أوسلى .. أبو الحسين .. ومن لف لفهم ... رجاء وطلب بسيط ..!!

أوسلى .. أبو الحسين .. ومن لف لفهم ... رجاء وطلب بسيط ..!!


03-15-2007, 02:08 PM


  » http://sudaneseonline.com/cgi-bin/sdb/2bb.cgi?seq=msg&board=283&msg=1184848973&rn=0


Post: #1
Title: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-15-2007, 02:08 PM

معليش من حكاية ( ومن لف لفهم ) دى .. بس شايف اليومين ديل سوقا ماشي ........ :



بس محتاج لى شوية أغانى للرائع ود النصري ..
قدر ما فتشت و قوقلت مالقيتهن ..
والله كنت محتفظ بيهن في ملف جاء ضيف ابن ستين فتلة لعب في الجهاز وغطس حجرهن ..

( فراق قلبين ) .. ( السراب ) ... ( بنيات الجرف ) ... ( لا تنجع ) ... ( صبرية ) ... ( الشمات كفاية على )

أها ....... ياتنزلوهن ولا مسكونى الدرب ليهن ..!
واكون شاكرا ....











Post: #2
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: ملكة سبأ
Date: 03-15-2007, 02:27 PM
Parent: #1

سلامات طاهر
ونحن يانا من لف لفهم زاااتنا .. ديل الاغاني ولو داير الدرب برضو نديك ياهو



فراق قلبين


بنيات الجرف

لا تنجع

صبرية

ياشمات كفاية

Post: #3
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: ملكة سبأ
Date: 03-15-2007, 02:39 PM
Parent: #2



Post: #4
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-15-2007, 02:44 PM
Parent: #1

ياسلام عليك ياملكة سبأ..

الله يفرحك في الدارين ................
والله ماقصرتى ..وفيك الخير ... أوسلى ذاتو مافاضي من مطاردة تراجى وبشاشا ........
كده يادووووووب نهارنا أبيض .....





بلا أوسلى بلا أبوالحسن ومن لف لفهم .............



شكرا بعدد حروف روائع ودالنصرى

Post: #5
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: عبد المنعم سليمان
Date: 03-15-2007, 02:52 PM
Parent: #1

لا اغنية عندي اهديها ولا مال فقط اهديك صديقنا الطاهر هذا البوست عسي ان اكون من الدالين

ع فعل الخير وتكون انت من الخيرين الذين يامرون بالمعروف وينهون عن المنكر :

الاخ مهند مامون أنت تتجني على ابي ذر الغفاري وأسرته والناس أجمعين !


احترامي

منعم

Post: #7
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: ملكة سبأ
Date: 03-15-2007, 03:11 PM
Parent: #5

والجرح امتد بينا
لزمان الآهة تاني !

Post: #6
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-15-2007, 03:08 PM
Parent: #1

حرام عليك يابيجو ياخى
بلاهى عليك البوست ده بيحتمل متل عمايلك دى ...؟؟
عمايلك دى هى المبيتانا الليل قوا ..!!

الله يسامحك .......... يامن لاترى في الوجود الا العكننة ..........
ورحم الله اباذر حيا أو ميتا ..
وغفر لمهند صادقا كان أو كاذبا ..

Post: #8
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: معاوية كرفس
Date: 03-15-2007, 03:32 PM
Parent: #1

.

الأستاذ/ الطاهر ساتي

تحياتي

أنا بعتبر روحي من فئة من لف لفهم

وبعدين إنت بتسأل من زول غالي عندنا شديد

اديك نصيحة بنقولا نحن بناتنا

( ود النصري لو باريتو بيكتلك )

لكن غايتو انت مخير ..

وكمان موش غنية غنيتين

انا أوصف ليك دربو عديل

تمشي تلقي كل غناهو هناك

النزل كاسيت في السوق

و كمان الحفلات والفديو برضو

بس كبر طرفك

و أضغط اللنك التحت دا

منتديات محمد النصري

غايتو أنا حزرتك وشيل شيلتك


ودي
م.كرفس

Post: #12
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-15-2007, 07:02 PM
Parent: #8

معاوية .......

Quote: ( ود النصري لو باريتو بيكتلك )



انت عارف يامعاوية ود النصري ده عمل نقلة في أغنية الشمال مافى زول سبقو فيها
كدى خليك من الصوت ..
ركز معاى في اللحن ...
ياخى أغانى حميد دى في فنانين كبار مابيقدرو يقروها ساكت من الورق جا النصرى روض الاشعار دى ودخلها في بيت الطاعة واتلحنت ..
و الشي المدهش ربط اللحن بالآداء ... يعنى الله اعلم انو النصري ده يتقلد زى باقى الفنانين لانو عندو آداء خاص بيهو ..
ياخى ده لمن استضفناه في منبر الصحافة مع وردى أجبر وردى يتكلم عنو نص ساعة وغنى معاهو وطلب منو يغنى اغانى محددة وردى حافظها .. ولمن وصل حتة معينة في أغنية مطر الحراز وردى اتبكم مرة واحدة و بس قعد مدقر راسو وماسك ليهو المايك لحد ما انتهى ...

غايتو شئتم أم أبيتم ومع احترامى الوافر للنعام وادريس وكرم الله وجبارة وعبد القيوم و يعقوب والبركل و أرقى وكلهم ...... الزول ده فات الكبار والقدرو ...


وتحياتى ليك .....وشكرا يا كرفس على الكنز ده

وكدى اتعمق فى نضمى حميد ده ...

..............
.............
بنيات الجرف
كلم بنيات الجرف وكل البنيات من طرف تتبري من بحرا غدر
اتغاب ما راع الولف صاد الاخيتين بغدر
ليك حق يعافيك الحراز واليصطفيك طرفي وعشر
يامتوك الناس العزاز نابع قليبك من حجر
ما بتنفع انت بلا الخريف الصاقعي والريح والمطر
تنزف نزيف ما يحوش قيف لا من يقولوا عليك خطر
ما ظن نخيلك هز فوق سيرت عريس نازل البحر
ما طالة موجك ما بيضوق لا يضوق الناس غير كدر
عودنلو قشكن النشف يدغي ورويسات السعف
مكسور خويطره في قحف
ترغي وتسف ملح الأسف
عودنلو والسنبر برق جنحاتو بالأشواق سحر
قاصد جريف ود شيخ يخف لي مويته من دون البحر
والليلة زي غيما رعف حين طال علي ريح السفر
يا حليلو زينا ما عرف جوز القمريتين طفر
يا دنيا يانا ربات كتف ا
رغم الفجائع لا رجف
لا قال عوارضي أبت تخف
في بألو كم تاريخ سلف
لوكأن يشيل في الموت زرف دمعات أسى وحرقه أسف
آو بالعلي الحال يعترف كان عن رسول الله وقف
كلم بنيات الجرف وكل المكاليم من طرف
هي الدنيا كلها كم حرف لمن يطول فيها الأسف
هي الدنيا كلها كم حرف لمن يطول فيها الأسف

Post: #17
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: معاوية كرفس
Date: 03-16-2007, 01:55 AM
Parent: #12

.

عزراً تكرر من حد الإندهاش ..


.

Post: #18
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: معاوية كرفس
Date: 03-16-2007, 01:58 AM
Parent: #12

.

الأستاذ/ الطاهر ساتي

سلامات

تعرف أنا مندهش ( زي الرشة وادي البنية )

لأني تعرفت عليك قريباً ككاتب صحفي

و هذا بسب موضوعي خاص بي أنا و ليس لك دور فيه .

و حينها إندهشت ما بين ما تكتبه في الصحافة

و ما بين ما وصلني بأنك إسلامي و لديك علاقة ما

بالسلطة أو بما كانت قبل أن تصبح سلطة و تتفرع ،

وصرت أتابع كتاباتك كلما أتيح لي ذلك

فوجدتك لا تشبه العفن المكرن فينا من عهد عاد ..

طيب لغاية هنا الحكاية دي عندي معقولة و ما معقولة

تقوم تجي و تطلب أغاني لمحمد النصري

و كمان تكلمني عن إختيارو للشعر و ألحانو

و صوتو .. ياخي هو في صوت زيو .

وكمان جبت لي سيرة حميد

لا وكمان حديثك عنو - حميد - حديث المعجب

و المستمتع و الفاهم مقاصد شعر حميد

( يا زول إنتا طبيعي ولا عايز تجنني أنا ولا شنو )





ودي
م.كرفس
_____________________________________

شفت البحر دا عمل شنو في التويمات ديل ؟



Post: #19
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-17-2007, 08:24 PM
Parent: #18

معاوية

نهارك زى نهار أمى البتحلب والحميل لاواى
واخوى يفتلو في عشميق محصلبو السويق الجاى
وابوى داخل على الديوان يكورك : ياولية الشاى
( يا زول إنتا طبيعي ولا عايز تجنني أنا ولا شنو )


نهارك طيب ياكرفس ......

Quote: ( يا زول إنتا طبيعي ولا عايز تجنني أنا ولا شنو )


حبيبنا ..
اركان الشعر العامى في السودان أربعة
حميد .. القدال .. الدوش .. هاشم
وأى زول تانى يقول ليك أنا شاعر ولا كدة ماتقول ليهو اقرأ لى شعرك .. لا .. قول ليهو اقرا لي شعر الاربعة ديل .. لو قال ليك ماحافظ اخصم من شاعريتو 50 في المية .. وجيب ليهو قصيده ليهم وقول ليهو يلا اقراها.. وتابعوا .. لو اتلكلك في الاملاء ولا في القراءة طوالى اخصم شاعريتو ال 50 في المية التانية ..!!
لمن غادرت دنقلا ومشيت ثانوية المرين بالهلالية أخوك كان عجمى عدييييييل
يوم استاذ ابراهيم خلف الله قبضنى مدقر راسي في الزير وبشرب موية زى ماكنا بنعمل في جدول الحواشة في البلد وقام سألنى من اسمى قلت ليهو " التاهر " ساتى .. ضحك وقال لي انت من وين قلت ليهو من دنقلا .. قال عشان كدة ..!!
مزمل صاحبي قال لى الزول ده ماضحك عشان لقاك مدقر في الزير .. قلت ليهو أها .. قال عشان قلت " التاهر "
اتعقدت وزعلت وقلت يازول اخير اتخارج من المدرسة دى وارجع البلد لكن بعد ما اخد حقى وتوووووووووش دخلت ليهو في المكتب وسألتو انت ليه تضحك على اسمى يااستاذ ..؟؟
راسو شطب ..
واحتار انو يقول شنو ..
وبعد كم ثانية قال لى انت عندك رغبة تفك عجميتك .؟؟ قلت ليهو لا ..
يبدو لى فهم انى حكايتى دى ماداير اجيباالبر
بهدوء كدة قال لى شوف يا ساتى .. تعال نعمل صفقة .. انت تعلمنى رطانتكم وانا بالمقابل بديك قصائد تقراها تحفظ منها الدايرها .. وطوالى ناولنى ليك كراس دبل مكتوب بخط اليد ..
ومن اليوم داك بدت علاقتى بحميد والدوش وهاشم والقدال ...
استاذ ابراهيم ده - الله يطراه بالخير هسة بقى مشرف - كل شهرين تلاتة كان بيدينى عشرة جنيه عشان اشترى ورق بوستر واقلام شينى واطلع جريدة حائطية نصها أشعار ..
السنة الفاتت لاقيتو في بنطون الجنيد ولحد ماعدينا كنا بنبكى و الناس بيعاينو لينا بحزن جا ميرغنى ود بارا صاحب أبوى - بيبيع خضار جنب المرسى في الشاطئ الشرقي - جا قال لينا ياجماعة وحدو الله كل من عليها فان زولكم ده ادوه الفاتحة .. حتى قدرنا نضحك ونتونس ..
يا سلام عليك ياابي واستاذى ابراهيم ربنا يديك الصحة والعافية وراحة البال


معليش يا معاوية سرحنا بيك ..
المابيحب حميدو قدال وهاشم والدوش مابيحب الناس ولا الحياة



Post: #9
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: ناذر محمد الخليفة
Date: 03-15-2007, 04:27 PM
Parent: #1

الطاهر سلامات ..

Quote: أوسلى .. أبو الحسين .. ومن لف لفهم ... رجاء وطلب بسيط ..!!


ياخي والله أنا نفسي أعرف جملة (من لف لفهم) دي معناتا شنو !!
هم لفو شنو بالضبط ؟!!

Post: #10
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: Muna Khugali
Date: 03-15-2007, 05:43 PM
Parent: #9

Quote: ياخي والله أنا نفسي أعرف جملة (من لف لفهم) دي معناتا شنو !!
هم لفو شنو بالضبط ؟!!


يعني الواحد يكون لافي كده..يقوموا التانيين يشوفوه بيلف..يقوموا هم ذاتهم يلفوا زيه...

لكل مجتهد نصيب..

سلام لصاحب الدار

Post: #14
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-15-2007, 07:14 PM
Parent: #10

عزيزتنا الغالية منى خوجلى

سعيد والله بوجودك في الجو الطروب ده

وربنا يسعدك دائما

Post: #13
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-15-2007, 07:09 PM
Parent: #9

طبعا ياناذر انت في البوست ده زى الاطرش في الزفة ......
خليك في عودك ده .. ده وترا انت ماعندك ليهو احساس ........
شايفك بتعلم تبلدينا الجيتار بقومة نفس وشد عروق ..
بلاهى لمن تجى تعلمو الاورغن ركب ليهو انبوبة اوكسجين ...... مايقع يموت ليك كمان يدفعوك دية القتل الخطأ ...

واظهر وبان ......

Post: #11
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: ناذر محمد الخليفة
Date: 03-15-2007, 06:46 PM
Parent: #1

منى خوجلي ..

Quote: يعني الواحد يكون لافي كده..يقوموا التانيين يشوفوه بيلف..يقوموا هم ذاتهم يلفوا زيه...


كمفسر الماء بالماء

Post: #15
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-15-2007, 07:26 PM
Parent: #11

شوف عيوشة حميد دى دنيا بحالها كيف ...... تقول لى الفاتح حمدتو .....؟


عـــيوشة

منبوشة .. منبوشة
نبشوها قبالك .. بت حالا زي حالك
ذي كلمة مربوشه
عودها إنبعت حرقان .. زي شتلة معطوشة
عينيها رماشة .. أم لمبة فتاشة
من طاقة جاتا الريح
كتر البكا .. التجريح
خلاها دعموشة
تلوشة .. ولا ضفاف
خيم عليها جفاف
زي صرخة الغرقان فوق موجة بين فيضان
شعراتا منفوشة
وشفع مبارياها .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
وترقص لهن رقبة ، صقرية ، جابودي ، السامبا .. كاروشة
عيوشة .. جامايكا .. الهورس عيوشة .. اسلولي عيوشة
وعيوشة ما بترقص .. لكنها الدوشة
وتفلت من الشفع
في الفلتة تترتع ..
تدخل على بيتاً .. ستاتو منمدِّي .. ناساً بعرفوها
لكن بعافوها
دايرين غسيل عدي .. شاكرين يا دقلوشة
ويدوها عيشايي بي دمعة مرشوشة
وتنملك الشارع .. خطواتا مربوشة
السوق مع الأطفال .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
على قدر ما كاست .. عينيها ما لاقت غير مطبقة وبصلة
المطبقة انهردت .. والبصلة مقروشة
ما قلنا مقشوشة
قشوها قبالك .. ديشك يا عيوشة
يا الحاضر الغايب .. في الدنيا ما جايب خبر المدينة الكان
على رغم ما فيها من فاقة من حرمان
مرات اياديها تعطف على الإنسان
بي فكة في قروشا
بي كلمةً طيبة .. بي فضلة في مطعم او برتكانايتاً ضرباني في كوشة
والليلة بانت زي .. بيتاً في آخر الحي .. ناساتو منبوشة
يا جرحنا الهايم .. طول النهار حايم
يلبد إذا ما شاف صحبانو مكشوشة
يضحك إذا الكومر .. قبل على كوبر
ولا المديرية .. ينمطق الفرحة .. بس فرحة مغشوشة
إن تنجا من كشة .. دردير وتلتيلة ..
كيف تنجا من جوعة .. من بردها وليلا
عزت برنداتا واوكارها مطروشة
بيت الله قافلنو
مستشفى غافرنو .. ساحاتو مرشوشة
كم يوم يعز النوم
رغماً عن المشموم .. والدوخة والدوشة
دي مدينة ما هيلك
مافي البيشبهلك .. ما في البناديلك
لافي البخاويلك
غير ناس أحاويلن قطعن أحاويلك
أصحابك الساعتك لا بد يعاينولك ..
صمتاً يجيبولك
باكر تلاقيهن .. في وجبة فوق كوشة
جنب مجرى يحكولك
ودونا لي ضابط .. كالعادة وانكفرن قال وين أوديهن
والعندي ما قادر بالموية أكفيهن
والعسكر أدونا
سوطين وفكونا
كالعادة يا اخونا .. حيكومة مربوشة
دايرين شغل .. مافيش
غير نغسل العربات غير نضرب الاورنيش
عتالة .. جرسونات .. شغلاً ما يوكل عيش
وبالحالة دي الكشة
بلدية والبوليس ... مرات يجيك الديش
ما يقبضوا الباعوض .. ما يقبضوا الضبان .. والما بدور فتيش
الارزقي السمسار .. إشمعنى نحنا وليش
إحنا الحرامين ولا البدسو العيش
الزول يخاف يكفر .. يرجع يقول معليش
شقيش نقع شقيش .. حتى السجن مافيش
مافيش يا عيوشة
من تكبري آهة وآه
وآدم بدور حواه
الطيرة بي عشوشة
الفارة بي جحارة .. الكل بي مأواه
وهنا في إبن آدم تاه
ملجاه أرض الله
لا أوضة لا حوشة
يا أبونا يا الأسود
يا أمنا القرقد
يا داجي وين نرقد
جاك المحل قاسيت .. لامن هجرت البيت
فض المطر صديت ..
أو صددوك غصب
دارك لقيتا حرب
كرت عليك فريت .. كان مافي غير تنفد
بي لونك الأسود .. بي شعرك القرقد
وبي فالك الشامخ زي تاج أبو الهدهد
لامن يطير في الجو .. من ها المدن ينفد
حاشاك من عيب تب
لي شينة ما ختيت .. دغري وعراض إيديك
بس كفها إتعود في الأرض يرمي الحب
ما قنبلة وديناميت
جيت المدن لاقيت
من سيدا ما لاقيت
تحرس عماراتو .. علشان تمسي تبيت
ويتربو زي ما ربيت
كم للعرق شديت
زوغت أمن .. كريت
جاملت جاراتو
وأو تتم ترحل لي سيد خلاف السيد
يتغيروا الأسياد .. لكنو نفس القيد
نفس الربط ذاتو
يا ماشي دون راس خيت
وين كنت لما الناس إنقسموا ا
في مدن تجز الراس كان زولو ما طاطا
كت مافي ولا أبيت .. واصبحت مقطوع راس
زي ديل كتير من ناس لا أوضة لا ضل بيت
وفتحنا لاقيناك .. أول ما شالنا الحيل
بالراحة في ذات ليل
يا أبونا خليناك .. خففنا ليك الشيل
تقلت بنا الخرتوم
وفرنا لقمة عيش .. موية ومحل للنوم
سامحنا .. عافينا .. يا أصلنا الحنّان
غيرنا اسامينا شان نحيا باطمئنان
دينق إنقلب عثمان .. هاشم بدل دلدوم
من وين ؟؟
من ام درمان وناس بيتنا منوفين
بس لكنة الرطّان تفضحنا .. بعض الحين
وإن كنا يوم في يوم ماشين بننعوّد على لهجة الخرتوم
في ولاد عرب بالكوم
طالعين سوا ونازلين .. يفرقنا إلا النوم
ما الحالة من بعضا .. مطروش ومطروشة
وأكوان وقد قابل .. في كوشة عيوشة
يا التحكي دون تبكي .. وفي وشو بتعاين
شوف فيهو شن باين .. غير دمعة مقشوشة
قشوها ناس أخوان .. أكوان وعيوشة
بي صبر كم طول
على حال حا يتحول
قصر الزمان يا زول ولا الزمن طوّل
لا بد يتحول
ما فيهو من آلام .. في يوم من الأيام لي دنيا مفروشة
بالعافيي والطعام لي كل فم .. ما دام في غلابة بي ديوشا
وبجاي و بغادي قلة وكتر بوشة
تخمت حكام مندلدلة كروشة
فاوة وتفل لاقّي
ونار الغضب باقّي
تالاها محموشة
جرفت لبقة الليل وانطنبجت دينك لا عينا بي شموشة
الحال حا يتحول .. قصر الزمان يا زول ولا الزمن طول
لابد من فوقة .. ومن تنتهي الدوشة
قولاً قبل قلنا .. وكتين نصر نحيا مافي البكتلنا
قولك يا عيوشة .. يا اب نفس طماعة غاشاك ومغشوشة
الدنيا دنيانا
زرع إيدنا نديانا .. لا صيص لا كدموشة
وماك ماشي جيت غاشي .. ليك خيرها ينسبّل
لا كُتّي شحّادة .. نديك وتتوكل
لا جيتنا دنّاعة .. نمسح لك الجردل
أخرت للساعة وتلبت في حوشة
في حزك المنجل وشوالة مخموشة
ناسي انو مزروبة ..
بي شوق حبايبنا وحارساها كلوبة
وكلوبة بات ووبة .. ويات لوبة بتحوشة
يا النفسو ماهية
شن جبهة متكية
بي عمة كاكية .. وطاقية طربوشة
جنب جبهة دغرية .. العمة مكوية .. فوق راسها ملوية
ترقش بياض نية .. وبالهيبة منقوشة
زي وشم فوق أكوان .. شلخاً في عيوشة
يا جرحنا الطوّل
جاييك زمن طيب .. خيراتو ليك أول
صدقني يا طيب .. يا أرض يا جدول
كارتنو بي معول
والليلي تتجول .. عينيك مدهوشة
من كنت تتسول .. في مدينة ما هيلك ومن كوشة لي كوشة

Post: #16
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: ناذر محمد الخليفة
Date: 03-15-2007, 07:28 PM
Parent: #1

!!!!!!!!

Quote: بلاهى لمن تجى تعلمو الاورغن ركب ليهو انبوبة اوكسجين ...... مايقع يموت ليك كمان يدفعوك دية القتل الخطأ ...



Post: #20
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: تماضر الخنساء حمزه
Date: 03-17-2007, 08:45 PM
Parent: #1

يامبيتاني الليل قوا


شوايقة بكايين
فضحتونا مع باقي السودان

التعديل سااهي

Post: #21
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-18-2007, 02:11 PM
Parent: #1

والمشكلة ياالخنساء انو بكاهم الخاص ده بيبكى السودان كلو ..
لو حنيتم دى قسموها للناس ماكان في نفرين الدنيا دى بيفترقو من بعض ..
كلامى دا طبعا بعيدا عن " يامبياتانى الليل قوا " اللى انتى شرحتيها بعقلك الباطنى .......


بالمناسبة ..
عشان تجودى اشعارك لازم تقرى لحميد وقدال والدوش وهاشم
بتلقى عندهم الأفكار قبل الاشعار ...
تحياتى

Post: #22
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: تماضر الخنساء حمزه
Date: 03-18-2007, 02:15 PM
Parent: #21

ساتي
ياخي ناس حميد والدوش ديل لايُعلى عليهم
ديل أي شيتاً زين وسمح مابفوتم

Post: #23
Title: انا مانقدت حب العيون لمن يحاحيني الرمش
Author: ملكة سبأ
Date: 03-18-2007, 03:18 PM
Parent: #1


بقبقتـى بــى ريــح الـسـراب
فانـوس رؤاى والشـوق عطـش
وصقعالـى يداك السـحـاب
بـار البـروق أوعـاك تـطـش
ولا هسـة يــا بنـيـة الغـمـام
الــرش واديـــك مـنـدهـش
ليـش لا قبـض شــتل الـغـرام
لا طيـرو فـيـك سـوالـو عــش
نـوبـة المجـاذيـب اتـرخــت
ودرويـشـي ينـقـز مـنــدرش
وانـا روحــى تقـابـة بـخـت
ليـهـا الله لــى رب الـعــرش

***
يــا مبيتـانـى اللـيـل قــوي
ورجيانـي أجيـب ليـك الشمـس
طالقنـى فيـك عـكـس الـهـوي
وسابقانى بـى فسـراع .. وامـش
نقرشتـى قلبـى عشـان يـكـون
يـوم مهرجـان سعـفـك بــرش
وأنـا مـا انقـدت حـب العـيـون
لا مــن يحاحيـنـى الـرمــش
ساعـالـى نـامـوس الشـجـون
وحامانـى بـى غنواتـى اهــش
مابـيـن مـرايـات الـظـنـون
فيـك كـل مــرة بـلاقـى وش
بقبقتـى بــى ريــح الـسـراب
فانـوس رؤاى والشـوق عطـش
وصقعالـى يداك السـحـاب
بـار البـروق أوعـاك تـطـش
ولا هسـة يــا بنـيـة الغـمـام
الــرش واديـــك مـنـدهـش
ليـش لا قبـض شــتل الـغـرام
لا طيـروا فـيـك سـوالـو عــش
نـوبـة المجـاذيـب اتـرخــت
ودرويـشـي ينـقـز مـنــدرش
وانـا روحــى تقـابـة بـخـت
ليـهـا الله لــى رب الـعــرش
فـى الضلمـة لسـه بنـات نعـش
يابنـيـة بــارى العنقـريـب
ضـارب العريجـي حجـــر دغــش
فـى سـكـة الـشـوق الخبـيـب
إندهـدهـت راجــى الـهــواء
وعـود التباشيـر يـمـلأ طـيـب
يـنـفـخ مـزامـيـر الـهــوى
وعلـى نقـرة العشـق الرهـيـب
تـصـدح معانـيـنـا الـســوي
وتسـكـت زنـازيـن الوجـيـب
وانا بيكى يبقى الكـون نـدى
وكــل المـواسـم همـبـريـب
لا ريـدة تتحتـرب صـدا لا ظـن
حبيـب فــى حبـيـب يخـيـب
العمر بالبسمـة إبتـدأ والصرخـة
مـــا صـرخــة نـحـيــب
صـرخـة اريحـيـة ورضـــا
وأنا راضى بـي ذكـراك نصيـب
يا بنية ما اكتر من بشر
فى خير وشر يـخـتـى ويصـيـب
يسعدنـى اكونـك مــن مـطـر
مـا شــرط طيـنـك يستجـيـب
المهدى وين المنتظـر عـز الكـدر
غـيــر فــــى الـحـبـيـب
دي الـــكـــتـــمــــة
لوكـــشـــر الــمــطــر
حــوش الربـيـع الهمبـريـب .






Post: #24
Title: Re: انا مانقدت حب العيون لمن يحاحيني الرمش
Author: الطاهر ساتي
Date: 03-20-2007, 01:47 PM
Parent: #23

ملكة سبأ

شوفتى الزول ده حتى احزانو بيقتنع بيها وبيجد ليها تبرير مقنع
شوفى الكلام

( يا بنية ما اكتر من بشر
فى خير وشر يـخـتـى ويصـيـب
يسعدنـى اكونـك مــن مـطـر
مـا شــرط طيـنـك يستجـيـب )

البيهمو انو يكون ليها مطر وماهم استجابة الطين
يعنى هو راضي بهواه و راضي بعدم استجابتها برضو
.....
ود السفلة عندو كلام قريب لى ده لكن بموقف مختلف وفيهو تحدى
" ده الما القلب البيجرسو شوق .. قلب بالصح "
لكن بينى وبينك كلامو ده ذاتو نوع من الجرسة
بس جرسة زول نفسو عزيزة ..
مرة سألت خالد شقورى عن قصة " صبرية "
قال لى هى كواقع موجود في حياتنا ومابالضرورة تتجسد امام عيونا
لكن عليك امان الله يا ملكة انا صبرية رسمتهاشخصيتهافي خيالي
وكل ماامشي البلد والقى فرقان الحلب في طرف الحلة بيجينى احساس انو صبرية بتكون معاهم
افكر افتش فيها واخجل من الفتيش ..
وده يمكن القاصدو كرفس بان الناس ديل بيجننو البيباريهم ....
تحياتى ليك
وابقى واصل
العيون الفى انتظارك شوقا زى مطر الفواصل " شقورى + حنان النيل "

Post: #25
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: أبو الحسين
Date: 03-21-2007, 03:12 PM
Parent: #1

Quote: بلا أوسلى بلا أبوالحسن ومن لف لفهم .............



يجازي محنك يا الطاهر أخوي ...

الشئ أنا غايب لي كم يوم وأول مرة أشوف البوست دا...

الصبر اليبِل الآبريه ما عندك...

أها هاك كمية الجمال دا...

سوقني معاك يا الحمام...

قواسيب مودتي... ودي صورة ود النصري لزوم التوثيق...


أبو الحســـــــــين...



Post: #26
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: عبد المنعم ابراهيم الحاج
Date: 03-21-2007, 03:50 PM
Parent: #25

بوست شحمان



الا انا المحيرني


خالد شقوري صاحبي ده


زول كتاب من حوا


لي راس واقود

وصبرية..



وبعد ده كلو مسؤول دفاع شعبي


شفت المفارقات دي

ياساتي

Post: #28
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-22-2007, 02:21 PM
Parent: #26

عبدالمنعم ابراهيم ...
فعلا البوست شحمان .. لكن لسة جعان .. وكنا مفتكرين الشي الوحيد المابيابى الزيادة هو البحر
آتار الطرب برضو مابيابى الزيادة ..
مش كدة ..؟



ود شقورى ده ياخى زول جميل بشكل ..
اتحداك لو لقيتو يوم بدون ابتسامتو البتعرفا ديك ..
حتى لمن يكون مدور معاك قضية خلافية حدها الخصومة بتلقاهو برضو مبتسم ..


ومبدع بالجد ..
عندو قصيدة جهادية لمن يغنيها على اللحو حرم بتخليك تقرب تشيل سيفك وتبدأ الجهاد بجيرانك ..!!
اسمها " غنية للولد الرسالي " ..
حاول اسمعا مرتين
عشان المرة التالتة تمشي ترفع تمامك لشقورى في الدفاع الشعبي ..!!
أنا ماضدالعقل المبدع البيعبر عن أفكاره - أيا كانت - بأدواته الابداعية
لكن ضدالعقل الحجرى المابيقبل تعبير الاخرين عن أفكارهم بادواتهم الابداعية أيضا ..
بلدنا دى وسيعة يا الحبيب ..
وكذلك قلوب ناسا ..
و لو الافكار ختت الرحمن في قلبا ، كل فكر كان لقى براحو بدون ضيق ......


سلامى ليك






Post: #27
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-22-2007, 01:51 PM
Parent: #25

أبو الحسين ......
أخيرا يا الحبيب جيتنا بقواسيب محبتك ..؟
فيك الخير وتجيك العافية
بس عندى شوية أسئلة في سوقنى معاك ياحمام دى .
مطلع الاغنية دى حق منو .؟
سمعت انو حميد لقى المطلع وأكمل القصيدة .
وسمعت انو الشريط اتسحب من السوق بسبب صراع شاعر مع حميد .؟
وبمحاكم وكدة حميد اثبت ملكيته للقصيدة .
انت باين عليك زول قديم ياابوالحسين .. من سنة حفرو البحر ..
وبالتأكيد بتكون سمعت القصيدة قبل تلاتين سنة ..
كدى تعال ورينا الحاصل ..

مع قواسيب محبتى
تقاند مودتى

Post: #29
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: osly2
Date: 03-23-2007, 02:15 AM
Parent: #27

الانيق ود ساتى
غبار المعارك الاسفيريه حجب العيون من نور هذا البوست
وكما قال منعم انه بوست شحمان
انا بعذرى
ابو اللحسين مالو ؟

شايف ناس من لف لفنا ما قصروا معاك


الملكه
ما يقصرنبك الايام

ناذر الخليفه
تسيب ناس محمد سليمان ومن لف لفه
تجى تسال الطاهر المسكين دا من المعنى ؟

Post: #31
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-31-2007, 09:23 AM
Parent: #29

أوسلي ..
بركة الجيت .......
نصيحتى ليك في معاركك دى أعمل بحكمة شيخ البطانة أب سن
أب سن ده كان قاعد يوم في سوق رفاعة
جا واحد هلفوت اداهو كف ابن ستين كلب
رفاعة كلها انتظرت رد الفعل
شيخ العرب بكل هدوء مسك الهلفوت من يده
وقال ليهو : عليك امان الله مابسوى ليك حاجة بس ورينى المحرشك منو ..؟

شفت الناس الحكماء بيتعاملو كيف مع الهلافيت ..؟
دحين يا اخوى لمن تلقى ليك بوست مشاتر لبشبش ولا فحل نساء الشمال
اتعامل معاهو بنفس طريقة اب سن ..!!




ود النصرى احسن منو مافى ..
بيريح الوجدان وبيرطب الحالة النفسية ..
عقب كل معركة استمع للزول ده

Post: #30
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: ناذر محمد الخليفة
Date: 03-24-2007, 01:43 PM
Parent: #1

أوسلي ...

Quote: تسيب ناس محمد سليمان ومن لف لفه
تجى تسال الطاهر المسكين دا من المعنى ؟


عايزني أسأل محمد سليمان
والله كدة يا دوب البكون لافي معاهم لفهم

Post: #32
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: الطاهر ساتي
Date: 03-31-2007, 09:32 AM
Parent: #30

ناذر ........

الفيك اتعرفت ...!!
واياك تقول لى مالك .. في شنو ..؟
بفضحك هنا .........

Post: #33
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: نادر
Date: 04-04-2007, 08:31 AM
Parent: #1

البوست السمح المدهش ده يمشي فوق
شكراً يا أستاذ الطاهر ساتي على هذا الامتاع والتجلي

Post: #34
Title: Re: أوسلى .. أبو الحسين .. ومن لف لفهم ... رجاء وطلب بسيط ..!!
Author: هاشم الحسن
Date: 04-06-2007, 06:47 AM
Parent: #1

وعلـى نقـرة العشـق الرهـيـب
تـصـدح معانـيـنـا
الـســوي
وتسـكـت زنـازيـن
الوجـيـب

********
بالله عليك،
و عليك اللـــــه
شوف
جنس الشعر و الغنا الفوق دا!!!
.
.
.
و جنس الرجالة دي!!!
(وتسـكـت
زنـازيـن
الوجـيـب)

.
.
.
صفا...
إاااااااااا...... نتباهـ
.
إلى جهة
الحنـــــــــــــــــــــــــــان
دُر.
.
.
.
.
.
معتداااااااادل مارش...!
.
.
إنتباه...!
.
و خليــــك كما (أنت)



يا
الطاهر




أو أقرب قليلاً....