شركه (تساهيل ) هل تكون نواه لسوق مواسير جديد

خلال الأيام القليله الماضيه ظهرت للوجود شركه جديده ملأت إعلاناتها فضاء الأثير

فما أن تفتح أي إذاعه إف إم إلا ويطالعك إعلان يقول ( ماعندك عربيه مالك .. تعال شركه تساهيل وأقتني عربيه بالأقساط المريحه )

( عندك قطعه أرض وما قادر تبينها .. بسيطه تعال شركه تساهيل وأبني بالأقساط لمده سبعه سنوات )

( تبحث عن عمل ولديك مؤهلات جامعيه .. بسيطه جيب ورقك وشركه تساهيل توفر لك الوظيفه المغريه )

عايز عفش للبيت .. بسيطه إتصل فقط على ....... من سوداني ونحن نوفر لك الحل

هكذا يتردد الإعلان عن هذه الشركه المعجزه التي سوف تحل كل مشاكل السودانيين

المتمثله في إيجاد وظيفه ثم بناء البيت ثم شراء العفش والسياره ثم شراء الشيله والعرس

لفتت نظري هذه الإعلانات التي تتدغدغ أحلام الملايين

وطاف بحاطري شركات توظيف الأموال المصريه المنهاره

وتذكرت قضيه سوق المواسير بالفاشر

توكلت على الحي القيوم وتوجهت لمقر الشركه بشارع عبيد ختم لإستطلاع الأمر وخرجت بالحصيله التاليه

حقيقه لا بد من ذكرها هنا

ما أكتبه الآن مبني على ظنون وإفتراضات قدلا تكون صحيحه

مقر الشركه من النظره الأولى لا يحوي لك بإنها شركه ذات رأس مال محترم مثل ما روج لها

المبني شقه في عماره بالقرب من القسم الشرقي

الشقه بالطابق الثاني

الأثاث غير متانسب مع بعضه البعض ولا يدل إنه قد تم شراءه من مكان واحد

تستقبلك فتيات آيه في الجمال لكن من الواضح إنهن لا يعرفن أي شئعن شركتهن

فقد سألت واحده بعد أن اعطتني كتيب أو بالصح بانفيلت للشركه

عن الجهات المكونه لهذه الشركه ورأس المال

فاجابات بإن ما تعرفه إن هذه الشركه هي نتاج لإندماج عدد من الشركات التي فشلت في تسميه أي واحده منها

سألتني عن وجهتي فقلت القسم العقاري

دخلت لذاك القسم لأجد عديد من المواطنين قد سبقني

البعض يحمل خرط والبعض ملفات

لفت نظري إن رئيس القسم هو الفنان ( نزار المهندس )

الذي سبق إن أشرنا في بوست سابق إنه من رواد الغناء الهابط

لكن ليس هذا موضوعنا الآن

إنتظرت حتى جاء دوري

وللاسف كان نزار منشغل مع زبون آخر فتوجهت لمهندسه زميل له في نفس المكتب

اها ..

Quote: اها ..

حباب محمد عمر

أها يا زول

أخوك بدأ يسأل عن الضمانات في مقابل رهني لقطعه الأرض ودفعي ل 30% من جمله المبلغ

فوجدت أن لا ضمانات سواء العقد الموقع بيني وبين الشركه التي تستأجر شقه متهالكه في شارع عبيد ختم

خرجت من القسم الهندسي لقسم شراء السيارات

هناك وجدت إن لديهم سيارات فيستو آكسن وكريز وأتوس وداماس وغيرها

وهي السيارات المرغوبه هذه الأيام لذوي الدخول المتوسطه

بداء حواري مع المهندس بسؤالي عن طريقه التمويل

فاجابت إن الموضوع بسيط

عليك إحضار شهاده ملكيه قطعه الآرض بالإضافه لإثبات شخصيه

بعدها سوف تدفع 300 جنيه رسوم دراسه لبناء المنزل أو العماره

هذا المبلغ غير مسترد لو قررت عدم تكمله الموضوع

بعدها يتم تحديد القيمه الكليه للمبنى

ثم تقوم بدفع 30% من القيمه الكليه للمبني كمقدم

ويقسط باقي المبلغ حسب طلبك سواء لثلاث سنوات أو او خمسه او سبعه

مع هامش ربح للشركه 5% في العام

!!!!!!!!!!!!!!!!!!!!!!!!!!!!!!!!!!!!!!!!!!!!!!!

نواصل

اسي حالتو الواحد داير يمشي عليها

لكن كدي النتنور منك اول

واصل

شراء السيارات يتطلب فقط شهاده مرتب وإثبات شخصيه وشيكات ضمان

القسط الأول للفيستو والأتوس هو 9000 جنيه

والباقي قسط شهري ب 975 لمده 36 شهر

ليبلغ سعر العربه تقريباً44 مليون جنيه وهو مبلغ خرافي لعربه مستعمله ولو إنها أورنيك لكنها موديل 2008 أو 2009

مرحب أخونا يحي الشريف

هناك أسئله وعلامات إستفهام كبيره حول هذه الشركه

في ظل سعر الدولار المتغير والمتزايد

كيف أمكنهم حساب الأرباح والخسائر في عمليه بناء المنازل

بأقساط تمتد لسبعه سنوات؟؟؟؟

من يقف خلف هذه الشركه ولديه رأس مال يتحمل كل هذا الصرف ثم إنتظار الأرباح؟؟

واصل ياعمك

لغاية هسع كلامك ده دعاية ليهم

ماشايف حاجة مريبة

ورق الواطة يسمع في كلامك

وال30%جاهزة

واصل ...وخليك واصل

معاذ الهادي أزيك

دعايه شنو يا قريبك
يعني الواحد يرهن ليهو قطعه ويدفع ليهو حوالي 90 مليون لو داير يبني ليهو بيت ب 300 مليون

لشركه لا تقدم لك أي ضمانات بتنفيذ العقد

لو لم ينفذ البناء حسب المواصفات التي أطلبها ماهو الحل

من شروطهم عدم تدخلك في العمل نهائياً بعد توقيعك للعقد

وتسليمهم القطعه

يعني ممكن يحصل غش في المواد وإنت ما جايب خبر

خليك من دي

من المنطق إنه شركه تسلفك مبلغكبير زي ده لمده طويله زي دي

عشان سواد عيونك


سعيد بمرورك

وخلينا نمشي لحته التوظيف

فيبلد يشكي فيها كل الخريجين من العطاله

تقول الشركه إنها قادره على إيجاد وظيفه وكمان محترمه لك

ما عليك سواء إحضار الشهادات وملأ الإستماره

ودفع مبلغ 20 ألف جنيه بالقديم لا ترد طبعاً

وأبقي إنتظر منهم تلفون

ولو ضربوا ليك أبقي قابلني

Quote: دعايه شنو يا قريبك يعني الواحد يرهن ليهو قطعه ويدفع ليهو حوالي 90 مليون لو داير يبني ليهو بيت ب 300 مليون لشركه لا تقدم لك أي ضمانات بتنفيذ العقد لو لم ينفذ البناء حسب المواصفات التي أطلبها ماهو الحل من شروطهم عدم تدخلك في العمل نهائياً بعد توقيعك للعقد وتسليمهم القطعه يعني ممكن يحصل غش في المواد وإنت ما جايب خبر

فدياس اخوي

انا كان عندي تسعين البوديني ليهم شنو

وبعدين المتابعة مهمة ياعمك
الناس تتفق معاهم وبعدين تراقبهم
مسالة عدم التدخل دي ماواردة

بالنسبة للعربات
اي عربية بالاقساط خسرانة

قبل كده اتحاد الاطباء البائس نزل عربات بالاقساط ب 71 مليون
علما انها بالاقساط في شركتها ب65 مليون


المهم
لو في استفهام في الشركة دي يبقى في التوظيف وتوفير الفرص


واصل ياقريبي



التعديل لاضافة حرف الدال لاتحادالاطباء رغم انهم مايستاهلو

عايزين رأي إقتصاديين عن طريقه عمل هذه الشركات

ومن باب الضايق عضه الدبيب يخاف من جره الحبل

نتسأل قبل أن تقع الفأس في الرأس

المشكلة ان القانون ينظم عمل الجهات التي تقوم بأعمال التمويل ويعرفها القانون بالاعمال المصرفية

ولكن في غيبة الرقابة الفورية يمكنك ان تعمل في مجال التمويل بالتحايل أو الحصول علي استثناء

مثل شركات البيع بالتقسيط ..

المشكلة هي ان الجهة التي تقوم بتمويلك هي شركة خاصة ذات مسئولية محدودة أي ان مسئولية ملاك الشركة

في حدود مساهمتهم في راس المال واديك نموذج قانوني للاحتيال علي العالم و بضمان القانون .. مثلا

يكون عثمان وفدياس شركة تطوير عقاري وتكون شركة خاصة ذات مسئولية محدودة

يكون راس مال الشركة 500 الف جنية

تتفق الشركة مع محلية ..... علي تخصيص قطعة ارض مساحتها 3 كلم مربع لعمل مشروع اسكاني لذوي الدخل المتوسط

تصمم الشركة الخرط و تطرح المساكن للبيع بدفعة اولي وقدرها 5000 جنية وتسدد الدفعة الثانية بعد اكتمال 30%

من المباني (إغراء) و تجدول باقي الاقساط

وتكثف الحملات الاعلانية

اين يحصل الاحتيال

بعد جمع الدفعة الاولي وحسب المبلغ المحصل

تعلن الشركة انها فتحت الاعتمادات للمواد من كذا دولة

لا تصل المواد وتطلف الاشاعات ان الشركة تم النصب عليها

وان مدير الشركة المفوض الهن..... الجنسية قد هرب من البلاد

ويعلن افلاس الشركة وتتم تصفيتها و يعوض المشترين بما يتم الحصول عليه من تصفية الشركة

اصحاب الشركة خسروا راس مالهم فقط و نصبو علي شركتهم

اخونا عثمان كلامك منطقي مقبول

لكن هل ينطبق على هذه الشركة ام لا

قبل كده كانت في مخاوف من شركة سوقطرة بتاعت المخططات السكنية
واتضح فيما بعد انها اصدق واسهل في معاملاتها من جميع الشركات التي تسمي نفسها شركات وطنية


ناس تساهيل ولا اي زول عندو معلومة مفيدة ممكن يشاركنا بيها على الايميل التالي

[email protected]
ونعدكم بكشح المشاركة في البوست كما جاءت من المصدر


الموضوع ده مصيري يا شباب ماتبخلوا علينا

Quote: اخونا عثمان كلامك منطقي مقبول لكن هل ينطبق على هذه الشركة ام لا

اخونا معاذ

الانشطة التي تمارسها الشركة هي انشطة البنوك القائمة بالدولة

تمويل عقاري
تمويل شراء احتياجات شخصية (نظام مرابحة)
تمويل شراء سيارة

والغريب والمهم هو الاطلاع علي عقد الرهن وان كان يحق لهذه الشركة ان تعيد رهن اصولك لجهة ثالثة
فإذا لم توف الشركة للطرف الثالث فانت من سيفقد اصوله أو عقاره

لا اعلم شئ عن شركة سومطرة
ولكن الله اعلم في ظل الحالة السائدة في مجال الاسنثمار فالتعامل مع المؤسسات العريقة اقل خطورة و ليس اكثر امان

اخونا عثمان

شكرا على الإضافه والمعلومات القيمه ومفيده

من نخاف منه هو ماذكرته أخيراً عن الوضع الإستثماري بالبلاد

من يخاطر في مثل هكذا ظروف بتسليف الناس مبالغ قد تكون طائله

ثم الإنتظار لخمسه أو سبعه سنوات ليجني أرباحه

معروف إن رأس المال عموماً ########

وكلنا نشهد الركود الذي تشهده البلاد بسبب الخوف من المستقبل الغامض

من يخاطر في مثل هكذا ظروف

لابد من أن أشير لخطأئي في حساب السيارات المكتوب أعلى هذا البوست

والصحيح إن مقدم الأتوس هو 900 ألف جنيه مع قسط شهري 809 جنيه لمده 36 شهر

ليصبح إجمالي المبلغ هو 38124 جنيه تقريباً

والأكسنت مقدمها 15000 ألف جنيه والقسط الشهري هو 970 ليصبح إجمالي المبلغ 49900 تقريباً

وهي مبالغ خرافيه في سوق السيارات المستعمله

من كلامكـ واضح انهم عبارة عن سماسرة للبنوك والربويين

Quote: من كلامكـ واضح انهم عبارة عن سماسرة للبنوك والربويين

أخونا أحمد

سلام

شركه تساهيل في إعلانها رقم تلفونلا يقبل الإتصال إلا من هاتف سوداني

وهو الرقم 50005

ودي برضو تفتح المجال للتساؤل عن العلاقه بينها وبين شركه سوداني

لماذا لا يمكن الإتصال بهم إلا من هذه الشركه رغم كثره شركات الإتصال

عموماً

الخلاصه إن الموضوع كله فيهو ما يدعو للشك والريبه

ابن عمي كان يريد شراء شاحنة 8 طن
اتصلنا على هذه الشركة بالذات ، ردت علي موظفة وسألتها عن امكانية شراء العربية المطلوبة
قالت أن السيارات عندهم امجاد ، قريس ، اتوس ، كليك ، اكسنت ، لكن "خليك معاي"..
طلبت مني الموظفة تفاصيل العربية ومكان شراءها ، رد عليها ابن عمي ،
طلبت منا الحضور الى مباني الشركة

ذهب ابن عمي لمقرهم ، ولا أعلم هل هو الذي ذكره فدياس أم آخر!

اتصل علي ابن عمي بعدها وأخبرني أنهم طلبوا منه 40% والباقي اقساط على ثلاث سنوات بعد اضافة الارباح 35% تقريباً
وهو مبلغ ضخم جداً ، ولا أعلم بنك أو جهة تمويلية تزيد في الارباح في العربات بالذات عن 10%

Quote: الخلاصه إن الموضوع كله فيهو ما يدعو للشك والريبه

..
.
سلام يا فدياس
بلد كلها بقت عايشة على النصب والإحتيال

Quote: التعديل لاضافة حرف الدال لاتحادالاطباء رغم انهم مايستاهلو

غايتو يا معاذ زعلتك من الاطباء
اكبر من زعلت فدياس .. من تساهيل

-----------------

اعتقد ناذر الخليفة ممكن يقدم لينا تسهيلات بناء
افضل من تساهيل .. ولا كيف يا ابو النيز ..

حباب محمد يوسف وناذر

الموضوع لحدي الآن في نظري هو ماسوره جديده حتى يثبت العكس

المهم هنا أن نحذرالناس ليأخذو أقصى درجه الحذر وهم يتعاملون مع هذه الشركات

وليس المقصود فقط هذه الشركه

لكن كل من يعمل في مجال التمويل

Quote: الفنان ( نزار المهندس )

ده شنو ده كمان؟فن جديد؟

Quote: غايتو يا معاذ زعلتك من الاطباء اكبر من زعلت فدياس .. من تساهيل ¿

تبلدينا سلام

والله بعيد عنك وربنا يكرم السامعين اخوك طبيب

مشكلتي ما مع الزملاء

مشكلتي مع اتحاد الاطباء والوزارة...(السجم والرماد).

بعد اذن الاخ فدياس

المشاركة دي جات في الايميل

Quote: السلام عليكم اخ معاذ القصة العرفتنى بى ناس تساهيل دى طويلة جدا لكن انا اختصرها ليك فى نقاط معينة ارجو شاكرا نشرها لو انت خريج ولا عاطل داير تتوظف حاتدفع ما بين 20 -50 الف غير مستردة لو عاوز عربية حاتدفع ما بين 300 -500 الف غير مسترده لو عاوز تتم بيتك حاتدفع ما بين 500 - .... الف غير مستردة لو عندك قطعة ارض ساكت فانت حاتركب ماسورة تماما والقروش دى كلها بتتلم اخر اليوم وتتورد فى البنك فى حساب شخص معين مافى داعى لى ذكره حاليا دى شركة بتشيل من العطالة قروش اكون عندها عمار كيفن؟؟؟ شركة ما عندها مقر كيف توفر ليك شغل او بيت او عربية او ....ده اعجاز فترة كانو ماجرين فى المنشية بعدين مشو جنب اوماك ثم عبيد ختم قبل شهرين بس ذكرونى بى حسن ماسورة وللعلم الشركة دى ما جديدة بي الايام دى طالعة فى الكفر قالو احصلو المولد قبل ما المولد اخلص الناس دى بتبيع الاحلام للشعب التعبان ده .انا ممكن اجيب ليك لستة لى ناس منتظرين تساهيل تضرب ليهم عشان اتوظفو او اركبو عربات او بيوت او عفش او ......اى شى وحاينتظروا كتييييييير الناس دى بتلم فى قروش الناس بمساعدة من شخصيات اعتبارية فى البلد محاسب سابق ).

الكلام دخل الحوش يا ناس تساهيل

ياريت تعدلوا لينا راسنا

بعد اذن صاحب البوست
مشاركة اخرى من اخ كريم

Quote: الأخ / معاذ السلام عليكم بخصوص الموضوع بتاع شركات التمويل مثلا تساهيل او غيرها ، فهي موجودة في كل الدنيا وهنا في السعودية ما أكثرها بس في مشكلة عويصة وخطيرة وهي أنه بين هذه الشركات ، شركات وهمية ولقد سبق لي المرور بتجربة مع هذه الشركات الوهمية هنا في الرياض حيث كنت حاضرا مع احد الأخوة السعوديين عندما بدأ الحديث الحالم مع مدير أحدى هذه الشركات حيث كان هنالك الكثير من الوعود التي يسيل لها اللعاب، ولكي لا اطيل عليك في النهاية كده الشركة دي اتضح انها كانت جارية وراء مبلغ 50000 الف ريال غير مستردة في حال توقف العميل عن الاستمرار في هذه المهذلة وتدفع مقدما ، ولابد للعميل ان يتوقف لانهم في كل يوم بيطلعوا ليك ببند جديد فيه مصاريف ،النصيحة اي شركة تطلب منك مبلغ مقدم غير مسترد في حال انسحابك لابد انك تكون واثق انك حتستمر للنهاية معهم وعارف خطواتهم، مهندس ا. ي الرياض

الاخ صاحب البوست

وصلني هذا الرد على الايميل

اعتقد انه من شركة تساهيل او احد موظفيها
للاسف من غير توقيع ومن ايميل شخصي على الياهو

قد يكون من الشركة وقد لايكون
لكن ننشره كما وعدنا بنشر اي مشاركة تأتي للفائدة العامة

Quote: السلام عليكم الاخ معاذ الهادي قال تعالى يا أيها الذين آمنوا أن جاءكم فاسقٌ بنباءٍ فتبينو أن تصيبوا قوماً بجهالة فتصبحوا علي ما فعلتم نادمين) صدق الله العظيم اخي الكريم اولا يجب ان تعرف ان لشركات الاقساط ميزتين قويتين هما الارباح و السيولة المتدفقة حيث انها لا تتأثر بي الوضع المتذبذب لان كمية العملاء و اقساطهم يوفرون السيولة الدائمة الشركة لها عملاء من جميع مستويات المجتمع فعلا هنالك مواقع نفذت و هنالك قيد التنفيذ و كمية من العربات امتلكها الجمهور وكميات من الخريجين اشتغلو عن طريق الشركة وبدون محسوبية الحمد لله كل من تعامل معنا كان راضيا اقساط العربات ليست خرافية كما ذكرت انت تعلم ان اسعار الجمارك ارتفعت و انا اعلم ان البنوك يربحون اكثر من ذلك بكثير و باقي الشركات مثل شركة البربري كنت اريد ان اشتري قتس فوجدتها بالاقساط تصل الى 76 الف او تزيد العاوز يشتري و الماعاوز يخلي هذه ليست من احتياجات الحياة الضرورية هذه كماليات او رفاهيات اما عن الاخ نزار المهندس شنو دخل فنو في الشغل الزول دا مهندس و شاطر كمان وهو ما المدير الهندسي تساهيل عندها فريق عمل ممتاز وياريت تجو تزورو الشركة و تدخلو للمدير و يجيبكم عن اي استفسار ليدكم و قبل كدا كان معاهو اكتر من لقائين على الهواء اذكر منهم اذاعة مانقو و اذاعة مراية اف ام تابعه للامم المتحدة و قريبا على شاشاة الفضائيات و ذي ما بقولو الشجرة المثمرة تقذف بالحجارة شكرا على الدعاية الممتازة وجد لا تقدر بثمن و مستنين زيارتكم و اتقو الله في اعراض الناس ان بعض الظن اثم اما بالنسبة الاتصال من شركة سوداني فقط و هذه لانها اول شركة تعاملت معنا و باقي الشركات لم نوفق معهم بعد و المحاولات جارية و ربك يسهل وشكرا

عن اذنك يا معاذ عندي تعقيب على الايميل الاخير..

Quote: و قبل كدا كان معاهو اكتر من لقائين على الهواء اذكر منهم اذاعة مانقو و اذاعة مراية اف ام تابعه للامم المتحدة و قريبا على شاشاة الفضائيات

هسي دا دفاع دا؟

الناس بتسأل عن الضمانات والاستمرارية وامكانية أن تكون الشركة ليست الا ماسورة
يجو يقول ليك قبل كدا اذاعة مانقو عملت مقابلة مع المدير

ثم ثانياً هذا البوست ليس دعاية ممتازة ، وانما نهاية للشركة لو ما لحقتوها بحاجة تقطع الشك باليقين

الاتهامات كالاتي:
ضمانات التمويل العقاري
هوامش الارباح من العربات المقسطة

ردكم يا ناس الشركة

Quote: العاوز يشتري و الماعاوز يخلي هذه ليست من احتياجات الحياة الضرورية هذه كماليات او رفاهيات

رد غير موفق

نحن بنتكلم عن
البيت (المسكن)
والعمل والتوظيف
والعربة

اعتقد انها ليست رفاهيات او كماليات

بل هي احتياجات الحياة الضرورية

وده المخلي نفسنا طالع ونازل مع هذا البوست
وهذه الشركة

تبلدينا

Quote: اعتقد ناذر الخليفة ممكن يقدم لينا تسهيلات بناء افضل من تساهيل .. ولا كيف يا ابو النيز ..

غايتو الحمد لله لحدي الليلة مستورين مع الزبائن ..

بالمناسبة ..

وين صحبك الشغال معاكم وجاني كم مرة في الموقع ..!!

الحصل عليهو شنو ؟؟!!

Quote: شكرا على الدعاية الممتازة وجد لا تقدر بثمن ]

اخي الكريم
البوست ده سلاح ذو حدين

معاذ الهادي ومحمد يوسف الزين
و
أبقوا عشره على البوست ده

أخوكم مزحوم شويه

لكن بجيكم راجع لو ربنا سهل

حباب تبلدينا بهنا

وحباب د محمد بابكر

ويا معاذ إعتبر البوست حقك

بنجي نعقب على الإميل البادفع عن الشركه بعدين

وينك فدياس؟

والله مشتاقين

طولت الغيبة

Quote: وينك فدياس؟ والله مشتاقين طولت الغيبة

عمنا عبدالفتاح

تسأل منك العافيه ..... شويه مشغوليات وإمتحانات وحاجات تانيه حمياني .... شغلتنا عنكم

أخبارك وأخبار الكدايس معاك

..
.

Quote: الناس دى بتلم فى قروش الناس بمساعدة من شخصيات اعتبارية فى البلد

لو البلد فيها محامى طموح
وصحفى غيور .. بس يمسكوا الملف دا .. ويكشفوا المستور
ويرجعوا للناس حقوقها مع التعويض بسبب بيع الوهم ..

--------------

قال شنو الصحافة السلطة الرابعة
وتجيب ليهم خبر يقول ليك والله ما بنقدر حنخسر عميلنا ..

??

طبعاً يا جماعه لو الرد ده جاي من طرف الشركه فتبقي دي مصيبه كبرى

رد يجرم من حيث أراد أن يدافع عن الشركه

ركاكه في الصياغه ...عدم موضوعيه

أخطاء نحويه .... كارثه أخرى تضاف لكوارث هذه الشركه

ولا زلنا نقول لو إن الردجاء منها أو من أحد العاملين بها فتلك مصيبه

تأمل معي هذه الجزئيه

Quote: كمية العملاء و اقساطهم يوفرون السيولة الدائمة الشركة لها عملاء من جميع مستويات المجتمع

الشركه هنا تقر بإنها تستغل أقساط العملاء لتمويل عمليه الشراء بمعنى إن رأس المال الحقيقي هو أقساط هؤلاء البسطاء

وده كلام خطير جداً ...!!

شوف معايا المقطع ده

Quote: وكميات من الخريجين اشتغلو عن طريق الشركة وبدون محسوبية الحمد لله كل من تعامل معنا كان راضيا

في دوله بلغت العطاله بها مبلغ عظيم وفي ظل وجود هيئه أو مؤسسه إسمها تشغيل الخريجين وفي وجود مكتب العمل

تمكنت هذه الشركه بالتفوق على كل هؤلاء وشغلت كميات ( تجاوز معي حته وصف الخريجين بالكميه ) شغلتهم في شركات في وزارات لا أحد يعلم

سنصدق هذا الإدعاء بعد نشر الشركه أو من يمثلها هنا بنشر كشوفات هؤلاء الخريجين مع أسماء الجهات التي تم تشغيلهم بها ولو أمكن تلفوناتهم حتى تطمئن قلوبنا

Quote: الاخ نزار المهندس شنو دخل فنو في الشغل الزول دا مهندس و شاطر كمان

لم نتطرق لنزار المهندس بسوءوذكرت بالحرف الواحد إن هذا ليس موضوعنا ولكن ما دام الكلام جاب الكلام فدعني أقول إن الشركات المحترمه لديها إمج تحافظ عليه وسط الجمهور

هذا الإمج من أبسط الأشياء به إن تختار الوجه الإعلاني الذي يقدم وجه الشركه ويمكن أن أحيلك لفسخ شركه الكولا لعقد الدعايه الذي كان يجمعها بالنجم وأين روني بعد ظهور مشاكله الخاصه على سطح الأحداث

طبعاً لا مجال للمقارنه هنا بين الحادثتين لكني أحببت أن أقرب لك معنى كلمه إمج... وتاني لا إعتراض لنا على نزار المهندس في شخصه ولو أصبح المدير العام للشركه

Quote: و مستنين زيارتكم و اتقو الله في اعراض الناس

فتشت البوست فوق تحت عشان ألقي إسم زول قمنا بالتعريض به فلم أجد

نحن نتحدث عن شخصيه إعتباريه وهي الشركه ولم نقل أكثر من إنها شركه مريبه

على الأقل خلونا نعرف من هم المساهمون في هذه الشركه

ورأس المال كم؟؟

ومسجل كشركه مساهمه عامه ولا محدوده

وهل صحيح إنها تنقلت بين عده مواقع حتى إستقرت أخيراً في شارع عبيد ختم

ولماذا الآن فقط نشطت في السوق

ونرجو إنها لا تطبق المثل الذي يقول

لو بيت أبوك سرق شيل ليك منه شيله

؟

يا دكتور معاذ

الجماعه ديل عاملين رايحين ؟؟

ردوا رد فطير بواسطه الإميل الوصلك

ردينا عليهم وهسه سوف ننتظر رد تاني منهم

رد عشان الناس تطمئن على أمواله

عايزين أسماء المساهمين في الشركه دي لو أمكن؟؟

الاخ فدياس وصحبه الكرام مرتادي البوست
تحية واحترام

من الواضح جدا وعلي حسب المعطيات المتوفرة وبشوية تشغيل لاي نافوخ عادي ان العملية تدخل من باب عمليات النصب التي يطلق عليها الهرم وبعدها تنقلب للهرم المقلوب كالاتي

عمل دعاية مكثفة لجذب اكبر قاعدة من ( الزبائن ) المغفلين وجمع مبلغ كبير في شكل رسوم غير مستردة ومقدم كبير ثم التضحية بمبلغ بسيط من مال الغلابة الاوائل ليكون طعم للمغفلين الجايين في الطريق ومن ناحية اخري تطمين للمغفلين الاوائل
مع العلم بان الشركة ربما لايكون لها راس مال علي الاطلاق او شوية مصاريف وواجهات (الشقة والبنات الحلوات والفنان ) لا ااكثر ولا اقل
ومن ثم تبدا الهبرة الكبيرة والمماطلات ( مصادرة الرهون والمقدمات والعربات ) ثم الهروب الكبير وترك المغفلين يغنوا اغنية ياليل ما اطولك

هذا مبلغ علمي وفوق كل ذي علم عليم اي (الله اعلم)

جاي تاني ان شاء الكريم

Quote: عمل دعاية مكثفة لجذب اكبر قاعدة من ( الزبائن ) المغفلين وجمع مبلغ كبير في شكل رسوم غير مستردة ومقدم كبير ثم التضحية بمبلغ بسيط من مال الغلابة الاوائل ليكون طعم للمغفلين الجايين في الطريق ومن ناحية اخري تطمين للمغفلين الاوائل

أخونا بكري

سلامي وإحترامي

وضعنا هنا كما ترى عدد من الأسئله .... حتى نجد رد من هذه الشركه ومن المؤكد إنهم قد مروا من هنا

لكن جأنا رد بائس وفطير من شخص يمكن أن ننسبه لهذه الشركه

بس خليني أوصف الزبائن بالـــ( المساكين )بدلاً عن المغفلين

فشعبي بلدي الطيب مسكين ويحاول التعلق بقشه

شاكر مرورك ومنتظرك تاني

Quote: فشعب بلدي الطيب مسكين ويحاول التعلق بقشه

انا واحد من المساكين الداير اتعلق بالقشة حقت تساهيل دي

وجادي في الموضوع
لكن البوست بتاعك ده لخبط لي حساباتي

حتى الان انتظر مشاركة ناس تساهيل وعودتهم لتوضيح بعض النقاط في هذا البوست

سيبقى هذا البوست لحين عودتهم فهو كما ذكرت من قبل ذو حدين
وارى ان هناك حدا يلمع

Quote: هذا الإمج

والله يا فدياس يا أخوي راجعت قاموسي العربي كلو ما عرفت (هذا الإمج) دا شنو؟
على العموم (هذا الإمج) أكيد ما بياكلوهو ولا بشربوهو،
المهم ما صاح منو الكلام دا

محمد

خلينا من موضوع الإمج وركز معايا في موضوع هذه الشركه التي تحوم حولها الشبهات

ولا تكلف نفسها بتوضيح؟؟

هل يا تري نحن أقل من أن يرد علينا ؟؟

هل هناك صعوبه في هذه التساؤلات ؟؟

عموماً صديقنا دكتور معاذ في الإنتظار ...ونحن كذلك

اخي فدياس شكرا علي تعقيبك

اطلاقا لم اقصد التقليل من شان عملاء الشركة المحترمين ولكن وصفت استغفال ( خداع ) الشركة لهم ومن هنا اتتني التسمية لا اكثر ولا اقل

ولكني اود ان انبه اخواني من تلك الحركات الاستغفالية التي يقوم بها بعض معدومي الضمير ومستعجلي الثراء علي حساب ( المساكين ) من ابناء بلدي

1/ يجب ان نفكر من اين تاتي حتة شركة بكمية كبيرة من الوظائف في ظل الظروف الحالية واذا كانت الشركة جادة فلتخصم عمولتها من اول راتب اذا كان الامر جادا

2/ عملية تمويل شراء السيارات والمنازل وبناءها عملية مكلفة تعجز عنهاحتي بعض البنوك ناهيك عن شركة متواضعة مقرها شقة بالايجار

3/ عدم اعطاء الشركة ضمانات للعملاء عدا العقد الخاص بهم هو بداية التهرب من المسئولية ( اضمار نية الشر مقدما )

لذلك انصح اي زول بعدم التهور والوقوع في اخطاء كارثية مثل رهن المنازل مهما كانت المغريات دون اخذ كافة الضمانات

Quote: 1/ يجب ان نفكر من اين تاتي حتة شركة بكمية كبيرة من الوظائف في ظل الظروف الحالية واذا كانت الشركة جادة فلتخصم عمولتها من اول راتب اذا كان الامر جادا 2/ عملية تمويل شراء السيارات والمنازل وبناءها عملية مكلفة تعجز عنهاحتي بعض البنوك ناهيك عن شركة متواضعة مقرها شقة بالايجار 3/ عدم اعطاء الشركة ضمانات للعملاء عدا العقد الخاص بهم هو بداية التهرب من المسئولية ( اضمار نية الشر مقدما )

دي يا بكري زبده وخلاصه الموضوع

كفيت ووفيت

يا فدياس خسرت الناس قروش ياخ

ما خلو ليهم جريدة ما نزلو فيها الاعلان دا

هامش ربح 5% دي كضب وبشهادتي الشخصية في تمويل سيارة


في الاعلان في عمارة طاشر طابق!

يا محمد

مافضل إلا يكتبوا

وهم على كل شئ قدير

إستغفر الله

تساهيل ملتي اكتفتيز قال ليك

يا حليل (الإمج)

كيزان حرامية.

كيزان حرامية

كيزان حرامية

يا بدر الدين يا أخويا

لحدي هسه الواحدما عارف هويه الناس دي

ممكن زي ماقلتوا يطلعوا من أهل النظام

وممكن يطلعوا معارضه زاتو

المهم هم في نظري متهمين لحدي ما يثبت العكس

شكراً على المرور

مشاركة مهمة من الاخ علي عبد العزيز عبر الايميل

Quote: الاخوه الاعزاء السلام عليكم الرجاء التكرم لى بادلاء رأى البسيط فى جزء معين من هذا الموضوع وهو مايتعلق بنشاط التوظيف بحكم عملى الطويل فى الموارد البشريه فى الخليج والسودان فقد تعاملت مع مكاتب توظيف فى الخارج وهنا فى السودان شركات التوظيف من الاعمال التى لا تحتاج لراس مال لكى تبدا عملها فقط تسجيل الشركه وتاثيثها بشكل مناسب ثم تكوين قاعده بيانات بطالبى الوظائف كل بحسب تخصصه وخبرته بالاضافه الى تسويق عملك لمدراء الشركات ومسئولى التوظيف وحقيقه هى خدمه سريعه وقليله التكاليف بالنسبه للشركات اذا حسبت تكلفه الاعلانات والاعمال الاداريه التى تصاحب التوظيف والمعاينات خصوصا اذا كانت الشركه لا تملك متخصصين فى الموارد البشريه لاجراء هذه العمليات لكن هناك نقطه مهمه جدا فى قانون العمل هناك جزئيه تسمح لوزير العمل او مكتبه بالتصديق لمكاتب التوظيف سواء خارجى او داخلى لكن بشرط عدم اخذ اى مبالغ ماليه من طالب الوظيفه واى مبالغ اخرى باى مسمى يعنى شركه التوظيف بتاخد من الشركه التى تطلب موظفين وعاده مايكون مرتب شهر او 15% كم المرتب السنوى على حسب سياسات الشركه واتفاقها مع العميل لكن الذى يحدث ان هناك شركات تاخد نسبه من مرتب الموظف او رسوم تقديم عند اول تقديم للموظف لشهاداته لشركه التوظيف وهذا منافى تماما للقانون ولا يحق لهم ذلك والغريب فى الامر انه يجرى تحت نظر الجميع قبل فتره كان فى اعلان لشركه توظيف خارجى تطلب وظائف عديده لاطباء من جميع التخصصات للسعوديه وفى اخر الاعلان مكتوب انه على المتقدم دفع مبلغ معين لا اذكره لفتح فايل له والشى المعيب انو هذا الاعلان مصدق وبرقم تصديق للاعلان من الادارة الختصه بمكتب العمل مااريد ان اخلص له ان هذه الخدمه عالميه لكن هنا وعلى الرغم من ان فقره فى قانون العمل الخاصه بالتصديق لهذا النوع من الشركات تمنع اخذ اى مبالغ ماليه المتقدم للوظيفه ولكن تحدث تجاوزات مما يفتح الباب للكثير من القيل والقال بهذا الخصوصشكرا لكم على عبد العزيز

شكرا علي

فعلا هناك شركات مثل امواج الخليج وايثار
تطلب مبلغا معينا نظير توفير وظيفة وعقودات عمل للاطباء بالسعودية
ولكن الاختلاف بينها وبين هذه الشركة ان المبلغ يتم استيفاؤه من الطبيب بعد استلام عمله فعليا بالسعودية
اما شركتنا هذه فبتدفع اول واحتمال يشغلوك واحتمال لا

دكتور في معاذ
سلام

اليوم سمعت في الراديو إن هناك حوار منشور في صحيفه الإنتباهه

مع السيد المدير العام لشركه تساهيل

المهم قرأ المذيع جزء من الحوار

وفيه يقول السيد المدير العام إن الشركه بصدد إحداث نقله نوعيه للمواطن السوداني

وإنهم بصدد تقديم خدمات إستراتجيه لمصلحه المواطن في كل ولايات السودان

المهم يا مؤمن مشيت جبت الإنتباهه ولم أجد الحوار

وأظن وبعض الظن إسم إنني لم أتبين إسم الصحيفه جيداً من الراديو

لكن المؤكد إن الموضوع بقي كبير آووووي

وجاب ليهو كلام عن الإسترتيجيه والذي منه !!!!

الجزئيه التي أشار لها صاحب الإميل

والخاصه بتحصيل رسوم غير مسترده من المتقدمين بحثاً عن وظائف

يمكن أن نحيلها للإخوه في مكتب العمل

لو يقدروا يعملوا فيها حاجه ؟؟؟؟

فدياس نجم الدين
تحياتى ..
Re: خالد مجذوب الكتيابى - مدير شركة تساهيل .. هل هو سو...جديد ؟ ( توجد صورة )

Quote: فدياس نجم الدين تحياتى .. Re: خالد مجذوب الكتيابى - مدير شركة تساهيل .. هل هو سو...جديد ؟ ( توجد صورة )

شكراً الأخ مزمل خيري

سلام لكل المتداخلين..

لفت نظري جداً موضوع الفائدة ال5% سنوياً....

وهو شيء يدعوا للريبه والاستغراب...

يا جماعة سعر الجنيه السوداني يتناقص بوتائر عاليه يومياً جراء التضخم ووتدهور سعر الصرف

يعني اي مبلغ مؤجل سيخسر سنوياً ما لا يقل عن 40% من قيمته....هل تعلم انو في عام2010

الجنية فقد حوالي42% من قيمتو...يعني لو عملو الفايده 30% هناك مخاطر ناهيك عن الظرف السياسي

الضبابي والسائل والذي له تداعايتو على الاقتصاد...

اصلاً في فترات التضخم وتدهور سعر صرف العمله تصبح تجارة الاقساط من باب الخساره الا بالعمله الصعبه

او فوايد عاليه..
اذن قصة 5% مريبه وغريبه وغير واقعيه...

كل الذي ذكر عن الشركة مزعج...

يعرف المقيمين في السعوديه اشياء مثل هذه((مساهمات عقارية ومضاربات بطاقة سوا)

كل الذين دخلو مبكراً خرجو بارباح مجزيه..وبالتالي ابلغوا من حولهم بذلك مما خلق حالة من الطمانينة

ولم تمضي سنتين الا وكان الضحايا بالالاف والمبالغ بالمليارات..

انا لا اجرم احداً,,,,ولكن توضيح قدرات الشركه الماليه بمنتهى الدقه امر مهم...

من كل قلبي وبصفتي دارس اقتصاد ولي ممارسه وعملي في السعوديه قريب من هذه الانشطه

اتمنى ان لا يندفع الناس نحو هذا الامر ابداً ولابد ان تتبينوا القوة الماليه الذاتية

للشركه ..بمنهى الدقه...فالبلد ما ناقصه طاعون جديد....

Quote: من كل قلبي وبصفتي دارس اقتصاد ولي ممارسه وعملي في السعوديه قريب من هذه الانشطه

شكراً الأمين

أها يا ناس تساهيل .... جاءكم واحد من خبراء الإقتصاد

تعالوا ردوا على الزول ده

في صحف اليوم تواصل ظهور السيد خالد مجذوب الكتيابي

المدير العام لشركه تساهيل

ففي صحيف قوون ظهر الرجل وهو يوزع لابتوبات للاعبي الهلال في مقر أقامتهم

وفي نفس اليوم ظهر في حوار رياضي في صحيفه حبيب البلد

متحدثاً عن عشقه وحبه لنادي الهلال

وإستعداده لإحداث نقله حضاريه للنادي العريق

(إسمع كلامك .. أصدقك .. أشوف عمايلك ..... إستعجب )

يا ناس تساهيل ما تتساهلوا معانا

وتجي تردوا علينا

الطناش ما بيخدم غرض

تواصل الظهور الإعلامي المكثف للسيد خالد الكتيابي

ففي عدد يوم الخميس الماضي من صحيفه الأهرام اليوم

يظهر الرجل في الصفحه الأخيره مع صوره بارزه له داخل مكتب الهندي عزالدين

رئيس التحرير والخبر المصاحب يقول إنه زار الصحيفه وإلتقي مع السيد رئيس التحرير

وثمن دور الصحيفه التي وصفها بصحيفه كل الأجيال ( العبد لله مافهم الوصف ده )

لم توضح الصحيفه هل هذه ماده إعلانيه أو تسجيليه

لكننا يمكن أن نصل لإستنتاج لا يتطلب كثير ذكاء

عن المقصد من هكذا أخبار


ولا تزال التحريات مستمره

مشاركة بالايميل من الاخ

ط.الامام

Quote: انا من الذين حفيت اقدامهم للحصول على تمويل لشراء منزل حتى فى ولايتى خارج الخرطوم وبضمانات معقولة واقساط تتناسب ودخلى علما باننى اعمل بالسعودية وفى قطاع المقاولات العامة ولو كنت املك قطعة ارض قريبا من السعودية لكنت بنيتها من مخلفات المبانى مع رخص مواد البناء ايضا بالسعودية .المهم انا ايضا لفت نظرى الاعلان ولكن عملى وخبرتى فى مجال دراسة وتسعير وتنفيذ المشاريع جعلنى شديد الحذر والحرص حيث اننا نحسب بالهللة حتى نضمن الربح.كثير من الذين لديهم امكانات وخبرة فى مجال العقار ليس لديهم الحماس للدخول فى هذا المجال لما فيه من تعقيد ولا يمكن معه تقديم خدمه بفوائد تناسب راغبيها وغالبيتهم من الفقراء .لذلك لا توجد الخدمات العقارية الا فى بعض البنوك وبضمانات واسعار اشبه بالخيالية .بالنسبة لسوقطرة فهى شراكة سعودية وتعمل بصورة صحيحة مع ولاية الخرطوم ولا غنار عليها .عدم وجود وظائف جعل الكثير من الشباب خاصة يسعون لايجاد دخول بطرق شتى وهذه واحدة منها وسنرى الكثير منها لاحقا .هذا المجال ىحتاج المال الكثير والخبرة لان عئده قليل ويحتاج لوقت ليس بالقليل ولا اعتقد ان تساهيل لديها ذلك وهناك الكثير ليقال ولكن ضيق الوقت يجعلنى اكتفى بذلك ونصيحتى للجميع بالحذر قبل دفع اى مبالغ والله الموفق