اكلات سريعة وخطيرة للعزومات.... مطبخ بنت الحسين

العزيزة ليلى صلاح... الشهيرة بي أبنوسه مرّه قالت لي كلام، لسبب ما عالق في ذهني بصورة كبيرة... قالت لي انها بعد شغل يستمر لمدة شهور في الاعداد لبرامج قناة الجزيرة... وبعد ان تحصل على اجازة مستحقة بالكامل، تسعى لأن تدخل في حالة "نسونه" بكل تفاصيلها الدقيقة.. ابتداءاً بفنجان القهوة الصباحية، وإلى ما لا نهاية

خلال الاسبوعين الماضيين، وخلال الزنقة التاريخية المشهورة في الجامعة، في آخر الفصل الدراسي... نُزحم بالتصحيح والامتحانات والرصد للدرجات وإلى آخره... وبعد ان انتهت الزنقة... وبدأت الاجازة.. اردت ان اكتب هذا الموضوع الذي احبه جداً.. وهو المطبخ...

في عدد من الاكلات البطبخها لما أكون متوقعه ضيوف ... واهم ما يميّزها انها سهلة سريعة.. ودايما بتعجب ضيوفي... حأخصص البوست ده عشان اكتب عنها... معظمها وصفات لقيتها او شفتها في التلفزيون.. وعدّلته عليها...

اتمنى السيدات العندهم وصفات سهلة وجميلة يشاركونا بيها..

اول وصفة حأكتب عنها، هي السمك بالفرن ...لانها سبب تفكيري في البوست ده...

المقادير
سمك فيليه مقطع لقطع صغيرة
كوب زبادي
ملعقتين طحينه
ملعقتين مايونيز
نص ملعقة مستطرد
ملح-فلفل
ملعقتين شمار اخضر طازج
ملعقة شمار ناشف
عصير ليمونه كبيره..
---اختياري(دي الاضافة بتاعتي للوصفة).. نص ملعقة صغيرة من blue cheese...

الطريقة..
تختي السمك الفيليه في صينية بتدخل الفرن.. او صحن باريكس.. عشان تقدمي بيه طوالي... وتخلطي بقية المقادير مع بعض.. وتكبيهم فوق السمك.. وتغطي الصينية بي foil ... وتدخليها الفرن لمدة 25 دقيقة.. بعداك تفتحي الfoil عشان ياخد لون... حيكون السمك طلّع موية .. وعمل مع المكونات صوص تقيلة بيضاء... بعد خمسة دقايق .. طلعيها.. لزيييزة مع الرز او الخبز او من غير اي شي



blue cheese


الطبق القادم... shepherd pie with a twist (فطيرة الراعي... مع تعديل لزيز)

Quote: blue cheese

Quote: المقادير سمك فيليه نص ملعقة مستطرد

اختلفنا من قولة تيت.

محمد يوسف...غايته اختلاف من غير ما تجرّب ما معانا...

صدقني النكهات دي كلها بتتندمج مع بعضها وبتدي طعم مختلف تماماً.. امشي جرب وتعال



ياخوانا اسمحوا لي اهدي البوست ده كله بي أكلاته، لزميلة الكنافة، عزاز شامي.... واقول ليها، اصمدي

Quote: نص ملعقة مستطرد

كدى قبل ما نواصل يا بت الحسين
ورينا المستطرد دا شنو
ولو ليهو اسم معروف غير دا ورينا , يعنى سودنيهو وكدا

علي محمد علي

مرحب بيك


عليك الله المسطرد ما بتعرفه!!! سمع اضاني، في السودان، بقولوا الإسكيرت ده لونه مسطرده... هدا شكله ... وصلت؟

مريوم يا حبيبة..

ســلامات وهابي 2010 عليك وعلى مودي ونادر..

حأجي اتحشر وأكتب وصفاتي البريدها. طبعا أنا هواياتي زماااان كانت الرسم والكانافاه (أوعا زول يجي يقول ما بيعرف الكانافاه).

من كم سنة وبعد ما بقيت أرجع بيتنا بس في الـ R&Rs طلعت لي هواية جديدة وهي الطبخ. وكل مرة ألقى نفسي فاضية أتفنن في إختراع كده. طبعا بعد الإتصال بصديق (وهو هنا الحاجة).

أمبارح عملت لي فراخ روستو. مااااااا حصل.

لغاية ما أرجع ليكم حضًروا فرخة كبيرة الحجم عشان تتقطع قطع كتيرة:))
وبصلة متوسطة الحجم. بهارات وزيت. أبعدوا من السمن في طبخات الشتا عشان الأكل بيبقى باااارد في ثواني.

وما تنسوا الملح:))


تحياتي للحبيبة ليلى وأسرتها وكل عام وهم بخير

Quote: ورينا المستطرد دا شنو

mustard = الخردل

وصفه عمل لقيمات والشاى فى النار والضيوف فى الصالون

نجيب self rise دقيق سريع التحضير يحتوى على خميره نضيف عليه قليل من الملح و نعجنو بمويه ليتماسك ويكون القوام متماسك

فى المسافه دى بيكون الزيت فى النار ...

بنرمى الرميه الاولى فقط قطعه بسيطه حتى تاخد لون داكن بعدها ونرميها .

نقطع حسب الطلب ونرمى خلال 10 دقائق او اقل بيكون عندك طبق كامل من اللقيمات سريع التحضير

ليقدم مع الشاى ويا رييت يكون شاى بالقرفه ...................................

أها نجي لروستو الفراخ.

تقطع الفرخة قطع متوسطة (لا صغيرة لا كبيرة.. هههههه)

- يتم غسلها وتجفيفيها.
- تحمًر في زيت حار وكتير.
تنشل من الزيت في ورق تنشيف عشان بعدين برضو في زيت.
- في حلة ضغط يتم وضع قليل من الزيت. وتقطًع البصلة ونضع باكبنج باودر. البصلة يبقى لونها شفاف ما تحمر.
- نضع الفراخ المحمًرة في البصلة. ونضيف ملح + شوية كزبرة ناشفة ما خضراء + فلفل + كمون ونقطع فلفلية متوسطة.

نضيف نصف كباية موية. وتقفل الحلة لتنضج بالبخار.

10 دقايق بس والأكلة تبقى جاهزة.

وبالهنا

لازم أشكر الحاجة على فكرة الأكلة. أمي بتعمل بدلا من الفراخ "كستليتة".. أحلى كستليتة ممكن تاكليها:)))


الله يغفر ليك يا مريوم. شكله الزول جعان الليلة..هههههه

بالجد أشكرك (عمر سعد)..محتاج للوصفة دى شديد وخجلان أسأل منها أى زول...هههه

مريم...صحبتى....ان شاء الله بالف خير.
الاسبوع الجاى ده ح اجرب السمك....و بجى اوريك الحاصل.
انا حقيقى بحب الاكل و الطبيخ جدا... جدا. الايام دى الموضه عندنا فى البيت اكل هندى. بجيك راجعه بوصفه او صفتين كده.
______________________________
رجاء .....مشتاقين....و ينك يا اخى

سمارتي يا حبيبة ســلامات ومشتاقون بجد..

أنا وحاتك ما عارفة راسي من رجليً. كل يوم بلدنا فيها مصيبة جديدة. دعواتك..

ـــــ

عمر سعد وأمبدة ســلام وكل عام وأنتم بخير

طبعا يا عمر اللقيمات دي أديك ليها وصفة شاي ماسالا.. وبالهنا مقدما:

- كيلو حليب سايب.
- سكر. ممكن يكون خفيف للناس العاملة ريجيم وكده. لكن الماسالا ما بيكون حلو..
- قرفة - هبهان - بهار شاي عند اي عطًار - وشاي خرز

الطريقة:
يوضع اللبن ليغلي. وتضيف ليه كل المكونات أعلاه وتقلبه.
أتركه لينهي غليانه وقوم بتصفيته بقطعة قماش نظيفة (ما مصفى بالله لو سمحتو..هههه)

ويقدم ليشرب مع لقيماتك الظريف..



* طبعا حيجيني زول يقول لي ده ما الشاي الساموطي زاتو.. أيوة قريب منه بس بيفرق في البهارات



مريوم إستلمت منك البوست.. طالعة مشوار وحأرجع باكلة تانية:))))

رجاء العزيزة... ياخ والله البوست على حسابك... عليك الله كان ما جربتي اكلة السمك دي.. انا متأكده انها حتعجبك... لزيزه جدا جداً... طبعا انا تصويتي دائماً للفرن... الاسباب كتيره خالص.. اولاً بكره ريحة التحمير، الحاجه الوحيدة البحمّرها هي الاسود، لانه سلطة الاسود المحمره إدمان عندنا.. وريحة التحمير انا من زمن في بيت امي، قاعده اطفش منها.. واصحى زهجانه... ومحتجّه كالعادة... ثانياً بحب الاكل الصحّي... لاننا بعد ده الحال، ماشين في العريض.. ولولا الellpitcal machine كان حسي الباب ده ما بدخّلني...(باب صغير، ما تسرحوا بعيد) أكلتك دي، حأجرّبها... واجي اديك الfeedback...

عمر سعد... اللقيمات دي، انا والله بعرف اجيّها كويس.. بس دي شكلها وصفة جميلة وسريعة... حأجربها برضه واديك رأيي... بس النشتري selfraising دقيق.. لاني ما قاعده استعمله عادة...

سمارت العزيزة... منتظرين الهندي... انا بحب جداً اجرّب الحاجات الجديدة...

بجيكم بكره بالوصفة التانية...

ماشين ندوي محمود الألعاب! على قولته

محمد الشيخ أرباب
ألف شكر على الترجمة ... والله دي كانت رايحة لي هههههههههه

اها يا علي محمد علي.. عرفته المسطرد... حتعمل الوصفة ولا لأ...

أمبده... بركه الجاتك براها... وصفة سمحة والله.. جرّب وتعال ورينا




*tip of the day
لما تحمري اي حاجه والزيت يكون نظيف (بطاطس، اسود ...) استغلي الباقي في انك تحمري بصل، وبعد يبرد تدخليه التلاجه.. بجي يوم ببقى ليك sauce لكفته.. او ممكن تديه شوربة جداد، وحبّة ويكة.. ويطلع ملاح ام رقيقه ما حصل... َ

متابعين يا بت الحسين

ماتنسي الحاجات الحلوة

لانو انحنا عندنا في بلدنا دي طوالي في حالة جلسات نسوية
مع الاطباق المتنوعة


عامك سعيد محاط بالصحة والهناء

بت الحسين

سلام عليك وكل سنه وانت طيبه

بسأل يابت أمى من وصفة عمل طاجن الفراخ
لكن بدون مسطرده

يا مريم و راجا و عمر سعد بالله واصلوا لينا فى البوست دا.

شكلكم حرفا ( الحاء عليها ضمة) و عارفين ليكم و صفات ساهلة و لذيذه.

و دى أكتر حاجة سأحتاجها فى ألأيام القادمة.


أخوكم الما عزابى مع وقف التنفيذ (فهمتونى)

طبعا الخلطه والشغل ده تعلمتو من فنان مشهور جدا جدا لكن لو كتبته اسمو بيجى بيقتلنى هنا .........

لانو يوم كلمت اختى بيهو لمن جانا قال لى ما تعمل لى سمعه ياخى ...............................

بس بنزل ليهو اغنيه لو عندى زمن شفتنى بحب المشاكل كيف يا امبده

بعد تخلص ورينى بس الخلطه اعمل حسابك فيها كويس يا امبده الخليط ما يكون مويه ولا يكون قوى اوكى مساله تجربه وبتظبط معاك الاول ده اكلو براك بتلقى نوعين من self raising انا بحب اللونو ازرق وفى واحد تانى لونو برتقالى او بيجى برضو كويس ...........

دايرين وصفه لى (سمنقايه ) يا بت الحسين ؟

لقبت اكلات وعزومات زز ومطبخ
وعمر سد جوه قلت النتاوق

Quote: وقوم بتصفيته بقطعة قماش نظيفة (ما مصفى بالله لو سمحتو..هههه)

يا رجاء

ده جزء من الطقس ولا مهم للطعم

تحياتي

مريم ازيك


اليومين دى انا داخلة فى حالة ريجيم قاسى

عشان كده بدخل بوستيك ده اقرآ واشبع


اها كدى وصفى لينا الخروف المحشى بالفرن (وش ميت من الجوع)

tasneem
جداً .. حأخصص جزء للحلويات اكيد...

Teeta
عندي وصفة طاجن دجاج، دوليه.. بعمل منها نسختين.. واحده طاجن، وهي نفسها ممكن تبقى دجاج بالفرن....

ابن عفّان... مرحب بيك، وربنا يفك عزوبيتك المؤقتة... انا ناوية انقل وصفات كتيرة بعملها عادة... والهدف برضه اني كتير جداً بنسى انا بعرف اعمل شنو.. واتحيّر... ده حيكون لي reference

عمر سعد ... (سمنقاية) دي ما بعرفها هي زاتها شنو... لكن I'm open to new things.. ورينا ابداعاتك... شكلك خطير في المطبخ

محاسن.. بطّلي متاوقة، وادخلي عديل عليك الله.. وورينا وصفاتك

محمد ارباب
اعتقد ده جزء من الطعم زاتو.. رغم اني ما حصل ضقته شاي مسالا.. بس مرته شفته في التلفزيون... قطعة القماش دي بمصرووووووها لما روحها تمرق.. عشان تمرق ليك النكهة بتاعت الشاي

منال
مرحب بيك... ياخ ريجيم شنو.. انا اقتنعت انه الريجيم ده اكبر كذبه بنعملها لروحنا... الكلمة الاساسية هنا (الاعتدال، الاعتدال، الاعتدال)... ومعاه الرياااااااااااااضة.. يومياً... تلقي نفسك بتسيحي..... ده بالمناسبة بوست مستقبلي للإجازة البعد الفصل الثاني

تابعوا معاي طبق الليلة

يا بت الحسين سلامات،
نحن كعزابة، "الطيارة قامت" هلكتنا والله، ويا قول عبداللطيف بكري، ذبحتنا، عديل؛ حا أجرِّب موضوع السمك ده، فيا جيتك راجع أشوف لي وصفة تانيَّة يا كمان مشيت المستشفى..
____
تحياتنا الأخ العزيز نادر..

shepherd pie أو فطيرة الراعي اكلة لزيزه جداً... وسهلة وسريعة
انا بعملها بطريقة شوية مختلفة... والاختلاف الاساسي في النكهات..

المكوّنات
لحمة مفرومة
بصلة
ثوم
صلصة
فاصوليا خضراء (ممكن المجمدة او الfresh)
ملح وفلفل
بهارات (قرفة وكزبرة منشّفة)
ثلاثة حبات بطاطس
حلقات اسود محمّر
ملعقتين مارجرين او زبدة
بيضة
(جبنة فيتا بحليب الماعز او اوريغانو وبيزيل وتوم بودره) واحد من الخيارين ديل عشان نكهتين مختلفتين.. ما حصل عملتهم مع بعض

قشّروا البطاطس، وقطعوه لمكعبات كبيرة... وفي موية اسلقوه ومعاه نص ملعقة ملح... وخلوه يتسلق... في المسافة دي تقلبوا البصلة في حبّة زيت شوية لحدي ما تدبل شوية.. وتضيفوا ليها اللحمة المفرومة، والبهارات والصلصة والثوم... والفاصوليا الخضراء.. وتخلوهم يستووا كلهم سوا... ممكن تضيفوا حبّة موية ليهم ... بعداك تكبوهم في صحن بدخل الفرن... وترصوا من فوق ليهم حلقات الاسود المحمّر (انا بحمّر اسود كتير وبخته في الفريزر، عشان كده دايماً عندي اسود محمّر، ولو مافي ما ضروري.. بس بعمل إضافة رهيبة) بعداك بعد يتسلق البطاطس..تصفوا منّه المويه.. وتهرسوه بي هرّاسه البطاطس.. زي دي ... طبعا هي ممكن تفيد برضه في تكسير الفول...


بعد تتهرس البطاطس.. نضيف ليها المارجرين او الزبده طبعا البطاطس حيسيّحها... ومعاه ملح وفلفل... والبيضة (حركوا بسرعة عشان البيضة ممكن تستوا مع الحرارة) بعداك اضيفوا قطع صغيرة من جبنة فيتا الماعز goat cheese ملعقة كبيرة.. ولو مافي تقدروا تختاروا الخيار التاني... اوريغانو (الزعتر البرّي) والبيزل (الريحان) ومعاهم توم بودره... في النهاية.. تفردوا البطاطس ده فوق المجموعة الاولى... وباستخدام شوكة.. اعملوا خطوط فيها.. وتدخلوها الفرن... لمدة عشرين دقيقة...الخطوط دي مع البيض حتدي لون وشكل عجيب للأكل...

قبل يومين عملتها في البيت.. ممكن تتعمل لغدا البيت، ومعاها سلطة خضراء.... او ممكن تتعمل كجزء من عزومة..

الاكلة دي انا بسميها المنقذة... لأنها سريعة.. سهلة... ولزيزة جداً... وفيها كل المواد الغذائية الضرورية.. يعني الواحد ممكن ياكلها بالشوكة.. وخلاص..


الطبق القادم... البيتزا بطريقتي المختصرة (حأشرح منها نوعين.. بدقيق ابيض، وبدقيق اسمر... )

Quote: نحن كعزابة، "الطيارة قامت" هلكتنا والله

يا ياسر

انت اكثر حداثة من غيرك في ناس لسع شغالين ب "القطر قام" هههه.

تحياتي

والله يا ياسر طيفور حتدعي لي... الوصفة ظريفة جداً.. بس طبّقها صح.. قبل اسبوع تقريبا عزمته جاراتي عشا.. وعملته ليهم السمك ده.. ومعاه حاجات تانية حأشرحها هنا.... اولا احتاروا هو شنو.. ثانياً... استغربوا لما عرفوا سهولة الوصفة...

في الغربة دي، السمك مسييييخ، ما زي سمكنا بتاع النيل.... عشان كده عايز ليه تحانيس زي دي.... بس الجبنة خلي بالك ما تكتّرها.. لانه نكهتها قوية.. اعمل منها زي ما انا كاتية... وممكن تجلّي الجبنة خالص، بس والله العمل البتعمله في الطبق ده، خطير!

مريم الاخري

يبدو ان مطبخك للمترفين فقط

والحاجات دي غالية جدا

ادينا وصفات لحاجات بلدية

تقلية نعيمية وكدا


جمعة مباركة

خليل ازيك

الحاجة الوحيدة الغريبة في الوصفات دي، هي blue cheese .. ودي بتشتري منها حبببببة، بتقعد معاك تلاته شهور ما تكمل، حتى لو استخدمتها يومياً

بالنسبة للنيعيمة والتقلية.. عندي ليهم short-cuts برضه.. يعني ملاحي ما بياخد ربع ساعة مسافة ما يمرق..

عليك الله جرّب السمك حقّي ده.. انا عارفه انه في الدوحة في المطاعم بتعمل سمك والله بس حق السودان (إلا شويّة كده)... وجاهز، ورخيص ورهيب... لكن والله سمكي ده برضه رهيب... خلي المدام تجرّبه ليك.. وحتجي تقول مريم قالت

Quote: بالنسبة للنيعيمة

ياخي النعيمية دي أحسن أكل في الدنيا ...


..

بت الحسين .. سلامات ...
جابتني ريحة الأكل ... وحبيت أشكرك على البوست الزمااان داك ...
بعد ما رجعت ... تاني ... (يوزر نيم جديد.. وإشتراك جديد ..) الله كريم ..

.. تحياتي لـ نادر ..

..

مريومه سلام
عارفه ما في شئ بكرهه في الحياه متل المطبخ لو بيدي الناس تاكل نئ
بيني وبينك بيكون من طول الخدمه ومتمنيه اتقاعد لكين ما في طريقه
بتي بتقول انه امها احسن من يطهو لووووووووووول وابوهم بيقول ليهم لو رفدوه نفتح مطعم
اجيد الاكل التايلندي صيني هندي ايطالي .

سلامات يا بت الحسين
امس في وأحد صحبى من جنوب افريقيا قالى انا جيت من البلد
وجبت ليك هدية.
ناولنى الكيس الماخمج انقري كان فيهو شنو
حوالى ثلاثة كيلو لحم ناشف
ولما لاحظ حيرتى قال لى انحنا فى البلد بعتبروا الز وجبة سريعةsnaks
يعنى لو مستعجل يمكنك اكله على طول
وعشان اتأكد سألته عن طريقة طبخه فاجابno no you dont have to cook it
فازدادت حيرتى وأضاف ما معناه ان طريقة تحضره هى ان يتبل اللحم بعد تقطيعه لشرائح
وبالطبع تضاف كميه من الملح ثم يتم شره تحت الشمس حتى ينشف
سألتة وبعدين ؟
قال لى لا بعدين ولا قبلين فللى .
المهم شلت الكيس وقبل أن اودعه خطر لى ان أسأله سؤال اخير
وسألته طيب كان طبختو البحصل شنو؟
شعرت بيه امتعض. فكرت بسرعه انو الراجل ممكن بسؤالى الما دبلماسى يقطع
علاقت بلدوا بالسودان وبى واعز من وطنية غريزي غمت عيونى وقرمت لى قرمه
وانا أشتم رياح الجنة تهب
حصلت حاجة عجيبة اولا والشهادة لله دا اطعم لحم اكلته فى حياتى
شكرت الرجل وخطفت الكيس وجرى على البيت.
لكن فى الطريق فكرت فى مادا بعد؟
مادا اقول لام العيال؟
ودى حكاية !
سأتى لزكر ما جرى خلال الاربعة وعشرين ساعة الماضية
بينى وبين المدام والمتعلق بالاكلة السريعة الجنوب افريقية اللزيزه
(اعتزر هناك خلل فى الكى بورد فتجاوزا الخطأ فى لزيزه)
محبتى ولنا عودة
خالد جادين

صاحبات المطبخ ,,,,,,,,,

شوفوا لينا حاجات عزابة ,,,,,
وركزوا لي في مقدار الموية خاصة في العجين ,,, كل ما اكب موية لعمل عجينة اقول شوية اقعد ازيد فيها وازيد في والاخر اكب في الزبالة ,,

مريومة سلامات

سمكك خطير .. انا بحب المطبخ جدا

عندى قناعة اى فتاة تحب المطبخ وتبتكر فيه وتجدد من المؤكد امها ماهرة فى المطبخ

بجيك راجعه

السمنقايه

دى طبعا تسميه ناس امدرمان ما عارف بره بيقولو عليها شنو

سريعه جدا خلال خمس دقائق لى عشر دقايق .......من الاكلات البحبها جدا جدا ..

بعد نحمر البصله نضيف عليها طماطم او طماطم مخلوطه احسن عصير نكب عليها مويه بعد فتره

بعد تتسبك ونضيف عليها (دكوه) (زبده فول سودانى ) بعد نخلط الدكوه بالمويه نونضيفه

طبعا ملح حسب الذوق او اى بهارات محببه ليك فى المسافه دى تقطع العيش وتاكل بعد تتاكد

انك قفلت الباب عشان ما يجيك حد يكمله معاك

1/دكوه
2/طماطم معجونه
3/بصل
4/مويه--ملح

اسرع من كده مافى يا امبده جرب وفيد باك

حاتم يوسف العبيد.... ما عرفتك والله، اسمك القديم كان شنو... النعيمية السريعة حأشرحها بعد شوية


خالتي دومه.. والله الزوله الطباخة بتكون دايما حنينة زيك كده... انا متأكده انك بتحبي الطبيخ.. لانك لو ما بتحبيه ما بكوني رهيبة كده.. ادينا من طبخاتك عليك الله... وركزي على التاي والهندي... ديل مطبخين لازم اجرّبهم.. لسه ما اتعلمته منهم شي... منتظراك.. الرسول تجي


خالد جادين.. شوقتنا والله... زوجتك اتقبلت الsnack دي كيف... شكرا على المشاركة معانا..


عمار... والله الطبختين ديل حقات عزابه... كده سمّي بالله كده واعملها... انا شغلي كله سريع سريع كده.. على قول الامريكان working mom ما عندي وقت للمطبخ ... لكن بحبه شديد.. عشان ده بحاول قدر الامكان ابتكر

انتصار صاحبتي.. والله امي طباخه لدرجة .. الله يخليها لينا.. انا حسي مسافرة ليها بعد اسبوع.. وعندي كمية من الطلبات... عايزه منها ملاح نعيمية وملاح روب ابيض وملاح ام رقيقه بي الجداد... تعرفي الملاحات دي كلها بعملها في بيتي، ونادر ومحمود بقولوا عليها رهيبة... لكن انا اصله ما بقتنع بملاحاتي .... منتظرين وصفاتك

عمر سعد.. والله ما بعرفك الفت الاسم ده من وين.. ياخ دي اسمها السخيييييييييييينة... وإلزامي معاها لازم يكون في شطة بي دكوه... والعجب لو اديتها طرقة بتاعت كسره بايته، فرشتها تحت العيش.... تقول لي blue cheese ههههههه

tip of the day

اهم حاجة مفروض تكون في مطبخك هي دي



food processor
... احنا مطبخنا بعتمد كتير جدا على البصل... الآلة دي حتريحك من القطيع والريح... وتقدري تقطعي كمية من البصل في وقت قصير.. سواءا شرائح... او قطع صغيرة... مفيدة برضه لو عايزه تبشري خضار.. انا بعملها بيها سلطة روب بي الخيار والجزر... ما تخلص.. انا بشوفها في المطبخ اهم من الخلاط زاتو... وما بالضرورة تمشي تشتري النوع الغالي او الماركة المعروفة.. انا اشتريت بتاعتي من محل في العين، بي كم واربعين درهم (تقريبا 12 دولار)... وهدي شغاله معاي زي البمب...

مريومه بتي الرسول ليهو الحرم والكرم

الاكل التايلندي بتعمل سريع وممكن تقولي انه مطبخي المفضل لكين حارق لانهم بستعملوا شطه او جنزبيل فرش او حتي الفلفل فرش
اول مره لما مشينا المطاعم التايلنديه تعبنا لكين فتره بسيطه واتعودنا عليه حتي اطفالي يحبونه وحتي لما اكون في المانيا بنمش المتجر الاسيوي عشان نشتري لوزام الاكل التايلندي كالرد كري وقرين كري ويلو كري احمر واخضر واصفر وبختلف عن الكري الهندي توم يم بيست توم كا بيست لبن جوز الهند الصويا صوص اويستار صوص احسن اكتب ليك الاسماء بالانجليزي
glass noodles, Soya sauce, Tom yum paste, Tom Ka paste, Red Curry . green Curry, Yellow curry ,Oyster sauce, Coconut Milk, Tamarind , Basil leaves < Lemon grass< Corriander leaves they call it Bakshi in Thai Spring onion ,a lot of Garlic, fresh ginger, وغالبا يؤكل بالارز المبخر وبفضل الارز التايلندي برضو اجمل من الصيني . ممكن تعملي الاكله في نصف ساعه لو كنت سريعه في التقطيع الارز بتعمل بالارز كوكار يعني ما بكلف زمن ولا عايز منك اي مراقبه .
كميه اللحم المستعمل غاليا ما بتكون كثيره وتستعمل انواع عديده من الخضروات حتي في الصحن الوا حد والالوان شئ مهم احمر اخضر اصفر . عندهم كميه من السلطات جميله وفاتحه للشهيه وكذلك انواع من الشوربه اشهرها توم يم وتوم كا .
جربي دا لانه ما حارق كبدايه
لحم فلتو وخضروات بالاويستر صوص
200جرام لحم فلتو بقري قطعيه رهيف سرائح
جذره فلفيه نص خضراء ونص حمراء مشروم لو كبار اربعه خمس قطع تقطع كلها بصوره جميله متل ما تحبي الجذرر يكون رهيف توم 3 فصوص قليل من الجنزبيل الاخضر ابشريه هو والتوم بالبشاره بتاعه الجبن ملعقتين من الاويستر صوص وحضري الصويا صوص
حضري الطوه بتاعك ضعي معلقتين زيت او تلاته رشي اللحم بقليل من الدقيق رش خفيف
الزيت لازم يكون حار ارمي اللحم قلبيه فيه لثلاث اربع دقائق طلعيه ارمي الجذر المشروم التوم الجنزبيل قلبيهم تلاته دقائق ارمي الفلفل قلبيه دقائق قليله ما تطهي الخضر دي لزمن طويل رجعي اللحم عليهم ضيفي الاويستر صوص ضيفي قليل من الصويا صوص حسب ما يطعم ليك لانها مالحه ممكن تضيفي معلقتين او تلاته مويه قليل من السكر , الحكايه دي كلها تقليب سريع .
اللحم فلتو ومسرح رهيف ما بحتاج زمن الخضر لازم لما تعضي عليها تحسي انها قويه . بس لو عندك اسبر نق انيون ممكن تقطعيه عشان يكون منظر وترميه وتطفي النار
الارز بيكون استوي وطوالي علي الصفره ما يبرد .

100 بيضة
كسريهم
أديهم حبة ملح
وتاخ في زيت مغلي في صاج

أو

كوارع مع موية وحبة بهارات وأقفلي الحلة

تاني لو جاك ضيف أسأليني.

دى يا مريم و ضيوفها الكرام وصفه بتاعة صوص هندى (Mango Chenty). و الصوص بعد ما تعمليه مكن تختيه فى الفريز و تطلعى منه شوية شويه. ممكن تستعمليه لحجات كتيره. مكن تمسحيه فى عيشه بدل الجبنة او الزبده . ممكن تقطعى جداد و خضار (على كيفك) و تطعميهم عادى بعد ما تسنوى الصينية فى الفرن تجى تمسحى شويه من الصوص و ترجعيه الفرن مفتوح لمدة 5 دقائق.
انا بخت خضار (اسود, كوسه, جزر, مشروم, كورن) مع سمك و اطعمهم عادى و اخت شويه من الصوص و على الفرن. بس لحدى ما الخضار يستوى. لو طلع فيها مويه كتيره افتحيها شويه فى الفرن عشان المويه (تحسى).

طيب ابوصفه بتاعة الصوص كالاتى:
قطعى 5 منقات متوسطات الحجم
بليهم فى مويه ملح طوال الليل (حوالى 8 ساعات)
صفى مويه الملح
فى حلة اغلى:
5 كبابى خل + 2 كباية سكر
بعد ما يغلى الخل و السكر اضيفى:
المنقه المقطه المنقوعة من مويه الملح.
عود كبير بتاع قرفه
معلقتين صغار شطه (ما تختى الشطه لو محمود ح ياكله)
5 قطع ثوم ...مهروس
3/4 كوب بلح من غير بزر
3/4 كوب بناتى (زبيب) raisins
يخليهم يغلوا تانى و بعد كه خلى النار متوسطه و سوطى و سوطى لمده 90 دقيقة ( ايوه 90 دقيقه ...ساعة و نصف*) لحدى ما يتقل و يبقى ذى المربه.
ختيه فى مواعين بتخش الفريزر و طلعى منو كل مل تكونى عاوزه تعملى منو
___________________________
90 دقيقة شكلها كتير ...لكن والله بيستاهل

خالتي دومة... الله يكرمك زي ما اكرمتيني... الوصفة حأجرّبها... أموت في الحاجات السريعة.. وحأصوّرها، واوريك الصورة... واوريك رأيي...

عمو كوستاوي.. انت شكلك النوع المابعرف الكمشه من الملعقة... مية بيضة .. ليه مااااالنا....؟ كدي أسأل لينا المدام، انا متأكده انها حتكون زولة خطيرة

سمارت صاحبتي.. عندي سؤالين.. المنجا مواصفات شنو.. منجتنا الطااااعمة السكر سكر.. ولا منجا خضراء... برضه، الخل ما كتير شويه؟ خمسة كبابي موش كتيرة؟

شكرا ليكم جميعا

ســلام مريوم وزباينها.. أووبس وضيوفها:)))))


يا محمد الشيخ أرباب. السر كله في القماش الزي الشاش (في رواية أخرى دلقان نضيف..ههههه)

مصفى السلك بيحصل معاه تفاعل قلوي ولا شنو ما عارف. أنا ما بريد استخدمه خالس.
مصفى البلاستيك برضو ما منه ثقة. يقوم يتفاعل مع بهارات الشاي..




طبعا الفوق ده كله إجتهاد من جانبي. لكن انا شفتا الهنود والكينين بيصفوه بالقماش. وبيني وبينك في الأول كنت مستنكرة وبشدة. لكن بعد ما جرًبته.. آآآآمنتا


ــــ
ح ارجع ليكم بوصفة ساهلة شديد


* سوري محمد الشيخ غلطتا في إسمك.. تحاياي يا ملك

Quote: ياخوانا اسمحوا لي اهدي البوست ده كله بي أكلاته، لزميلة الكنافة، عزاز شامي.... واقول ليها، اصمدي

شكرا جميلا صديقة الكنافة ... لا عدمناك
صامدون صامدون و من أرض المعركة نحييكم
أمامنا البحر و خلفنا بحر تاني و عن يمينا بحر و عن شمالنا بحر براهو

______________

عيب الزول يجي يدو فاضية ..
جبت ليكم وصفة أهم و جبة غذائية على الهرم الغذائي لسكان جنوب قارة آسيا و هم زي
ما عارفين قوة صناعية عاتية و تبوؤا مكانة في الاقتصاد العالمي و عملا بنقل التجارب
الإيجابية حقو نبتدي بالأكل أهم شيء و الباقي هين ....























الرز الأبيض:
1- كأس رز ناشف يغسل و ينقع في ماء دافئ و ملح
2- ملعقة زيت أو زبدة
3- عدد 2 كوب ماء قدر كوب الرز زات نفسه

طريقة العمل:

البسي ابرول المطبخ و جهزي حلة و كبشة و طفاية حريق و الاسبيد دايل على رقم شخص من العائلة فطن وجاهز لحالات الطوارئ
بسم الله الرحمن الرحيم يا مسهل ...

1- يقدح الزيت أو الزبدة
2- تقيفي بعيد من الحلة علشان ما تـتـشي
3- ترمي كوباية الموبة بالتدريج من بعيد
4- ارمي مكعب ماجي بعد تشيلي ورقة التغليف الذهبية كي لا تسبب تلبك معوي و سعب تنقيها من الحلة بعد تدوب
5- اقفلي الحلة ...لا دقيقة افتحيها و ختي الرز بعد ما تصفيهو .. ما بالموية ** أكرر من غير موية النقوع
6- امشي اقضي ليك غرض في البيت و تعالي بعد عشرة دقايق اطفي الحلة كان استوت كان ما استوت لانو مافي زمن بعد ده

و بالهنا و الشفاء و يزين الطبق بشطة كريستال و ليمون و يؤكل أمام التلفزيون

ملاحظة: يقدم ساخنا





___
صحبة راكب عدد واحد وردة بيفتح و يغمض

بالله شوف النسوان ديل إتلموا كيفن!!
جنكم أكل

ليهم حق الرجال كان كتفوكم في المطابخ

طيب شابكننا مالكم

أعطني حريتي
أطلق يديا
من البامبيا

عالم كلتانا

احنا يا كستاوى بنحب الطبيخ بمزاجنا...
ما عشان زول مربطنا فى المطبخ..

Quote: حاتم يوسف العبيد

يا بنت الحسين وضيوفها سلام
دة كان اسمه Hatim Yousif
انت فتحت ليه بوست الحنة حقته عند جيرانكم
مشى عرس وجات معاه العروس وصلته ورجعت
ورجع تانى لبوفيه الفول السودانى الكئيب
العزمنى فيه يوم زرته فى الدمام

اها انا الليلة دى بتكلم ليكم من الGemba
باليابانى مكان العمل لايف من المطبخ حيث
طلب منى العيال اعداد ال Brunch بتاع يوم
الجمعة وكان عبارة عن الاتى:
خبز توست
بيض
حليب
جبن شيدر مبشور

يضرب زى تلاتة بيضات ويخلط مع نصف كوب
حليب ومقدار مناسب من الشيدر
يقطع التوست مثلثات صغيرة ويغمر
فى خليط البيض وعلى الطوة للقلى

ويا سمارت الوصفة دى اتعلمتها من داستن هوفمان فى فيلم
Kramer vs. Kramer اتعرض فى التمانينات بيتذكروه
الناس الكبار

southwest Taco salad

مشاركتي معاكم حتكون ساوثويست تاكو سالاد بس ربك يهون
نعمل الـchili الاول وبعدين نكمل الباقي



__________
أحمد التجاني
بالحيل بتذكر الخلطة دي في الفلم دا والخمج الخمجو الراجل دا من صباح الرحمن
المهم بشوية تعديل ممكن تكون (فرنش توست) وطبعا لو فتنت اولادك في الفرنش توست تاني مابيخلوهو
المهم تقطع التوست شرائح طولية وتغمره في خلطة اللبن والبيض بس من غير جبنة وتحمره في زبدة
وهو سخن تغطيهو بالعسل (ممكن سيرب او عسل نحل)

Quote: أحمد التجاني بالحيل بتذكر الخلطة دي في الفلم دا والخمج الخمجو الراجل دا من صباح الرحمن المهم بشوية تعديل ممكن تكون (فرنش توست) وطبعا لو فتنت اولادك في الفرنش توست تاني مابيخلوهو المهم تقطع التوست شرائح طولية وتغمره في خلطة اللبن والبيض بس من غير جبنة وتحمره في زبدة وهو سخن تغطيهو بالعسل (ممكن سيرب او عسل نحل)

راوية ازيك

تتخيلى فعلا انا ورطت نفسى مع الاولاد من اول مرة عملتها
بقى برنامج ثابت كل ما يشوفونى قاعد فى البيت بيطلبوها
لكن الشيدر بتخليها خطيرة والمرة الجاية ح نجرب بتاعت
العسل
بمناسبة التاكو فتح عندنا مطعم مكسيكى جديد فى جدة
اسمه زى on the boarder كدة تنصحينا بيه

أحمد التجاني.. شكرا ليك ... كتير بحصل اننا نكون بنتونس انا ونادر عن المنبر، ويقوم يقول لي اسم زول.. ما اعرفه إلا لما اشوف الاسم... بالذات الناس الكاتبين اسماءهم بالانجليزي.... ألف مرحب بالعريس حاتم.. الزمن ده عادي العروس بتسيب راجلها بعد شهرين... ههههههه خلي روحك رياضية يا حاتم...


راوية هههههههههههههههههههه.... french toast... اصله ما بدخل لي مزاجي... منتظرين وصفاتك ياخ، انا عارفاك طبااااااااااااااخه

والله يا رجاء... لقيتيك بتاعتك كيمياء عديل كده.. ده كله من شاي المسالا...

كُر علي يا عزوز... شغاله رز سااااااي؟ يلا شدّي حيلك... الموضوع ده بياخد ليه زي اسبوع كده.. وبعداك بتبقى تمام...

كستاوي.. ما لازم زول يطبخ... العيال حياكلوا كيف... بيض؟

Quote: السمنقايه دى طبعا تسميه ناس امدرمان ما عارف بره بيقولو عليها شنو

السمنقاية بتاعة ناس ام درمان يا عمر لو شلت منها
الدكوة...بتبقي اسمها (أم شعيفة) عند بعض أهل البادية
والخلا وسخينة عند أهلنا

مريومة سلامات
والله كل ما اجوع اجي البوست الظريف ده والمريح تحس بالجد كأنك بتتونس وقاعد في لمة كدة وسط الناس الحلوين يشيلو منك هم الدنيا دي
اها قلتي لي شنو؟؟ في الطبخات
لكن ياخ الوصفات دي كتير منها ما سريع - تعرفي انا بحب الاكل السريع جدا - يعني في نص ساعة تكون عملت كم حاجة
اها انا حابدا معاكم بوصفة سريعة جدا قاعدة اتحايل بيها على ناس سهى وسارة وبالذات لما اتزنق واجي متاخرة
طبعا بكون عندنا باقي دجاج محمر ( سوى عملتيه في البيت او جبتيهم جاهز)
اها تقومي تقطعي الدجاج المحمر بي يدك وطبعا بدون عضم بس لحمتو المحمرة يلا تقومي تقطعي فلفلية وجزر وبصل ابيض شرائح وعاهم ربطة بقدونس مقطعة ناعمة وفصين توم مبشور يلا تكبي في الخليط ده خل وشوية ملح
تجيبي الطوة فيها شوية زيت لو زبدة او سمن وتكبي الخليط وتسوطي تخليه زي 10 دقائق وتختيه في صحن وبي طرفة بطاطس شبس
ومعاه جك عصير كبير ورغيف تاكلو وبعدها نومة
هههه كدي خليكم نائمين لامن اجيكم تاني
الوصفة دي بتنفع لاي زول بجيب كنتاكي جاهز وبكون عندو باقي لا عارف يجدعو لا عارف يخليه
ههههههه
تحياتي يا حلوين

أم سهى.. والله شكلها خطيرة الاكلة.... ماما الله يديها العافية.. بعد ما نقع ليك في جردل الكنتاكي، ويفضل باقي.. تاني يوم تجي تعمله لينا مع الرز... بتطلع برضها ظريفة.. ألف شكر ليك.. وانا وانت بنحب الاكل السريع سريع...حليل حبوباتنا، الواحده تضقي عمرها كله في المطبخ...

Quo

Quote: te: السمنقايه دى طبعا تسميه ناس امدرمان ما عارف بره بيقولو عليها شنو السمنقاية بتاعة ناس ام درمان يا عمر لو شلت منها الدكوة...بتبقي اسمها (أم شعيفة) عند بعض أهل البادية والخلا وسخينة عند أهلنا

الاخ نزار شكرا شفت مريم قامت سدارى طوالى وطلعت تسميتى غلط بالرغم من انو قلت ليها دى تسميه

ناس امدرمان ..انا عارف بعض الاكلات بتكون متشابهه لكن اسمائها مختلفه شويه من منطقه لى منطقه

شكر على المعلومه بسمع با شعيفه دى لكن ما عارفه شنو ومرات الواحد بيخجل من السؤال ..

اوكى ح ا اديك طبخه سريعه جدا بتحب شنو انت عشان ازودك بطبخه .؟

طبق اليوم.. بيتزا ... برضها سريعة

زي ما قلت، حتكون الوصفة بعجينة بيضاء، وأخرى سمراء.. لكن الحشوة واحدة...

مقادير العجيبنة البيضاء
3 كبايات دقيق، بيضة، ملعقة ونص خميرة، ثلث كأس زيت زيتون، ملح+فلفل، كوب حليب دافيء او كوب ماء دافي للعجن
نضيف الخميرة للدقيق والملح والفلفل، وبعداك نضيف الزيت، ونفرك بيه العجينة شويه لحدي ما يتوزع، بعداك نضيف البيضة، والحليب او الموية... ونعجن لمدة دقيتين إلى تلاته دقائق.. او لحدي ما العجينة تفك من اليد.. ونخليها تخمر لمدة ساعة.

مقادير العجينة السمراء
3 كبايات دقيق اسمر، ملعقة كبيرة سكر، كوب ماء، ملعقتين حليب سائل، ملعقة كبيرة خميرة، نص ملعقة صغيرة ملح، ربع كوب زيت زيتون
نعجنها بنفس الطريقة بتاعت العجينة البيضاء، ونخليها لمدة ساعة تخمر

مقادير الشحوة
صلصة معكرونة او بيتزا جاهزة (انا بستخدم ماركة اسمها بريقو)، المهم صلصة مارينارا
طماطم مقطعة
بصل مقطع
فلفل اخضر مقطع
توم بودره
ملح فلفل
زيت زيتون
جبنة موزيريلا
زيتون شرائح

بعد ما تجهز العجينة.. نولع الفرن عشان يكون ساخن... نكب شوية زيت زيتون في الصينية العايزين نعمل فيها البيتزا... نبدا بفرد العجينة... العجينة ممكن تكون مطاطية شوية، عادي طبعا.. لكن الحل عشان تتفرد بسهولة... حاولوا افردوها شوية.. بعداك غتوها لمدة خمسة دقائق.. وارجعوا تاني افردوها بتتفرد بسهولة....نفرد الصلصة فوق العجينة، ونوزّع الخضار فوقها.. ونملحها ونعمل الفلفل والتوم البودره ونكب زيت الزيتون ... والجبنة.. وندخلها الفرن.. ما بتاخد ربع ساعة... وكل ما تكون العجينة رقيقة، كل ما قل الزمن البتاخده في الفرن...

الليلة ناوية اعملها.. حأنزل ليكم صورة بعدين

الكرمبا يا شين.. إنتا زاتك الجابك شنو غير ريحة التبيخ..؟


غايتو البشوف وصفاتك دي ما يشوفك قاعد تطلب بمزاج الأكل يومداك في المطعم الأثيوبي.. مما يدل على أنك من الذوًاقة (شفتا الفصحى دي.. هههه)



تحاياي

سلام يا بت الحسين

Quote: سمك فيليه مقطع لقطع صغيرة

أعملى حسابك اليومين ديل فى سمك فيليه فيتنامي لافى فى السعودية




















سؤال فنى (البلطي) بيلغى الخطورة بتاعت أكلات العزومات دى؟ :)

يا بنت الحسين ازيك

يوم انا عملت فيها عايز أعمل تغيير شوية...ودخلت الانترنت سرا
عشان الاقي وصفة بيتزا...أعملها ليارا وصويحباتها...
لقيت وصفة قريبة من الوصفة دي....وعملتها زي ما
قال الواصف...

لما أديتها البنيات...رجعنها وقالن...
ما بتنقطع...وتأكدت بنفسي..
لما فكرت أوديها لي عجلاتي...

فأين تكمن المشكلة...
طلعت مطاطية...ولابسة رتينزا...السكين ما بتمشي فيها!!!!

والغريبة الواصف خاتي معاها صورة فيديو لكيفية
عمل الخطوات...لما شالها من الفرن...وورانا ليها...
علا النصيحة ما قطعا!!!

نزار حسين.. والله بختك، انا عشان كده بقول لنادر ما بجيب ليك بت.. عشان حتاخد جزء من الدلع ... شفته الانانية دي كيف

بالنسبة للبيتزا بتاعتك.. في اعتقادي انك انت ما خليتها تخمّر كفاية... عشان كده بقت ليك زي اللستك... او ما ختيت خميرة كفاية، او نسيت تختها خالص.. الخميرة طبعا عايزه مكان دافي، يعني لو الدنيا برد.. حاول اعجنها بموية دافيه... عشان تشتغل... جرّب وصفتي دي، وانا متأكده انه يارا حتتكيف منها شديد...

سلام ست البوست..الاخت الكريمة \مريم
و لي كل الاخوة و الاخوات..
تحياتي و احترامي...

اها...انا عزابي مخضرم...وطباخ لحد معقول...ههههههه
اها بحب الاكل المجيه..والجديد و بجرب كتير..
لكن عمري ما فتحت لي كتاب طبيخ و لا نقلتها لي وصفة....المهم مجرب كل شئ مع اي شئ
وجني وجن البشتنة في تقديم الاكل..
يعني كل ماعون ليه اكلته...الافطح و الغريق..السرويس..الكورية...بفرزهم كويس
وخــــــــــــــاصة لما يكون عندي وقت و زمن للطبيخ....غالبا في اخر الاسبوع..
اها اكلاتكم دي كلها..جميلة و جديدة و وصفاتكم عينة...
بس ناقصكم شئ واحــــــــد!!
الصور الصور الصور....
يعني صورو لينا (العضة) بعد ما تجهيزوها...يعني زي صورة الاخت عزاز شامي
الاكل في الاول ..منظـــــــــــــــر و في الاخر..طعـــــــــم



______
ما عايزين صور..مجلات
صور حقيقية....

كل التحايا.....

الاخت بنت الحسين
شكرا علي هذا البوست الجميل
الذي سيستفيد منه قبيلة العزابه
وفي أنتظار المزيد

الاخت العزيزه/راجا
التحايا
شنو حكاية الدجاج دهـ
دايرين نعرف طريقة تحضيرالمنسف والمسخن
وقالوا في اليمن في حاجه أسمها بنت الصحن
وأيضا البرم
وصحتين وعافيه للجميع

الاخ عبدالرحيم
مرحب بيك في البوست... انا ممكن اديك وصفة المنسف .. لكن ده من الاكلات البتاخد زمن طويل... اما الاكلات اليمنية.. فده خليه لرجاء...

هوّاري، والله طبيخ بي مزاج ده...

بالنسبة للصور.. حأرفع ليكم بعدين صور البيتزا... وخلال الاسبوع ده ناويه اعمل السمك، بصوّره... ما عارفه الحق اعمل الفطيؤة برضه ولا لأ، لاني مسافره اخر الاسبوع

في انتظار وصفاتك السريعة

وليد طه... الاكله دي انا جربتها بي فيليه هامور، وفيليه السمك السموه هنا، العنكد... وطلع لزيييييييييييييييييييييز.. ما بعرف والله البلطي يعمل معاهم كيف

صور البيتزا

بالمناسبة، العجينة الكتبتها دي انا بالنسبة لي بتكون كتيره.. يعني بتعمل لي صينية كبيييييرة بتاعت فرن، ولا صينيتين صغار، لاننا بنحب العجينه تكون رفعية..


دي صورة البيتزا قبل ما تدخل الفرن


ودي صورتها بعد ما طلعت من الفرن (دي وديتها لجيراننا)... والصغيرة حقتنا...


وبجيكم تاني

مريم مساء الخير

البوست دا جنني ماعرفت اقول ليك داير شنو

ممكن علي الخفيف

شيه جمر

مريوم وضيوفها النقاوة..

ســلامات.. من امبارح ومن آخر مداخلة المنبر حلف ما يفتح لي. حلف بالله واحد. (يا عين يا عنية.. لووووول)

أهاأكلاتي الخفيفات:
(1) سلطة البيض:

طماطمتين - بصلة صغيرونة أو بصلتين خضر (حسب الرغبة.. حلوة حسب الرغبة دي) - بيضتين مسلوقتين - وملح وفلفل - زيت زيتون او سمسم إذا كنتم من سكان السودان:((


يسلق البيض وإنتظروا حتى يبرد، تقطع الطماطم مربعات كبيرة، ويقطع البصل أيضا بشكل كبير (ما كبير خالص) ويضاف ليها البيض المسلوق المقطع ايضا مربعات كبيرة، نخت ملح وفلفل والزيت الموجود.. يا حبذا لو زيت مريوم الكان في التلاجة داك:))

السلطة دي ساااهلة وممكن تعشي بيها أصحابك الجوك فجأة..

(2)

طبعا لو ما شبعوا عليك بالفول المطبوخ أو الفول بالقوطة (الطماطم)
وطريقته برضو سهلة:

المطلوب (توم - طماطم او (أووطة يا قول المصريين) - علبة فول أمريكانا بدون أي خلطة (مصرية ولا لبنانية) وزيت.

يقشر التوم ويقطًع حلقات، ويوضع في الزيت الفي النار، نتركه لمدة دقيتين كان تلاتة بس يحمرو شويتين، نضيف الفول بعد ما نفتح العلبة يا قول عزاز:)) وبعدين نضيف الطماطم المقطعة صغيير ونتركهم ينضجوا مع بعض لمدة 7 - 8 دقايق. ونضيف الملح والكمون والفلفل وكل حبشتكانات التظبيطة.

في ناس (وأنا زااتي) بدل الطماطم بنخت صلصة.. برضو بيطلع ختيير

وبالهنا..


ــــ

* نصيحة اليوم: لازم تسلحوا نفسكم باكبر عدد من علب الفول والتونا والبازلا والفاصوليا البيضا.. الكلام ده للعزابة الزينا:)))


يا عبدالرحيم شكلك قعدت في الأردن واليمن ديل كتير..
المنسف اصله ما عجبني. لكن عجبتني أكلة أردنية اسمها (كعاجيل) حأجي اوصفها (لاحقا.. هههه)

أما أهلنا أبو يمن فاكلهم طااااااعم. بت الصحن دي ما حصلت. من شووووية جارتي صاحبة البيت نزلتها لي سخخخخخنة.. حلًيت بيها بالعسل الأسود.

عندهم اكلة بتاعت شتا بجد إسمها (سلتة) بالحلبة.. ما عجبتني زي الـ (الفحسة).. دي بقى تخصصي واصحاب المطاعم هنا أول ما يشوفوني يحضروها لي. حأجي اوصفها (إجتهادا كده) لووووول

أنا ده كووووله ما بيملأ عيني زي (الرجلة). قبيل كلًمت الجندرية اسالها بيجيبوها من وين. غايتو الجمعة الجاية ياني الضابحة رجلة: لو عملتها أكيد حاصوًرها..


تحاياي

شكرا مريوم.. وضيوفها
الطبيخ فعلا فن .. ووسيلة رائعة لتهدئة الأعصاب من جري الدنيا الكتير ..
(وده حالتو بريطانيا يا رجاء (-:)

أهم شيء يكون في جهاز تسجيل بالمطبخ وبسمّاعات تمام،
موسيقى أو راديو..

الوصفات العندكم حلوة ومتنوعة،
وكمان الأخوان ما قصرّوا (يبدو ان هناك أمل للرجل السوداني في المطبخ)
بس هواري يبدو عليه تخطّى مرحلة الوصفة ووصل طريقة التقديم، الله يكتر من الفنانين الزيّك..

دومة وسمارت كتّر خيركم.. يا لجمال المطبخ التاي .. والهندي..
بس الأخير متعب وروحه طويلة..

______
ما بحب التحمير والزيت، نهائي ما بعمل وصفة بتحتاج اكتر من ملعقتين زيت زيتون..
وعلى قول دومة، تخصصي إيطالي.. وبجيكم راجعة..

____
مريوم..
في البيتزا بخلط الأسمر مع الدقيق العادي (تلتين أبيض وتلت اسمر خشن)
(جنّي وجن الدقيق الأبيض كان في عيش أو غيره، ماعدا في الخبيز..)

Quote: والهندي.. بس الأخير متعب وروحه طويلة..

الجميله نجوان عارفه انا بعمل سمك هندي سريع جدا او شرمز
نصف بصله بخلطها بالخلاط بضع معلقتين زيت زيتون واقلبها فيهم بضيف ليها صلصه طماطم جاهزه افتكر اسمهاArabica لانه فيها شويه شطه تلاته معالق زبادي بخلطه كويس مع Coconut Milk حسب ما تحبي بضيفه للصلصه بضيف ليها التوابل الهنديه للسمك برضو خلطه جاهزه برضو حسب ما تجبي لانها spicy لو عندي جنزبيل فرش ببشر منه حته بدي نكهه حلوه بضيف السمك الفلتو لاني بكره شوك السمك 5 دقائق السمك بينضج . الموضوع دا ما بياخد اكثر من 20 دقيقه لكين بناكله بالارز ما بعرف اعملNan

فزنا بوصفة جديدة بسببك يا نجوان.. شكرا خالتي دومه... بعد ارجع من السفر حأجربها ان شاء الله

نجوان
انا زيّك كده... ما بحب الاكل المحمّر.. وبكره التحمير.. وبتضايق منّه جداً..

فكرتك بتاعت البيتزا حأجربها المرّه الجايه، فكرة لزيزه والله

منتظرين الوصفات الايطالية

رجّوية.. الegg salad دي اديها رشّة بتاعت كزبرة منشّفة... رووووووووعه.. دي اخدتها من حماتي اخت نادر
بالنسبة للفول .. احنا بنسميه فول مطبوخ... وقاعده اعمله زي السخينة، بس بضيف ليه الفول...

منتظرين الوصفات اليمنية

الاخ محمد طه

مرحب بيك.... شية جمر شنو ياخ... دي دايره ليها وصفات!

مريومه

مشتاقين

جاياكم بي وصفه رهيبه

استنو بث

مرحب مرحب يا بت الهنا... منتظرينك احنا

الليلة حأعمل فطيرة الراعي... وحأصورها ليكم

بالنسبة لطاجن الدجاج الاتكلمته عنه قبل كده، في عندي ليه طريقتين.. طريقة سريعة بالفرن، وطريقة بتاعت slow cooking ما بتاخد زمن في التحضير، لكن عايزه وقت في النار

البداية للاتنين واحده... نجهّز التدبيله وهي عبارة علبة زبادي، ملعقة كبيرة صلصة، ملح فلفل زنجبيل مطحون ومجفف كركم بابريكا قرفة هبهان شمار اخضر مجفف نص ليمون وحبّة خل...التدبيلة دي لي 6 كرعين دجاج (ممكن استخدام دجاجة واحدة مقطّعة) بعداك نضيف الدجاج للخلطة دي، ونخليه تقريبا ساعة، ممكن تتعمل من بي الليل، والصباح نطبخها.. او ممكن من غير ما نخليها زمن.. للفرن، بنرص الدجاج في صينية بايركس، ونغطيها بي foil ونخليها لمدة نص ساعة... بعداك نشيل الfoil عشان لما ياخد لون... ونقلب الدجاج عشان ياخد اللون من الجهتين.. الوصفة دي من ريحتها ساااااكت، الناس بتتجنن... وانا دايما بعملها لما يكون عندي ضيوف...

الversion التاني منها.. هو الطاجن، واصلا ده الشكل الاساسي للوصفة، لما شفتها في التلفزيون، وانا عملت عليها التعديل بتاع الفرن... اها بعد الدجاج يتدّبل.. نكب شوية زيت في حلّة تقيلة ونقلّب في الدجاج بسيط بس عشان ياخد لون، ونطلعه من الزيت... بنقطع خضار لمكعبات كبيرة... بصل، كرفس، طماطم وجزر وفلفل رومي (الفلفل الاخضر ممكن طعمه يبقى مر شويه في النار)... ونبدا ندخّل في الحلّة زاتها الخضار، اولا البصل والكرفس والجزر والطماطم والفلفل الرومي.. بعداك شوية نرجّع الدجاج للحلة... ونكب شوربة دجاج او خضار... ممكن استعمال المرقة الجاهزة.. او موية مع مرقة ماجي (انا ما بستعملها)... ونكب ملح وفلفل ونغطيها ونخليها على نار عالية لحدي ما تغلي، بعداك نرخي النار، ونخليها لمدة ساعتين ... ونقدّمها مع الرز...

ما اعتقد الحق اعملهافي الايام الجاية.. لكن بحاول.. دي صورتها حتخلي الصايم يفطر..

بنيتى الحبيبة مريوم وضيوفها الكرام
مشاركتى تجربة اتعلمتها هنا
كعكة الموز
المقادير
كباية سكر
نص كباية زيت
بيضتين
موزتين او تلاته "لازم يكون لونهم اسود ـ معفنات الا شوية "
ملعقة كربونات الصوديوم
ربع ملعقة شاى ملح
كبايتين دقيق
بعد كدا تقوموا تكونجوا الحاجات ديل كلهم فى الخلاط لمدة دقيقتين
ولمن يتكوجنوا تختوهم فى صينية فرن ممسوحة بزيت
لمدة 35 دقيقة بث ممكن تضيفوا ليها شوية كريمة
ومش حتقدر تمسك ايدك
ومطرح ما يمشى يمشى

والله حلاة كيكة يا ام العروس ... والله مبالغة عديل كده... انا حأعملها واجي اوريك النتيجة... بمناسبة الكيك، عندي كيكة جميلة جداً قاعدها اعملها طوالي

ثلاثة بيضات
نص برتقالة مقشّرة
كباية زيت
تلاته ارباع كباية موية
3 ملاعق حليب بودره
كباية سكر

ديل كلهم في الخلاطة، ونخليهم يدوّروا مدة خمسة دقايق

بعداك نكبهم في حاجه غريقة، ونضيف ليهم كبايتين دقيقه معاها ملعقتين باكينج بودر... ونحركهم مع بعض بwhisk (بالمناسبة مفيد جداً لملايقة الملاح بي الويكة، ولتحريك العصيدة)

بعد ما يندمجوا سوا، لازم طبعا الفرن يكون شغال ... نكبهم في صينية للفرن، ونخليها لمدة 25 دقيقة على حرارة 180 درجة...

حأعملها بكرة، واصوّرها ليكم

العزيزه مريم..

Quote: سمارت صاحبتي.. عندي سؤالين.. المنجا مواصفات شنو.. منجتنا الطااااعمة السكر سكر.. ولا منجا خضراء... برضه، الخل ما كتير شويه؟ خمسة كبابي موش كتيرة؟

hmmm ده سوال مهم(بتاع المنقة)..خاصة ان الهنود عندهم عشرات الانواع من المنقه..لكن على مسؤليتى استعملى اى منقه..بس تكون نكهتها قوية.
عن الخل..ابدا ما كتير خاصة انك عاوزه سائل يغلى فى النار عشان البلح و البناتى و المنقى يتهردوا فيه لحدى ما يبقى القوام ذى المربى.
_______________________________________________________________
سلامات لدومة و نجوان....حقيقى انا بحب (اللعبة الحلوة)...قصدى الاكل السمح مهما كان جنسو..لكن عندى حب خاص للاكل اليابانى..حاولت اضبخ يابانى..لكن لقيت روحى بقعد 3 ساعات عشان اطلع لى طبق واحد بيكفى زول او اتنين. عشان كده قررت اصحاب الطباخين فى افضل مطعم يابانى فى المدينة اللى انا فيها.

Quote: عشان البلح و البناتى و المنقى يتهردوا فيه

طبعا سؤال مريم عن نوع المنقة، سؤال زول مفتّح وخطير في المطبخ..
الباقيين قروها منقة وبس!

_____
معاك في حب اللعبة الحلوة يا سمارت،
والقصيرة منها ان كنت انا الطابخاها..

طبعا يا سمارت آمنت بيك يوم قريت ليك هنا مرّة انك بتعملي السجك from scratch
عشان كده ملاحظاتك عن المطبخ ما بتفوتني،
بس دقست في نوع المنقة (-:

_____
ألف شكر يا دومة، وصفة من نوع السهل الممتنع..
الصحن الطاعم ما إلا يقابلوا النيران ويقيلوا ليه في المطبخ (-:
تسلمي..

أسرع من كدا مافي
وبرضو ما في عزومة بتخلو من صحن بلدي

ملاح التقلية بالقراصة أبو عشرة دقايق:

(لُخي) عجين القراصة واللي هو عبارة عن دقيق قمح #2 مع ذرات ملح وغطيهو وخليهو بعيد

بالنسبة للتقلية:

2 بصلة حمراء متوسطة الحجم تقطع لحلقات
3 ملاعق كبيرة شرموط (لحم مجفف)
2 ملعقة ويكة بودرة (بامية مجففة ومسحونة)

بهاراتك العادية

ضعي حلة متوسطة الحجم وعليها ملعقتين من زيت الطعام البتستعمليهو أرمي فيهو البصلة وقلبيها لغاية ما لونها يبقى بني (مش ذهبي) عشان يدي الملاح نكهة محببة وواصلي التقليب مع إضافة قليل من الماء لغاية ما تتهرد (ما تكبي ليها موية كتيرة البصل بينز براهو وبيهرد روحو)
بعد ما خلاص البصلة إتهردت أطفيها بي حوالي كبايتين تلاتة موية ويا حبذا لو كانت من الغلاية طوالي وأرمي وراها 3 ملاعق الشرموط وملح حسب طعم يدك وشوية كزبرة ناشفة وشوييية (قرفة+هبهان) وغطيها وخليها تغلي لمدة 6 دقايق (في المسافة دي ممكن تولعي صاج القراصة) بعديها أرمي فيها معلقتين - 3 ملاعق صلصة طماطم (حسب نوع الصلصة وجودتها) ونص ملعقة كبيرة توم وحركي لغاية ما الصلصة تدوب تماماً في المكونات الأصلاً بتكون بتغلي وخليها تستوي عشان بعد ما تكبي الويكة ما في غليان كتير بعديها كبي ملعقتين كبيرة ويكة وأبدي حركي بالمفراكة على طول عشان الويكة ما (تكرضم) وعن تجربة يا مريم المفراكة ما في زيها لا تقولي لي مفراكة كهربا ولا سلك حركي لمدة دقيقة بالكتير دقيقتين وما تخليها تغلي كتير لأنو الويكة لو غلت كتير بتتقطع ولياقتها بتروح وبتبقى قوامها نشارة نشارة

بعد داك ارمي قراصتك وبالهنا والشفا ..

نجوان ازيك... والله انا برضه آمنت بيها من زمن السجق... واتلصقته ليك فيها لما بقت صاحبتي.... سمارت فعلا سمارت، في اكتر من مجال.. وعيني بااااااااااارده... ربنا يخليها لأهلها وزوجها واولادها.... خلاص يا منقة، انا الليلة مارقة السوق، بشوف كان لقيت لي مرقة كاربة، بسوي الصوص واديك خبر

تيسير عووضة.. هالله هالله، ناس القراصة.. نادر عباس حيتكيف منّك، طبعا المحس بحبوا القراصة... وانا جعلية (تجميع دبي) ... اها بحب الكسره جداً، القراصة دي ما بدورها كله كله.. واخدت منّي تلاته سنين عشان عقدتي تفك منها واعرف اعملها هههههههه حسي خلاص بقيت خطيرة فيها بشهادة المحسي...

انا عندي shortcut برضه لملاح التقلية للماعندهم شرموط زيي كده...

بقلب البصلة في حبة زيت، واخليها لما تحمّر... وبعداك بضيف ليها لحمة مفرومة حببببببببببببببة.. واخليها لما تنشف... بتاخد ليها زي عشرة دقايق كده... بعداك اديهم ملعقة صلصة... واخليهم مع بعض ثواني بس عشان الصلصة تتقلب في الزيت... بعداك اديهم موية... واكب ليهم شمار اخضر، ملح فلفل ممكن حبة قرفة... واخليهم يغلوا مع بعض... بعداك اقوم استخدم دي


او طبعا ممكن الخلاط، لكن دي في الغسيل اخف (كسل شديد)... بعداك بلايقها.. طبعا انا المفاركة ما بعرف استعملها نهااااائي... لكن الملاح ده ضمان، ربع ساعة بكون انتهى... بعداك، يا فتشنا الكسرة.. يا عملته عصيدة.. يا بكون لاخه لي قراصة ارميها....

تيسير .. لعبك خطير على قول سمارت ونجوان.. منتظرنك تاني

دي فطيرة الراعي، عملتها من شوية.. ما اخدت ربع ساعة شغل

بالخطوات
دي اللحمة المفرومة مع البصل وقطعته فيها فلفل اخضر


عملته فوق ليها طبقة بتاعت اسود محمّر، كان جاهز عندي.. لكن لو ما عندك ما ضروري.. بس بتستاهل


ده بعد ما اضفته البطاطس المهروس


وده بعد طلعت من الفرن.. بس عشان تاخد لون


عملتها صغيرونه عشان غدانا فضلت خيركم، فيه حاجات تانية... وانا لزوم الرجيم يا منال، اكلته لي تفاحة قبل الغداء بشوية عشان ما انجرف هههههه

نعرفة يا مريومة

أحلى من أكلاتك دى شنو؟؟؟

أخوانك الصعار مازن ومروان

كان لى شرف التعرف عليهم فى بيت ناس دكتورة صفية أم قصى همرور فى كندا

منتهى التهذيب والرقة والظرف واللطف والذكاء والموهبة

تحياتى لهم عبرك وتحياتى لعبرك بهم ههههه

العزيزة تماضر.. مازن ومروان برضهم متكيفين خالص منّك.. امس اول ما قريت كلامك ده، كانوا معاي في المسنجر، ووريتهم كلامك.. والاتنين فرحوا بيك زي ما فرحتي بيهم... عقبال ما ألاقيك انا ياخ ... محبّة مدفقه من هنا لعنديكم هناك.. وربنا يديم عليكم الفرح، ونشوفكم في ساعة خير...

بالمناسبة انا متذكرة ليك ملاح تقلية من النوع ابو السريع، لما كنت عروس، كتبه بوست وانت جيتي كتبتي لي وصفتك... ومن يومها انا اقتنعت بقدراتك في المطبخ.. منتظرين وصفاتك

البنات السمحات كلكن لي ظلكن
سلام
وصفه ساهله وبدون لحم
لعمل Lasagne
رقائق اللسانيا جاهزه طبعا
برطمانيتين صلصه الطماطم الايطاليه الجاهزه انا بستعمل الماركه دي والنوع ارابيتا دي (Barilla -ARRABBIATA
معلقتين مارقرين او زبد حسب ما تفضلي
125 مللتر كريم (متل الوبكريم )
جبن موزارلا مبشور 200 جرام (وبتكون احلي لو خلطتي Mozzarella and gruee cheese
معلقتين او تلاته دقيق لبن حليب
بيضه ملح فلفل قرفه مسحونه
حضري الصلصه البيضاء من الدقيق والسمن واللبن في النهايه ضيفي البيضه طعميها بملح وضعي قليل من القرفه براس السكين شويه شديد )
في العين التانيه سخني صلصه الطماطم البرطمانيتين حوالي 750 مللتر مع ملعقتين زيت زيتون لو عندك اورقانو Oregano اهرسيسه شويه وضيفيه شوفي ملحها حسب طلبكم وانا بضيف معلقه سكر صغيرونه تخفف حموضه الطماطم شويه
كميه الصلصه البيضاء اقل شويه مثلا تكون 600 مللتر يعني اللبن يكون 500 مللتر الباقي تميه مويه .
الفرن يكون وانت بتعملي في الصلصه سخنتيه لدرجه 200 مئويه . جيب الصينيه الحاتعملي فيها اللسانيا صبي صلصه طماطم مري عليها بصلصه بيضاء خفيف ما بالضروره تكون مغطيه تماما شرائط شرائط احمر ابيض فوقها طبقه رقائق اللسانيا وهكذا
الطبقه الاخيره حاولي تغطي بالصلصه البيضاء علي الطماطم صبي الكريمه 125 مللتر دخليها الفرن بتاخد 40 دقيقه في الدقائق الخمسه الاخيره طلعيها وانشري فيها الجبنه الموزارلا
راقبيها لما الجبن بيفي لونه دهبي طلعيها .
وجيه كويسه للناس الفجتارينز Vegetarians

خالتي دومه.. والله اللازانيا تفتح النفس.. بس دايره ليها جرية نص ساعة عشان تأثر شديد هههههه

انا بعمل وصفة تانية بتاعت لازانيا low carbs.. شفتها في التلفزيون... رهيبة عديل كده...

كوسة
اسود
لحمة مفرومة مقيّمة بي البصل والتوم
صلصة مكرونة جاهزة
صلصة بيضاء (زي طريقة خالتي دومة)
جبنة موزيريلا
جبنة بارميزان

نقطع الكوسة شرائح (لانها حتحل محل اللازانيا) والاسود ونمسحهم بي زيت زيتون باستخدام الفرشة.. ونشويهم.. ممكن تستخدموا شواية الفرن (العين الفوق).. ما بتاخد زمن.. ونقلبها عشان تاخد لون من الطرفين... نجيب الصحن الحنعمل فيه اللازانيا.. ونخلص الصلصة مع القيمة.. ونكب شوية في القعر عشان ما تتلصّق ونرص طبقة بتاعت كوسه.. وبعدها طبقة بتاعت اسود، وبعدها صلصة بيضاء وجبنة بارميزان وموزيريلا... وتاني طبقة بتاعت كوسه.. وبعداك صلصة مع القيمة، وهكذا لحدي ما نخلص المكونات، او يتملي الصحن.. في الطبقة الفوق.. نكب صوص بيضاء، ومن فوق ليها بارميزان وموزيريلا.. وندخلها الفرن.. ما بتاخد زمن لانه الحاجات كلها نجيضة... بس تتماسك... وتسيح الجبنه...

وبالهنا والشفا

بجيكم بعدين بي وصفة حلو، ما يخلص.. وما بياخد عشرة ثواني! ممتاز للعزومات!

يا سلام.. البوست ماشي مسخّن..
وجوّعتونا!

Quote: ممكن تستخدموا شواية الفرن (العين الفوق).. ما بتاخد زمن

تمام يا مريوم..
جنّي وجّن الأكلة البيجاروا ليها من جهاز لجهاز!


_______
لتوفير الوقت والمجهود .. وتحديدا عشان اللزانيا طعمها ما يبقى بشاميل بشاميل،
انصح بإستخدام الRicotta cheese بدلا عن الصلصة البيضاء
ودي موجودة في المحلات، وفي منها الصّحي قليل الدسم..

ولو حابّة تجوّدي الطعم أكتر،
أخلطي مع الريكوتا قبل اضافتها ملعقتين بقدونس طازج مقطّع ناعم
وذرّة من بودرة جوزة الطيب (nutmeg)..

يابت الحسين

الطبخات السمحة دي حجاج الداخل ماعندهم فيها نصيب


هلكتينا بالشاي

تحياتي

زاتوووو

HOW COME THIS POST IS NOT "MUTHABBAT"AT THE TOP?
its the only post with tangible benefits

or do we have to rename one of mariam's pie to the sustainable democracy pie
or fish a l'Arman

come on stick it at the top

تقولي شنو!!!

المرقدة وعزيزة

تحلية ظريفة وغير تقليدية وممكن تسد ليك في عشا
المرقدة
كوب ونص رز مصري نضيف
كيلو لبن كامل الدسم وياويت يكون طازج
ربع كيلو سكر أو حسب الرغبة
حبهان او مستكة او ماورد
الطريقة
تغلى الرز بعد غسله مرة واحدة بس للاحتفاظ بالنشا
نضيف اللبن بعد مايستوى الرز
ببساطة نعمله بطريقة الرز باللبن العادية ولما يخلص خالص نضعه في صينية فرن
وندخله فرن 300 لمدة نص ساعة او لغاية مايحمر وشه
يقدم بارد
بفضل المستكة للطبق دا بتكون أحلى من الحبهان والماورد
وبالهنا
عزيزة
عبارة عن مكرونة بالباشميل المحلى
تسلق المكرونة جيدا
وتحضر كريمة الباشاميل العادية (زيادة عليها السكر وقشطة او كريمة ثقيلة)
توضع طبقة رقيقة نوعا وتوضع طبقة الباشاميل وتدخل الفرن الا ان يحمر الوجه
وبالهنا

Quote: come on stick it at the top

كان مريم تعنونو كالآتي:

سياسية بارزة تطلق السياسة وتدخل المطبخ من أوسع وألذ وصفاته:
(وهي ليست زوجة ياسر عرمان)

Quote: سياسية بارزة تطلق السياسة وتدخل المطبخ من أوسع وألذ وصفاته: (وهي ليست زوجة ياسر عرمان)

نزار ازيك... والله ضحكتني

امس فتحته بوستين وفتحت الرد بتاعهم عشان اعلّق.. لقيت نفسي مسدودة.. بوست عبدالقادر سبيل، بتاع عرمان يمشي المسجد، قلت اقول ليه انه الصلاة دي حالة فردية من العلاقة بين الانسان وربّه... وانه ابن ابي سلول كان بصلي، بس كان بخطط لموت النبي عليه الصلاة والسلام.. اها بعد شوية، قلت ياخ سيبك! وفتحت بوس جنّي بتاع ترشيح نقد، وبديت اكتب انه ده قرار غبي، بدل ما يركّزوا عشان يفوّزوا عرمان.. قلت سيبك، خربانه خربانه...

اها قلت اواصل بي جاي احسن...

انا كنت منتظراك يا راوية.. اقتنعت بيك طبعا من بوست لنا بتاع رمضان داك، مما قلت اني ملاح التقلية بتديه حبّة سكّر عشان طعم البصلة يتعادل.... دي حركة حريفة، ولو لاحظتي تيسير عووضة برضها عندها...

حأجرب وصفة البشامل الحلوة... وبجيك اوريك النتائج

هههههههههههه ميسون النجومي ازيك.. بارك الله فيك ياستي.. لكن يختي احنا ما قدر المقام العالي داك... او يكون بكري خايف على الريجيم بتاعه...

شكرا ليك .. ومرحب بيك.. ما عندك وصفات تشاركينا؟

ههههههههههههه يا الزول زاتو.... غايته تجيني تاني، بتطلع منّي بي عصير بس... بعد مؤامرتك مع نادر للبحث عن شقة خمسة غرف... انا اصلي من زمان شاكه الراجل ده عنده بيت تاني... عنده تلاته ساعات بعد الدوام كده بغتس في المكتب...

نجوان ازيك

ما تتصوري انا اتكيفت للتعديلات بتاعتك دي كيف.. ما حصل جرّبته الريكوتا خالص، رغم اني بشوفها كتير.. وحتوفر جهد كبير في اللازانيا.. يعني ممكن براحه كده تنتهي منها في عشرة دقايق.. حأجرّبها واجي اديك الfeedback... بحبببببببب الItalian foodانا..بس صعب شويه مع برنامج الوزن وكده.. اعز صديقاتي عايشة في ايطاليا... قلت ليها، الايطاليين سُمان.. قالت لي بالعكس..بشكل عام fit... قلت ليها مع كل الpasta دي.. قالت لي ما بياكلوا غيرها!

الليلة حأكتب ليكم وصفتين...

الاولى مالحة...
المقادير
خبز عربي (ياريت لو يكون ما ممكن يتأكل، يعني شوية نشف) او ممكن رقاق الباسطة الجاهزة
شوربة دجاج او لحمة
لحمة مفرومة مقيّمة، من غير صلصة
شرائح جبنة شيدر
سمنة او زبدة او مارجرين بطعم الزبدة (الحته دي مهمة والله واساسية) انا حأفترض انها السمنة
بارميزان


نمسح صينية بي السمنة ونفرش الخبز بعد ما نفصلة، ما يكون مطبّق... ونعمل من الخبز اكتر من طبقة... بعداك في منتصف الطريق، نكب اللحمة المفرومة وشرائح الجبنة الشيدر، ونرش فيها شوية بارميزان، وملعقة سمنة نوزعها كويس... ونكب فيها نص كمية الشوربة... ونواصل الطبقات تاني ... في النهاية، نرش شوية بارميزان وسمنة... وندخلها الفرن وهي مغطّية بي foil.. ونخليها لمدة ثلث ساعة.. بعداك نشيل الfoil.. ونخليها تاخد لون.... بتتقطّع زي الفطيرة.. ومافي زول حيعرف انه ده عيش .. (سليقة) هههههه.. والضيوف حتعجبهم جداً...انا مرات بعملها لينا في البيت، لما اتحيّر.. ومعاه سلطة خضراء..


الثانية حلو.. سلطة فواكة رووووعة وسريعة
علبتين كبار فواكة مشكّلة، ومحفوظة في عصير
علبتين قشطة
علبة حليب مركّز ومحلى concentrated

نكب الفواكة بي العصير بتاعها في صحن غريق للتقديم طوالي... ونكب القشطة كلها والحليب.. ونحركهم مع بعض لحدي ما تذوب القشطة والحليب في عصير الفواكة.. وتبقى زي صوص بيضاء تقيلة كده.. بعداك ندخلها التلاجة لساعة كده .. وتتقدّم... لزييييييييييييييييييزه .. وسريعة.. ولما يكون عندي عزومة وما عندي رغبة اضيّع وقت في التحلية، قاعدة أعملها...

جرّبوها

Quote: نمسح صينية بي السمنة ونفرش الخبز بعد ما نفصلة، ما يكون مطبّق... ونعمل من الخبز اكتر من طبقة... بعداك في منتصف الطريق، نكب اللحمة المفرومة وشرائح الجبنة الشيدر، ونرش فيها شوية بارميزان، وملعقة سمنة نوزعها كويس... ونكب فيها نص كمية الشوربة... ونواصل الطبقات تاني ... في النهاية، نرش شوية بارميزان وسمنة... وندخلها الفرن وهي مغطّية بي foil.. ونخليها لمدة ثلث ساعة.. بعداك نشيل الfoil.. ونخليها تاخد لون.... بتتقطّع زي الفطيرة.. ومافي زول حيعرف انه ده عيش .. (سليقة) هههههه.. والضيوف حتعجبهم جداً...انا مرات بعملها لينا في البيت، لما اتحيّر.. ومعاه سلطة خضراء

يا بنت الحسين...

أهم حاجة تورينا نوع السمنة...ودرجة حرارة الفرن كم؟؟؟

الأكلة دي شكلها لذيذة

مريوم..

ما تنسي تضيفي للريكوتا بيضة واحدة مخفوقة..
السليقة المكسيكية بتاعتك دي باين عليها رهيبة جدا، ح أجربها بالدجاج..
والله آخر الزمن، الست سليقة بقت تدخل الفرن
(دي بالضبط زي حبوبتي لو بقت تمشي الكوفير)
(-:

______
بالنسبة للتحلية، عندي ليك فكرة سريعة جدا.. وstress free
تجيبي آيسكريم فانيللا عااادي وماركة المحل الإقتصادية كافية جدا (generic)
النوع الفي علبة البلاستيك الكبيرة المربعة او مدورة.. تختيه في الفريزر وتنسيه..
(لو جبتي آيسكريم قليل الدسم أو sugar free بيكون احسن..)

لمّا تحتاجي لتحلية سريعة.. او لضيوف جوا على السريع، بدلا عن موّال البارد والشاي المعتاد،
تجيبي الآيسكريم وتضعيه في الكاسات وتختّي من فوق شراب شوكولاتة او كارميل (syrup)
لو عندك مكسّرات شوية ممكن من فوق.. أو قطعة فاكهة، او حتى بسكويتة وورقة نعناع..
لو عندك اكتر من ضيف، ممكن تضعي في كل كاس شيء مختلف فوق الآيسكريم.. (بس الكاسات يكونوا اخوان ههههه)
أكيد الكاسات العندك احلى من صور النت دي.. التقديم ، التقديم على قول هواري..

مريوم الحبيبة و ضيوفك اللذيذين جداً (ناس و صحون)!

كل سنة و انتم كلكم طيبين

جيت حسب الوعد يا مريم... لكن قصة الShortcuts دي خلتني أرجع تاني للعنوان و أنتبه انو للأكلات السريعة و خطيرة و بتفك الحيرة .. لقيت ملف الأكلات السودانية ما مناسب لأنو داير ليهو فزعة حطب.. و قعدة (تكل) بكل توابعها حتى جلابية العواسة اللي لازم طرفها يكون واااااسع ..يا معاها طرحة ..عشان نشيف الدموع و ال.... الناتجة من الدخاخين!!

أها مشيت قلبت ليك في العام و المبتكر..و الأفرنجي..

أديك واحدة من بنات أفكاري.. اللي (انفتقت) في عيد ميلاد هبة قبل شهرين** و فعلا كانت سريعة خصوصا اني أديت حسن (عشرة سنوات) يلفها لي و كان في قمة السعادة!!


لفائف الباذنجان و الفلفلية..

باذنجان مقطع شرائح طولية
فلفلية (بابريكا) ملونة مقطعة شرائح رفيعة و طويلة
ملح و خل و ليمون و ثوم و فلفل و شمار ناشف

رشي الباذنجان بكمية كافية من الملح و اتركيه في مصفى لمدة نصف ساعة أو أكثر حتى يخرج السوائل المرة منه و لا يمتص الزيت عند التحمير
في هذه الأثناء قطعي الفلفلية و ستويها saute في شوية زيت زيتون أبعدي من الزبدة عشان عايزين اللو كالوري

بعد ذلك اغسلي الباذنجان بالماء (مجرد شطف من الملح و السوائل المرة) و جففيه قليلا بورق المطبخ..
اقليه في الزيت و أخرجيه على ورق تجفيف ليمتص الزيت و اتركيه حتى يبرد
اخلطي مكونات التتبيلة أعلاه بمقادير حسب الرغبة و الأفضل تذوق الباذنجان المقلي قبل اضافة الملح فقد لا يحتاج للمزيد
تبلي الباذنجان شريحة شريحة بالخلطة و لفي كل شريحة حول مجموعة من أعواد الفلفلية السوتيه

و بالهناء جداً

و لي عودة بإذن الله..

سلام تاني لكل الناس ..و تمنيات بسنة جميلة


----------------------------------------
**الطعم أكيد ما مناسب للأطفال لكن دا كان واحد من الحاجات الاستهدفت بيها الأهل!!

الللللللللله.. سناء دخلتي الساحة.. والله دي احلى هدية الليلة..

صحن مقبّلات لزييييز.. وانا بحب الاسود المحمر جداّ جداً.. لدرجة انه لما امي كانت تحمر الاسود، انا كنت بخلصه قبل ما تهرس وتبقيه سلطة.. بشيل الاسوداية كده.. ومعاها ليمون وملح بس... وباكلها.... حسي فكرتك دي رهيييبة .. اعتقد التحدي الوحيد الفيها هي الحرفنة بتاعت تقطيع الشرائح

الحاجة الاظرف فيها، انك خليتي ولدك يساعدك في الشغل في المطبخ.. ده بخليه يتعلم ياكل حاجات جديدة.. ويتعلم يتعامل مع الاكل كيف.. محمود بعصر البرتقال بتاعه براه بالعصارة.. وبشربه.. ولو لقاني عصرته ليه، بزعل..

منتظرينك طبعا.. ما تتأخري علينا

عظمة يا نجوان.. الأساس واحد.. والsauce مختلفة.. والله فكرة ... بالذات في الصيف بتكون رهيبة..

مشكوره يا عزيزة.. وشوّقتيني ازورك في البيت عديل كده

الاخ نزار.. اي سمنة نكهتها حلوه.. سمنة بلدي.. او سمنة حيوانية او نباتية.. او حتى زبدة.. وظيفتها هنا مجرّد النكهة

مريم و نجوان....ما تحرجونا يا اخى...
انا نوع الناس البيحبوا يشكروهم شديد خلاص....هسى انا مبسوووووطه.

ايام السجك دى يا جماعة لما كانت الدنيا بخيرها. لما كنت بتريض يوميا و بمشى السنما فى كل نهاية اسبوع و بمشى Comedy club كل شهر او شهر ونص. لما كنت بسوق 3 ساعات فى ال Highway عشان امشى حفلة عمر بانقا. الان انا بقول يارب اليوم يعدى على خير.الحمد لله ...العلى القدير.
*******************
ملاحظة سريعة كده عن لزانية Lasagna نجوان و صينية دوما بتاعة المكرونة بالبشملا Béchamel sauce.
بالنسبة لى ديل اكلتين مختلفات تماما. الاولى ايطالية (و يقال يونانية) و هى بتتعمل دائما بالجبنة ...دائما ricotta او mozzarella
التانية اكلة فرنسية ...البشمل صوص مهم جدا فى ال French cuisine . الغريبة الوصفة الاصلية برضو فيها جوز طيب.*
*******************
سؤال لنجوان .....بنفس الحشوه بتاعة اللزانيا (الجبنة و البقدونس و البيضة و حبة جوز الطيب) انا بحشى stuffed shells



المشكلة انى جربت ادخلها الفرن مفتوحة و مغطية لكن فى كل الحلات بتهبد و ما بتطلع مفرهدة ذى اللى فى الصورة الفوق دى...اى فكرة تكون المشكلة فى شنو???

_________________________
*Finally,I quote Monk’s theme song “I could be wrong now, but I don't think so”

نزار سلامات...لو كنت فى امريكا ( و اظن كندا) عندهم حاجه اسمها:
I Can't Believe It's Not Butter
و دى بتدى طعم و نكهة الزبده بس...من غير الGuilt

مريوم وضيفاتها الحبيبات وضيوفها الغوالي:))

هسسسسع بس رجعت من الشغل. مزنوقة زنقة عدوكم. ما بحس بوقت خاص لرويحتي دي إلا في الخميس بالليل والجمعة قبل الصلاة..ههههههه

المهم متابعة معاكم. مرة مرة بفتح البوست في الشغل عشان أشوف لي أكلة.. حاجيكم يوم الخميس (قرًررررب)..


يا مريم ونجوان. أنا الأكل المحمًر بيعني لي الأكل الجد جد.. لو ما البيت ريحتو إتعبًقت كده وبعدين عملتو بخور. شن الأكل الإتعمل:))))

أنا غايتو من ناس الحزب بتوع "المحمًر والمشمًر".


وبالهنا في كل الأكلات عاليه (حلوة عاليه دي..هههههه)

قبل ما أمشي انوم اوصف ليكم إدماني في التحلية: التيرميسو*

طبعا الوصفة الأساسية قاعدة تتعمل ببسكويت مخسوس وهو الـ Lady fingers. وما قاعدين يحلًو القهوة. وبيبشروا شيكولاتة في الوش... وتعقيدات كده إتخلصتا منها زمااااان.

المكونات:
بسكويت شاي عااادي (المسيخ داك) - قشطة تبقى خارج التلاجة مدة - سكر بودرة - ونسكافيه..

نغلي موية ونحل بيها كباية كبيرة نسكافيه ونضع معاه سكر (حسب الرغبة)

نخلط سكر البودرة مع القشطة (لصينية متوسطة نحتاج لـ 4 - 5 علب قشطة صغيرة)

يالله نجيب صحن زجاج بتاع تقديم ونرص الدور الأول من البسكويت وبالمعلقة نصب النسكافيه عليه (ما تغرقوه عشان بعديين بتجيك قرمشة هنا وقرمشة هناك)

ونغطي الدور الأول بالقشطة المحلاًة ونعمل الدور التاني وهكذا دواليك.......

في آخر غطا قشطة رشوا شوية نسكافيه حب.. ممممممممم

(السر بقى إنك تدخل التيرميسو في الفريزر في الأول لغاية ما تجمد. وبعدين تنزلها في التلاجة العادية)
ولازم تتأكل من التلاجة. يعني تجيب المعلقة بتاعتك وتفتح باب التلاجة وتتكلو بركبتك وتغرف قدر قدرتك:)))))



* وبالهنا وتصبحوا على خير..

اسمارت و نجوان و رجاء.. نجوم البوست اللامعين , و ست المطبخ كلو ..ازيكم كلكم و شكراً ليكم شديد على اتحافنا بالجمال دا كلو .. لو عندكم وقت أعملوا في الصور بتاعتكم دي أي حاجة تحفظ ليكم حقكم الأدبي .. منتديات السيدات سريعين في (لطش) الصور و بصراحة أنا حارقني للسودان و السودانيين جدا انهم بيشيلوا حاجاتنا فن و غيره و ينسبوها لنفسهم.. و بعد دا لسانهم فينا (آد كدا هو________________): فعليكم الله أقطعوا عليهم الطريق دا على الأقل..

___________________________

اسمارت المرة الفاتت سلمت عليك أول ما رجعتِ بعد غيبة فتحتِ لي , و اتعقدت.. أصلي ما بريد الاحراج,
أها هسه استجمعت أطراف شجاعتي و جيت أسلم تاني..
ما دام بتحبي الياباني ياخي زورينا ..ما حأطبخو ليك! و أنا عويرة أتشالق قدام الأساتذة؟!.. لأ بس حأوديك حتات حتعجبك جداً ..وعد!
بالنسبة للStuffed shells أنا ما بدخلها الفرن و أفتكر زي ما انت عاملاها كدا طعمها أطيب أكيد لذيذ.. باحشيها بخلطة من الفيتا و الكوتج مع ريحان فرش أو نعناع برضو فرش..و بدون بيض فما بتتحتاج فرن.. و بتحافظ على شكلها.....
وووووبس.. السؤال كان لنجوان, لكن حاجة شلاقة دي غايتو الله يعينكم عليها!
بس حقيقي أنا برضو مستنية رد نجوان لأنو لو في طريقة تدخل الفرن و يكون شكلها حلو تكون حاجة ما تخلص.. : )

___________________________

نجوان .. مبدعة جداً و يسلموا ها الأيادي.. ضحكتني قصة الكاسات يكونوا أخوان دي.. أنا طبعاً بت حلاّل .. (آآي قديتكم بيها الحاجة دي لكن بصراحة أهلي و حلاّلنا عاجبني جداً.. أو يمكن من شوقي ليهم و لحلاوة زمن قديم تاني ما بيرجع)..!
المهم ..يا قول تبارك..
أهلنا في الحلاّل.. حلاّل راقية و مفلهمة و ( بيعرررفوا السمح و الميز , على رايهم).. أها لو يوم مشوا زاروا أهلهم أو نسابتهم في المدن (مدني أو الخرطوم) و الله قدّر يضيفوهم بطقم ما كامل.. أو صحن واحد مشاتر في الصينية , أها شيلة الحال لحولها.. قايليننا ما بنعرف؟ شايفننا ما بنستاهل...و ليه..و ما شافونا لامن يجونا بنضيفهم كيفن.. و الفعلتك ..و التركتك..وووو..ا!!
أها يا عزيزتي أول عزومة عند يابانيين (ما بتشبه الصورة التحت دي ...إطلاقاً!!) ألقى ليك كل كباية من جهة.. و ما في صحن بيشبه أخوه.. و زول واحد بيعزم و الاّ يخسّم ما في..ضحكت في سري.. و قلت ما شافوهم أهلنا كانوا بقوا سيرة تسير بها الركبان..!
لكن عجبتني الحاجة دي عندهم جدا و فهمهم فيها انو الزول يشوف تشكيلة مختلفة من الألوان و الأشكال و يمتع نظرو بيها و انو الشكل الواحد ممل



و مع انها عاجباني جداً عندهم لكن ما قادرة أطبق النظرية دي الا في نطاق ضيق و غالباً بتنتصر فيني الطبيعة السودانية و حب التطقيم!

ميمو أنا غرامي المقبلات و الفينقر فودز... و اهتمامي بيها مساوي لاهتمامي بالطبق المين..و زيك بأفضل الفرن و بأختصر التحمير قدر ما أقدر

رجوية ذكرتني هالة سلطان في مسلسل الليل و آخرو لما دخلت تناقر الشيف في انو لازم السمنة تطفح في الأكل .. و لما قال ليها ما صحي.. هرشتو :))

عموماً بحب يكون الطبق المين واحد يعني لو صينية بشاميل (خضار أو مكرنة أو كريب crepe ) أو صينية دجاج أو سمك أو أي طبخة تقيلة يكون صنف واحد و الباقي مقبلات و شوربة و أطباق جانبية خفيفة..طبعاً مع الرز و الخبز..و الحلو..

بالنسبة للطبق الرئيسي .. حسب نوعية ضيوفي..يعني لو عازمة عرب بأحرص انو يكون الطبق الرئيسي سوداني..أو بإضافة أو نكهة سودانية واضحة.. و لو عازمة غير عرب يابانيين أو أي جنسية تانية بأعملو سوداني أو شرق أوسطي.. لو عازمة سودانيين ..(و دي كانت زمان هسه الناس كلها سافرت و بقينا تقريباً برانا.. إلا وين وين يجي زول من بعيد..) هنا بقى بأمشي على العالمي و ما بقيد نفسي ..

و معليش يا مريوم أنا جيت البوست دا متأخرة و لسة ما قريتو كلو كويس لكن في حاجتين انت أشرت ليهم عايزة أأكد عليهم لأي واحدة بتأسس أو حتأسس مطبخها من الأول.. الFood Processor و ال whisk ديل مهمات خالص.. و لو الواحدة جابتهم من الأول حيوفروا عليها أدوات كتيرة و مجهود و زمن كبير.. أنا ماركتي المفضلة في المطبخ Cuisinart و الفود بريسسور (يا عالمات منال العالم) بتاعتهم و ال Standmixer أعز حاجتين علي في المطبخ..مع الفرن طبعاً!

Quote: عموماً بحب يكون الطبق المين واحد

سلام يا حلوين.. وحمدالله على السلامة سناء خالد..

ويا سمارت ما تتواضعي.. you know your way around the kitchen
ودي شهادة يا بت امي ما قاعدين نوزّعها ساكت كده
(-:

بخصوص الـ stuffed shells معليش ما عندي الإجابة الشافية، الحاجة الوحيدة الممكن أقولها
انه ما تنجضيها للآخر قبل الحشو، يعني بالكتير نص استواء (al dente) على قول الإيطاليين،
(لكن متأكدة انك عارفة الحتة دي وح تكوني بتعمليها كده..)
ويا سناء الفرن ضروري لانه بيخلي مقومات الحشوة تتماسك (مع البيضة المخفوقة)
والنكهات بتتداخل وتصبح اطعم في تقديري.. وإلا ح تكون بقت مكرونة بالجبنة..

انا بعمل sauce مع الـstuffed shells ولابد يكون فيه crushed tomatoes قبل ما ادخلها الفرن (دون غطاء)،
بيضيف لون وطعم جميل.. احيانا بضعه من فوق ليها على الصحن.. وجبنة بسيطة جدا..


_____
خطيرة يا رجاء.. تيراميسو حتّة واحدة!
بعدين بعرف الأكل في العربية، في المواصلات، الشارع،
بس الأكل في التلاجة دي جديدة .. ههههه
تسلمي يآخ..

احلي احلي احلي تحلية...

سناء خالد؟؟؟



مشتاقين وكل سنة وانتي طيبة بمناسبة الخمسمية عيد اللي فاتو


ــــــــــــــــــــــــــــــ
مريم سلامات..بوستك الجاب سناء دة فيهو سر

سلامات مريم وضيوفها..
وبالمناسبة السعيدة دي(مشاركة سناء) اعترف ليكم باني ابلد مخلوق في الطبخ..بكرهو عمي ما بحبو..
لاسباب..
منها اني لو عملتا الاكل ماباكلو..
واني لمن اطبخ لي طبخة ناس بيتنا بيستغلوني(إيما) استغلال..فبقيت عن قصد بتغاتت عليهم وقلبت الغتاتة لي بلادة..
وبرضو بلاوذ من الزيوت والدهون والسكريات نظام ما دايرة انبرش..وقصة اللوو كلريس دي ما واثقة فيها...

لكن بموووووت في الفطائر.. وعندي صديقتي هنا بتعمل لينا فطائر وجيس كيك .. مكرهاها..
فيا ريت توروني اسهل طريقة لعمل الفطائر والجيس كيك..

اكرر..اسهل واسرع طريقة..ما دايرة اقضي اليوم كلوو في المطبخ هههههههههه
(الطلب دة لكل المشاركين)..

ـــــــــــــــــــــــــــ
نجوان...شايفاك كشفتي الدور البي هناك :) :)

يا سلاااام.. المطبخ محروس وستّه تكوس (دي طبعا من امثال الحاجه...) احنا برضه يا سناء ما من الخرطوم، من رفاعة.. وفي قصة الخسّيم دي عندنا قصص.. طبعا انا بقول من رفاعة.. ابوي من رفاعة وامي من رفاعة.. لكن مجموع الايام القعدتها في رفاعة خلال التلاتين سنة الفاتت ما بتتم سنة.. عشان كده الناس لما يسألوني بتعرفي فلان ولا فلانه من رفاعة، بكتشفوا اني زولة فشنك.... الخسّيم دي طريقة غريبة في الترحيب بي الناس، وانا بتضايق لما يخسّموني.. يعني انا اصلا بكون عامله portion control هههههههه وبكون عاملة كمية من الضغط على نفسي عشان ما اتقّل في الاكل.. يقعدوا يخسموك... ولو ما اكلتي، الاكل ما عجبك.. او مفلهمة.. او او... اما لما تكوني في الطرف الآخر، المفروض يخسّم... دي مشكلة اكبر... عندنا واحدة قريبتنا، كان ما قعدتي ليها في الواطة... وحلّفتيها بالغالي والرخيص ما بتاكل.. خاااااااااالص.. ولو ما خسمتيها، بتشيل حالك...

رجاء العباسي.. والله انت زولة رهيبة.. تيرماسو ده اتوحمت بيه بي محمود.. الحاجة الوحيدة الطلبتها لما كنت حامل.. لكن لقيتك عملتي قفزات ضخمة.. يعني الزول ما يضيّع زمنه.. ههههههههه ... الcheese cake كيف معاك؟ انا بجيب ليكم وصفة الليلة لي cheesecake على البارد، عندي في كتاب بتاع طبيخ.. ورهيبة جداً... ما دايره الشغل الكتير بتاع الفرن داك... لكن تاكلي وتاخدي ليك جريه ساعة.. ولا شنو يا سمارت

سبقتيني يا نجوان بي الصوص للShells... انا طبعا ما بعملها خالص... لسبب معين.. انه انا وصلت لمرحلة مع المكرونة اننا زهجنا من بعض.. ووصلت لقناعة انه كله pasta.... القناعة دي وصلت ليها بعدما عملت يومpasta manicotti الاسطوانية.. وتعبنا مع بعض تعب شديد...



هي طلعت لزيزه خالص.. وزي ما قالت نجوان، عملتها ألدينتى pasta al dente ...

بمناسبة الpasta... انا بحب جدا جدا الalfredo sauce الصلصة البيضاء... وروني وصفاتكم ... برضه الmarinara لو في منكم بتعملها في البيت... برضه ورونا الوصفات.. انا الليلة حأخت وصفتين .. واحده الcheesecase والتانية وصفة asian كانت بتعملها لينا لوليتا الفلبينية الكانت شغاله معانا واحنا صغار.. مع بعض التعديلات .. عشان كده ما ليها اسم..

سناء... دي الmachine الناوية اجيبها next ان شاء الله.. عندي واحدة، ربحها نادر في مسابقة.. لكن ما عاجباني ... بس منها احجام كبيرة شديد.. انا بتعجبني الحجمها صغير.. الضخمه دي بحس بيها too much على احتياجاتي...

برضه عايزين وصفات لشوربات يا سيدات


رواية.. القحة ولا صمّة الشخم يختي

منتظراكم

Quote: خلال التلاتين سنة الفاتت

شلتي حالك برااااك اسفيريا..

Quote: ضحكتني قصة الكاسات يكونوا أخوان دي

يا سناء.. جبتي سيرة البحر وح تخليني انداح وأفتل البوست لمريوم..!!

انا يا ستّي minimalist جدا في حتة العدة دي، ما بحب الكرور الكتير..
وبعتقد الواحدة أحسن تضع ميزانيتها في حاجتين تلاتة تمام.. بدلا من ان تملا الدولايب روبابيكيا..
وبنفس المنطق، بتفق معاك وراوية في انه مافي داعي لملي السفرة،
طبق رئيسي واحد مزبّط مع طبق جانبي وسلطة..ثم تحلية.. كفاية جدا..
(بالذات لو عازمة ناس بعرفهم، اي حساسية تجاه اكل معين، الخ)

بعدين اختك من أنصار كسر القاعدة.. ما بحب المتشنة (من matching) الكتيرة سواء في العدة، اللبس، او باقي الحاجات..
بس كسر القاعدة دون رؤية بيكون أحيانا شتارة.. يعني ممكن يكون في عامل مشترك بين كاسات شكلها مختلفة..
وهذا العامل المشترك ممكن يكون واضح أو subtle جدا..
او قد لا يكون هناك عامل مشترك، بس تكون هناك فلسفة ما.. (عجبتني جدا صورة المائدة اليابانية دي!)

برضو ما بحب العدّة البدسوها للضيوف،
لو ما أكلت فيها انا ستها في الأول -كل يوم- مافي زول بيشوفها!

وأكتفي بهذا القدر يا مولاي..
(رأفة بمسار البوست ههههه)




* التعديل لسرّور أيضا..
الموضوع جميل .. أراهنك ح يبقى موضة سريع!

Quote: انا بحب جدا جدا الalfredo sauce الصلصة البيضاء... وروني وصفاتكم

طبعا من اكلاتي المفضلة الــChicken Alfredo وهي من اهم اسباب خراب ميزانيتي..
اول ما الشيك يدخل ..انا بدخل طوالي علي الــ Olive Garden ..بيبدعوا فيها..قررتا اعملا براي..مشيت جبتا الصلصةمن الجينت..

قطعت صدر دجاج لشرائح مستطيلة,,حمرتها في نار هادئة لمدة خمسة دقائق لمن يبقي لونا بني علي دهبي..بعدين طلعتها في حلة تانية واديتها ليمون وبهار ورجعتها النار لمدة عشرة دقائق تانية..في قلاية تانية بمسحا بي زبدة واجيب الصلصة الجاهزة واضيفا وابدا احركا براحة واثناء ما بحركا اضيف ليها بهارات (ممكن فلفية مقطعة وجبنة Parmesan cheese في الوقت داك بتكوني حضرتي نوع الباستا(المكرونة) الانتي دايراها ..تختيها في صحن خزف (عشان بيحفظ الاكل ساخن) نقوم نخت الباستافي الصحن دة وفوق عليها الجيكن المطبوخ وفوق عليهم خلطة الالفرديو..نزينها ببقودنس..بالهناء والشفا..ومبروك عليكم الخمسة باوندز :) :)






ـــــــــــــــــــــــــــــــــــ

مني رجاء والعشم ما مقطوع فيني صح؟؟

وانت الصادقة يا سارة على.. البوست الجابك وفكّاك من بوست الحبر السري بتاعك داك ما هيّن...


المقادير
8 حبات جبنة كيري
فنجان سكر
علبة قشطة
فنجان ونص حليب سائل
1 باكيت dream whip
باكيت بسكويت شاي، اررررخص نوع
اصبع زبدة على حرارة الغرفة


اها.. يلا البسكويت نطحنه، ومعاه الزبدة.. ونفرشه في الصينية بتحت.. انا قاعده اعمله في صحن بايركس.. لكن لو عند الصينية القاعدتها بتتحرك، دي هي الصينية بتاع الcheese cake... بعداك يلا في الخلاط... نخلط الwhipp مع الحليب السائل شوية كده .. بعداك نضيف ليها باقي المقادير كلها.. ونخلطها مسافة... دي بتبقى الطبقة التانية للcheesecake.. وتقومي كده تدخليها التلاجة لحدي ما تجمد... بعداك طبعا الtopping زي ما عايزه.. لكن في الكتاب مقترحين انك ترصي من فوها حلقات من الأنانس.. وتستخدمي جلي اناناس تعمليه عادي.. وتكبيه فوق الcheesecake... وتدخليها التلاجة تاني

بالنسبة للفطائر.. انا بعمل بنفس عجينة البيتزا الكتبتها قبيل ديك... الوصفة 3 كبايات دقيق، بيضة، ثلث كباية زيت زيتون حبة ملح وسكر وملح ملعقة ونص خميرة وكوب حليب او موية دافية... تفكري الدقيق بالزيت .. وبعداك تكبي باقي الحاجات فيها وتعجني شوية لحدي ما العجينة تفك من يدك...

اها البرنامج الاساسي في الفطاير هي الحشوة.. وعند الشوام الشكل مهم برضه... انا حأقترح الحشوات... ولو لقيت صور لشرح طريقة عمل الاشكال بجيب.. انا عندي في الكتاب اشكال حلوه...

1- حشوة الجبنة... كباية جبنة سائلة + بيضة...
2- لبنة مع زعتر
3- ممكن hotdog
4-دجاج مسلوق مع مايونيز وخص
5- تونة مع مايونيز.. او تونة مع ليمون وطماطم وبصل مقطعين صغار
6-جبنة كيري
7- السبانخ (تجيبي سبانج مجمد وتسيّحيه وتكبي عليها حبة ملح وتممممممممممصريه من المويه... معاها ملح وليمون وحبة زيت زيتون وبصل اخضر وسمّاق)

تحشيها بالطريقة العايزاها وعلى الفرن... الفرن اهم شي يكون حار.. وتمحسي بي بيض مخفوق (او ممكن تذوبي حليب بدرة بي شوية موية وتمسحيها)... عشان يكون عندها وش حلو...


بجيكم بعدين عشان الاكلة الفلبينية.. احنا بنسميها الشومن.. وهي طريقة ممتازه عشان تأكلي الاطفال خضار

Quote: اسمارت المرة الفاتت سلمت عليك أول ما رجعتِ بعد غيبة فتحتِ لي , و اتعقدت.. أصلي ما بريد الاحراج,

عيب السواد و الرماد (على راى حبوبتى)...الساعة عندى هسى منتصف الليل....و قمت من النوم لان واحد من الاولاد عامل غلبه...قلت بالمره افتح اشوفكم عاملات شنو ...لقيت كلام سناء ده...قلت اصلى ما بخليه للصباح...لازم اعتذر بليلى ده...و الله يا سناء اكون ما لاحظت..اعفى لى عليك الله. انا لاقيك تسلمى على و تسالى فينى ..كمان ما ارد؟؟
___________________________________________________________
مريم ...انا شكرتك على البوست ده؟؟؟ البوست فعلا جميل.. ..تسلمى.خاصة و انا الموضوع ما وصفات بس ..كمان عن المعدات اللى بتستخدم فى المطبخ و ده موضوع ما حصل اتفتح هنا. و او نجوان ما قصرت و اتكلمت عن التقديم ....و فلسفتها فى العده...

سمارت -ون ازيك؟
احييييي من قصة العدة..عندي واحدة من اخواتي التقول ولدوها في سوق العدة امدرمان!!!
تشتري وتجدع ..وعلي قول نجوان العدة قاعدة منظر ساااااي..

طبعا السودانيات بيحبو يتبوبرو بالعدة..مرات بحس بيها اهم عندهم من الدهب

ازيك يا بت الحسين وصاحباتها...

أمس بالليل طبعت وصفة البيتزا وخاتيها قدامي...وعملتها كما قال الكتلوج...
الطعم ...طعم بيتزا...والريحة ريحة بيتزا...قبل ما اضوقها...
المشكلة الوحيدة القابلتني....نجضت من فوق بيتزا ومن تحت رغيف...
النوع ابو لب داك...وبقيت اشيل من الرغيف التحت وأملح في البيتزا
الفوق...وبعد لقمتين قلبتها فتة...

يكون دا من شنو؟؟؟

Quote: يكون دا من شنو؟؟؟

من العليك..


شكلك ختيت فيها خميرة ولا بيض كميات..

Quote: يكون دا من شنو؟؟؟

من العليك..


شكلك ختيت فيها خميرة ولا بيض كميات..

Quote: من العليك.. شكلك ختيت فيها خميرة ولا بيض كميات

الخميرة...ختيت ملعقة شاي كبيرة...والدقيق...اشيل واكب لما اتفكت العجينة من يدي
والبيضة...واحدة...


الا يكون من العلي...ههههههههههههههههههههههههههه

بالمناسبة يا نجوان... انا اصلا هدفي من البوست حاجات كتيره.. منها العدّة ومنها الادوات المهمة في المطبخ، بالاضافة إلى الوصفات السريعة... عشان كده انت ما فتلتي البوست ولا شي... فلسفتك لزيزه في موضوع العدّة.. انا ما بركّز كتير في موضوع العدّة بقدر ما بهتم بموضوع الادوات البتسخدمها في المطبخ.. والبتساعدني في تزيين الاكل... الاكل عندي اكل بالعين قبل ما يكون بالخشم.. ممكن العدّة تكون معقولة.. لكن الاكل شكله يشهّي... بحب الالوان في الاكل... من خلال الوصفة نفسها... او من خلال اضافات للطبق.. بحب العدّة اما تكون بيضاء او لونها فاقع.... تصوّري لترتيب الأطباق في السفرة صحن الاكل الرئيسي يكون لونه ابيض بي شكل هندسي... وصحن الشوربه يكون لونه فاقع (احمر قاني... اصفر .. اخضر)...

بالنسبة لكمية الاكل.. انا في الحته دي بختلف معاكم.. لكن بحكم العا

سارة علي... يختي مالها فضيحة.. تلاتين سنة، صغيرة وجاهله.. حلاااتي يا يمه ههههههه... انت بالمناسبة فعلا زي ما قلتي بتتغاتتي على المطبخ.. وصفك ده وصف زول بطبخ بمزاج... وبتفنن فيها كده، وبصبر على الدجاج للدرجة دي..معناها زول خطير في المطبخ...

سناء... ما تلبدي تاني... منتظرينك

سمارت نوم العوافي

نزار حسين .... هههههههههههههههههه الوصفة صاح مية المية، وانت ما غلطته في حاجه، ساره علي دي ما تعقّدك... لكن انت لو لاحظته للصينتين الختيت صورهم ديل... الاتنين كانوا بمقدار واحد.. يعني العجينة لو انت بتحب البيتزا رهيفة.. تاخد جزء من العجينة ما كلها... وتفرشها في الصينية... الباقي ممكن تخته في التلاجة.. او تعمل ليك بيتزا تانية.. او تعمل بيه فطاير... او ممكن تعمل نصف المقدار، يعني بدل تلاته كبابي دقيق، تعمل كباية ونص ... وهكذا....

جرّبتها تاني... بتظبط معاك

ده من البوستات الى بتدينى شعور انو كلامى كتير..لانى بكون بقرا و بكون عاوزه اقول مليون حاجه. استعدوي لدور برى اساسى..
ساره على

Quote: اول ما الشيك يدخل ..انا بدخل طوالي علي الــ Olive Garden ..بيبدعوا فيها..قررتا اعملا براي..مشيت جبتا الصلصةمن الجينت..

ازيك ? و ينك يا زوله?
لما تجيبى alfredo sauce انتبهي ان الصوص يكون فيه sun-dried tomatoes . ما تتخيلى بتعمل فرق قدر شنو فى الطعم. انا حقيقى علاقتى بالطمام معقده جدا. مرات بحبه جدا (لما يكون sun-dried او crushed ذى ما بتعملوا نجوان فى الـstuffed shells .) و مرات ما بطيق سيرة الطماطم.

Quote: ومبروك عليكم الخمسة باوندز :) :)

و عشان خمسة باوند ديل انا بطلت اكل pasta نهائى. و بطلت امشى Olive Garden نهائى. او اى مطعم عندو سلسة مطاعم.

نجوان احتمال المشكلة تكون فى انى بخت الصوص بتاع الطماطم قبل ما ادخلها الفرن.

سناء خالد

Quote: ما دام بتحبي الياباني ياخي زورينا ..ما حأطبخو ليك! و أنا عويرة أتشالق قدام الأساتذة؟!.. لأ بس حأوديك حتات حتعجبك جداً ..وعد!

يا جماعة و الله شكرا على الكلام الكبار كبار ده...لكن و الله انا ياداب بفك الخط فى مواضيع المطبخ دى.
وبالمناسبة ما تعزمينى عزومات ذى دى...احنا خفاف جدا (عند الفزع) و بكره بضرب ليك اقول ليك احنا جاييين اليابان عشان الاكل. اصلا كل سفرتنا بتكوت عشان الاكل و الفرجه.

رجاء...ترمسوا عديل كده ??
دى من الحجات اللى انا بقول عليها ( اذا سرقت فسرق جمل)...و لما اقرر اكل حجات ذى دى بمشى لاجعص محل فى البلد و اااخد راحتى. خاصة انى جهلولة فى اى حاجه بتحتاج خميرة او الحلويات
ذى ال Ice cream مستحيل اكل واحد من غير سكر او fat ...
Come one!
مريوم...بجيك راجعه بشوربات لذيذه..

الشومن...

المقادير
rice noodles (دي ما بعرفها اسمها بالعربي) لكن ده شكلها

بصل مقطع ناعم
فلفل اخضر
صدور دجاج
صويا صوص
زيت سمسم
هوت دوغ مقطع صغار
ملفوف cabage
ملح وفلفل

نكب زيت السمسم في النار.. ونضيف ليه صدور الدجاج المقطّعة... ونقلبها سوا شوية.. بعد تستوي نطلّعها عشان ما تبقى ناشفه.. ونكب شوية زيت تاني.. ونقلب فيه البصل شوية لحدي ما يبقى شفاف، نقطع الملفوف ونقلبه مع البصل.. ومعاه الhot dog...ز والفلف الاخضر اخر شي.. والملح والفلفل... بالنسبة للnoodles نكبها في صحن، وفوقها موية مغلية لمدة عشرة دقايق ولا محتاجه نار... ونصفيها من الموية ونكبها في الخلطة... واخر شي نكب الصويا صوص..

وبالهنا

بكره حأكتب وصفة mushroom creamy soup

يعني تبقى عيبه في حق الواحد يخم ويصر من غير ما يقول شكرا

شكراجزيلا يا مريوم وكل الزوار الاتحفونابأكلاتهم الشهية

وجن... عملتي ياتو وصفة؟ وورينا انتاجك...

مريوم ووووووو كل الناس الزينة الجابت أطباقها هنا.. صباحو أبيض

سرقت لي 5 دقايق وفتحت البوست. لقيت مريوم طالبة الشوربات.. الللللله.. حبي انا

قبل ما أجيب ليكم وصف شوربة لازم "نأكد" على شئ مهم للغاية. وهو لما تمشو للجزار او اللًحام أو الـ Butcher أطلبو منه يديكم العضام ديك الما بشتريها زول.
هو في الأول حيتخيل عندكم "كلب" هههههههه. المهم إسمها "المواسير" في مصر. ما عارفة عندياتكم بيكون إسمها شنو؟

تجيبو العضام ديك وتسلقوها أطول مدة ممكنة. وبعد كده تصفوها وتقسموها في كونتينات وتدخلوها التلاجة.
اي شوربة تعملوها بعد كده تضيفوا ليها حبة من الشوربة دي.. وتعالوا قولوا لي الحصل شنو.



* ما تنسوا بعد ما تصفوا العضام تدوها للكلب بتاعكم أو بتاع الجيران:))))) لووووووول

رجاء العباسي... انت زولة "معدّلة" زي ما بقولوا الاردنيين للمراة الknows her way around the kitchen... شغلك نضيف ... قاعدن تكيّفيني...
بالنسبة للشوربات... انا بحب جدا جدا شوربة الmushroom... عبيها انها بتكون دسمه.. لكن انا في حاجات قاعده اعملها بقلل بيها الدسم إلى حد كبير...

المقادير
ملعقتين دقيق
ملعقة مارجرين ومعاها ملعقة زيت زيتون
فطر مقطّع
بابريكا
قرفة مطحونة
حليب low fat
ملح وفلفل
بصل مقطع صغار
توم مهروس

الطريقة
نكب الزيت والمارجرين في الحلة، ونكب معاهم البصل والتوم، ونقلبهم سوا... لحدي ما ريحة التوم والبصل تطلع... بعداك نضيف الفطر (طريقة من مطبخ منال لتقطيع الفطر بسهولة وسرعة، باستخدام قطّاعة البيض المسلوق)


بعد الفطر يموت شوية كده، ولونه يبقى اغمق... نضيف الدقيق ونقلبه لحدي كما يذوب وينجض مع البقية.. وضرورية الخطوة دي عشان ما يعمل ليك كتل بعدين، وما يكون في طعم دقيق... نكب الحليب، ويا ريت يكون بارد... ونسوط بعيد من النار لحدي ما الدقيق يذوب في الحليب.. ونرجعها النار... نواصل تقليب لحدي ما تبقى الشوربة تقيلة، ونضيف ليها الملح والفلفل وحببببة قرفة... ونواصل التقليب.. كمية الحليب بتعتمد على مدى التقلة العايزنها للشوربة.. بتتقدم.. مع رشة بابريكا للتزيين...

وبالهنااااااااء

يااااااااااا سارة ..جداً..

ياخي و الله انت بتردي الروح مش بس بتفرحيها!

ما بيخلي الواحد يرجع إلا الناس الحلوة زيك.. جيت هربانة ليكم عدييييل.. و أظني جيعانة برضو عشان كدا حتلت في المطبخ الرائع دا!

كل يوم و كل لحظة و انت و أحبابك بألف خير.. و سنة سعيدة عليكم يا رب..
....
لكن يا سرو لو ما كنت لحقتينا بوصفة الألفريدو.. كان تكوني بالغت..بالذمة في واحدة تقول على روحها كدا و في منبر عام...!

أنا ما خايفة من العريس.. لأنو ممكن يكون زول متفتح و مستنير..لكن خايفة عليك من النسابة..
بركة الوضحت انها غتاتة مطبخية و انو الموهبة موجودة و الحمدلله..

بالمناسبة دي..عندي صاحبتي أنا عارفة انها كرهتها في الدنيا المطبخ لكن قبل ما تتزوج كانت كاتبة في البروفايل هوايتها الطبيخ

معليش يا جماعة لي عودة بإذن الله

يا جماعة البوست ده ملغم
المفروض تعملوا حسابكم ان في نساء
في البورد ده حوامل وبيتوحموا على اي حاجة
-حسه انا اعمل ايه ولا ايه؟- ههههه
مريومة، المفروض تجي تقعدي معاي الكم شهر الجاية
لحدي ما ربنا (يلتعني) بالسلامة....0)
سناء خالد، مشتاقين وبركة بوست مريم الجابك
كويس الليتي الأولاد من بكرات الرز الأبيض
نجوان، لقيتك خطيرة.. بتاعة أغاني ومطبخ كمان...
رجوية مشتاقين والله..

وعلشان ما أكون جيت ويدي فاضية
عندي وصفة قريبة ليك يا سنوية..
انا بجيب الباذنجان الصغير..


وأقطعه قطع صغيرة
ثم أحمره بقليل من الزيت..
التتبيلة بتكون ملح، ليمون، فلفل، ثوم
وبيكون طبق صغير وحاذق كأنه مخلل باذنجان

لكن كثير من شوق ومحبة
غادة

بوست لذيذ ..

العزيزات مريم, ماما دوما, اسمارت, نجوان, ساره, رجاء, راويه, وحبيبتي سناء خالد (حمد الله علي السلامه)

مبسوطه منكم, أيوه كده أدونا كورسات سريعه, عشان لو الواحده فكّرت تكوّن نفسها فجأه وتعمل ليها مطبخ مستقل ;) ما تحتاس ههههه

فكرتي عن الطبيخ كويسه جدا وبجيد الأكلات السودانيه أغلبها,
في بكين طبخت لصحباتي الصينيات أكل سوداني عجبهم جدا ..
أما صحباتي الطالبات السودانيات فدايما كنت بطبخ ليهم أكل سوداني لذيذ, حتي في رمضان كنت بعمل ليهم التقليه والعصيده,
وكل أصناف المائده, ودايما بحبوا يجوني عشان أعمل ليهم حاجات حلوه,
المشكله الوحيده هي الوقت, يعني لنفسي ما كنت بلقي وقت أطبخ أو أتعلم الأشياء الجديده,
والجميله زي الأفكار اللذيذه المتاحه هنا .. وكنت معدياها في الأيام العاديه أكل صيني جاهز ومعلبات هههههه

في السودان ما بلقي وقت أدخل المطبخ الا في رمضان أو لما يكون عندنا عزومه أو ضبيحه أو في حالات الضروره,
السبب أنه الشغل والقرايه ماخدين اليوم كله :(

بس حأقول ليكم سر صغير,
اني استمتعت بحديث سناء ونجوان عن العده جدا,
لأني بحب العده موت, وزي نجوان لما بشتري عده لازم تكون عده حلوه وغاليه وشيك ..
شراء العده بالنسبه لي هوايه لاتضاهيها متعه :)
وبحب أدوات المطبخ جدا :)
ياريت يا مريم لو عملتوا لينا ركن عن أحدث أشكال العده وأجملها في رايكم حاليا ..


مبسوطه بيكم شديد وبحبكم كلكم, حاسه البوست ده لما لي كل الناس البحبهم,

ومطبخ يعني صناعة حب وحنان بكل طولة البال الممكنه ..

واصلوا ومتابعاكم بشغف :)

أماني الامين.. والله كلامك حاساه طالع من جووووه... وبي احساس عالي... دايما الستات المشغولات بكون عنده إمكانية انهم يبدعوا في المطبخ، لانه الضغط بخلي الواحدة عملية في شغلها... ومبتكره بحيث تعوّض انشغالها ده.. ده غير طبعا زي ما قالت نجوان، التأثير المريح للطبيخ... انا بحب من غير ما اجوط، يعني اطلع من المطبخ، يكون زي ما دخلته.. مرات نادر كان يجي يدخل المطبخ.. يقول لي، شنو الليلة مافي غداء؟! ولأني لو طلعته وهو جايط... ببقى صعب علي جداً نظافته.. زمان قبل ما يجي محمود، كنت الملعقة البستخدمها بغسلها فوراً.. جنّي وجن تراكم العدّة في الحوض..

بالنسبة للعدّة... ده اقتراح ظريف جداً.. وبيصب في مصلحة البوست.. منتظرين نجوان وسناء.. وانت زاتك، منتظرينك...

التحية للعزيزة لنا جعفر... قالت إنها طبّقت من الوصفات بتاعت البوست..

وزي ما قلت يا اماني.. البوست جمّع الاحبة كلهم

غادة عبدالعزيز خالد شخصيا!!

والله بارك الله في البوست... ويختي وحم شنو اللحدي حسي ده.. بالله حتى وصفتك الجبتيها وصفة زولة غرقااااااانه في الوحم.. لو علي.. اجي اسوي ليك الاكلات دي كلللللها، انا لاقية... مشتاقين وكده...


مسعولة من الخير، انت ليه ما عندي في الفيسبوك؟

Quote: بالمناسبة دي..عندي صاحبتي أنا عارفة انها كرهتها في الدنيا المطبخ لكن قبل ما تتزوج كانت كاتبة في البروفايل هوايتها الطبيخ

والله صاحبتك دي ألذ زول..

طبعا الراجل ممكن يحبك.. يقوم يتجاوز عن قصة المطبخ دي يا سرو... لكن النسابة لازم تطبخي ليهم.. وتوريهم انه ولدهم في أمان.. حتى لو مافي امان loool...

غايته انا لما يوم عملته بيض اومليت.. وقلبته بي خضاره وجبنته.. وطلع مدوووور ... وحماتي قالت لي "اللللللللللله"... قلت خلاص، باسيت الامتحان ;)....

Quote: لكن النسابة لازم تطبخي ليهم.. وتوريهم انه ولدهم في أمان.. حتى لو مافي امان loool...

soooooooooooooooooo funny

سلام راوية و كل سنة و انت طيبة..
أنا فعلاً بأحس انو لما يكون الصنف الرئيسي واحد بيدي فرصة أكبر للناس انها تستمتع بالأكل كلو ..كمان بأحاول انو الأطباق الجانبية بقدر الامكان ما تتضارب مع الرئيسي..يعني لو عاملة بشاميل يبقى الشوربة ما تكون كريم Cream بأي من أنواعه..و العكس ..لو الرئيسي الأساس بتاعو طماطم يبقى الشوربة أساسها لازم يختلف
و برضو نوع اللحوم الفي الرئيسي يكون مختلف عن المستخدم في الأطباق الجانبية و كدا..

___________________________________________

نجوان ..
تسلمي ياخي.. لكن هي فعلاً مكرونة بالجبنة بس في نقطتين بيخلوها تفرق بالنسبة لي..
انه الأصداف حجمها مناسب كفينقر فوود و بالتالي في البوفيهات عملية أكتر من المكرونة العادية
الحاجة التانية انو ال herb المستعملة معاها سواء كانت نعناع أو ريحان basil بيديها نكهة جميلة..بأخلط معاها الcottage cheese عشان تخفف من الحداقة بتاعة الجبنة البيضاء..و بتكون متماسكة ما محتاجة بيض..بس أحيانا لما أحس انها ناشفة شوية بأضيف ليها شوية زيت زيتون..

أما العدة دي فأنا وسط..بس ما بأشتري إلا حاجة أحس انها بتخدم لي غرض حقيقي.. و صحون الضيوف بلمّها أحيانا لأنو حجمها بيكون كبير و ما في داعي أهلك روحي بغسيل صحون كبيرة و نحن برانا.. أو ممكن يكون فيها زيك دهبي أخاف عليها من استعمال المايكرويف (لأني أحيانا بأضطر أسخن بعد ما أخت في الصحن) أو من الخربشة بالشوك..

و عليك الله انداحي لينا في العدة دي قدر ما تقدري لأنو المتعة البلاقيها في محلات العدة حتى لو فرجة بس بتفوت متعة محلات العطور و الميك أب!

___________________________________________

سمارتي ياخي أعفي لي من تأخيرك في الرجوع للنوم... بيعملوها كيف الحركة دي؟ أنا كان صحيت قدر دا تاني ما بنوم بسهولة..!
و لا يهمك يا حبيبة..عداك العيب و حاشاك اللوم ( اللوم بيجي بالغفلات على رأي حبوبتي أنا )
لكن عزومتي دي جادة جداً ..و ما حتندمي إن شاء الله
____________________________________________

غدوية ازيك..

و الله مشتاقين..ألف مبروك و ربنا يحلك بالسلامة يا رب..
تعرفي يا غادتنا .. أنا قلت ربنا ريحني من الكروريات دي على رأي عماد عبدالله لروحي, خليهم الأولاد..لأنو لما رحلنا غيرنا الروضة و في الروضة الجديدة ما بأحتاج أعمل بنتو لأنهم بيوفروا لهديل وجبة خالي خنزير..مع زملاءها ..لكن وحياتك كان أرحم عمل البنتو!!..لأنو كنت مرتاحة من قصة التوصيل للمدارس.. هسة بيضيعوا من يومي بين تلاتة لأربعة ساعات في العربية بين المدرسة و الروضة!!
الأسود بالخل و التوم بالجد روعة ..أمي كانت بتقطع الفلفلية أربعة شرائح طولية كبيرة أو نص لو كانت صغيرة و تحمرها على خفيف و تتبلها زي تتبيلتك دي و تغمرها في زيت زيتون و تختها في التلاجة..لما تكون مستعجلة و عايزة تشيل معاها للمدرسة حاجة سريعة بتفتح الخبزة و تحشيهم و تشيلهم معاها..على رأي مريم النساء العاملات بيبتكروا و بيكونوا عمليات..
و برضو على رأي انتصار محمد صالح..أي واحدة بتحب المطبخ بتكون أمها فنانة فيهو..ماما لما كانت بصحتها ما كان بيعجبني أكل زي أكلها!
____________________________________________

رجوية ..
فكرة الشوربة دي رائعة ..مع انو ما شكلي حأقدر أطبقها هنا ..لكن هي خبرة ممكن الواحد يخزنها لما يرجع السودان أو بلد إسلامي..لأننا هنا يا إما بنشتري لحمة حلال أو أمريكية أو أسترالية يعني مستوردة من بلد أهل كتاب..و بتجي مقطعة و جاهزة
يا خسارة بالجد


____________________________________________

أموني..
شفت صورك و انت بتشوي كباب السيخ.. ياخي أنا الكباب دا علاّني علة على بال ما ظبط معاي و بقى ما بيقع من السيخة.. لكن بيستاهل التعب!
أكلنا السوداني لذيذ جداُ و سهل الأكل للشعوب الأخرى..(سهل الأكل دي تعبير ياباني عن تقبل الفم للطعم)
الناس دايما بتتعقد من طريقة الأكل سواء للكسرة أو العصيدة..لكن طريقة التقديم على رأي هواري و نجوان بتخلي طريقة الأكل سهلة..دا غير انو أكلنا السوداني متنوع و ما بس كسرة و عصيدة و قراصة!
عفيت منك ما غلطت غلطة سرورة في الغتاتة .. لكن لازمك استدراك سريع( زي استدراك سارة) للكلام بتاع ما لاقية زمن من القراية و الشغل
___________________________________________

مريوم..
أنا قضيت في الحلة سنين حياتي الأولى قبل المدرسة و رجعت ليها في تانية و تالتة عام..(أولى ثانوي بس كانت داخلي في رفاعة الأميرية..و دي ذكريات سردها يطول و رفاعة من أجمل المحطات في حياتي رغم معاناة الداخلية) ..
برضو للأسف الشديد ما بأعرف الناس في حلتنا كويس بسبب الغربة ... لكن بأحتفظ في ذاكرتي بانطباعات و ذكريات حلوة خالص عن عاداتنا ..و بحب أتعلمها لما ألقى فرصة ..المرة الوحيدة السمحوا لي فيها أدخل التكل و أنا في المتوسط..ما فضل لي إلا أبكي لحبوبتي عشان تخلي لي جردل (ربعي.. صغييييير) بتاع مديدة حلومر عشان أعوسو..و كنت متأكدة اني بأعرف من كترة ما بأقعد أتونس مع أي زول بيدخل يعوس و أراقب الطريقة..
أها قمت دخلت و و الله عستو و طبقتو سمممممح (حسب رأيي) و كمان كتلت الفقاعات الطلعت كلها عشان ما يبوظ..لكن بعد دا كلو حبوبتي الله يرحمها كانت ما رضيانة و قالت بشتنت ليها العجين..غايتو كان أول و آخر يوم أنا و هي نتشاكل..و أول و آخر يوم يخلوني أدخل التكل أعوس.. ما أتونس!!

عملت صينية السمك بتاعتك و حأجيك بالصورة عشان تصححي لي :))

____________________________________________

أحلى ماما دومة

أنا متأكدة انك أجدع زولة في المطبخ.. و خبرتك فيهو بتلزمنا شدييييييد و الله
مش أنا قلت ليك بأحب التاي شديد لكن بعد تجربتي الما ناجحة مع التوم يام كن .. بقيت ما بأحاول خصوصا و انو مافي زول بياكل سبايسي غيري في البيت ..و مع اني زبونة دايمة في مطعم التايلندية صحبتي.. لكن دايما للغداء مع صاحباتي..مع ناس البيت بنمشي غالبا ايطالي أو ياباني الاتنين رفيقين بمعدة خالد و أفواه الأولاد!
وصفتك للفسيخ بقت صنف دائم في حفلاتنا .. as a Sudanese Spread حأجيب ليك الصورة برضو من عيد ميلاد هبة بس يا ريت انت تنزلي لينا الوصفة لأنو قالوا سمح الغنا في خشم سيدو..و على فكرة مرة عملتو و ديتو لجيراننا الجديدين عشان أتعرف عليهم و أعرفهم شوية عننا و عن بلدنا... كان معاهم خالتهم متزوجة أمريكي و عايشة كل عمرها هناك..فسألوها بتعرفي حاجة عن السودان عن الأكل السوداني ..هزت أكتافها بنوع من الصلف..أو اللامبالاة..! و الله يا ماما بعد يومين جاتني بت أختها الشابة قالت لي ممكن تدينا الريسيبي..قلت ليها ممكن..و ممكن تجي يوم و أوريك تعمليها كيف.. قالت لي أنا عايزاها بسرعة لأنو خالتي راجعة أمريكا بكرة و عايزة تأكلها تاني بس ما بتعرف مطاعم سودانية هناك!

طبعاً أصعب سؤال واجهني: اسم السمك بتاعو شنو؟
بأقول ليهم أنا بأعرف اسمو بالعربي (دحين يا بنات أمي هي السمكة بتاعتو مش اسمها فسيخ؟ طيب اسمها شنو بالانجليزي؟) المهم انو ما في هنا و بأستبدلها بالتونة و ال Shrimp Paste
طبعاً لما تزورينا انت بالذات أنا حأطبخ ليك و أطبخ معاك كل يوم..عشان ما حأفوت فرصة انك توريني و تصححي لي لو في طريقة أحسن.. و أتعلم و أستفيد من الخبرة..بس برضو حنفسحكم كويس:))
_________________________________________


راجعة بشوية صور و وصفات إن شاء الله

عيني بارده يا بناتي
كله تمام اكل وتقديم وعده
وكمان سناء خالد الجميله معنا باطباقها الحلوه
وكلامها الاحلي من العسل
بت الحسين تتباركي
لميتي الحلوين كلهم هنا

ماما دومه... تحلي ليك الحياة كلها ان شاء الله ...

سناء خالد... انا مسافره بعد ساعتين، كلامك الطاعم ده مسكني من التجهيزات! اتخيلي بس! انا حأنتظر الصورة.. انا طبعا عامله الليلة السمك بتاعي كغداء اخير قبل ما نسافر انا وحمودي... بحاول اصّور برضه وارسلها ليهم.. لكن مافي طريقة حسي انزّل الصورة عشان الوقت...

بالله ابقن عشرة على البوست ده... لحدي ما اصل بيت اهلي

Quote: طبعاً أصعب سؤال واجهني: اسم السمك بتاعو شنو؟ بأقول ليهم أنا بأعرف اسمو بالعربي (دحين يا بنات أمي هي السمكة بتاعتو مش اسمها فسيخ؟ طيب اسمها شنو

لوووووووول يا سناء فسيخ لا يعني اسم السمك بل هو اي سمك يتم تمليحه وضعه في وعاء محكم ويتم دفنه في الارض او في مكان دافئ الي ان تكتمل عمليه التفسخ لوووووووول حيث يهترئ اللحم ويكتسب الرائحه المميزه للفسيخ
وممكن يتعمل بانواع كثيره من السمك .
في ناس بيعملوا البلطي فسيخ وفي ناس بعملوا سمك تاني حجمه صغير شوكه كثير شكلا بشبه الهيرنقHerring though I think Herring is a saltwater fish
. غالبا تستعمل انواع من السمك التي تكون غير مفضله للتحمير او الطبخ لكثره شوكها ودقته .

Quote: تجيبو العضام ديك وتسلقوها أطول مدة ممكنة. وبعد كده تصفوها وتقسموها في كونتينات وتدخلوها التلاجة. اي شوربة تعملوها بعد كده تضيفوا ليها حبة من الشوربة دي.. وتعالوا قولوا لي الحصل شنو.

سلام لي كل الاخوات الكريمات و الاخوة الكرام
و في مقدمتهم ماما دوما...

اها..كلام رجاء العباسي ده...كلام تمام و مية المية..
ونديكم شوية من طبيخ العزابة...

الشورباات عموما..من الحاجات المفضلة عندي..وعموما ممكن تعملو شوربة سريعة جدا يعني (قطر قام)
اسلقو اللحم او العظام و اسلقوها في موية سخنة يعني ما ترمو اللحمة في موية باردة
ارمو معاها قطعة بطاطس...قطعة جزر...قطعة فلفية..او تلاتة قرون شطة خضراء...و طبعا التوم و البهارات.. والملح..حسب المذاق
بعد تتاكدو من الاستواء تماما...انشلو العظام منها ...و اخلطو الشوربة في الخلاط..
وممكن تصفوها بعد الخلط.. لو حبيتو..
رجعوها علي النار شوية...و اضيفو ليها شوية سمن بلدي..او زبدة ..علي الوش من فوق
وشوية بقدونس مقطع ناعم... عند التقديم
بالنسبة لشوربة الدجاج نفس الطريقة...لكن في اختلاف بسيط..
بعد الدجاج يستوي..انشلوه و اخلطو باقي الشوربة..
وبالشوكة,,, او باليد (انكشو او فتتو ناعم جدا ) لحم الدجاج و ارجعوه لي الشوربة..
مع اضافة الزبدة اوالسمن او البقدونس... عند التقديم
لي شوربة الدجاج انا بفضل (صدور) الدجاج...سهلة السلق و التفتيت

____
في بعض الناس بيضيفو شوية ارز او شعيرية او شوية دكوة,عشان الشوربة تبقي سميكة....وكلو حسب المذاق
لكن ما بتحتاج و خاصة بعد خلط الخليط كلو مع بعض(البطاطس و الفلفلية و الجذر و الشطة الخضراء
______
اكلنا السوداني طاعم جدا جدا جدا...
ولكن مرات شكل التقديم ليه دور.....و يا مريم...لما كنا في الجامعة..كنا بنقول(الماعون اللين غسلو هين)
يعني مفروض بعض الطبيخ المطبخ يكون انظف من اول...كلامك صاح مية المية
وقاعد اقول لشلتنا هنا..(اسلمك نظيف سلمني نظيف)...يعني انا علي اطبخ و انظف مكان الطبيخ و اقدم ليهم الاكل في الصفرة..
وطبعا اهم شي عندي تقديم الاكل.
بس هم عليهم لم الصفرة و غسيل العدة..هههههه
تسلمو و انشاء الله نلاقي وقت عشان نجرب وصففاتكم الشهية..
ربنا يديكم العافية..
وتتهنو اكلاتكم...

معليش...
نسيت انبهكن\م...
مقاس الموية مهم جدا مع كمية الدجاج و اللحم و الخضروات..
وخاصة بعد السلق والخلط..
يعني التحكم في (كثافة) الشوربة...
سميكة و لا رقيقة....
من اهم نجاح عمل الشوربة




______
ما تنسو الليمون بعدين..

انا معجبه بيك شديد يا هواري ولدي ما شاء الله عليك
كله تمام كلامك ووصفك رائع وما بحتاج اي زياده
عجبني بالذات انه المطبخ لازم يكون بعد الطبيخ نظيف متل اول واكثر .
لو ما متزوج اريتك عريس البنيات

Quote: انا معجبه بيك شديد يا هواري ولدي ما شاء الله عليك كله تمام كلامك ووصفك رائع وما بحتاج اي زياده عجبني بالذات انه المطبخ لازم يكون بعد الطبيخ نظيف متل اول واكثر . لو ما متزوج اريتك عريس البنيات

ماما دومة
تحياتي و احترامي...
طلعنا من السودان ما بنعرف حاجات كتيرة عن المطبخ
و لقينا نفسنا لازم نتعلم...
الغربة و السفر و الاختلاط بالاخر
ومعرفة ثقافة الاخر
وتقديمنا لثقافتنا من خلال الطعــام و اللبس و الموسيقي
والحمد لله...
الواحد بقي كويس جدا و بقينا (اسياد بيوت )ي مزااااااااااج
ووبعدين...الغربة و الشغل هنا بكون ضاغط شديد..
يعني مافي اي زمن ..
اها بقينا ننظم حياتنا و زمننا بالساعة و الدقيقة
يعني ..طبيخ وغسيل و نظافة و شوبنق في اخر الاسبوع
وبالذات الطبيخ و نملا التلاجة و نجي نسخن ..
وطبعا لمة الاصحاب و (حلة العزابة) مشهورة جدا...


____
شكرا للدعوات و الامنيات
لكن لسه بكتب (سنقل) في فورمات التقديم..هههههههههههه

عاطر تقديري و احترامي

معقوله انا ما شفت البوست الدسم ده؟؟؟


جاياكم بمهله هسه لازم امشي الشغل

والله يا هواي لقيتك خطير ما شاء الله... انا حأجرب وصفة الشوربة دي.. وبجي اديك النتيجة... عجبتني النقطة بتاعت انه اللحمة تتخت في الموية وهي بتغلي.. لكن نسيت نقطة البهار.. البهار ده سيد الحلّة.. مرات وجود بهار او عدمه بخلي الاكله تكون مختلفة تماماً .. البهارات القاعد تختها شنو...؟

دانية المكي.. عاد ما بسألك؟ انا اشيل واعاين ليك... معقول ما شفتو البوست حقنا ده.... يلا انا في انتظار وصفاتك...

عايزين بعد الشوربات نبدا في الحاجات الlow calories و low fat.... والخبيييييييز (ده انا ما مجالي نوهائي)...



مريم الحسين-العين

بوست جميل سأقوم بلفت انتباه من يهمهم الأمر إليه.

شوربة العدس
نسلق العدس، ومعاه جزر وبصلة مقشرة ومقطع مكعبات كبيرة وبطاطسايه... ونخليهم يغلوا سوا... ممكن لو عندكم مرقة دجاج، تضيفوها عشان تبقى اطعم... البهارات، حبة قرفة.. وفلفل اسود وملح طبعا... بعد يستوي العدس، في الخلاطة(انا بستخدم الخلاطة اليدوية)... نخلطهم كلهم مع بعض.. انا بحبها ناعمة، ناس بتحبها فيها texture كده...

تتقدّم مع شريحة ليمون... ومعاها كراكرز ... ممكن تجيبوا الجاهزه.. او تعملوها في البيت.. تدهن بي زبدة أو زيت زيتون وتتقطع مكبعات وتتحمّص في الفرن.

وصحتين وهنا..

منتظرين شوربات يا شباب وشابات

..
متابعين يا بت الحسين .. والعزابة اليومين ديل صحتهم اتصلحت
العزابة المعاي ديل و الله مبسوطين منكـ شديد وقالو ليكي ركزي في الحاجات البلدية, لانو الوصفات الغربية دي ما عرفناها, ذي ال مسطرده ولا الشنو ما عارف ديك, واللي موجودة في الصفحة الاولي في البوست في الطبخة حقة السمكــ بالفرن ديك ... ما عرفنا ليها نهائي.

زبطنا العدس بالطرقة بتاعتكـ الفوق ديكــ وطلع شي عجيب.

سلامات يا مريم و حمد لله على السلامة...
اه...شوربة العدس دى بالنسبة لى ..عبارده عن واحده من متع الدنيا...
انا بعملها ذيك بالضبط الفرق انى كمان برمى مع البصلة و الجزر كوسه مقشرة... من غير بهار او ملح.
بخليه ينجض و اضربه بالخلاط . لانى من (الموظفات فى الارض ) فبعمل كمية كبيرة و برضوا بقسمها فى مواعين صغيرة و اختها فى الفريز.
لما احتاجها بطلعها من الفريزر ..اسيحها بعدين اكب ليها البهارات و الملح و اخليها تغلى فى النار.
و الفكره ان الملح بخليها (تسود) لو ختيته من بدرى. و لانها مطعمة جديد بتكون كانها طازجة.
جربى كمات تختى شمار اخضر (بتاع الفول) و ح تلقى ان طعمها برضو مختلف.

Quote: نا بعملها ذيك بالضبط الفرق انى كمان برمى مع البصلة و الجزر كوسه مقشرة

...
الاستاذ/ة smart_ana2001
سلامات ..
طريقتك دي أكيد كويسة مع العدس, بس الكوسة دي جديدة علينا وما جربناها, بس الكوسة دي بالصراحة من الصعب انو نتحصل عليها, بس طريقة الاخت مريم دي كويسة وكل مره بسويها, مع الجزر, والغريبة الليلة كنا ساوين العدس ومعاهو الجزر, وطبعاً دائما مع العدس لحمة ولا دجاج ومية المية ومجرب, انت جرب الخطوات بتاعت بت الحسين دي وحترف الطعم الرائع .. والمره الجاية حنجرب حكاية الخلاطة المذكوره دي.


انت يا smart_ana2001
سيد ولا سيده, لانو طراحة لسع ما خشيت بروفايلك.

سلامات احمد محمد بشير ...مريم دى اى حاجه بتعملها ح يكون طعمها خرافى...
انت بس خلى بالك معاها...


ملاسى ..منو ديل اللى ح توريهم البوست؟؟؟
وصلت السلام لصحبتى؟؟
_____________________________________________________
و عشان اوفر عليك المشوار لحدى البروفايل..انا سيدة.

الله يسامحكن يا نسوان..
قامت علي الهاشمية بي بوستيكم دة وجريت اكابس في المطبخ..
اتخيلوا؟؟وشي يشحشح ساااااااي..
في سري سبيت ليكم (عدد من المرات)..
المهم سويت قيمة البطاطس ..
وعملتا اكلة علمتني ليها امي في لحظة تجلي اسمها( كبيبة)..
بعد وشي يروق بجيكم راجعة بالصور والوصفة..

Quote: لوووووووول يا سناء فسيخ لا يعني اسم السمك بل هو اي سمك يتم تمليحه وضعه في وعاء محكم ويتم دفنه في الارض او في مكان دافئ الي ان تكتمل عمليه التفسخ لوووووووول حيث يهترئ اللحم ويكتسب الرائحه المميزه للفسيخ وممكن يتعمل بانواع كثيره من السمك .

لوووووووول يا ماما دومة..أنا و الله (كان ألبي حاسس) انو القصة دي ما ظابطة.. و الله انت كنز..تسلمي!

_______________________________________________

مريوم حمد لله على سلامتكم..

يوم رجعت متأخرة و ما طابخة.. و مفروض في ظرف ساعة أكون خاتة العشاء في السفرة.. و أنا في الطريق كنت بأراجع في ذاكرتي الحاجات الفي البيت عشان مافي وقت لشوبينق..

خطرت لي طوالي وصفة السمك بتاعتك..و جيت مباشرة على الفريزر..طلعت السمك الكان عندي..و لأني كنت مجمداه زي ما جبتو من المحل..with the tray عملت ليهو ديفروستينق سريع في المايكرويف و تميت الباقي تحت ماسورة المطبخ..ما أخد خمسة دقايق..خلطت باقي المكونات و كنت محظوظة انها كلها موجودة فما احتجت أتلفت..أكتر حاجة كنت محظوظة بأنها موجودة كانت الشمار الأخضر..لأنو من الأصناف النادرة الوجود هنا و (أغلى من ال Blue cheese !!) عشان كدا كل ما (أصادفه) في محل بأشتري كل الكمية الموجودة و أجمدها..و الله يا مريم بأشتري الموجود كلو و اللي ما بيعمل (ربع ربطة) من الحجم بتاع السودان..بيتباع عندنا زي العينات..بالشكل دا




و دا كل الموجود في الصندوق..





سعره بيتراوح بين دولار و نصف لدولارين و نصف حسب الموسم!! طعمو أقل قوة من بتاع السودان..و و الله أنا ما عندي مانع أعمل بيزنس مع زول يصدر لينا خضار و مواد غذائية من السودان.. دا طرح يمكن يعجب الرجال و يدخلهم المطبخ دا يتعلمو ليهم طبخة طبختين للطواريء : )!

المهم بدون الشمار ما كان الطعم حيظبط..

اتخليت عن الليمون..و اكتفيت بالحموضة من الزبادي و الماسترد و البلو تشيز..خصوصا و انو ناسي ما بيحبو الحموضة الشديدة..
طلع الطعم ممتاز..أنا و خالد عجبنا جداً.. و بالنسبة للأولاد.. عشان يحبوه أكتر المرة الجاية حأنقص الطحينة لملعقة واحدة..مع اني أصلاً نقصتها لملعقة و نصف (بناء على تجربة سابقة لوصفة كفتة بالكريم تشيز و الطحينة أخدتها من صديقة)

حاولت أخلي الوش يحمر أو يأخذ لون أكتر لكن كان صعب خصوصا و انو كنت مستعجلة و في نفس الوقت خايفة السمك ينشف..أو يبقى قوي شوية...
قدمتو مع رز أبيض (ياخي حلة الرز اليابانية دي اختراع عظيم..حأحكي ليكم عنها إن شاء الله) و سلطة خضراء..و صورتو صور سريعة لأنو الشباب كانوا جيعانين..و هديل ما قادرة تصبر!
طبعاً لأني ما جربت الأصل فما متأكدة إلى أي حد نجحت في تطبيق الوصفة..بس شوفي لي الشكل هو و لا لأ..و وريني لو في حاجة عايزة تحسين..

ساره علي.. بالله جيبي صورك وتعالي النصحح ليك... عايزين نشوف شغل اليد بالله

سناء .. والله مداخلاتك متعة عديل كده.. اول حاجه السمك طلع شكله روعه، اتمنى انه طعمه كمان يكون طلع رهيب.. الطحينة انا بعملها ملعقتين بس.. الكمية قليلة مقارنة بي الزبادي.. واعتقد الليمون كان حيخفف ليك من طعمها على الاولاد.. لكن الشكل عظمة على عظمة (صح كبيييييييييير، ومعاه ممتازه أحسنت).. بالنسبة للشبت/الشمار الاخضر، حقو الواحد يشتغل معاك بزنس بتاع تصدير.. اصله شنو حبّة كده التقول شحده وبعد ده سعره غالي..

شكرا يا سناء على مشاركاتك ف البوست ده.. وبالمناسبة، اداني فكرة جميلة عنّك.. ونديك جائزة المفراكة الذهبية في المطبخ.. حركة التلج في العدس دي روعه.. عشان الخلاط ما كويس نخلط فيه والاكل حار... رغم اني بستخدم خلاط اليد، وده بوفر عليك اللفة دي.. لكن اهم شي انك بتتصرفي، ودي هي طريقة الزولة الحريفة

سلامات مريم و كل ستات البيوت (و اسياد البيوت) و سلامم كبير لهوارى...


دى وصفه بتاعة شوربه مفروض انو فيها Carb كربوهيادراتات قليله..و فعلا بتملا البطن و طعمها جميل و عملها ساهل..بتختى الحجات كلها فى الحلة و تمشى تخليها:

فى حلة كبيرة ختى:

3 صدور جداد متو سطة الحجم مقطعة مكعبات (مقاس حوالى نصف بوصة )
broccoli ... قرنبيط ..ممكن تستعملى مجمد
كباية جزر ..برضو مقطع مكعبات.
كباية مشروم ..مقطع شرائح
نصف كبايى بصل مقطع
نصف كبايه كورن
2 قطعة ثوم ...مهروس
نصف معلقة صغيرة زعتر ناشف
1 بطاطسة متوسطة الحجم..مقطعة مكعبات.
2 كباية شوربة جداد..او ممكن ترمى مكعب بتاع مرقة فى موية.


ختى الحجات دى فى حلة و بعد ما تغلى وطئ النار لهادية...
بعد ما تحسى ان الجداد و الخطار كلو استوى ...
اضيفى كبايه كريم و ارفعى النار لحدى ما تغلى ...و طى النار تانى و اضيفى نصف كباية جبنه شدر.
_______________________________________________

ايوه الوصفه ما فيها ملح...الملح اللى فى مرقه الجداد كفاية..لو المرقه ما فيها ملح ختى شويه ملح

Quote: ختى الحجات دى فى حلة و بعد ما تغلى وطئ النار لهادية... بعد ما تحسى ان الجداد و الخطار كلو استوى ... اضيفى كبايه كريم و ارفعى النار لحدى ما تغلى ...و طى النار تانى و اضيفى نصف كباية جبنه شدر.

الاخت الكريمة...smart_ana2001
تحياتي و احترامي... ياخي لكن ما جهجتيني ...بي حكاية علي النار...ووطيها و علينا تاني..
زمن معين و لا كيف؟؟


اها عليكن الله كترن من الوصفات السريعة السريعة....احنا العزابة ديل و الله ما عندنا وقت وبال للحاجات البتاخد وقت طويل..




الكريمة مريم..
شكرا لشوربة العدس, و هي نفس الطريقة البنعملها بيها.. بس احنا بنحب الاكل شوية فيه شطة,يعني بنديها قرن و لا اتنين بتاعة شطة
خضراء عشان النكهة و الطعم...

سلام لي كل الاخوات و الاخوان
ووبالهناء و الشفاء
معاي شباب كتار فاعدين يطبعو وصفاتكن دي

سلامات يا ناس الدار
وحمد لله علي السلامة يا مريوم..
وسلام يا الهواري..
عملت لينا بمداخلاتك تشكيلة حلوة انت ونزار..

نبهتني يا الهواري لي حتة شكل التقديم..
انا غايتو منظر الاكل عندي اهممممم من طعمو..بالغتا مش؟؟
في العزومات في بيتنا لمن يبدو يرصو الاكل تلقوني شايلة لي صحن كبيرررر بتاع خضار مشكل شئ احمر وشئ اصفر وشئ اخضر والف علي الصحانة وابدا اشكل فيها واتفنن لمن اتكيف واقبل ليك علي الصفرة شئ مناديل ملفلفة وشئ كبابي قاعدة كيف وشئ ختة الصحانة مع المعالق والشوك(الشوك منظر ساااي حركات مني العضة غالبا بتكون باليد) يعني الصفرة في النهاية بتكون مهرجان الوان حرم كان طبخت ليهم اي شئ ما جايب حقو مع المنظرة دي بياكلوا بتشهي كمان..غايتو المفروض اطلع وويتر(نادلة)..


ـــــــــــــــــــــــــــ
سؤال..اصح اقول (ملعقة) ولا (معلقة)؟؟؟

Quote: سؤال..اصح اقول (ملعقة) ولا (معلقة)؟؟؟

سارة..
تحياتي احترامي..

غايتو حسب قاموس نافوخي الخاص:

ملعقة: من لعق يلعق فهو لاعقا
معلقة: من علق يعلق..فهو معلقلا
والله اعلم...
؛؛ اها الله يسترنا من ناس اللغة العربية...

_____
لكن لقيتك بتاعة ديكور مبالغة يا سارة...
انت قايلة اللبنانين و السورين ديل ,مطاعمهم ناجحة ليه؟؟؟
من شكل الديكور وتقديم الاكل....
لكن اكلهم و مشاويهم اكتر من عادية..واصلا ما بتلحق شية الجمر و السلات بتاعننا
(هو عليك الله لبنان دي فيها خرفان و لا بقر كمـــــــــــان) غير الدجاج عندهم شنو كمان..
لكن ناجحين في الدعاية و التقديم و الديكور و نظافة المكان...ودي اهم شئ
ياخي انت هنا ماشايفة دعاية الاكل, والله يصوروها ليك و تقولي ده اطعم اكل و تلاقيه في الاخر ديكور بس..كلو دهن!!ههههههه




معليش يا ستات البوست
دخلنا عليكن شديد و شاركنا كتير
لكن بالجد قاعدين نستفيد من كلامكن و وصفاتكن و نصائحكن
تسلمن يا اخوات

مريوم

كنت عايزة أوفر الأكلات السودانية لملف خاص بيها..لكن بما انو البوست بدأ يأخد طابع سوداني من ضمن العالمي..فشكلي حأضمنها هنا..خصوصاً و اني خلاص حأدخل الدوامة من جديد و دخلة المنبر حتبقى لي صعبة تاني..

شوربة العدس دي برضو من الحاجات المفضلة بالنسبة لينا..و صنف يومي و ثابت في صينية ماما الرمضانية..

جددت اكتشاف عظمتها..أول ما جيت البلد دي و يوم كان عندي مواعيد مع صاحبتي يابانية فعملت شوربة عدس و طعمية و شلتهم معاي..قلت نتغدا بيهم سوا عندها..المهم.. صاحبتي ما ختت الأكل..شالتو على جنب..و جابت لي للغداء هوت كيك( زي ما بيسمو البانكيك هنا)..و عسل.. و شاي ياباني..!!
أنا كنت حامل و قلبي مقطوع من الجوع.. و لما أكون جيعانة ما بأعرف آكل حاجة حلوة..المهم قلت ايش حال لو ما جايبة غداي معاي!! و ما قدرت أفهم نظريتها من شيل الأكل على جنب..خصوصا و اني عارفة الناس ديل بيحبوا يجربو الجديد..إذن ما قصة انها مستغربة الأكل أو ما عايزة تجربو!!
برضو إتصال منها تاني يوم..فهمني الحاصل..أتاريها وفرتو عشان تمشي تأكلو مع ناس أمها في العشاء...و فعلاً ..و طلبوا مني اني أجي أعملو ليهم في البيت و أعلمهم كيف يعملوه..!!

بأحكي ليكم الحاجات دي لأنو في ناس بيفتكرو انو الأكل السوداني ما مؤهل للخروج للعالمية..و حقيقي الأنا بأحكيهو عن ردود فعل الناس عنو..ليس سوى غيض من فيض..

المهم صبيتكم لكن أعفو لي..

هنا وصفتي لشوربة العدس و هي قريبة جدا من وصفة مريم ..لكن المرة الجاية حآخد بنصيحة سمارت بتاعة التمليح (الكوسا عندنا غالية يا سمارت..القطعة بدولار و شوية..بس حأجربها إن شاء الله)..و فعلاً الشمار الناشف مع العدس خرافي

بأشتغل المقادير بالاحساس أكتر من القياس..فحكمو احساسكم و خبرتكم..

بصلة كبيرة
جزرة
بطاطس..
علبة طماطم
عدس (يمكن حوالي ربع كيلو)
مكعب أو اتنين مرقة دجاج
حبهان
قرفة
و أحيانا بأضيف كباية زبادي
و أكيد موية

بأقفلهم في حلة ضغط لمدة ساعة إلا ربع إلى ساعة تقريباً

بعدين بأفتح الحلة و بأضيف ملعقة كبيرة دكوة (زبدة فول سوداني ..الترجمة لناس الشهادة العربية)..و شوية شمار ناشف
بأخليهم يغلوا شوية (بدون ما أقفل حلة الضغط) تاني على نار هادية لأنو الدكوة ممكن تلصق و تحرق بسهولة.. و دا تنبيه للعزابة..و العدس كمان بيلصق و يحرق بسهولة..عشان كدا خلو النار هادية..و استخدموا حلة قعرها سميك..و حركوا حلة الضغط نفسها كل شوية لأنو ما حتقدروا تحركوا المكونات بملعقة أثناء الطبخ..لو حلتكم قعرها ما سميك..ختوا غطاية علبة معدنية كبيرة ..أو ضحوا بصينية معدنية صغيرة..و استخدموها دايماً للغرض دا و خلوها كحاجز بين الحلة و النار..(بتنفع للرز برضو) ..

كلامي بقى كتير زي منال العالم..أنا ذاتي كرهت روحي..و عافية للبيكرهني: ))

و لأني غالباً بأكون مستعجلة و ما بأقدر أصبر للحلة تبرد عشان أخلط العدس..بأقوم أخت ليها مكعبات تلج..أصلي حأحتاج لموية عشان يتخلط لي..
بعد ما أخلط المكونات و أصفيها**..بأرجعها النار تاني عشان الرغوة الناتجة من الخلط تروح..و على نار هادية بأكمل تطعيمها لو ناقصها شيء..و بأضيف ليها قدحة توم..و بأخلي شوية قدحة للوش عند التقديم..
الصورة التحت دي قديمة..و تاني يوم بعد عزومة مبسوطة انو ما محتاجة اطبخ و التلاجة مليانة أكل..قلت أدلع روحي و أقعد للغداء بمزاج...دهنت شرائح خبز فرنسي baguette بسلطة أسود..مع الشوربة و ضربتهم..





_____________________________

**أكتر حاجة مزعجة هي التصفية في كل الطبخة دي..و لو أضفتو القرفة و الحبهان مسحونين..أو نشلتوهم (كلللهم) قبل الخلط يمكن ما تحتاجوا انكم تصفوها..بس أنا برضو بحبها ناعمة زي مريم و لما يتخلطوا البهارات مع الشوربة نكهتهم بتكون أقوى و ألذ..
[B/]

مريم قلتي لي أجدع ليكم وصفة
طبعا انا ما شاء الله...طقوا الخشب..في المطبخ عصمت مديني D+ (برضو احسن من الF)وإن شاء الله حيرسلوني كورس
حأرجع منو C+ والعافية درجات
لكن ا ما يمنع نديكم حركة في الكبدة لما الاولاد يكونوا في حالة تمرد فجأة من الكبدة
I dont blame them

تبلي الكبدة بالبهار كزبرة وشمار وتوم وكدا...وأضيفي خردل(مسطرد)..لو ما في خردل ليمون ...ليمون كتير...تبنيهو في البقسماط
(قرقوش مدقوق) وحمري في زيت حار....It tastes like chicken


ناس الدول الاسيوية...ياخ أنا عاجبني الfried rice
حسب وصفة صديقي البورمي الله يطراهو بالخير..تسلقي ليك رز وتخلليهو على جنبة يكون برد...وفي طوة كبيرة، تختي زيت زيتون، وتشوحي فيهو دجاجك أو سمككك(المتبل ومبهر ومقطع قطع صغيرة).. الدايراه
تمرقي الدجاج تختي الخدار (بصل أخضر، red beans، انا بخت جزر مبشور)
تشوحي الخضار وتفقعي بيضتين في الخضار وتقلبيهو بشرعة معاهو عشان ما يتكتل، تختي فيها بابريكاوتوم بودرة make it real spicy
على كيفكم البهار دا، أنا بحب الزعفران، ويلا ما تقعدي البيض كتير ، عشرة ثواني بس، أضيفي الدجاج،قلبي أضيفي الرز...انتهى...يؤكل بالدقوس ولا إسمو chilly sauce

يا سمارت أنا...أفتكر الفسيخ ياهو الanchovies ولا شنو؟ أنا بشتريهو وبقلبو فسيخ حسب وصفة واحدة صحبتي

ميسون النجومي، والله ما عرفتك وانت نازلة الملعب... D+ شنو ياخ، ما هدي زي الفل.. حركة الكبدة عجبتني والله.. حأجربها.. احنا عندنا مطعم ظريف اردني، اسمه مطعم هاشم.. بعمل الكبدة ومعاها حمّص.. وحاة الله تاكلي ما تدي الجنبك.. ومحمود بحبها جداً.. لكن بتاعتك برضه حأجربها.. ما حصل حاولت في الfried rice... لا اكلته، ولا عملته.. لكن حأعمله، أصلا دي فايدة البوست ده.. شكرا ليك.. ومنتظرين زيادة...

نجوان.. وصفة السمك بتاعتك دي، اول حاجه حأعملها اول ما ارجع بيتي.. لانه نادر بحب السمك جداً.. وانا من زمن بحاول القى وصفات سريعة، وسهلة.. ومن غير تحمير.. لانه انا عندي ضد مع السمك.. ومحاولة اكل فيه اكتر الفترة الفاتت دي...

مبروك يا سناء صينية السمك (-:
وشكرا على الصور الأصلية!

بعمل شيء قريب جدا من وصفة مريم
بس مكوناته أقل شوية..

1. بحمّر بصل اخضر مقطّع ناعم وتوم في ملعقتين زيت زيتون
(البصل في الأول والتوم في الآخر عشان ما يحرق)
وأخليه على جنب..

2. بخلط طماطم مقشّر مع الزبادي، ملعقة كبيرة صلصة،
ملعقة كبيرة دكوة (peanut butter)
عصير برتقالة وقشر برتقالة..
والبهارات العادية..

بضيف 1 +2 للسمك وبغطي الصينية وعلى الفرن..
(السمك لازم يتبهّر قبل إضافة الخلطة بوقت)
دي كل المكونات..

بيطلع لونه على برتقالي كدة (زي الbutter chicken بتاع الهنود داك)..
وطعمه زي العسل!

دي صورة بتشبهه (بس ده دجاج الهنود)

______
يا سمارت شوربتك قليلة الكارب رهيبة جدا..
بعملها قريب من بتاعتك بس بضيف الخضار آخر شيء (تقريبا لما الدجاج يكون إستوى وطلعته من الحلة)
بعطي الخضار تبويخة بسيطة جدا (ما بتنجّضه) عشان قيمته الغذائية ما تقل، وبتم الباقي في الخلاط..

______
هواري .. مالك على الشوام الليلة،
والله أكلهم طاعم وصحي!

______
ازيك يا ملاسي.. مالك عايز تفتل البوست
بس الجماعة مشوّها ليك..
(-;
______
مرحب بغادة عبدالعزيز وميسون النجومي..

كتبت:

Quote: بوست جميل سأقوم بلفت انتباه من يهمهم الأمر إليه.

فكتب سمارت:

Quote: ملاسى ..منو ديل اللى ح توريهم البوست؟؟؟

و كتبت نجوان:

Quote: ازيك يا ملاسي.. مالك عايز تفتل البوست بس الجماعة مشوّها ليك .. (-;

يعني الزول أصلو ما يكون ظريف و يشيد
ببوست و يروج ليهو في أوساطو و للا شنو


_____
السلام وصل أكمل وجه يا سمارت

سلام لمريوم ست المطبخ و ضيوفها الكرام،،

أنا غايتو البوست دة ماشية و جاية عليهو لى يومين،
و مل لقيت لى فرقة أدخل عليكم،،

قلت نبدأ بالسلام لغاية ما نجهبز الوصفات و نجيكم،،،


كل البنات و (الستات) المروا على الخيط دة،
ماشاء الله حاجة تمام و يرفعوا الراس،،
و من الشباب كيفنى جدا هوارى،
و نزار برضو ما قصر،،،


أنا غايتو فى المطبخ دة عندى مشكلتين (لا ثالث لهما)،،،

1. ما بشتغل بمقادير (إلا فى وصفات الكيك و الحلويات فى بعض الأحيان)،،

2. ما بحب أشتغل لو مزاجى ما جاى شديد،،
يعنى فى الحالات دى و للضرورة بس بطلع الاكل الإعتيادى (عدى من وشك)،،،

فما عارفة الحل وين؟؟

أيووووة أتذكرت المشكلة الثالثة، و طلعت الأهم و الاكبر:
و لا أقول ليكم خليها المرة الجاية،،،،

طبعا شوقتينا بالنقطة التالتة.. لكن دي بشارة خير انك جاية تانية.. فحننتظرك يا هالة.. بالنسبة للمشكلتين الاوائل، انا برضه كده، بلتزم بالمقادير في الكيك والحلويات بس.. لانها ما بنفع معاها التنظير.. اما باقي الاكل بنجر فيه من راسي... وكتير بغير في الوصفة على حسب مزاجي.. قصة مزاج الطبيخ دي انا معاك فيها برضه.. مرات راسي ده يقفل ما اعرف اعمل شنو.. واكون زهجانه اني ما قادره اطبخ بمزاج.. وحتى لو الاكل طلع حلو انا ما بكون راضية لانه ما بمزاج

سلام للسيّدات الهميمات وللسادة الحنينين،

Quote: منتظرين شوربات يا شباب وشابات

أمسكي عندك "العلاج الشوربجي" (سوب ثيرابي) الذي قدّمته "ياهو هيلث" بمناسبة "الشهر الوطني للشوربة" حيث تزعم أنّ من القدرات العلاجية المدهشة للشوربة أنّها تسهم في إزالة السموم من الجسم، انقاص الوزن وتدعيم المناعة بالاضافة لفوائد أخرى...وحا تلقَن وصفة وصفتين لشوربات متخصّصة في ذلك. وبما إن براعتي في ترجمة الوصفات ليست أفضل من براعتي في تنزيلها إلى أرض الواقع، ما عندي ليكَن غير: أُكْلَن ناركَن.

لقد احتلّت الـmushroom creamy soup المرتبة الثالثة بقائمة شورباتي المفضّلة (الشوربة المعمولة بطريقة مريم دي، مُشْ الجاهزة من ماجي وألاّ كنور، مع إنّو شورباتهم بتاعت الدجاج والشوفان ما هينة).

المرتبة الأولى احتلّتها شوربة دجاج وسبانخ تناولتها في مطعم هجين (صيني/هندي) خطير؛ في واحد لاصق جنبو ما يخدعكم، لمّيت فيهو بالصدفة بشارع الظهران (مجمّع مطاعم يلي مجمّع لتأجير السيّارات) بالثُقْبَة بالخُبَر: تُكمل الشوربة نضجها على طاولتك على بابور غاز نارو هادئة وقد قمت، براي كِدا، بتعديل مذاقها إلى مذاق أقرب للملاح الأخدر بأن زوّدتها بأطنان من الشطّة الحارقة والتوم والليمون.

المرتبة الثانية تحتلّها شوربة بحريّات (سمك وجمبري وcrab) بالكريمة والكراث لدى مطعم النافورة للأسماك (أكرّر مطعم، واحد يعني، وللأسماك، ما أي نافورة يعني وما تفتّشوا ليها في بوفيهم المفتوح) بطريق المطار القديم بالرياض...وبالهنا والشفا.

عادل البدوي
انا برضه قريت الخبر ده في ياهو.. وبارك الله فيك جبته هنا.. اتشجعته اني اعمل شوربة اكتر في برنامج الاكل بتاعنا...

Quote: المرتبة الأولى احتلّتها شوربة دجاج وسبانخ تناولتها في مطعم هجين (صيني/هندي) خطير؛ في واحد لاصق جنبو ما يخدعكم، لمّيت فيهو بالصدفة بشارع الظهران (مجمّع مطاعم يلي مجمّع لتأجير السيّارات) بالثُقْبَة بالخُبَر: تُكمل الشوربة نضجها على طاولتك على بابور غاز نارو هادئة وقد قمت، براي كِدا، بتعديل مذاقها إلى مذاق أقرب للملاح الأخدر بأن زوّدتها بأطنان من الشطّة الحارقة والتوم والليمون.

اسمه شنو المطعم ده، ووصف لينا بدقّة اكتر بالله.. طبعا اكيد في ناس بقروا الكلام ده، وحيكونوا عايزين يصلوا للمطعم ده

ساره علي.. عبجتيني تب.. ده برضه كان دوري لما كنت في بيت اهلي.. ولحدي حسي في بيتي بهتم بشكل الاكل كتير.. يعني مثلا صحن حمّص (بالمناسبة صحّي جداً، ولزيز جداً).. لازم اعمل زي ما بعملوه الشوام... وازينه بي زيت الزيتون، والسمّاق..صحن لبنة عادي، ممكن ازينه برشّات زعتر.. وزيتون.. بابا لحدي الآن بقول لي تعالي اكلي قدامي (ده لما اكون باكل براي) عشان طريقة ختك للاكل لزيزة، وبتشجعيني اكل...

سناء خالد.. عدسك جوووووووعني.. الدنيا نص الليل.. انا بحب العدس جداً.. ومشهور اني بحب العدس بالجبنة، ومعاهم صحن بيض (عيون).. ولازم يكون running طبعا.. لو عزمتيني فطور زي ده، انت كده اكرمتيني غاية الكرم...منتظرين الوصفات السودانية يلا.. ممكن عشانها نأجل الlow carbs

سمارت جهجهتيني بالشوربة دي والله... انا حأقوم اعملها هنا اجرّبها في اهلي، ولما ارجع بيتي ياني الحأسويها كتيرة واختها في التلاجة، أي tips للتجميد؟ والله شوربة عجب عديل كده..لكن سمّيها لينا، ولا بسميها شوربة سمارت..

هوّاري، أنا برضه زولة شطة، لكن نادر ما بدورها.. ومحمود ولدي بطبيعة الحال ما بستحملها.. لكن انا دايما عندي شطتي الخضراء قاعدة بضيفها للأكل في صحني

يا سلااااام.. انا سعيدة والله انكم قاعدين بي جاي رغم غيابي الليلة طول اليوم...

الاخ احمد... الحمدلله انه العزابة استفادوا من البوست.. وده شي يسعدنا.. عقبال تتأهلوا كلكم بإذن الله

سمارت.. حأجرب شوربة العدس بالكوسه.. حتضيف ليها قيمة غذائية.. والtip بتاعت الملح دي...

الشوفان او oatmeal من الاضافات المميزة للشوربات.. بتزيد من كثافة الشوربة وفي نفس الوقت بترفع من قيمتها الغذائية.. ممكن يٌضاف لاي شوربة نعملها، بالخضار ولا باللحمة ولا بالدجاج.. انا برضه بعمله مع الملاح أو الدمعة، ملعقة واحدة منه اثناء الطبخ، بتزيد القيمة الغذائية للاكل.. برضه عندي وصفة سريعة وساهلة لoatmeal cupcakes بكتبها لما نخلص من الاجندة القدامنا دي..


الألياف fibers من المواد الغذائية الهامة اللازم تكون موجوده في اكلنا.. وممكن نحصل عليها من الشوفان زي ما ذكرته ومن المنتجات المصنوعة من الحبوب الكاملة.. في الخبز .. وفي بعض الخضار .. الألياف بتساعد الجسم على الهضم.. وبتساعده على التخلص من بعض الدهون .. عشان كده هي تعتبر مكون اساسي للعايزين يعملوا ريجيم ولكن ريجيم صحّي.. موقع quakers مليان وصفات ممكن نستخدمها عشان نضيف المزيد من الشوفان لأكلنا.. او بالتحديد الألياف.. لكن وعن تجربة، لازم الواحد يشرب موية كتيرة جداً.. عشان ما يصاب بعسر هضم او غازات او امساك (excuse me)...

منتظرين المزيد من الشروبات ... قبل ما ننتقل للفقرة التالية


ملحوظة:
الليلة عوسته تلاته طرقات كسرة، وماما قالت لي انه الزول البتعلم العواسه لازم ياكل طرقاته، فكانت طريقة لطيفة منها عشان انا اتحمّل تبعات اعمالي البعملها!

سلامات يا مريوم
للاسف الشوربه دى (بالذات ) ما بتتجمد ..لان الخضار فيها ما مهروس. لوعاوزه تجمديها اعملى بوصفه نجوان.
لو عاوزاها كمات تكون اتقل شويه افتحى فيها علبه شوربه بطاطس مركزة.
اليوم ح اعمل صينية السمك....الجماعة مستعدين!


نجوان ...المره الجايه ح اجرب اعملها ذيك...فكرة جميلة جدا ان نحافظ على قيمة الخطار الغذائية
_____________________________________
الشوربه اسمهاchicken and vegetables chowder


عموما فى البلد دى اى حاجه اسمها chowder معناها فيها دهن خنزير. عشان كده بعملها براى فى البيت.
http://en.wikipedia.org/wiki/Chowder

اكتر حاجه بتعجبنى فى مواضيع الطبيخ دى انى اعرف اصل الاكلة من وين و ليه حجات معينه بتتعمل.عشان كده برنامجى المفضل فى التلفزيون اسمه Good Eats
و مقدم البرنامج بيحب الاكل و العلوم..عشان كده عادى ممكن تلاقيه بيطبخ فى اكلة و فجاءة يجيب السبوره و يقعد يرص فى المعادلات الكيمائية...and YES, I am a Geek

Quote: الليلة عوسته تلاته طرقات كسرة، وماما قالت لي انه الزول البتعلم العواسه لازم ياكل طرقاته، فكانت طريقة لطيفة منها عشان انا اتحمّل تبعات اعمالي البعملها!

لا....لا....لا.....ما شاء الله و عينى باااارده. و الله يا مريوم دى عاوزه ليها تكريم. يا اخى انا لما عملت العصيده كنت ح اعمل حفلة.
الكسرة دى انا بفكر فيها لى 3 سنيين كده...و لحدى الان ما اتسهلت.

سناء خالد...مداخلاتك طااااعمة .ما شاء الله.

دى وصفة شوربة كنت كتبتها فى بوست السجك ....لكن لانها ساهلة و سريعة و طعمها خرافى ف ح اكتبها تانى هنا...

قبل ما انسى اسمهاGREEK LEMON RICE SOUP او شوربة الرز و الليمون اليونانية..و هى حقيقة فى اى مطعم يونانى موجوده ..شكلها كده ذى العدس عندنا.
لازم احزر انها فيها كارب كتيرة.. ممكن تكون كويسه للاطفال (الضعاف) لانه فيها رز و بيض.


فى حلة ختى:
3 كبابى شوربة دجاج
تلت كباية رز
بعد ما يغلو ارخى النار و غطيهم لمدة 20 دقيقة لحدى ما الرز يستوى تماما
اطفى النار
اضربى 2 بيضة و 3 ملاعق عصير ليمون طازج.
(النار مطفية فى الرز و الشوربة) ابدى اضيفى البيض و الليمون شويه شويه لحدى ما تخلصى كل البيض.
شغلى النار تانى و سوطى ...خليها تسخن .....بس ما تغلى .....لو غلت البيض ح يبقى خيوط بيضاء..
كبى ليها حبة ملح (حسب المزاج)...بس خلى بالك من الملح لان لو المرقه فيها ملح ما ح تحتاجى لملح زياده

حاجه تانى ...قدميها على طول...يعنى لو عاوزه تعمليها لضيوف نجضى الرز فى المرقة من بدرى ..لكن ما تضيفى البيض و الليمون قبل ما يجو الضيوف و تبدى تختى الاكل
ختيهم فى نار

تحياتي مريم و الجميع

Quote: شكرا يا سناء على مشاركاتك ف البوست ده.. وبالمناسبة، اداني فكرة جميلة عنّك.. ونديك جائزة المفراكة الذهبية في المطبخ.. حركة التلج في العدس دي روعه.. عشان الخلاط ما كويس نخلط فيه والاكل حار... رغم اني بستخدم خلاط اليد، وده بوفر عليك اللفة دي.. لكن اهم شي انك بتتصرفي، ودي هي طريقة الزولة الحريفة

ياخي نحن الشاكرينك على فتح البوست دا..تعرفي مما بقيت عضوة في سودانيز و أنا نفسي أعمل بوست زي دا, و كل ما ألقى لي فرصة أصور أكلة..بأصورها.. و أقول لما أفضى و أعمل البوست..لكن السياسة و المشاكل طايرة..ما خلتني.. التقول أبوي كان وزير و لاّ قايلة روحي حأصلح الكون..!!
لكن يا مريومة الأغبش المعتل الصحة الاسمو السودان دا هو حبي الأكبر..و نفسي يقيف على رجلينو سليم ما مقطع الأوصال.. و يبقى صحيح البنية..شبعان و كسيان..و قيافة و راسو ملان..و لكن...!!

في الحلق غصة.. خلينا نرجع لموضوع البوست..

عجبني كلام هواري قبيل

Quote: معرفة ثقافة الاخر وتقديمنا لثقافتنا من خلال الطعــام و اللبس و الموسيقي

فعلاً الآخر ما حيحترمنا لو ما عرف انو نحن ناس عندنا ثقافة و موروثات غنية و جديرة بالاحتفاء..و الحاجات التلاتة دي من أسهل و أجمل الطرق لنصل لعقل الآخر و قلبه..

قبل كم سنة كنت عازمة أمهات زملاء حسن في الفصل.. بأعمل الحاجة دي تقريباً كل سنة ..بأعزم أمهات الأطفال لأنو اليابان على حسنات كتيرة فيها..لسة فيها نوع من الانغلاق..و الأجنبي فيها بيفضل أجنبي مهما طوّل..و الأفارقة قد يواجهوا بنوع من العنصرية المبطنة..و معاملة الأطفال للأطفال انعكاس للفكرة التي يحملها والديهم..و يوصلوها لهم!

الحاجة اللي لاحظتها انو دايماً بعد ما يزورونا في بيتنا و يتأكدوا انو نحن ما جايين من Jungle!! بينفتحوا علينا خالص و آخر احتفاء و احترامات!!

بديت أحكي ليك عن عزومة الأمهات في فصل حسن..لأنها كانت تجربة مختلفة شوية بالنسبة لي..عن لما كان في الروضة
المدرسة خاصة و هي الأغلى هنا..و الأمهات ديل من أغنى و أرقى طبقة في البلد..(نحن داخلين معاهم شلاقة ساي..و بس عشان المدرسة الوحيدة البتدرس بلغتين انجليزي وياباني..و شادين الحزام شديد:)))
المهم أنا حكيت رأسي و دخلت في دوامة قبل يوم العزومة..لأنو متخيلة انو ما في شيء حيعجبهم و هم البيمشو أغلى المطاعم في البلد و برة البلد..
العزمتهم جو..إلا اتنين اعتذرو و من طبيعتهم اللاحظتها عليهم ممكن أقول ليك انها طنقعة بس ما لأي سبب وجيه (واحدة منهم زوجة مدرب كرة القدم و اللاعب الأشهر في ألمانيا في الثمانينات..بيير ليتباريسكي Pierre Littbarski مع انو هو زول في قمة اللطف و التواضع لكن زوجته ماخدة نصيبو من الغرور تقولي كانت بتلعب هي :)))

المهم وصلو زي ستة في الأول من حوالي 12 ..ما قعدوا و لا لحظة في الكنب..متحلقات حوالين السفرة و ما قادرين يصبروا لما يجو الباقيين..






كنت عاملة حاجات مختلفة.. و أفتكر لذيذة..
Smoked Salmon



, Shrimp in Remoulade



, Chicken Nuggets



,فطاير سبانخ



, Tartlets



and Cakes, etc


حلو فراولة..





بس الرئيسي و اللي كالعادة عندي (سوداني) فاز بالجائزة الأولى..محشي و بدون صوص سايل عشان سهولة اللأكل بالهاشي..!






و سلطة الأسود بالتانية



و الشطة الخضراء بالدكوة




مش بس أكلوها..و الله يا مريم قسموا الباقي منها في كبايات بلاستيك حبة حبة و غطوها بالرابwrap و دخلوها في الشنط اللوي فتون و جوتشي و ميو ميو..(الشنطة أقلاها بألف دولار!!) أنا بصراحة كان قلبي على الشنط..و بيني و بين نفسي أقول بالله شوف العظمة اللقتها الدكوة :)) لكن على رأي خالد..لو اتوسخت حيرموها و يجيبوا غيرها (ما تشوفو بساطة اللبس الكاجيوال دا!)
طبعاً دي واحدة من الحاجات البتعجب عند اليابانيين ..إنو لما يعجبهم الأكل عادي جداً يطلبو يشيلو منو لو في باقي!! و عشان كدا دايما بأحتفظ بdisposable containers في البيت عشان يشيلو فيها! الحاجة دي ما عندها أي علاقة بمستوى اجتماعي..يعني (بيحصل في أرقى العائلات..على رأي المقولة الشهيرة)!

المهم التجربة دي زادت ثقتي في جودة الأكلات السودانية..و فخري بيها.. لكن في مشكلة عويصة بتواجهني....

الكلام دا عندو باقي..بأرجع ليهو تاني إن شاء الله

_______________________________________________________________________________

بأحاول أدش الكلام كلو مرة واحدة لأنو متخيلة اني ممكن أنشغل و الرجعة تبقى لي صعبة..
حأحاول فيما بعد أنزل ليكم الوصفات الفوق لو فيها شيء عجبكم

مريوم

المفراكة في روحها دهب و لا الاسم دا رمزي؟

ياخي تسلمي ..لكن أنا ما فايتة أي واحدة منكم غير بالفياقة و حب التصوير..و انتو كلكم نساء مشغولات بالانتاج في مجالات أوسع..ربنا يوفقكم يا رب

لكن فعلاً زي ما قلتي الخلاط اليدوي بيريح في انك ممكن تخلطي في الحلة مباشرة و هو سخن..و بيقلل من غسيل العدة..لكن يا مريم العندي ما بيخلط لي البهار في الشوربة ناعم زي الخلاط العادي..و عشان كدا بأستعمله لشوربات الخضار و المفاريك..لكن ما مع شوربة العدس..عشان القرفة و الحبهان!

_____________________________________________

سمارت و الله الكلام دا بس من ذوقك..

لكن الشوربة اليونانية دي أنا حاسة انها أقل دسم من الشاودر..و لاّ ما كدا؟
حأجربها الليلة إن شاء الله لأنو شكلها ساهل..عندي رز جاهز ممكن أضيفو على الشوربة و أخليهو يغلى شوية و أكمل على كدا؟

على فكرة طوالي قوقلت Good Eats
ياخي دا برنامج لذيذ بشكل..حضرت الحلقة بتاعة ال Soup's On
شكلي حأبقى Fan
زي ما بقيت بسببك a fan of Dr.House
حأقول ليك نتيجة الشوربة اليونانية إن شاء الله


___________________________________________

سروية ياخي أعفي لينا من تعبك..

لكن وين صور القيمة..و وصفة الكبيبة...

أنا مغروضة في وصفة الكبيبة دي شدييييييد
جربتها مرة عند مرة عمي و مع انها وصفتها لي لكن أصلي ما قدرت أعمل زيها..في انتظارك

ازيكم
سناء.... ماشاء الله ...ما شاء الله.... This is very impressive
الاكل شكلو خرافى...,والعده شكلها اجمل...
بغرتينى...بكره انا ماشه اجيب لى عده جديده....Just kidding

بينى و بينك انا لما اكون عازمه اجانب اهم حاجه المحشى ...لكن زوجى (الله يديه العافية)لما يسالوا ده اكل سودانى ..بيقول ليهم (لا)....و لما اغالط ....بيقول لى المحشى سودانى فى الخرطوم بس. المهم ..احنا فى كل عزومه بنتغالط قدام الضيوف فى الموضوع ده.
الحاجه التانية البسيطه هى انى بحمر ليهم سمك بس ببهار سودانى.. شمار و كزبره و توم و فلفل و ملح.....

انا مبسوطه جدا ان Good Eats عجبك...
دى وصفه بتاعة اكله جميلة جدا...كنت عاوزه اختها فى البوست لكنها برنامج طويل جدا و مريم عاوزه اكلات سريعة.....ذى ما قلت عملها برنااامج لكن Your patience will be rewarded الاكلة دى فعلا خطيرة...مع انها احد اسلحتى السرية فى العزومات ..لكن ح اختها ليكم...ربنا يعوضنا.
http://www.foodnetwork.com/recipes/alton-brown/braciole-recipe/index.html
لما اعملها و اضوقها ما تتخيلو بتكيف كيف.
__________________________________________
انا مبسوطه اكتر انك بقيتى تحبى هاوس...هسى انا بكتب فى البوست و بشوف فى حلقة.

Quote: اسمه شنو المطعم ده، ووصف لينا بدقّة اكتر بالله..

للأسف يا مريم المطعم إسمو رايح علي لكن أكان مشيتي بالوصِف الختّيتو بتلقيهو ولو كنت بالخبر لأتيتك بالأكيدة. بَسْ أهم حاجة تفرزيهو من التاني (المتسلبط) وذلك بملاحظة مقالات (أم هي مقالة وحيدة) معلّقة ببابه/ببورده كاتبها/نّها متلقي حجج تناولوا طعامهم به فعجبهم.

إعتذاراً عن المعلومة الناقصة في أعلاه، إليكم Tip كاملة لمحبّي الطبايخ باللحم العجّالي* وللحريصين على النكهات المميّزة في الشوربات وغيرها، أسألوا مجرّب ولا تسألوا طبّاخ: ورق الغار، مُشْ من أي عطّار وإنّما، من انتاج سبايس آيلاندز (صحيح غالي، العلبة الصافيها أربعة جرام، أيوا أربعة بَسْ، بحوالي أربعين ريال؛ أي، حوالي عشرة دولارات) لكنّو يستاهل.

أعتقد بوجود قسم لمنتجات سبايس آيلاندز عند صفوف البهارات ببعض السوبرماركتات (في الرياض - السعودية، يوجد ذلك بالتميمي سوبرماركت). الناس ديل، سبايس آيلاندز مُشْ التميمي، برضو عندهم أطنان من الوصفات لمن يتوفّر له/لها الوقت والمزاج.


______________
* جرّبوا لمثل هذه الطبايخ تكسير وتقطيع تي بوناية (قطعة T-Bone)، تجي حوالي نصف كيلو، مع نصف كيلو ضلوع وادعوا، بالهنا والشفا، لي ولكم ولجميع محبّي الطبايخ، وأكان الله هوّن بجي أدّيكم أفضل طريقة لـ"طفية" بصلة الحلّة دي تحافظ على نكهة الطعام لآخر نِتْشة. نِشّيل (نِشّيل دي فُصحى، وتصف الفعل المعني تماماً، بالمناسبة) لحم الطبايخ بكون أصلو الحكاية دي.

Quote: بالمناسبة دي..عندي صاحبتي أنا عارفة انها كرهتها في الدنيا المطبخ لكن قبل ما تتزوج كانت كاتبة في البروفايل هوايتها الطبيخ

سناء خالد..
اشكرك حتي الشبع للهنت الفوق الاديتيني ليهو دة..(اديني دقيقتين وامشي راجعي بروفايلي)..
ثم البيسالوا عن صوري ..انا اي شئ بكتبو طواااالي بتصدقوهو ؟؟ ههههههههه
بالجد صورتا قيمة بطاطس لكن مااااااا بتنافس مع صور سناء هههههه حقتي دي عملتها بي طمة بطن عشان نظام البروفايل الجديد ههههههه بنزلا ليكم..
ويا سناء الكبيبة البعملا عبارة عن خلطة رز باللحمة المفرومة وبتتحمر بالبيض..دي القاصداها.؟؟
غايتو الكبيبة دي سااااااهلة للعزابة...



ـــــــــــــــــــــــــــــــــــــــ
باريتكم وواطاتي اصبحت..

يا سارة على،،

Quote: غايتو الكبيبة دي سااااااهلة للعزابة...

على قولك ساهلة و لذيذة،،،

جربى معانا كبيبة الشوام دى،
(طبعا عندعم أنواع كتيرة، لكن دى النوع الأصابع البتحمر)،،

المقادير:
1/2 كيلو لحم مفرومة،
1/2 كيلو برغل (خشن)
بصلة كبيرة
ملح، فلفل ،بهارات (كبابة صينى)،،


الحشوة:
لحمة مفرومة (معصجة)
صنوبر
زبيب


الطريقة:
ينقع البرغل فى ماء لمدة 30 دقيقة أو اقل،،
يخلط مع مقدار اللحم و يبهر،،
يضاف البصل،
و يفرم الخليط ليتجانس،،،

للحشو:
تعصج اللحمة بتسويتها و تبهيرها على النار مع البصل،
و يخلط معها الصنوبر و الزبيب (ممكن من غير زبيب حسب المذاق)،،

التكفيت لازم بموية باردة،
تؤخذ قطعة متوسطة من اللحم و البرغل و تشكل على شكل اسطوانى (مدبب) من طرف و مفتوح،،
(ممكن زول يجيب لينا صورة من النت، عشان خاصية إنزال الصور عندى معطلة)،،،
و يتم حشو القطعة بملئ ملعقة صغيرة من الحشو و تقفل العجينة بشكل مدبب أيضا،،

تحمر الكبيبة فى زيت غزير،،

و بالهنا و الشفا،،

يا سلام يامريم ويا نجوان ويا كلللللكن



طول عمري ..بشوف المطبخ طشاش طشاش ..لكن الأيام دي عندي إهتمامات زي دي وطبيخ نص الليل ..إكتشفت إنو



الطبيخ ده ممتع جدا جدا ..



ياخ البوست ده ..حيتنسخ كلو ..وهاك يا تجريب ..




ــــــــــــــــ




إحتمال أبيعوا ..أعفن لي سمح ؟

Quote: فى حلة ختى: 3 كبابى شوربة دجاج تلت كباية رز بعد ما يغلو ارخى النار و غطيهم لمدة 20 دقيقة لحدى ما الرز يستوى تماما اطفى النار اضربى 2 بيضة و 3 ملاعق عصير ليمون طازج. (النار مطفية فى الرز و الشوربة) ابدى اضيفى البيض و الليمون شويه شويه لحدى ما تخلصى كل البيض. شغلى النار تانى و سوطى ...خليها تسخن .....بس ما تغلى .....لو غلت البيض ح يبقى خيوط بيضاء.. كبى ليها حبة ملح (حسب المزاج)...بس خلى بالك من الملح لان لو المرقه فيها ملح ما ح تحتاجى لملح زياده حاجه تانى ...قدميها على طول...يعنى لو عاوزه تعمليها لضيوف نجضى الرز فى المرقة من بدرى ..لكن ما تضيفى البيض و الليمون قبل ما يجو الضيوف و تبدى تختى الاكل ختيهم فى نار

يا سمارت,,,التلاتة كبابي شوربة دجاج دي شنو؟؟؟
أجيب دجاج...وأغليه لما يبقي شوربة..؟؟؟
أكياس الشوربة الجاهزة ؟؟؟
مرقة ماجي أعملها شوربة؟؟؟

داليا حافظ هوي.. احنا عندنا نسبة، بقينا لينا في مفراكة دايرين نشتريها لسناء دي

سمارت..
يا ستي عينك ملانة و الله..و شكراً على الكلام الحلو و الوصفات الأحلى..حأحاول أعمل الBraciole في أقرب فرصة إن شاء الله..بس ألقى استيك بالحجم دا
قبل أسبوعين عملت حاجة قريبة لوصفو دا و هي رولاد الدجاج..ما أخدت وقت . .. but I can tell from your recipe that the Braciole is more sophisticated

طبعاً بغرت من مشاهدتك الليلة لهاوس..يا مين يديني حبة روقة أمشي الفيديو سنتر.. ما بتعرض عندنا:(( |إلا في مكتبات الفيديو
السوب في النار و اتأخرت على الجماعة بالعشاء حأرجع للتصحيح برضو..
---------------------------------------------------------------------------------------------

سارة..حكو ليك بالحصل علي لما رجعت لبروفايلك..غايتو خليتيني فرجة :))) و الله ما نصيحة!!!

ياها دي الكبيبة البسأل منها..ما الكبة زي ما وصفتها هالة..مع انها مفروض تكون أسهل من السهولة نفسها لأنو زي ما منال علمتني ليها هي رز و لحمة مفرومة تبهريهم و تعمليها أصابع و تغطيها بالبيض و الدقيق و تحمريها..لكن أصلو ما طلعت لي زي حقتها..و طول الوقت بسأل نفسي عملت فيها شنو غلط!!
أديني وصفتك..راجياك..

_____________________________________________________

هالة .. لكن مبدعة.. البتشوف الكبة ساهلة دي أصلو ما ممكن تكون بتكره المطبخ.. ياخي دي أهلها ما بيقولو ساهلة..بس إنت اللي زولة ما ساهلة
لممممما يجي على بالي أغلب روحي في الطبيخ بأعملها.. لكن بالكسكسي بدل البرغل لأنو ما عندنا برغل هنا..و دايماً بسد محلو بالكسكسي لو كان للكبة أو للتبولة..
لكن ما بأخلط مع العجينة أي شيء غير البهار..يعني بفرم نفس مقدار اللحمة الحمراء..مع نفس مقدار الكسكسي (أو البرغل) و بهار..بس بأضيف البصلة للحشوة و بأعمل معاها ليمون.

أنا في رأيي انو المهندسين ديل بيظبطو أي حاجة لأنو شغلهم كلو بيعتمد على الدقة..و خالد لو قطع لي سلطة..ما شاء الله كأنو مقطعها بمسطرة..لكن طولة روح عجيبة :))

خالص التحايا

يا مريم، قوقلوا تصحّوا!

Quote: مطعم تنور وصيني مشويات إسمه معقد جدا وأعتقد أن إسمه Grill مشويات في حين أن ما من أحد يطلب مشويات لديه وهو مطعمي المفضل والرائع وهو أيضا على شارع الظهران بجوار بيت الكباب ولقرية الصيني السابق ذكره وهو صغير جدا جدا جدا وضيق ولكنه يشعرك أنك في بيت يعني له جو خاص غريب نوعا ما قد لايعجب البعض أكله لذيذ جدا وأطباقه رائعة وسخية للغاية وقائمة طلباتي تكون كالتالي: 2 دراقون سوب (رائعة جدا جدا) 1 رز مقلي مع الخضروات والدجاج والربيان وأيضا جيد 1 نودلز مشكلة مع الرباين والدجاج وهي المفضلة لدي 1 سعودي شامبين والفاتورة بحدود ال 80 ريال إن كنت أتذكر ولكنني أتذكر أن هذا الأكل 2 سوب مع 2 مين كورس كفيل بإشباع 3 أشخاص بكل بساطة فالكميات فعلا سخية هذا المطهم رائع جدا لا يفوتكم

Quote: من وجهة نظري تنور وصيني Grill-شارع الظهران بجوار بيت الكباب هو الأفضل رغم إن ديكوره قديم لكن أكله لذيذ وأسعاره معقولة و أطباقه خاصة الشربة والنودلز روعــة ..جربوا البيرل تشيكن عندهم .. إذا اشتهيت أكل صيني رحت عندهم وما أدور غيرهم

http://travel.maktoob.com/vb/travel246898-2/

على ما أذكر الواحد يدخل يمين، من شارع الظهران، في زقاق (أم هو دَرَج!) ثم إلى اليسار حيث مدخل المطعم وأوّل ما تدخلي حا تلقي الكاونتر على اليمين وصالة المطعم إلى اليسار. يلي الكاونتر منظر مفتوح على المطبخ حيث في الواجهة أحد الآسيويين شادّي ليهو صاج كبييير يغلي فيهو موية (غالباً لعمل شيرة من شيرهم البستخدموها في مأكولاتهم). الأثاث (من خيزران؟) والديكور متواضع لكنّ الطعام يعوّض.

يا سناء،

طريقة سارة دى إحنا بنسميها كفتة بالرز،،
و فعلا بتحب البقدونس جدا،
و بتطلع حلوة،،

Quote: أنا في رأيي انو المهندسين ديل بيظبطو أي حاجة لأنو شغلهم كلو بيعتمد على الدقة..و خالد لو قطع لي سلطة..ما شاء الله كأنو مقطعها بمسطرة..لكن طولة روح عجيبة :))

شكرا على رأيك (المتحيز) دة :-)

بالنسبة للزيادات،
البصل مع اللحمة بديها نكهة حلوة دايما فى الكفت و الكبة،
و زى ما اتفضلتى دة يعتبر من الزيادات فى الوصفة الاصلية بتاعت أسيادها،،

ممكن ناس تانيين يضيفوا ليها أعشاب مختلفة،
بس إحنا ما بنفضلها مع الكبيبة،،

و بالمناسبة،
ممكن نفس الوصفة تتعمل صينية،
يعنى طبقة أولى من خليط اللحم بالبرغل على صينية ممسوحة،
و الحشوة فى النص،
و تتغطى بطبقة تانية،
تتخرط بشكل هندسى،
و شوية سمنة على الوش،،

و على الفرن،،،،

إنتى كدة يا سناء ح تخلينى أعترف بالسر التانى الما كنت عاوزة اقولو فى الاول،،
طبعا بعد ما مريم طمنتنى (كتر خيرها) إنها بتمر بنفس حالاتى،،
أجى اقول ليكم الموضوع شنو:

ببساطة كدة،
أنا المطبخ دة بتعقدنى فيهو أمى (الله يديها العافية)،،
ماشاء الله عليها سيرتها واصلة الافاق،،
اقربها زوجة خالى أردنية و أمها سورية جات فى السودان تتعلم منها الكبيبة،،
و أخرها أهل الاردن كلهم فى زواج بت خالى،
حلفوا ما ضاقوا كحك ناعم زى دة قبل كدة:

ما علينا،،
أمى بتحب الدقة بطريقة عجيبة،
و عندها صبر خرافى ماشاء الله على شغل المطبخ،،
يعنى ما ممكن تلقيها راصة ليها أشكال مكعوجة مثلا (كفتة كانت أم خبيز)،
بنتعب جدا (أنا و خالاتى) لما نحاول ندخل إيدنا معاها،
اى شى ما بعجبها، بترجع طوالى على العجين،،،

و أنا طبعا بحب أشتغل (حسب الزمن المتاح) و المسطرة دى برسم بيها بس،،،

بالتالى أى شى بعملو، بشوفوا ناقص و ما مظبوط،،،

عرفتوا مشكلتى شنو؟؟؟؟

هالة .. ازيك
الكبة البي الصينية دي اهلها بياكلوها نييييييييييييية من غير ما تخش الفرن.. وبسموها كبّة نيّة (ههه)... بس اللحمة تكون very fresh وبضيفوا ليها كمية من البهارات كده...

والله يا عادل البدوي لقيتك طبّاخ بي مزاج عالي.. انا متأكده انه نادر قرا وصف المطعم ده.. وحنمشي ليه اول ما ارجع الدمام.. وبجيك بالاكيدة

غايته بعد الصور دي يا سناء، المفراكة إلا نعملها ليك دهب عديل.. لكن إلا نخش لينا صندوق عشان نلم التمن

سناء خالد.. جيتك بالمهلة... طبعا اهم اهم اهم حاجه الpresentation ... راقي.. جميل.. بسيط.. وفيه فن عالي.. واهم حاجة طبعا الالوان فيه جميلة... عدتك كلها يا شفافة يا بيضاء سادة، وده تحديداً البحبه انا... جني وجن الجوطه في العدّة...

(رفعت يدّها، وطقطقت، وقالت فضلك)
عندي سؤالين
سلطة الاسود عاملاه مطبوخة؟ ولا بس بعد التحمير طوالي طّعمتيها؟
برضه عايزين وصفة حلو الفراولة.. (ما قلت عامله ريجيم عااااااااااارفه)... عشان كده حأديكم وصفة chicken nuggets بس طبعا low fat

chicken nuggets
صدور دجاج مقطعة قدر اللقمة (لقمة زول ظريف ما أكّال)
كوب صغير زبادي
توم
ملح وفلفل
بابريكا
كورنفليكس
ليمون (بخلي الصدور هشّة)

نلخبط الزبادي والتوم والملح والفلفل والبابريكا سوا.. بعداك نكب فيهم الدجاج، ونغطيه وندخّله التلاجة.. نخليه ممكن over night... السرعة في الطبق ده اننا ممكن نتبله قبل كم يوم... ويوم الاكل نفسه نعمل التالي: في كيس نكب الكورنفلكس... ونربطه، ونهرسه بي يدينا.. او ممكن نضرب بي يد الفندك... وبعداك نكب جواه الصدور عشان تتغطى بي الكورنفليكس... ونختهم في صينية، وعلى الفرن... حسب حجم التقطيع.. لو الحجم صغير.. بياخد بالكتير ثلث ساعة في الفرن... ممكن نعمل معاه صوص بالزبادي والتوم وحبببببببة مسطرد

سمارت

هو انت من ناحية geek دي منتهين منها.. لكن الطيور على اشكالها تقع.. وحاتك اي مصيبة بفتش ليها تبرير علمي... الشافع ده مطبقه فيه كمية من النظريات.. دحين برنامجك ده ماشه "اكوسه".. لانه اكيد ما بيجيبوه لينا في فتافيت...

وبالله الليلة زول (غير سناء) يتكلم معاي مافي، انا زولة عايسه لي تلاته طرقات... طبعا استثنيت سناء لانه بصراحة اكون نافخه روحي ساي كان نافست الصور الخاتاها لينا دي...

شكرا يا سناء على العرض المشرّف
ونقلنا لمكان الحدث!
ماشالله عليك.. المفراكة الذهبية قطعا من نصيبك هذا الأسبوع!


____
وأنتهز هذه السانحة لأهدي القرقريبة الذهبية لمريوم..
تلاتة طرقات انجاز والله يا بنية..


___
ويا جماعة رأفة بناس نزار حسين ديل
ما تجهجهوهم بالـ short cuts الكتيرة واختصار الخطوات..
الجماعة ديل صامدين معانا هنا.. قليل من الرحمة (-:

والله يا نجوان اعتقد انه ناس نزار دي اتجهجهوا مما بدا البوست ده... جوع شديد.. العجب لما جات ليك شوربات سمارت...

بعدين يختي القرقريبة دي خفيييييييييييفة.. يعني ما تتم ليها خمسة جرام.. تقّلوا شوية.. قولوا الصاج الذهبي

كمان يا نجوان ومريم ما تصعبوها شدددديد كدة..
التخرج ابو عواسة دة لسه ما قرينا مقررو...

سلامات نزار حسين

Quote: يا سمارت,,,التلاتة كبابي شوربة دجاج دي شنو؟؟؟ أجيب دجاج...وأغليه لما يبقي شوربة..؟؟؟ أكياس الشوربة الجاهزة ؟؟؟ مرقة ماجي أعملها شوربة؟؟؟

معليش على قصر النظر بتاعى ده.
طيب ..لما اقول شوربة دجاج بكون قاصده انك تجيب حاجه اسمها chicken stock. ممكن يتعمل فى البيت. و هو ذى الفكرة اللى قالتها رجاء ... بس دى كانت لحمة و هى انك تجيب اللحمة و العضام و تسلقهم (بي شوية) بهارات. لكن لحسن حظنا انك ممكن تشتريه جاهز. فى انواع كتيرة ..لو (ذيي كده ) و خايف على صحتك ممكن تختار نوع فيه ملح اقل و دهن اقل.
دى صور لبعض الانواع



الحل التانى ان تجيب مرقه مكعبات ....ذى ماجى و تشوف بتتعمل كيف (كمية المويه للمكعب الواحد)و تعلملهاو تستعملها.

لو لاحظت الصناديق الفوق دى واحد مكتبوي عليه Stock و التانى مكتوب عليه Broth . الفرق بينهم ان الاول عباره عن لحمة و خضار و بهرات مسلوقات. التانى لحمة و (احتمال خضار) بس. و انا حقيقى بستعمل اللى بيقع فى ايدى فيهم.

احنا يا سمارت لسه ما جابوا لينا الstock ده.. وكل ما اشوف rachel ray تعملوه، اتغاظ.. لانه فعلا بسهّل حاجات كتيرة.. ووقت كتير.. بس انا بعمل العادي بالعظام، واخته في الفريزر.. واستعمله

بنات أمي إزيكن
ياخي بوست ما حصل
مريوم و أنا قد نطلع ليكم إنتاج مطبخي مشترك في الأيام القليلة القادمة(:(:(:(:
ودي هدية لمحبات التزيين و الأكل بالعين

جاااااااااااية
محبتي
لنا

سلام يا مريم
وما شاء الله ع البوست المحترم دة
بالله 3 صفحات؟!!
غايتو اكيد ولازم ح ألقى لي فرقة اقراهو ولو بالتقسيط المريح
لكن كفتح خشم كدة مشيت توووش ع الصفحة التانية ، متعة بالجد
وبامانة كدة ركزت ع مداخلات سناء خالد اصلها عاجباني والليلة عجبتني زيادة ومداخلة الدعوة بتاعتها ديك كسرتني عديييل كدة، بالجد بحس انها صاحبة بيت انيق وراقي من كلو!!
تسلمي ياعزيزتي وليك ولكل الايدي الشاركتك هنا تعظيم سلام

حاسبي يا سمارت نحن في العالم التالت
زي الصناديق دي لو وصلتنا حا يبيعوها
كهدايا...اعياد ميلاد

لنا مهدي... والله نوّرتي ... كده بس... نطبخ جنس طبيخ.... منتظرين الوصفات، والله عارفاك طبّاخة يا ام الوليد...

شيماء.. مرحب بيك... اقري بمزااااااج وتعالي لينا راجعة.. منتظرينك تدينا شوية وصفات بالله... انا استفدته كتير من البوست ده...

وصفة سريعة spaghetti لزيييييييز.. لكن لازم يتقدّم طوالي... انا بعتبرها من الcomfort food... لما أعملها معناها "مدبرسه"... الوصفة الاصلية كالآتي:
spaghetti رفييييع.. (الوصفة ما بتقول كده، بس انا بحبه كده)
كريمة (او قشطة)
جبنة بارميزان
فلفل وملح
زيت زيتون يكون نوع سمح بالله EVOO ياقول Rachel
عصير ليمون وقشره (انا بفضل الليمون الاخضر الاسمه lime


نخلي السباجيتي يستوي عادي.. بعداك نصفية من الموية، لكن ما نغسله... في الصحن الحناكل فيه، نكب المقادير كلها مع بعض، ونحرّكها.. بعداك نضيف ليها السباجيتي وهو حار.. ونحرّكه معاها وناكله.. وانتهينا ههههههههههههه

انا بحب الsour food جداً ... والاكله دي انا فترة كده ادمنته عليها .. لسهولتها.. لكن ما تسألوني عملت فيني شنو بعداك...

في منها نسخة أخرى... شفتها في التلفزيون.. .بإضافة بيضة... بس ما جرّبتها، ولا عايزه احاول زاتو...

شكلها بكون كده تقريباً


بعداك بقيت اعمل منها وصفة اسرع كمان.. بستخدم النودلز (ما بتاخد زمن في النار) ومعاها ملعقتين من جبنة كيري الجرّة pot

وبعداك زيت زيتون وبارميزان.. ومبروك الpounds على قولة ساره علي

البيت بيتكم يا اخوانا...

سمارت مفروض يكون عندك هسة صباح الخير مش؟

معليش أنا في حاجات كتيرة بتفوتني مرات لأني بأكتب باستعجال..و السيستم بتاع الكمبيوتر (أو يمكن بتاع المنبر) ما مساعدني بالمرة..

Quote: بينى و بينك انا لما اكون عازمه اجانب اهم حاجه المحشى ...لكن زوجى (الله يديه العافية)لما يسالوا ده اكل سودانى ..بيقول ليهم (لا)....و لما اغالط ....بيقول لى المحشى سودانى فى الخرطوم بس. المهم ..احنا فى كل عزومه بنتغالط قدام الضيوف فى الموضوع ده. الحاجه التانية البسيطه هى انى بحمر ليهم سمك بس ببهار سودانى.. شمار و كزبره و توم و فلفل و ملح.....

تعرفي أنا بأقيف في صفك في الحتة دي.. المحشي صحيح انو طبق منتشر في معظم الأقطار العربية بس أفتكر انو في الأصل تركي.. أو يوناني..لكن كل ناس بيعملوه بيقدموه على انو خاص بيهم.. و ما أفتكر في زول غلطان ..لأنو بالبهارات و الطعم..بيختلف من بلد للتاني.. و حقيقي مع عشرتي لعرب كتيرين خليجيين و مصريين و شوام..ما لقيت زول بيعملو بالطعم بتاعنا..و في البيوت السودانية ممكن تلقي واحد أطعم من التاني..لكن في نكهة مشتركة لا تتكرر لدى سوانا!
برضو الطعمية و الفول.. يعني نحن بنعمل الطعمية بطريقة مختلفة عن كل الشعوب التانية.. المصريين بيعملوها بالفول المقشور.. و الشوام بيعملوها بالحمص أو الكبكبي زينا.. لكن بيضيفوا ليها بيكربونات بدل البيكنج باودر..عشان كدا بتاعتهم دايماً لونها أسود و شاربة زيت!! غير كدا أفتكر نحن الوحيدين البنضيف ليها شمار أخضر..
و برضو نحن الوحيدين البنطعم الفول بزيت السمسم و الشمار الناشف
بعدين ياخي المحشي دا ما في الخرطوم بس..أنا و الله من فتحت عيوني على الدنيا لقيتو عند أهلي (في قرى الجزيرة) في ..بس ما تسأليني فتحت متين..:))

قيمة البطاطس دي كنت متخيلة انو كل الجنسيات بتعرفها.. و بصراحة استغربت لما عرفت انها جديدة على الشوام و المصريات المعاي هنا و حبوها جداً كما هي و بدون تحريف لكن حرفتها مرة بالصدفة في يوم كنا مجتمعين مجموعة أمهات و كل واحدة مفروض تجيب طبق.. عملت قيمة البطاطس و قلت أوديها ..قبل ما أطلع قلبي قال لي ضوقيها..لقيت ملحها زايد
اتلفت ما لقيت بطاطس زيادة أخفف بيها الملح .. طوالي عملت ليها صوص بيشاميل ملحو منخفض و كبيتو فوق الصينية..و رشيتو على خفيف بجبنة و أديتها 10 دقايق في فرن حار..
ما حأقدر أوصف قدر شنو المثل بتاع (رب ضارة نافعة) لفق في الحتة دي ..أول حاجة عجبت الناس جداً و تاني شيء ريحتني لروحي دي لأني كنت بأعمل صينية الخضار بالبيشاميل كمية و أنواع من الخضار مقلية و طبقات فوق بعض..و محشية باللحمة المفرومة..تحتها بيشاميل و فوقها بيشاميل..!! عملية طويلة و معقدة..هسة طوالي بأعمل قيمة بطاطس على السريع و من فوق ليها البيشاميل..الأولاد مسمينها قراتان البطاطس Potato Gratin و هي أكلتهم المفضلة!

عملت الشوربة يا سمارت..و هبّبت في حاجتين..كبيت الرز كتير..على حس انو مطبوخ جاهز اتخيلت اني مفروض أختو كتير و لا ما عارفة قلبي قال لي شنو!!
و كترت الليمون بالغلط..شغل ما كان منظم.. مع اني في الأول ظبطت مقاس الشوربة..but it's one of those days
جيت عشان أصورها ..لقيت اني من أمس ناسية الكاميرا مفتوحة و بطاريتها نازلة..(عايزة اسمايلي المكزز أسنانه داك)
بالرغم من كدا الطعم بالنسبة لي أنا كان لذيذ جداً ..و أكيد حأعملها تاني خاصة انها سهلة جداً جداً.. بس حألتزم أكتر بالوصفة و الرز اللي يتسلق في الشوربة..
بالنسبة للأولاد هبة و هديل حبوها جداً.. و حسن و أبوه اضطريت أضيف ليهم شوية سكر يخفف من الحموضة بتاعة الليمون

الحسنة الوحيدة (الارتكبتها) بدون قصد اني عشان أصورها زينتها بLemon Balm
و نكهته مع طعم الليمون في الشوربة بيخليني أكون عايزة أجربها تاني في الأسبوع دا و أضيف ليها في آخر مرحلة مع البيض و الليمون chopped Lemon Balm

____________________________________________________________________________________

هالة..ممكن أصاحبك... عشان توديني تعرفيني على خالتو.. ياخي أنا بأموت في الناس الخبرة..و بأكون عايزة أعرف منهم الصغيرة قبل الكبيرة..ربنا يخليها ليكم و يديها الصحة و العافية يا رب

_____________________________________________________


مريم ياخي أخجلت تواضعي و الله ...شكراً ليك على كل التعليقات الحلوة..بس خليني أجيك بمهل لأنو الدنيا عندنا هسه نص الليل ..و عايزة أكتب ليك كلام كتيييييييير

_____________________________________________________

نجوان ..تسلمي انت و يسلم ذوقك..أنا مرات صبّابة..و خاصة بعد فترة صمت طالت و فترة صمت تقترب..لكن محتاجين نكتسب منك خبرات و انت واضح أنك فارسة لا يشق لها غبار في ساحة المطبخ .. فما تحرمينا رجاء

_____________________________________________________

شيماء..شكراً ليك شديد على ثنائك اللطيف.. بس أنا ما قدر ما كلماتك صورتني.. زولة بسيطة و يا دوب بأتعلم.. بس يمكن مرنة بتأقلم بسرعة, و بحب أطور نفسي و أتعلم الجديد دائماً..

مودتي..

____________________________________________________

يااااا لنا..لي ساعة بأكتب في المداخلة دي رجعت شوية لقيتك دخلت المطبخ..

هلا و غلا..بأم الوليد

Quote: ما حأقدر أوصف قدر شنو المثل بتاع (رب ضارة نافعة) لفق في الحتة دي ..أول حاجة عجبت الناس جداً و تاني شيء ريحتني لروحي دي لأني كنت بأعمل صينية الخضار بالبيشاميل كمية و أنواع من الخضار مقلية و طبقات فوق بعض..و محشية باللحمة المفرومة..تحتها بيشاميل و فوقها بيشاميل..!! عملية طويلة و معقدة..هسة طوالي بأعمل قيمة بطاطس على السريع و من فوق ليها البيشاميل..الأولاد مسمينها قراتان البطاطس Potato Gratin و هي أكلتهم المفضلة!

عندي حاجتين بعملهم كتغيير في الاكل... الباشميل، والبطاطا المهروسة... ومعاهم جبنة، وعلى الفرن... اكلتك دي مرّه عملتها برضه لمصقّعة... كانوا جاييني ضيوف، وعملته ليهم مصقّعة... بس الظاهر قطّعته الأسود شرائح ارفع من العادة.. خفتها تقوم تدوب مع التسبيكة الاخيرة.. قمته عملته معاها بطاطس... ومن فوق ليها بشاميل من النوع ابو كديس (مع قشطة)... ومن فوق عملته ليها موزيريلا.. والفرن ...

كانت اكلت الموسم

مريوم والجميع الظريفين.. ســـلامات

عارفة نفسي مقصًرة.. طبعا يا جماعة لقيت مريوم كاتبة لي في حيطتي بتاعت الفيس بوك تسأل مني..

أنا موجودة بس غرقانة في طبيخ غير.. لوووووول

أكيد اكيد جايكم بشوربات ما تخرًش الميًه.. لكن سنوية بأكلاتها الملونات دي عقًدتنا عديييل..

غايتو كان عملت لي أكلة إلا أنتظر امشي لأستوديو العريس في القاهرة عشان يطلًع لي الصورة مية مية:)))))


وبالمناسبة دي أعلن إنضمامي لحزب العدة الختييرة.. أمي بعد شويتين حتأجر مخزن أو شقة تانية للعدة البقت أكتر من الناس:)))
الحلو إننا قاعدين نعمل (كووردنيشن). مثلا لما راوية تجيب طقم، بهاء بيجيب ليهو الـ (إكسيسوريز).. وهدى الكبايات....الخ.
لما مشيت المانيا. غطستا في سوق العدة. بهاء شافني بتمًن في طقم ملاعق وشوك وسكاكين. حلف قال لي ما بتشتري من اي مكان حتى ولو بألف يورو. لازم نمشي لمدينة شنو كدا ما عارف. العملو فيها السيوف بتاعت نابليون. تصدقوا!!!
(طبعا عشان نتبوبر للضيف البيكون بياكل بيهم بإنه الحديدة دي حفيدة حديدة نابليون..ههههههههه)

بالهنا ليكم/ ن ولكل القراء

رجاء العباسي.. والله ضحكته ضحك لما قريت انك كتبته ليك في حيطك... الترجمة مرات بتكون ألز من الحقيقة.. ههههه بالمناسبة السعيدة دي، امس اكتشفته انه محمود ولدي رسم لحبوبة (جدارية) في الحيطة بتاعت السلّم... وحبوبته الكانت بتعاني مع اخوي مروان زمان لما كان صغير، ورسم الحيط، حسيتها الموضوع على قلبها زي العسل!! ناديته وشاكلته.. قام كالعادة قال لي "ما تكورك"... قلت ليه لي إنت تعمل كده.. قال لي "عقاب" (يعني هاتي من الاخر)...

منتظرينك .. افضي لينا سريع

اها يا سناء وهالة جيتكم بالاكيدة..

الكبيبة البعملا بعملا بابسط المواد..
ومن هسه مافي واحدة تسألني من المقادير..حاستعمل مفرادت (خمشة) و(نتشة)و(حبة) وحاجات زي دي والتقدير ليكم بعد داك...
ويا ناس هواري ونزار ركزوا الاكلة دي حلوة وسااااهلة..
المواد:-
لحمة مفرومة
رز
خمشةبقدونس
بهارتكم المفضلة
مصرة عصير ليمون
بيض
حتة صلصة
توم مفروم نتشة ونص
زيت تحمير

بجيب لحمة مفرومة وببوخا في النار بس ما لدرجة النجاض ..
وبنجض لي رز والكمية ما تكون كتيرة..واهم حاجة الرز يكون مفلفل ما مديدة..فهمتوني يا العزابة؟؟
يعني الرز علي اللحمة المفرومة يكونوا متساااوين..بمعني اللحمة ما اكتر من الرز والرز ما اكتر من اللحمة..فهمتوني؟؟
بنشل اللحمةالمفرومة من النار يعني لحمة مفرومة شبه منجضة وبختها في صحن واسع مع الرز ووبضيف كل البهارات المفضلة لي وفي خلطة بهارات شامية الايامات دي شايفاها في المطبخ لونها اصفر زي العصفر (ما تحرجوني وتسالوني من اسمها) المهم تتبلوا الخلطة دي بالبهارات البتحبوهامع توم مفروم عشان النكهة وكدة ..البصل ما بفضلوا لانو مع التحمير بيحمر هههههه ..انا بضيف ليها برضو حبة ليمون وصلصة (نتشة) وبقدونس او شمار مفروم..بعد داك بجغمسهم مع بعض بي يدي وبعد داك بجي بدورا زي ما بدور الطعمية..يعني اتخيلوا نفسكم بترموا في طعمية الفرق انو قبل بعد ما ادورها اقراص بغطيها بالبقسماط...(عيش ناشاااف) في الوقت دة بجيب لي بيض وبضربوا بمعلقة عادية..بقوم ادخل القرص بتاع الكبيبة في البيض وارميهو في الزيت..اهم حاجة الزيت يكون علي نار هااااادئة والزيت يكون ما كتير وما شوية..اتصرفوا في قصة الزيت دي..تختوااقراص الكبيبة بعد تغطيتا بالزيت في النار الهادئة لمن يبقي لونا دهبي وتنشلوها في ورق مطبخ..عشان الزيت وكدة..
بعد داك تختوها في سرويس وتزينوها بالطريقة البتفضلوها...


ــــــــــــــــــــــــــــــــــــــ
ولو حصلت ليكم اي مضاعفات ما تطلعوني انا السبب..تكونوا كترتو من الخمشات والنتشات

Quote: احنا يا سمارت لسه ما جابوا لينا الstock ده.. وكل ما اشوف rachel ray تعملوه، اتغاظ.. لانه فعلا بسهّل حاجات كتيرة.. ووقت كتير.. بس انا بعمل العادي بالعظام، واخته في الفريزر.. واستعمله

مــــــــــــاسمحة يامريم
يو ديدنوط ميس ايت
مابريدها خالص واحسن تعملي شوربتك براك حتى لو ماجي بس
لانها فيها ريحة وطعم كدا إحنا مامتعودين عليهو

بالمناسبة بتعذر شديد عشان مشغوليات عجيبة كدا
لكن جاية ولغاية ما أجي تحية لسناء وعمايلها
مميزة ياخ

راوية ازيك... والله!! وانا حالتي كنت زعلانه.. لا خلاص خليني في البسوي فيه ده.. انا حتى ماجي ما قاعده اجيبها.. بعمل عظام الدجاج.. لكن تاني بسوي بتاعت اللحمة حقت رجاء...

انت مشيتي وين... عايزين لينا شوربة

ساره علي... والله عجبتيني ... لكن الصور الصور الصور... منتظرين بالله .... هي شكلها سريعه خالص.. وظريفة.. لكن للناس الزيي كده البزيدو pounds من نقطة موية، يخلوا بالهم... ما عندك وصفة كفته low carbs؟

سنوية،

Quote: هالة..ممكن أصاحبك... عشان توديني تعرفيني على خالتو.. ياخي أنا بأموت في الناس الخبرة..و بأكون عايزة أعرف منهم الصغيرة قبل الكبيرة..ربنا يخليها ليكم و يديها الصحة و العافية يا رب

و أنا موافقة يا ستى،
و لو إنك ح تستخدمينى كبرى،،

لكن زى ما قلت ليكى،
متعودة،،،،

مريومة،،
أنا شخصيا بستعمل ماجى عند الحوجة (الماسة)،
لكن بفضل شوربة الدجاج (المفرزنة)،،،،

يا سرورة،
لكن الوصفة عندك،،،
مريحة راحة،،،،،
ما قصرتى،،
فضل بس تدوقينا،،،،،،


الله يديكم العافية،،،،

شكرا شكرا شكرا,,
بس لو سمحتو ما تستغلوني هههههههههههههههه


اها اتحنفشتا وحاكتب ليكم تخريمات

تخرينة (1)
لو حصل وانو الفرن اتملا دهون وصعب تنضيفو قومو رشو ملح بالجنبات وولعو الفرن حبة..القصة دي بتخفف في نظافة الفرن

تخريمة(2)

ودي بخص بيها العزابة للتخلص من رائحة البصل..ممكن تستخدموا قشرة ليمونة معصورة مع ملح وتدعكوا بيها يدكم..وبرضوا سمعتا بي قشر البصل ذاتو الفوق فوق تلموا وتحرقو وتختو يدينكم في دخانو..سمعتا الاخيرة دي وجربتها مرة وما تسالوني النتيجة كانت شنو؟؟ لكن بركز علي الليمون اكتر..






وما(إيلك) الا سارة

Quote: ودي بخص بيها العزابة للتخلص من رائحة البصل..ممكن تستخدموا قشرة ليمونة معصورة مع ملح وتدعكوا بيها يدكم..وبرضوا سمعتا بي قشر البصل ذاتو الفوق فوق تلموا وتحرقو وتختو يدينكم في دخانو..سمعتا الاخيرة دي وجربتها مرة وما تسالوني النتيجة كانت شنو؟؟ لكن بركز علي الليمون اكتر..

سرورة.. الكحة ولا صمة الخشم ..




والله يا حبيبات إن شاء الله يوم شكركن ما يجي ..إستفدنا موووت ..لأنو أصلا طلعنا قاعدين


سااااي ..



يا مريوم.. بوست زس العسل ..




سناء خالد أنت معلمة كبيرة وفنانة فنانة ..



ـــــــــــــــــــــــــــــــ




المساعدة بالصفقة برضو ما بطالة صاح ؟

من الوصفات البحبها اعملها للضيوف، او حتى للبيت هي الكريب باللحمة المفرومة أو مع التونة...(دي ما وصفة سريعة، بس ممكن تجهيزها قبل يوم)... وصفتين مختلفات... لكن خلونا نتكلم عن الكريب...طبعا وصفته بتشبه البانكيك.. انا بستخدم وصفة سهلة وما بتتنسي

كوب حليب
كوب دقيق
بيضة
وحبة ملح

الحلو في الوصفة دي انه لو عايزه ادبّل الكمية، ساهل جداً... نضرب البيضة براها وبعداك نضيف الحليب والدقيق.. ما بحتاج ضرب شديد.. بس تكون الخلطة متجانسة...في طوّه، نكب حبّة زيت زيتون.. والطوة مفروض تكون حارة نسبياً... وباستخدام كمشة صغيرة نملاها مرّه واحده.. مع تحريك الطوة عشان يتوزّع.. انا بستخدم طوّه صغيرة.. بعد ما ننتهي نجهّز الحشوة..
نجي للحشوة... في نوعين.. لحمة مفرومة، نحشي بيها.. ونلفها اسطوانية... ونرصّها في الصينية... انا برصّها بحيث الجزء البنّي يكون لي فوق عشان الشكل يطلع حلو... بعداك في طوة بكب ملعقة سمنة او زبدة.. ومعاها توم وخل وصلصة... وبعداك بكبها فوق الكريب.. وبغطيها، وادخلها الفرن عشرة دقايق بس.....
الحشوة التانية، تونة... بعمل نفس الشي (في طوة بكب ملعقة سمنة او زبدة.. ومعاها توم وخل وصلصة) ومعاه التونة عشان التونة تكون طريه ما ناشفة... وبحشي بيها، وبعمل نفس الصوص من فوق للبانكيك.. بتطلع نكهة جميلة جداً

شكلها بطلع زي كده...


اثناء ما بفتش لصورة ممكن تشبه الوصفة دي.. لقيت شكل عجبني شديد.. ممكن اعمله المرّه الجايه.. شكلها ظريف... طبعا الربطة واضح إنها بي الجزء الاخضر، من البصلة الخضراء

داليا حافظ...

Quote: يا مريم بوست زي العسل

من ذوقك بس يا ذوق.. ورينا جرّبتي شنو.. وعجبك شنو.. عشان انا في كم حاجه عايزه اجربها لما امشي بيتي ان شاء الله

مساكم خير..


رجاء ..راوية ..داليا..

تسلمو يا جماعة دا بس من ذوقكم و الله.. و شهادة منكم أعتز بيها لأني عارفاكم بتتكلمو من واقع خبرة و دراية .. بس ربنا يجمعني بيكم يوم و أضيفكم (كلكم يا ناس البوست)..و الوقت داك أكان الطعم طلع ماااا زي الشكل..بأعمل ليكم فيها سارة علي و أحملكم المسؤولية..
__________________________________________________

سارة.. شكراً ياخ..أكتر حاجة على دمك العسل..بعدين على الوصفة..لكن القياس ما عندك! أكتر حاجة عجبتني مصرة الليمونة..


__________________________________________________

مريم معليش اتأخرت عليك..أنا ما قدر الأستذة لكن ممكن تقولي تلميذة مجتهدة:))

قبيل قعدت أفتش على صور كنت حافظاها لخطوات سلطة الأسود لأني صورتها مرة و رسلتها لواحدة ((تركية)) بين أربعة أقواس لأنو دا معناها السلطة دي مية المية سودانية..(المصريات برضو ما اتعرفو عليها) .المهم ..لا لقيت الفايل..و لا لقيت نسخة الايميل لأنو كان طول شدييييد..

المهم حأكتبها ليك بسرعة و متخيلة انك تكوني بتعرفيها أولريدي بس يمكن ناس تانيين (بالذات الرجال العزابة) يستفيدوا منها..لو لقيت صور الخطوات بنزلها تاني إن شاء الله..

هي زي ما انت سميتيها سلطة الأسود المطبوخة ..و أمس كان وقفت ليكم عند نقطة انو بتواجهني دايماً مشكلة عويصة مع الأكلات السودانية..!!..ألا وهي التسمية!!

يعني شفت المكرونة دي عند الايطاليين عندها كم اسم؟ مع انه زي ما قلت كلها في النهاية Pasta!!

هسة أنا فكرت انو لو فتحت لي مطعم..أو ألفت كتاب طبخ سوداني (أحلام زلوط:))) أكتب المنيو كيف؟

سلطة أسود بالخل و التوم
سلطة أسود بالزبادي
سلطة أسود بالطحينة
سلطة أسود بالدكوة
...

قراصة بدمعة دجاج
قراصة بالتقلية
قراصة بالملوخية..

عليك الله يا مريم شوفي لما تترجم بالانجليزي أو أي لغة تانية..بتبقى موضوع انشاء مش اسم

يعني يعني شوفي صوصات الاسباجيتي.. بدون ما توصفي جواها شنو..من اسمها المشهور الناس بتعرف مكوناتها..مارينارا و كاربونارا و أرابياتا... و هلم جرا!!

أها أنا نفسي تبقى اسماء الأكلات السودانية قصيرة.. مقطع واحد..و ما عندي أي مانع نسمي مع بعض....

جربتو البانوفي..banoffee
http://en.wikipedia.org/wiki/Banoffee_pie
أها الانجليز قطعوا كلمة بنانا و توفي و بقوها بانوفي.. ينفع نسمي الأسود بالدكوة ..أسكوة؟؟

أي حاجة بس المهم اخترعوا لينا أسماء يشيلوها الناس سهلة!!

الأسكوة...:)))))

كيلو أسود ..مقشر و مقطع شرائح عرضية و ليست طولية. (التقشير ضروري)

علبة طماطم (استعيضوا عنها بملعقتين كبار صلصة إن لم توجد)

ملعقة كبير دكوة

شمار ناشف و توم و ملح و فلفل.. ليمون حسب الرغبة

قطعي الأسود و ملحيه و اتركيه نصف ساعة أو أكثر

في هذه الثناء ضعي علبة الطماطم في قليل من الزيت النباتي على النار.. (أو الصلصة تشوح قليلاً في الزيت ثم بعد ذلك إضافة كوب و نصف ماء إليها)
تترك الطماطم على نار هادئة لمدة ساعةيباً و نضيف عليها ماء بين فترة و أخرى حتى لا تحترق, أثناء طهيها نضيف التوم و نتركه لينضج معها..نريد أن نتخلص من طعم الحموضة الذي يميز الصلصة أو الطماطم المعلبةوما عايزين طعم التوم يكون ظاهر شديد فلازم نخليه ينضج

حمري الأسود..و جففيه من الزيت و ضعيه على صلصة الطماطم..دعيه ينضج معها على نار هادئة جداً و نقوم بهرسه فيها..

نضيف الدكوة و البهارات..و نترك الملح للآخر..حتى نتأكد أننا نحتاج أن نضيفه (نحن قبيييل كنا مملحين الأسود)

نتركه لمدة خمسة دقائق على نار هادية مع التقليب المستمر لأن الدكوة سريعة الاحتراق..

نتخلص من الزيت الزائد لو وجد..

و بالهنا...



Gotta go for now,be back in shaa Allah tomorrow,Sorry for writing in a hurry

سناء ازيك... والله انا بحب سلطة الاسود بالطريقة دي بصورة ما تتخيليها.. لكن يا الحرقان استعد ...

غايته حأعملها بكره، ماما اشترت ليها اسود كتير...

ألف شكر يا سناء على إثرائك للبوست ده.. انا متأكده انه في ناس كتاااار بدعو ليك

سناء...


انتي مشروع استثماري خطيررررررر عندو كرعين..


شكرا شدددددديد علي الاكلات الحلوة,,, اريتك كنتي مرة اخوي..كان استغليتك استغلال وعملتا ليك شغل الحموات وعلي حس اليابان اقلبك(اوشين)..

ما شاءالله..

ـــــــــــــــــــــــــــــــــ
عندك اخوان؟؟