انها بالفعل بدايات التغيير القادم والتي لن تتوقف بإذن الله وإرادة هذا الشعب المظلوم وستتسع رقعة الغضب الشعبي كل يوم حتي لحظة انفجار البركان والذي هذه بداياته وثور حتي النصر.
لماذا صار هذا الوطن يمطرنا أحزاناً ويسقينا الفجيعة كل صبح ؟! .. لماذا غادرتنا الافراح وداهمتنا الخطوب ؟! .. لماذا سلّط الله حكومة البشير المدمرة كي تحكم هذا الشعب المسكين ؟! ..
والله يا جماعة الخير احنا تعبنا خلاص من المسلسلات التركيةالطويلة البعملا رهط الدمار الشامل الحاكم السودان دة .. الناس ديل بقوا متخصصين في اغراقنا بهموم تفوق طاقتنا كبشر .. يطلعونا من حفرة حرب عشان يرمونا في دُحديرة حرب تانية .. ولسة ما بنكون شلنا نفسنا من مصيبة سودا عمولها .. بنلقى روحنا دخلنا في مصيبة تانية اسود من نياتهم .. واكبر من كروشهم المتضخمة بفعل سرقة موارد البلاد والعباد .. وانيل من وشوشهم المتوردة من اكل مال السحت ..
انا مستغربة .. كيف الناس الخايبين ############ين ديل لسة قادرين يحكمونا ؟! .. دة معناها انه احنا زاتنا خايبين وبلدة .. أي والله .. بقينا شعب كامل مصاب بالخيابة والبلادة بدليل انه رجل مزواج ورقاص وحلاف قدر يحكمنا هو وعصبته لمدة فاقت العقدين .. من يوم ما هلّوا علينا ما شفنا خير .. دخلوا علينا بالساحق والماحق والبلا المتلاحق .. رجلينهم الناشفة نشفت خيرنا .. وايديهم الطويلة استولت على حقوقنا .. وذممهم المطاطية حاوطت اقواتنا وارزاقنا .. طفشونا وبهدلونا وقسمونا وشرذمونا وباعونا بابخس الاثمان .. غذوا عصبيتنا وجاهليتنا ووحشتينا .. وخلونا ناكل لحم بعض .. طمسوا اخلاقنا واغتالوا سماحتنا وطيبتنا .. خلونا مسوخ مشوهة لناس كانوا كويسين ..
اها ونحنا لسة غاطسين في وسط الدوامة حقتهم دي وبنحاول نطلع منها قاموا فتحوا لينا نفاج جديد لحرب جديدة مع ناس كانوا جزء مننا وهسة بقوا اغراب وكمان اعداء .. وبدأ رئيسنا المبجل يرص الجوقة بتاعتو ويحضر لعزف سيمفونية جديدة يخاطب بيها شعبه الضمن خيبته وبلادته .. قال ايه ؟! .. تعالوا حاربوا الجنوبيين عشان استولوا على قطعة ارض عزيزة !! .. وقال ايه ؟! .. ادوني اولادكم احارب بيهم المعتدي الظالم !! .. وبدأت الجوقة من خلفه تدق على اوتار الوطن والوطنية .. ويردد من وراهم الكومبارس أنّ يا معشر الاغبياء اسمعوا وعوا .. انتم مطالبون باثبات ولائكم لحكام هذا الوطن الذين سحلوكم وقتلوا اولادكم وضربوا نساءكم وطردوا اباءكم وقطعوا ارزاقهم .. انتم مطالبون بتقديم فلذات اكبادكم كقرابين على مذبحة الحرب القادمة .. وإلا .. فانتم متهمون بنقص الوطنية .. وانعدام الولاء .. وموالاة الاعداء .. وعصيان اولي الامر .. وهي تهم لو تعلمون مدى فداحتها لذهبتم انتم ايضاً مع ابناءكم لتحاربوا المغتصبين .. وان شاء الله تموتوا كلكم .. يعني شنو لو مات منكم الف ولا مليون ؟! شهداء .. وحات الخوة شهداء ولا خوف عليكم ولا اهلكم يحزنون .. موتوا ياخي .. احنا حاولنا جاهدين منذ قدومنا الميمون ان نقتلكم باي طريقة ممكنة .. بالجوع .. بالسجن .. بالحرب .. ما مهم الوسيلة .. المهم تموتوا .. يا جماعة الخير افهموا .. وجودكم عامل للجماعة ديل مشكلة لانكم بتقاسموهم في الكلا والماء .. وموتكم انتم واولادكم واحفادكم ونساءكم رحمة لهم .. انتو مالكم شعب ثقيل كدة .. قدر ما عملوا فيكم ابيتوا تموتوا ونسلكم ابى ينقطع !! هسة خلاص الجماعة ادوكم رخصة موت مشرف دفاعا عن الارض والعرض .. ونصرة للحق واعلاء للدين.. ( ووتر الدين دة طبعاً كان اكتر وتر _ مقسّم _معاهم .. لكن للاسف هسة فقد سطوته .. حقوا يجربوا ليهم وتر جديد يحل محل القديم بعد استهلاكه بشكل مفرط ادى الى عدم صلاحيته لدى افراد الشعب ) .. يا جماعة الخير قاتلوا الكفار حتى يرتاح الحاكم .. ارسلوا اولادكم إلى المحارق كي تصدوا النار عن العصبة الحاكمة .. اجعلوهم يحاربوا وكراعهم فوق رقبتهم .. عشان نسوان واولاد واحفاد ومحسوبي رئيسنا المبجل يستمتعوا بالامان .. وبركوب الفارهات .. وبالسفر إلى المنتجعات .. وبسكنى القصور العاليات .. حسوا على دمكم وبطلوا التلامة بتاعتكم وامشوا حاربوا .. عالم بليد وخايب وما بفهم الكلام ..
عن نفسي .. ما عندي اولاد .. لكن لو عندي مية ولد .. ولا واحد فيهم ما بخلي يمشي يحارب نيابة عن نظام البشير ورهطته.. حيتهموني بالخيانة وعدم الوطنية ؟! بعدم الولاء ؟! .. ان شاء يتهموني بكل التهم العندهم .. عملوا لي شنو عشان اديهم اولادي يحاربوا بالنيابة عنهم ؟! هم العلموني عدم الوطنية .. وهم القطعوا خيوط الولاء .. هم الخلوا الوطن كأنه ما وطن .. هم اساس البلا .. عشان كدة لو عندي ولد بمسكه عليّ وما بطلعه قربان يذبح على نصب افعالهم .. زي ما اشعلوا النيران .. خليهم يطفوها براهم ..
خليهم هم واولادهم يمشوا يحاربوا .. إّنا ها هنا قاعدون .. ..
لماذا صار هذا الوطن يمطرنا أحزاناً ويسقينا الفجيعة كل صبح ؟! .. لماذا غادرتنا الافراح وداهمتنا الخطوب ؟! .. لماذا سلّط الله حكومة البشير المدمرة كي تحكم هذا الشعب المسكين ؟! ..
Post: #21 Title: Re: الثورة إنطلقت .. مظاهرات الخرطوم (فيديوهات) Author: نيازي مصطفى Date: 04-18-2012, 04:10 PM Parent: #20
لهم التحية ..نعم يجب ان تتوحد جهود كل السودانيين لانتشال البلاد من هذه الطغمة التي دمرت بلادنا وافقرتها واذلتها.. وعلى الشرفاء والكرام الذين تبقوا بقوات شعبنا المسلحة والقوات النظامية ان يساندوهم . لك جزيل الشكر على هذه البشارة .
Post: #22 Title: Re: الثورة إنطلقت .. مظاهرات الخرطوم (فيديوهات) Author: Amani Al Ajab Date: 04-18-2012, 04:43 PM Parent: #21
Quote: شكراً امانى علي هذه الاخبار السارة
شكراً الأخ سعد المدني .. نأمل أن تتضافر الجهود من أجل إقتلاع نظام الحرب والفساد .. دمت بالف خير ..
Post: #24 Title: Re: الثورة إنطلقت .. مظاهرات الخرطوم (فيديوهات) Author: أحمد ابن عوف Date: 04-18-2012, 05:16 PM Parent: #22
شكرا استاذة اماني
التحية لهؤلاء الطلاب، وهم ما زالوا مؤمنين بأن التغيير ممكن
Post: #26 Title: Re: الثورة إنطلقت .. مظاهرات الخرطوم (فيديوهات) Author: اسعد صلاح البدري Date: 04-18-2012, 05:30 PM Parent: #24
ثــــــــــــــــــورة حتى النصر
Post: #25 Title: Re: الثورة إنطلقت .. مظاهرات الخرطوم (فيديوهات) Author: Ahmed Elyas Date: 04-18-2012, 05:18 PM Parent: #1