قصه .. طه وريا مع ودكين ..

قصه .. طه وريا مع ودكين ..


02-20-2010, 01:00 PM


  » http://sudaneseonline.com/cgi-bin/sdb/2bb.cgi?seq=msg&board=260&msg=1266667204&rn=0


Post: #1
Title: قصه .. طه وريا مع ودكين ..
Author: محمد طه الحبر
Date: 02-20-2010, 01:00 PM

قال طه :
أخوك يا ريا اخوك وكت الخيول يدبكن
أخوك يا ريا اخوك وكت الرماح يتشبكن
أخوك جبل الثبات وكت القواسي يحبكن
كم بكيت وكم قشيت دموع الببكن
قالت ريا :
وراك أسود علي ما نمت اسمع طيب
قال طه :
بسم الله قولي أخو طيب طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب

الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس أنا ما بخافو لقاهو
ياليت الحلم في صحيا كان بلقاهو
قالت ريا :
كعب نوم النهار أمس العصير كنت نايمه
رأيت قدام الفريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه
قال طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه

قالت ريا:
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها
وقعدت ريا تبكي:
رد عليها طه وقال :
ما بفيد البكاء وكلامي احسن تنسي
قالت ليه ريا :
كيف ما أبكي وكيف أفوت مراتع أنسي
افقد كل شي عزي ورجالي وانسي
تطلق فوقي نار عقبان تقول لي أنسي
كنا في سيرة لقاء طه وريا وهم بيحكوا لي بعض قصة الحلم
قال طه :
فال الخير أخير ما شفنا شيناً جدت
كلا لشفنا أحلام في طريقه إتعدت
قبل الليلة إيد لحمان قطْ ما اتمدت
ما بنهد شرفنا لو السماء إنهدت
قالت ريا :
خير إنشاء الله خير والخير مساك وصباحك
والفال السمح فالك يضوي مراحك
بالضيفان أشوف عامر تملي مراحك
شينك ما أشوف وأشوف هناك و أفراحك

قال طه :
خير الزول يقول مهما الامر يتهول
قالوا الناس علي فالو الحلم يتأول
غاية الحي فناه إن كان قرب إن طول
يترك ذكرو والناس الوري بتتقول
قالت ريا :
وريني الحلم التورك مذهول
قال طه :
أصبري لي أروق حبل الفكر مبهول
احكيلك شنو الشفتو والله مهول
شفت الوحده شفت النار وشفت الهول
أحكيلك تمام الشفتو ما بتغابه
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تقابه
قدر ما نشوف قدامنا نلقي حريق
وقت النار علت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق
فترتي قعدتي , انا محتار جلست وراكى
حاقبه الدرقة ختيت سيفي فوق أوراكى
وكت بعد البهم لى قسعو قمتى براكى
غسعتي وجيتي ومعاك كور صقور تبراكى
تبت بي عجل شافنى جفلن و طارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عينني وغارن
سل السيف ولاقاهن أخوك يالضامره
تور عنز أم هشيم الفي المجامع دامره
سيل تلوى اندفق فوقو السحائب هامره
حجر الصاقعه فرتاك الصفوف العامره
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن
قالت له ريا :
عارض ومات خلاص لي الليلة يمكن عفن
بعد ان بدأ طه يطمئن ريا اراد ان يقطع الشكوك والمخاوف من تحقق هذا الحلم بالزواج من بنت عمه ريا فقال :
نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا
بطال البعيش في الدنيا اصلوا غناه
ان كان مالو راح غير اهله مين يدناه
سمح البفوق اساس ابواتو تمه بناه
والزول دون قبيله غناه شن معناه
ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا
كل بطحاني يفرح بي عرسنا مناه
ساعة جمعتن بيتنا يتم بناه
عذاب عيش العزب يا ريا مر ضقناه
سمح الزول صبي يلد ويربي جناه
طبعاً ريا ما قبلت الكلام ده لانو ابوها عبد الله المعروف بابو كبس ما تمّ سنه من وفاته والناس في حالة حداد فقالت :
ده الاعوج تراه والشين نهايه حدو
إن شاع ده الخبر يملا الفريق لي حدوا
يقولوا ابكبس من دخل ود احدو
فرحوا وعرسو لا موجعن لا حدو

إن كان في الفريق ماتت مريه ذليله
لي الحول يرفعوا العرس الدخلتوا الليله
خليه ابكبس راجل الرجال ودليله
إن كان بي قبيلة تعدوا تبقي قليلة
خليه الكلام وعرسنا في ده الحال
من بالك أمرقو محال والف محال
علي ميتت ابوي لي الليله حول ما حال
نصبح بكره ونسه وبهادل حال
رد عليها طه وقال ليها :
الموت ما شمت غاية البخود والببروا
والموت والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا
بنخاتر منو الوجعه هيلنا برانا
نحن أهل المصاب والناس عزا مجابرانا
في آخر المراح دايماً تجي الفترانا
عادة الحد ندوسا والناس عقب تبرانا
بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد :
فقالت :
الناس بالمكارم والفعال بتباهو
زي الفطرة ينشا الزول حسب مرباهو
عادة جدو عادتو ونحل ابوه نباهو
يلبس ثوب قبيلته ان داره ولا اباهو
من الليلة حول مضيوه تاني اتكلم
الدايروا بيتم رب العباد ان سلم


يتبع

Post: #2
Title: Re: قصه .. طه وريا مع ودكين ..
Author: كمال سالم
Date: 02-20-2010, 01:05 PM
Parent: #1

أيوه خليك كده عندك شخصيه .

Post: #3
Title: Re: قصه .. طه وريا مع ودكين ..
Author: محمد طه الحبر
Date: 02-20-2010, 01:08 PM
Parent: #2

الله يجازيك ياكمال

تحياتي

Post: #4
Title: Re: قصه .. طه وريا مع ودكين ..
Author: بشير أحمد
Date: 02-20-2010, 01:16 PM
Parent: #3

الاخ/محمد طه

تحياتي ؛؛؛

ياخي مغروض في قصة طه وريا ودكين ضروري ؛

بالصوت لو أمكن.

Post: #5
Title: Re: قصه .. طه وريا مع ودكين ..
Author: محمد عمر الفكي
Date: 02-20-2010, 01:24 PM
Parent: #4

غايتو يا محمد قلنا نخش نسلم عليك قبل عكاكيز حيدر الزين وعمك وهبة ومزمل خيري يدبكن فوق روسنا في البوست دا.
قصيدة جميلة ارجو ان تدندن بها وانت تحلق في الاعالي، صدقني بتقطع لك فرقة ما هينة تب.

Post: #7
Title: Re: قصه .. طه وريا مع ودكين ..
Author: محمد طه الحبر
Date: 02-20-2010, 01:33 PM
Parent: #5

محمد عمر تحياتي

والله بتقطع لي فرقه

لكن الجماعه الطيبين ديل اذا هابشوني

مابتحلو مني الا بباقه سمن

Post: #8
Title: Re: قصه .. طه وريا مع ودكين ..
Author: محمد طه الحبر
Date: 02-20-2010, 01:42 PM
Parent: #7

تسجيل صوتي لقصه طه وريا

الجزء الاول

طه وريا الجزء الاول

Post: #6
Title: Re: قصه .. طه وريا مع ودكين ..
Author: محمد طه الحبر
Date: 02-20-2010, 01:24 PM
Parent: #4

الاخ بشير

تصدقني فقدت كتاب الطيب ضحويه

وانا ايضا ابحث عن تسجيل صوتي لها

واعدك انشاء الله اجمع بيهو

تحياتي

Post: #9
Title: Re: قصه .. طه وريا مع ودكين ..
Author: كمال علي الزين
Date: 02-20-2010, 02:10 PM
Parent: #1

(*)

كده إنت ممكن تكون كاتبي المفضل بالجد ..

سأعود ..

Post: #10
Title: Re: قصه .. طه وريا مع ودكين ..
Author: على محمد على بشير
Date: 02-20-2010, 03:03 PM
Parent: #9

بوست حلو يا الحبر

ياريت تواصل فيهو ..

Post: #11
Title: Re: قصه .. طه وريا مع ودكين ..
Author: Elbagir Osman
Date: 02-20-2010, 03:40 PM
Parent: #10

من المهم تثبيت إسم المؤلف

الشاعر المسرحي إبراهيم العبادي


وفي إنتظار بقية المسرحية


الباقر موسى

Post: #12
Title: Re: قصه .. طه وريا مع ودكين ..
Author: محمد طه الحبر
Date: 02-20-2010, 04:40 PM
Parent: #11

البوست دا بحتلوهو اولاد العز

Post: #13
Title: Re: قصه .. طه وريا مع ودكين ..
Author: خالد علي محجوب المنسي
Date: 02-20-2010, 06:25 PM
Parent: #12

أخوك يا ريا اخوك ساعة الخيول إيدبكّن
أخوك يا ريا اخوك وكت الرماح يتشبكّن
أخوك جبل الثبات ساعة القواسي يحبكّن
كم بكيت وكم قشيت دموع الببكّن

قالت ريا :
وراك أسود علي ما نمت هسع طيب

قال طه :
هي بسم الله قولي أخو طيب وشديد
حاضر قلبي ماهو مغيب
إلا الشفتو في النوم من هوايلو يشيّب
الزول في الصحي مخدوم وعليه شقاهو
وإن غمض شويه تجي الهموم لاحقاهّو
الموت في ام لبوس أنا ما بخاف لقاهو
ياريت الفي الحلم في صحيا كان بلقاهّو
كان خير ولا شر برجاهّو مابهم بالي
وحارسني الثبات من الكُبار قُبالي
وكت هسي حسيت وشفتك سالمة قاعدة قُبالي
كان إتلخبت الكون تاني ماني مبالي

قالت ريا :
كعب نوم الضحى أمس العصير كنت نايما
جيت قدام فريقنا أشوف لي صقوراً حايما
كبيرن غار علي من نومي تبيت قايما
صحيت مهجومه لا مفصل ولا في قايما

قال طه :
حت انتي رأيتي صقور عباره غريبه
علامتا كافية ظنيت الحكايه قريبه
هاك مني الأكيد الما بتدخلو الريبه
هادي الحله بي عينيّ أشوف تخريبه


لك التحية أخي محمد طه الحبر في حضور هذا الحديث الطيب

لك التقدير

Post: #14
Title: Re: قصه .. طه وريا مع ودكين ..
Author: خالد علي محجوب المنسي
Date: 02-20-2010, 06:47 PM
Parent: #13

هي قصة حصلت حقائقها على أرض الواقع وصاغ لها الشاعر
العبادي تلك الرواية الشعرية وأجاد وابدع

كانت الحروب التناوش على المراعي والمورد ( المياه ) لا تهدى بين القبائل المتجاورة
قديماً.
وبحكم الجيرة في أرض البطانة بين قبيلتي البطاحين والشكرية كانت الحروب بينهما دول

كان على رأس قبيلة البطاحين حسين والد ( طه ) التي تدور حوله القصة وبعدما مات حسين
صار على رأس قبيلة البطاحين شقيقه عبدالله أب كبس ( والد ريا )
اي ريا بنت عم طه .. في حياة عبدالله اب كبس خُطبت ريا لطه وكان مفروض يتزوجّو لكن وقف دون ذلك
موت عبدالله أب كبس.

طه كان فارس قبيلة البطاحين وبعد موت عمه صار له شياخة البطاحين.

في المقابل كانت على رأس قبيلة الشكرية عبدالله وهو نسيب المك نمر مك الجليين ( نمر متزوج بنت عبدالله وأسمها شمّا ).
تربى المك نمر في صغره في أرض الشكرية وتزوج من بنت شيخها ( عبدالله ).
فارس قبيلة الشكرية هو أخ شيخها عبدالله واسمه ( حمد ودكين ).

بعد موت أب كبس كانت تعم أرض البطانة فترة دهنة بين القبيلتين لا حروب لا مناوشات

وهي الفترة التي حدثت في أيامها قصة هذه المسرحية.

الحوار الذي دار في المسرحية من خيال الشاعر العبادي يروي به قصة حدثت

Post: #15
Title: Re: قصه .. طه وريا مع ودكين ..
Author: خالد علي محجوب المنسي
Date: 02-20-2010, 07:15 PM
Parent: #14

Quote: أخوك يا ريا اخوك ساعة الخيول إيدبكّن
أخوك يا ريا اخوك وكت الرماح يتشبكّن
أخوك جبل الثبات ساعة القواسي يحبكّن
كم بكيت وكم قشيت دموع الببكّن


أها في يوم من الأيام كان طه يرعى في سعيته ( سعيته من ضآن وألبل ومعاعز وأبقار )
ويطلق عليها السعية وقد يخص بالماعز والضآن ويقال غنمه
وبنت عمه وخطيبته تشاركه نفس المرعى. ترعى بسعيتها ...
في وقت الضحى إتكى طه في ظل شديرة ظليلة رامية ضليل
وغمد .. في غمدته هذه شاف لي حُلم أخافه صحى منه مهجوم.
كانت بنت عمه قاعدة قُبالو في شدرة أخرى ( تتر ليها في صوف )
والتر هو عملية الغزل.
عندما صحى طه لاحظ وجود بنت عمه ريا .. حبَّ أن يثبت لها
جلده وشجاعته لانه رأى من العيب أن يصحى مهجوم كدي قدام بت عمو
وزوج المستقبل..
فقال لها هذا الكلام :

أخوك يا ريا اخوك ساعة الخيول إيدبكّن
أخوك يا ريا اخوك وكت الرماح يتشبكّن
أخوك جبل الثبات ساعة القواسي يحبكّن
كم بكيت وكم قشيت دموع الببكّن

كان من عادة الفراسان أن يتنبر اي يذكر مكارمه وشجاعته شهامته أن أشعر
أو تحدث عن نفسه

يقال : أدبك الطين أي أمزجه.

أستخدم كلمة أخوك لأان الأخ هو البحمي وهو الستر والمعين لمحارمه وأهله.
جبل الثبات : اي وقت الحروب بكون ثابت كما جبل راسخ وتد ما بزح لا يمين لا شمال
ومابرجع ورا .. دفيرو لي قدام زي بحر الدمير الطابعي لي الهدام ...

القواسي : المحن
يحبكن . حبك الشئ أي حاكه بإتقان

كم بكيت .. وكم قشيت دموع الببكّن
يقول لها أنا ياني الببكي النساء بقتل زوج أوأخ أواب .. خال وعم
وفي نفس الوقت بفش غبينة من قتل لها عزيز ( بجيب ليها الثأر )
بقش بذلك عينها التي ظلت تبكيه ولا جفت لها دمعة وقاتله يمشي بين الناس

Post: #16
Title: Re: قصه .. طه وريا مع ودكين ..
Author: خالد علي محجوب المنسي
Date: 02-20-2010, 07:59 PM
Parent: #15

Quote: قالت ريا :
وراك أسود علي ما نمت هسع طيب

قال طه :
هي بسم الله قولي أخو طيب وشديد
حاضر قلبي ماهو مغيب
إلا الشفتو في النوم من هوايلو يشيّب
الزول في الصحي مخدوم وعليه شقاهو
وإن غمض شويه تجي الهموم لاحقاهّو
الموت في ام لبوس أنا ما بخاف لقاهو
ياريت الفي الحلم في صحيا كان بلقاهّو

كان خير ولا شر برجاهّو مابهم بالي
وحارسني الثبات من الكُبار قُبالي
وكت هسي حسيت وشفتك سالمة قاعدة قُبالي
كان إتلخبت الكون تاني ماني مبالي



وراك أسود علي : اي الدنيا من بعدك تسود في وجهي
تستخدم بادئة في حديث النساء عندما تخاف من أمر
يخبئه القدر ...

هول : ضخم اي هائل
طه شاف رؤيته حُلم مفزع ..

الزول في الصُحّى مخدوم
اي داب خدمته التي يكسب منها عيشه وكسب العيش صعب
وكان غمد اي نامتجي الهموم لآحقاهو

اي يرى أحلام مثل هذه مفزعة مُخيفة ..


وبعدها حب يثبت لها أنه لا يخاف الموت وهو قدر القدر محتوم وواقع
أم لبوس
هي الحرب وساحة الوغى وسميت بأم لبوس لما يفعله الفرسان
ويرتدوا لها ... لبسها الخاص من دروع وخوذات وسلاح..



Post: #17
Title: Re: قصه .. طه وريا مع ودكين ..
Author: خالد علي محجوب المنسي
Date: 02-20-2010, 08:14 PM
Parent: #16

Quote: قالت ريا :
كعب نوم الضحى أمس العصير كنت نايما
جيت قدام فريقنا أشوف لي صقوراً حايما
كبيرن غار علي من نومي تبيت قايما
صحيت مهجومه لا مفصل ولا في قايما

قال طه :
حت انتي رأيتي صقور عباره غريبه
علامتا كافية ظنيت الحكايه قريبه
هاك مني الأكيد الما بتدخلو الريبه
هادي الحله بي عينيّ أشوف تخريبه


صحيت مهجومة لا مفصل ولا في قايمة

اي صحت من نومها وتشعر بألأم في مفاصلها وقوائمها

وهذا يعني ان ريا شافت في حُلمها صقور والصقر في المنام يخلع
الصقر بختف الختف هو الموت

عشان كدي كان رد طه عندما حكت له الحُلم التي رأته الأستغراب
أنتي برضو رأيتي صقور عبارة غريبة أن يتشابه الحًلم وكان بنهم أمر
وهو زواجهما لبعض
لذا أكد لها ودون شك أن هذه الأحلام علامة لمصيبة سوف تقع ..وقريباً..
قد تؤدي لحرب بها يكون خراب الديار..
( وعلى مايبدو أنه حلم بحلم مماثل لحلمها اي رأى برضو صقور في حُلمه ).

Post: #18
Title: Re: قصه .. طه وريا مع ودكين ..
Author: haroon diyab
Date: 02-20-2010, 08:33 PM
Parent: #17

سلام ود الحبر

سلام خالد المنسي

ويديكم العافية

Post: #21
Title: Re: قصه .. طه وريا مع ودكين ..
Author: أسامة الفضل
Date: 02-20-2010, 09:16 PM
Parent: #18

l محمد الحبر

كنت و ما زلت و ستكون الى يوم يبعثون ديك ديكة بمرتبة الشرف من الدرجة الأولى

يا بني للكتابة محاذيرها عموما و للكتابة عن تأريخ القبيلة في السودان و بشكلة العرقي و العنصري و الاقصائي الحالي محاذير أكبر

لولا تدخل أخونا خالد المنسي الذي أكن له كل تقدير و وضعه للبوست في المسار الذي كان من المفترض أن يبدأ به لنالك ما لا يقوي عليه من يردون على رجال آخرين بعبارة - الله يجازي محنك با فلان - أو من هم أكثر صلابة منهم .

ما أورده أخونا و هو ما كان يجدر بك أن تبتدر به خيطك أنك تقتبس من مسرحية العبادي و التي هي عمل أدبي قام علي حقيقة تاريخية و هي وجود حروب بين الشكرية و البطاحين . و هذا لا يعني بأي حال أن ما ورد في المسرحية هو ما حدث فعلا كما يتوهم العوام و الهوام .

كراهية الكثير من الشكرية للعبادي بسبب هذا العمل الأدبي قامت على أساس أن أمثالك يعتقدون أن العبادي كتب تأريخا بينما نعرف نحن أن العبادي كتب معالجة أدبية قائمة علي حقيقة وجود حرب بين الشكرية و اخوانهم البطاحين و هذا يعني أنه غير ملزم بسرد تفاصيل التأريخ .

الي أن يتحول السودان لمكان ليس للقبيلة فيه مكان لن يرضى شخصنا الضعيف برمي الحديث على عواهنه عن أهله بدون الايضاحات اللازمة التي تفضي للفهم الصحيح .

Post: #19
Title: Re: قصه .. طه وريا مع ودكين ..
Author: خالد علي محجوب المنسي
Date: 02-20-2010, 08:54 PM
Parent: #17

قالت ريا:
تف الشينه ليه فاجعني ليه يا طه
انت الدغري ..ات للكاشفا ياك غطاها
كان في الدنيا هادي العقبة ما نتخطاها
ما بضلل سماها وما ابتشيلنّي وطاها
وقعدت ريا تبكي:

رد عليها طه وقال :
ما بفيد البكاء وكلامي احسن تنسي

قالت ليه ريا :
كيف ما أبكي كيف أفوت مراتع أنسي
افقد كل شي عزي ورجالي وجنسي
تطلق فوقي نار عقبان تقول لي أنسي


هنا ريأ حست من كلام طه
( هذي الحلّة بي عينيّا أشوف تخريبا )
حست بالفجعة
والفجعة هي الخوف والمصيبة والحزن والبكى مجتمعة...
لذلك قالت تف كلامك القلتو دا
وبعدها عرجت تذكره أنه هو فارس القبيلة وحاميها وسندها .. وأنت البتغطي المكشوف
وهذه بلاغة عالية يغطي المكشوف أي ستر الفقير بكرمه يحمي المهضوم حقه أن يأخذ له الحق ..
يقش العين الدامعة .. يفزع الملهوف ومستنجد .. وتقول جنس الكلام دا ..

وقعدت ريا تبكي:

قال ليها
ما بفيد البكاء وكلامي احسن تنسي

ردت علي الدمعة في عينيها متحسرة ...

كيف ما أبكي كيف أفوت مراتع أنسي
افقد كل شي عزي ورجالي وجنسي
تطلق فوقي نار عقبان تقول لي أنسي




Post: #28
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 01:42 AM
Parent: #14

Quote: هي قصة حصلت حقائقها على أرض الواقع وصاغ لها الشاعر
العبادي تلك الرواية الشعرية وأجاد وابدع
كانت الحروب التناوش على المراعي والمورد ( المياه ) لا تهدى بين القبائل المتجاورة
قديماً.
وبحكم الجيرة في أرض البطانة بين قبيلتي البطاحين والشكرية كانت الحروب بينهما دول

كان على رأس قبيلة البطاحين حسين والد ( طه ) التي تدور حوله القصة وبعدما مات حسين
صار على رأس قبيلة البطاحين شقيقه عبدالله أب كبس ( والد ريا )
اي ريا بنت عم طه .. في حياة عبدالله اب كبس خُطبت ريا لطه وكان مفروض يتزوجّو لكن وقف دون ذلك
موت عبدالله أب كبس.

طه كان فارس قبيلة البطاحين وبعد موت عمه صار له شياخة البطاحين.

في المقابل كانت على رأس قبيلة الشكرية عبدالله وهو نسيب المك نمر مك الجليين ( نمر متزوج بنت عبدالله وأسمها شمّا ).
تربى المك نمر في صغره في أرض الشكرية وتزوج من بنت شيخها ( عبدالله ).
فارس قبيلة الشكرية هو أخ شيخها عبدالله واسمه ( حمد ودكين ).

بعد موت أب كبس كانت تعم أرض البطانة فترة دهنة بين القبيلتين لا حروب لا مناوشات

وهي الفترة التي حدثت في أيامها قصة هذه المسرحية.

الحوار الذي دار في المسرحية من خيال الشاعر العبادي يروي به قصة حدثت


سلامات أخي / خالد
هذا الحديث ليس صحيحاً على إطلاقه _ عمنا العبادي قام بجمع الأشعار من رواة معاصرين
كانت هذه الملحمة تروى على ألسنتهم وتجري بين الناس دون كتابة أو جمع _ فقام بجمعها وبعدها
إستعان بملكته الشعرية الفذة ومقدراته التي ندر وجودها حتى بزماننا هذا ..

وهي ملحمة تستطيع أن تقرأ منها تأريخ (عرب السودان) قبل الفتح التركي وفيها الكثير من ما يمكن
أن يعيب إنسان ذلك العصر _ كأفتخارهم بالعبيد حيث أن الحديث عن (ليمونة) التي توصف بأنها (فرخة) شما الشكرية
زوجة المك نمر وأم ولديه (حسن) و(حسان) _ حديث كان بذلك الزمان لا يستغرب _ وهي ملحمة تستطيع من خلالها أن تحق مقولة :
الشعر ديوان العرب ..
فهذه الملحمة تأريخ فيه الإجتماعي والسياسي والثقافي والإقتصادي ..
وبالأمس عندما أوعزت للأخ / الحبر _ في بوست آخر بأن ينزل هذه الملحمة عقب إستشهاده بأبيات منها بموضع آخر
كنت أنوي فعلاً الإستفاضة في أمر ملحمة (حمد ودكين) و(طه) و(المك نمر) والتي بعدها ببضع سنون تغير تأريخ المنطقة بأكملها
جاء الفتح التركي وخرج المك نمر بعد حريق الباشا _
ونشأت مدينة الخرطوم عام 1824 على أيدي شوام ومصريين جاءؤوا مع القتح ولم يجدوا حينها سوى أبنا (حمد ودسالم ) إبن أخ (دكين)
الذي هاجر إلى (توتي) وتزوج من السيدة (ست النساء بت الشيخ حمد ودأمريوم المحسي) وكان في طريق هجرته من البطانة قد تعرض لأمطار غزيرة
فقيل أن : حمد (دبس) أي دقته مطرة في السكة ..
فأسماه الناس (حمد دبيس) وعرف أحفاده ب(الدباسين)
فأنشأ أبناءه من (إبنة الشيخ ود أمريوم) منطقة القوز والرميلة وأمتدوا بعدها حتى (العزوزاب _ الدباسين)_ وهذا حديث آخر ..

والشعر الذي جرى على لسان (طه) و(ريا) و(وودكين) وغيرهم وأستخدمه العبادي كان شعراً (جمعه) من رواة الشعر بعد أن طاف بالقرى والبنادر
وصاغ تلك الملحمة التأريخية ..

والعبادي كان مثقفاً من طراز فريد أراد بهذه الملحمة جمع الصف ونبذ العنصرية والفرقة لذا ختمها بأبياته الشهيرة:
جعلي ودنقلاوي وشايقي إيه فايداني _
غير خلقت خلاف خلت أخوي عاداني ..
ألخ ..

ولعمري إن أجمل ما رود بهذه الملحمة هي أبيات (طه البطحاني) في رثاء (حمد ودكين) نفسه _ أي أنه قتله ورثاه وعدد مآثره
(شهامته وشجاعته وكرمه وشدة بأسه) _ ولأان (البطاحين) و(الشكرية) أبناء عمومة فقد أحس (طه) أنه بقتل (حمد ودكين) قد خسرت القبيلتنان
فارساً وقائداً ورجلاً كريماً هو خسارة للجميع _ وإن قتله مضطراً من ناحية وغير مصدقاً من ناحية _ لأان (حمد ودكين) كان فارساً لا يجارى


أعود ..

Post: #20
Title: Re: قصه .. طه وريا مع ودكين ..
Author: حسن حماد محمد
Date: 02-20-2010, 09:06 PM
Parent: #1

الأخ محمد

متعك الله فقد أمتعتنا

ارجو المواصلة

Post: #22
Title: Re: قصه .. طه وريا مع ودكين ..
Author: عادل سهل
Date: 02-20-2010, 09:29 PM
Parent: #20

Quote: هي قصة حصلت حقائقها على أرض الواقع وصاغ لها الشاعر
العبادي تلك الرواية الشعرية وأجاد وابدع


والله حقاً كما قال صديقى الدكتور احمد القرشى ما ولج خالد المنسى ناصية الآدب والفنون الا أبان واجاد

فهذا البوست إزدادت دسامته بهذه الطلة البهية للاخ المنسى

اما أخونا الحبر ، فقد نقبت عن درر التراث السودانى ، وأجبرتنا على المتابعة

ســــــنعود كثيراً ، فشكراً




ــــــــــــــــــــــــــــــــــــــــــــــ
فى انتظار ود ضحوية . . .

Post: #23
Title: Re: قصه .. طه وريا مع ودكين ..
Author: عفاف أبو حريرة
Date: 02-20-2010, 09:42 PM
Parent: #22

Quote: l محمد الحبر

كنت و ما زلت و ستكون الى يوم يبعثون ديك ديكة بمرتبة الشرف من الدرجة الأولى

يا بني للكتابة محاذيرها عموما و للكتابة عن تأريخ القبيلة في السودان و بشكلة العرقي و العنصري و الاقصائي الحالي محاذير أكبر

لولا تدخل أخونا خالد المنسي الذي أكن له كل تقدير و وضعه للبوست في المسار الذي كان من المفترض أن يبدأ به لنالك ما لا يقوي عليه من يردون على رجال آخرين بعبارة - الله يجازي محنك با فلان - أو من هم أكثر صلابة منهم . . . .

ده كلام انا ليه قمه الحزن والاسف
يعني الصغير بيناتنا مايكبر
والما عنده خبره يبقي اعمي لي يوم الدين
ليه كسير المغاديف والاحباط
ازرع شجره بكره اكيد ح يكون احلي

Post: #24
Title: Re: قصه .. طه وريا مع ودكين ..
Author: عفاف أبو حريرة
Date: 02-20-2010, 09:48 PM
Parent: #23

Quote: والله حقاً كما قال صديقى الدكتور احمد القرشى ما ولج خالد المنسى ناصية الآدب والفنون الا أبان واجاد

فهذا البوست إزدادت دسامته بهذه الطلة البهية للاخ المنسى

اما أخونا الحبر ، فقد نقبت عن درر التراث السودانى ، وأجبرتنا على المتابعة

ســــــنعود كثيراً ، فشكراً

ابو احمد متابعين

Post: #25
Title: Re: قصه .. طه وريا مع ودكين ..
Author: أسامة الفضل
Date: 02-20-2010, 10:14 PM
Parent: #24

الأخت عفاف أبوحريرة

يكبر ونص و نشيلو فوق راسنا طالما التزم الأدب و انتظر وتعلم وعرف مايمكن أن يكون مضوعا مفيدا وحتى إن كانت هناك أجزاء حساسة في ما تناوله عرف كيف يقدمها بطريقة تجعلها مقبولة.
القبيلة بشكل السودان الراهن و إلى أن يقضي الله أمرا كان مفعولا منطقة يتطلب الإقتراب منها حنكة لم يبرهن الحبر وجودها لديه كما أنه و بالرغم من قصر مدة وجوده هنا صاحب تاريخ كارثي.

Post: #26
Title: Re: قصه .. طه وريا مع ودكين ..
Author: عفاف أبو حريرة
Date: 02-20-2010, 10:38 PM
Parent: #25

Quote: يكبر ونص و نشيلو فوق راسنا طالما التزم الأدب و انتظر


يا سيدي يسلم راسك
عداك العيب
احترامي

Post: #27
Title: Re: قصه .. طه وريا مع ودكين ..
Author: Abobakr Shadad
Date: 02-20-2010, 10:48 PM
Parent: #25

شكرا للاخ محمد طه
وللاخوة المتداخلين
وأعجب ممن يسدى النصح بالشتيمة

لو كنت مكانه لاعتذرت

وفى انتظار المزيد يا محمد

Post: #29
Title: Re: قصه .. طه وريا مع ودكين ..
Author: Elbagir Osman
Date: 02-21-2010, 01:49 AM
Parent: #27

لا أرى مبررا لغضب إحدى القبيلتين موضوع المسرحية

فقد صور العبادي الخصومة كخصومة شريفة بين شجعان من الجانبين


الباقر موسى

Post: #30
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 01:55 AM
Parent: #29

Quote: لا أرى مبررا لغضب إحدى القبيلتين موضوع المسرحية

فقد صور العبادي الخصومة كخصومة شريفة بين شجعان من الجانبين



أتفق معك تماماً أخي الباقر ,,
كما أن الأمر أمر تأريخ صاغه عمنا العبادي شعراً ..
لكني أصدقك القول : أن مكانة (حمد ودكين) ورمزيته عند الشكرية جعلت الأمر شاقاً عليهم
كما أن هجرة طه لشندي وطلبه الحماية و(الجيرة) لدى المك نمر _ وموقف المك نمر حين أجاره رفض تسليمه
رغم أنه قتل عم زوجته وأم ولديه (شما الشكرية) _ قد جعلت الأمر أكثر صعوبة _

Post: #31
Title: Re: قصه .. طه وريا مع ودكين ..
Author: أسامة الفضل
Date: 02-21-2010, 02:52 AM
Parent: #30

السيد كمال الزين

والله حيرتونا يا تقدمي آخر الزمان فبعد الحلم باخوة و رفاهية البشرية جمعاء هأنتم تلغون في ماعون القبلية الضيقة مؤسسا لحقائق التاريخ علي عمل أدبي لم يعرف عن صاحبه و لم يدعي هو أنه مؤرخ .

ان كنت تتوق لقرأة تاريخية لما حدث فعليك بالمؤرخين أو بسؤال الطرف الآخر فلربما تجد لديه نسخة و رواية آخري .

في ردي عليك أو على الحبر لا أكابد مشاعر الوجع التى تتوهمها فحاضر البشرية ملئ بالانكسارات و التي من الممكن أن نوفر لها مثل هذه المشاعر و أنا على يقين أن الحبر لم يقصد الاساءة و لربما لا يكون يعرف عن الشكرية و البطاحين الا الأسماء و لكن محاولته اخراج نفسه من صورة الشافع الأروش أو ديك العدة التي رسمت له في هذا المنبر تدفعه لقرع أبواب قد لا يعرف الهواء الذي يمكن أن يأتيه من فتحها .

الكلام بلهجة الواثقين لا يجعل الكذب حقيقة حتي و ان آتى ممن كنا نظن فيه خيرا

Post: #32
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 03:08 AM
Parent: #31

Quote: السيد كمال الزين

والله حيرتونا يا تقدمي آخر الزمان فبعد الحلم باخوة و رفاهية البشرية جمعاء هأنتم تلغون في ماعون القبلية الضيقة مؤسسا لحقائق التاريخ علي عمل أدبي لم يعرف عن صاحبه و لم يدعي هو أنه مؤرخ .




تعرف يا أسامة (البورد) ده بقى الواحد يكتب فيهو حسب حالتو النفسية _ لما خوفتونا زاتو ..
من الذي يلغ في ماعون القبلية الذي تتدعي ؟
التأريخ (المفلتر) لا يعني (التحضر) _ ومانعانيه الآن من أزمات جميعها مرجعها هذا التأريخ
حتى صراع (درافور) ذو خلفية تأريخية ..
ومانسميه صراع المركز والهامش وحمى السودان الجديد .. ألخ
أم ترى أن علاج الحاضر هو إنكار الإستعباد والرق الذي كان موجوداً ؟
القبلية والجهوية موجودة حتى في أمريكا حاضرة العالم المتحضر _ فبها تجد (الآسيوي _ الإفريقي _ الإسباني _ الآيرلندي)
وجميعهم جمعهم (ماعون الدولة المدنية) ..ولم يقم أحدهم بإنكار تعرض الهنود للإبادة أو تعرض الأفراقة للعنصرية والإستعباد



Quote:

ان كنت تتوق لقرأة تاريخية لما حدث فعليك بالمؤرخين أو بسؤال الطرف الآخر فلربما تجد لديه نسخة و رواية آخري .



ياصيقي المجال أمامك فأتنا بما ترى من قراءآت تأريخية _ بدلاً عن إلجام من يود الحديث عن أمر تأريخي (مختلف حوله) ..



Quote: في ردي عليك أو على الحبر لا أكابد مشاعر الوجع التى تتوهمها فحاضر البشرية ملئ بالانكسارات و التي من الممكن أن نوفر لها مثل هذه المشاعر و أنا على يقين أن الحبر لم يقصد الاساءة و لربما لا يكون يعرف عن الشكرية و البطاحين الا الأسماء و لكن محاولته اخراج نفسه من صورة الشافع الأروش أو ديك الديك التي رسمت له في هذا المنبر تدفعه لقرع أبواب قد لا يعرف الهواء الذي يمكن أن يأتيه من فتحها .

الكلام بلهجة الواثقين لا يجعل الكذب حقيقة حتي و ان آتى ممن كنا نظن فيه خيرا


الحبر كان موفقاً في الإتيان بهذا العمل الذي له دلالات عميقة في نبذ القبلية _ والعبر التأريخية _ (ودي بجيها راجع)
ماتحته خط لم أفهمه _ أنا لا أعلم لماذا تدعي أنك تحديداً متهم بالإصابة بوجع تأريخي ؟

فأنت هنا متداخل كغيرك من هو (مع أو ضد) ..؟
لماذا توهمت أنك تحديداً معني بهذا ؟

أجبنا حتى نعرف من أين نبدأ _ فتح الله عليك ..

Post: #33
Title: Re: قصه .. طه وريا مع ودكين ..
Author: لقمان حسن همام
Date: 02-21-2010, 03:11 AM
Parent: #31

أسامة الفضل

أحترم أمثالك ممن يملكون ناصية الفهم والحرف ..

Quote: فحاضر البشرية ملئ بالانكسارات و التي من الممكن أن نوفر لها مثل هذه المشاعر و أنا على يقين أن الحبر لم يقصد الاساءة و لربما لا يكون يعرف عن الشكرية و البطاحين الا الأسماء و لكن محاولته اخراج نفسه من صورة الشافع الأروش أو ديك الديك التي رسمت له في هذا المنبر تدفعه لقرع أبواب قد لا يعرف الهواء الذي يمكن أن يأتيه من فتحها .

الكلام بلهجة الواثقين لا يجعل الكذب حقيقة حتي و ان آتى ممن كنا نظن فيه خيرا

Post: #34
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 03:18 AM
Parent: #31

Quote: و لكن محاولته اخراج نفسه من صورة الشافع الأروش أو ديك الديك التي رسمت له في هذا المنبر تدفعه لقرع أبواب قد لا يعرف الهواء الذي يمكن أن يأتيه من فتحها .



أخي أسامة (الكتابة آخر الليل شاقة شوية) ..
لذلك فاتني أن أنوه أن ملحمة العبادي موجودة ومتاحة للجميع وليست مما يتداول سراً ..

فما الذي يجعل الحبر يقرع أبواب الهواء الذي تعني ..
كما أن الأمر ليس فيه إساءة لأي من القبائل ذات العلاقة ..

فأرجو توضيحاً ..

Post: #35
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 03:29 AM
Parent: #34

(*)

ولتوضيح أكثر :

الدلالات التأريخية التي من أجلها (جمع العبادي) هذا التراث _ وأؤكد على جمع هذه لنناقشها بروية بالله
العبادي صاغها لجمع الصفوف ونبذ القبلية والعنصرية في المقام الأول _ والفترة التي جمع فيها وصاغ هذه الملحمة لها دلالتها أيضاً
العبادي أراد أن يذكر الناس بأن السودانيون كانوا يقتتلون فيما بينهم _ والغازي التركي يتربص بهم وعلى أبوابهم
ويحذر من تكرار هذا الخطل التأريخي _ والعبرة في خاتمته :
جعلي ودنقلاوي وشايق إيه فايداني ..ألخ

ثم أن العبرة في أن المك نمر الذي كان في حماه عزيزاً _ يجير المستجير _ تحول بين ليلة وضحاها بعد الغزو التركي إلى
من يبحث عن من يجيره بأرض الحبشة _ ولو كان السودانيون حينها في وحدة ولم تمزقهم القبلية لكان الحال قد أختلف ..

سأعود ..

Post: #36
Title: Re: قصه .. طه وريا مع ودكين ..
Author: أسامة الفضل
Date: 02-21-2010, 03:42 AM
Parent: #35

الشكرية يا سيد كمال يقولون أتهم لم يهزموا و أن ما ورد فيما يتعلق بفرار طه الي شندي لم يحدث . و انهم يقبلون بما أورده العبادي كعمل أدبي ليس المطلوب منه محاكاة الواقع التأريخي . فماذا تقول أنت لهم يا سيدي . هؤلاء الذين تحكي عنهم هنا ليسوا شخصيات كرتونية و انما أناس لهم جذور في الحاضر قد يقرأ أحفادهم ما تكتبه أنت كقراء أو أعضاء في هذا المنبر.

Post: #37
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 03:56 AM
Parent: #36

Quote: الشكرية يا سيد كمال يقولون أتهم لم يهزموا و أن ما ورد فيما يتعلق بفرار طه الي شندي لم يحدث . و انهم يقبلون بما أورده العبادي كعمل أدبي ليس المطلوب منه محاكاة الواقع التأريخي . فماذا نقول أنت لهم يا سيدي . هؤلاء الذين تحكي عنهم هنا ليسوا شخصيات كرتونية و انما أناس لهم جذور في الحاضر قد يقرأ أحفادهم كقراء أو أعضاء في هذا المنبر.


رفض الشكرية رواية العبادي ؟
هل هذا يعني حظرها عن التداول _ أم أن الرد عليها يتم برواية أخرى وتصحيح ومعالجة تأريخية مفيدة ..
المغالطات التأريخية ليست حكراً على قبائل السودان وتأريخه _
هل تعلم أن (بني مرة) إلى اليوم ينكرون رواية مقتل كليب (وائل بن ربيعة) غدراً على يد عمرة بن مرة (جساس)
وينكرون الكثير مما تناقله الرواة عن حرب البسوس ..
ودافعهم هنا أي دافع الرفض (هو القبلية) وتقديس القبيلة وتأريخها وفلترته وكل القبائل تدعي أنها من أصلاب رجال لا يهزمون ..
أما عن حساسية (الشكرية) تجاه مفهوم الهزيمة _ فالرواية تقول أن مقتل (ود دكين) لم يكن خلال معركة بالمعني المفهوم ..
لأن المعارك بين الشكرية والبطاحين في ذلك العهد لن تكون الغلبة فيا للبطاحين _ لأن الشكرية كانوا أكثر عددا وعدة وبأساً ..
وهذا أيضاً حديث آخر ..


لم تجبني بعد لماذا إتهمت نفسك دوننا جميعنا بالوجع ؟

Post: #38
Title: Re: قصه .. طه وريا مع ودكين ..
Author: لقمان حسن همام
Date: 02-21-2010, 04:09 AM
Parent: #34

عزيزي، أسامة الفضل

من منطلق إعجابي بسردك وحرفك ..

أفترض يقينا أنك تتفق معي أن الكلمة مسؤولية متى كان انطلاقها (صباحا - نهارا - مساء)

لذا أقول: إن

Quote: صورة الشافع الأروش أو ديك الديك التي رسمت له في هذا المنبر


أسهم بعضٌ من المتداخلين في هذا البوست، بالترويج لها، بل والاستهتار بها..

لكنهم الآن يدافعون عن هذه الصورة !!!!


(عجبي) .. بل وكل (عجب) بدر الدين الأمير ..

صديقي أسامة .. تمدد في سردك، صباحا كان أو ليلا

فأنا أفترض فيك الصدق وعفة اللسان في كل الأوقات ..

Post: #39
Title: Re: قصه .. طه وريا مع ودكين ..
Author: أسامة الفضل
Date: 02-21-2010, 04:16 AM
Parent: #38

لكني أصدقك القول : أن مكانة (حمد ودكين) ورمزيته عند الشكرية جعلت الأمر شاقاً عليهم
كما أن هجرة طه لشندي وطلبه الحماية و(الجيرة) لدى المك نمر _ وموقف المك نمر حين أجاره رفض تسليمه
رغم أنه قتل عم زوجته وأم ولديه (شما الشكرية) _ قد جعلت الأمر أكثر صعوبة _


لا يعجبنى نقص القادرين على التمام فلا تجبرني على الشك في ذكائك.

Post: #41
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 04:25 AM
Parent: #39

Quote: لكني أصدقك القول : أن مكانة (حمد ودكين) ورمزيته عند الشكرية جعلت الأمر شاقاً عليهم
كما أن هجرة طه لشندي وطلبه الحماية و(الجيرة) لدى المك نمر _ وموقف المك نمر حين أجاره رفض تسليمه
رغم أنه قتل عم زوجته وأم ولديه (شما الشكرية) _ قد جعلت الأمر أكثر صعوبة _


لا يعجبنى نقص القادرين على التمام فلا تجبرني على الشك في ذكائك.


يبدو أنك من تسيطر عليه نزعة قبلية ما ..!
لم ترد توضيحها _ فأرجوأن ترد حجة بحجة مكذباً للروايات بروايات تدحضها _
أنا لم أدعي ذكاءً لا يشوبه شك _ فأرجو الرد في حدود الموضوع المطروح ..

Post: #40
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 04:20 AM
Parent: #38

(*)

العلاقة بين الشكرية والبطاحين كغيرهما من قبائل العربان علاقة أبناء عمومة وبها ندية _ تشوبها عصبية
إقرأ حديث البطاحين في مدح الشكرية والعكس _ ترى أن علاقات القبيلة وتعقيداتها لم تكن حائلاً دون الإقرار بفضل
أبناء العمومة _ ولا يخفى عليك أن المصاهرة بين القبيلتين وعلاقة الدم تجعلهما أقرب قبائل السودان رحماً ونسباً
وحا جيك بالتفصيل :
(*)

رد عليها طه :
تاني امضي حول وانا بالحشا اتالم
علي حكمك صعب انا قابله ما بظلم
نستني السنة قاسية وصعيبه علينا
ردت عليه ريا :
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا
يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو
وتقوم ريا فايته علي الفريق وطه يعاين فيها وهي ماشه ويقول :
ياليت السعادة ان كان وقت ايديه
كنت اعيش غني في الدنيا بالزنديه
علي حكموا ناسي الفب اخذوا الديه
اموت بالعطش والمويه بين ايديا
اه يا رب ارحم صبري امس ضنين
يمحف ديه السنه ربي الحليم وحنين
يخصمه من حياتي رضيت بعشرة سنين
وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال :
بالضيفان تمري لا سلام لا كلام
صدقوا اهل المثل توب العرب صح لام

ريا ردت عليه :
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتكم كيف
العربي قال ليها :
من وين في الاهل كفاك فخر يا بنية
ردت عليه ريا :
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه
________________________________________
قام رد عليها ود دكين طبعاً عرفها انها هي زولتوا :
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا

فردت عليه ريا قايله :
كما يسد مكانن قدموا ليش يوطاها
( يعني ماشي في الواطه لي شنو غير اكرام الضيف واغاثة الملهوف(
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي ووشيه
رد عليها و دكين :
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد وديه المحريه
قام واحد من العرب داير يعرفا انه ده شيخ العرب ود دكين فقال :
ما بتسألي لامن وين ولا وين ترسو
قالتلوا ريا :
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديثو تعرف أبوه وجنسوا

فرد عليها العربي :
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيه

ده خريف البطانه المالوا فيها مشارك
هيلوا السارحه هيلوا الصاهله هيلوا البارك
ما وقع لك كلامي ساكته لي شنو خبارك
فخرك ود دكين جاك في فريقك زارك
ردت عليه ريا :
اهلا حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
تابعو إن جانا نجري ونخدموا حفايه
رد عليها ود دكين :
بارك ربي فيك عقلك يدوم يا ريا
كرمك ماهو كلفه دي طبعتك فطريه
إياك بت التلوب والسمته فيك محريه
قديم فوت البطاحين عزه للشكريه

في الوقت داك جاء طه ووجدتهم واقفين فقال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدارنا
تنزلوا في الدرب مالنا ماتت نارنا
رد عليه شيخ العرب:
حباب طه الضرس والفي الصهيباب راس
الجود والكرم هيلك قديم ميراث
نارك ما بتموت با ولده الفراس
قاصدين ام شديدة ومعانا عوجه راس
رد عليه طه :
لعدوك العوج يا الفي الكبس سراي
راسك ما بدوس مليان رجاله وراي
باكر لي ام شديدة اركب معاك براي
لاكن يا شيخ العرب لازمن تختوا كراى
طبعاً شيخ العرب ما فهم كلمة كراى دي فقال لي طه :
هادي الشورة يا طه الغلبني دليله
كل البزمه القاهو فيك قليله
رد عليه طه شارح ليه كلمة كراي :
كراي الدايروا تبقوا ضيوفنا انتو الليلة
ترقدوا في الفريق حتي ان عشانا بليله
رد عليه ود دكين :
مسكنا الدرب أسرع قوام ما تلعب
دارك ديمه عامره والسمح ما بكعب
يكفين الوصف لاتشد جمل لا تتعب
وهدنا الطريق عقب الوصول ما بصعب
رد عليه طه:
يمين تغشوا الفريق بتفوتوا نحنا مقابر
رد عليه شيخ العرب :
عامر انشاء الله ديمه اياك مرسى العابر
مشطوطين خلاص مسكنا في دريب جابر
نخاف عوج الطريق منو لي المقدر خابر
رد عليه طه :
دريب جابر مزم والسكه سالكه ورايقه
فرقان ما بتلاقيك ما بتعوقك عايقه
اخد خاترنا نحنا قالوا واصله السايقه
بتراوح ام شديدة باكر وزواملك فايقه

رد عليه ود دكين :
الزول ان وعد شين ميعادو يخلفو
في ربط اللسان يسخابو دمو يتلفو
سفري الليله فيه زولين ما بختلفو
ضروري اصل ام شديده علي وعد بي حلفو
ما بعرف ازوق من نشيت تبيت
فريقكم لي فريق وبيتكم يمين لي بيت
اجيك ديناً علي حتي إن بقيت حبيت
هاك وعداُ نجيض ارجانا بكره مبيت
شوفتي للفريق ايام بكي ابواتك
ما غابني حالك سمعت بي نخواتك
فريقك بكره ضيفوا وما بفوتوا وحاتك
إلا أحققك وبراي اشوف نفحاتك
يا ود الهميم النفسوا ما معارضاه
كرم الضيف عليك مكانة ابوك فارضاه
جاييك في امر ان تابه وان ترضاه
غيرك ما بكوس واملي بس تقضاه
رد عليه طه :
غرضك مقضي كان احتاج لخيل وجمال
والضان والابل سارحات يمين وشمال
رد عليه ود دكين :
فوق القولتو انا لي فيك امال
رد عليه طه:
بي دمي الغرض اقضاهو خلي المال

المهم طه زي فهم شيخ العرب وده ماشيلوا جاي وطه ماشيلوا علي المال
فرد عليه شيخ العرب :
دي المأموله فيك وين الدرب خترنا
رد عليه طه :
دربكم في السلم
قالوا شيخ العرب :
والله تب ما ودرنا
بكره نجيك ان قلينا ولا كترنا
وهنا ودعهم شيخ العرب وسار بي جماعته قاصد ام شديدة وعلي اساس في اليوم التاني ينزل ضيف علي طه وقبيلة البطاحين
وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا :
في البال لي ضمير شيخ العرب متعوب
قايم نفسه يختف في الكلام مرعوب
ما خاتيلوا شئ ما شوفتي كيف مرعوب
حمد ود دكين مرتع دياروا وربعوا
ده الشئ السمعتوا من الاباه والتبعو
الراجل فاعيلوا يبين لك طبعوا
انا ود الخلا البعرف اسوده وضبعو
ردت عليه ريا :
اعوج كان يخلف الليله ميعاد جيتو
رجال وحريم كل اهل الفريق في رجيتو
قطعوا السارحه كل زول في مراحو سعيتو
كبار وصغار و حتي الراعي خله رعيتو
قال ليها طه :
محال يخلف محال قال جايبو غرضاً عندي
ردت عليه ريا :
كان غرضاُ صعب ؟؟؟؟؟
رد عليها طه :
كان رأس نمر في شندي
وعدتوا أقضاه وابذل كل جهدي العندي
كان بالمال وكان بالراى وكان بي زندي
قالت ريا :
هيلك من زمان غنت البجيك تحجالوا
لاكين ود دكين عامر قديم برجالو
قال ليها طه :
يا ريا الكلام ده اخير تقفلي مجالو
وكت اوعدته بقضالو غرضو الجالو
وفي وقفه طه وريا يجوهم ثلاثه من ابناء البطاحين عبدالله وخلف الله وأحمد
قال عبد الله :
سلام يا طه
قال طه :
مرحب بي كبار قبيلتي وعزي
مرحب بالاسود البفقعوا المستهزي
ريا جات قبيلتك فوقه انكعى هزي
وإن زحينا يوم الحارة قرنك جزي
ردت عليه ريا :
اولاد بطحان تعيشوا ويزيد مراحكم ناير
وناركم في سرات الوادي تهدي الحاير
بتحلو المضيق وتصدوا غارات الغاير
ما هيلكم تزحوا كان يزح الداير
قام خلف الله لما سمع الكلام ده خاف وارتجف واصابته خوفه كده
فناداه عبدالله قال :
خلف الله ولدي اقعد قبال ود عمك
كلام ريا هادا بشوفه غير دمك
من زمن بعيد أتمني أسمع نمك
فرج همنا مولاي يفرج همك
دوبينا ......قول ... دوبينا

Post: #42
Title: Re: قصه .. طه وريا مع ودكين ..
Author: أسامة الفضل
Date: 02-21-2010, 04:46 AM
Parent: #40

كمال يا أخوي ولتكن هذه آخر مداخلاتي في هذه الخيط :

أولا : أنا لست طرفا في أي صراع عندكم في الدوحة و ربما أنني لم أتداخل مع أي شخص من الدوحة سواك و الأخ هارون دياب و لا أريد لكلامي معك هنا أن يستغل من قبل أي جهة أو شخص لتسوية صراع لست أنا طرفا فيه .

ثانبا : بحكم وجودي في هذا البورد أري ما يقوم به الأخ الحبر من اضرار بنفسه و لم يحدث أن تداخلت معه ناصحا أو مستهزءا لعلمي بعدم جدوى ذلك فهذه الأشياء لا يتعلمها الناس في المنابر .

ثالثا : أنا لا أحجر على أحد فتح مثل الموضوع المفتوح الآن و لكن أحتج كشخص ينتمي لمجموعة تم ذكرها هنا أن يتم الحديث عن تأريخهم من خلال الكلام عن عمل أدبي كحقيقة تأريخية و أعتقد عن ذلك حق عام و خاص لن تستطيع حرماني منه.

رابعا : لا أعاني من تضخم في الذات أو احساس بالدونبة لانتمائي لقبيلة الشكرية فهي مثل أن تكون جعليا أو حمري أو دينكاوي لا تشرف و لا تعيب و لكن ذلك لا بعنى التعاضي عن تصيحيح ما أراه و الكثيرين غيري مغالطا للحقائق التاريخية .

لا وقتي و لا طبيعتي يسمحان لي بالمماحكات . أنا أوضحت وجهة نظري و هذا ما استطيعه و كلي أمل ألا يحمل كلامي أكثر مما حمل .

Post: #43
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 04:59 AM
Parent: #42

Quote: كمال يا أخوي ولتكن هذه آخر مداخلاتي في هذه الخيط :

أولا : أنا لست طرفا في أي صراع عندكم في الدوحة و ربما أنني لم أتداخل مع أي شخص من الدوحة سواك و الأخ هارون دياب و لا أريد لكلامي معك هنا أن يستقل من قبل أي جهة أو شخص لتسوية صراع لست أنا طرفا فيه .

ثانبا : بحكم وجودي في هذا البورد أري ما يقوم به الأخ الحبر من اضرار بنفسه و لم يحدث أن تداخلت معه ناصحا أو مستهزءا لعلمي بعدم جدوى ذلك فهذه الأشياء لا يتعلمها الناس في المنابر .

ثالثا : أنا لا أحجر على أحد فتح مثل الموضوع المفتوح الآن و لكن أحتج كشخص ينتمي لمجموعة تم ذكرها هنا أن يتم الحديث عن تأريخهم من خلال الكلام عن عمل أدبي كحقيقة تأريخية و أعتقد عن ذلك حق عام و خاص لن تستطيع حرماني منه.

رابعا : لا أعاني من تضخم في الذات أو احساس بالدونبة لانتمائي لقبيلة الشكرية فهي مثل أن تكون جعليا أو حمري أو دينكاوي لا تشرف و لا تعيب و لكن ذلك لا بعنى التعاضي عن تصيحيح ما أراه و الكثيرين غيري مغالطا للحقائق التاريخية .

لا وقتي و لا طبيعتي يسمحان لي بالمماحكات . أنا أوضحت وجهة نظري و هذا ما استطيعه و كلي أمل ألا يحمل كلامي أكثر مما حمل



أولاً : إحترامي وتقديري أخي / أسامة ..
ثانياً : أنا لم أتداخل معك اليوم للمرة الأولى _ فبيننا كثير من التواصل كفيل بجعلي أفهمك جيداً
ولم أحمل كلامك مالا يحتمل _ (أثق بك تماماً)

ثالثاً :
أنا أيضاً لست طرفاً بصراعات أهل الدوحة _ وتعلمت أن أنتقي من أرد عليهم بهذا البورد ومن أتجاهلهم (بوعي كامل)
تحاشياً للمناطحة _ ولو كنت أرى فيك غير ذلك لتجاهلتك كما أتجاهل غيرك _ ولكنك عندي مقدر _ محترم ..

رابعاً :
الأخ الحبر شاب صغير وهو منا بمكانة الأخ الأصغر _ نقول له أحسنت حين يحسن ونقول له أخطأت حين يخطئ
دون إستعداء مجاني _ ودون إساءة أو تجريح _ وإن فعلنا فمطالبون بإعتذار فوري بحقه وبحق غيره ..

خامساً :
أنا ضد نقل كل مايحدث بالدوحة إلى هذا البورد _ وتوقفت عن الخوض في أمرهم سلباً أو إيجاباً (شخوصاً يعني)
لأن نقل الصراعات هنا يحدث في حالات (نفسية وجسدية وعقلية) لا تصلح معها الكتابة ...
وما ذنب أهل البورد إن أختلف أهل الدوحة أو إتفقوا ؟

سادساً :
أود فعلاً مواصلة الحوار معك حول أمر ملحمة العبادي _ يمكن تقنعني _ ليه لا ؟

محبتي التي تعرف ..

Post: #44
Title: Re: قصه .. طه وريا مع ودكين ..
Author: المسافر
Date: 02-21-2010, 06:23 AM
Parent: #43

Quote:



ولعمري إن أجمل ما رود بهذه الملحمة هي أبيات (طه البطحاني) في رثاء (حمد ودكين) نفسه _ أي أنه قتله ورثاه وعدد مآثره
(شهامته وشجاعته وكرمه وشدة بأسه) _ ولأان (البطاحين) و(الشكرية) أبناء عمومة فقد أحس (طه) أنه بقتل (حمد ودكين) قد خسرت القبيلتنان
فارساً وقائداً ورجلاً كريماً هو خسارة للجميع _ وإن قتله مضطراً من ناحية وغير مصدقاً من ناحية _ لأان (حمد ودكين) كان فارساً لا يجارى


هنا مواقف عظيمة
موت المثله فقدان للعرب بالجملة...

أكيد كان طه يعرف من هو حمد ود دكين...(أنا لي لقاك من صغير متدرب) وعارف أن الحتمية التي جعلت منه فارس القبيلة في يوم ما سوف يكون اللقاء مع مثل حمد الدكين..
وأكبر من ذلك معرفة طه لنفسه .. ومكامن ضعفها مكنه من الوقوف في وجه أكبر مقاتل عرفته البطانة .. شيخ العرب.. واعترافه بذلك ( على شوية كان داير يعمل العملة ) أي يقتل طه ويأخذ ريا... لكن عواقب العملة هي التي جبرت كسر طه ( ما بصح لريا تبقى سبية لأنه في هذه الحالة يكون أخذها بقوة السيف ... وهذا يذكرنا قصه عروة الورد ... زعيم الصعاليق .. ومحبوبته التي أختطفها بسيفه وهام بحبها وفرضت عليه أن يعيدها لأهلها ويطلب يدها منهم .. ولما رجعت رفضت برغم حبها له .. لأن أخذها عنوة كان نقص لكرامتها)..



كذلك اختيارو للقرار الصعب أن يلجأ إلى المك نمر وهو يعرف علاقته بحمد الدكين كذلك كان من المعرفة والحنكة وما دار في مجالس المك نمر ...

الحقيقة هي أن العبادي قام بجمع تراث ضخم يحكي عدة جوانب من مجتمع البطانة.. وكما نعلم هناك مجتمعات أخرى غير الشكرية والبطاحين .. بل في مسرحية يوسف سنينات وموسى ود جلي هناك شخصية كورينا وهو ليس من البطاحين .. وهو من صد يوسف سنينات بعد قتله لموسى ود جلي .. كورينا كذلك معروف أنه من أسود البطانة ... وآخر أيامه كان في كسلا..

Post: #45
Title: Re: قصه .. طه وريا مع ودكين ..
Author: Ahmed Yousif Abu Harira
Date: 02-21-2010, 07:17 AM
Parent: #44


Post: #46
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 09:06 AM
Parent: #45

Quote: الحوار الذي دار في المسرحية من خيال الشاعر العبادي يروي به قصة حدثت



سلامات أخي / خالد
هذا الحديث ليس صحيحاً على إطلاقه _ عمنا العبادي قام بجمع الأشعار من رواة معاصرين
كانت هذه الملحمة تروى على ألسنتهم وتجري بين الناس دون كتابة أو جمع _ فقام بجمعها وبعدها
إستعان بملكته الشعرية الفذة ومقدراته التي ندر وجودها حتى بزماننا ه


الأخ الفاضل كمال
التحية الطيبة سلام عليك ورحمة من الله

هل قصدك أن كل الحوار الذي جاء في الملحمة أو القصيدة أو المسرحية
جمع ؟

لم أفهم قصدك بالضبط

إن كان ماأستدركه وفهمه عقلي الضعيف
يبقى العبادي ليس شاعر هذه الملحمة
إنما جامع

الرجاء الإجابة

تحياتي ومودتي

Post: #47
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 09:12 AM
Parent: #46

شكرا الأخ خالد علي محجوب

وشكرا كمال علي

وعفاف أبوحريره

وأيضا جميع الإخوه المتداخلين


ولي عوده

Post: #49
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 09:32 AM
Parent: #47

Quote: [B]قال طه :
فال الخير أخير ما شفنا شيناً جدت
كل الشفنا أحلام في طريقا إتعدت
قبل الليلة إيد لي حمانا قطْ ما اتمدت
ما بنهد شرفنا لو السماء إنهدت

قالت ريا :
خير إنشاء الله خير والخير مساك وصباحك
والفال السمح فالك يضوي مراحّك
لضيفان أشوفك عامر تملي مراحك
شينك ما أشوفو وأشوف هناك و أفراحك


عندما شاف طه بكاء ريا تفسير لما قال

( هادي الحلة بي عينيّا أشوف تخريبّا )

بدأ يهدي من روعها وخوفها من حديثه

الفال هو ,ان صح النعبير القدر المكتوب

والفال السمح فالك يضوي مراحّك
لضيفان أشوفك عامر تملي مراحك


مراحك في البيت الأول تعني : مكان سمره وتسامره ومراحهه

ومراحك في البيت الثاني : هي سعيته التي يكرم منها الضيف وعابر السبيل

Post: #48
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 09:29 AM
Parent: #46

Quote: سلامات أخي / خالد
هذا الحديث ليس صحيحاً على إطلاقه _ عمنا العبادي قام بجمع الأشعار من رواة معاصرين
كانت هذه الملحمة تروى على ألسنتهم وتجري بين الناس دون كتابة أو جمع _ فقام بجمعها وبعدها
إستعان بملكته الشعرية الفذة ومقدراته التي ندر وجودها حتى بزماننا ه


الأخ الفاضل / خالد
أنا لم أنكر شاعرية عمنا العبادي وماكان لي
وماقصدته أن أدب جمع السير يعتمد على معالجتها
والمعالجة تكون بجمع السيرة وماصحبها من أشعار وغربلتها وصياغتها ..
لذلك تجد على سبيل المثال / السيرة الهلالية جمعت على روايات مختلفة
وتغنى أيضاً على الربابة على روايات مختلفة _ ومايؤسف له أن هذا الأدب
طرقه عمنا العبادي دون غيره في السودان ولو أن أحدهم حاول جمع سيرة طه وود كين
(شاعر آخر) لخرجت السيرة على شكل آخر _ مع الإتفاق في بعض النصوص الثابتة
وثوابت القصة والإختلاف في شكل النظم ..

وإن لم يكن كلامي واضحاً ..
سأعود بتوضيح أكثر ..

محبتي ..

Post: #50
Title: Re: قصه .. طه وريا مع ودكين ..
Author: osman abdala
Date: 02-21-2010, 10:07 AM
Parent: #48

اسامة وكمال والمنسي

واصلوااااااااااا

لا تحرمونا من الاختلاف الحميد



وحهة نظر: ان شعر العبادي لم ينتقص من اي القبيلتين
علي العكس تماماُ صور و عكس لنا ما يحتاج لي الاف الصفحات
من الكتب في نص شعري سلس و بلغة اهل البادية

Post: #54
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 11:14 AM
Parent: #44

(*)

ولعمري إن أجمل ما رود بهذه الملحمة هي أبيات (طه البطحاني) في رثاء (حمد ودكين) نفسه _ أي أنه قتله ورثاه وعدد مآثره
(شهامته وشجاعته وكرمه وشدة بأسه) _ ولأان (البطاحين) و(الشكرية) أبناء عمومة فقد أحس (طه) أنه بقتل (حمد ودكين) قد خسرت القبيلتنان
فارساً وقائداً ورجلاً كريماً هو خسارة للجميع _ وإن قتله مضطراً من ناحية وغير مصدقاً من ناحية _ لأان (حمد ودكين) كان فارساً لا يجارى
Quote: هنا مواقف عظيمة
موت المثله فقدان للعرب بالجملة...

أكيد كان طه يعرف من هو حمد ود دكين...(أنا لي لقاك من صغير متدرب) وعارف أن الحتمية التي جعلت منه فارس القبيلة في يوم ما سوف يكون اللقاء مع مثل حمد الدكين..
وأكبر من ذلك معرفة طه لنفسه .. ومكامن ضعفها مكنه من الوقوف في وجه أكبر مقاتل عرفته البطانة .. شيخ العرب.. واعترافه بذلك ( على شوية كان داير يعمل العملة ) أي يقتل طه ويأخذ ريا... لكن عواقب العملة هي التي جبرت كسر طه ( ما بصح لريا تبقى سبية لأنه في هذه الحالة يكون أخذها بقوة السيف ... وهذا يذكرنا قصه عروة الورد ... زعيم الصعاليق .. ومحبوبته التي أختطفها بسيفه وهام بحبها وفرضت عليه أن يعيدها لأهلها ويطلب يدها منهم .. ولما رجعت رفضت برغم حبها له .. لأن أخذها عنوة كان نقص لكرامتها)..



نبل هؤلاء العربان أخي / المسافر لا تحده حدود _ رغم الإقتتال إلا أن أحدهم لا يستطيع إنكار فضل الرجال ..
أبيات (طه ) في مدح (حمد ودكين) كانت بكائية ورثاء نبيل :

زايله رقد ود دكين اسد القبيله الراعي
كان ما ضايقني هو .. ما كت قطعتو ضراعي
(وهنا وصف قتله لود دكين كقطعه لذراعه ) ..
موت المتلو نقصان للعرب في الجمله
كان راس الجرارق وهو البقود الحمله
اطرا فعايلو جفني يجف بعد ما يمله
كما شويييه كان داير يعمل العمله




رغم أنني (شكري) النسب إلا أنني لم أعش بينهم و (عاصر) على أهل أمي (كواهلة وجموعية)
إلا أنني أقرأ هذه المرثية (وشعر جلدي) يقوم ..
فسلام على الكرام بطاحين وشكرية ..
وأرجو أن تقرأ هذه الملحمة على وجهها الذي أراده العبادي _


____________________________________________
وآسف يا الحبر على إقتطاع هذا الجزء من ماسيأتي لا حقاً ..

Post: #51
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 10:31 AM
Parent: #1

متابعه للنص

رد عليها طه :
تاني امضي حول وانا بالحشا اتالم
علي حكمك صعب انا قابله ما بظلم
نستني السنة قاسية وصعيبه علينا
ردت عليه ريا :
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا
يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو
وتقوم ريا فايته علي الفريق وطه يعاين فيها وهي ماشه ويقول :
ياليت السعادة ان كان وقت ايديه
كنت اعيش غني في الدنيا بالزنديه
علي حكموا ناسي الفب اخذوا الديه
اموت بالعطش والمويه بين ايديا
اه يا رب ارحم صبري امس ضنين
يمحف ديه السنه ربي الحليم وحنين
يخصمه من حياتي رضيت بعشرة سنين
وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال :
بالضيفان تمري لا سلام لا كلام
صدقوا اهل المثل توب العرب صح لام

ريا ردت عليه :
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتكم كيف
العربي قال ليها :
من وين في الاهل كفاك فخر يا بنية
ردت عليه ريا :
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه
________________________________________
قام رد عليها ود دكين طبعاً عرفها انها هي زولتوا :
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا

فردت عليه ريا قايله :
كما يسد مكانن قدموا ليش يوطاها
( يعني ماشي في الواطه لي شنو غير اكرام الضيف واغاثة الملهوف(
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي ووشيه
رد عليها و دكين :
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد وديه المحريه
قام واحد من العرب داير يعرفا انه ده شيخ العرب ود دكين فقال :
ما بتسألي لامن وين ولا وين ترسو
قالتلوا ريا :
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديثو تعرف أبوه وجنسوا

فرد عليها العربي :
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيه

ده خريف البطانه المالوا فيها مشارك
هيلوا السارحه هيلوا الصاهله هيلوا البارك
ما وقع لك كلامي ساكته لي شنو خبارك
فخرك ود دكين جاك في فريقك زارك
ردت عليه ريا :
اهلا حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
تابعو إن جانا نجري ونخدموا حفايه
رد عليها ود دكين :
بارك ربي فيك عقلك يدوم يا ريا
كرمك ماهو كلفه دي طبعتك فطريه
إياك بت التلوب والسمته فيك محريه
قديم فوت البطاحين عزه للشكريه

Post: #52
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 11:02 AM
Parent: #51

Quote: الأخ الفاضل / خالد
أنا لم أنكر شاعرية عمنا العبادي وماكان لي
وماقصدته أن أدب جمع السير يعتمد على معالجتها
والمعالجة تكون بجمع السيرة وماصحبها من أشعار وغربلتها وصياغتها ..
لذلك تجد على سبيل المثال / السيرة الهلالية جمعت على روايات مختلفة
وتغنى أيضاً على الربابة على روايات مختلفة _ ومايؤسف له أن هذا الأدب
طرقه عمنا العبادي دون غيره في السودان ولو أن أحدهم حاول جمع سيرة طه وود كين
(شاعر آخر) لخرجت السيرة على شكل آخر _ مع الإتفاق في بعض النصوص الثابتة
وثوابت القصة والإختلاف في شكل النظم ..


أخي كمال
بدءً أنا لم أقل لك قط أنك أنكرت أن العبادي شاعر
أرجع لكلامي
قلت :
لو لو كانت النصوص فعلاً جمعت فقط يبقى العبادي جامع لنصوص الملحمة ..
وهنا لا نقول شاعر الملحمة بل جمع نصوصها ..
هذا الذي أريد أن أصل إليه

لا أختلف معك أن كثير من السير جمعت في شكل نصوص قيلت
لكن هنا الوضع يختلف

هل تملك مستند أو قول أدلى بذلك

لأنه عندي قول أن شاعر الملحة هو العبادي

القصة لم تكن كاملة بالنصوص الشعرية كما ذكرت لكن الشخوص فعلاً
وهذا لا ينفي أن حديث الناس قديما حكم وشعرا ونثرأ بليغ ...

الرجاء أفادتي لو كنت تملك قول أو مستند يقول ذلك أن نصوص الملحمة جعت شعرا وفقط قام العبادي بمعالجتها .....

تحياتي ومودتي

Post: #55
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 11:31 AM
Parent: #52

Quote: أخي كمال
بدءً أنا لم أقل لك قط أنك أنكرت أن العبادي شاعر
أرجع لكلامي
قلت :
لو لو كانت النصوص فعلاً جمعت فقط يبقى العبادي جامع لنصوص الملحمة ..
وهنا لا نقول شاعر الملحمة بل جمع نصوصها ..
هذا الذي أريد أن أصل إليه

لا أختلف معك أن كثير من السير جمعت في شكل نصوص قيلت
لكن هنا الوضع يختلف

هل تملك مستند أو قول أدلى بذلك

لأنه عندي قول أن شاعر الملحة هو العبادي

القصة لم تكن كاملة بالنصوص الشعرية كما ذكرت لكن الشخوص فعلاً
وهذا لا ينفي أن حديث الناس قديما حكم وشعرا ونثرأ بليغ ...

الرجاء أفادتي لو كنت تملك قول أو مستند يقول ذلك أن نصوص الملحمة جعت شعرا وفقط قام العبادي بمعالجتها .....

تحياتي ومودتي


كلام سليم أخي / خالد ..

سأحاول الإتيان بإجابة شافية من بيت خالتنا (ملكة إبراهيم بابكر العبادي)
ويمكنني أيضاً الرجوع للأستاذ/ حاكم سلمان (زول ودرعية) الإذاعي المعروف فهو متزوج من إبنة
العبادي والعبادي له أحفاد في أمريكا (أبومدين) وشقيقه ..
وله إبن أيضاً ..

كنت قد بحثت عن أمر السير منتصف التسعينيات وأهتممت بهذه السيرة الفريدة
وقد تحاورت مع الخالة (ملكة العبادي) ومع بعض المهتمين بالأدب الشعبي مثل الراحل الطيب محمد الطيب
وأحد شيوخ الدامر (نسيت) إسمه _ وهؤلاء لديهم مخزون من الروايات والسير الشعبية المجموعة على روايات مختلفة
وللأسف ليس هناك وثيقة تثبت ذلك غير رواية المعاصرين للعبادي ..
وما أردت تكراره أن الأشعار للعبادي لكن القصة جمعها من أفواه الرواة _ بحثاً وتنقيباً وترحالاً ..

سأحاول الإتصال ببعض هؤلاء والإتيان بأكيدة إن شاء الله ..

محبتي ..

Post: #53
Title: Re: قصه .. طه وريا مع ودكين ..
Author: كمال عكود
Date: 02-21-2010, 11:02 AM
Parent: #51

الأخ محمد طه وضيوفه الكرام

تحية طيبة

حصل في منتدانا نقاش في هذا الموضوع جميل جدا وفيه فؤائد جمة أحببت أن تستفيدوا منه في هذا الخيط

وكما يقال الشي بالشي يذكر


وتجدونه على هذا الرابط


http://wadhamed.net/vb/showthread.php?t=2732&highlight=...C7%E1%DA%C8%C7%CF%ED

Post: #56
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 11:40 AM
Parent: #53

قال طه :
خير الزول يقول مهما الامر يتهول
قالوا الناس علي فالو الحلم بتأّول
غاية الحي فناهو إن كان قرب إن طول
يترك ذكرو والناس الوري بتتقول

قالت ريا :
يا طه ...
أحكي لي الحلم التورك مشغول



حب طه أن يطمأنها أن كل الذي كان أحلام وبتعدي في طريقها...
وأن الحُلم متى ما فسر وقع
لذا أوصانا الرسول الكريم عليه الصلاة والسلام فيما معناه
في الحديث الشريف ..
الرؤى والأحلام على كف ملك طائر متى مافسرت وقعت ...
لذا ينصح العارفين بالدين عندما يرى الواحد منا حُلم
أن لا يحكي لمن لا علم له .. لأنه قد يفسره حسب هواه ويقع
أن الحلم أن رأيت فيه خير ولا شر أن تقول أللهم أجعله خير

والحكمة الأخرى التي أوردها طه أن الكلمة الطيبة هي الباقية
وهي السيرة بعد أن يفارق الإنسان دنيا البشر للدار الأخرة

والفال كما أوردنا هو القدر والله أعلم

قامت ريا حبت تعرف الحُلم الذي توّر طه مهجوم

وقالت لي أحكي لي الحُلم التورك مشغول

أنظر للبلاغة التي إستخدمتها وما حبت تجرحه وتقول له مهجوم ( فقالت مشغول أي مشغول البال )

وتوّرك أي أصحاك من نومك

Post: #57
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 01:03 PM
Parent: #56

قال طه :
أصبري لي أروقي عقد الفكر مبهول
احكيلك شنو ؟ الشفتو والله مهول
شفت الوحده وشفت النار وشفت الهول
أحكيلك تمام الشفتو ما بتغابا
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تُقابه
قدر ما نشوف بعيد قدامنا نلقي حريق
وكت النار عِلت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق
فترتي صنقرتي قعدتي , انا محتار جلست وراكى
حاقبه الدرقة ختيت سيفي فوق أوراكى
وكت بعد البهم غسعتي قمتى براكى
غسعتي وجيتي معاك كور صقور تبراكى
تبت بي عجل شافنى جفلن و طارن
غابن من عيوني وفي اللعوت إتضارن
ما غابن كتير جن يقدلن يتبارن
قدامن كبيرن عينني وغارن
سل السيف ولاقاهن أخوك يالضامره
تور عنز أم هشيم الفي المجامع دامره
تل سيل واندفق، فوقو السحائب الهامره
حجر الصاقعه فرتاك الصفوف العامره
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن
قالت له ريا :
عارض ومات ، لي الليلة إمكن عفن


بعدما ريا طلبت منو يحكي ليها الحُلم الصحى منه مشغول
بدأ يحكي لها وأبتدر أبياته أن تمهله حتى تترتب أفكاره لآن الحُلم المزعج شتت أم فكاره.
نشرح هنا بعض المعاني والألفاظ وليس شك في مقدرات القارئين في معرفتها لكن
حتى تعم الفائدة ويستفيد الكل وأولهم أنا لأني قد أكون فهمت كلمة بمعنى غير معناها
الحقيقي ويأتي التصحيح من متداخل. وبالله التوفيق والخطأ من عندنا


عقد الفكر مبهول : أي مشتت

مهول : هائل وكبير
إتغابا الشئ : أي أجهله ولا أعرفه وقد تكون عنوة أو جهل بالشئ

التقابة : هي النار ومنها تُقابة القرآن اي ناره التي توقد للقراءة
تباصر الشئ : اي تحاول أن تجد حل وهي من البصيرة والبصير من يرى الأشياء على حقيقتها

غسع البهم أو البهائم ردها من المكان الذي ذهبت إليه قد يكون مرعى لأخر وقد يكون أرض لا مرعى فيها لذا يغسعها الراعي

كور : اي جمع .. كثرة
كور صقور عدد من الصقور

تبَّ : أي نهض مسرع

جفل : اردَّ خوفاً

اللعوت : من من الأشجار

سل السيف ولاقاهن أخوك يالضامره
تور عنز أم هشيم الفي المجامع دامره
تل سيل واندفق، فوقو السحائب الهامره
حجر الصاقعه فرتاك الصفوف العامره

في هذه الأبيات يصف نفسه كيف قابل الصقور في حُلمه
الضامرة اي الهيفاء
اي إلتقاهم بهجوم قوي وعنيف كما فعل تل من السيل خرّا
ويزيد الوصف حلاوة حتى يثبت كم قوة هذا السيل أنه سيل دافر وما زال المطر مستمر
سيل وإندلق وفوق سحابة ما زالت تهمر من الماء غدق
يرف اي يتحرك في حركة منتظمة
ومنها رفة العين
وعيني ليها زمن ترف يا ربي دايرا تشوف منو ؟

بعدما حكى لها الحُلم والذي كانت نهايته انه قتل كبير الصقور وبعد موته طارن بقية الصقور
ريا قالت لي :
عارض ومات اي الشئ الذي كان يمكن أن عارض لنا في حياتنا مات
وامكن ليوم الليلة يكون عفن

Post: #58
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 01:13 PM
Parent: #57

Quote: وما أردت تكراره أن الأشعار للعبادي لكن القصة جمعها من أفواه الرواة _
بحثاً وتنقيباً وترحالاً ..

أخي كمال إستناداً لقولك هذا
نحن غير مختلفين
أرجع لحديثي
فلت فيه أن القصة ومجريتها حصلت على أرض الواقع
لكن الحوار والحديث بالشعر من تأليف العبادي وخياله
وأعني بخيالة أنه ألم بالصقة وتفاصيلة كلاماً عادي
وخياله الجميل الشاعري حمله على أن يصيغ هذا الحديث
شعراً جميل يخلب العقول جمالا وأبداعاً وبلاغة
هذا الذي أقصده
أنا فهمت من حديثك أنك تعني أن العبادي جمع الحوار
الذي حصل مثلاً بين ريا وطه وهو نفس الكلام الذي وصلنا شعرا
وهذا أنا أختلف فيه معك لو كان زعمك هكذا

تحياتي ومودتي أخي كمال على سعة الصدر وردودك

مودتي

Post: #59
Title: Re: قصه .. طه وريا مع ودكين ..
Author: كمال علي الزين
Date: 02-21-2010, 01:23 PM
Parent: #58

Quote: أنا فهمت من حديثك أنك تعني أن العبادي جمع الحوار
الذي حصل مثلاً بين ريا وطه وهو نفس الكلام الذي وصلنا شعرا
وهذا أنا أختلف فيه معك لو كان زعمك هكذا



العزيز / خالد _ الناس لا يتحاورون شعراً _كماهو معلوم
نحن متفقان _ تماماً ..
نقطة الخلاف إن القصة من خيال العبادي أم أنه جمعها من أفواه الرواة وصاغها شعراً
الملاحم والسير تجمع كروايات وتصاغ شعراً لتستخدم ك(نمة) أو (دوبيت) أو غناء الربابة المعروف في السير ..

الآن فهمتك تماماً وأتفق معك ..
أرجو أن تواصل ..

وسأواصل في مسألة نسبة البطاحين والشكرية وأصولهم وزعم أن البطاحين والجعليين أبناء عمومة ..


محبتي ..

Post: #60
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 02:32 PM
Parent: #59

Quote: الآن فهمتك تماماً وأتفق معك ..
أرجو أن تواصل ..

وسأواصل في مسألة نسبة البطاحين والشكرية وأصولهم وزعم أن البطاحين والجعليين أبناء عمومة ..


محبتي ..


أخي كمال
هذا موضوع هام وجميل وكلنا منه بالجهل ما كفى
أتمنى ذلك وهذا سوف يجعل البوست مميز ومفيد

أريد أن أنوه لقول لم أعلق عليه قبل ...
ملحمة العبادي أنا أرى أنه عالج فيها الكثير وعكس فيها تاريخ بحاله
لحقبة وحال ومكان
فيها الكثير من الألفاظ التي لم تتعود عليها أذن إنسان هذا الزمان وإن وجد ندر
فيها من الحكم لو أعتبرنا بها لكفتنا شر الغير وأصبحنا في أخاء ونعمة

ولك الود والتقدير


Post: #61
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 02:48 PM
Parent: #60

Quote: والله حقاً كما قال صديقى الدكتور احمد القرشى ما ولج خالد المنسى ناصية الآدب والفنون الا أبان واجاد

فهذا البوست إزدادت دسامته بهذه الطلة البهية للاخ المنسى


الأخ العزيز عادل سهل
سهل لك الله كل أمر قاسي
لك السلام تحية طيبة

شكراً كتير على هذا الإطراء
وهذا من طيب أصلكما أنت وعزيزي الأخ الصديق أحمد القرشي
وندعو الله أن لا يصيبنا الغرور
ونبفى زي الحمار شكرو رقد
هههههههههههههههه

وللحديث بقية
ولك الشكر تاني وتالت

مودتي

Post: #62
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 03:24 PM
Parent: #61

الاصفياء خالد علي

كمال علي الزين والبقيه

سوف اعود بعد لحظات

لنشر مجموعه كبيره من الابيات لقصة طه وريا وحمد ودكين والشكرية والبطاحين

تحياتي

Post: #63
Title: Re: قصه .. طه وريا مع ودكين ..
Author: haroon diyab
Date: 02-21-2010, 03:57 PM
Parent: #62

مرة اخري.....

بوست جميل ورائع

وكلام مرتب.....

ونقاش هادف وواعي

ومداخلات ثرة من الاحباب

حالد واسامة وكمال والحبر

لاول مرة اطلع علي شعر البطانة

وتجدني انقاد مع هذا البوست....مداخلة.....مداخلة

فمزيدا من التواصل والسرد الجميل لان اعتقد بان

هذا جزء من توثيق لكيانات مهمة في تاريخنا....

والاجمل هنا هذا التوثيق المقفي .

لكم الود جميعا

Post: #64
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 04:05 PM
Parent: #63

طبعا قصة طه وريا وحمد ودكين والشكرية والبطاحين تروجت
هذة القصة بكثير من الاقاويل وتم فيها كثير من التبديلوهذا هو اصل القصة التي حصلت في البطانة بين الشكرية والبطاحين والتي انتصر فيها طه البطحاني واحتمي بالمك نمر الجعلي افا دار جعل شيالين التقيلة
المهم اترككم مع القصة
قصـة ود دكين مع طه
تروي الروايات ان هذه الواقعة وقعت حوالي عام 1818 ميلادية وكانت الواقعة الشهيرة بقتل أحد فرسان البطاحين حمد ود دكين زعيم الشكرية واحتمي البطاحين بابناء عمومتهم الجعلين وعلي رأسهم المك نمر وكادت الحرب تقع بينهم ولكنها انتهت الي الصلح .
وصور الشاعر الكبير إبراهيم العبادي هذه الواقعه مع إضافات أدبيه جمه ومحسنات أفضت بها إلي مسرحية شعريه بقت أثر عظيم لتلك الواقعة التي تناسي التاريخ سببها الأصلي وبقيت أبيات الشعر وألحان القوافي .
هذه المسرحية قدمتها فرقة الرواد المسرحية على خشبة المسرح القومي بامدرمان
في العام 1968م و استمر عرضها حتى عام 1971م وقد لاقت نجاحا واقبالا شديدا
خاصة بعد أن طافت أقاليم السودان حيث كانت مدينة شندي آخر محطة للعرض
ثم تجمعت الفرقة مرة أخري و قدمت آخر عرض لهذه المسرحية على خشبة مسرح نادي
العمال بالخرطوم وكانت المناسبة هى عيد العمال و كان ذلك في العام 1976 بحضور الأستاذ إبراهيم العبادي .
فرقة الرواد المسرحية كان معظم أعضائها من العمال في النقل الميكانيكي ومصلحة لمخازن والمهمات و كانوا هواة يتمتعون بموهبة عظيمة في التمثيل .
كانت المسرحية من إخراج المرحوم احمد عثمان عيسى وقد لعب هو نفسه دور طه،
المرحوم ميرغنى خليفة عثمان لعب دور حمد ود دكين .
الأستاذ إبراهيم حجازي لعب دور ود النعيسان
ابراهيم احمد حمد لعب دور المك نمر .

Post: #65
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 04:15 PM
Parent: #64

القصه من الاول

أخوك يا ريا وكت الخيول يدبكن
أخوك يا ريا وكت الرماح يتشبكن
أخوك جبل الثبات وكت القواسي يحبكن
كم بكيت وكم قشيت دموع الببكن
قالت ريا :
وراك أسود علي ما نمت اسع طيب
قال طه :
بسم الله قولي أخو طيب طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب

الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس أنا ما بخافو لقاهو
ياليت الحلم في صحيا كان بلقاهو
كان خير ولا شر برجاه ما بهم بالي
وحارثني الثبات من الكبار قبالي
وكت هسه حسيت ولقيتك صاحية قبالي
ان اتلخبط الكون تاني ماني مبالي
قالت ريا :
كعب نوم النهار أمس العصير كنت نايمه
رأيت قدام الفريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه
قال طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه
قالت ريا:
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها
وقعدت ريا تبكي:
رد عليها طه وقال :
ما بفيد البكاء وكلامي احسن تنسي
قالت ليه ريا :
كيف ما أبكي وكيف أفوت مراتع أنسي
افقد كل شي عزي ورجالي وانسي
تطلق فوقي نار عقبان تقول لي أنسي
كنا في سيرة لقاء طه وريا وهم بيحكوا لي بعض قصة الحلم
قال طه :
فال الخير أخير ما شفنا شيناً جدت
كلا لشفنا أحلام في طريقه إتعدت
قبل الليلة إيد لحمان قطْ ما اتمدت
ما بنهد شرفنا لو السماء إنهدت
قالت ريا :
خير إنشاء الله خير والخير مساك وصباحك
والفال السمح فالك يضوي مراحك
بالضيفان أشوف عامر تملي مراحك
شينك ما أشوف وأشوف هناك و أفراحك

قال طه :
خير الزول يقول مهما الامر يتهول
قالوا الناس علي فالو الحلم يتأول
غاية الحي فناه إن كان قرب إن طول
يترك ذكرو والناس الوري بتتقول
قالت ريا :
وريني الحلم التورك مذهول
قال طه :
أصبري لي أروق حبل الفكر مبهول
احكيلك شنو الشفتو والله مهول
شفت الوحده شفت النار وشفت الهول
أحكيلك تمام الشفتو ما بتغابه
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تقابه
قدر ما نشوف قدامنا نلقي حريق
وقت النار علت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق
فترتي قعدتي , انا محتار جلست وراكى
حاقبه الدرقة ختيت سيفي فوق أوراكى
وكت بعد البهم لى قسعو قمتى براكى
غسعتي وجيتي ومعاك كور صقور تبراكى
تبت بي عجل شافنى جفلن و طارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عينني وغارن
سل السيف ولاقاهن أخوك يالضامره
تور عنز أم هشيم الفي المجامع دامره
سيل تلوى اندفق فوقو السحائب هامره
حجر الصاقعه فرتاك الصفوف العامره
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن

قالت له ريا :
عارض ومات خلاص لي الليلة يمكن عفن
بعد ان بدأ طه يطمئن ريا اراد ان يقطع الشكوك والمخاوف من تحقق هذا الحلم بالزواج من بنت عمه ريا فقال :
نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا
بطال البعيش في الدنيا اصلوا غناه
ان كان مالو راح غير اهله مين يدناه
سمح لبفوق اساس ابواتو تمه بناه
والزول دون قبيله غناه شن معناه
ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا
كل بطحاني يفرح بي عرسنا مناه
ساعة جمعتن بيتنا يتم بناه
عذاب عيش العزب يا ريا مر ضضقناه
سمح الزول صبي يد ويربي جناه
طبعاً ريا ما قبلت الكلام ده لانو ابوها عبد الله المعروف بابو كبس ما تمّ سنه من وفاته والناس في حالة حداد فقالت :
ده الاعوج تراه والشين نهايه حدو
إن شاع ده الخبر يملا الفريق لي حدوا
يقولوا ابكبس من دخل ود احدو
فرحوا وعرسو لا موجعن لا حدو

إن كان في الفريق ماتت مريه ذليله
لي الحول يرفعوا العرس الدخلتوا الليله
خليه ابكبس راجل الرجال ودليله
إن كان بي قبيلة تعدوا تبقي قليلة
خليه الكلام وعرسنا في ده الحال
من بالك أمرقو محال والف محال
علي ميتت ابوي لي الليله حول ما حال
نصبح بكره ونسه وبهادل حال

ونواصل رد طه عليها

Post: #66
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 04:26 PM
Parent: #65

رد عليها طه وقال ليها :
الموت ما شمت غاية البخود والببروا
والموت والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا
بنخاتر منو الوجعه هيلنا برانا
نحن أهل المصاب والناس عزا مجابرانا
في آخر المراح دايماً تجي الفترانا
هادة الحد ندوس والناس عقب تبرانا
بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد
فقالت :
الناس بالمكارم والفعال بتباهو
زي الفطرة ينشا الزول حسب مرباهو
عاة جدو عادتو ونحل ابوه نباهو
يلبس ثوب قبيلته ان داره ولا اباهو
من الليلة حول مضيوه تاني اتكلم
الدايروا بيتم رب العباد ان سلم
رد عليها طه :
تاني امضي حول وانا بالحسا اتالم
علي حكمك صعب انا قابله ما بظلم
نستني السنة قاسية وصعيبه علينا
ردت عليه ريا :
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا
يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو
وتقوم ريا فايته علي الفريق وطه يعاين فيها وهي ماشه ويقول :
ياليت السعادة ان كان وقت ايديه
كنت اعيش غني في الدنيا بالزنديه
علي حكموا ناسي الفب اخذوا الديه

اموت بالعطش والمويه بين ايديا
اه يا رب ارحم صبري امس ضنين
يمحف ديه السنه ربي الحليم وحنين
يخصمه من حياتي رضيت بعشرة سنين
وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال :
بالضيفان تمري لا لام لا كلام
صدقوا اهل المثل توب العرب صح لام
قامت ريا ردت عليه :
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتك كيف
قام العربي قال ليها :
من وين في الاهل كفاك فخر يا بنية
ردت عليه ريا :
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه
قام رد عليها ود دكين طبعاً عرفها انها هي زولتوا العاوز يعرس زاته فقال :
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا

ونواصل رد ريا عليه

Post: #67
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 04:41 PM
Parent: #66

فردت عليه ريا قايله :
كما يسد مكانن قدموا ليش يوطاها
( يعني ماشي في الواطه ليشنو غير اكرام الضيف واغاثة الملهوف(
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي ووشيه
رد عليها و دكين :
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد وديه المطريه
قام واحد من العرب داير يعرفا انه ده شيخ العرب ود دكين فقال :
ما بتسألي لامن وين ولا وين ترسو
قالتلوا ريا :
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديث يعرف أبوه وجنسوا
فرد عليه العربي :
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيه

ده خريف البطانه المالوا فيها مشارك
هيلوا السارحه هيلوا الصاهله هيلوا البارك
ما وقع لك كلامي ساكته لي شنو خبارك
فخرك ود دكين جاك في فريقك زارك
ردت عليه ريا :
اهلا حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
تابعو إنت جانا نجري ونخدموا حفايه
رد عليها ود دكين :
بارك ربي فيك عقلك يدوم يا ريا
كرمك ماهو كلفه ديه طبعتك فطريه
إياك بت التلوب والسمته فيك محريه
قديم فوت البطاحين عزه للشكريه

في الوقت داك جاء طه ووجدتهم واقفين فقال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدرنا
تنزلوا في الدرب مالنا ماتت نارنا
رد عليه شيخ العرب:
حباب طه الضرس والفي الصهيباب راس
الجود والكرم يلك قديم ميراس
نارك ما بتموت با ولده الفراس
قاصدين ام شديد ومعانا عوجه راس
رد عليه طه :
لعدوك العوج يا الفي الكبس سراي
راسك ما بدوس مليان رجاله وراي
باكر لي ام شديد اركب معاك براي
يا شيخ العرب لاكن تختوا كراى
طبعاً شيخ العرب ما فهم كلمة كراى ديه فقال لي طه :
هادي الشورة يا طه الغلبني دليله
كل البزمه القاهو فيك قليله
رد عليه طه شارح ليه كلمة كراي :
كراي الدايروا تبقوا ضيوفنا انتو الليلة
ترقدوا في الفريق حتي ان عشانا بليله
رد عليه ود دكين :
مسكنا الدرب أسرع قوام ما تلعب
دارك ديمه عامره والسمح ما بكعب
يكفين الوصف لاتشد جمل لا تتعب
وهدنا الطريق عقب الوصول ما بصعب
رد عليه طه:
يمين تغشوا الفريق بتفوتوا نحنا مقابر
رد عليه شيخ العرب :
عامر انشاء الله ديمه اياك مرسى العابر
مشطوطين خلاص مسكنا في دريب جابر
نخاف عوج الطريق منو لي المقدر خابر
رد عليه طه :
دريب جابر مزم والسكه سالكه ورايقه
فرقان ما بتلاقيك ما بتعوقك عايقه
اخذ خاترنا نحنا قالوا واصله السايقه
بتراوح ام شديد باكر زواملك فايقه

رد عليه ود دكين :
الزول ان وعد شين ميعادو يخلفو
في ربط اللسان يسخابو دمو يتلفو
سفري الليله فيه زولين ما بختلفو
ضروري اصل ام شديده علي وعد بي حلفو
ما بعرف ازوق من نشيت تبيت
فريقكم لي فريق وبيتكم يمين لي بيت
اجيك ديناً علي حتي إن بقيت حبيت
هاك وعداُ نجيض ارجانا بكره مبيت
شوفتي للفريق ايام بكي ابواتك
ما غابني حالك سمعت بي نخواتك
فريقك بكره ضيفوا وما بفوتوا وحاتك
إلا أحققك وبراي اشوف نفحاتك
يا ود الهميم النفسوا ما معارضاه
كرم الضيف عليك مكانه ابوك فارضاه
جاييك في امر ان تابه وان ترضاه
غيرك ما بكوس واملي بس تقضاه
رد عليه طه :
غرضك مقضي كان احتاج لخيل وجمال
والضان والابل سارح يمين وشمال
رد عليه ود دكين :
فوق القولتو انا لي فيك امال


ونواصل رد طه علي ود دكين

Post: #68
Title: Re: قصه .. طه وريا مع ودكين ..
Author: الامين محمد علي
Date: 02-21-2010, 04:54 PM
Parent: #66

اولا شكرا على هذا المجهود الرائع

ارجو ان تتكرم بالجزء الثاني من التسجيل

Post: #69
Title: Re: قصه .. طه وريا مع ودكين ..
Author: Elsanosi Badr
Date: 02-21-2010, 05:08 PM
Parent: #66

Quote: كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديثو تعرف أبوه وجنسوا

هيييععع




راخين الرسن هني تب

Post: #70
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 05:34 PM
Parent: #69

الاخ الامين

اولا شكرا لمرورك هنا

تفضل هذا الجزء الثاني من التسجيل

طه وريا الجزء الثاني

Post: #71
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 05:36 PM
Parent: #70

ونواصل القصه

رد طه علي ود دكين:
بي دمي الغرض اقضاهو خلي المال
المهم طه زي فهم شيخ العرب وده ماشيلوا جاي وطه ماشيلوا علي المال
فرد عليه شيخ العرب :
دي المأموله فيك وين الدرب خترنا
رد عليه طه :
دربكم في السلم
قالوا شيخ العرب :
والله تب ما ودرنا
بكره نجيك ان قلينا ولا كترنا
وهنا ودعهم شيخ العرب وسار بي جماعته قاصد ام شديد وعلي اساس في اليوم التاني ينزل ضيف علي طه وقبيلة البطاحين
وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا :
في البال لي ضمير شيخ العرب متعوب
قايم نفسه يختف في الكلام مرعوب
ما خاتيلوا شئ ما شوفتي كيف مرعوب
حمد ود دكين مرتع دياروا وربعوا
ده الشئ السمعتوا من الاباه والتبعو
الراجل فاعيلوا يبين لك طبعوا
انا ود الخلا البعرف اسوده وضبعو
ردت عليه ريا :
اعوج كان يخلف الليله ميعاد جيتو
رجال وحريم كل اهل الفريق في رجيتو
قطعوا السارحه كل زول في مراحو سعيتو
كبار وصغار و حتي الراعي خله رعيتو
قال ليها طه :
محال يخلف محال قال جايبو غرضاً عندي
ردت عليه ريا :
كان غرضاُ صعب ؟؟؟؟؟
رد عليها طه :
كان رأس نمر في شندي
وعدتوا أقضاه وابذل كل جهدي العندي
كان بالمال وكان بالراى وكان بي زندي
قالت ريا :
هيلك من زمان غنت البجيك تحجالوا
لاكين ود دكين عامر قديم برجالو
قال ليها طه :
يا ريا الكلام ده اخير تقفلي مجالو
وكت اوعدته بقضالو غرضو الجالو
وفي وقفه طه وريا يجوهم ثلاثه من ابناء البطاحين عبدالله وخلف الله وأحمد
قال عبد الله :
سلام يا طه
قال طه :
مرحب بي كبار قبيلتي وعزي
مرحب بالاسود البفقعوا المستهزي
ريا جات قبيلتك فوقه انكعى هزي
وإن زحينا يوم الحارة قرنك جزي
ردت عليه ريا :
اولاد بطحان تعيشوا ويزيد مراحكم ناير
وناركم في سرات الوادي تهدي الحاير
بتحلو المضيق وتصدوا غارات الغاير
ما هيلم تزحوا غن كان يزح الداير
قام خلف الله لما سمع الكلام ده خاف وارتجف واصابته خوفه كده
فناداه عبدالله قال :
خلف الله ولدي اقعد قبال ود عمك
كلام ريا هادا بشوفه غير دمك
من زمن بعيد أتمني أسمع نمك
فرج همنا مولاي يفرج همك
دوبينا ......قول ... دوبينا
قال خلف الله :
الولد البخاف من القبيلة تلومو
بخلف ساقوا فوق تيساً رقيق قدومو
اما يجيب رضوه البهم البينقر فومو
وإما تخامشن قدح الرماد حرومو
سنابك حضر الطافه و جرايدك نوا
كورك سال و مزيقا و رطانه و عوا
الخلاني فوق نار أم لهيب أتلوي
النوم شفتو يا قرد القلوع شن سوا
أكل الشلخه لامن كمل المنسية
شمخ الحورى لبعصه عريب بت ريه
أكان ما أسكت الباكيات و أخلف الكيه
قوله أبو فاطنه يا الصادق خساره عليا
خرير دوماتو فوق عاجن رسن متلاقيه
يا الغول النقيب سويلو سوق الساقيه
بت معز الخلا الفوق الكجر متاقيه
عكرناها يا أمروبه النشوف الباقيه
وبعدين ظهر ود دكين في جماعته جايين علي الفريق
فقال طه :
هداك ود دكين بي زمله بان شفناه
دار اليوم يروح خلف الوعد خفناه
الراجل في الاصول ما خاتي لي معناه
يا ريه استعدي الزول جمعنا عناه
ولما وصلوهم ود دكين قال :
قلنا جاهم شيخ العرب فقال:
ولاد بطحان سلام اهل النبا و الشكره
سلام عز العرب اهل الفحل والبكره
سلام يا طه يا راس الكرم والضكره
جيت لي غرضي يا طيب الاصل والذكره
رد عليه طه :
مرحبتين حباب مرحب خريف الرازه
حباب شيخ العرب البيه القبائل عازه
حباب سيف العرب البيه هاشه وهازه
في يمنك قبيلتاً ما تقبل فازه
قام عبد الله قال : هيا جايهو الزمل
رد شيخ العرب :
خليه يا عبد الله
غرضي إن كان ما أنقضى أنا زملي ما بتدله
رد عيه طه :
الناس في رجاك من الصباح في مله
كدي شوف الطعام شيخ العرب بسم الله
رد شيخ العرب :
ما بأكل طعام كان ما حساب اتضرب
وقضيان الغرض فيكم حقيقه مجرب
الامر العنيتو كما اتدرب
ما بنفعني اكل وما بيرويني مهما اشرب

Post: #72
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 05:58 PM
Parent: #71

كانت العرب لا تمتنع عن تناول طعام قوم الا لوقع امر جلل وامر هام فيحاول اهل الدار واهل القبيله تلبيه ذلك الامر مهما كلف ومهما كان ثمينا

فقام عبدالله وقال:
ياشيخ العرب امرك خلاص همانا
قول غرضك عديل خصصنا او عمانا
عسع نقضى ليك في محلنا اللمانا
كان بي مالنا كان بي دمانا
رد ود دكين " شيخ العرب: "
عندكم الغرض لا بدور قلم لا ورقه
ماغرضاً تسافرو لو وتقيسوا الفرقه
يقضي ان قولتوا خير مابدورلو سيف لا درقه
وان قلتوا لا يروح شمار في مرقه

ما مقبوض وجيتكم لاجي فوقي جنيه
بي خيري ومراحي وتاني نفسي غنيه
جاييكم نسيب تدوني بطحانيه

رد عليه عبدالله :
خير سميها
رد ود دكين:
في بت ابكبس لي نيه
قال عبد الله :
يفتخروا البطاحين ساحتم راحبالك
لكن ريا امرها مقضي من قبالك
فات فيها الفوات لي طه هاد قبالك
من دون ريا قول الدايروا في بالك
ده فريق الصهيباب مافيهو واحده حقيره
مال ورجال وعز في الحله مافي فقيره
كثير الزي ريا مليان البلد من غيره
ان درت الضغار وان كان قصدت صغيره
قام شيخ العرب قال :
إن مال الشجر ما بكسرن فراعو
وقمحان الطلب لي المابجيبه ضراعو
ليه يا أهلنا البيناتنا ما بتراعوا
القال راسي موجوعني يربطولوا كراعو
قام عبد الله قال :
حبل المهله يربط انت ارتاح بيت
بكره نمر سوي ونلفي البيوت بيت بيت
سمي الدايره ولوم البقولك ابيت
رد عليه شيخ العرب :
يمين بالله غير الغايه مالي مبيت
هنا طه حز الكلام في نفسه لانه شيخ العرب بينوا ليه انه ريا مخطوبه وبعد ده هو بصر وبجادل فقام طه وقف وقال :
يا شيخ العرب أمرك بشوفو حقاره
وما جايباك مره الجابتك بس غارة
وقرناك كثير ونفسك ابيت وقاره
خبرك هادا ما دايرلو دق نقاره
قام واحد من اعوان شيخ العرب اسمه علي ووجه الكلام لي طه وقال :
قبلك في اللجج يا طه راحو الهدو
تتجاسر علي شيخ العرب بتهدو
زولكم ماعقل يا كبار كما تهدو
بعنادوا الفريق خايف يسبب هدو
هنا جو المجلس توتر وقام طه قال :
انا المالح الكارب خريفي وصيفي
المثلك تبيع ما بطول فوق قيفي
كما الليله في بيتي وبعدك ضيفي
في الشي السمعتو برد عليك بي سيفي
هذه الابيات تمثل قيم وجدانية راقية جدا
الحلم عند الغضب( فليس القوي بالصرعة، وإنما القوي هو الذي يملك نفسه عند الغضب، )
علو منزلة الضيف عند العرب
هنا قال شيخ العرب :
كفي يا بطاحين فيكم اتغشينا
كرمكم جانا طامح رخصه اتعشينا
بعد الشى السمعنا كان ما مشينا
خايف في اجتماعنا تقع وقايعاً شينه
في وداعة الله عقب بيناتنا ما في علاقه
وات يا طه اتشفيت شبعت شلاقه
عمرت الشر سعيت دليته بي معلاقه
نحن وانتو بعد الليله يوم نتلاقه
قام عبد الله عاوز يرضي شيخ العرب ود دكين فقال :
من ولدك زعل كل البلد بتكاورو
ارحكم بيتنا بيتو ونحن زولنا نداورو
نتدابر نشوف نحزم جمعنا نشاورو
رد عليه شيخ العرب :
ضيف الغابه حالف ده الفريق ما أجاورو
قام عبدالله قال :
سمح ارجانا يمكن طه نحنا نجبروا
رد عليه شيخ العرب :
الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبروا
رد طه علي شيخ العرب و قال :
سوي الدايره وكتر الكلام خليهو
والشر القصدتو معاي ابقي عليهو
طير اصل السما حتي القمر دليهو
يوم نتلاقه كل واحد بعرف الليهو


ونواصل حين خرج شيخ العرب ود دكين وعيونه يقدح منها الشرار

Post: #73
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 07:14 PM
Parent: #72

كان الرؤية أنه رأى صقور تريد أن تختف منه بنت عمه
وهذا الحُلم أفزعه شديد ...
وبعدما حكى لها الحُلم حبَّ أن يدخل في الموضوع ويشير إليها أن يتزوجا

فقال لها

نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا
في العامية السودانية تستخدم
هذه العبارة
( قرض أو أنقرض أو يقرض ) أي ( قتل .. قُتل .. يقتل )
والعجيب صارت أيضاً تستخدم حتى للموت العادي


بطال البعيش في الدنيا اصلوا غناهو
ان كان مالو راح غير اهلو مين يدناهو
سمح الفوق اساس ابواتو تما بناهو
والزول دون قبيلتو غناهو شن معناهو

ومازال يمهد للتسريع بالزواج لآنه يعلم أن ريا لا يمكن أن ترضى بذلك
لوفاة أبوها .. وكانت عادة الناس الحداد ولمدة طويلة.

يدناهو : اي الزول لو فلس منو البلمو غير أهلو

وسمح الفوق أساس أبواتو تما بناهو
اي الزول بسير على الطريقة الحميدة التي خطها له أهله الكِبار
ويتمسك بكل جميل موروث من كرم ونخوة وشجاعة شهامة

الزول دون قبيلتو غناهو شن معناهو
اي العز بالأهل والزول بحب أن يرى في أفراحو واتراحهه قرب أهله ويتنبر بهم
يعزهم ويعزوه ....

ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا

يا ريا المال والجاه والشياخة ما كل شئ الزول بحتمي بي أهلو ويبقو لي ضراع
وترس جماية ..
وهي عادة الناس قديما وحديثاً جمعتهم في الفرح والترح ودا شئ موروث عند أهلنا السودانيين
كافة .. يجو ويحضروا عرسنا

كل بطحاني يفرح بي عرسنا مناهو
ساعة جمعتم بيتنا بنتم بناهو
عذاب عيش العزب يا ريا مر ضقناهو
سمح الزول صبي يلد ويربي جناهو

كل البطاحين مناهم أن تزوج ويحبون أن يروننا متزوجين
ها يوم لمتهم لي فرحنا ديك بنبني عُش الزوجية
حيلة العذب أي العذوبية مرة وضقناها

وسمح الزول صبي يلد ويربي جناهو .. وجناهو يلحقّو قبل خرف

Post: #74
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 08:04 PM
Parent: #73

نواصل

هنا خرج شيخ العرب ود دكين وعيونه يقدح منها الشرار وكبر الشر في نفوس الفريقين
وقام طه جاري في ظهر شيخ العرب ...... قام واحد من البطاحين اسمه احمد مسك طه وقال :
أقيف يا طه عندي نصيحه ليك ابداها
العقده الصعيبه العاقل بيتعداها
الشكريه كثره نحنا مانا لداها
انا عندي العرب بريا أخير نفداها
رد عليه طه :
ده راي السديد يا احمد تراك بي فكرك
روح لي ود دكين وريهو يسمع شكرك
يديك مال كثير وقبيلتو ترفع ذكرك
تصبح عمده فوق روسينا تخلف حكرك
قام رد علي طه عمه عبد الله فقال :
ليه أحمد تهينوا نصيحتوا ما ضاراك
ما حق النقص وانت بتعرفوا براك
وكت بتسوي عوسك وما بتشوف بي وراك
نشاور ريا ممكن ريا ما دايراك
رد طه وقال :
صدق القالوا خربانا البلد بكباراه
ديك ريا أسألوها واعرفوا خباره
من غير السفر ما عندي تاني دباره
نحنا وانتو بي دي الحاله ما بنتباره
رد أحمد :
يا طه المصاعب للقبيله تقودا
مسافر وين مخلى النار بوراك موقودا
طه:
انا السمتان جليس الردفولا عقوده
حد السيف بقطع عقدتو المعقوده
رد طه :
ما ولعت ناراً انتو تقعو فيها
شن دايرين براى وانا نارى مدفيها
أحلف ليك يمين دى الحله متقفيها
باكر من صباحى قبل يحس الفيها
رد عبدالله :
نحن كبار اخيرلك ترضى بعرفتنا
مع الشكريه احسن نشترى الفتنا
ندى ود دكين ريه ونكتل الفتنا
ما من خوف ملاقات الرجال حرفتنا
رد طه :
من الفيها ما بزح ان تزحزح مره
وان حين نعود ان طال زمنا ومره
عيش الدنيا ان كان يحلى وان كان مرة
الزين ما بدوم والزول بموت فت مره
رد عبدالله :
وقت صممت ما ترجع وتسمع قولنا
وسفرك دا محال ما بقبلنو عقولنا
الموت ما بنخافو الخوف يمبن مُوهلن
بنعاين بعيد بنخاف بهادل عونا
عبد الله يواصل محاججه طه:
الشكريه بي سيوفن صغيرنا معتق
ما ابناباه الكتال ونقول جرحنا اتفتق
مرحبتين حباب الشر محل ما بتق
تنقد الرهيفه انشاء الله ما تتلتق
رد طه:
الشكريه غوش واكتر علينا حساب
ضيف ليهم لميم ما بتربطو الانساب
انا لي غارتن حسبت الف حساب
كان تتعدوا راي يقين عقابكم ساب
بجيكم حمد ومعاه الرجال تابعه
قولوا ليهو طه طفش وريا معاه
كيف نرضي السفيه الادبو ما برعاه
يرفض طلبك انته ونحن كيف نسعاه
ابقي قاصدو وحدي والقبيله محايده

عقبان ان رجع فوقو الخسائر عايده
وانا كان درني انا اابترجع جموعو الزايده
وان حصلني حت ما اظن يعود بي فايده
رد عبدالله :
ما بقيف ود دكين واصلو السرج ملحوق
في دربك بسوق يا طه ياك ملحوق
وات صنديد تصد الميه ماك ممحوق
بنخاف كترتن وايد الرجال بتحوق
رد طه:
ليه خايفين علي؟؟ الدنيا عيشا مخاطر
الواجب نسوي ونرجي ستر الساتر
في وداعه الكريم الليله نيتي انا خاتر
يا دار ريا ما كان الفراق بالخاتر
كفايه مع السلامه انتهينا خلاص
غير الشوره دي ما لينا تاني خلاص
في يميني ابحريره الدكري القصاص
ما بخاف ود دكين ان جاني بي رصاص
يخرج طه من المجلس ويحاول احمد ان يوقفه فلا يلتفت اليه
احمد:
عم عبدالله خبرك هادا شيتن فاجع
كيف بنطاوعو من بيناتنا يطفش ناجع
عبد الله :
سمعتوا كلامو من الفيها ما متراجع
في الشئ الشايفه قط بي هينه ما بعود راجع
احمد:
نركب نلحقه نخليه يمشي براه ؟؟؟
عبد الله:
شورتو القاله اخير من نلحقه ونبراه
العاقل بحسسب لي التجي متافراه
ويفكر علي القدامو والبي وراه
احمد:
فوقو ابسوقو قط في ظني ما بخلوهو
كيف موقفنا ساعه يلحقو يكتلوهو ؟؟
عبد الله :
ان وقع القدر ما بتقدروا تصدوهوا
ود وكتو الكلام هسع اخير قلوه
وينفض المجلس بانتظار ما تاتي به الاقدار
الان طه وريا قاصدين شندي عشان يتحامو بالمك نمر وابتدا طه يغازل ريا فقال ليها:
درقي يكركب كمه ركبي يشيل دي الهمه
اصلي بطرز رمه مني تحود الامه
جملي يكسر الهربه سيفي يحل من كربه
قلبي سمينا تربه ما ابتقماني الغربه
يا ريا الحلم ما شفتي كيف اتهول
اتفسر براه وبالشين علينا اتاول
داخل راسي فكرا من ما بتحول
بكتلو ود دكين ان كان قرب وان طول



وبعدها نواصل ماذا قالت ريا

Post: #75
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 08:05 PM
Parent: #73

قامت ريا الكلام والحديث ما عجبها
كيف ود عمها يفكر في الزواح ولي الليلة لم يتم الحول على
موت أبوها عبدالله أب كبس ..
وكما قلنا كانت من عادات الناس الحداد ولبس الأسود والأبيض
وفي الشهور الأولى كنَّ يشلنّ الحفّة ( اي لا تدهن شهرها وتنقضه لو كانت ممشطة وتكفوتو )
كانوا يظلو حتى صدقة الخامسة عشر ودن تغير الملابس ولا حمام حتى ...
قامت ريا قالت لي :

الاعوج تراه والشين نهايه حدو
إن شاع ده الخبر يملا الفريق لي حدو
يقولوا اب كبس من دخل ود احدو
فرحوا وعرسو لا مُوجعن لا حدو

الأعوج هو الفعل الغير صائب وبجيب اللوم
وتعني : ياطه لو فعلنا كدي والله أعوج وشين لحد بعيد
نعرس فوق أبوي وتربتو لينة ...
ونبقى حديث الناس وسيرتهم إننا عرسنا قبل كسر التربة وعادة تكسر التربة
في الشهر التاسع وبها تكون صدقة ...
وكانت عادات ...
الوجع هنا بمعنى الحزن على الفقيد ...


إن كان في الفريق ماتت مريّا ذليله
لي الحول يرفعوا العرس الدخلتوا الليله
خليه ابكبس رأس الرجال ودليله
إن كان بي قبيلة تعدوا تبقي قليلة

قالتو شوف ياطه وا ولد عمي خلي أب كبس عادتنا لو في الفريق أو الحي ماتت مرة مسكينة
الناس بتحد عليها حول ( سنة ) ويأجلوا العرس الكان مفروض يكون قبل مماتها لمدة سنة
تجي تقول لي الكلام دا فوق أبوي رأس القبيلة ومرساها .. ابوي لو ختيتو قصاد قبيلة كاملة وعديت ترجح كفة أبي .. تقول جنس القول دا ياطه

خليهو الكلام وعرسنا في ده الحال
من بالك أمرقّو محال وألف محال
علي ميتت ابوي لي الليله حول ما حال
نصبح بكره ونسه وبهادل حال

دحين يا أخوي الكلام دا أمرقو من رأسك
( زواجنا في الحال )
لأنو شئ محال بالنسبة لي
وبكرة يلوكنا الناس لُبانة في سيرتهم

Post: #76
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 08:14 PM
Parent: #75

نواصل قول ريا

ريا:
اسود ود دكين بي اسمه ما تحجينا
هو الفرقنا قمنا من البلد هجينا
عقب في دار جعل تاني الخرابه بجينا
ما بسوي الرماد المك نمر بحجينا
طه :
ماشيه بي كرعيه
تلاته ايام وضحوه وكان معاي سعيه
هسع مشينا يومين لا فتقه لا في رعيه
كيف يلحقنا دون شندي ومعاه معيه ؟؟
قبيله دار جعل محميه فيها اسوده
تقدل بالمكارم ديمه فاجعه حسوده
راسا المك نمر كل القبيله يسوده
ركازه القبايل في السنين السوده
بكره نجيهو ابسيفا يجز بولادو
العز والكرم من الكبار تيلادو
ما اظن ود وكين بي شينا يوطي بلادو
ماخد بت اخوه شمه ام اولادو
ان ودعتك المك ما بخاف المتلو
اهون من شراب المويه عندي اكتلو
ارجع للبطاحين تاني راينا نفتلو
الشكريه تغيو وغير حرب ما بتلو
يا ريه البطاحين اصبحت محقوره
علي الشكريه دايما سارحتن معقوره
ما بتلقالا عز وتعيد مكانه وقوره
الا تلعب الغاره وتغدي صقوره
ريا:
في دار الشديد ابقالنا قوم دربنا
بي وصفك دحين من شندي نحنا قربنا
ما بنفتق عشا بالفتقه دي تسربنا
ما بنومو الرجال يمك يمسكو دربنا
هنا يسمع طه حركه خيول قادمه فيقول لي ريه:
بسمع حركه
ريا:
شد ديل يبقي رعاويه
طه:
حركه صهب ده ركب سروج ما حويه
قربت مننا وفي ظني ناسه شويه
كان ناس فزع ما بجيبو حته ضويه
ريا:
ياهم ناسنا خمسه عقاب رجالن وينو؟
بتشوف ود دكين برز براهو هوينو

طه :
الشي البينا نحن سعينا لي تهوينو
ضايقنا اب فعج ما ظن يعود لي عوينو
الناس المعاه عرب صعيد يا ريا
ما اولاد عمو ديل والله ما شكريه
معروفين تمام في كل بلد اجريه
كان حفرولو بير ولقوهو شجره ضريه
الجاينها بحكيها ليك اجمال
قايمين من هناك بارنو بي امال
عارفين ود دكين ما بهم بي خيل وجمال
بكتلني ويسوقك وهم يسوقوا المال
وان مات ود دكين ودي الظانها في فكرى
بتشوفي الفضائح الما بتجيك من شكري
الشكريه فرسان ومستحقين شكري
ده الصح قلتو ليك انا لا بخاف لا مكري
المهم ريا قالت لي طه :
يا طه استعد الناس عنونا عديل
طه :
وين شفتي القطابي مسوي همو قديل
بضاير العوق اخوك الما بهم من ديل
براك بتشوفي ياما اشبعن بهديل
وهنا يلتق المرجان هذا عذب فرات وهذا ملح اجاج طه ووراهو وريا من جهه و ود دكين ( شيخ العرب ) ومعاه اربع انتهازيين مرتزقه يكلو ويشربو في ضلو متشوكرين ساكت علي قول واحد صاحبنا من الجهه التانيه
ويبادر شيخ العرب طه قائلا:
ود دكين:
اتعبت الزمل حفيت وراك متسبقه
احسن ليك تفوت ريا وتحل الربقه
طه:
كان كل القبائل جات علي منطبقه
افوت من ريا يا شيخ العرب؟؟ ما بتبقا
ود دكين:
البلقي القبائل ما بسوي سواتك
خربت قدلتك يا طه وين دعواتك
تاني بعد جريك البشهدن به خواتك
فارقك الثبات فارق درب ابواتك
طه :
يا شيخ العرب جربت لحسه كوعك ؟؟؟؟
كل ما اوقرك في الشين اراك تتقدم
اتعكنن خلااااااااااص انا صبري حصنو اتهدم
اصلو البينا ما بتنفكا من غير دم
الكاينه التكون بي وراها ما بتندم
قام واحد من جماعة شيخ العرب وإسمه عمر للنيل من طه فيقول :
عمر :
اصلو الخمله ما بسمع نصيحه الهادي
اول خفنا ليك من البهادل هادي
يا طه البهدد ما بضرب الوادي
يمشو عليه الرجال يجري ويقبل غادي
طه :
هسع تشوفو ان كان صح وكان تهديد
وصلتو الميس ده حين .. وحديد يلاقي حديد
بنبرش الطروره ويثبت الصنديد
خليهو المضي لاقي البجيك جديد
عمـر :
نافذ فيك قدر يا طه انته عميته
في الهروب وقعته .. عترته ما سميته
منه وجاي قضيت وبقيت خلااااااااص زول ميته
في تركتك كفاي انا بركب اب سوميته
( ابو سوميته ده الجمل بتاع طه )
طه :
الداير الغني يعمل حساب لي فقرو
كعب الضله كيف المتلي انته تحقرو ؟؟؟
ابسوميته خلي الليله سيدكم اعقرو
وين تاني الملاج وكتين يتلب صقرو
ود دكين :
لم باقي الكلام يا طه بهمك سرب
جييييييييتك استعد


وبعدها نكتب ماذا قال طه

Post: #77
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 08:17 PM
Parent: #75

Quote: الموت ما شمت غاية البخوض والببروا
والحد والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا
بنخاتر منو الوجعه هيلنا برانا
نحن أهل المصاب والناس عزا مجابرانا
في آخر المراح دايماً بتجي الفترانا
عادة الحد ندوسا والناس عقب تبرانا


في هذه الأبيات الكثير من الحكم الجميلة

مافي زول بشمت في وفاة زول ( الموت مو شمت )

الموت غاية ونهاية كل حي مآله لموت يوم لا يؤخر لايقدم ( أجل مكتوب ومسطور )
ورمز لها هنا بي البخوض ويعني بها الزول البخوض هو العارف للمياه وداري بالعوم
والغير عارف بفضل يباري فوق دربو .. والجمال هذا التشبيه الضمني
لكل الناس بي البخوض والببرو

والحد والحزن اي الحداد والحزن مابرجعوا الفات

والحكمة أنو الناس مفروض في الشدائد ووقت نزول المحن تتصبر والصبر له الجزاء
والله هو المعين ومنزل عليهم سكينته في الفقد الجلل لكن الجد والحزن ما بتجيب شئ

بنخاتر منو ؟ : اي نجامل منو نحن أهل الميت وأسياد الوجعة وشيوخ الحلة والقائدين
وضرب لها نحن ديمة الماعز الفترانة تراها تكون متأخرة في المراح نحن نبدأ أن نلغي هذه العادة
وبعدنا الناس بتسير على ما سيرنا عليه

تبرانا : اي تتبعنا وتسير على نهجنا

Post: #78
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 08:22 PM
Parent: #77

Quote: في هذه الأبيات الكثير من الحكم الجميلة


الاخ خالد علي محجوب المنسي

اجمل ما في الحكم انها بليغه

Post: #79
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 08:27 PM
Parent: #77

الناس بالمكارم والفعال بتباهو
ويمشي الزول فطرتو حسب مرباهو
عادة جدو عادتو ونحل اباهو نباهو
يلبس توب قبيلتو ان دارو ولا اباهو
من الليلة حول مضيوهو تاني إتكلم
الدايروا بيتم رب العباد ان سلم


ما كان لريا إلا أن تحسم الموضوع
لأن الزواج قبل أن يتم الحداد على أبوها ما برضيها

فقالت له
الناس بكرم العادات وفعل الخير بتباهو اي يفتخروا
والزول الفطرة التي تربى عليها هي التي يمشي عليها
عادة أهلوا القدام هي تكون عاداته وسير أجداده يمشي علي وتكون خبر
نباهو .. من النبأ اي الخبر الذي يقال عنه والناس قديماً كانت تتناقل الأخبار فلان كريم وفلان شجاع وفلان فارس وغيرها من الصفات الحميدة
دحين يا طه أخوي من الليلة خلي الحول يمضي تاني تعال كلمني في الموضوع دا
وإن شاء الله ربننا يتمم لنا هذا الأمر ( زواجنا )

Post: #80
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 08:33 PM
Parent: #79

نواصل قول طه

طه :
مرحب حبابك اقرب
من قومه الجهل انا لي لقاك مدرب
يا شيخ العرب الليله نجمك غرب
وهنا تقع معركه عظيمه بين الفارسين والباقين وبعد ساعه من القتال يسقط شيخ العرب ود دكين ميتا بين يدي طه :
طه :
تري شيخ العرب قبض الربح من تجرو
اتوسد تقيله انشاء الله ثابت اجرو
( ثم يلتفت الي عمر ) :
وانتو الشوره كيف .. عندي الزمل وبحجرو
صنقعو .. ده السماء .. بطيرو ولا بتجرو ؟؟؟
عمر لي أحمد وقد طار قلبه :
ابرز يا عمر الروح في ايد الخالق
بتجابه الضرب في الدرقه ساسك غالق
أحمد لي عمر :
عان ده الخشيم دايما تنط متشالق
ما تنزل عليه ... مالك ات ماك بالغ
طه :
ضربي صعيب علي وصف البوصف عازر
في غارب التلوب انا نايبي دايما غارز
اسمعو يا طمش كان ما يجيني مبارز
واحد منكم بضرب طرف ما فارز
تري ابسوميته اركب يا طفلول سافرته
قبيل وقت الكلام زي الاسد طفرته
مال دمك بهت متل القول جفرته
عمر وقد ارتعدت فرائصه:
من القلتو ليك انا عديييييل تبت واستغفرته
طه :
انا علي حلف ان كان بقيتو سريه
منكم انتهي قبال تجي العصريه
جيتكم استعدوا تاني ما فيش ريه
هجم عليهم طه لكن الاتنين قامو جارين يتحامو بي ريا وقالوا بي صوت واحد :
هاديل السيوف واقعين وراك يا ريا
طه :
يا خضره المفرهده فوق جروفه نديه
علي الواقع وراك انا كيف اشيل ايديه
حتي كان كتلني عافي ليه الديه
دمي ومالي هيلك واقبليه هديه
ريا :
رجال التابه ... انتو الستره تب ما فالكم
اتامنتوا قوموا وامشوا سوقوا جمالكم
حت مال ود دكين سوقوهو يتبع مالكم
نمشي في حالنا نحن وانتوا تمشوا في حالكم
طه :
زايله رقد ود دكين اسد القبيله الراعي
كان ما ضايقني هو .. ما كت قطعتو ضراعي
ريا :
تتاسف ليه ليه كان دار يجز براعي
والنعلات حرام ما تضوقه تاني كراعي

ده كان القسم الاقسمتو ريا لو ود دكين قتل طه وسباها
طه :
موت المتلو نقصان للعرب في الجمله
كان راس الجرارق وهو البقود الحمله
اطرا فعايلو جفني يجف بعد ما يمله
كما شويييه كان داير يعمل العمله
وتوجها الي شندي حيث المك نمر .. يصل طه الى شندي و يدخل على المك نمر وحواليه اركان حكمه و وزرائه :
طه :
التلب اللزوم مدخور يشيل العايلة
يقدل بى مهل فوقه الحمولة الهايلة
اياك مرق القبايل فيك نسند المايلة
فراج كربة الهم اب قبايلا جايلة
عامر جمعكم انشاء الله ما ينفض
ما جابنى مال ما بدور دهب لا فضة
بدور المك نمر سيد النحاس الجض
جيتو على حملة غيرو ما بتنجض


ونعود ماذا قال المك نمر

Post: #81
Title: Re: قصه .. طه وريا مع ودكين ..
Author: محمد طه الحبر
Date: 02-21-2010, 08:51 PM
Parent: #80

نواصل باقي الحديث

المك نمر :
تقضى كان بقدرها
طه :
انت اللزوم ماك حاشى
الاك زي حزمتى تشيلها تقدل ماشى
التقيان تفشو والضعيف بتراشى
ما داب قبيلتك انحن بيك نفاشى
جيت يا مك واملى فيك تكشف همى
فى الاول وداعتك و فى حماك بت عمى
وقتين تقبلها تكون شلت تلتين همى
و التلت الاخير تحجانى تحقن دمى
بت عمى اب كبس ما كان ابوها فقير
ابوي قبالو مات وربانى كنت صغير
وكت لحق عش وراهو مانى حقير
اصد الغار على جاري و لى عروضى اغير
المك نمر :
مالك هسى شن جاك
طه :
جاتنى جنية حربة ربى ما بى خاطري ما بالنية
المك نمر :
كتلت منو وجريت
اها دي المابيها لكن خفت الورانية
الموت ما بخافو الخوف يمين مو هولى
الشئ البخافو بخاف بهادل عولى
كان الناس الوراي براي يسعو لى
فى راس لبكتلتو اقيف يمين لى حولى

كان هم برضو بى تارهم و ياخدو الهيلتى ( يقصد روحه )
ما كنت التجيت ضاقت على مهيلتى
يامك ناسى قلة بخاف يخربو قبيلتى
بى جعل احتميت فوقك سندت تقيلتى

الشكرية تقيو و ى الجوار ما براعو
حمد ود دكين فى راسى خت كراعو
سمع بى سفري قاصد شندي قام بسراعو
قاطع دربى يخرت ريا قال بى ضراعو
جيت من اهلى قاصدك ما بقبل تار
انكشف الامر دحين براك اختار
يا اما تبقى بينى والبخافو ستار
ولا تفتلنى انت نسيبو و تاخد التار

اياك عز القبايل و الكرم فيك طبعه
و جارك ما بهم ان كان مسوي السبعة
ان كان اجلى تم اخد قصاصى التبعه
و الياكلو الاسد اخير لو من الضبعة
يلتفت المك نمر للجعليين من حوله و يقول :
مطارق جعل انتو الكلام سامعنو
قولو دحين رايكم وفكركم الشارعنو
يهب احد الجعليين واقفا :
كان ضيفنا ما نحجاه و ندافع عنو
نرمى سيوفنا ليه تانى الحصان ساعينو
قديم يا مك ديارنا مرتع الامال
و شعبة الكون وركازة الزمان ان مال
صغيرنا ان جال يضاير العوق يمين وشمال
بدمانا النزيل نحجاه قبل المال
اديهو الامان يقدل و يلقى مناهو
البقى فوق امان المك منو البدناهو
كل اسم جعلى من اعلاهو لى ادناهو
محال يبعد والمك نمر ادناهو
المك نمر :
انتو كبارنا شورتكم جمعنا بتعمرو
مارستو الدهر ضايقين حناضلو و تمرو
غاية الحى فناه الموت نهاية امرو
لكن بى وراه ذكرو بصبح عمرو

اياها الضامرة وعليها كنت مصمم
ما اتعداها رايكم جايي ليها متمم
سار فى امانى طه بالزمام متزمم
و ادوهو هدومى و بعمامتى اليكون متعمعم
ارتع فى امانى انا البفش البتقو
يلزمنى اليمين ان ولدي جاك ما اعتقو
بالمال الشرط عازم اباك ينرتقو
وان كان قالو لا عقبا نوسع فتقو
نبه بالامان فوق النحاس بشربو
عشان يسمعو كل الناس البعاد والقربو
عقب البدنى طه يمين عقابو نخربو
انا المك نمر كبريت يحرق الجربو
طه :
نمرا يركب الكيك البطل يتحرن
نمرا يقلب العوق ام صفوفا جرن
خلوات صدرو فى علوم الحروب كم قرن
سيفو بينسف الدرع الحديدو مقرن

ما نمر الشدر حاضن فروعو مقيل
ده النمر البضاير الصف محل ما يميل
كل ما اقول شكر القاهو فيهو قليل
كفو بيخجل العين السحابها منيل

قبيلة المك قبيلة ما بتختا اصولها
العشمان يعيش فوق ضلها ومحصولها
بالشين البدورها بعيد عليهو وصولها
فروعها سيوفها ومطارق جعل فى اصولها
عرمان جدكم والنسبة عباسية
و اعياد فضلكم لليلة ما منسية
هاهى الدنيا حية بى فخركم مكسية
نزيلكم ما بهم ان سوى الاف سيئة
مين سابق العرب فى اصلها و فخوذة
مثبوتة الرجالة وعنكم ماخوذة
صغيركم يدخل الحارة ام لبوس يخوضها
مجرب من قديم سيفكم بوابر الخودة


(واحد حاجب كان قاعد جم نمر قال)
الحاجب: نبه بالامان فرسان فازن وهزت
دقين النحاس فوق الرجال انعزت
عروس الكُجرة فرحانه وطرب اهتزت
عرمان عزُّ لله قبيله بيك اعتزت
المك: وصلو طه للبيت المخصص ليه
واحفظ كل موجودو وجميع ماليه
خدمتك باحسن تقعد معاهو تسليه
فى كل يوم تعيت ناس يغفر عليه
طه: عشمكم
المك: ابدى بنصايحك وبيها أخير انصحنا
واختم بالحماس بالفيها قولىّ نحن

النصيح: خلى عجب النفس الدنيا قيد قصير
وبشرك اصيحو لا تكون دوام متغير
لا يغيرك هوا الضُحى المتغير
كم سبق الاجل خلا الامل متحير

Post: #82
Title: Re: قصه .. طه وريا مع ودكين ..
Author: خالد علي محجوب المنسي
Date: 02-21-2010, 09:00 PM
Parent: #80

فال ليها طه بعدما طلبت منه أن يتكلم بعد سنة
تاني امضي حول وانا بي الحُسار أتألم
علي حُكمك صعب انا قابلو ما بتظلم
لكن مشيتي لي السنة قاسية وصعيبه علينا

تاني انا أمضي سنة كاملة والحسرة تؤلمني بهذا الحكم لأنه حكم صعب لكن برضو قابلو
لكن أني أمضي حول تاني قاسي وصعيب علينا لكن أللهم لا أعتراض في أمرك ..




ردت علي ريا وقالت :
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرا عايده علينا

خلاص يا طه دا أبقى الاتفاق البينا أنو بعد سنة من الليلة نتزوج
وزي عادة البلد نحد علي فقيدنا وهذا لا زيد ولاينقص فينا
وياربي السنة الجاية تكون سعيدة علينا

يا طه البهم قارب رجوع سراحو
بنات واولاد هديلك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو

هنا همت ريا بالعودة للحلة من المراعي والخلا
فقالت لأبن عمها موعد العودة قد حان
شايفا ناس الحلة جت توجهوا راجعين بأغنامهم
وغنمنا ياها عزنا ودا السمعتو من كبارنا
أنو العربي مو عزيز كان ماعندو مراح وسعية

Post: #85
Title: Re: قصه .. طه وريا مع ودكين ..
Author: أسامة الفضل
Date: 02-21-2010, 10:40 PM
Parent: #82

كنت قررت أن تكون آخر مداخلاتي هي الأخيرة و لكني مجبر على العودة لأوجه هذه المداخلة للعزيزين خالد المنسي و الغواصة كمال الزين لوجه المزاح و الاحتفاء . كيف لا أعود بعد فجر كيمو الزين مفاجأة الموسم باعلانه انتماءه القبلي للشكرية .

كمال الزين اسمح لي أنا الشكري الكامل الأهلية _ نسبة لأنني ولدت وعشت في ام هبج - أن أقول لك بأنك ناقص الأهلية كشكري طالما أنك لم تعش في بطانة أب على وحسان وعليه يلزمنا اعادة تعميدك - ان صح اللفظ - ثم النظر بعد ذلك في أمر كونك غواصة . عليه يتوجب عليك ما يلي :

اعلم سيدي أن أجدادك الأوائل قد وقفوا ضد المهدية - سلطة دينية و سياسية - و هو موقف غفره لهم التاريخ لما اتضح لاحقا من أته كان بعد نظر أكثر من كونه عمالة عليه تكون أمدرمان محرمة عليك و نطالبك بالتوجه الفوري للسوق الشعبي الخرتوم و البحث عن لوري متجه نحو الحصاحيصا و ان لم تجد لوري فلا يسعك أكثر من أن تركب نيسان قديم و لا يسمح لك البته بركوب البصات المكندشة و ما شاكلها . عند وصولك للحصاحيصا ان لم تجد البنطون كما تركته أنا و و وجدت الكوبري فعليك الوقوف تحت الكوبري و تقلع نل _ انشاء تعرف تنطقها _ كيوم رآك أخوالك الجموعية اول مرة و تسمي الله و تنزل العاديك و هو النيل الأزرق عند أهل البطانة . عليك أن تغتسل و أنت تردد ما شئت من الدوبيت مما كتبه الفحول من الحاردلو و حتى ود شعيت . عندما تصل رفاعة ستشهق الأرض لعودة الابن الضال فتبدأ أنت بترديد مسدار رفاعة لأحمد عوض الكريم أبو سن لتهدأ الأرض تحت قديمك و تستقبلك أرواح الأجداد تتنادي من كل الحقب مستذكرة كل الانتصارات و الانكسارت تسكبها فى روحك مجدا و عزة و تبحث لك عن مكان بين الأرواح الحية تطوف بك كل مكان جاء ذكره في المسدار و في ليلة الرابع عشر من الشهر القمري تقضي نهارك الصيفي في خيمة أجدادك وسط رائحة النال و البرم و أزهار التبر البيضاء . وعندما تنتهي الشمس من الصراع مع أشعتها التي ترفض التخلي عن حضن هذه البقعة و لأن القمر كان يستعجلها منذ منتصق النهار فقد طاله شوقه وهو الليلة قمر 14 تبدأ قصتك أنت فما أن يلثم القمر بثغره الفضي تلك السهول و الوديان حتي تتطاول زهرة التبر تمارس عادتها في مص أشعة القمر و هي عادة تفعل ذلك ببطء و لمدة 13 يوما حتي ترده أسود و لكنها في هذه اليلة و لأمر ما فهي تقوم بذلك سريعا ليعم الظلام وعندها تنوح الأرواح و تنهض الجغرافيا و التأريخ و الوحوش و الروائح القديمة ينهض الفرسان و يلوكون حروجهم من جديد يعود صبي فتي يطارد من يحب خلسة خجلا من مروءته أن يخدشها فعل الحب .تصحو نيران تقابات القرآن و اندايات المرايس ينهض الناس بكل تناقضاتهم في احتفال مجوسي وعندما تنهض الأشياء ترتعش أنت فقد عرفت أنه قد أزف وقت الامتحان . و عندما تسأل عن كل الآشياء فلا تجد جوابا و يبدو أنك على وشك الرسوب ينقذك أحدهم بأنه سيقرأ عليك بيتا واحدا من الدوبيت و علبك أن تجيب على واحد من الأسئلة التي تدور حوله و هي فرصتك الأخيرة .

يا فروج ضهاليم الخلا البنجاضن
اسرع قودع أمسيت و المواعيد فاتن

من القائل ؟ و ما المقصود ؟ و ما معني .........................؟
وهل فاتن المذكورة أعلاه هي فاتن حمامة أم فاتن سيف النصر ؟ فتبتسم أنت و تتنفس الصعداء فأنت تعرف الأجابة . و يكون القرار النهائي : يقبل المذكور أعلاه كشكري وتحمله الأرواح حتي الحصاحيصا و يسمح له بالعودة لأمدرمان ممتطيا بصا مكندشا .

أخونا خالد المنسي .
مبروك لقيت ليك شكري غواصة باع ليك القضية . على العموم أنتم أجدادي من جدتي فلا بأس بذلك . أنا بعيد كما ترى عن البلد و المصادر الحية للدوبيت وقد كنت لا اثق في المطبوع و لكني مجبر الآن فأعنا أعانك الله.

هارون : الوارد في هذا البوست ليس دوبيت شعراء البطانة ولكنه شعر العبادي

خاتمة :

للعمامة فوائد جمة فالبعض يفرق بها بين رأسه و قدميه و هي لا تضفي نضجا ان كان الرأس الذي تحتها فارغ.

Post: #88
Title: Re: قصه .. طه وريا مع ودكين ..
Author: كمال علي الزين
Date: 02-22-2010, 03:56 AM
Parent: #85

(*)

ودالعم أسامة ماتورطنا ياخي بسيرة المهدية _ أنا بي غادي جدي (عبدالله ودجادالله ودبليلو)
):

أنفعلت مرة وجنحت إلى تجريب عيش أسلافي _ فشرقت إلى ديار أهلي الشكرية والدباسين والورطة كمان حبوبتي الهناك بطحانية
إتجرست :

جربت الصرف جرب شقاوة و صرعة
تميت في الخلا ستة ليالي و سبعة
بين أهلي الرجولة الكرم والفزعة
شف نفسي ضاع عمري نعمة ولمعة
لا الدرع أم لبوس لا قنص لي ضبعة
حرم من فعالهم روحي شافت الطلعة

ضيع عمري في بندر كهارباً شالعة
لا نميت ولا دوبيت ولا قرب سعية ظالعة

دار أبواتي بعدت والعمر في أواخرو
لكن دمي شكري عقاب أبويا وآخرو
وفي شان أهلي وحماهم ماني عازو وداخرو


هيييع .. أبشر ..


____________________________________________
وهذه معلقتي المئوية التي كتبتها في الخلا ..
لا تحاسبها محاسبة شكري أصلي ..
):

Post: #89
Title: Re: قصه .. طه وريا مع ودكين ..
Author: haroon diyab
Date: 02-22-2010, 05:39 AM
Parent: #85

اسامة الفضل

سلامات ياحبيب

Quote: هارون : الوارد في هذا البوست ليس دوبيت شعراء البطانة ولكنه شعر العبادي


واعتقد بانه هنا كان يتحدث يلسان حالهم .

المهم.....

اعجبني الدوبيت ويعجبني العبادي

وهذه المعلومات الثرة التي تقدمونها جميعا .

متابعة .

Post: #91
Title: Re: قصه .. طه وريا مع ودكين ..
Author: Fadl Karrar
Date: 02-22-2010, 06:36 AM
Parent: #85

Quote: للعمامة فوائد جمة فالبعض يفرق بها بين رأسه و قدميه و هي لا تضفي نضجا ان كان الرأس الذي تحتها فارغ


؟؟؟؟؟؟؟؟؟؟؟؟؟؟؟

Quote: خاتمة :


تعودنا في الخاتمة علي الكلام الطيب

ولكن الأخ اسامة - ربما لشدة جرحه - لا يزال يصر علي مثل ما أتي

الكلمة الطيبة صدقة ياأسامة

Post: #83
Title: Re: قصه .. طه وريا مع ودكين ..
Author: على تاج الدين على
Date: 02-21-2010, 10:02 PM
Parent: #69

Quote: Quote: كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديثو تعرف أبوه وجنسوا


هيييععع




راخين الرسن هني تب


السنوسى ولدي اقعد قبال ود عمك
كلام ريا هادا بشوفه غير دمك
من زمن بعيد أتمني أسمع نمك
فرج همنا مولاي يفرج همك
دوبينا ......قول ... دوبينا

Post: #84
Title: Re: قصه .. طه وريا مع ودكين ..
Author: محمد عثمان عبدالله
Date: 02-21-2010, 10:38 PM
Parent: #1

يا سلام عليك يا حلو

Post: #86
Title: Re: قصه .. طه وريا مع ودكين ..
Author: Elsanosi Badr
Date: 02-21-2010, 11:20 PM
Parent: #84

Quote: يا فروج ضهاليم الخلا البنجاضن
اسرع قودع أمسيت و المواعيد فاتن

ازرق كركر يا لنوايحك فاحن
ضراع الماصع المنو المخاويل ضاحن
جودو البورداب خلو القلوب يرتاحن
هييييع


علي ود تاج الدين

ياخي الكلام ده مرقنا من ضلهيم عجيب
ياخي النم وكتين يرن ...علي جملة الايمان ام كشيط بتدرع الضرعان وبتنز في السدر فوق ...

ياخي ملحمة العبادي دي انا كت حافظها صم...


بجيك راجع

Post: #87
Title: Re: قصه .. طه وريا مع ودكين ..
Author: حسين نوباتيا
Date: 02-22-2010, 00:57 AM
Parent: #86

بعاين من دقش في رجاك يا اب كلمة مسموعه
ود اب حريرة فارس علم ماسح لليتامى دموعه
رفقت عمر في الليالي الحلوة والموجوعه
مكانك جوووه مجالس الحديث وضلوعه
علا تراك حيرتني ماقلتك كلمة مبلوعه

Post: #90
Title: Re: قصه .. طه وريا مع ودكين ..
Author: المسافر
Date: 02-22-2010, 06:07 AM
Parent: #87

Quote:

في يميني ابحريره الدكري القصاص
ما بخاف ود دكين ان جاني بي رصاص


الدكري القصاص هو سيف من سيوف العبدلاب
وكان في رأية العبدلاب في معركة القلابات
وعند إبادة الرأية تم إرسال الدكري مع وصية إلى الشريف الهندي ، ومازال السيف ضمن ممتلكات الشريف يوسف الهندي..

أما أبحريرة هو سيف آخر...
لكن عادة يتم ربط حريرة في مقبض السيف مثل الحريرة التي تربط في مناسبات الختان والزواج

كذلك أبسوميتة ...
جمل طه
والسوميتة هو السكسك المنظوم لزينة رقبة الجمل وذلك كناية على الفخر بالأصل والمال.

Post: #92
Title: Re: قصه .. طه وريا مع ودكين ..
Author: إدريس محمد إبراهيم
Date: 02-22-2010, 07:25 AM
Parent: #90

الأخوان / محمد طه الحبر ، المنسي ، كمال ، أسامه ..وبفية العقد الفريد ...

لكم عاطر الود والتحيه ..

حقيقة لم أقرأ هنا منذ زمن بوست بمثل هذه الدسامة والجمال .. هذه السيرة العطرة الموشاة بمفردات العبادي الندية حقيقة أترعت صباحاتي بالبهجة حد الانتشاء ...

أتمنى أن تتحفونا بالمزيد من قصص التراث الذي تتجلي فيه كريم الخصال ونبل الغايات ... مع طلاوة النصوص المترفة بالجمال ...


شكراً لكم كثيراً من الأعماق ... ولا أملك إلا الامتنان والتصفيق ...

مع خالص تحياتي وتقديري للجميع ؛؛؛

Post: #93
Title: Re: قصه .. طه وريا مع ودكين ..
Author: Ahmed Yousif Abu Harira
Date: 02-22-2010, 12:11 PM
Parent: #92

الأخوة الكرام
مسرحية المك نمر عمل ادبي
ولو ان العبادي حضر زمن الديسكليمر disclaimer كان كتب:
ان الاسماء والاماكن والاشخاص المذكورين في هذه القصة fictitious ووو... الخ
أو كما يقولون .

وللاخ اسامة الفضل المتعصب لقومه (وهم قومنا ايضا ان لم يكن يعلم)،
اقول نحن برضو كبطاحين ما راضين باحداث المسرحية ولنا عليها مآخذ كثيرة
لكنها في النهاية عمل ادبي مش سرد تاريخي لأحداث حقيقية عشان نتصدى لها بالتفنيد والمغالطات

ورحم الله الشاعر الحكيم العاقب ود عبدالقادر ودموسى
حين قال وهو يخمد بوادر فتنة اطلت براسها في وقت ما بين القبيلتين:

غير مقبول شريط ريا الملفق كلو
كان لي شكري او بطحاني خاتي محلو
بيت الفتنة ما بقبل رجولي تطلو
صغري وشيبي ما بنطق كلام غير حلو





ــــــــــــــــ
ازيك يا حسين وشكرا ليك على الاهزوجة
وطالما بقيت تقرض اشعارنا نديك حق المشاركة


بشري سارة لبورداب شرق النيل المغتربين:اكتشاف الذهب في ابودليق

Post: #94
Title: Re: قصه .. طه وريا مع ودكين ..
Author: خالد علي محجوب المنسي
Date: 02-22-2010, 12:31 PM
Parent: #92

Quote: [B آه ياريت السعادة ان كان وقت ايديه
كنت اعيش هني في الدنيا بالزنديه
علي حكموا ناس بي السيئة طلبو الديه
الموت بالعطش والمويه بين ايديا

يخصمه من حياتي رضيت بعشرة سنين


أها ريا بقت ماشا ساقت غمنها وخترت
طه بقى يعاين ليها وبدأ ينشد في كلام كُتر

يا ريت لو الواحد بقدر يجيب سعادتو بي يدو
الزندية : هي القوة
كنت بعيش في هناء بالقوة

لكن انا حالي حال الكتفو وسالين علي السكين
وحال الفي البحر حايشنو تمساحين
وحال الفي السجن ما قدرّولو سنين
حكمت علي ريا اني امضي حول وتاني أتكلم فكان حكمها كالحكم على من فعل سيئة
وطلب منه أن يدفع الدية

جنبي وبعيدة مني دا حالي .. بقيت زي المات من العطش جنب النيل

Post: #95
Title: Re: قصه .. طه وريا مع ودكين ..
Author: خالد علي محجوب المنسي
Date: 02-22-2010, 12:45 PM
Parent: #94

Quote: ريا عليا قاسية وجايرا في التفنين
آه يا قلبي أرحم صبري أمسى ضنين
أمحق دي السنة ربي الحليم وحنين
وأخصم من حياتي رضيت بي عشرة سنين


ويواصل في أنشاده ويقول يحدث نفسه ...

أنو ريا قست علي شديد بحكمها أنو يمضي سنة وكان جور منها لم يحمله قلبه
ويطلب من قلبو الصبر وقد قلَّ صبره
ويدعو الله أن يخلص هذه السنة بسرعة ويخصم دا من عمر إن شاء الله عشرة سنوات
وهذا من باب الشوق أن يجتمع بالحبيبة فهذا تجرد لحب سامي

كيف أنا أعيش وصبري ولى مودع
وسببي الرُخرخ القام من صغير متفدع
جنين وجني جنى وحالي اصلو مبدع
أهج شقيش أفج فاضليِّ تاني أجدع

كيف الحياة تكون غير ليمك يا ريا والصبر ودعتو وولى مني
وكان سبب تعاستي الرخ المن ولدوها مبروم قوامها ومتفدعة زي البانة تميل تلف الطوق
وزي ما تميس نحن نميس والميسان طبع البان.
ببعدها جنيت والجن الراكبني ذاتو جنّه وبقيت مزوزّو ومودّر
أمش وين بعد الجن بس فاضل لي أجدع الناس بي الحجارة

دا حال العدو المسكين

Post: #96
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 10:31 AM
Parent: #95

لحيـــــن ميسرة

Post: #97
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 11:37 AM
Parent: #96

Quote: رغم أنه قتل عم زوجته وأم ولديه (شما الشكرية) _ قد جعلت الأمر أكثر صعوبة _


في الحقيقة للمك نمر
أربعة أبناء فرسان
أحمد
خالد
عمارة
علي ( على ما أعتقد )
لكن المتأكد منه هم أربعة

وبنت هي بنونة

Post: #98
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 11:48 AM
Parent: #97

وريا ماشّا علي الفريف .. وكانت عادة النساء
تتخذ من أطراف البيوت طريقا ( ما بتمشي في نص الطريق
وزي ما بقولوا بتلزم الحيط وأطراف البيوت سبيلا
أها وهي ماشّا .. كان في عرب نازلين تحت شدرة أغراب لا تعرفهم .. شافوها ماشّا
وما سلمت عليهم قام واحد منهم ناغما أي ناداها وقال ....

بالضيفان تمري لا سلام لا كلام
صدقوا اهل المثل توب العرب صح لام

( توب العرب صُح لام )
اي المرة دوما بتتلوّم في أن تقر الضيف
طبعاً هذا لا يجعلنا نقول هذا صحيح والكثير مما قيل في لمرأة
قد يكون غير صحيح وخليك من هذا الحديث وأسمع رد ريا الذي برهن
أن توب العرب قام بالواجب

Post: #99
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 12:02 PM
Parent: #98

وكان رد ريا الشافي الذي أدحض نظر
توب العرب صُح لام

حبابكم عشرة ومن دون كشرة وألف سلام
يا وجوه العرب المتلي ما بتلام
انا بت الرجال أهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتكم كيف


وهي عبارة تعني البشاشة في الترحيب
( حبابكم عشرة من دون كشرة )
وعقبتها بي ألف سلام مو سلام واحد

وجوه العرب اي يا سادات العرب ووجهائهم
والوجه هو المقدمة في الشخص.
وبعدها بدأت تقدمي نفسها لهم في عبارات
أنها بنت الفرسان بنت أهل الكرم ..
يحجو المرقوب اي يجيروا قلتل النفس ويحموه

وفي نهاية حديثها قالت لهم

أنا ريا كان شفتكم أفوتكم كيف ؟؟
ويظهر وهي مارة بطرف الفريق لم تلمحهم وهم نزول في ضل تلك الشدرة

Post: #100
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 12:15 PM
Parent: #99

تاني العربي الضيف
ويظهر أنه كان مرافق مع شيخ العرب حمد وددكين

سألها تاني

ما بتسألي ...
لا من وين ولا وين ترسّو ؟

قامت ريا ردت عليه ببالغة البنت الواثقة

كيف العربي يسأل ضيفو كيفن تنسّو
أول بكرمو ويخابرو ساعة أنسّو
من مقلب كلام تعرف أبوهو وجنسو

هييييييييييييييييع زي مابقول شيقوق
ومحل رهيفة تنقد

وهذه كانت عادة أهلنا في السودان قاطبة
مافي زول لما يلقى ضيف يبادره أنت منو ومن وين ؟
بسوقو البيت ويكرمو وفي ساعة الونسة مع كباية الشاي ببدأ التعارف
الذي يطفو على سطح الحديث عفواً دون قصد
وفعلاً كيف الزول يسأل الضيف
هل تريد أن تعرف هو منو وبعدين تقرر تكرمو ولا لا ؟

Post: #101
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 01:52 PM
Parent: #100


Post: #104
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 02:10 PM
Parent: #101

هنا وددكين عرف أنو دي زولتو الوصفوها لي ( ريا بت أب كبس )
إتعدل في قعدتو وقال ليها ...

أأأأ عبدالله أب كبس عز البطانة وفخري
وفي وجوه العرب بنعدّى ماهو الوخري
كريم وهميم كان لي القبائل دوخري
بت شيخ لبعرب هيلك صحيح تفتخري
توقد نارو ديمة الما بكوس الجمرة
في الضيفان يهوش سكينو دايمن حمرا
بي كأس ما عبر لبنو بجيك بالعمرة
هيلو الراسا وهيلو الامارة وهيلو الشكرة
المرحوم أبوك كان لي القبيلة عطاها
عزك قديم عمك حسين ابو طه
إن شاء الله يكون أخوك دي السكة ما تخطاها

أها أتي بت عبد الله أب كبس
أبوك عزيز ونفتخر بي

وبين وجهاء العرب قدامي مو وخراني اي ( متأخر )
كان لي الكرم كريم وهميم وهو حوبة القبائل وكت مدخور يشيل العايلة ( اي العائلة )
ليك حق لو أفتخرتي وأتي بت أصول ورجال
المرحوم أبوك كان رأس القبيلة وعطاها .. ودا مو عزاً جديد قبلو كان عمك حسين أبو طه
بس إن شاءالله أخوك طه ماشي في دربهم

Post: #105
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 02:16 PM
Parent: #104

قامت ريا داير تدي كلمتن نجيضة فوق ود أعمها

قالت لي
كان ما بسد مكانن قدمو ليها ياطا
( اي الواطا دي ذاتا يمشي فيها ليه )

لا يفوت لا يموت ساعة البيوت مغشية
تُقابة الفريق يوقد صباح وعشية
زايد في الرجال طالق قفاي ووشيا
ضيوف الليل سكفيهم مرارة وشية

قالت لي اخوي اخو السرور البقوم بي الواجب وكت الفريق يكون مضيوف
زي النار النار للقاصدو مولع صباح وعشية
فوق الرجال عودو زايد ومخليني أتنبر بي وأفتخر بي وامشي بين الناس الكي كدي

وحت ضيوف الهجعة ما بس بضبح لهم دا بشبعهم بس مرارة وشية من كتّرت موضباح
في الليل الواحد لي ضيوفو

Post: #106
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 02:19 PM
Parent: #104

قام وددكين قال ليها
ما دخلت التراب البركة في الذرية

والخلاك ورا مابقولو مات يا ريا
دايما في البلاد سيرة ابوك مطرية
بيهو وبي أخوهو تزيد ودي المحرية

Post: #102
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 01:56 PM
Parent: #100

العربي قال ليها :
منو إت في الاهل كفاك فخر يا بنية
العربي شاف البنية أفتخرت كثير بأهلها ونفسها
أنت بت ناس منو بتفتخري فينا كدي


ردت عليه ريا :
انا بت البيوت المن بعيد معنيه
بى فوق السما نفوسنا.. وبيوتنا حنيه
انا بت اب كبس في النسبه بطحانيه

وكان أيضاً الرد الشافي
أنا بت البيوت المن بعيد معنية
وهذه كانت عادة المسافر عندما يشد رحله بكون عارف على اي البلود يمر
واين يكرم
بي فوق السما نفوسنا
نفوسنا عالية تداعب أعنان السما عفة
وبيوتنا حنية
رغم عفتنا وكرمنا وكل جميل فينا نحن قوم لا نسكن إلا في حناي ومعروف بيت الحناي

بت أب كبس اي انا عبدالله أب كبس شيخ قبيلة البطاحين
ونسبي بطحانية

Post: #103
Title: Re: قصه .. طه وريا مع ودكين ..
Author: خالد علي محجوب المنسي
Date: 02-23-2010, 01:58 PM
Parent: #102

قام العربي قال ليها :

عملتي حسابو ضيفك وكرمو وجبتّي
ويخجل كان سأل وأسمو ماعرفتي
أسم شيخ العرب سامعايّو ما شفتي

دا خريف البطانة الفيها مالّو مشارك
هيلو السارحا هيلو الصاهلا هيلو البارك
ماوقعلّك كلامي ساكتا لي شنو خبارك
فخرك وددكين جاك في فريقك زارك

العربي بعد ما سمع كلام ريا حبَّ يوريها
أنو دا شيخ العرب حمد وددكين الذي فاقت شهرته في ذلك الزمان فارس
من الفرسان اللذين يعدو على الأصابع وصلت أخباره شرقا وغربا شمالا وجنوبا

خريف البطانة أي فارس البطانة وما لهو مشارك فيها
وفوق دا من بيت مال وجاه وهم يملكون الأغنام والبقر ( السارحا )
والخيول ( الصاهلا ) والبارك هي ألبل الجمال

Post: #107
Title: Re: قصه .. طه وريا مع ودكين ..
Author: عفاف أبو حريرة
Date: 02-23-2010, 07:55 PM
Parent: #103

ابو احمد متابعين

Post: #108
Title: Re: قصه .. طه وريا مع ودكين ..
Author: خالد علي محجوب المنسي
Date: 02-24-2010, 09:04 AM
Parent: #107

Quote: ابو احمد متابعين


تسلمي يا عفاف ست العفاف

وين أب شنب الكريم عز البطانة وفخري
ودالمحرب هميم وبنعدّى ماهو الوخري


شايفو في محلات المشاوي

تحياتي ومودتي

Post: #109
Title: Re: قصه .. طه وريا مع ودكين ..
Author: خالد علي محجوب المنسي
Date: 02-24-2010, 09:23 AM
Parent: #108

ردت عليه ريا :

Quote: مرحبتين حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
التابعو إن جانا نفخربو ونخدموا حفايه

رد عليها ود دكين :
بارك ربي فيك عقلك يدوم يا ريا
كرمك ماهو كلفه ودي طبعتك فطريه
إياك بت التلوب والسمته فيك محريه
قديم فوت البطاحين عزه للشكريه


ريا من البلاغة والحكمة ما فاق حد الوصف ( وماشاء الله عليها )
لما سألها العربي رفيق وددكين
أجابت بكل حكمة وعزة في نفسها تكرم ضيوفها حتى في حديثها
ولما حبَّ العربي يوريها أنو دا ودكين لا،و عارف أنو وددكين سمع بيها
وناوي الزواج بها وهو لا يعلم أنها مخطوبة لابن عمها طه

ردت علي ريا
مرحب بالكريم الفارس المغوار والمعروف أن عزه ماشئ ملتق
معروف تمام زول ضيوف وكريم ونارو ما بتموت يحتموا بها البشر
من قر وزيفة مطر
إت يا أخوي القلتو فوق وددكين ما بقارب شخصو
وخلي ود دكين البجبر الناس تكرمو بي كرمو
البجي مع وددكين نحن أكراماً له بنفخر بي ونخدمو حفاية ....
هنا وددكين إتكيف كيف شديد من كلام ريا وقال ليها


بارك ربي فيك عقلك يدوم يا ريا
كرمك ماهو كلفه ودي طبعتك فطريه
إياك بت التلوب والسمته فيك محريه
قديم فوت البطاحين عزه للشكريه

بت التلوب : التلب هو الجمل
وعندما يصف الرجل بالتلب :-
فأنها تحمل دلالات عدة
أنه شيال التقيلة إن وقعت
الصبر وتحمل الصعاب والمشقة
القوة

السمتا : القيام بالواجب ( غير متأكد من معناها وليت تنجدنا بت الحسن ودطلحة سمية ريحانة البطانة )
محرية : اي مرجوة

Post: #110
Title: Re: قصه .. طه وريا مع ودكين ..
Author: خالد علي محجوب المنسي
Date: 02-24-2010, 09:53 AM
Parent: #100

أها هم في حديثهم دا جاء طه وطبعاً بتعارفو هو ووددكين
لقاهم واقفين فأبتدر حديثه موجه لشيخ العرب حمد وددكين.. عشان نزلتهم في
طرف الحلة ما عجبتو كيف تعجبو وهذا يعني أنهم ليسو أهل لكرم وأكرام
ضيف .. ودا عيب عند أهل السودان وأهل البادية بالأخص

مرحب شيخ العرب مرحب خريفنا الزارنا
مرحبتين حبابو اتشرفنبّوا ديارنا
مرحبتين حبابو البيهو كل مدرنا
تنزلوا في الشدر مالنا ماتت نارنا

مرحب
وكلمة مرحب يبتدرها أهلنا دلالة على فتح باب الكرم ( حبابك أدخل )
وشبه هنا شيخ العرب بالخريف .. والخريف يعني به المطر
وفي الخريف خير وهو الجود والكرم وكرمو بعم كل البشر ...
وقال ليهم ليه بتنزلو في الشدر مالكم قالوا ليكم خلينا الكرم
وطفينا نارنا...



رد عليه شيخ العرب:
أهلاً بي طه الضرس والفي الصهيباب راس
الجود والكرم هيلك قديم ميراث
نارك ما بتموت با ولده الفراس
إلا قاصدين ام شديد ومعانا عوجه راس

أهلنا لما يصفو زول ويقولوا له :
أب ضرس تعني انه فايت أنداده في المناعة والقوة والعقل ( وزول واجب )
وتعني أنه قوي بطحن كما قوة الضرس
ومن تلك الأوصاف ايضاً
أب فلج يقول ليك هييييع يا أب فلج
القارح مادلّه

أب عروض ..
وغيرها من الألفاظ ذات المدلول الجميل وكانت كلها تحمل معاني للكرم والجود
والشهامة والنخوة الفراسة والفزع

يا أخوي إت معروف والجود الكرم مو شيتن جديد عليك دا شئ ورثته كابر عن كابر
بيت الكرم نارو ما بتموت يا طه
لكن سبب نزولنا خايفين العطلة ونحن قاصدين أم شديدة وراسنا أعوج
عندما يقال ( رأسي أعوج )
قد تحمل معني أنه مسافر لأمر ضروري لكن مافي زول بقوم لي بالواجب في عمله في بلده
ولذا يكون في عجلة من أمره
وقد تعني أنهم مسافرين لأمر مهم وماقادرين يستجمعوا أفكارهم لحل ذلك الأمر

Post: #111
Title: Re: قصه .. طه وريا مع ودكين ..
Author: خالد علي محجوب المنسي
Date: 02-24-2010, 03:48 PM
Parent: #110

لحيــــن ميسرة

Post: #112
Title: Re: قصه .. طه وريا مع ودكين ..
Author: محمد طه الحبر
Date: 02-25-2010, 11:36 AM
Parent: #111

شكرا للاخوان: أسامة الفضل كمال علي الزين haroon diyab

Fadl Karrar على تاج الدين على محمد عثمان عبدالله Elsanosi Badr

حسين نوباتيا المسافر إدريس محمد إبراهيم Ahmed Yousif Abu Harira

وعفاف ابوحريره


شكرا لكم جميعا

وسأحاول توثيق اكبر كميه من شعر العبادي

شكرا لكم مره اخري

محمد طه الحبر

Post: #113
Title: Re: قصه .. طه وريا مع ودكين ..
Author: معتصم ود الجمام
Date: 02-25-2010, 05:46 PM
Parent: #112

يا شباب سلام جاكم

مسرحية المك نمر للمرحوم العبادي
كانت ولا زالت من الكلاسكيات السودانية التي تدرس في منهج التثميل العملي
لطلاب السنة الاولى بقسم المسرح في المعهد العالي للموسيقى والمسرح مع اخواتها
خراب سوبا لخالد ابو الروس ومسرحية بامسيكا لحمدنا وتاجوج .... ما اود قوله هو
ان النص كتبه العبادي للمسرح وطريقة الكتابة تبين ذلك والمعروف ان كتاب المسرح
في ذلك الزمان اقصد زمن العبادي وابو الروس حاولوا مجارات الشاعر احمد شوقي في
مسرحياته الشعرية وحاولوا ان يجدوا مواضيعهم في الواقع لذلك كانت لعنة المحلق
السؤال هل سنحاكم هذه النصوص وسحبها علي الواقع لنقول ان ده غير صحيح وغيره هو الصحيح
يا جماعة ده نص ادبي لو في محاكمة له فل تتم في هذا الاطار ...

وشكرا لكم جميعا


Post: #114
Title: Re: قصه .. طه وريا مع ودكين ..
Author: سيف اليزل جعفر عبد الرحمن
Date: 02-27-2010, 01:16 PM
Parent: #113

فوق عشان طــــه

Post: #115
Title: Re: قصه .. طه وريا مع ودكين ..
Author: سيف اليزل جعفر عبد الرحمن
Date: 03-02-2010, 05:47 AM
Parent: #114

فوق عشان ريا

Post: #116
Title: Re: قصه .. طه وريا مع ودكين ..
Author: سيف اليزل جعفر عبد الرحمن
Date: 03-02-2010, 04:53 PM
Parent: #115

تاني عشان ريا فوق

Post: #117
Title: Re: قصه .. طه وريا مع ودكين ..
Author: سيف اليزل جعفر عبد الرحمن
Date: 03-21-2010, 04:36 AM
Parent: #116

فوق عشان طه