Post: #1
Title: يرجاء المساعدة في وصفة عمل طبيخ، رجلة وقرع
Author: rani
Date: 08-15-2010, 06:47 PM
داير اعمل ملاح رجلة وملاح قرع لكن وحاتكم ما عارف التكتحني فيهم..
العارف، عارفة يورينا الطريقة..
شكري
|
Post: #2
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-15-2010, 09:54 PM
Parent: #1
انت لقيت الرجله وين يا راني؟؟؟
ساهل جدا لانه الاساس نفسه لوبتعرف تعمل طبيخ بطاطس
المشكله بس في حش الرجله لانه كل ما كانت ناعمه بتكون جميله ما تمش تحشها متل رجله المطاعم والداخليات
تحضر البصل واللحم وانا بحب البصل المخدع يعني ما محمر
المهم اللحم يكون عجالي نضيف والعدس مهم عشان يمسك الرجله شخصيا بحب الشمار الاخدر ( الشبت )مع الرجله بديها نكه حلوه في ناس ما بحبو ريحته
المهم يا سيدي تكب الزيت والبصل واللحم وتديهم مويه ما تطمبجا
ولما المويه تقل تقوم بالمعلقه بتاعه الخشب تهرس البصل لما يموت لوووووووول
بعد داك تضيف الرجله والعدس وتديهم مويه شويه لانه الرجله بتطلع مويه واوعك تفوت الحله عشان العدس ما يمسك وما تنسي تسوطها وكلما العدس ينضج كتر من السواطه
اول ما العدس مات ضيف ليها الصلصه واديها شويه مويه واستمر في السواطه
واعمل حسابك سوطها بي معلقه تكون طويله عشان ما تحر ق يدينك بالعدس المتطاير وما تنسي تلبس مريله عشان قميصك ما يتملي بالصلصه
بعد داك لو بتحب الشمار الاخدر ضفه وضيف الملح ومسحوق الفلفل الاسود وشويه توم حسب ما تحب لو بتحب الاكل الحارق ممن تضيف شويه شطه اوعك تكترها.
لو ضقتها ولقيت طعمها محمض من الطماطم او الصلصه اديها معلقه صغيرونه سكر .
القرع
تقريبا نفس الطريقه الزيت البصل اللحمه المويه وضف الملح طوالي عشان بيساعد ذوبان البصل بعد البصل يدوب ضف الصلصه ولما اللحم يستوي او يكون علي وشك تضيف مكعبات القرع واديه شويه مويه ما تكترها عشان القرع ما يتهرس احسن تضيف المويه شويه شويه لانك لو كترها ما بتتعالج
ضف البهارات البتحبها لوكسبره او فلفل .
|
Post: #3
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-15-2010, 10:07 PM
Parent: #2
بيس وبينك يا راني القرع دا بالطريقه السودانيه ما حلو يعني الاتلقي ليك كسره مره يعني حامضه وليمونه وشطه حاره وتقوم تعجنه بيها ومعها مويه وملح ويكون معاك كم نفر كدا ويكونوا جيعانيين شديد وما في اكل في البيت غيره و من الافضل لو كان بالليل والنور قاطع عشان ما تشوف القرع زاتو .
لكين التايلنديين بطبخوه من غير لحم بي red curry ولبن جوز الهند ولما يتسوي بضيفوا ليه sweet basil leaves ويؤكل مع الارز
|
Post: #4
Title: Re: يرجاء المساعدة في وصفة عمل طبيخ، رجلة وقرع
Author: ناذر محمد الخليفة
Date: 08-15-2010, 10:18 PM
Parent: #2
سلام يا شاب ورمضان كريم ..
تعرف يا راني ..
أنا ما عارفك داير تتعلم طبيخ القرع دة لييه ..!! يا خي القرع دا أسخف أكلة في الوجود وما شايف فيها أي لذة أو إستمتاع .. أنا محرم القرع تماما يخش بيتي هو ومعاهو الشي الإسمو كوزة داك !!
أما الرجلة فدي ياخي ضربة معلم عدييل كدة وأنا لو ما مامتك دومة شرحتا قبالي كنت حا أديك الشرح زاتو القالتو ليك تقريبا .. الرجلة دي حاجة ممتعة شديد في الأكل لو تعرف يا راني ..
بس في حاجة مهمة جدا أقولا ليك بي صفتي عذابي سابق لمدة سبعة سنة ..
لمن تعمل الرجلة ديا حاول أطبخا بالليل بي حلة البريستو .. ولمن تطفي النار خليها في محلها وأمشي نوم .. اصلك ما تهبشا ولا تدخلا التلاجة .. تعال ليها بكرة وكت الغدا ..!!
يا خي كدة وزاد وجدي ... حاجة ما تخلص ..
وبيتان الملاح دا برضو بينطبق على البامية .. يا خي الليديس فنقر دي لمن تبيت لي تاني يوم وتالت يوم وكمان تعمل معاها رز مفلفل .. يا خي تنسى القرع والبطيخ زاتو ...!!!
|
Post: #5
Title: Re: يرجاء المساعدة في وصفة عمل طبيخ، رجلة وقرع
Author: ناذر محمد الخليفة
Date: 08-15-2010, 10:24 PM
Parent: #4
!!!!!!!!!
| Quote: بيس وبينك يا راني القرع دا بالطريقه السودانيه ما حلو يعني الاتلقي ليك كسره مره وليمونه وشطه حاره وتقوم تعجنه بيها ومعها مويه وملح |
عوووووووووووووووووووووووووووع ....!!
بالغتي والله مع الراجل يا ماما دوما ...!!
إنتي ما صايمة ولا شنو ؟؟!!
ياا خي عليك الله الود في غربة .. كمان دايرة تبقيها عليو غربة وقرع ؟؟!!
|
Post: #7
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-15-2010, 10:30 PM
Parent: #5
لووول يا ناذر ولدي ما قال دايريعمل قرع
فقلت اوريه طريقه يتبلع بيها
انا لو علي القرع دا ما يزرعوه نهائي
|
Post: #6
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-15-2010, 10:27 PM
Parent: #4
كلامك صح يا ناذر
الرجله البايته ما في زيها والباميه المطبوخه لما تكون مسبوكه تمام وتبيت
يا اخي في 6 ملاحات سودانيه دي كريهه جدا
البامبي
الكوسه
القرع
الاسود البراطيش
القاورمه
دمعه الارز
|
Post: #8
Title: Re: يرجاء المساعدة في وصفة عمل طبيخ، رجلة وقرع
Author: ناذر محمد الخليفة
Date: 08-15-2010, 10:43 PM
Parent: #6
دوما ..
دي بي صراحة ما حصل أكلتها ...
لكن في قراصة رز رهيبة جدا جدا بيعملوها الهنود ..
أمشي أقرب مطعم هندي وأطلبي حاجة إسمها (إدلي ودا) ممكن نكتبا كدا idly wda بيجيبو ليك قراصتين صغيرونات كدة من الرز معجونات ومسبكات ومعاها صحنين صغيرين .. واحد فيهو زي دمعة خدار كدة والتاني فيهو سلطة معمولة من لب الجوز هند بيسموها شتني (shtni) دي حاجة ممتعة جدا وما تخلص ..
أما الحاجة الإسمها قاورمة .. فدي والله أخير منها القرع الدايرو رامي الغبيان دا ..!!
الأسود دا سمعت مرة الدكتور عبد الله الريح بيقول إنو الأسود لا يصلح لغذاء ومضر جدا للأنسان وللحيوان على السواء لإحتوائه على كمية من العناصر السامة والغير مفيدة ..!!
البامبي ما بينفع معاي طبيخ ... لكن عادي ممكن أشيل لي بامبايايا وأكدها نية زي الدوم ..!!
|
Post: #9
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-15-2010, 10:58 PM
Parent: #8
شفت الرز دا امي الله يرحمها مرات نادره بتعمله انا غايتوا ابدا ما بخارح معاي بتطبخ اللحم بالصلصه عادي وبدلا عن الخضار تضيف الرز ويؤكل بالرغيف
بس اتخيل الموضوع دا برضو قرف شديد
يعني لو خلتها لينا دمعه كان بيكون احسن لكين اظنها تتحايل علي ندره البصل في موسم انعدامه عشان الدمعه تكون تقيله شويه.
اما القاورمه دي مبالغه في القرف لانها ملاح بصل صغارمدور متل البلي وطعمه سكر سكر .
نادر انت االمانجو المعموله مع الشطه متل المخلل اسمها شنو ؟؟؟
|
Post: #10
Title: Re: يرجاء المساعدة في وصفة عمل طبيخ، رجلة وقرع
Author: osman righeem
Date: 08-15-2010, 11:17 PM
Parent: #9
في نواحي الرجلة نديك موقفين
الاول عمنا عاش معظم عمره خارج السودان نواحي مصوع
وعندما رجع نهائي الجماعة عملو فزع ( نفير ) عشان يزرع ارضه
اها في وسط المعمة دي سألهم عايزين تزرعو شنو ودار الحوار التالي
1:-حنزرع رجله
عمنا :- رجلة يعني شنو
1:- ياخ جبركلة
عمنا جبركلة يعني شنو يعني بيعملو بيها شنو
2ك- ياخ بتتعمل طبيخ
عمنا : بتتعمل كيف يعني
1:- (شرح ليهو المكونات زي شرح خالتك دومة)
عمنا :- منغعلا لا لا لا وقف بلاش كلام فارغ قال رجلة قال
دي ياخ البصل لحالو ملاح و اللحم لحالو ملاح و العدس
لحالوا ملاح و الشبت لحاله ملاح ... وقف دي خراب بيوت
قال رجلة قال
الموقف التاني رمضان كريم في العيد وانت طيب
|
Post: #11
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-15-2010, 11:29 PM
Parent: #10
Quote: عمنا :- منغعلا لا لا لا وقف بلاش كلام فارغ قال رجلة قال
دي ياخ البصل لحالو ملاح و اللحم لحالو ملاح و العدس
لحالوا ملاح و الشبت لحاله ملاح ... وقف دي خراب بيوت
قال رجلة قال |
لوووووووووووووووووووووووول بس اريتو يكون جاكم معرس ومنتهي
شكلو راجل جبار
|
Post: #12
Title: Re: يرجاء المساعدة في وصفة عمل طبيخ، رجلة وقرع
Author: rani
Date: 08-15-2010, 11:39 PM
Parent: #6
ماما دومة و ناذر ازيكم..
كدي خلوني احل مشكلتي اول وبعداك برجع ليكم واحد واحد.. المصيبة.. نسيت اقول..
عندي برضو اسود ابيض او بازنجان ابيض
الداهية دا اعمل فيهو شنو؟
ببيسوهو كيف؟
دومة نسيت اقول... انك ذكرتي الصواته كتير.. يكفينا الله شر الصواتة... غايتو حا امشي بي كلامك واصوتها لمن قلبا يقيف.. بس في النهاية انشاء الله ما تطلع لي مديدة رجلة.
ناذر مشتاقين.. بكون معاكم الشهر الجاي..
.
.
كتر من المعمورة.. بالمناسبة نسيت اقول رمضاااان كريم.
|
Post: #13
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-15-2010, 11:46 PM
Parent: #12
لووووووووووووووووووووووول الاسود الابيض
خللوه علي قول عادل املم
البازنجان الابيض والكوسه والفلفليه ممكن تعملهم محشي متل ما في الصوره دي
شغله متعب شويه لو تحب ممكن نشرحو ليك
|
Post: #14
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-15-2010, 11:52 PM
Parent: #13
| Quote: دومة نسيت اقول... انك ذكرتي الصواته كتير.. يكفينا الله شر الصواتة |
لووووول عارف يا راني حلتك او نوعها هو البحدد كميه السواطه
في حلل بتمسك لما تطبخ العدس وبيقوم يحرق والملاح المحروق الا تكبه في برميل القمامه
لو ما بتجب تحريك الحله كثير تقوم يا سيدي بعد تغسل الرجله ووتنشلها من المويه تكبها هي اولا وتقوم تكب العدس من فوق ليها وما تصوطها وتضيف شويه مويه بحيث يظل العدس متوسدا الرجله وتغطي الحله لكين اوعك تمش تقول تتفرج في التلفزيون ولا الانترنت ومره مره اكشف الغطاء عشان تشوف الحاصل اها بتلقي العدس داب
لكين بعد اضافه الصلصه والملح والبهارات ليس هناك اي طريقه لتفادي الصواطه والرجله البتكون مويتها كابه بالجنبه متل رجله المطاعم والداخليات ما جميله لازم العدس يكون مسكها تماما يعني ما تكون مويه غايتوا دي الرجله البحبها انا . الرجله بتحب البصل و لحم يعمل مرقه تمام يعني يكون فيها عضام ما تكون لحمه حمراء ساكت لو ما لقيت لحم بعضم ممكن تضيف بدل المويه مرقه لحم تكون جاهزه عندك .
|
Post: #15
Title: Re: يرجاء المساعدة في وصفة عمل طبيخ، رجلة وقرع
Author: خالد العبيد
Date: 08-16-2010, 01:55 AM
Parent: #14
سلام للجميع
| Quote: انت لقيت الرجله وين يا راني؟؟؟ |
عارفه يا دوما نحن اكتشفنا الرجلة هنا بي الصدفة
صديقنا الزراعي الجلاد لقاها قايمة بروس في الـ Backyard
وبالجد رجلة من النوع الممتاز
السودانيين هنا ماعندهم مشكلة مع الرجلة
اللستة بتاعتك حقت الاصناف البايخة
بتفق معاك فيها كلها
الا القرع !!
القرع البايت مع كسرة معجونة حاجة ما بتخلص !
المصريين عندهم مثل بيقول :
القرع لما استوى قال للخيار يا لوبيا!!
وبمناسبة الكسرة اسمعي دي:
قبل فترة اشتهيت كسرة بي موية وبصل وشمار
مشيت عملتها
ناديت وارف ولدي .. قلت ليه تعال اكل كسرة بي موية
بعد اكل ليه لقمة واحدة سألني بي انجليزي قح :
يابابا دي الكسرة عرفتها طيب الموية وينا!!
ورمضان كريم
|
Post: #16
Title: Re: يرجاء المساعدة في وصفة عمل طبيخ، رجلة وقرع
Author: doma
Date: 08-16-2010, 10:48 AM
Parent: #15
Quote: اللستة بتاعتك حقت الاصناف البايخة
بتفق معاك فيها كلها
الا القرع !!
القرع البايت مع كسرة معجونة حاجة ما بتخلص ! |
لووووووول يا ود العبيد يا اخي القرع دا من شده ما كريه بتلقاه الخضار نمبر ون في ملحات البكيات
واصلا لو ما تمت معالجته بكسره مره ومويه وليمون وشطه واتعجن ما بتبلع.
بمناسبه انجليزي اياس انت متاكد انه انجليزي ؟؟
غايتوا مابعرف بتفهموا الاستراليين كيف ؟؟
شهر سته الفات دا لقيت استراليه تكون ستينيه كدا ومعها راجلها حايمين في سوق اسمه سوق الحرير في بكين وهو طبعا عباره عن مبني ضخم فيها خمس طوابق وكميه خياليه من المعروضات وعنده عده مداخل المهم الجماعه ديل لقيتم ليك بسالوا في البائعات وزول فاهم حاجه ما في قربت منهم قلت يمكن اساعد سالتها لو ممكن اساعدها
قالت لي وير اذ ذااااااا ماين انترانس
تصدق لبرهه ما عرفت هي بتقصد شنو ردتها كثير قلت ليها
can u spell it please
once she started em.,aye I got it , she was asking about the main entrance , actually her pronounciation sounded like: mine entrance
|
Post: #17
Title: Re: يرجاء المساعدة في وصفة عمل طبيخ، رجلة وقرع
Author: محمد المعتز جعفر
Date: 08-16-2010, 03:46 PM
Parent: #16
ماما دوما والله تسلمي كتير .. ياخ علي الوصفة طبعا أنا عندي خلفية وهواية في الكلام دا وبعرف اعمل حاجات كتير لكن التحدي الكبير بالنسبة لي كان ملاح الرجلة بالعدس والكسرة .. وكمان القرع.. يديك العافية شجعتيني وقمتاليك هب علي المسألة وجننتها ليك جن وطلعت مباااااااااااااااالغة عارفازيدي للمقادير بتاعتك الفوق دي شوية خل أبيض وشطة خضرا مسحونة ..
بعدين نظرية أخونا ناذر دي بتاعة معلمين حقت تقفل البريستو لي تاني يوم وماتفتحو ولا حتا تجخوا .. يا أخوانا الحلة كدا بتسبك وبتعمليها حبة تفاعلات كدا والكيميا بتشتغل.. وبتجننا جن ياسلام ياخ والله يا ناذر رمضان دا نعمة لانو بوريك عظمة حاجات كتيرة..
عارف ياناذر انا حا امشي مطعم هندي وحا اطلب المصيبة القلتها دي بتاعة قراصة الرز دي ولو طلعت ماسورة مابخليك
|
Post: #18
Title: Re: يرجاء المساعدة في وصفة عمل طبيخ، رجلة وقرع
Author: ناذر محمد الخليفة
Date: 08-16-2010, 04:01 PM
Parent: #17
محمد المعتز ...
| Quote: عارف ياناذر انا حا امشي مطعم هندي وحا اطلب المصيبة القلتها دي بتاعة قراصة الرز دي ولو طلعت ماسورة مابخليك |
والله حاجة ما تخلص يا مان ..
والفاخرة منها إسمها إدلي رافا .. دي كمان بالخضروات المحدقة الهندية تاكلا وتاكل المعالق بي وراها ..!!
|
Post: #19
Title: Re: يرجاء المساعدة في وصفة عمل طبيخ، رجلة وقرع
Author: Elawad
Date: 08-16-2010, 07:24 PM
Parent: #18
الأعزاء راني و دوما و بقية الضيوف... رمضان كريم.
في حالة عدم توفر الرجلة يمكن استبدالها بالسبانخ. زوجتي تقوم بطبخه والله ما تعرف إنه ما رجلة إلا يكلموك. وألذ حاجة نحن بنسميه ملاح رجلة على قول أخونا محمد E سليمان أحمر شفايف اخضر.
|
Post: #20
Title: Re: يرجاء المساعدة في وصفة عمل طبيخ، رجلة وقرع
Author: اسماء الجنيد
Date: 08-16-2010, 07:30 PM
Parent: #19
| Quote: على قول أخونا محمد E سليمان أحمر شفايف اخضر. |
لوووووووووووووووووووووووول العوض اخوي ازيك ياخ وكل سنة وانت طيب يابا
والله انا زي اختي حرمكم المصون دي اطبخ السبانخ في حالة عدم وجود الرجلة
تحياتي لك ولها وتصومواو وتفطروا علي خير
صاحب البوست الاخ راني ازيك ورمضان كريم
انا زي ناذر اخوي ده جني وجن القرع
لكن الرجلة بجيها ليك كان ما وصفت ليك ست الناس ماما دوما
بالهناء ان شاء الله
الحبيبة ماما دوما رمضان كريم عليك يا طويلة البال يا حنينة
يا حليلك يا دوما الكلك طيبة
ان شاء الله تلقي مرادك
وتصومي وتفطري علي الف خير ان شاء الله
كل عام والجميع بالف خير
|
Post: #21
Title: Re: يرجاء المساعدة في وصفة عمل طبيخ، رجلة وقرع
Author: Elawad
Date: 08-16-2010, 08:24 PM
Parent: #20
و لك كل التحايا الأخت الكريمة أسماء و ربنا يعيد رمضان عليك و على أسرتك بكل خير إن شاء الله.
|
Post: #22
Title: Re: يرجاء المساعدة في وصفة عمل طبيخ، رجلة وقرع
Author: Hamid Elsawi
Date: 08-16-2010, 10:42 PM
Parent: #21
باين رمضان عامل فيكم عمايل مهببة
ده ما كان صيام يا راني ال خلاك تكورك
رجلة ... قرع ...و الحقوني
تصوم و تفطر علي خير يا صديقي
و كل عام و انت بخير انت و ضيوفك المتجرسين ديل
دي جَرسَة اسفيرية موثقة
رمضان كريم
ــــــــــــــــ
|
|