الرقم الوطنى

الرقم الوطنى


09-20-2011, 11:50 AM


  » http://sudaneseonline.com/cgi-bin/sdb/2bb.cgi?seq=msg&board=350&msg=1317364133&rn=0


Post: #1
Title: الرقم الوطنى
Author: مزمل خيرى
Date: 09-20-2011, 11:50 AM

عذاب ومرمطة لخلق الله !
مشيت أرخص العربية قالوا الأ تجيب الرقم الوطنى !
ياجماعة العربية ترخيصها علاقتها شنو بالرقم الوطنى دا .؟
ياشيخنا أمشى جيب الرقم الوطنى عشان نرخص ليك أو سوق عربيتك وأمشى !
مشيت أطلع الرقم الوطنى شفت المرمطة والعذاب
رجعت البيت ..

Post: #2
Title: Re: الرقم الوطنى
Author: ود الخليفه
Date: 09-20-2011, 11:58 AM
Parent: #1

عزيزي مزمل

السلام عليكم ورحمة الله

تم الزام الجامعات ايضا بتسجيل الطلاب بعد ابراز الرقم الوطني

وللامانه توجد اتيام عمل في كل كلية لاكمال الاجراء

وشمل ذلك حتى العمال والموظفين

Post: #3
Title: Re: الرقم الوطنى
Author: سفيان بشير نابرى
Date: 09-20-2011, 12:16 PM
Parent: #2

لا حولة باللللللللله

انا اربعة يوم اساسق يا مزمل ده عذاب الله اكبر

شوف معاي .
اصلاً انا قلته قبل ابدأ الأجراء امشي السجل المدنى
القرررريب جم حلتنا دا و اسأل المطلوبات شنو ؟
مشيت و حاتك لقيت عسكري في الرسبشن سالتو :-
يا أبن العم أنا عايز اطلع الرقم الوطنى المطلوبات
مني شنو عشان اجي اطلعو ؟
عاين لي من تحت لي فوق و قال لي :- ده سالهل ومجاني
قلت ليهو :- تمام اها الورق شنو المفروض اوفروا
عشان اجى اطلعو ؟
قال :- تجيب شهادة سكن و تجيب فصيلة دمك وتجيب بطاقتك
الشخصية و تجى تستلم طوالى .
قلت :- اوكى أنا ما معاي بطاقة شخصية عندى جواز وعندى
جنسيتى بنفعو ؟
قال :- ايوة بنفعو .
قلت :- تمام اها وعندكم فحص الدم دا هنا ؟
قال :- لا لا تفحص وتجيب ورقة بالفحص.
طلعته منو .
مشيت .
بكريته جيت وفي عيادة في الشارع بالقرب من السجل المدني
سالته من فحص الدم لقيتو ب10 جنيه اهاومنها خشيت للسجل
المدنى قالو لى :- لا لا ورقك ناقص لازم تجيب بطاقة شاهد
قالته ليهم اجيبو هو ذاتو بي بطاقتو ؟ قالوا لا بطاقتو
تكفي .
مشيت جيت بكرة ببطاقة بابكر اخوي قالو لي ويييين لازم
تجيب صورتين شخصيتين .
مرقته تانى ما مشيت ليهم .

كيف يا مزمل ربنا يعينا على البلد دا .
السبب بكون عشان مجان ..!

Post: #7
Title: Re: الرقم الوطنى
Author: مزمل خيرى
Date: 09-20-2011, 03:23 PM
Parent: #3

Quote: مرقته تانى ما مشيت ليهم .

ياسفيان
شكلك تانى ماحتمشى بالشفتو !

Post: #4
Title: Re: الرقم الوطنى
Author: امير عبدالدائم
Date: 09-20-2011, 12:18 PM
Parent: #2

صاحب البوست سلام
وما هو الرقم الوطنى
وبيطلعوا من وين كمان

Post: #5
Title: Re: الرقم الوطنى
Author: SHIBKA
Date: 09-20-2011, 12:29 PM
Parent: #4

اها وناس برة ديل بطلعوا رقم وطني كيف؟؟

ولو قالوا دايرين شهادة سكن نجيبا كيف؟


سفيان لما ترجع تاني للعسكري اسالو لينا اثابك الله

Post: #10
Title: Re: الرقم الوطنى
Author: مزمل خيرى
Date: 09-20-2011, 03:31 PM
Parent: #5

هند
ازيك ياصديقة ...
Quote: اها وناس برة ديل بطلعوا رقم وطني كيف؟؟
ولو قالوا دايرين شهادة سكن نجيبا كيف؟

ناس برة الاحتمال الوحيد يكون من السفارة
وما أظن يحتاج لشهادة سكن لان مكتوب فى الجواز والله اعلم ..
الناس ديل ما مضمونين ...

Post: #8
Title: Re: الرقم الوطنى
Author: مزمل خيرى
Date: 09-20-2011, 03:26 PM
Parent: #4

يا أمير
الرقم الوطنى دا بيقولوا بطاقة بتغنيك عن البطاقة
الشخصية والجنسية !
وهى بتطلع من السجل المدنى ...

Post: #6
Title: Re: الرقم الوطنى
Author: مزمل خيرى
Date: 09-20-2011, 03:16 PM
Parent: #2

ود الخليفة
وعليكم السلام ..
المسألة دى المفروض تتعمل بالتدريج ويكتروا
مراكز الخدمة .. هسع بالله أمش اقرب مركز ليك برة
الجامعة وشوف الخلق والخلائق دى كيف مزدحمة !

Post: #9
Title: Re: الرقم الوطنى
Author: nazar hussien
Date: 09-20-2011, 03:31 PM
Parent: #6

هل لاقاكم او اتطلعتوا علي قانون للرقم الوطني..
وما هو الفرق بين الرقم الوطني...ورقم البطاقة الشخصية..
ورقم الجواز...والجنسية؟

وهل ألغي الرقم الوطني...كل من الجواز والجنسية والبطاقة الشخصية
في اثبات الشخصية؟؟

واذا كان ذلك كذلك...فما هي القيمة التي تبقت للبطاقة الشخصية
والجواز والجنسية في اثبات الشخصية؟

ولماذا رفض ترخيص عربيتك يا مزمل طالما انت تحمل مستند رسمي
لم يلغي...او يعدل بقانون...اذا لم يكن هنالك فعلا قانون خرج علنا
ونشر رسميا لالغاء البطاقة والجواز والجنسية...ومنع اي منهم من اثبات
ان مالك العربة المراد ترخيصها هو مزمل..؟

وقبل كل ذلك ما هو الرقم الوطني؟؟ وما هي حدود الوطن المراد استخراج
رقمه؟؟؟

وهل الامو

Post: #12
Title: Re: الرقم الوطنى
Author: ناصر المحسى
Date: 09-20-2011, 03:51 PM
Parent: #9

الرقم الوطنى او زى ما بيقول فى السعودية رقم الكمبيوتر

رقم خاص بك فى الحاسوب الحكومى يسجل فى فيه كل معلوماتك

من معلومات الشخصية الجنسية ورخصة القيادة ورخصة السيارة

Post: #13
Title: Re: الرقم الوطنى
Author: مزمل خيرى
Date: 09-20-2011, 03:56 PM
Parent: #9

نزار حسين ...
سلام ...
Quote: ولماذا رفض ترخيص عربيتك يا مزمل طالما انت تحمل مستند رسمي
لم يلغي...او يعدل بقانون...اذا لم يكن هنالك فعلا قانون خرج علنا
ونشر رسميا لالغاء البطاقة والجواز والجنسية...ومنع اي منهم من اثبات
ان مالك العربة المراد ترخيصها هو مزمل..؟

دا السؤال يانزار ...
عندى بطاقة شخصية ورخصة قيادة وجواز وكلللهم مفعولهم سارى !
فى داعى للرقم الوطنى ؟
وبعدين بتاع الحركة مابيعرف ليك رقم وطنى وللا ما وطنى
عندك مخالفة طوالى بيطقع الأيصال ...

فعلاً حاجة تحبط شديد !

Post: #16
Title: Re: الرقم الوطنى
Author: Ahmed musa
Date: 09-20-2011, 04:45 PM
Parent: #13

Quote: دا السؤال يانزار ...
عندى بطاقة شخصية ورخصة قيادة وجواز وكلللهم مفعولهم سارى !
فى داعى للرقم الوطنى ؟

عشان العربية بتترخص بالرقم الوطني
لو عملت مخالفة
لو طلبوك في جريمة
الخ
برجعوا ليك بالرقم الوطني
يعني تجي ماشي مصر
يقول ليك وين ياعمك ؟
انت عندك مخالفة مالية حادث عربية ضربت زول وشردت
تعال بي جاي
وتتضاير زي الماحصل شئ
أحمد موسى ــ خبير بالرقم الوطني

Post: #34
Title: Re: الرقم الوطنى
Author: مزمل خيرى
Date: 09-22-2011, 03:37 PM
Parent: #16

أستاذ أحمد موسى _ المحامى
ياخ مشكور على التوضيح والتشجيع ...

Post: #11
Title: Re: الرقم الوطنى
Author: بله محمد الفاضل
Date: 09-20-2011, 03:39 PM
Parent: #1

Quote: رجعت البيت ..

أها
ودخلوك
ولا قالو بعد تجيب الرقم



الله يستر ما يكون الرقم بتاعي
اللي يوم الليلة مجلي
حسب قول قيقراوي عليه رضوان الله


مزمل
تحياتي

Post: #14
Title: Re: الرقم الوطنى
Author: Ahmed musa
Date: 09-20-2011, 04:36 PM
Parent: #11

والله ياشباب فصة الرقم الوطني ده مهمة خلاص
عشان حاجات كتيرة وأهمها تحديد الإحتياجات الكلية للبلد وللمواطن
(حيجي معارض يقول ليك طيب اها النقول حددوها ...اها !!!)
وجايز ينبذ ليك الحكومة والكيزان
من حقه
اها بس القصة دي دايرة حبة إعلام
وحبّذا زي إعلام ناس خلف الله داك
عشان تبسيط القصة
انا عنّي قريت في النقابة
قالوا هوي يامحامين ما تتمرمطوا (قربوا يكتبوا زي ناس مزمل وسفيان لكن الوقار منعهم)
اها قالوا تعالوا شيلوا الارانيك من النقابة
والحاجات الدايرنها هي
جنسيتك او بطاقتك او جوازك
جنسية شاهد (مايجي)
صورتين
شهادة سكن دي ماقالوها (باكر بمشي اسالهم)
وفصيلة الدم
ومايثبت انك محامي عشان الرمتلة وكدا مايجوا ناس سفيان يقولوا دايرين نعمل رقم وطني فرع نقابة المحامين
اها ونجي متين
قالوا ولااااتعذبوا روحكم يوم الاجازة الجمعة والسبت
قلنا اها ونمشي وين
قالوا ولا تعذبوا روحكم تجوا نقابتكم دار المحامين شارع 61 تكملوا الاجراءات وتشربوا شاي وقهوة
ولو دايرين تقطعوا في الحكومة أو مجلس النقابة فلا ضير ولا تثريب عليكم
اها اخواني ارجوني لحدود الجمعة أو السبت ياجيت مرضتكم بشكر النقابة
ياكمان تزحوا لي جنبكم في التحالف الوطني لإسقاط الرقم الوطني
اها ارجونا للجمعة او السبت
فتكم برقم وطني ...أأأأقصد بعافية

Post: #15
Title: Re: الرقم الوطنى
Author: Magdi Ahmed Elsheikh
Date: 09-20-2011, 04:38 PM
Parent: #11


Post: #17
Title: Re: الرقم الوطنى
Author: سفيان بشير نابرى
Date: 09-20-2011, 04:52 PM
Parent: #15

Quote: شهادة سكن دي ماقالوها (باكر بمشي اسالهم)


يا أحمد موسى للضمان شيله معاك عشان نحنا ذاتو ما عندنا
ليك خانة فى التحالف الوطنى لاسقاط الرقم الوطنى و الموتمر
الوطنى و انت ذاتو خاتك بنستفيد منها بنفرين.

Post: #29
Title: Re: الرقم الوطنى
Author: مزمل خيرى
Date: 09-22-2011, 01:59 PM
Parent: #11

بلة
Quote: أها
ودخلوك
ولا قالو بعد تجيب الرقم
هههههه
والله يا بلة الخوف نمشى يوم من الايام
مطعم عشان نطلب طلب فول يطلبوا مننا الرقم الوطنى ...

Post: #18
Title: Re: الرقم الوطنى
Author: محمد طه الحبر
Date: 09-20-2011, 04:53 PM
Parent: #1

Quote: مشيت أرخص العربية قالوا الأ تجيب الرقم الوطنى !


مبروك يامزمل العربيه

Quote: ياشيخنا أمشى جيب الرقم الوطنى عشان نرخص ليك أو سوق عربيتك وأمشى !


دي هينة يامزمل

نص ساعه ح يطلعو ليك الرقم الوطني

ح اراسلك في الماسنجر الداخلي




----------
مشتاقين والله

Post: #19
Title: Re: الرقم الوطنى
Author: Ahmed musa
Date: 09-20-2011, 04:56 PM
Parent: #18

Quote: ح اراسلك في الماسنجر الداخلي

راسل معاك سفيان نابري ده ينوبك ثواب
سفيان ده لو حرد ومشى القاهرة إحتمال كبير تحصل مصيبة للبلد
اها انا احتمال اراسلك بالمسنجر يوم السبت
خلي المسنجر فاتح
وخلي السلاح صاحي ياحبر

Post: #20
Title: Re: الرقم الوطنى
Author: SHIBKA
Date: 09-21-2011, 08:15 AM
Parent: #19

اها وصلتو وين ياناس الرقم الوطني ولي برضو ننتظر الجمعة السبت يمشوا ونسال المحامي احمد موسى؟

Post: #21
Title: Re: الرقم الوطنى
Author: Dalal Ezzaldin
Date: 09-21-2011, 08:35 AM
Parent: #20

اظنهم قرروا فجأه يعملوا تسجيل الكتروني للمواطنيين


غايتو الافكار بتجيهم فجاءةً

Post: #22
Title: Re: الرقم الوطنى
Author: حبيب نورة
Date: 09-21-2011, 08:55 AM
Parent: #21

يا مزمل خيري كيفنك
أنا في الحقيقة ربك رب الخير لاقاني بي زول عندو تجربة مريرة مع ناس الرقم الوطني
أظنو ساسق لمن ربنا غفرلو حتين طلعو
أداني قائمة بالمطلوبات كلها
جهزتها اول حاجة وبعد داك نصحني بالبكور
يعني اقوم من النجمة وأستعين بواسطة قوية
لاقاني بي عسكري وشلت تلفونو ومن الدغش مشيت مركز الحلفايا
وبقدرة قادر عملت كل الإجراءات وأنتظرت المتحري
وسيادتو غايتو جانا نصة نهار وبعد نجاض خلصت الموضوع

عليكم بالبدار
البركة في البكور

Post: #23
Title: Re: الرقم الوطنى
Author: SHIBKA
Date: 09-21-2011, 09:36 AM
Parent: #22

حبيب نورة
انت الطلعت فيهم

Post: #24
Title: Re: الرقم الوطنى
Author: ود الخليفه
Date: 09-21-2011, 09:44 AM
Parent: #23

تشجعت اليوم لاكمال اجراءاتي بمركز في الجامعه بعد ان كان محصورا للطلاب فقط

تسلمت الاورنيك المخصص وارفقت صور من المطلوب

صوره من البطاقه الشخصيه والجنسيه وشهادة الميلاد وجنسية الشاهد

وفي انتظار الرقم القومي او رقم ماسينجر ود الحبر

Post: #25
Title: Re: الرقم الوطنى
Author: انور التكينة
Date: 09-21-2011, 10:08 AM
Parent: #24

مزمل ازيك ..
قبل سنة تقريبا مشيت طلعت الجواز الجديد ..
اهم حاجة انا عملوا لى الرقم الوطنى و ثبتوه فى الجواز ..
مع الحملة الاخيرة للرقم الوطنى جانى شك .. قمت سألت صاحبى لواء فى السجل
المدنى : خلاص موضوع الرقم الوطنى بتاعى محسوم ؟ أبى يطمنى و قال لى لازم
تراجع السجل المدنى يشوفوا هل رفعوهو فى الكمبيوتر العام ..
المهم .. احبطت و ما سألت ..
والزارعنا غير الله اليجى يقلعنا ..

Post: #26
Title: Re: الرقم الوطنى
Author: قلقو
Date: 09-21-2011, 01:13 PM
Parent: #25

Quote: مرقته تانى ما مشيت ليهم .

الأخوان مزمل وسفيان والأخوة المتداخلين,
لازم ترجعوا ليهم. فالرقم القومى موجود فى كل العالم, لكن نحن تطبيقنا للأشياء دايما مشاتر.
انا استخرجت رقمى القومى من مكتب شرق النيل والحق يقال بأن التعامل كان فى منتهى الأدب والتهذيب .

Post: #27
Title: Re: الرقم الوطنى
Author: Yasir Aloob
Date: 09-21-2011, 03:45 PM
Parent: #26

الاخ مزمل سلامات
احكى ليك شوية عن الرقم الوطنى القطرى.....
الرقم الوطنى فى قطر هو رقم البطاقة الشخصية.و رقم رخصة القيادة.
و بالنسبة للاجانب كمان
يتكون من 11 خانة بنظرية جميلة جدا.... كيف؟
اول خانة من الشمال هى رقم 2 و للاطفال رقم 3 بغض النظر عن قطرى ولا اجنبى.
الرقمين البعد الا 2 هم سنة ميلاد الشخص.
الثلاثة ارقام البعد كده هم الكود بتاع البلد الانتا منها.
الارقام المتبقيه هم عدد الناس المولودين فى نفس سنه ميلادك من بلدك حتى لو قطرى.
مثال:
انا مثلا رقمى الشخصى فى قطر هو : 29073600999
لو عاوز تطبق الكلام الفوق ده حا يكون الرقم مقسم بالطريقة ادناه:
00999-736-90-2
الرقم 2 هو رقم دول قطر و ممكن يكون 3 بالنسبة للاطفال.
الرقم 90 هو سنة ميلادى انا(:
الرقم 736 هو الكود بتاع السودانيين فى دولة قطر.
الرقم 00999 هو عدد السودانيين الموجودين فى دولة قطر الاتولدو فى العام 90.
عشان كده لو عاوز تعمل اى حاجه (انشاء الله عاوز .....) لازم يسالوك من رقمك الشخصى (الوطنى)

واحده من فوائد الرقم الشخصى ده انو ممكن تعرف سنه ميلاد اى واحد اذا شفتا البطاقة الشخصية او
رخصة القيادة او الاقامة بتاعتو فى الجواز.

اتمنى ان يكون الرقم الوطنى بتاع السودان بالطريقة دى او قريبة ليها.

Post: #31
Title: Re: الرقم الوطنى
Author: مزمل خيرى
Date: 09-22-2011, 02:49 PM
Parent: #27

ياسر علوب ..
ماعندى فكرة والله لو زى حقتكم وللا لآ .؟
غايتو الحاجة السمعتها هنا انو لازم تجيب رقم شهادة
الميلاد ورقم جنسية الوالد ...
ماعارف الواحد لو ابوهو ميت وجنسيتو ضائعة
يعمل شنو ؟

Post: #37
Title: Re: الرقم الوطنى
Author: أمجد الزين
Date: 09-22-2011, 04:17 PM
Parent: #27

سلامات ياسر
Quote: و ممكن يكون 3 بالنسبة للاطفال

طيب الاطفال ديل لمن يكبروا حيغيروا ليهم الرقم الوطنى؟
ولا الفهم كيف؟

Post: #35
Title: Re: الرقم الوطنى
Author: مزمل خيرى
Date: 09-22-2011, 03:43 PM
Parent: #26

قلقو
مبروك اولا الرقم الوطنى
شرق النيل افتكر هو المركز الرئيسى مش كدا ؟
احتمال عشان كدة عدد الشغالين فيهو كتار ومافيهو زحمة ..
شوف فى المراكز الثانية الزحمة كيف
تحياتى وشكرا على المرور ..

Post: #28
Title: Re: الرقم الوطنى
Author: مزمل خيرى
Date: 09-22-2011, 01:31 PM
Parent: #25

التكينة
سلامات ...
أفتكر ماعندك مشكلة طالما ما عندك الجواز الجديد
المشكلة فى الناس المصالحهم اتعطلت بسبب الرقم الوطنى دا !

Post: #33
Title: Re: الرقم الوطنى
Author: مزمل خيرى
Date: 09-22-2011, 03:34 PM
Parent: #22

Quote: يعني اقوم من النجمة وأستعين بواسطة قوية
ياحبيب نورة .. طيب طالما قايم من النجمة
فائدة الواسطة القوية شنو .؟
تحياتى ..

Post: #30
Title: Re: الرقم الوطنى
Author: مزمل خيرى
Date: 09-22-2011, 02:12 PM
Parent: #18

الحبر ...
Quote: دي هينة يامزمل
نص ساعه ح يطلعو ليك الرقم الوطني
ح اراسلك في الماسنجر الداخلي

يا الحبر شكراً لقيت رسالتك ..
أها نجى نمشى سوا .؟؟
Quote: مبروك يامزمل العربيه

الله يبارك فيك .. البركة فى اولاد المسلمى ..




___
ماعندك لينا هبوط اضطرارى قريب ...

Post: #32
Title: Re: الرقم الوطنى
Author: مزمل خيرى
Date: 09-22-2011, 03:09 PM
Parent: #30

x.jpg Hosting at Sudaneseonline.com

xx.jpg Hosting at Sudaneseonline.com



....
نموذج لاستمارة استخراج الرقم الوطنى للفائدة ...

Post: #36
Title: Re: الرقم الوطنى
Author: سفيان بشير نابرى
Date: 09-22-2011, 04:03 PM
Parent: #30

لا حولة ولا قوة إلا بالله
من الرقم الوطني


اها مش أخر مرة هنا دا قلته ليكم طلعته مشيت البيت !!؟

طيب الحصل شنو ؟
لميت كل المطلوبات - شهادة الميلاد - بطاقة الشاهد - جنسيتى
جوازي - ورقة فحص الدم - صورتين فتغرافيتين .
و قمته دغش بدري و صلته السجل المدنى القريب لينا هنا دا زي
ما كلمتكم المرة الفاتت انهم هم الاترددته عليهم كم مرة عشان
اطلع منهم الرقم الوطني .
اها انقروا الليلة قالوا شنو !!!؟
و حاة الله وصلته لقيت مكاتبهم قافله وخلق الله قاعده حارساهم
قعدته حرسته معاهم بعد شوية جاء عسكري (صول) حته كرسي و مركب
شخصية للواء لو سالتو ير عليك بطرف شلاليفو .
العسكري شايل ورقة بتاعة حضور و قاعد قدام الباب الرئيسى
للسجل المدنى و كل ما يجي موظف او عسكري بسجل زمن حضوره
المهم انا قلته كدى اسالو للمرة الاخيرة عشان اتأكد انى جاهز
موية ونور فسالتو و وريتو كل الحاجات الأنا وفرتها قلب عيونو
وعاين لى وقال :- انت عايز تستخرج شنو ؟
قلت :- الرقم الوطنى .
قال :- الرقم الوطنى دا هنا ما عندنا.
انا :- نجوم كتييييرة و (هلالات) سغيييييرة لافه دائرة فوق رأسي
قال :- الرقم الوطنى دا اقرب حته ليك من هنا بتاع الحارة 17
خليفة .
انا:- ياخ انا لى كم يوم بجى هنا و بقولو لي ورقك ناقص جيب كدا
وجيب كدا !!
قال :- شوف يازول انا كلمتك عايز تضيع زمنك انتظر تاني و أسال براك
انا :- نفس النجوم والهلالات ديك بس اكتر شوية .
المهم قررته انتظر و اسأل موظف بدل العساكر ديل (اول مرة برضو كان
عسكري) .
اها المكاتب فتحت و دخلته سالته موظف الموظف قال :- الرقم الوطنى دا
الا فى الحارة 17 .
هاهاهاهاهاهاهاهاها و حاة الله جد .
المهم مرقته و قررته انو يا انا يا الرقم الوطنى دا
طوالى على الحارة 17 خليفة و انا مابعرفه المهم امشى واسأل لحدى ما وصلته
السجل المدنى .
هناك لقيت آمة لا اله الا الله كلها قاعده و مافى اي نظام .
السجل المدنى بتاع ال17 دا تقريبا بقع في مساحة 1700 متر لكن من كترت الآمة
بتشوفو 400 متر بس .
فتشته رسبشن ما لقيت عسكري ما لقيت موظف ما عرفتهم وين بديت اسأل (الزملاء)
المواطنين يا جماعة أنا عايز استخرج الرقم الوطنى اعمل شنو ؟
نطو سته يجاوبونى فى لحظة واحده .
البيقول انت اول مرة تجى و البقول عندك استمارة و البقول وجاى هسى !! والبقول
و جاى مرتاح المهم تريقه شديده اخر شى جاوبتهم ايوة انا اول مرة اجى هنا و جايب
معاى كل المطلوبات قالو خلاص امشي للزول داك سجل اسمك في الكشف عشان تستلم استمارة
مشيت للزول لقيت الناس منكبه فيهو للتسجيل .
الزول البسجل ما بعرف يكتب نهائي قسماً بالله في زول قدامى قال اسمو قسم الله اها الزول
البسجل سجلو كدا دا :- قصل الله الزول اعترض و قعد يملي فيهو حرف حرف برضو لما صلحو
صلحو :- قسل الله الزول تانى اعترض قال ليهو :- يازول امشي بعدين بعرفه ... المهم
سجلته اسمي طبعا بعد مليتو ليهو حرف حرف .
بعد داك انتظرته مع خلق الله نستلم الاستمارة الانتظار طال و العدد كتر شديد و بدت النقه
المهم جانا نقيب و قف خطب فينا :- يا جماعة انتو ناس الاستمارت الجديدة صح ؟
قلنا :- ايوة صاح .
قال :- عوجة مافي اقعدوا هنا و ساعدونا بالصبر .
أيوة و الله قال الصبر و اصلى ما بهتو ولا حاجة .
المهم صبرنا .
اخر شي جاء نفس النقيب شايل الاستمارات ونادى مواطن قال :- الزول دا مواطن منكم وفيكم
هو حينده الاسامى و الزول لما يسمع اسمو يجيب جنسيتو وانا بشوفه وبسلمو استمارة و يمشي
يجينا يوم السبت يكمل الأجراءات النهائية .
المهم فعلاً دا الحصل و أنا استلمته الأستمارة و ح ارجع يوم السبت .

اها يا مزمل أنت استلمته الإستمارة !!!!؟

لو ما استلمته استعين بالصبر .

Post: #38
Title: Re: الرقم الوطنى
Author: أمجد الزين
Date: 09-22-2011, 04:23 PM
Parent: #36

سفيان يا حبيب
لكن لقيتك روحك طويلة خلاص
انا غايتو الرقم الوطنى دة ما بطلعوا الا بعد مكاتبهم دى تفضى عدييل كدة
لانو انا هسع ما محتاج ليهو ذاتو
الا لو جاتنى سفرية برة السودان فجأة

Post: #39
Title: Re: الرقم الوطنى
Author: مزمل خيرى
Date: 09-23-2011, 12:16 PM
Parent: #36

Quote: اها يا مزمل أنت استلمته الإستمارة !!!!؟
لسع ياسفيان
مارجعت تانى .. الأستمارة دى رسلها
واحد من قراْء البورد بالايميل وطلب نشرها
للفائدة العامة عشان الناس تعرف المطلوبات شنو .؟
بالله كان لقيت ليك واسطة قوية كدا ادينا سلك بالله ...

Post: #40
Title: Re: الرقم الوطنى
Author: Dr.Elsadig Abdalla
Date: 09-23-2011, 12:26 PM
Parent: #39

يا مزمل سلامات

إنت ماسمعت الوالي قال ليكم الماقادر علي عيشة الخرطوم يرحل ؟

Post: #41
Title: Re: الرقم الوطنى
Author: بخاري عثمان الامين
Date: 09-23-2011, 12:53 PM
Parent: #40

Quote: رقم خاص بك فى الحاسوب الحكومى يسجل فى فيه كل معلوماتك



نحن دلع شديد يا مزمل .. تمت الاجراءات داخل الشركة

وبكرة البصمة ...

بس في سؤال غريب في الاستمارة وهو عن القبيلة ؟

سألت الناس المعانا عايزين شنو بالقبيلة مافي زول

عنده رد ... قلت للضابط انا معترض علي سؤال القبيلة

لاني ما فاهم الغرض منه ... اجابني بكل اريحية : من حقك .

كتبت في خانة القبيلة ( ســـــــــــوداني )

Post: #43
Title: Re: الرقم الوطنى
Author: مزمل خيرى
Date: 09-25-2011, 10:53 AM
Parent: #41

Quote: بس في سؤال غريب في الاستمارة وهو عن القبيلة ؟
سألت الناس المعانا عايزين شنو بالقبيلة مافي زول
عنده رد ... قلت للضابط انا معترض علي سؤال القبيلة
لاني ما فاهم الغرض منه ... اجابني بكل اريحية : من حقك .
بخارى ... سلامات والبركة فيكم فى زيدان
يابخارى انا برضو لاحظت السؤال الغريب دا فى كل الاستمارات
حقت الدولة !!
زمان كان بيكون مكتوب الجنسية ، هسع استبدلوها بالقبيلة
حتى فى اورنيك البلاغ حق الشرطة حتى فى اورنيك 8 الطبى !
ماعارف السر شنو فى الحكاية دى شنو .؟
المسألة دى قبل الانفصال بفترة طويلة بالمناسبة
ما بعد الانفصال !
بتمنى انو الحكاية دى تنسحب من اوراق ومستندات
الدولة ...!!
ويكفى اننا سودانيين وبس ...

Post: #42
Title: Re: الرقم الوطنى
Author: مزمل خيرى
Date: 09-24-2011, 02:01 PM
Parent: #40

Quote: يا مزمل سلامات
إنت ماسمعت الوالي قال ليكم الماقادر علي عيشة الخرطوم يرحل ؟
أها يادكتور نمشى وين طيب .؟ غايتو الا نرجع الشمالية تانى !!

حمدلله بسلامة الوصول !

Post: #44
Title: Re: الرقم الوطنى
Author: Abdulrahman Gorashi
Date: 09-25-2011, 11:38 AM
Parent: #42

Social security number

Post: #45
Title: Re: الرقم الوطنى
Author: بخاري عثمان الامين
Date: 09-25-2011, 01:37 PM
Parent: #44

والله يا مزمل زيدان مسخ علينا أي حاجة


الحمد لله وربنا يتقبله قبولاً حسناً ...