النعيم ود حمد.. أيقونة الكرم السوداني الأصيل(توجد صور)

النعيم ود حمد.. أيقونة الكرم السوداني الأصيل(توجد صور)


04-07-2013, 09:45 PM


  » http://sudaneseonline.com/cgi-bin/sdb/2bb.cgi?seq=msg&board=430&msg=1365367533&rn=0


Post: #1
Title: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-07-2013, 09:45 PM

sudansudansudansudansudansudansudansudansudansudansudansudan-sudansudansudansudansudansudansudansudan.jpg Hosting at Sudaneseonline.com

حمد النعيم حمد(شمس الضحي)

Post: #2
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-07-2013, 09:47 PM
Parent: #1

sudansudansudansudansudansudansudansudansudansudansudansudansudansudansudansudan144.jpg Hosting at Sudaneseonline.com

سرايا النعيم ودحمد ( حيث كان يوجد ديوان النعيم ودحمد ) ديوان النعيم ولا بنسد

Post: #3
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-07-2013, 09:49 PM
Parent: #2

sudansudansudansudansudansudansudansudansudansudansudansudansudansudansudan175.jpg Hosting at Sudaneseonline.com


جامع النعيم ودحمد

Post: #4
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-07-2013, 09:53 PM
Parent: #3

sudansudansudansudansudansudansudansudansudansudansudansudansudansudan210.jpg Hosting at Sudaneseonline.com


هذا قبر النعيم ودحمد وابنيه حمد النعيم وموسي النعيم

Post: #5
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-07-2013, 09:58 PM
Parent: #4

Quote: هو من مواليد قرية (حلة حامد) وحامد هذا هو جده لأمه، أما جده لابيه فهو الفقيه الشهير الشيح حمد ود الترابي المعروف بالنحلان والذي ترجم له محمد النور ود ضيف الله في طبقاته.
حفظ القرآن الكريم على عدد من المشائخ بالمنطقة، وبعدها أسس قرية (طيبة النعيم) وكانت وقتها تعرف باسم حلة النعيم ود حمد، وكان يعمل بالزراعة في أرض بلغت (1500) فدان، وقد ورث معظم أملاكه من أمه التى كانت تنتمي الى قبيلة رفاعة، واشتهرت أراضي النعيم بالانتاج الوفير الذي كان ينفقه على كل محتاج وفقير، وكانت خلاويه عامرة بالضيوف والطلاب وحفظة القرآن الكريم، وقد كان يصرف عليهم جميعاً من ريع أراضيه، وكان تلاميذ خلاوية يوقدون النار ويعلقونها في أعلى الأشجار لتكون منارة هادية لابناء السبيل والسارين ليلاً، وفوق هذا وذاك كان رجلاً متواضعاً، ولا يفرق بين الفقير والغنى.
فقد كانت تقف وراء النعيم ثلاث زوجات فضليات، الأولى منهن من قرية ود الترابي وتدعى آمنة بنت عبد الرحمن من قبيلة البديرية الدهمشية وأنجب منها ثلاثة أولاد وخمس بنات، والثانية فاطمة بنت عبد السلام من قرية (حلة حمد) وأنجب منها ثلاثة أولاد، والثالثة من قبيلة رفاعة وأسمها حجاز بنت عبد الباقي ولم تنجب منه.
وقد ذاع صيت النعيم ود حمد وكرمه الأسطوري اولاً في الجزيرة ثم انداح صيته الى كافة ارجاء البلاد، ولا أعتقد ان هنالك سودانياً لا يعرف الرجل او يسمع به، واذا اراد أحد مدح شخص بالكرم وصفه بأنه (النعيم ود حمد)، ولعل للاغنية المشهورة (سنن البرامكة) دور في علو صيت الرجل، ونعلم جميعاً ان هذه الأغنية المادحة ابدع في أدائها الفنان الراحل خلف الله حمد، ولكن قد لا يعلم الكثيرون قصة هذه الأغنية التى سارت بذكرها الركبان.. وتقول قصة الأغنية أو على الأوفق القصيدة ان زفة عرس (سيرة) اتت مارة بالقرية وقد جنهم الليل فارادوا نيل قسط من الراحة ثم يواصلوا سيرهم، فجلسوا قرب شجرة فرآءهم أحد ابناء النعيم وذهب اليهم وسالهم عن سبب مجيئهم فاجابوه، فذهب الأبن الى والده وأخبره بالأمر، فطلب منه النعيم ان يعود ليحضرهم، فلبوا الدعوة وأخذوا يحزمون امتعتهم ثم ساروا وراء الإبن الى ديوان والده، وكانت المفاجأة انهم عند وصولهم ودخولهم الديوان وجدوا عدداً من البراميل ممتلئة بالعصير وجولاً من البلح، وبعد ان نالوا حظهم من العصير والبلح دخل عليهم النعيم ومعه خروف قام بذبحه وحلف عليهم لتناول العشاء..
وهنا يختلف الرواة حول القصيدة المادحة الشهيرة، فبعضهم يقول ان الشاعر (بابا) من قرية البشاقرة غرب كان ضمن تلك (السيرة) وهو الذي نظم تلك القصيدة في مدح النعيم ود حمد، ومعلوم ان هذا الشاعر هو صاحب القصيدة الحماسية الشهيرة (الكنداكة) والتى نظمها في مدح الشيخ العبيد ود بدر وتغني بها ايضاً الراحل خلف الله حمد، وبعضهم ينسب القصيدة لإمرأة جاءت الى النعيم في زمن مجاعة وطلبت منه العون في قوت عيالها، فحمل لها قافلة جمال من الذرة اضافة الى جميع احتياجاتها فنظمت هذه القصيدة في مدحه عرفاناً بكرمه.
والقصيدة طويلة وما تغنى به الراحل خلف الله حمد كان بعض مقاطع منها وليس كلها، ومطلعها كما هو معروف للجميع المقطع الذي يقول:
الاحييت سنن البرامكة
عاجبني طول ايدو سامكة
يابابا قول النعيم دراج للمتابكة
والقصيدة تروى بروايتين، أحداها تبدا بكلمة (الأحييت) والأخرى تبدأ بعبارة ( يالأحييت)، وتختلف الروايتان في ترتيب المقاطع بل وفي الابيات نفسها، فمثلاً نجد ان بالرواية الأولى ابيات تخلو منها الثانية، ومن تلك الابيات:-
(النعيم يا الواضحا ابو حمد شمس الضحى)
ومنها (إنت الكبرى الركز البلد) ..
منها مقطع كامل هو:
النعيم أنا شكرو درتو قادل فوق توبو وسترتو
أخفى القمر في بهرتو باجوراً شخرت ماسورتو
واخيراً نقول ان هذه القصيدة الذائعة الصيت قيل ان النعيم نفسه لم يسمع بها حيث انه انتقل الى جوار بارئه في العام 1958م عن عمر ناهز التسعين عاماً، اى قبل تغني المغنيين بها ومن ضمنهم او على الاصح آخرهم الفنان الراحل خلف الله حمد، ولا شك انها أى قصيدة جعلت من النعيم ود حمد ايقونة للكرم السوداني.

Post: #6
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-07-2013, 09:59 PM
Parent: #5

Quote: شاعر القصيده هو بابا من اهالي البشاقره شرق فقد كان يزور ديوان النعيم ود حمد من حين الي اخر مما جعل سيدي النعيم ود حمد ملم ببعض التفاصيل الحياتية ل بابا وكانت هذه عاده عنده ملم بكل التفاصيل لمعظم الناس مما يسر له ان يقدم يد المساعده دون ان يكون هناك حرج في السوال بالنسبه للمحتاج.
وهذا ما حدث مع الشاعر بابا فقد جاء لسيدي النعيم ود حمد طالبا العون والمساعده لان زوجته قد وضعت له مولودا ويريد ان يقوم بواجب السمايه
فاكرمه النعيم فكساه الخجل ولم يقوي ان يطلب من النعيم ودحمد اي طلب لكرمه الفياض لكن النعيم بفطنته المعروفه وذكائه ادرك ان زوجة بابا قد وضعت مولودا لما يعرفه عن بابا واسرته فارسل كل مستلزمات السمايه الي قريه البشاقره وبابا جالس في ضيافته
مكث بابا مع النعيم ود حمد ثلاثه ايام ولم يستطع ان يطلب من النعيم ود حمد اي طلب فقفل راجعا الي البشاقره وعند وصوله الي المنزل وجد كل مستلزمات السمايه موجوده فسال من الذي اتي بهذه الاغراض فقيل له انه النعيم ودحمد فانشد فيه قصيدته المشهوره (احيا سنن البرامكه (هذه القصه سمعتها من حفيد بابا شخصيا منذ عامين وهو يعمل الي الان بشارع الجمهوريه واسمه بابا (وكان يوجد استديو مشهور بعماره اراك يسمي استديو بابا وهو مسمي علي صاحب القصيده)

Post: #7
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-07-2013, 10:00 PM
Parent: #6

يا الأحييت سنن البرامكة
عاجبني طول ايده سامكه
يا يا با قول النعيم درّاج المتابكة

***

النعيم يا فحل القبائلْ
كريم لمّام الهمايلْ
شيتا براك ما أظنو خايلْ
ايدو ام ِرويق والقِبلي شايلْ

****

النعيم يا قاصدين لبا
خشمو انطبع لي مرحبا
هو عزيمتو ما بردخا
والبتلبن للضيف بضبحا

***
أنا غنيت ِجب مسدارو
شوف النعيم كيف لاوي شالو
ما حسبوك في القالوا قالوا
العيش ِرخص والقمري طالوا

***

النعيم قادر وحدو
ما تكترو وتتقعدو
هو رب القدرة ساعدو
ختو لو الصحة ما فنتدو

***

أنا غنيت للولد
الاسمو النعيم ود حمد
وكت العيش ِبقى بالقِبض
ديوان النعيم ولا بنسد

***
غنيت لدابي الرجيمة
ما بحوى على البهيمة
هو لك الشكرات قديمة
ما بشيل المال الفي القسيمة

***
النعيم على كفو السخا
يقدل زي شمس الضحي
والبتتاوم للضيف يضبحا

***
غنت ليك أم رشوم
هو مو لها وطق خُشوم
وكت العيش بقى معدوم
فوق ضهرو الولية تنوم

****

يا الشرفت القضا
يا الحاكيت المن مكوار بدا
خدامتو القعدا
هيِ بتدرِش وقالت قضى

Post: #8
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-07-2013, 10:07 PM
Parent: #7

http://www.youtube.com/watch?feature=player_e...beddedandv=jhTlJjIlepU

Post: #9
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-08-2013, 11:12 AM
Parent: #8

أنا غنيت للولد

Post: #10
Title: Re: النعيم ود حمد.. أيقونة الكرم السوداني الأصيل(توجد صور)
Author: نادر النور آدم
Date: 04-08-2013, 11:28 AM
Parent: #9

الاسمو النعيم ود حمد
بوست في الصميم يا سيف اليزل
من زمن طويل ابحث عن توثيق أو معلومات مفصلة عن النعيم ود حمد
فهو من أعلام الجزيرة حقيقة وسيرته مفخرة لكل سوداني
لك التحية وللنعيم ود حمد الرحمة والمغفرة
فقد ترك في الدنيا سيرة لا يستطيع تركها إلا قلة من الرجال
نسأل الله أن يجعل البركة في ذريته

Post: #11
Title: Re: النعيم ود حمد.. أيقونة الكرم السوداني الأصيل(توجد صور)
Author: محمد عبد الماجد الصايم
Date: 04-08-2013, 11:44 AM
Parent: #10

غايتو النعيم ود حمد واليويتوب الفوق دا مالافقة كلو كلو!
القصة كلها شدّة ورجالة وكرم .. وغنا ليّن!! معقولة ياخ!


أمسكو عليكم عمكم خلف الله حمد!


Post: #13
Title: Re: النعيم ود حمد.. أيقونة الكرم السوداني الأصيل(توجد صور)
Author: فتح الرحمن حمودي
Date: 04-08-2013, 11:58 AM
Parent: #11

Quote:
غايتو النعيم ود حمد واليويتوب الفوق دا مالافقة كلو كلو!
القصة كلها شدّة ورجالة وكرم .. وغنا ليّن!! معقولة ياخ!


أمسكو عليكم عمكم خلف الله حمد!

يا عمك ما تكمل جميلك وتجيبا برواية (شرف الاهلية) مرة واحدة
















--------

رواية شرف مختلفة خالص من النص المكتوب هنا دا

ومن قولة تيت: (احيا سنن البرامكة)

بتلبن - بتزبد (وحسب شرحو -اي شرف الاهلية- هي البهيمة العاوزة تلدي .. مش الوالدة .. ودا كرم ما بعدو)

قيقاراعي (سابقاً)

Post: #37
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-11-2013, 01:07 AM
Parent: #11

شكرا ود الصايم علي الفيديو لك خالص الود

Post: #12
Title: Re: النعيم ود حمد.. أيقونة الكرم السوداني الأصيل(توجد صور)
Author: محمد علي البصير
Date: 04-08-2013, 11:49 AM
Parent: #10

سيف البرعي ربنا يديك العافية

أنا مدين لك بفضل كبير كونك تتيح لي فرصة التعرف على شخصية جديرة بالإهتمام
ولكن بكل أسف المعلومات عنها شحيحة للغاية

من خلال هذا البوست الجميل عرفت اليوم تفاصيل كنت أتمنى معرفتها من سنوات طويلة

كان والدي رحمه الله يقلب إحدى شقيقاتي بالنعيم ود حمد حينما كانت تقوم بتوزيع مصروفها المدرسي وحاجاياتها على زميلاتها بالمدرسة والحي

فتولدت في نفسي رغبة لمعرفة أدق التفاصيل عن هذه الشخصية

ولكن بكل أسف طيلة السنوات الماضية ما كنت أعرف عن النعيم ودحمد سوى أنه رجل أشتهر بالكرم

ولكن اليوم حققت لي رغبتي

أكرر شكري الجزيل أخي سيف


Post: #15
Title: Re: النعيم ود حمد.. أيقونة الكرم السوداني الأصيل(توجد صور)
Author: أيمن الطيب
Date: 04-08-2013, 12:09 PM
Parent: #12

سلامات سيف اليزل,,

رحم الله النعيم ود حمد وأكرمه
فقد كان كرما جوادا وشهما أصيلا,,

كالعهد بك دائما يا سيف..
أوفيت الرجل قليلا من كثيره,,

تحياتى,,

Post: #39
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-11-2013, 10:47 PM
Parent: #15

شكرا العزيز أيمن
لهم ترفع العمائم احتراما
فقد زانوا وجداننا

لك خالص الود

Post: #17
Title: Re: النعيم ود حمد.. أيقونة الكرم السوداني الأصيل(توجد صور)
Author: كمال علي الزين
Date: 04-08-2013, 12:23 PM
Parent: #12

(*)

النعيم ود حمد سيرة ناصعة ...
وهو بالمناسبة جد كل من :
الدكتور / النور حمد النعيم ودحمد ودالترابي (التشكيلي والاديب المعروف )
وزوج الاستاذة / أسماء محمود محمد طه ..

وشقيقه الدكتور / مضوي حمد النعيم ودحمد ودالترابي (القطب الاتحادي والاكاديمي والسياسي المعروف )

والشهير بدكتور مضوي الترابي ...

تحياتي ياسيف برعي وليك وحشة ..

Post: #40
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-19-2013, 06:03 PM
Parent: #17

ولدنا كمال شكرا جزيلا لمرورك..والشوق كميات
تحياتي لك وللاسرة

Post: #38
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-11-2013, 04:48 PM
Parent: #12

أخي محمد علي البصير

كان لزاما علينا أن نحتفي برموز مجتمعنا السوداني
وأن نعلي ما أندثر من قيم
مروركم هنا يبهجني كثيرا
لك خالص ودي
سيف

Post: #14
Title: Re: النعيم ود حمد.. أيقونة الكرم السوداني الأصيل(توجد صور)
Author: الفاضل يسن عثمان
Date: 04-08-2013, 12:08 PM
Parent: #10

بوست اكثر من موفق يا سيف. وتوثيق اجتماعي رائع, لسيرة اجداد يستحقون
الاشارة والاطلاع علي كرمهم وفضلهم. جيل بعد جيل.
ويا ليتنا نفعل والسير لتوثيق السير الاجتماعية, لرموز ,مثل النعيم ودحمد.
وفتح نوافذ علي ادب البطانة . وام بادر وغيرها من مناطق ربوع وطننا الجبيب
في ذلك لو تعلمون , تفاسير للحاضر واستشراف لمستقبل واجيال.
لك التحية سيف . اجتهادك كبير,


مودتي

Post: #16
Title: Re: النعيم ود حمد.. أيقونة الكرم السوداني الأصيل(توجد صور)
Author: ياسر منصور عثمان
Date: 04-08-2013, 12:15 PM
Parent: #14

النعيم ود حمد ...ارتبط بالكرم وارتبط الكرم به

وهو رجل من سلسلة رجال زينوا جيد هذا البلد الكريم بما عرف عنهم بالكرم والجود

وليتك تكمل جميلك وتحاول التوثيق لبعض من اشتهروا بالكرم في السودان ..

يديك العافية ياخ

Post: #18
Title: Re: النعيم ود حمد.. أيقونة الكرم السوداني الأصيل(توجد صور)
Author: الصادق سيكا
Date: 04-08-2013, 01:17 PM
Parent: #16

شكرا سيف بوست جميل جداً
وياريت يا سيف تجيب لينا النجيضة عن ود اب كريق ...

Post: #47
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-25-2013, 08:01 PM
Parent: #18

صديقي الصادق سيكا شرفت البوست مرحبا بك

Post: #19
Title: Re: النعيم ود حمد.. أيقونة الكرم السوداني الأصيل(توجد صور)
Author: elhilayla
Date: 04-08-2013, 01:46 PM
Parent: #16



Quote: حلة حامد


الصحيح
حلة حمد

نعم النعيم ود حمد جد
الاخ الأكبر النور حمد التشكيلي المعروف
والاسم كاملا

النور محمد حمد حاج ادريس
وتنطق (حاج ادريس) عندنا - حاج دريس- كلغة شائعة في قرانا
حلة حمد - ابوروس- ود الترابي - الحليلة - كلكول - الكسمبر
الجميعابي - طيبة النعيم وتسمي سابقاً حلة النعيم
علي جدنا المعروف النعيم ود حمد

سنعود بحول الله

__________
الحليلة

Post: #20
Title: Re: النعيم ود حمد.. أيقونة الكرم السوداني الأصيل(توجد صور)
Author: أيمن دياب
Date: 04-08-2013, 04:37 PM
Parent: #19

Quote: حمد النعيم حمد(شمس الضحي)

بحمد الله لنا صلة قرابة ونسب مع أبناء الشيخ النعيم ود حمد..
حيث أن ابنه حمد النعيم حمد الترابي متزوج من عمتنا المرحومة نفيسة محمد دياب
التي توفيت في العام الماضي عليها رحمة الله..
وأبناء المرحوم حمد النعيم:
أحمد ومحمد وليلى وسميرة ومحاسن وعفاف..

Post: #21
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-09-2013, 07:41 AM
Parent: #20

حضوركم ومشاركاتكم اثلجت صدري أحبتي وأخوتي
النعيم ولد او رجل من الزمن الجميل
حاتم طي زمانه
الحاجات الحلوة كتيرة حولنا
فمعا لاعلاء قيم الجمال
السياسة اخدتنا كتير
لكم خالص ودي
سيف

Post: #22
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-10-2013, 00:55 AM
Parent: #10

الأخ نادر شكرا لمرورك الكريم وربنا يقدرنا علي ابراز مواهب وافضال اعلامنا السودانيين
خالص مودتي
سيف

Post: #23
Title: Re: النعيم ود حمد.. أيقونة الكرم السوداني الأصيل(توجد صور)
Author: nazar hussien
Date: 04-10-2013, 02:00 AM
Parent: #22

في بعض الكلمات غير صحيحة يا شباب. اولها البتلبن دي زاتا الشرحا شرف الاهلية.
فهي لا تنسق مع القافية ولا كرم النعيم ود حمد. والكلمة الصحيحة هي. البتسبي
وهي البهيمة علي وشك الوضوع. وارجح ان الشاعر قصدها لوصف حالة الكرم النعيمية الهائشة والغير مترددة
اذا جري لبه بهيمة لقري الضيف فهو لا يرجعها لزريبتها حتي لو كانت علي وشك الوضوع.

اما عدم جواز ضبح البتلبن للضيف. فهو معروف عند الناس بتلك النواحي.

Post: #24
Title: Re: النعيم ود حمد.. أيقونة الكرم السوداني الأصيل(توجد صور)
Author: nazar hussien
Date: 04-10-2013, 02:12 AM
Parent: #23

جا ارجع ليكم لي الكلمات التانية

Post: #25
Title: Re: النعيم ود حمد.. أيقونة الكرم السوداني الأصيل(توجد صور)
Author: nazar hussien
Date: 04-10-2013, 02:34 AM
Parent: #24

وبعدين كلمة لبن بتشديد الباء معروفة في عاميتنا السودانية تقال للذرة. (العيش).
ما سمعتو بي (بعد ما لبن ادوه الطير) فإذا استصحبنا معانا البيت البيقول.
خدامتو القعدا. هي بتدرش قالت قضي. يعني انتهي. مع كلمة لبن حقة العيش دي
معناه النعيم ما ضبح ليهم

شرف اجتهد في الشرح لكن الكلمة الاستخدما غير صحيحة بل تقدح في كرم النعيم
فعليكم الله صلحوها علي مسئوليتي. ثم اخيرا كلمة بتسبي دي عربية فصيحة جدا لي
التحسس منها

Post: #26
Title: Re: النعيم ود حمد.. أيقونة الكرم السوداني الأصيل(توجد صور)
Author: عبيد الطيب
Date: 04-10-2013, 04:35 AM
Parent: #25

Quote: النعيم يا فحل القبائلْ
كريم لمّام الهمايلْ
شيتا براك ما أظنو خايلْ
ايدو ام ِرويق والقِبلي شايلْ



شكرا سيف اليزل علي قدح "النعيم ود حمد" المترع سماحة وكرما وأريحية

شوفو "إيدو أم رويق والقبلي شايل" أم رويق هي السارية المدجنة ومطرها غزير وأم رويق أي علي عرض الأفق
والبرق القبلي لا يخطي ابدا وحتما سوف يمطر وأهل البادية يسمونه "مربط عجيل" وهو البرق الشمالي الشرقي
زارنا أحد الإنجليز في بوادي الكبابيش لا أستحضر هل هو "كول" أم "مايكل أشر" صاحب كتاب موت الصحراء
وكان معه الخبير الراحل جمعة ود سنين وعندما لمح جمعة البرق يومض قبلي صاح في الخواجي
" يا خواجي أحكم غطاء العفش البرق دي "مربط عجيل" بجي بجي
فصاح الإنجليزي :- يا جمعة البرق بعيد ما بجي وفي الهزيع الأخير من الليل أرعدت وأمطرت السماء بغزارة
وقد إبتلّ الكثير من "عفش" الخواجة وبعد يومين لمح الخواجة برق من جهة الغرب فأحكم غطاء العفش
فأخبره جمعةقائلا:- ان البرق الغربي لا يأتي مطره فصاح الخواجة:- ياجمعة ربنا محل مو داير بربط العجيل
النعيم يا قاصدين لبا
خشمو انطبع لي مرحبا
هو عزيمتو ما بردخا
والبتلبن للضيف بضبحا

البتلبِّن هنا يقصد بها التي ولدت جديدة اللّقحة وعندما تلد البهيمة إن كانت بقرة او شاة او ناقة او عنز
اولا حليبها عندما يوضع في النار يصيركالزبادي ولونه بين الأبيض والأخضر ويسمي "اللِّبا"
والشاعر يقصد ان النعيم من كرمه يذبح اللّقحة او الشّايل لضيفه
نقول فلان كريما يذبح " الشايل
"العشاية والشاشاية والسباية
وام ضرة لى ضيفانو بسخابن" ودبادي

والدارّة اي الماخض او العشار وهي التي مرة علي حملها عشرة أشهر
"إذا نحروا العشار مودعاتٍ فلا منٌّ بذاك ولا كلام" عمر البنا

محبتي

Post: #27
Title: Re: النعيم ود حمد.. أيقونة الكرم السوداني الأصيل(توجد صور)
Author: على ابراهيم رفاى حمد
Date: 04-10-2013, 07:47 AM
Parent: #26

سلام سيف اليزل ولك تحياتى
بوست جميل عن رجل جميل وكريم بالفطرة وسوف احكى ليك قصة غاية الروعة وكنت شاهد عليها
انا وابن اختى او ابن شقيتنا الكبيرة كنا بنزرع ونقطع بعض الحشائش فى الحواشة فى حلتنا !!
اهاا جو ناس عائزين بعض الخضار من حواشتنا فطلبوا من ابن اختى ذلك فقال بدا أعطاهم مايردون وزيادة وشكروه على ذلك وابن اختى لم يتعدى فى ذلك الزمان سن الثامنة!!
اهاا أهلنا ديل ركبوا قام واحد شكرًا ياا لنعيم ود حمد فصحكت قمت قلت ليهو والله العظيم الزول دا جدو النعيم ود حمد قام عمك تلب من حمارو وجا سلم على ود اختى تانى !!
وقال ليهو يا ها المحرية فيكم !!
النعيم ود حمد رمز سودانى واصبح كل من يكرمك ويبالغ فى الكرم يطلق عليه اسم النعيم ودحمد!!!

لنا علاقة نسب مع هذه الاسرة العظيمة !!
ونسيبى هو حمد بابكر محمد حمد حفيد النعيم ودحمد ووالد دكتور بابكر حمد والنعيم وأبناء اختى هم حزيفة وعثمان واياس وحاتم




شكرًا سيف اليزل لك تحياتى

Post: #28
Title: Re: النعيم ود حمد.. أيقونة الكرم السوداني الأصيل(توجد صور)
Author: nazar hussien
Date: 04-10-2013, 08:04 AM
Parent: #26

Quote: البتلبِّن هنا يقصد بها التي ولدت جديدة اللّقحة وعندما تلد البهيمة إن كانت بقرة او شاة او ناقة او عنز
اولا حليبها عندما يوضع في النار يصيركالزبادي ولونه بين الأبيض والأخضر ويسمي "اللِّبا"
والشاعر يقصد ان النعيم من كرمه يذبح اللّقحة او الشّايل لضيفه
نقول فلان كريما يذبح " الشايل
"العشاية والشاشاية والسباية
وام ضرة لى ضيفانو بسخابن" ودبادي


يا عبيد...البتلبّن ...غير البتلبّي...فالبتلبّن كما شرحت فوق هي قندول العيش والذرة...
فاللبا بتشديد اللام غير اللبن كما اشرت انت...

ود بادي نفسه في الكلام الانت جبتو اشار للسباية...وهي نفسها البتسبي...

Post: #29
Title: Re: النعيم ود حمد.. أيقونة الكرم السوداني الأصيل(توجد صور)
Author: عبيد الطيب
Date: 04-10-2013, 09:01 AM
Parent: #28

Quote: والبتلبن للضيف بضبحا
يا عبيد...البتلبّن ...غير البتلبّي...فالبتلبّن كما شرحت فوق هي قندول العيش والذرة...
فاللبا بتشديد اللام غير اللبن كما اشرت انت...


أستاذ نزار سلام ومحبة
الزول قال البتلبِّن لي الضيف بضبحا
من السياق ما دام فيها ذبح وضبح يعني البتلبٍّن من اللبن او الحليب او إنها بتحلب ومما يعني من شدة كرمه يذبح التي تحلب اللّبن
و المتعارف علية الذي يذبح الدارة واللقحة والبتحلب والشّايل هم الكرماء

وشكرا لما اورده شخصك يا نزار البتلبِّي غير البتلبِّن
لكن تلبّن العيش غير نقول العيش " شري " أظن المقطع هكذا
"البتلبِّي للضيف بضبحا " بدون نون وهو من اللِّبا وإذا قرأناه مرتين يتضح ذلك

يا أستاذ نزار نبهتنا لملاحظة قيمة جدا أظن شعر الموروث يحتاج لقراءة وتنقيح

محبتي لك ولصاحب البوست وليسامحنا إذا كنا "ثقيلين" وتداخلنا أكثر من مرة
لكننا نحب الكرماء والذين اصبحوا "كالغول والعنقاء"

محبتي للجميع

Post: #30
Title: Re: النعيم ود حمد.. أيقونة الكرم السوداني الأصيل(توجد صور)
Author: nazar hussien
Date: 04-10-2013, 09:53 AM
Parent: #29

http://www.youtube.com/watch?v=ToNHji3jrR4
يا عبيد كدي دوس الرابط دا واسمع الدقيقة 1:06...

خلف الله حمد زاتو قال البتسبي

وهاك دا مختار الصحاح شخصيا:


والسابِياء أيضاً: النتاج.
وإذا كثُر نسل الغنم فهي السابِياءُ.
السابِياءُ: المَشيمةُ التي تخرج مع الولَد.

Post: #31
Title: Re: النعيم ود حمد.. أيقونة الكرم السوداني الأصيل(توجد صور)
Author: عبيد الطيب
Date: 04-10-2013, 10:36 AM
Parent: #30

Quote: يا عبيد كدي دوس الرابط دا واسمع الدقيقة 1:06...

خلف الله حمد زاتو قال البتسبي

وهاك دا مختار الصحاح شخصيا:


والسابِياء أيضاً: النتاج.
وإذا كثُر نسل الغنم فهي السابِياءُ.
السابِياءُ: المَشيمةُ التي تخرج مع الولَد.


الأخ نزار سلااااام ومحبة

في مداخلتي أعجبني مقطع "أم رويق " وحاولت شرحه
أما عن البتسبّي او البتلبّي او البتلبّن شخصي غير متعمق في هذه الغنوة
ولا أعرفها بتسبي او بتلبّي لكنني تطرقت لشرح بتلبّي فقط
ومادام اوردتها من مقلعها أظن ما اورده شخصكم الكريم هو الصحيح
والله يا نزار أني ما "بغالط" فيكم هل هي بتسبّي او بتلبّي فقط من باب الشرح
عندنا في بوادي الغرب بنقول فلان دي بدفع اللّقحة وبدي المنيحة وجمل العطفة وجمل السافورة وبرفع اللَّقروب وبدي البتسبّي
والبتلبّي والبتفقي من الفقاية وال.........الخ وبضبح الدّارة والجزرة
نعم الكرم وقديما قالوا" الكريم لا يضام"
لقد شاهدت يا نزار أحدهم راكب علي بعيره وهوفي رحلة سفر نزلت بجواره "عطفة" اي هودج أمرأة مرحلة من بيت والدها الي بيت زوجها
وكان معها نساء ورجال هذا الرجل ذبح لهم بعيره "علَّق" سرجه مع صاحبه وحين ساروا مسافة ليس ببعيد وجدوا إبل
ولم تغيب الشمس حتي كان عند صاحب البعير اكثر من خمسة جمال وعرفت تماما ان الكريم لا يضام
وهذ الرجل إسمه الطيب "كركبه" من اسرة الشيخ الكباشي
توفي الي رحمة مولاه ولكن أبناء بناته صاروا مثله اي والله
محبتي

محبتي

Post: #32
Title: Re: النعيم ود حمد.. أيقونة الكرم السوداني الأصيل(توجد صور)
Author: nazar hussien
Date: 04-10-2013, 10:43 AM
Parent: #31

Quote: عندنا في بوادي الغرب بنقول فلان دي بدفع اللّقحة وبدي المنيحة وجمل العطفة وجمل السافورة وبرفع اللَّقروب وبدي البتسبّي
والبتلبّي والبتفقي من الفقاية وال.........الخ وبضبح الدّارة والجزرة


دا الكلام يا عبيد...

أنا من زمااااان بفتش عن زول زيك كدي...عارف تراث أهله بلحيل...
هسي كلامك دا في ناس كتيرين هنا بعتبروه رطانة...

بارك الله فيك

Post: #33
Title: Re: النعيم ود حمد.. أيقونة الكرم السوداني الأصيل(توجد صور)
Author: سامى عبد المطلب
Date: 04-10-2013, 01:39 PM
Parent: #32


شكراً لكى اخونا ذو اليزل على القاء الضوء على احد اساطير منطقتنا النعيم ود حمد فهو سلاله بعضها من بعض عرفوا بالعلم والكرم
انتشروا ما بين طيبه النعيم وود الترابى والحليله وابروس وحله حمد وقد ابدع بابا فى ذكر مناقبه وافضاله وما يزال ديوانه مفتوحاً الى يومنا هذا
يقوم ابناءه واحفاده باكرام كل من يطرق بابهم


Post: #34
Title: Re: النعيم ود حمد.. أيقونة الكرم السوداني الأصيل(توجد صور)
Author: فتح الرحمن حمودي
Date: 04-10-2013, 02:04 PM
Parent: #30

Quote:
شرف اجتهد في الشرح لكن الكلمة الاستخدما غير صحيحة بل تقدح في كرم النعيم
فعليكم الله صلحوها علي مسئوليتي. ثم اخيرا كلمة بتسبي دي عربية فصيحة جدا لي
التحسس منها

يا نزار شرف ما بغلط في امور الرعاوية دي ..
الخطأ من الراوي ..


ياخ شرف كان ما عرف للرعاية والصرم تاني فايدتو شنو؟
ما نضبحو هو همسلف ..
راجين بيو الضحية لي شنو؟

الواحد في الضهاري ديك يسرح بالهائم لمن يصل عمرو 15 سنة حتن يدخلوهو المدرسة!















---------

الخطأ خطئي انا دا .. هي فعلاص البتسبي
فضلة خيرك نحن تربية بنادر ساي ما عرب زيكم كدا
قريتا بي اضاني .. ؤ على كبر
وانت عااارف التعليم في الكبر

له ولك مليون تحية
ومكرر الاعتذار

Post: #35
Title: Re: النعيم ود حمد.. أيقونة الكرم السوداني الأصيل(توجد صور)
Author: nazar hussien
Date: 04-10-2013, 02:26 PM
Parent: #34

Quote: ا نزار شرف ما بغلط في امور الرعاوية دي ..
الخطأ من الراوي ..


ياخ شرف كان ما عرف للرعاية والصرم تاني فايدتو شنو؟
ما نضبحو هو همسلف ..
راجين بيو الضحية لي شنو؟

الواحد في الضهاري ديك يسرح بالهائم لمن يصل عمرو 15 سنة حتن يدخلوهو المدرسة!

---------

الخطأ خطئي انا دا .. هي فعلاص البتسبي
فضلة خيرك نحن تربية بنادر ساي ما عرب زيكم كدا
قريتا بي اضاني .. ؤ على كبر
وانت عااارف التعليم في الكبر

له ولك مليون تحية
ومكرر الاعتذار


ههههههههههه شكرا يا فتح الرحمن...
لكن:
البنادر بتعلم عربي جوبا يا فتح الرحمن اخوي؟؟؟

الكلمة دي متحكرة في مختار الصحاح حق العرب الزمااااان ديك...ناس إمرؤ القيس
والمتنبي...وكثير عزة...

Post: #36
Title: Re: النعيم ود حمد.. أيقونة الكرم السوداني الأصيل(توجد صور)
Author: فتح الرحمن حمودي
Date: 04-10-2013, 03:12 PM
Parent: #35

Quote:
البنادر بتعلم عربي جوبا يا فتح الرحمن اخوي؟؟؟

المافي شنو؟
الجنوب دا -بالقديم- مافيو بنادر؟

لو ولدوك في جوبا ح تتعلم عربي شنو؟


























-----------

وتيب!!

انا مولود وعشت صباي الباكر في (مدينة) القيقر - شمال اعالي النيل

يا عمك انا قيقاراعي (سابقاً)

Post: #41
Title: Re: النعيم ود حمد.. أيقونة الكرم السوداني الأصيل(توجد صور)
Author: باسط المكي
Date: 04-19-2013, 07:54 PM
Parent: #26

شكرا سيف اليزل
امتعتنا يااخ ببوست الكل
اتبسط منوووو وواصل

Post: #42
Title: Re: النعيم ود حمد.. أيقونة الكرم السوداني الأصيل(توجد صور)
Author: عمر محمد ابراهيم
Date: 04-19-2013, 09:21 PM
Parent: #25

شكرا اخونا سيف
شكرا نزار
هي فعلا ال (بتسبي للضيف بضبحا ) لانها زي ماقلت علي وشك الولادة ودائما الناس مابتضبح دي طمعا فيها وفي جناها الجائي ده
وصحلحوها فعلا علي مسئوليتي ومسئولية اخونا نزار
بوست موفق جدا ويشعرنا بالفخر يا سيف ,
ناظم القصيدة هو فعلا بابا المشهور في منطقة شمال الجزيرة من منطقة البشاقرة الغربية وكان فنان المنطقة الاكثر شهرة وتطريب ومعروف بنظمه لأغانيه
احفاده هم اصحاب استديو بابا المشهور المسمي باسمه .
شكرا وتحايا لكل المرور

Post: #43
Title: Re: النعيم ود حمد.. أيقونة الكرم السوداني الأصيل(توجد صور)
Author: عبدالرحمن الحلاوي
Date: 04-20-2013, 01:12 AM
Parent: #42

ممن اشتهروا بالكرم قديما بالكرم الشيخ محمود ود زايد ( شحم ألبل) ، والملك بادي االأحمر والشيخ مالك ابوروف الأهدى المية للحلبية( 100 ناقة لشحادة حلبية)
1- ويروى عن كرم ود زايد انه ذات مرة امتحن في كرمة في مكان صحراوي.. ولم يكن باستطاعته ان «يُوقد ناراً لاكرام جماعة ارادوا اختباره».. لانعدام الحطب في تلك الصحراء، فاشار لجماعة بتكسير «السروج» التي توضع على ظهور دوابه.. ونجح في اعداد الطعام لضيوفه.
ومن الامثال التي ارتبطت بكرمه «قدح ود زايد الوّحل العجل الحولي» ولهذا المثل قصة طريفة تروى على لسان حفيده وناظر القبيلة عوض الكريم ود زايد: يروى ان عجلاً صغيراً كان (ينطط) بالقرب من قدح ود زايد واثناء حركته وقع في القدح وظل يحاول ان يخرج منه دون جدوى فصار مثلاً «قدح ود زايد الوحل العجل الحولي».
وعرف عن قدح ود زايد سعته الكبيرة قالوا «يشيل» اردبين من العيش.. والآكلين في القدح لا يرون بعضهم البعض من الجهة المقابلة.
ويوجد ببيت الخليفة بأم درمان القدح الصغير أو «المغراف» الذي تُملح به العصيدة في القدح الكبير.
واشتهرت عصار بحسن نسائها وكرم رجالها.. وبسالتهم في القتال.. ويحترف اهلها الزراعة، وتمد مدينة القضارف بالخضروات من كل الاصناف.. وبها توجد عصارة الجمل التي يستخرج منها زيت السمسم الصافي..
والزائر لقرية عصَّار.. يلاحظ الكرم الضبايني في مقام ود زايد ما زالت بنيرانه الـ «مولعة» وقدحه حاضراً رغم حداثته، لكن القيمة التي اورثها ود زايد لاحفاده مازالت تمشي بين الناس هناك في حاضرة الضباينة.

وسمسم وأم صقور وسهل قبوب ود زايد
وصقيعة أم بليل براقها قايم وقاعد
والمطر البكب أربع شهور ويدارد
كان والد محمود ود زايد ناظراً على قبيلة الضباينة إبان الحكم التركي وهو من مواليد قرية (شربوب) على نهر عطبرة عام 1821م. والقدح المشار إليه يطلق عليه اسم (أب خروس،) كما ذكر الجنرال أحمد طه أو (السرتيك)، كما ورد ذلك في كتاب (ود زايد شحم البل)، للراحل الطاهر عبدالكريم، و(السرتيك) تعني القارب الصغير، ويقال إنه كان يسع لما لا يقل عن خمسة جوالات من الذرة تخبز عصيدة (لقمة) تنقل إليه بواسطة ست قداحة أصغر تسمى (الدمير)، وأحد هذه القداح الستة موجود بمتحف الخليفة بأم درمان، وأما القدح (السرتيك) فقد حطم إهمالاً إبان حكم المهدية.
وهنالك رواية تقول إن قدح (السرتيك) قد أوحل عجلاً عندما كان مليئاً بالعصيدة، وفي ذلك قال عبد الله ود مرين شاعر محمود ود زايد "في قدح الضحى إتوحّل الحولي".
وسهل القبوب، كما ذكرنا، سهل عالي الخصوبة غزير الأمطار وقد قال الشاعر خليل عجب الدور:
ولا يزال على الآفاق منتشراً
مزن أزال الجوى عنا بشائره
هما على الأرض فازدانت مفاوزها
بالنبت والمحل قد ولت مخاطره
من القبوب إلى التومات منتظماً
أرض البطانة جوف الليل هامره
والقبوب الذي عرف عبر التاريخ بـ(قبوب ود زايد) تزرع فيه مختلف المحاصيل من ذرة وسمسم، ويمتاز بإنتاجيته العالية حتى اليوم، وقد كان في السابق -قبل دخول الآلة الزراعية- تمارس فيه زراعة الحريق (وهي تعتمد على حرق مخلفات زراعة الموسم الماضي الزراعية على مشارف فصل الخريف).
اعتقل الخليفة عبد الله التعايشي زعيم الضباينة محمود ود زايد عام 1887م نسبة لرفضه الامتثال لأمر الخليفة -كما يقول يوسف ميخائيل في مذكراته صفحة 136- بحضور كافة أهالي الجزيرة ورفاعة وأولاد أبو سن والضباينة والعبدلاب ناصر ولد جماع إلى أم درمان.. فأصدر الخليفة أمراً بتجريد قبيلة الضباينة واعتقال محمود ود زايد. قام بمهمة الاعتقال كل من الأمراء عوض الكريم ود كافوت، عبد الله الطريفي والحسن ود عبد الواحد، عامل المهدي في منطقة القضارف، ويقال إنه من قرية تبارك الله جنوب شرق القضارف.
وبعد معركة انتهت بقتل عدد من قبيلة الضباينة اقتيد محمود ود زايد بصحبة ابنه محمد إلى كسلا ثم أرسل إلى الخليفة وأودع في سجن (الساير)، وكان ذلك في العام 1887م حيث قضى ود زايد أربع سنوات حتى شمله عفو عام ورجع إلى قبيلته، لكن لم تطل أيامه ففارق الحياة في العام 1892م، ودفن بقرية المناصرة بالقرب من قرية عصار جنوب مدينة القضارف.
يتساءل البعض كثيراً عن معنى (شحم ألبل) المرتبط باسمه ارتباط الحدقة بإنسان العين (محمود ود زايد شحم ألبل).. ويقول ناظر الضباينة عوض الكريم ود زايد ان ود زايد الأكبر اشتهر بكرم ضيوفه فينحر لهم النياق الدرار (الناقة الدارة)، اي التي في بداية مراحل الحمل، حيث يكون سنامها في هذه الفترة كبير الحجم مكتنزاً شحماً، وهذه المواصفات تجعل الناقة عزيزة لدى أصحابها فلا يفكرون في بيعها أو نحرها، يقول الشاعر عبد الله ود مرين في مدحه للزعيم محمود ود زايد:
من قومه الجهل من الكبار مأمون
يا نيل الفرات الفاض على سيحون
كان حضر البرامكة ما بقصر دون
وبالجود والكرم أشبه لي هارون

Post: #44
Title: Re: النعيم ود حمد.. أيقونة الكرم السوداني الأصيل(توجد صور)
Author: عبدالرحمن الحلاوي
Date: 04-20-2013, 01:27 AM
Parent: #43

2- الشيخ عمر المغربي ..كتب هذه القصيدة في مدح الشيخ بادي أبودقن أحد ملوك سنار :
أيا راكبا يسرى على متن ضامر إلى صاحب العلياء والجود والبر
ويطـوى إلية شقة البعد والنوى ويقتحم الاوعار فى المهمة القفر
وينهض من مصر وشاطئ نيلها وأزهرها المـعمور بالـعلم والذكــر
لك الخير إن وافيت سنار قف بها وقوف محـب وانتـهز فرصـة الدهر
والق عصا التسيار فى صرح انسها تجد كل ماتهوى النفوس من البشــر
وأهد سلاماً عطر الكون نشرة الذ َّ مـن المـاء المـسلسل والقـــــطر
وأحلى وأهن من وصال بلا جفا وأعـلى وأغـلى مـن عقـــــــود الدَّر
إلى حضرة السلطان والملك الذي حمى بيضة الإسلام بالبيض والسمر
هو الملك المنصور(بادى ) الذي له مدائح قد جلت عن العد والحصر
حمى حرمة الدين الحنيفى بالقنا وعزَّز فيه راية الفتح والنصر
وجرَّد للإسلام والملك صارماً أباد به أهل الغواية والكفر
له فى صميم الملك مجد مؤثلُ تلقّـَاه عن أسلافه السادة الغرِّ
ملوك تساموا للعلي وخلائف أولو العزم فى أزمانهم وأولو الأمر
هم العقد من أبهى اللآلئ نظمه مناقبهم كالمسك طيبة النشر
وفيهم مولانا المليك فريدة لذا العقد ربُّ العز والمجد والفخر
هو البرّ والبحر المحيط حقيقة فناهيك من برّ ٍ وناهيك من بحر
عماد يلوذ المسلمون بظله وسدُّ منيع للأنام من الضر
سليل ملوك الفونج والسادة الأولى علا مجدهم فوق السماكين والنسر
محا أثر الفجار بالسيف فاغتدت بهم حوزة الإسلام سامية القدر
إياد له بالنصر كاسرة العدى ولكنها بالجود جابرة الكسر
به أصبحت سنار فى انس والصفا وتاهت على البلدان حتى على مصر
تبارك من أنشاه للخلق رحمةّ وزان به الأزمان كالعقد فى النحر
وصيَّر أمري فى يديه فإِن يشأ أزال برغم الدهر ما من الضرِّ
فاني فقير والفضائل حرفتي وفى سلكه نظم الجواهر والدر
فقبَّلتة الفاً وحقاً جعلته على الرأس تعظيماً وأودعته صدري
تسلمت عبداً من صلاتكم ونلت به فخراً وناهيك من فخر
فخذها من العبد الفقير قصيدة منظمة كلدرّ فى خالص التبر
هو المغربي المالكي وانه يسمى ابن الخطاب ومثلك من يدرى
فمنوا عليهما بالقبول وانعموا علية بما ينجيه من غصص الدهر
فلا زلتَ فى أوج السعادة رافلاً وراجيك (باد) عن عطاء وعن شكر

Post: #45
Title: Re: النعيم ود حمد.. أيقونة الكرم السوداني الأصيل(توجد صور)
Author: عبدالرحمن الحلاوي
Date: 04-20-2013, 01:43 AM
Parent: #44

3- الشخ مالك ابوروف الملقب ب (دفاع البل ) والشيخ هلال أبوحجار والمرضى أبوروف فهذا سجل ضخم ومورد فخم يصعب تتبعهم وسبر أغوارهموما دون في كتب الرحالة كثير يحتاج وقتاً لإخراجه للناس ولكن سأكتفي ببعض الإشارات :
من قوز الأهليج يوم الخميس جاني الخبر الشين
ماتوا أخواني السمحين
حليل أخواني الرقدو دمير شلبي ساري الليل
هذا النص للحاردلو يؤرخ واقعة قوز الإهليج في صراع رفاعة الهوي ( الغرب ) مع الخليفة عبدالله .
انظر لمدح شلبي ابوروف حيث وصفه بأنه ( ساري الليل)....
التحيات لصاحب البوست والزملاء في المنبر والقراء الكرام

نواصل كا وجدنا سانحة

Post: #46
Title: Re: النعيم ود حمد.. أيقونة الكرم السوداني الأصيل(توجد صور)
Author: سيف اليزل برعي البدوي
Date: 04-25-2013, 01:39 PM
Parent: #45

شكرا لمجهوداتكم يا شباب معنا في هذا البوست
للتوثيق لاعلام بلادي