عفواً سيدي الحجاج ..... قصيدة جديدة رائعة لأزهري محمد علي

عفواً سيدي الحجاج ..... قصيدة جديدة رائعة لأزهري محمد علي


09-28-2011, 06:42 AM


  » http://sudaneseonline.com/cgi-bin/sdb/2bb.cgi?seq=msg&board=350&msg=1317366723&rn=0


Post: #1
Title: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 06:42 AM

عفوا سيدي الحجاج
أزهري محمد علي

كلابك والأفاعي الحايمة من روتانا لي أمواج ..
كاورت البلد بي حالا ..
... ولا لقت اليقولها جر ..
في ناس جيعانة ما قلبت حرف في صاج ..
... في ناس عريانة ما لفحت هدم في الزيفة ..
ما طالت ايديها رغيفه ..
والسبب المعكر كيفا ..
دق بنوتا بالكرباج ..
ناس غلبانة بس دغرية ..
ما بتعرف تخت طاقية في طاقية ..
والدين الحنيف في شرعها الحرية ..
زدتها في الحرج احراج ..
وزدتها في الدجل دجال ..
عوج شفناهو ماسمعناهو في قول زول ..
قال بنات دقوها دق العيش ..
ولاد ما أندقوا في شبال ..
بقت في غصة الأيام ..
قيم غنيتا يا قدال ..
قيم شلناها عمة وتاج ..
رقيص الشامة بت حمدين ..
وخت الحنة لي يات من حضور ضفرين ..
ونمات العديل والذين ..
ورقصة جون مع أوهاج ..
مشينا نقدم البنوت على ضو الرتاين ..
خفت وهج الغنا الوهاج ..
ورحل صوت المغني حزين ..
ورطن صوت العنج هراج ..
سقط في غفلة نون النسوة ..
أخوان البنات والنخوة ..
ستار العيوب والرسوة ..
شيال الحمول أبعاج ..
.. فيا حجاج أكل نارك ..
واتلفح بشاكيرك ..
مع طلعة شهر زو الحجة ..
وأحرم حاج ..
وطوف فوق الجثث طاؤوس ..
وشعبك لا أكل لا علاج ..
وحاج في شنو؟ ..
معاك كل البلد هاصت ..
وفار نحل الجباية وهاج ..
فيا فالق نواة الحبة يافراج ..
ويا باسط عجايب الإسرا والمعراج ..
ويا خالق الخلايا الحية .. أمشاج ابتلت أمشاج ..
طحنتنا طاحونة الفقر ..
طحنتنا سنواتا العجاف ..
يا الله تلزمنا الصبر والسترة ..
والعيش الكفاف ..
وترحمنا من صرة وشي ..
في وش وليداتنا الضعاف ..
..............
غرقان بيرقص منتشي ..
ووطنا مقطوع من خلاف ..
وبأسم الله ما خلالنا شي ..
وفصلنا في آخر المطاف ..
يا ناسي أقدار الرجال ..
ما تخشى غدر الله وتخاف ..
كتر عوج الكلام والميل ..
وتحت الجزمة مليون ميل ..
تحت الأزمة طاحونة حوافر الخيل ..
سقط تلت البلد عفوا ..
سقط نص البلد لهوا ..
سقط كل البلد سهوا ..
فهل صحاك ضمير الأمة في هجعة هوايد الليل ..
على زبد الغنا الممحوق؟ ..
شنو الخلاك تنوم تحلم على على خرطة وطن مسروق؟ ..
وطن في السوق .. وطن أشتر ..
مرق من ذمة التاريخ على ذمة كلاب الحر ..
ينوم في جبة الدرويش ..
يقوم بي بدلة العسكر ..
.. فيا ويلك في يوم الويل ..
ويا ويلك .. تقوم تحتك قيامة الناس ..
أفواج الضحايا ..
ستات الكجيك والشاي ..
والناس البعرفو شليل ..
حشود الطلبة والعمال ..
وبنوت الغياب والليل ..
طفولة مشردة ونازحين ..
وكم حجاج .. يجيك من ديل يجيك من وين ..
أولاد الشوارع عووك .. المعدمة ومعدومة ..
قطامة وقرضمة وراندوك ..
لماضة وطرقت حلقوما ..
من كل حتة يجوك .. يوم التسود يوما ..
ناسات حكومة الجن .. وناس جنها الحيكومة ..
ما طالا الشوارع في .. في ولاد بعرفوا القوما ..
ولاد راقدين .. وأولاد اسمها المايقوما ..
ديل أولاد شريعة قوش .. المستضعفين في الأرض ..
يبنوا ويهدوا عروش ..
لا بتخون البعض لابتشتريها قروش ..
في كل حته وراك تمرق تلاقي جيوش ..
أصدق لسان الحال من نضمك المهبوش ..
نفس الولاد جايين من طينة حضارة كوش ..
حافظين شعر حميد ..
فاهمين قصايد الدوش ..
ما تمشي يا محجوب دايرين نظبط بوش ..
يا داب عرفنا الصاح ..
دخل الكلام الحوش ..
وشكرا .. شكرا سيدي الحجاج

Post: #2
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 06:43 AM
Parent: #1

http://www.facebook.com/#!/elgizuli

من صفحة دكتور حسن الجزولي بالفيس بوك ....

Post: #3
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 07:14 AM
Parent: #1

هذه القصيدة سيكون لها تداعيات خطيرة علي كل المستويات

Post: #4
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: محمد الكامل عبد الحليم
Date: 09-28-2011, 07:31 AM
Parent: #3

تحية....

ومن غير ( ناس ازهري محمد علي ) يحملون جراحات( محمد احمد) واوجاعه المتصلة...ومن غير ازهري المتصدع حزنا علي الحال المايل يجوس بمضع الهم في خوابي الكلام..(وينضم) حديث الرجال حين يقتضي النظم الكلام والحزن الكلام...والفجيعة شعرا عندما يقع البسط في مكان المقام...

الفجر ات حين يصدح الناس بحروف ازهري عن الماثل المحتقن..

يا ناس( بله) شن قولكم

Post: #5
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 07:43 AM
Parent: #4

فعلا يا محمد الكامل ... الشعراء هم ضمير الأمة والناطق الرسمي بأسمها التحية لأزهري ورفاقه من الشعراء الأماجد

Post: #6
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: كمال الشادي
Date: 09-28-2011, 07:54 AM
Parent: #3

اول شي
شكرا كتير على القصيدة يا زهير
الله يديك العافية
ويسلم فمك المليان غنا ودبيت
يا أزهري محمد على


عارف زهير
كل الناس الراحو السودان في الاجازة الفاتت ( اناما رحت )
لما سألتهم عن السودان
كانت إجاباتهم تقريبا كلها مشتركة في عبارة غريبة
( مافي امل )
تصور اكتر من عشرة اشخاص
قالو لي ما في أمل

شيء حزين أنو يكون مافي أمل
في بلد كانت بتدي الناس الامل


ومافي أمل ليه

يقولو ليك
كل زول مشغول في الفيهو
مشدوه بي أحوال واحوال بيتو وحق اللقمة
زمان كان اسمو حق القفة
هسي بقت ما في قفف

الله يرحم زمان


كل ده والله زهير اتسرب وراح مع القصيدة الرائعة بتاعة ازهري محمد على

يا اخي قريتها يجي عشرة مرات
لقيت طالما ما في صوت
زي الصوت ده
طالما في كلمات زي الكلمات دي
بتطلع من واحد من عامة الشعب
وبيقولها لاكبر راس
ويخت إيدو في عين الفيل
ويقول يا فيل يا أعور
إنت أعور

فما في حد يتكلم عن إنو مافي أمل

فعلا زي ما قلت يا زهير
القصيدة دي
راح تكون ليها أصداء غريبة
وتداعيات مش عادية
لك التحية

Post: #7
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: أسامة عبد الجليل
Date: 09-28-2011, 08:08 AM
Parent: #6

Re: الان لليوم الثاني تظاهرات في بري ومحاصرة لمنزل كرتي وسماع لاصوات ط


أنا فكرت أفتح بيها بوست يا زهير، لكن فضلت إضافتها كمداخلة بإعتبار
إنه بيكون في زول سبقني في نشرها.

قصيدة تصور الحال وتحرض على الثورة ضد الظلم.
شكرا لك وشكرا لصديقنا د. حسن الجزولي وشكرا للشاعر الملتزم أزهري محمد علي.
لكن يبدو لي القصيدة ليست جديدة تماما.

Post: #8
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 08:19 AM
Parent: #7

شكرا يا اسامة علي المرور ... . حقيقة اول مرة أطلع علي القصيدة صباح اليوم ... وان كانت ليست بجديدة فهي تعبر عن واقع الحال اليوم ... اليس الشعراء هم أنبياء شعوبهم يروا ما لا يروه .... أعتقد أن القصيدة تستحق الأحتفاء وأن تنشر علي أوسع نطاق ..... ومعك نقول شكراً لشاعرنا أزهري محمد علي ....

Post: #9
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 10:54 AM
Parent: #6

الصديق الفنان الشادي ... بكل تأكيد في أمل .... فقط أن التغيير للأفضل لن يكون بين ليلة وضحاها الأمر يحتاج لكثير من التضحيات والصبر ... فقط كيف نمسك الدرب العديل .... لا يأس من الشعوب ... خاصة إذا ما كان مثل الشعب السوداني ....

Post: #10
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: أحمد أمين
Date: 09-28-2011, 11:14 AM
Parent: #9

كلام زي الرصاص، دغري وعديل

هذه اناشيد الثورة القادمه.......................

Post: #11
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: Nasr
Date: 09-28-2011, 11:51 AM
Parent: #10

نفحات الشعر الطيبات
ولهائب الثورة الحارقات

Post: #15
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 03:05 PM
Parent: #11

نصار يا شاعرنا المبدع ....

نفحات الشعر وقود الثورة ...
ولهائب الثورة تحرق الطغاة ...
وتبني المجد للشعوب ....

Post: #12
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: حسبو عكاشة
Date: 09-28-2011, 11:52 AM
Parent: #10

Quote: وطن في السوق .. وطن أشتر ..
مرق من ذمة التاريخ على ذمة كلاب الحر ..
ينوم في جبة الدرويش ..
يقوم بي بدلة العسكر ..
.. فيا ويلك في يوم الويل ..
ويا ويلك .. تقوم تحتك قيامة الناس ..
أفواج الضحايا ..
ستات الكجيك والشاي ..
والناس البعرفو شليل ..
حشود الطلبة والعمال ..
وبنوت الغياب والليل ..
طفولة مشردة ونازحين ..

Post: #13
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: معتصم الطاهر
Date: 09-28-2011, 12:25 PM
Parent: #12

سلام الله

القصيدة جديدة ..

و كتبت فى هذا العام

و اكتملت بصورتها الحالية قبل رمضان ..

و هى معاناة سنين ..

و معها آخريات ..

هذه مناسبة لنشر أعمال الأستاذ أوهرى الأخيرة ..

Post: #16
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 03:07 PM
Parent: #12

فعلاً يا حسبو من أجمل أبيات هذه القصيدة ...

فيا ويلك في يوم الويل
فياويلك في يوم الويل

Post: #14
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 03:04 PM
Parent: #10

نعم يا أحمد الثورة التي نراها قريبة من أي وقت مضي ....

Post: #17
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: زهير الزناتي
Date: 09-28-2011, 03:09 PM
Parent: #14

شكراً معتصم علي المعلومة ....

القصيدة من أجمل ما قرأنا مؤخراً وهي تعبر تماماً عن حالة الغليان التي تجتاح البلد كلها ....
وهي بشائر لثورة انتظرناها كثيراً ......

Post: #18
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: سمير شيخ ادريس
Date: 09-28-2011, 03:24 PM
Parent: #17

أزهرى محمد على دة مش شغال مع صلاح ادريس
شغلتو شنو بالثورة
لو قامت ثورة نضيفة نزيهة
أول زول مقروض يخاف منها هذا الأزهرى
لأنها بالجد حتغير مراكز هلامية وطفيلية
هى مصدر رزق ازهرى ..
وبقية شعراء السلاطين
.
.تحياتى يا زهير
تقديرى التام لمجهوداتك ومثابرتك الدائمة بالمنبر

Post: #19
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: غادة مكى محمد
Date: 09-28-2011, 05:14 PM
Parent: #18

Quote: .. في ناس عريانة ما لفحت هدم في الزيفة ..
ما طالت ايديها رغيفه ..
والسبب المعكر كيفا ..
دق بنوتا بالكرباج ..
ناس غلبانة بس دغرية ..
ما بتعرف تخت طاقية في طاقية ..
والدين الحنيف في شرعها الحرية ..
زدتها في الحرج احراج ..
وزدتها في الدجل دجال ..
عوج شفناهو ماسمعناهو في قول زول ..
قال بنات دقوها دق العيش ..
ولاد ما أندقوا في شبال





________________________________

سلام زهير وتحياتى

Post: #20
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: معتصم الطاهر
Date: 09-29-2011, 05:56 PM
Parent: #19


.
.تحياتى يا زهير
تقديرى التام لمجهوداتك ومثابرتك الدائمة بالمنبر
Quote: [
أزهرى محمد على دة مش شغال مع صلاح ادريس
شغلتو شنو بالثورة
لو قامت ثورة نضيفة نزيهة
أول زول مقروض يخاف منها هذا الأزهرى
لأنها بالجد حتغير مراكز هلامية وطفيلية
هى مصدر رزق ازهرى ..
وبقية شعراء السلاطين
.
.تحياتى يا زهير
تقديرى التام لمجهوداتك ومثابرتك الدائمة بالمنبر


أولا .. يا أخ
أزهرى كان يعمل عملا شريفا مع صلاح ادريس و ليس أرزقيا ..

و قبلها كان يعمل فى احدى المؤسسات الحكومية ..قبل أن تقفلها الحكومة مع كل المؤسسات التى قفلتها ( وبوظتها ) الحكومة
فهل هذا يعنى أنه كان يأكل من مال حرام أو متسلق فى احدى المناصب..
أم هل ينتظر ( مناضلى النت ) ليرسلوا له عطاياهم ..
ثم هل ازهرى فى حوجة لك أو له ..
بل هو العمل الشريف ..

هل تعلم أين يعمل أزهرى الآن ؟
هل تعرف لم قدم استقالته من منصبة الاخير مع احدى مؤسسات صلاح ادريس و كيف ؟

إن كنت تعلم فقد تجنيت عليه
وأن كنت لا تعلم فتحرى الصدق

فلقد اغتبته و بهته ..

ثم ماذا تعلم عن نضالات أزهرى .. سابقا و حاليا ..

Post: #21
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: معتصم الطاهر
Date: 09-29-2011, 06:16 PM
Parent: #20

http://www.youtube.com/watch?v=VddANHfTQJs

Post: #23
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: معتصم الطاهر
Date: 09-29-2011, 06:28 PM
Parent: #21

يا مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
يا مشرع الحلم الفسيح
***************
يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
و بيناتنا ليل الغربة ... داكِنْ
هبّت هبوبك..
أفتح شبابيك المساكن
وسـِّع دروبك ..
ولـِّع مصابيح الأماكن
يا مشرع الحلم الفسيح
*************
يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا رغبة الرعد البيسكن ..
بين غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا
*******************
يا مشرع الحلم الفسيح
أنا وإنت .. والمطر الفصيح
حانطوِّع الزمن القبيح
نأخد بعض .. شكل السما
حدِّثنى دايماً .. كلما
تنشف على البر الضفادع
يهجر الضو المواضع
وتسقط من الكف الأصابع
حدثني دايماً كلما
تحرد مراسيك السفن
تسكن مرافيك الزعامات .. الدُمى
حدثنى لو تاهت خطانا ..
على الدروب المبهمة
أو ربما..
تهدم آلات الشوارع ..
وترجمْ العُزّى الصواقِع
حدثنى لو مطرك هما ..
حدثنى لو صادف الكى المواجع
وضلك على الساحل رمى
حدثنى لو مطرك همى
علمنا دايماً كلما
نبذر على أرضك شهيد
يطلع شمس ..
يبهر بأنوارو السما

يا مشرع الحلم الفسيح

Post: #22
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: محمد الكامل عبد الحليم
Date: 09-29-2011, 06:28 PM
Parent: #20

تحية.....


ما يحزن يا استاذ الطاهر عبر تداول اعضاء المنبر استناد الكثير منهم الي الlike and dislike في تناولهم للشان العام والخاص علي حد سواء...

بالمفهوم الذي ساقه الاخ المتداخل يصبح جميع موظفي جمهورية السودان ارزقية ومن اكلي السحت اذا جاز التعبير...

خير للمذكور ان ينادي بالاضراب العام لجهة التغيير من ان يشير بالبنان الي رجل ناصع كازهري الانسان النظيف العفيف ...المهموم حقا لا تكلفا....

( علي المستوي الشخصي ليس لي علاقة بالاستاذ ازهري رغم انه ممن تشد اليه اكباد الابل للجلوس اليه شعرا ونثرا وانسانية )

Post: #24
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: Sabri Elshareef
Date: 10-04-2011, 05:00 AM
Parent: #22

تحت الأزمة طاحونة حوافر الخيل ..
سقط تلت البلد عفوا ..
سقط نص البلد لهوا ..
سقط كل البلد سهوا ..
فهل صحاك ضمير الأمة في هجعة هوايد الليل ..
على زبد الغنا الممحوق؟ ..
شنو الخلاك تنوم تحلم على على خرطة وطن مسروق؟ ..
وطن في السوق .. وطن أشتر ..

Post: #25
Title: Re: عفواً سيدي الحجاج ..... قصيدة جديدة رائعة لأزهري محمد علي
Author: كمال الشادي
Date: 10-04-2011, 09:05 AM
Parent: #24

الناس خلو القصيدة
ومسكو في الشاعر ازهري محمد على


قول كلمة حق في وجه اما جائر
الرسول صلى الله عليه وسلم وعد قائلها في ان يكون في زمرة من يظلهم الله في ظله يوم لاظل الا ظله


هل يشك احدكم أن ازهري محمد على هنا يهجو البشير
ويوجه له الكلام عيني عينك
ويقول للفيل في عينو إنت أعور
في بلد صعب جدا تقول فيها اي كلمة لو ما كان مستحيل
وكمان تتجرأ وتهجو رأس النظام
قوية بصراحة !!!


كنا في جلسة استماع من كم يوم
واتقرت فيها القصيدة
اكتر من واحد توقع انها ما تعدى على خير ( بالنسبة لازهري )

يكفيه شرفا ان القصيدة له وبإسمه وبصوته في النت والمنتديات
لك الود والشكر والتقدير
شاعرنا العظيم ازهري محمد على