شيخ العرب و جماعة من شعراء البطانة ادلو فوق وزنين لقو عندها ود شورانى

أكان العرب نازلين في "السادة.." وجا
احمد ود عوض الكريم والصادق من
البريسي..والوطا صباح .. والصادق حلب
شدوقو في العرب
كورك:اروروروووك..علي طول حسو ..
وكل زول شال سيفو وجوا جاريين
قايلين في مشكلة ..
يا زول الحاصل شنو؟؟
قالهُن: حرّم عوجة مافي ..الجملُو قريب
يشِد ..
شنو ؟؟
قالهُن "وزنين" فتوها في "القِليتة .. "
نمشي نشوفا هي ماسكة درب القِداما
ولا سوّتلها راي براها ..
وهسع الحقيقية الجملو قريب كلو
شدّا ..
قيّلوا في الصُباغ وإتراوحو في
ريرة ..وباكر الضِحى جوا عِندها ..
قدُر ماشافت الرَكُب ماشي علي
البيت..وكان نازل في بيتا عبد اللهِ ود
شوراني شبّحت البيت زادتو..مرقت علي
الجُمال دلّت البِتقدرها..
والكيف جبنة بس ..
وجابت الموية اسقتُن ..وولعت الفحم
يتهوزز مِتِل مَغس اللقربين ..وإشتغلت
علي الجبنة ..
وهسع ختت الفناجين متل وليدات
الفَصُل ..ومَلتِن على قدر المجتمع.
أحمد ود عوض الكريم قال : في حُكمُ
مَجلَس : الما بجيب غَنوة فوق "وزنين"
دي ما يشيل فنجانو..
قالولو : غن آ شيخ أحمد..
قال: لاالسابقك علي الباب قولو يا
أرباب .. يغني ود شوران دا ..
ود شوران قالُو: الغُنا فوق وزنين دي؟؟
شيخ أحمد قالُو فوق وزنين دي ..
ود شوراني قال:
سمحة وضوقها لبن صهباء ودخلها
مبسّط
شرفتا رِيل وكفيتا خيل وطُولها موّسط
من تاتاي قدومها وخطوتا الانرصت
حسيت قلبي فارقني وكبِدتي إنقصت
دا ود شوراني .
ادتو فنجانو
................................................ .
وإتلفتت على الصادق كشمت.
الصادق قالها:
لحظ ابصارو خصه اللحظة لي بصّاها
فرّا فواطرو تمرة فادى كع قصّاها
قدر ما اقول أتوب الون علي أنساها
مجلوقةً تقبّض في البدن داساها
.....................................................
شيخ العرب عاين عليها هي ..
قاليها:
شماليقك نُضاف وصباكي ناقِع ماها
رُوبتِك قامِتك المربوعة تب قاسماها
جميل جِيدك مسجل والعقول لا سماها
دعجات خد وفادعاً في البهيم باسماها
.......................................................
وداهو علي بلة ود اب شُكُر.. قالُو:
نفسي الخاينة ابت الزاد وطريّت كيفا
هادي قصبة سقادي الموجا كاضم قيفا
معشوقتي الجميلة وديسا هدلو كتيفا
ركفة شام ظُرة وسمحة دهبة ومُهرة
فُلوة وديفا
........................................................
جادين ود المهيوب قاليها:
شرقان في جمالك وغلّبني أوصافك
وفيك جُملا تمتع كل راوٍ شافك
الفارس اللِبس درع الدويدي بخافك
مايقك عين جدي ودوف أم لبب في اردافك
........................................................
أمُحُمّد ود الفكي حمد,ود أب ناجمة
قاليها:
سَماحِك غير حِبُوب بَرتا وقفِيس حُجّاج
سماح اليبست دوف الطريفي الساج
شِعاع زور الغشيم الفي الظلام وجّاج
سماح الفرُوا براق السِرا الفجّاج
...................................................
خالد ود علي قاليها:
لِسَان باهي الوريد المُو شرِف هراج
هُدود الصي عيون الغافي في السهراج
تفرذ زمهريراً في العضُم تلاج
يحلعُقد الضماير بسمها الفلاج
..................................................
ود شعيت قال:
سنهُور حاكم الدولة ابسِلاحاً راج
ماخدة عليهو دبورتين علاوة وتاج
دَرعات عُنّز الريل السماهِن هاج
طال حسر العليهُن ختت الاسلاج
................................................
الصِدّيق ود عباس قال :
جمال معشوقتي أبداً في البلد مافِيش
جمالاخِلقة غير عَدلة لَباس وغشيش
ديفةالمرّحن بين ود قِدير وكشيش
جمالك فرضة والتانيات معاكي عويش
.................................................
كرار ودكُردُم قالو:
يا الصِدِيق عشوقي الكتفو هدلو الريش
مضروب الغرام قال الحكيمما بعيش
قبلي أم درعة بدري وصيدت في الديش
كتير الترّكتلُو كتابو وكَترالهيش
...............................................
رانفي ود اللافِض قال:
معشوقتي كحيلة الرُميش
أديبة وراسية مي ام لكعة المشيها
رشيش
جرحها نازي دافِق دم فؤادي بشيش
درعاء و للكُلوهاتجوز قُمارها دِشيش
................................................
عبد الله ود الفكي الصديق ود اب ناجمة قال:
ناس رانفي بِنُوحوا مقربنين وعطيش
انا مالي؟ مِحارب النوم ومابي العيش
عاشقيالجرحو كاتم دمو ما في بشيش
خلاس داركني ..عِلا الليهو قشة بعيش
...................................................
احمد كيتا الهدندوي قال:
"إيداييب كُلها" بي شلاخ واب رشمة
كريكناب هاب للي ليما وتِكنِشما
الخلاني اكسر التوبة وين ما أطرا
اناقريت تيكا ما جلسو الاراملا ما
..................................................
سليمان الهدندوي قال:
يا قلبي الوليد مالك بقيت تشلا (تتشلع)
قال من شوفة اللابس رهيف ومدلا (مضلع)
علي المربوعة قامتو وما الطويل ومخلا(مخلع)
سواي حاكا دهنوك السنوك الولا (الولع)
..................................................
عيد ود الشيخ عبد الله الزبيدي قال:
نحنا أولاد رشيد الخاصة بالدرهان
نحنا أهل الدعيلات ما بنسعى الضان
ننصب لها رايش نحنا نسكها بالسفهان
نرضي ست الجوجلية وكان
الله لا بارك فيها ولابارك فيكم إنتو
ياالعجمان

الامين البشارى اخوى عندى الكلام دا فى شريط كاسيت و بدور اداويهو
شان ينزل فى البكان دا و مانى عارف الحبة دى .
اوديهو احولو ل سى دى و الباقى عليك و لا الشورة كيفن

جميعابى يا حبيب
اعد كرر
ياخى نضم بالسماحة دى تقلبو هيرغلوفى
ياخى اكتب الكلام ده تانى نائب مأمور ان لم تكن ماموراً
سلمت،،،

حباب الخال
و الله كتبتو زى ما ياهو لكن المنبر الليلكم دا لقعدتى و قعدتك دى ما عارفو بيجوط لى الكلام شان شنو
و الله وكتين اسمعو ببحة عبد الكريم ودشعيت بس بكوس السوط و مرات بدى نفسى جلدتين تلاتة .
كلامك اوامر يا خال

الجميعابي سلام
الصادق ود آمنة
ود شوارني
ود ابسن
وكل الذين ذكرتهم شعراء فحول
لكن البتكب الجبنة لو شافتك نزلت كلامهم بالطريقة دي تحرد الجبنة وكببانا
دحين زي ما قال خالك ود الموج
اعد ويا ريت لو نزلت الشريط

و الله آالشامى اخوى النضم سمح و ست الجبنة سمحة بالحيل
لكن ساعمل جهدى انزل النضم ملف صوتى.
و شفت ريحة الدعاش جابتكم و ريحة البن

Quote: و شفت ريحة الدعاش جابتكم و ريحة البن

اميز البوستات يا امجد هي التي تتناول مثل هذا الفن
ولقد اصبت تماما بفتح هذا البوست
وحنظل متابعين

مع جزيل الشكر والتقدير

حباب امجد
بوست جميل وحنكون متابعين
لانو شعرا البطانة ديل
كلامن عجيب وانا زول بطانة
عشتا فيها وعاشت في دمي
كل المناطق الذكرتها شفتها
ولفيتا من الصباغ وريره والصفيه
والجبال من جبل قريعة
وجبل والغر والعافاية
وجبل المندرة الفيهو ضريح اولاد
عبد الصادق الادبو الفيلة وانت ماشي
علي جبال السوكي وفنيس
وسرجين والابايتور
والوديان من وادي ابسعنة وابقنافذ
واب جراد
والله ياامجد رجعتني لي ذكريات جميلة
تسلم

Quote: وجبل المندرة الفيهو ضريح اولاد عبد الصادق الادبو الفيلة وانت ماشي

ديك المندرة وقُنّاصا....... وللنهمة تتسابق ناسا
حباب الاصلحو المرّاسا...... وجابو الفيل مع ابوجراسا

شكرا لكل الاخوة الذين تداخلوا فى هذا البوست
و خلى بالكم انا هسه نفسى قايم من تعديل النضم
الفوقانى لكن برضو قلت ما بجيكم ايدى يابسة.
برجعلكم بمهلة .



الشيخ أحمد عوض الكريم أبوسن
عبد الله حمد ودشوراني
الصادق ود آمنة
علي سليمان المرغمابي
كرار أب كردم
العاقب ود موسي

يصفون جمالهم و لا قول على قولهم

أحمد ود عوض الكريم أبوسن ( شيخ العرب ) قال

ياكور المفازات اللخبر فرك
وقبال تبقى نايب للوعر جرك
رئيس المنطقة المنو الغميد إنفك
أهجو الليلة يالسمح اللقالو مدك

ودشوراني قال

أب صلعة القطابي الطار بعد مارك
أسرع منو فور هرع البروق لا شك
علي دكك الجنيب الراسي مك من مك
سوى مشي الهوى القالع بعد مافك

الصادق ود آمنة قال

أكل الصافي علاك يا أب سناماً رك
أبوك فارط الجدي الأخد الروينة وجك
علي ست الصبا الدكانا قاطع اليك
رايف وفكفك الحسكة أم حديداً شك

علي سليمان المرغمابي قال

حر عنافي نسل أماتو قاطع الشك
جدو الأبيض السابق خيول المك
الرمى الحجيل من النزيل الفك
بعيد ياأربد الشرق المجارب السك

كرار أب كردم قال

بعد ما إتفاضل الزهمول وسوطو جبك
جريك عنا وسرعك برق ونايبك كك
علي ست أم مرادة مني ما بتنفك
هاجم كاضم وزي حاضن الحبارة برك

العاقب ود موسى قال

يا الرهو المسافر للحجاز شرك
وعادة جدك السوسيو عليها عرك
عاشقي منزه الطبع العليه الرك
بعيد يا غايس البرق أب هديلاً تك

حذف للتكرار

الاخوة الافاضل انا شايف انو نطعن المجادعات بمسدار شان احكم
قعدتن و ابقالن متل الميس دحين قدر ما نسويلنا كام مداخلة نحزم نصهن
بمسدار .
هاكم دا.


مسدار الصُباغ
للشاعر احمد عوض الكريم ابوسن

دَنَّـــــاىْ القَفـــــــــــــَارات البِعرْف العوم
نَقضـــــتَ عليقْتُو بَاكرْ بيهو قَصْدي شَيوم
كــــــان سَهَّل علينـــــــا الواحد القيُّـــــــوم
بَشوف بُوْ الكـافي قاعِد ومِنْ وسِطْ مقسوم
***********
لَيْ تعبنــــاً مطِّـــولْ مِنُّو خِلاي حَابْســــــــُو
جِبتــــــــُو الليلة وتْبوبَحْ ضَرَبْ فوقْ يَابْسـُو
ابو خَداً بيلْمـــــــَع بالــــغضب مــــُو عَابْسُو
مِتْـــــــوطي الحِشـــــــَمْ تُوبْ المَحامِدْ لابْسُو
*************
مَرَقْ مخَلـــوفْتُوْ وقَيت فُوقُوْ لَشَّق طَافـــُوْ
شَدَّيتــــُو ومغَيت ســــــــير القُشاطْ في هَافُو
عَشِيّــــــة رُقَادِي عِند الكامـــــــلات اوصَافُو
افْدَعْ جِيد واهْيـــــــف وعَاليــــــــــَات ارْدَافُو
**************
مِنْ الشــــــــَايَة قَامْ هَابِر بِي كَاربْ الزومْ
عَارفْ اليـــــــــــُوم مِباشْرك بِي دَفَاق الدُّوم
عَلىِ الحَاويِّتو هــــــــَامْ مردَهْ أب شَراياً كُومْ
سيت الدَابِـــــــــي جاك وتْسِوسِو البــــَعَشوم
****************
غِشيتْ عِدْ الصُّبـــــَاغْ نَشَّـــحْتُو فِيهُو نَشَاح
خَتَرْ واتــــــــــــِوَجَّه الغَافي المِسِن لُوْ وِشَاحْ
عَلي سِيدْ الجمـــــــــال ابُوْ مُدْفعـــــــاً رَشَّاحْ
قَنَّبْ يِحـــــــَاكي في تِعلْ الخــــــــــَلا الكَشَّاحْ
**************
جَاءُ بــــــَاري الْعُطـــاش تِيس الرَوايِن دَاحْ
كُورُو يَجِضْ مِتــــِل كَلــــــــــــْب الخَلاَ النَبَّاحْ
هَجـــــــام دكة*َ الرَعْنــــــــــاْ امْ عَبيراً فاحْ
مَصـــــــَعْ واتْهبْلع الرِبْد الوَطَاطــُو صَباحْ
***************
وَخَرْبِي القـــِرُون شَافْ أمْ عِشَيـــرة زَوالْ
قَصـــــــْدو يَقَصِّرْ النَقَع الشِـــــــروفُو طُوَالْ
عَلي هجيـــــــم الدكَكَا متُوتْلـــــة بِي الدَوَّالْ
شَدَّّ هَســـــــِالو شََّمر ؤشَنَّقْ الســــــــروالْ
***********
عِنْد الــــــوادي هَا الايِدُو جَاتـــــــــــــُو تَقِنْ
قَطَعْ في رَاســـــــُو كاس مَنْتــَة وقَزَازَة جِنْ
عَلى هجوم السَحِى ألما بجيبْ كلام غِير حِنْ
كَضـــــــــَمْ القِيدْ وحِس كُورُو جَوالسُوْ تَطِنْ
*************
بينَــــــك وبيِن بِلـــــودْ العِنْدو فُوقْنَا حَقوقْ
جَاكْ صَيَّا مَفَاســــــِح وفي وطَاطُو شِقُوقْ
عَلى سُكــــــــّرْ نبات الفي العِــــلبْ مَدْقُوقْ
قَمــــــــــــاري الجَالسَة خَلّيتِنْ يَسَوّنْ قُوقْ
**************
شَافْ شـــُوشْتْ الحَمَرَّبْ وليها فَاسِحْ عَاقْتُو
دَرَعْتَ الســـوطْ عَلى سَرجُو ولِمِس حَراكْتُو
عَلى هَجيــــــــــم المَسرَّحْ عَابِدْ دلالو وفَاقتُو
رَحَلْ واتْشـــَابَى الشَبَّاك قَطَـــــــــــعْ عَلَّاقتو
**************
قَصَدْ العُقـــــــدة فات بِي سَافــــــــل الرَتَّاجْ
جَاء نَاطحْ الحَــــــــاكِم اللابس البِدل والتاجْ
تيس الحِنــــــُّو الهبَّرْ شـــــــــــِروكْ القَاجْ
قَيَّل فيهــــــــــــا قَبْل الحَر يجيب لي ازعَاجْ
****************
مَابــــــــي النزلة ضــــــَرَّاع النَقيبات سَاجْ
دَاير الفــــــي الجِدلْ طابقــة السُوار والعَاجْ
يِكشِّرْ نايبــــــو في ارض الحَصَى أب دَهَّاجْ
مَا خَصَّاهــــو في الهُرْبَة المِســــِى مُدْهَاج

سلام أمجد

في انتظار الاوديو

Quote: سلام أمجد في انتظار الاوديو

اهلين و سهلين حسين منور سودانيز يا اخى
و الله يا حسين عندى شريط كاسيت بس اداوهو
كيفن ما عارف

يا أمجد بوست في السلك واصل
بنجيك راجعين بسوط عنجنا


الامين البشاري بيكون ماشاف البوست دا أديهو لكزه في الخاص

يا امجد سلام
ما تسمع كلام ناس تمام ديل .. انتبه فهذا الحديث -وان كان صحيحا - يرمز لاشياء اخري انت تعلمها تماما ، وكان الاجدر بك انتقادها بدلا عن التباهي بها كما يفعل الموج !
اسم صاحبة القهوة والفطاحلة الذين يشربون القهوة والكثير الكثير .
عفوا اذا افسدت علي الكثيرين متعهتهم بحديثي هذا ولكنها تذكرة لابد منها ...

مافي زول يقول لي انت سرحت بعيد وكلام زي ده !
نعم هذا واقع يجب الاعتذار عنه لا التفاخر به ...
جلسات القهوة في ذلك الزمن كانت لها معاني اخري ولا كلامي غلط ؟

Quote: يا أمجد بوست في السلك واصل بنجيك راجعين بسوط عنجنا الامين البشاري بيكون ماشاف البوست دا أديهو لكزه في الخاص

اهلين ود الباهى
و منور اخوى
خلى بالك البوست دا انا عايزو فوق
الناس ديل يجيب ود الشلهمة و الحاردلو
و ود ضحوية و عكير الدامر و ود الفراش
و ناسا كتار نضمن سمح و خلى بالك فى ناس
كتبو نضم سمح لكن مون معروفين بنرسلهم شان
يحضروا معانا العيتنوبة دى.
تحياتى

Quote: مافي زول يقول لي انت سرحت بعيد وكلام زي ده ! نعم هذا واقع يجب الاعتذار عنه لا التفاخر به ... جلسات القهوة في ذلك الزمن كانت لها معاني اخري ولا كلامي غلط ؟

المسلمى اخوى حبابك
نحن بندور النضم السمح دا
الحاجات الاخرى ديك ما عايزنها
بالله عليك شوف سماحة الحديس دا آ

هبوب ود الشلهمة هبت جابتلنا شوية من نضمو
بالله عليكم شوفو الزول دا فضل فضلة لصاحبو




رفيقي الواجبة باذل ليها دمك ومالك
وفي وكر الهرف كضب البقع قبالك
فرسان المواقع الصعبة عمك وخالك
أبوك زرعك مناصح طينة ما لفالك

رفيقي الدنيا ما سوت هوس في راسو
رفيقا راسو مو قرعوبة جابر ساسو
رفيقا ضارعو بالهاشمي وعرفت قياسو
رفيقا في البشوفن مافي تب ود كاسو

رفيقا اصلو ماظنيتو يقطع يلومك
رفيقا يقل طمع نفسو ويندر كومك
رفيقي ان جيتو مضكر كرب قدومك
بتمرق منو عريانا بشيلها هدومك

رفيقا مو الطرورة وعلي التفيهة بدلك
رفيقا مالو ليك وان انقبضت بحلك
ما بدورك ملان ويعاف يباسك وقلك
رفيقي الواجب ان نطيت حدودو بذلك

مو صايع المجالات تم كاسو وعب
ومو الورل البهشك وبالفراغ بتنبا
كان الجو حما اتعكر صفاهو ارب
من ردك تحود ناسا غلاد وتلبة

ماك صايع المجالات وفي الصقيعة تزح
وماك كضاب تقول الفارغة تابا الصح
ماك ###### الرواكيب البتاكل المح
اب درقة الملان سما بضر ويوح

ان واعد صديقا حاشا موكضاب
وان امنتو سرك يقفلو كيلون باب
قلبك مااتنفض شايل ضلعتك شاب
يا اب هجعة الغداك من السمان وغواب

مو النعجة البغشك وينقلب يتعذر
على الدبر اب وعا بشيل التقل ما اتفزر
مالا غير شكر ان شاء الله سيدو معقر
ان مات مو فقد موعتودا نقر

اتعبتك تعب موت وانت عندك راحة
اخلاص من ضميرك ببشاش وسماحة
اياك توب قدلتي الخايلة في اللفاحة
نفرا توزن الجمهور عبار ومساحة

وقاسمتك مقاسمة الوريث في حقوقك
وانتاجات فوايدي ببضعن من سوقك
يا اب درقة الموشح بالسواميت طوقك
يفداك عمري كان احتاج قرينك يسوقك

ايدك في خراب كوم القروش ملهوفة
وسراقاً عطيتك زول حرام ما بشوفها
لباي البتصعب في ليالي السوفة
قلبك للقلوب فيهو اختلاف مو دوفة

Quote: ايدك في خراب كوم القروش ملهوفة وسراقاً عطيتك زول حرام ما بشوفها لباي البتصعب في ليالي السوفة قلبك للقلوب فيهو اختلاف مو دوفة

شكرا أخ الجميعابي,

شكرا متل دا المتنبي ما شكرو سيف الدولة

تحياتي

أحمد الشايقي

Quote: شكرا أخ الجميعابي, شكرا متل دا المتنبي ما شكرو سيف الدولة تحياتي أحمد الشايقي

مرحب بيك احمد اخوى ود الشلهمة اوتى من دقة الوصف و عذوبة
الكلمة ما يجعله من افذاذ شعراء السودان .
و تعال بجاى شوف عمك ود الفراش اشكر فى روحو
هاك





ابراهيم ود الفراش
انا البـحر الكـبير حـاوى الـتراسا
وانا الجدرى الواقع فى الحلة داسا
بشـد البـانـقـير سـمـح السـياسـة
وانا ابراهيم اخو ام شلخن مواسا
*******************************
انا البحر الكـبير حـاوى الجـزاير
وانا الجدرى الواقع فى الحلة داير
بشـد البـانـقـير سـمـح الـنفـايــل
وانا ابراهيم اخو اللابسة الجباير
*******************************
انا البحرالكبير الدابو حمر
انا قدحة زناد مدفع معمر
بشد البانقير جملى المضمر
وانا ابراهيم اخو ام شلخن مجمر
*******************************
انا البحر الكـبير ان عبرونى
وانا رحل الكحـل ان ميلونى
انا شوك الكتر ان جرجرونى
وانا الجن البخلى الزول ينونى
*******************************
انا البـحر الكـبير جـاب الكلـيتـة
وانا رحل الكحل متموم شطيطة
انا الجن الواقع فى زولو عـيطه
وانا ابراهيم اخو المحزوم رحيطا
*******************************
بـدور إلبل بـدور فرع السعية
بدور السيف مع الدرقة القوية
بدور انهم بخيت لى ضيف عشية
بـدور قـدحـاً يكـفى التـلـتمـيــة
*******************************
بـدور إلبل بـدور نـاقة وهيـطة
بدورفرساً سريع اخد بو عيطه
بدور ضيف العشا وانهم بخيتة
بـدور السترة لامـن القى ميتة

Quote: تتلاصف خديداتو...المسوي قلوبنا صيداتو البموح بى نهيداتو ...البنسى الزول وليداتو

عبدالله ود حمد ودشورانى والصادق ود آمنة وعبدالفراج ود البدرى (ود دقمة) من محبى الشعر و الشعراء و مجالسهم الذى يهوى الشعر ومجالسه و عوض وداعة التقوا فى منزل احدى الحسان فى بادية ابودليق
و التى اعدت القهوة لضيفين يختلفان عن غيرهم... انهم ود شورانى والصادق و قد كانت بهية الطلعة فائقة الجمال زى ما قال ود شعيت ملكت كمالاتا .


عبدالفراج ابتدر الجلسة ببيت من الشعر قائلا

البن البطقطق وحرق القاليهو
خل مزاجى راحل بجميع ما ليهو
مشتول القريرات النتر خوليهو
خدر وطرفى شايفو وروحى علقت فيهو


الصادق
العين ساقدة بلحيل وقاسى نصحه
ربيع القامة فى سهر الليلى دفحه
رب العزة فى سابع السوامى رفحه
روق ذهنها وفطنها ما صفحه

ودشورانى

واسفاى على صبر الضعف لى وشحه
سببه العارضا فوق شتم النحاس القحه
الخلاقا لين طبعها وسمحه
زولا فدورة النوق فى العجيج قمحه

الصادق
تقيلة المجلس المن القبيح تسحه
من حر شوقا قلبى بنوح ودوفى اتلحه
الخلانى القايله فيك ما بسمعه
مقطوع النصيب بيك نفسه ما متعه

ود شورانى

لهجك كلمة الحنى السبيطه تفحه
اندى نداك يا الشتلة ام ادوبا نحه
الخلانا خلقك بالشكر نمدحه
اردافك فلو وقدمك تقيل ما رحه

الصادق

انتى فريدة العصر ونخيل الشبره
شوفتك تذهب الهم والليالى الغبره
بفر براطمك وقامتك المنتبره
احيتيلى نار قبره البوقد كبره


ود شورانى
البارح نسيم ريحل طلق من جبره
ذكر علقى لود العنانيس هبره
اح من فلانة وجرحها الما بيبره
قلبى عليها نلح بعد اليقين والصبره


الصادق

اخش فى مكتب الريس واصد بالعبرة
انا يا دقمة طشت روحى مى منخبره
الخلانى اتخترا النصيحة وابراه
ياقوتة الحضرى الوازنو ميت عيره


ود شورانى

ارض الله الوشيعة على بقت منشبره
من لهطى وتقربنى كل صاحب يبره
عارفك يا الظهورك مى ردية ودبره
فقدك احر من سم ابلدغتا نبره

الصادق
راسة اديبة عندك فوق ندايدك فوت
ضربك للعشوق كليح سيوف مو سوت
ناس دقمة متلى مهددين بالموت
زى كورة الهلال شاتت قلوبن شوت


ودشورانى
سبيك الخيل ظبى الغفرن بخلاهن
راح يخرب شروط التوبة من منشاهن
فليج بسمها العقد القلوب حلاهن
والسماء والارض يا دقمة فوقنا كفاهن

الصادق
يا عوض الجسوم اتعودن لبلاهن
ميدان العصر وعقب القلوب قالاهن
بدر الكون كبس الظلام ضواهن
العالى والوسط فاز بالجمال خلاهن


ودشورانى
سيدات الشباب ظهر الصبا البخفاهن
زى بدر التمام ما بينات كواكبه معاهن
من حر لهيب شوقهالعضام برعاهن
موج بحر الدميرة علايبه ما بيطفاهن

قلبى الليلة فاك السكة ماشى مخرم
زى مظلوم سلطة المحكمة البتغرم
ماذينا ابسنينا فى كبدى يفرم
سمحا للغنا فوق الخلافو يحرم

انتى مسيكة الفى القيف شابكة نوايبو
انت المجلس الممتاز تهبلى شايبو
ردفك طاوى لبسك فوق متانيك جايبو
انتى ثنوك ما حرق كبدنا لهايبو

Quote: قال أحمد أبو عاقلة أبو سن جباينهن صفاهن والدلال لالاهن .. وردات الخدود طل الربيع بلاهن .. وضع فوقهن كما الأكتاف هدل خلاهن .. رقاب الريل عيون بقر الوحش فى حلاهن .. رد عليه شاعر اخر عم قلبوس جزيل تحياتى وشوقى تلاهن .. أما احوالنا رب العزه يتولاهن .. قصدى أريك صفات من التممن الاهن .. جمَّلن خلقن وبالأدب حلَّاهن .. الاهن لى قمم رتب الجمال علاهن .. قادن ريش نعام كاجه الكفل تلاهن .. الخلانى ما يسهل نميمى بلاهن .؟ ريدن حلَّ محل دمى وعروقى ملاهن .. ------------------------- و هذا شاعر ثالث يقول صوبت ورميتن والسهم جلاهن .. ربات الخدور نوم الضحى جلاهن .. قادر ربك الزادن حلا وحلاهن .. مردومات كفيل ضامرات وفوق علاهن .. زوقهن عالى ريقهن حالى ما أحلاهن .. روَّح عمرى إلا قليبى ما بسلاهن .. شغلن قلبى ، عينىَّ السهر والاهن .. ما فاتت رويحتى ارتحت من تالاهن ..

الشاعر الفحل عبد الكريم ود شعيت بلا شك رجل يطوع الكلمات و يحسن الوصف
و هو فى هذه الابيات يتغزل فى محبوبته جنة.



جنة سدرها شايل ليهو رمانات
جنة الفيها أوصاف السماح تامات
جنة العندها العز والخيول عارضات
جنة فطيمة المرقن على السبعات

درعا كفلها عالي ضميرا زي حجبات
(شبريك) فيه زي نقش الكتب بالذات
سمحة سماحة ما سمع بيها في السابقات
تاجوج والزبيدة زليخة في الشيخات

سيقان جنة روثمان قاطع العوجات
وأقدام جنة ليف، لا هن أفتكر لينات
عاشق جنة جنى بتعتري الحالات
نظرات جنة أنفع من دواء وبخرات

Quote: أحمد ود عوض الكريم أبوسن ( شيخ العرب ) قال ياكور المفازات اللخبر فرك وقبال تبقى نايب للوعر جرك رئيس المنطقة المنو الغميد إنفك أهجو الليلة يالسمح اللقالو مدك المفازات اي العتامير وروعة الشاعر تكمن في وصفه لبعيره بالقوة والسرعة وهو (قعود) اي قبل ان يصير بعير نايب وتعركة التجارب (نمتطي البعير وهو جذع ثم تني ورباع وسديس وبعد يكون جامع او بعير ناب (نايب) ثم وصف المحبوبة بملكة جمال منطقتها ثم وصف بعيره بالسّشمع) بالعين وهو اسرع الحيوان او كما يقول الشاعر علي ود قدال الكباشي بي الصي والعتامير قامن معاك قزاعر وفي الهيش والتبوس ليهن تكسر الواعر علي المتبولة مداحاً بشايل الشاعر والله سمعاً قاصر الحاروك وسمع الجاعر في المقطعين الاخيرب وصف في غاية الروعة لخبب البعير اولا وصف متعه في (مداحا بشايل الشاعر ثم الحذر عند الأقتراب في (سمعاًقاصرو الحاروك وسمع الجاعر) او ضيبا ودشوراني قال أب صلعة القطابي الطار بعد مارك أسرع منو فور هرع البروق لا شك علي دكك الجنيب الراسي مك من مك سوى مشي الهوى القالع بعد مافك هذا الشاعر وصف بعيره بالصقر القطابي وهو اقوي الصقور لكن بعيره اسرع منه حتي شبهه بالهرع الراحل الدكك جمع دكة وهي الفرقان ثم وصف محبوبته بانها بت شيوخ وملوك وصف بعيره اولا بالضقر القطابي ثم بالهرع الراحل ولكنه حين يتجه صوب المحبوبة تزيد سرعته حتي يصبح كالرياح وهي الاسرع هذا شاعر ما بصاقع الصادق ود آمنة قال أكل الصافي علاك يا أب سناماً رك أبوك فارط الجدي الأخد الروينة وجك علي ست الصبا الدكانا قاطع اليك رايف وفكفك الحسكة أم حديداً شك ويا سلام الصادق استهلاله جميل حين قال انه يعلف بعيره من الذرة بعد نضافتها (يجولوها) حتي صارت ذورة سنابه كالطائر عندما يحط علي الأغصان وهذا تشبيه لا يقدر عليه الا امثال الصادق وبحكم انني إبن بادية اعرف الفرق بين سرعة وقوة البعير الذي يرعي العشب وبين بعير العيش علي ست الصبا يا سلام والمقطع الاخير لا ادري ماذا يريد به علي سليمان المرغمابي قال حر عنافي نسل أماتو قاطع الشك جدو الأبيض السابق خيول المك الرمى الحجيل من النزيل الفك بعيد ياأربد الشرق المجارب السك هذا الشاعر وصف بعيره بانه عنافي مأصلة اماتو اما اباءه فهي نسل البعير الذي سبق خيول احد المكوك وهذا يكون ايام (الزينة) ثم خاطب بعيره بأن ديار المحبوبة بعيدة ولا ادري ماذا يقصد بأربد الشرق هل هو الصقر كما هو متعارف ام بعير كرار أب كردم قال بعد ما إتفاضل الزهمول وسوطو جبك جريك عنا وسرعك برق ونايبك كك علي ست أم مرادة مني ما بتنفك هاجم كاضم وزي حاضن الحبارة برك هذا الشاعر لم يعحبني استهلاله حيث قال بعد ان اجمتعت الزهمول وهي الجمال ونقول في بوادي الغرب (الزامول( سوطي جبك) وهذا لم يكن محمده للبعير وانما زم لأن البعير الفارط لا يستعمل معه السوط اما الشطرين الاخيرين فقد اجاد حيث وصفه (هجم كاضم-ومثل طائر الحُبار) العاقب ود موسى قال يا الرهو المسافر للحجاز شرك وعادة جدك السوسيو عليها عرك عاشقي منزه الطبع العليه الرك بعيد يا غايس البرق أب هديلاً تك

يا سلام وصفه بطائر الرهو ثم وصف جده بأضليم او هضليم وهو ذكر النعام
ثم وصف المحبوبة بانها منزهة من العيوب ولكنه اجاد جداحين وصف بعيره بالبرق البعيد
وهذا وصف في غاية الروعة لأن السواري اولا يومض برقها لأنها تأتي من بعيد ثم ترعد الرعود ثم تهطل
الأمطار وهذا دليل علي بعد فرقان الحبيبة


شكرا الجميعابي وعلي عبق الكواليت شيوخ الدوبيت
ناس ود ابوسن وود شوراني والصادق والعاقب وبقية العقد

نرجو مراجعة ما اورده شخصكم من الدوبيت حيث صاحبها كثير من الأخطاء التي تفسد
وتغير المعني

لك محبتي وللمتداخلين

Quote: يا سلام وصفه بطائر الرهو ثم وصف جده بأضليم او هضليم وهو ذكر النعام ثم وصف المحبوبة بانها منزهة من العيوب ولكنه اجاد جداحين وصف بعيره بالبرق البعيد وهذا وصف في غاية الروعة لأن السواري اولا يومض برقها لأنها تأتي من بعيد ثم ترعد الرعود ثم تهطل الأمطار وهذا دليل علي بعد فرقان الحبيبة شكرا الجميعابي وعلي عبق الكواليت شيوخ الدوبيت ناس ود ابوسن وود شوراني والصادق والعاقب وبقية العقد نرجو مراجعة ما اورده شخصكم من الدوبيت حيث صاحبها كثير من الأخطاء التي تفسد وتغير المعني لك محبتي وللمتداخلين

شكرا الاخ عبيد على طلتك البهية
و يا سيدى يا ريت تصحح اى خطأ الاقيك
لانو بعض الدوبيت انا بكتبو من شريط كاسيت
و البعض الآخر ابحث عنه فى الكتب و المواقع


كتر خيرك