذا التراث العظيم في شتى بقاع السودان


مع تحياتي/ مامان

أهلين صديقنا العزيز مامان

شكرا على الإطراء ونتمنى أن نكون عند حسن الظن..
قول لشاعركم دا كان قبيل شكّر ولاد إحميد كان جبتا ليهو بقرة بكر تحتها إنتاية..
لكن الجايات أكتر من الرايحات


ألمي البارد بقد الدلو

كان عشقت أعشق قمر
وكان سرقت أسرق جمل
هذا المثل يشار بة للتميز وللقمر جمالة
وللجمل والنوق أثمانها الغالية
ولست دعوه للهمبتة والسرقة

بحيراوي

شكرا يا كانتونا

رغم إن أهلي من البقارة لكن أعترف بجهلي الكبير بكل هذا الزخم الثقافي والأمثال الجميلة من غرب السودان.
المذيد يا كانتونا

الإين أحمد أمين... حبابك يا عطوي .. المن عيال عطية وحيماد
يعني نقول عليك بقاري تايوان... هاك الكلمات دي قولها للوالدين عشان تمتحنهم هل بقارة 100% ولاّ خامنّك ساكت وهم ذاتهم تايوان؟

قول ليهم تعرفوا: النكور , المعنى : البقرة التي تلد وترفض أن ترضّع عجلها
المنصلاب: وهو العجل حديث الولادة
اللبي (بكسر اللام): وهو لبن البقرة الوالدة جديد أقل من أسبوع
السفين: وهو السرج الذي يوضع على ظهر الثور عند تحميله بالعفش ساعة الرحيل
الباصور: وهو العود في مقدمة السفين ليمنع تقدم العفش من على ظهر الثور إلى الأمام
البقرة أم شوتال: يعني أحد قرنيها راقد
وقول لبابا عمو كانتونا بقول ليك: بلط حوض وشل (بكسر الشين) شايا ولاّ كو؟

وإلى اللقاء في الحصة التالية

ألمي البارد بقد الدلو

أستاذنا/كنتونا
نشكرك على هذا الزخم الذى يسحبنا الى وطن جميل ويشعرنا بالشبع
تسلم ومزيدا من الروابه

ا كانتونا وين انت يا رجل

.org/basesmilies/bounce_vert.gif[/img]

الاخ العزيز كانتونا


حقيقه عمل جميل جدا وواضح التمكن
, التام والشرح الوافى

الامثال دى اختزال لى معارف
وتجارب وحكم فريده يتناقلهاالخلف من السلف عبر
اجيال كثيره واحيانا تكون معدله من منطقه لى اخرى
عندى ليك اقتراح ممكن يكون مفيد نوسع دائرة المشاركه0
لكل الامثال المتداوله مع الشرح الوافى حتى لو كانت امثال
سودانيه او غيرها
ومن غير تعدى على البوست بتاعك


لك كل الشكر

لووووول والله امثالكم كلها ما عندها عوجه الا ثلات منهن تب ما عجبني كدي افرزوهن
البعد ولا البلاد ام سعد
بليله مباشر ولا ضبيحة مكاشر
الخلا ولا الجار الفسل
البيلد المحن لابد يلولي عيالن
الفار ان كتر ما بحفر الجحر
السواي مو حداث

الأخ كانتونا والأحباء

وينكم يا جماعة.... نحن فى إنتظار المزيد وبارك الله فيكم


مع التحية

توثيق جميل يا عمنا كانتونا
فعلا أمثال بليغة .. ربنا يديك العافية

محمد قسم الباري