Post: #1
Title: أغنية الرواسي - جعفر السقيد - طمبور" تعبر عن حال البلد"
Author: Dr. Ahmed Amin
Date: 10-17-2010, 06:08 AM
http://mugrun.com/share/03_Al-Rawasy.mp3
عند ظهورها وقبل انتشارها الواسع تم خطفها من قبل الأمن
حتى لا تنتشـــر ....
الروّاسي
شعر حاتم حسن الدابي
غناء جعفر السقيد
مدِّر بدِّر يا رواسي نحن بعاد لحقنا القيفة
انت مدبج ونحن نقاسي برد ام شير والموج والزيفة
مركبك الماليها مطارق تمشي .. تقيف .. تسرح بي كيفا
مرة مغارب ومرة مشارق وانت تخاف الريح وحفيفا
سوّها زينة وفوقها بيارق وانت مدبج توب وقطيفة
فيها المات والضاربو الفالج والسالمين في حالة مخيفة
كل الناس ترزح في كفة وانت وناسك فوق الدفّة
الدايشين والراسهم لفّ والشاخصين في المدى للضفة
صوت أطبالك فوقهم ألفى جوه الموية وريقهم جفّ
من العطش النص اتوفى وباقي النص الفضّل جيفة
ضاقوا المر والحال استعصى الشغال واللاحق الحصة
الواصال للرحم اتقصّ والهاداي مو لاقي الفرصة
الرساي سافر ما وصى خل مُحمد وأحمد و حفصة
الأطفال العرفو القِصّة سدت جوّ حلوقهم غُصّة
من الجوع الدم اتمصّ واصبح كل الحلم رغيفة
كل الراكب شاف أحلامو دون احساس ماتت قدامو
فنّ كتابو وكسر أقلامو للوالدين لا جال مالامو
ناس الحلة القعدوا وقاموا أصرّ وألحّ يمشي كلامو
هزموه اخوانه البيجوع ناموا وكم خريج مالاقي وظيفة
يالفكيتها وقلتّ لها سيري وعارف انو الدنيا دميرة
لا في ضفاف لا شفنا جزيرة لا في الحيرة ولا في الطيرة
كسرت جناحها وقلتّ لها طيري واتملكت الكانت ميري
يالسودت الناصع جيرة إيد الحق صابونة وليفة
قبلك كم متعلم وقاري عكس الريح فكّولو الصاري
مشدوهين متعشي وحاري ريسها شلته والبحّاري
كم سنوات علامّها الباري واقفة وهم شيايفنها جاريي
بقينا هلاك والقيف متضاري لا حجّار لا دوحة وريفة
حسِّك عينك ما تتمادى وتنسى الراكب عندو إرادة
الأهوال الشافها وخاضها كان في مدرسة ولا عيادة
شفنا الإيد الكان أجوادة يا مبتورة ويا شحادة
وياما رقاب كانت سدادة علّمت الله من التعريفة
يا ريسنا قدر مدّيرك فك الدّفة وأدّها غيرك
أحفظ نفسك ترضي ضميرك وقّف أوعى تواصل سيرك
كان طاوعتنا شن بيضيرك عرض أكتافك وفك البيرك
لاهنا شكرا وكتّر خيرك وكل انسان في الأرض خليفة
|
Post: #2
Title: Re: أغنية الرواسي - جعفر السقيد - طمبور" تعبر عن حال البلد"
Author: Dr. Ahmed Amin
Date: 10-17-2010, 06:39 AM
Parent: #1
.
|
Post: #3
Title: Re: أغنية الرواسي - جعفر السقيد - طمبور" تعبر عن حال البلد"
Author: Dr. Ahmed Amin
Date: 10-17-2010, 11:46 AM
Parent: #2
|
Post: #4
Title: Re: أغنية الرواسي - جعفر السقيد - طمبور" تعبر عن حال البلد"
Author: نوسة
Date: 10-17-2010, 09:13 PM
Parent: #3
أبو حميد إزيك؟؟؟؟
قلبت يا أخوي إنت و لا شنو؟؟؟؟؟؟ ههههههههه
وين مختفي من الفيس؟؟؟
|
Post: #5
Title: Re: أغنية الرواسي - جعفر السقيد - طمبور" تعبر عن حال البلد"
Author: Dr. Ahmed Amin
Date: 10-18-2010, 03:40 AM
Parent: #4
Quote: أبو حميد إزيك؟؟؟؟
قلبت يا أخوي إنت و لا شنو؟؟؟؟؟؟ ههههههههه
وين مختفي من الفيس؟؟؟ |
حمدا لله على السلامة بعد الغيبة ..
أحوالكم كيف ؟؟؟
عليك الله ده ما حاله تقلب القلب ذاته ؟
تحياتي للبنات وأبوهم ...
محبتي ...
|
|