عــصــر،، تــحــيــة زروق ..

عــصــر،، تــحــيــة زروق ..


01-06-2010, 08:25 AM


  » http://sudaneseonline.com/cgi-bin/sdb/2bb.cgi?seq=msg&board=260&msg=1262762757&rn=0


Post: #1
Title: عــصــر،، تــحــيــة زروق ..
Author: محمد سنى دفع الله
Date: 01-06-2010, 08:25 AM

في زمن تحية زروق ،،
كانت بدايتي ..
تعلمنا على يد جيل الرواد ،،
للفن الجميل ..
المرأة نصف المجتمع ،،
وتحية زروق ، نصف المسرح السوداني ..
وفي مقولة اخرى ، المسرح كلو...
لكم احبك ايتها الفنانة النبيلة ...[/
B]

Post: #2
Title: Re: عــصــر،، تــحــيــة زروق ..
Author: إسماعيل حميم
Date: 01-06-2010, 08:50 AM
Parent: #1





محمد السني
يا جميل
وجميل الذكريات

أنا كنت من المتابعين للمسرح في ذلك الزمان بشغف

يا حليل أيام زمان والعودة من المسرح لي بيت المال "كداري"
عبر شارع النيل

مرفق:
كل الود

إسماعيل حميم


.

Post: #3
Title: Re: عــصــر،، تــحــيــة زروق ..
Author: فيصل محمد خليل
Date: 01-06-2010, 08:58 AM
Parent: #2



مصـنع العـمـالقه والـرواد

واصـل قريبــى

Post: #4
Title: Re: عــصــر،، تــحــيــة زروق ..
Author: عبدالأله زمراوي
Date: 01-06-2010, 09:02 AM
Parent: #3

الفنّان الجميل الوفي السني...

سوف أحجزُ لنفسي مقعداً هنا، سيما وأن المحتفى
بها جارتي العزيزة لأكثر من عقد من الزمان....

سأعود بين حين وآخر لأتحدث عن تحية الإنسانة والمرهفة،
البسيطة المتواضعة....

Post: #5
Title: Re: عــصــر،، تــحــيــة زروق ..
Author: فيصل محمد خليل
Date: 01-06-2010, 09:03 AM
Parent: #4

دا انا انت يا محمود


تحية زروق في احدى مسرحياتها





ازيك يا قريبي يا مستلب

Post: #6
Title: Re: عــصــر،، تــحــيــة زروق ..
Author: عبدالله شمس الدين مصطفى
Date: 01-06-2010, 09:37 AM
Parent: #5

تحية زروق رائدة مسرحية، وسينمائية أيضاً،
فمن ينسى عينا نعمة الواسعة الجميلة فى معالجة
خالد الصديق لرواية(عرس الزين)، الدور الذى
أدته تحية بجدارة لازمت كل أعمالها التى عرفناها.
التحايا لتحية، نموذج الشابة السودانية لذلك الزمن
الحلو، والتى نجحت هى فى ترسيخها فى عقل وعين
معجبيها وجمهورها الذى يقتله الظمأ إلى أدائها، حركتها
وصوتها الندى المشبع بألق الإبداع والفن.
تصورت ان يتم تكريمها بدلاً عن الكثيرين الذين لا
يستحقون التكريم، وبرغمٍ فقد نالوه دون جدارة أو
إستحقاق.

التحية لتحية زروق، ولك يا سنى.

Post: #7
Title: Re: عــصــر،، تــحــيــة زروق ..
Author: Osama Mohammed
Date: 01-06-2010, 10:01 AM
Parent: #6

الاستاذ محمد السني وجميع المشاركين
تحية طيبة ....

ارسل لي صديق سعودي - كويتي العام الفائت هذا الكليب وهو مقتطفات من لقاء مع المخرج الكويتي خالد الصديق يحكي فيه عن تجربته في عرس الزين بس زمن الكليب بسيط جداً ..

التحية للممثلة العظيمة تحية زروق اينما كانت والتحية لكل آل زروق


Post: #8
Title: Re: عــصــر،، تــحــيــة زروق ..
Author: ALGARADABI
Date: 01-06-2010, 10:04 AM
Parent: #6

التحية والاحترام لجيل العمالقة

تحية زروق(أنا نفسك يا محمود)
حمدنا الله عبد القادر(اللسان المقطوع)
مكي سنادة (خطوبة سهير وعشة أم رشيرش)
حسن عبد المجيد(قطر الهم)
هاشم صديق (نبتة حبيبتي)

واسمح لي أخي السني أن أحيي عبر البوست أخي الذي لم تلده أمي أمير محمود وزوجته شيراز تحية زروق

ونشكرك على الوفاء لأهل العطاء

Post: #9
Title: Re: عــصــر،، تــحــيــة زروق ..
Author: محمد الجزولي
Date: 01-06-2010, 10:19 AM
Parent: #8

التحية للمرأة التحية

تحية زروق ..




ــ
واصل أرمي حلو الدُفيق ياسني
ولك عزيز المحبة ..






ـــ
خارج النص
أنت في السودان؟

Post: #10
Title: Re: عــصــر،، تــحــيــة زروق ..
Author: محمد سنى دفع الله
Date: 01-06-2010, 10:34 AM
Parent: #9

محمد السني
يا جميل
وجميل الذكريات

أنا كنت من المتابعين للمسرح في ذلك الزمان بشغف

يا حليل أيام زمان والعودة من المسرح لي بيت المال "كداري"
عبر شارع النيل

مرفق:
كل الود

إسماعيل حميم
شـــكرا جــــمـــيلا
بعد تصل من مشوارك الكداري
نلتقي عشان احكي ليك ,,
مودتي ومحبتي

Post: #11
Title: Re: عــصــر،، تــحــيــة زروق ..
Author: محمد سنى دفع الله
Date: 01-06-2010, 11:45 AM
Parent: #10

كتب السنينمائي
الفنان عبدالرحمن نجدي :

تحية خاصة الي ( الأسطورة ) تحية زروق و رفيقاتها ،

أسجل في كل عام بعضا من خواطري عن المسرح في السودان حينما تأتي مناسبة اليوم العالمي وفي العام الماضي كتبت شيئا بعنوان ( إعلان عن مدينة ) و المدينة كانت هي امدرمان ، و ما كتبته كان مجرد مشاهد من الذاكرة أشبه بالسيرة الذاتية المبتورة ،
امدرمان التي أثرت و تأثرت بحركة المسرح ، أمدرمان التي أنجبت سيد عبدالعزيز ، الخليفة يوسف الحسن ، بابكر بدري ، العبادي ، خالد أبوالروس ، حسن عبدالمجيد ، ميسرة السراج عبدالوهاب الجعفري ، أبراهيم حجازي ....... ومن رحم هذه المدينة المبدعة جاءت ( تحية محمد علي زروق ) وغّير حضورها المميز كل القناعات القديمة ،

كنا طلبة دراما –
انا و محمد السني و تحية زروق وكل الوجوه المعروفة اليوم في المسرح السوداني ، و كانت تتملكنا رغبة هائلة – و ربما غير قابلة للتحقيق في تغيير العالم و تبديل شروط الحياة ( و النتيجة ثلاثتنا خارج حدود الوطن نجتر ذكريات الزمن الجميل )

تحية خاصة لكل المبدعات السودانيات اللواتي اقتحمن مجالا كان صعبا حتي للرجال :

سارة محمد ، آسيا عبالماجد ، تحية زروق ، نعمات حماد ، نادية جابر ، فتحية محمد أحمد ، فايزة عمسيب ، نفيسة محمد محمود ، رابحة محمد محمود ، آسيا ربيع ، تماضر شيخ الدين ، سعاد محمد الحسن ، ناهد محمد محمود ، زكية محمد عبدالله ، حياة حسن ، فوزية صالح ، سمية عبداللطيف ، نادية بابكر ، عفاف احمد ، مني عبداللطيف ، سعاد محمد الحسن ، سامية عبدالله ، ناهد حسن ، سوسن دفع اللة ، نور الشام محمد عيسي ،

تحية مكررة للأستاذة والصديقة و الزميلة الفنانة تحية زروق .. وسأكتب لكم عن تجربتي معها و أتمني ان يكون هذا ( البوست ) فرصة لكل الذين عاصروها و عملوا معها ان يدلوا بدلوهم حتي نجمع عنها ملفا يليق بتجربتها

Post: #12
Title: Re: عــصــر،، تــحــيــة زروق ..
Author: محمد سنى دفع الله
Date: 01-06-2010, 11:49 AM
Parent: #11


الفنان عبدالرحمن نجدي
والفنانة تحية زروق
في لقطة من فيلم
تم تصويره في لندن
من تاليف واخراج نجدي

Post: #13
Title: Re: عــصــر،، تــحــيــة زروق ..
Author: محمد سنى دفع الله
Date: 01-06-2010, 11:56 AM
Parent: #12

قريبي فيصلو
مودتي ومحبتي
تحية فنانة
رائعة الدواخل
ابهجتنا بادوارها البديعة
وطلتها البهية
ليك المودة وتابع معانا
تحية الفنانة الخلابة

Post: #14
Title: Re: عــصــر،، تــحــيــة زروق ..
Author: Mohamed Abdelgaleel
Date: 01-06-2010, 12:45 PM
Parent: #13

السنى الفنان .. لك ألف تحية

ولا يحدثك مثل خبير .. ما كان
والحاصل الآن ..

ماذا حدث؟!

وهل من عودة تاني أم هي مستحيلة؟!

Post: #15
Title: Re: عــصــر،، تــحــيــة زروق ..
Author: ابو جهينة
Date: 01-06-2010, 01:03 PM
Parent: #14

أبو النسب
تحياتي

ولا يحدثك مثل خبير .. ما كان
والحاصل الآن ..

ماذا حدث؟!


شرحو تماما

Post: #16
Title: Re: عــصــر،، تــحــيــة زروق ..
Author: محمد سنى دفع الله
Date: 01-06-2010, 01:22 PM
Parent: #14

اخي الشاعر المرهف
عبد الأله زمراوي
ياسلام بك نغطي المساحة الأخرى لفنانتنا تحية
في البلاد البعيدة
وكيف عاملة في غربتها التي نزحت ايها من خلال سفلا الجفا
مودتي ومتابعينك
ومنتظرين افادتك
محبتي

Post: #17
Title: Re: عــصــر،، تــحــيــة زروق ..
Author: محمد الجزولي
Date: 01-06-2010, 02:43 PM
Parent: #16

Quote: تحية خاصة لكل المبدعات السودانيات اللواتي اقتحمن مجالا كان صعبا حتي للرجال :

سارة محمد ، آسيا عبالماجد ، تحية زروق ، نعمات حماد ، نادية جابر ، فتحية محمد أحمد ، فايزة عمسيب ، نفيسة محمد محمود ، رابحة محمد محمود ، آسيا ربيع ، تماضر شيخ الدين ، سعاد محمد الحسن ، ناهد محمد محمود ، زكية محمد عبدالله ، حياة حسن ، فوزية صالح ، سمية عبداللطيف ، نادية بابكر ، عفاف احمد ، مني عبداللطيف ، سعاد محمد الحسن ، سامية عبدالله ، ناهد حسن ، سوسن دفع اللة ، نور الشام محمد عيسي ،

تحية مكررة للأستاذة والصديقة و الزميلة الفنانة تحية زروق


وتحية مكررة لهن

ولي سلمى الشيخ سلامة (أم عروستنا)


Post: #18
Title: Re: عــصــر،، تــحــيــة زروق ..
Author: BitAlhana
Date: 01-06-2010, 03:10 PM
Parent: #17

يا اخوانا الزول ما ينوم معاكم
بسسسسسسسسسسسسسسسسسسم الله


و الله لي مده كدي خاته أستاذه تحيه في قائمه اهتماماتي
و كلمتها قلت ليها انا ح اعمل معاك لقاء و انشره في سودانيز اون لاين
و رحبت بي الفكره

اها امبارح بليل كدي قمت خمشت لي كم اسم قلت انزل بيهم البوست
و قلت خلااااااااااااس يا بت الهنا انتي ح تكسري الدنيا
(ده نا ح ادغدغ الدنيا يمه)
و قفلت على كده
و نمت و انا بحلم انه حسن فضل المولى و معتصم الجعيلي بيفتشوا في تلفوني
عشان الانجاز ده
و قمت كده صنقعت و سرحت انه محمد السني دفع الله اختارني لي بطوله مطلقه
وحات الله جنس احلام
غايتو يا أستاذ محمد الفيك اتعرفت


التحيه للاستاذه تحيه زروق ..... النجمه المتألقه ... المعطاه
حبيبيتي هي و صديقتي ... بزورها في بيتها و بحس اني صاحبه البيت و هي الضيفه
من كرمها الفياض و تلطفها معاك
استاذه تحيه ليكي كل الحب و الود


استاذ السني الصور مااااااااااااافي ليك

Post: #19
Title: Re: عــصــر،، تــحــيــة زروق ..
Author: محمد سنى دفع الله
Date: 01-06-2010, 03:19 PM
Parent: #18

بت الهنا الرسول فوقك
خصمتك بي الايام البيضا
ما البوست ده والله حقك
ما هو لمن انت كنت نايمة وبتحلمي انا جاني حلمك
مش في التخاطر بتبقى الارواح شفيفة
اها شفيت الحلم منك
وانا اسف
بلا نزلي لينا الصور
وعليك الرحمن سلمي عليها
وقولي ليها
محبة في الله
تغطيك العافية
وتبقي لينا
منارة لي تاريخنا الأبداعي ياتحية زروقياست الفن كلووو
مودتي ومحبتي

Post: #51
Title: Re: عــصــر،، تــحــيــة زروق ..
Author: أسماء عبدالسلام
Date: 01-12-2010, 10:32 AM
Parent: #19

استاذ السني سلامات

لية دائما بنقول ياحليل زمان ؟
وياحليل الزمن الجميل ؟؟

لية ما بنقدر نكون زي الجميلين ديل ؟
البمنع شنوووو ؟؟؟

--------------------

التحية ليك ولتحية زروق

"مدنية"

Post: #53
Title: Re: عــصــر،، تــحــيــة زروق ..
Author: Mirghani Ali AlAmin
Date: 01-12-2010, 11:49 AM
Parent: #11

أخي الأستاذ الفنان محمد السني دفع الله

ذكرك لبعض الرائدات في عالم المسرح والتمثل في السودان أعاد إلى ذهني أياماً جميلة وشخصيات رائدة حبيبة، وبهذه المناسبة أود أن أسأل عن الأستاذة أمينة عبد الرحيم والتي تعرفت عليها في أول يوم ذهبت فيه للتلفزيون لتقديم نفسها كممثلة وفنانة كبيرة قديرة ، وفعلاً ظهرت في تلك الأيام الجميلة في بعض الأعمال كفنانة قديرة ولكنها فجأة أختفت منذ فترة طويلة جداً .
أود السؤال عنها إذا كان لديك أخبار عنها .
وقد أفتقدهاالمسرح والإذاعة والتلفزيون السوداني كثيراً ، وأفتقدناها نحن الجمهور ، لعل الداعي خير ، ولعلها بخير وعافية.

Post: #20
Title: Re: عــصــر،، تــحــيــة زروق ..
Author: walid taha
Date: 01-06-2010, 03:24 PM
Parent: #1

الفنان محمد السني لك التحية
جيلكم جيل يصعب تكراره أعطى الكثير ،ووضع بصماته بقوة فى خارطة الدراما السودانية
جيل معجزة قياساً بإمكانيات ذلك الوقت.
أنتم تستحقون التكريم


خضّر الله ضراعكم،،

Post: #21
Title: Re: عــصــر،، تــحــيــة زروق ..
Author: محمد الجزولي
Date: 01-06-2010, 03:36 PM
Parent: #20

محمد السني

شنو الحكاية


أنت داير تعمل فيها رايح ولا شنو ؟

عندنا عندك رد قبل البعدنا ولة شنو ؟



عليكم الله فترنا من جنس الفطَطان ده !!!!



!
!

Post: #22
Title: Re: عــصــر،، تــحــيــة زروق ..
Author: BitAlhana
Date: 01-06-2010, 03:42 PM
Parent: #20

والله ياأستاذ السني ضحكت ضحك
الله يديك العافيه

احلى حاجه (انا اسف)
مع احترامي ليك و لي فنك .... اها اسفك ده اسوي بيه شنو بعد ما النجوميه طارت مني
و احلامي بقت هباء منثوراااااا
احي يا بنات امي ... استغفر الله


غايتو الله كريم علي


خلاص عشان حلفتني بي الايام البيضاء و بي كل الالوان
انا بمشي عليها و بحدثها بي حديتكن ده كلللللللللللللللللله

و بخمش ليك الصور و الصقهن ليك هنا

قصرت معاك؟





بي كورنر كده:

بوردعامل زي السودان
اصلان ماممكن تعمل فيه مشروع حضاري

Post: #23
Title: Re: عــصــر،، تــحــيــة زروق ..
Author: محمد سنى دفع الله
Date: 01-06-2010, 10:03 PM
Parent: #22

محمد السني

شنو الحكاية


أنت داير تعمل فيها رايح ولا شنو ؟

عندنا عندك رد قبل البعدنا ولة شنو ؟



عليكم الله فترنا من جنس الفطَطان ده !!!!
محمد الجزولي اسفي
الفططان غير مقصود ولكن بت الهنا
عايز تزوق بالصور والحكايات العندها لي تحية
حصلناها واهي ماشة لي تحية وحتجيب لينا الأحبار
بنعتذر سامحونا ونرجع للصف وعدم الفط
مودتي

Post: #24
Title: Re: عــصــر،، تــحــيــة زروق ..
Author: أبوبكر حامد الأمين
Date: 01-06-2010, 10:21 PM
Parent: #23

Quote: وتحية زروق ، نصف المسرح السوداني ..
وفي مقولة اخرى ، المسرح كلو...
لكم احبك ايتها الفنانة النبيلة ...


وكم نحب فيك هذا الوفاء يا سنى ، عقب إنتهاء المحادثة الهاتفية ليلة أمس والتى بشرت فيها بهذا البوست وأنا مرابط أمام الكمبيوتر فى الشغل وفى البيت ، لم أجده فى البدء وبدأت أستحضر كلماتك وأحاول التذكر ، يا ربى السنى قال البوست فى سودانيز ولا فى منتدى ودمدنى ، وهنا وجدته بعد عناء وبحث نسبةً لكثرة البوستات هنا ، لك التحية يا سنى ولأحلام وهبى الزقازيقية الرائعة ، فلتتحد الصفوف لدحر بدر الدين الأمير وموظفته المنقبة .

Post: #25
Title: Re: عــصــر،، تــحــيــة زروق ..
Author: محمد سنى دفع الله
Date: 01-06-2010, 10:23 PM
Parent: #23

اخي العزيز وغالي
عبدالله شمس الدين مصطفى
لك التحيات والأمنيات النضيرة
يا اخوي كلامك عين العقل
لابد من تكريم الفنانة الشفيفة
تحية زروق
لابد من جمع كل صغيرة وكبيرة عن فنانتنا
ورصد تاريخ مجدها وجمعه في كتاب
بجانب عمل توثيقي لها من خلال فيلم تسجيلي
وعمل سهرة عنها
وجمع كل اعمالها
وعمل تكريم يليق بها كفنانة رائدة
ونحن في استديو ســـودانوي
يمكن ان نعد العدة لهذا الحدث
يدكم معانا
مودتي

Post: #26
Title: Re: عــصــر،، تــحــيــة زروق ..
Author: Osman Musa
Date: 01-07-2010, 00:03 AM
Parent: #25

الفنان الماهل
محمد سنى
سلامات
وكل عام وأنت فى خيرين .
النجمة تحية لها التحية .
انا برضو بحبها .
فى العصر داك كانت خارقة وعجيبة .
كانت سيدة المسارح .
كانت تطلع فى غلاف اشهر مجلتين فى البلد .
مجلة الشباب والرياضة ومجلة التلفزيون .. صور رائعة .
.. لها التحية .
ولك الشكر يا أستاذ محمد

Post: #27
Title: Re: عــصــر،، تــحــيــة زروق ..
Author: Dr. Salah Albashier
Date: 01-07-2010, 01:29 AM
Parent: #26

يا حليل زمن تحية
دمت أخي الفاضل

Post: #28
Title: Re: عــصــر،، تــحــيــة زروق ..
Author: محمد سنى دفع الله
Date: 01-07-2010, 05:28 AM
Parent: #27

اخي اسامة محمد
تحية فنانة مثقفة
ومطلعة وعاشت وسط عمالقة الأدب والثقافة والفنون والتراث
ولها موهبة مصقولة بالدراسة وتجارب رعتها بعناية منذ الطفولة
لهذا تركت ادوارها التي مثلتها اثرا عميقا في نفوس الناس
مثلت دور بنت القرية في عملين مختلفين ، وكانت ساحرة في طرحها الخاص الفني في اداء بنت القرية
البنت الوديعة في مسلسل قطر الهم ـ هاشم صديق
وفي دور النعمة ـ الطيب صالح ـ عرس الزين
كانت تحيةتتؤام مع الأدوار بسهولة وعمق تحسسك ان الدور خلق لها
فلنجتمع من اجل تحية
لنصدر كتابها الأول

Post: #29
Title: Re: عــصــر،، تــحــيــة زروق ..
Author: محمد سنى دفع الله
Date: 01-07-2010, 06:29 AM
Parent: #28

القرضابي اخي العزيز
تحية نضرة
التحية والاحترام لجيل العمالقة


تحية زروق(أنا نفسك يا محمود)
حمدنا الله عبد القادر(اللسان المقطوع)
مكي سنادة (خطوبة سهير وعشة أم رشيرش)
حسن عبد المجيد(قطر الهم)
هاشم صديق (نبتة حبيبتي)

واسمح لي أخي السني أن أحيي عبر البوست أخي الذي لم تلده أمي أمير محمود وزوجته شيراز تحية زروق

ونشكرك على الوفاء لأهل العطاء
معاك نرسل التحايا لأخيك واخونا امير محمود ولبنتنا شيراز
ولك عاطر التهاني
ونتمنى ان تدعم مقترحات نجدي بعمل توثيق كامل لفنانتنا الشامخة تحيةزروق

Post: #30
Title: Re: عــصــر،، تــحــيــة زروق ..
Author: مبارك السروجي
Date: 01-07-2010, 06:43 AM
Parent: #29

الاستاذ/ السني .. لك وحشة والله

وكل عام وأنت بالف خير..

تبقى تحية زروق إحدى الرائدات اللاتي يجدر الإحتفاء بهن.. كانت شامخة في زمن كانت فيه النساء يتوارين ويخشين الاضواء.
الشكر لك وأنت تسلط الضوء على الأستاذة تحية زروق .. فالوفاء من خصال الأصيلين.

كل المودة

Post: #31
Title: Re: عــصــر،، تــحــيــة زروق ..
Author: عبدالله الشقليني
Date: 01-07-2010, 09:48 AM
Parent: #30




المسرحي الباهي زيقو :
الأستاذ : محمد سني دفع الله
تحية واحتراماً

أذكر الراحل الدكتور علي البدوي حينما أزهر المسلسل الإذاعي الناجح ( الدهباية ) منذ زمان ، ورأى أن تصبح مسرحية ليكُن النجاح أفضل ، ولم يتم اختيار الفنانة تحية زروق للمسرح ، وحسب رأي الدكتور :

( الدهباية دي بِت صفرا.... ، ولا تصلُح تحية زروق لتمثل" الدهباية " في المسرح ) !!

رجاء تفضلاً إفادتنا عن الموضوع ، كمختص في ذات الموضوعات ، لنعرف هل كان كاتب النص
مُحقاً ، أم مُتجاوزاً حدوده ،

وتقبل من الشُكر أجزله .

عبدالله الشقليني




*

Post: #32
Title: Re: عــصــر،، تــحــيــة زروق ..
Author: عادل عبدالرحمن
Date: 01-07-2010, 12:35 PM
Parent: #31

حبيبنا يا السني

وتحيّة .. فاكهة المسرح ، والدراما الإذاعيّة ..

يا سلام ، كنا بنحضن "الرادي" عديل - كان نمسك صوته !

تعرف ، قبل كم شهر كده كان معانا خطاب حسن أحمد ،
في يوم من الأيام فتح تليفونو وانتبذ مكاناً قصيّا ..
القصة طوّلت ومشت على الساعتين ،
ونحنا كل مرّة نكورك :
- يا خطاب شنو ، ما نحنا مشتاقين ليك ..
- يا خطاب انعل أبو التلفونات .. لمّن ترجع بلدكم اتكلم زي ما إنت عاوز ..
- يا خطاب .. يا كتراب ..

وزولك عندو إجابة واحدة : ( يا أخوانا بس دقيقة أنا جاييكم ) !
ويرجع يضرب الغفلة هبّاعي ..

أخوك زعل ، ومشيت ليهو وقلعتَ منو التلفون :
- إنت بتتكلم مع منو ؟!
- كان شاطر أعرف براك ..

وأتاني صوتها - من صقيع كندا إلى زمهرير تكساس ،
فنزل عليّ ( برداً وسلاما ) منعشا الذاكرة والروح والتراجيديا .. فهتفت :
- توحة !
- إنتَ منو ؟ ( وأخوك يهضرب ) معقول عرفتني من صوتي ؟! ( وأخوك يهضرب ) لكين من سنة 90 متلاقينا
عرفتني كيف ، وكلّهم كم يوم في مدني !

وهي ما عارفة حاجة سايْ ، ما عارفة كنا بنهضرب بيها قبل سنة تسعين ، بى كم سنة ؟!!


الكم يوم ديل كانو أيام عرض مسرحيّة ( دنيا صفا .. دنيا انتباه .. ) ،
أيام أن عرفنا "تحيّة" عن قرب ـ الإنسانة ، فائقة الرقة والعزوبة واللطافة ..

Post: #33
Title: Re: عــصــر،، تــحــيــة زروق ..
Author: عبدالله شمس الدين مصطفى
Date: 01-07-2010, 12:46 PM
Parent: #32

Quote: وهي ما عارفة حاجة سايْ ، ما عارفة كنا بنهضرب بيها قبل سنة تسعين ، بى كم سنة ؟!!


لكن هى داب هضربة يا عادل؟؟!!!!
وأوع تقول لى كم يوم مدنى دىل كانوا بتاعين عرض مسرحية الجرح والغرنوق(السكة حديد قرّبت المسافات) ؟؟!!
يا لذاكرتك الأنثوية يا عادل، لا تلوح تنّورة إلآ وتنتعش كما النبات على الضفاف.

Post: #34
Title: Re: عــصــر،، تــحــيــة زروق ..
Author: عادل عبدالرحمن
Date: 01-07-2010, 12:49 PM
Parent: #33

الكلام تحت :

Post: #35
Title: Re: عــصــر،، تــحــيــة زروق ..
Author: عادل عبدالرحمن
Date: 01-07-2010, 01:51 PM
Parent: #34

Quote: وأوع تقول لى كم يوم مدنى دىل كانوا بتاعين عرض مسرحية الجرح والغرنوق(السكة حديد قرّبت المسافات) ؟؟!!


نعم ،
يا عبد الله شمس الدين -
مسرحية : "دنيا صفا .. دنيا انتباه .."
هي التي أخذها عبد الله علي إبراهيم من نصّيه الرائعين : "السكة حديد قرّبت المسافات .. وكثيرا " و "الجرح والغرنوق"  ،
كانت تجرّبة مسرحيّة فذّة ، وفارقة في مسار العمل المسرحي بالسودان ..
تخيّل عمل يكون في طليعته :
مكي سنادة ، تحيّة زروق ، خطاب حسن أحمد ، تماضر شيخ الدين ، مريم محمد الطيّب .. وماعارف تاني منو ( لعن الله الذاكرة ) وألمع طلبة قسم الدراما في ذلك الزمان ..
يؤدي أغانيها : مصطفى سيد أحمد وآمال النور !

لولا أنّها عُرضت بعد انقلاب "الجبهة" البغيض ،
كانت بروفاتها ، والتحضير لها ، قد بدأت قبل ذلك بأشهر ..
وكان أن "اشتريت" أنا حق عرضها الأوّل بمدينة ود مدني ، قبل أن تعرض بالخرطوم ،
فأدخلتني في تجربة عويصة ( قدّت جيبي ) لولا سماحة المنتج : ( عثمان أوماك ) الذي تحمّل عني عبئا كبيرا من الخسارة الماديّة ،
التي نجمت عن قلّة الخبرة : عرضناها وامتحانات الشهادة السودانية شغالة .. ( شفت كيف ) ؟!
وبرغم ذلك شهدت العروض اقبالا كبيرا ..
يا زول يكفي أن طلعنا بمشاهدة "تحيّة" عينك عينك ،
الباقين طبعا كانوا صحبانا من زمان ، ما عدا العميد : "مكي" - طبعا .

تحيّة وتماضر ومريم عملوا حاجة عجيبة : صعدوا إلى "حافلة" الدعاية وطافوا بها المدينة وهنّ يدعون الناس لمشاهدة العرض ..
والناس ، بين مصدّق ومكذب ، يتصايحون : هيْشوف دي تحية .. دي تماضر .. دي مريم ..

ويومها ، وبمناسبة مرور ذكراه التي لا تغيب ، أصرّ مصطفى سيد أحمد أن يؤدي الأغاني مع آمال النور حيّة على المسرح - رغم مرضه وانهاكه الشديد وقتها..
برغم من أنها مسجلة على أشرطة كانت ستفي بالغرض ،
إلا أنه أبى ، إلا وأن يشارك ذاك الزخم جوقته !

كان جمعا قلّما يجتمع تحت راية عمل واحد ..


كانت خمسة أيّام .
 

Post: #36
Title: Re: عــصــر،، تــحــيــة زروق ..
Author: عبدالله شمس الدين مصطفى
Date: 01-07-2010, 02:53 PM
Parent: #35

أذكر تلك الأيام جيداً، كأنها البارحة، أو كأنها خميس هذا اليوم.
وعلى ذِكر الباقى مصطفى، أذكر(إن لم تخنّى الذاكرة) أن تجربة
عمل الموسيقى التصويرية الحية على خشبة المسرح تلك كانت
تجربته الثانية من بعد عروض مسرحية (ضو البيت) على خشبة
مسرح قاعة الصداقة فى العام 1986، وقد إرتبطت تلك الذكرى
فى ذهنى لأنها تزامنت مع مهرجان الشباب بموسكو، فقد كنّا أنا و
الصديق ياسر عبد الوهاب قد إبتدرنا نقاشاً مع الباقى مصطفى
حول مشاركته فى المهرجان إلآ أنه قال لنا، وبالحرف الواحد بأن
المهرجان سوف لن يضيف شيئاً جديداً له، وبأن (وقته ضيق)،
يريد أن يوظفه فى توثيق الكثير من أعماله، بجانب أنه مرتبط
هذه الأيام بعمل رائد ألا وهو عمل موسيقى تصويرية حية لمسرحية
ضو البيت التى كانت تعرض فى تلك الأيام.
شفت كيف يا عادل أننا نمشى إلى الوراء، فى كل شئ، وبأن
أيامنا الشامخات قد أعطتنا ظهرها من بعد أن أدارتها لنا الأشياء،
وقلبت لنا الأيام (ظهر المجن).

هى بعض الشجون يا نديم الزمن الحنون.

محبتى العاتية

Post: #37
Title: Re: عــصــر،، تــحــيــة زروق ..
Author: عبدالله شمس الدين مصطفى
Date: 01-07-2010, 02:57 PM
Parent: #36

أذكر تلك (الّلزمة) " منّ الليلة يقيف دق الدليب"

Post: #38
Title: Re: عــصــر،، تــحــيــة زروق ..
Author: عمر علي حسن
Date: 01-08-2010, 05:10 PM
Parent: #37

الاخ الفنان العظيم محمد سني دفع الله

ملأت الدنيا عبقا بذكرك لأسطورة المسرح تحية زروق .. حبيبة الناس كلهم أيام كان للمسرح القومي جاذبية لايفلت منها الا غافل او غائب ..
بنت الاسرة الكريمة التي خرقت المألوف وأسبغت علي التمثيل احتراما بشخصيتها الجاذبة للمحبة والاحترام

كنت صديقا لإخويها محمود وصلاح وتلميذا محبا لاخيها مبارك .. أحببتها معهم .. وكانت هي موضع فخرهم ..

ورايتها علي الخشبة وهي تجذب الضوء والانتباه وتركزهما عليها حتي في حضرة الافذاذ مثل مكي سنادة ويحي الحاج وقد كان حضورها متسلطا عارما ..
ثم غبنا وغاب عنا الاحبة وغابت هي ضمن ناتج (الطرد المركزي) .. وكنت دائما اتساءل بلا هدي عن مكان وجودها وهل فيه من مسرح وخشبة ..
لعن الله الغربة فكم ضيعت من جمال وصبغت بالشيب أرواحنا ووجداننا وحبستنا بين جدران مكتب وبيت..

لك الشكر استاذنا الفنان فقد انتزعت من حدائق المنبر زهرة تجاورها وتزاورها .. فاطلب منك ومنها ابلاغ تحياتي المتأخرة زمانا لتحية ..

اما التكريم فهي اكبر منه ولكنها ستظل مكرمة أثيرة عند جمهورها وجمهور مسرح الفكي عبدالرحمن ..

عش سالما لتتذكر وتنعش أرواجنا المنهكة

عمر علي حسن

Post: #39
Title: Re: عــصــر،، تــحــيــة زروق ..
Author: مدثر قرجاج
Date: 01-08-2010, 07:20 PM
Parent: #38

استاذ السنى
لك الود

تحية زروق مبدعه بقامة وطن تحتاج ان نتوقف عند ابداعها
كثيرا ونوثق لها كى يعرف الجميع كم هى ممتلئة بالجمال
والموهبة...
مسرحية خطوبة سهير لازالت فى وجداننا تعلمنا منها كيف
نستمتع بالمسرح ونحجز لنا اماكن فى الصفوف الامامية
انه عصر الابداع فتفضل فنحن متشوقون لمعرفة المزيد
محبتى

Post: #40
Title: Re: عــصــر،، تــحــيــة زروق ..
Author: ابوعسل السيد احمد
Date: 01-09-2010, 05:32 AM
Parent: #39

الفنان الانسان..

محمد السني دفع الله.. جينا نتعلم عن هذا الجيل العظيم من فناني بلادي.. و أين هم الآن و ماذا فعلت
بهم الحياة و رياح الوطن..

.. التحية لتحية زروق .. و محبتي لك يا صديقي

Post: #41
Title: Re: عــصــر،، تــحــيــة زروق ..
Author: abuguta
Date: 01-09-2010, 05:59 AM
Parent: #40

اسى انا الخششنى معاكم شنو

كلكم مبدعين وجيل مسرحى,,يتكلم عن استاذة ورائدة لمسرح ايام الزمن الجميل
هذا الاسم يحفظه الريف الحبيب عن ظاهر القلب,,,
كل بيت وحوش ,,فى المزارع ,,مع الرواعية فى الخلا,,,اذكر كان عندنا راعى
زعلان من ابوى شهر كامل,,عشان انا ما جاب ليه جارة البطارية
لانه كان متابع مسلسل لتحية زروق,,,كان عندو رادى خشبى عامل ليه غطاء بكيس تريفيلا
زى شعار برشلونا الاصفر
انا ما بذكر متى بداءت اعرف تحية زروق,,,لكن بعرفها زى امى وخالتى
او اى مرة من نسوان الحلة,,مع انو ما حصل تشرفت بلقائها,,,

صحى الناس الزمان ديل كانو بحفروا اسمائهم فى ذاكرة الجيل
وانت منهم ياسنى
تسلم

Post: #42
Title: Re: عــصــر،، تــحــيــة زروق ..
Author: محمد سنى دفع الله
Date: 01-09-2010, 11:04 AM
Parent: #41

السنى الفنان .. لك ألف تحية

ولا يحدثك مثل خبير .. ما كان
والحاصل الآن ..

ماذا حدث؟!

وهل من عودة تاني أم هي مستحيلة؟
اخوي محمد عبد الجليل الانسان البديع
طبعا لابد من عودة وعودة كاربة باذن الرحمن
يا اخوي ذكرياتك مع تحية زروق وينه ؟؟
منتظرينك !!!
مودتي ومحبتي

Post: #43
Title: Re: عــصــر،، تــحــيــة زروق ..
Author: محمد سنى دفع الله
Date: 01-09-2010, 05:18 PM
Parent: #42

ابوجهينة
التحيات النضرة
قلتلي :

أبو النسب
تحياتي

ولا يحدثك مثل خبير .. ما كان
والحاصل الآن ..

ماذا حدث؟!

شرحو تماما
وهذا ماسوف نستعرضه هنا
تاريخ الفن الجميل
الممثلين والممثلات
وتاريخهم الحافل بالأباع

Post: #44
Title: Re: عــصــر،، تــحــيــة زروق ..
Author: هاشم أحمد خلف الله
Date: 01-09-2010, 05:59 PM
Parent: #1

التحية والتقدير لك ولها يا مبدع
كانت أيام سعيدة , ربي مناي تعيدا

Post: #45
Title: Re: عــصــر،، تــحــيــة زروق ..
Author: محمد سنى دفع الله
Date: 01-11-2010, 05:56 AM
Parent: #44

وليد طه
التحية والمحبة
تحية فنانة حتى النخاع
لها حضور جذاب
تأسرك من اول لحظة
تؤدي الشخصية بهمة وجمالية عالية
وببساطة
اها شفت بساطة دي هي مربط الفن الجميل
بتحسس اي ممثلة انها ممكن تؤدي بطريقتها
ولكن هيهات تحية حاجة تانية
مودتي ومحبتي

Post: #46
Title: Re: عــصــر،، تــحــيــة زروق ..
Author: محمد سنى دفع الله
Date: 01-11-2010, 06:27 AM
Parent: #45

تحية زروق
تخرجت في المعهد العالي للموسيقى والمسرح ـ74ـ1975
تخصص تمثيل واخراج
شاركت في العديد من التمثليات والسهرات الأذاعية
اميز اعمالها على خشبة المسرح
مسرحية : الرفض تأليف واخراج الفنان ـ حسن عبدالمجيد
العلاقة ـ عثمان علي الفكي
اللحظات الأخيرة ـ حسن عبدالمدجيبد
نبته حبيبتي هاشم صديق مكي سنادة
كلنا آدم حسن عبد المجيد سعد يوسف
العديد من الأعمال المترجمة
تحية ممثلة لامثيل لها[/

Post: #47
Title: Re: عــصــر،، تــحــيــة زروق ..
Author: محمد سنى دفع الله
Date: 01-11-2010, 06:35 AM
Parent: #46


مسرحية 6 شخصيات تبحث عن مؤلف
تحية زروق موسى الأمير عثمان جمال الدين نادية جابر

المؤلف برانديلو
المخرج عبدالحفيظ محمد احمد

Post: #48
Title: Re: عــصــر،، تــحــيــة زروق ..
Author: وليد عبد اللطيف
Date: 01-11-2010, 07:01 AM
Parent: #47

الفنان العملاق ( السني دفع الله )
كانت تقول ( التحية زروق )
انا انت وانت انا يامحمود
انا نفسك يا محمود

وهذه الكلمات سمعناها وكنا يادوب
ولم ننساها ولما ننسى كيف كانت تأثر المشاهد تحية زروق
والى ان وصلنا عهدكم مع محطة التلفزيون الاهلية وكيف كنا نتسارع لمشاهدتكم
الجميلة .
وكما قال فنانا الكحلاوي
داك زمن مابحي مين تاني البعيدو
العمر ساقو ومشابو
واللي كان .. كان وين زمان ... زمان



بوست موفق




----------------------------
الف تحية لتحية و ليك استاذ السني

Post: #49
Title: Re: عــصــر،، تــحــيــة زروق ..
Author: محمد سنى دفع الله
Date: 01-12-2010, 08:13 AM
Parent: #48

ابوبكر حامد الأمين
لك خالص التحيات
شوفت الواحد خلاص بقى مرشح للزهايمر
تجي تنزل صورة تحية في مسرحية الرفض انزل صورة احمد اسماعيل
كان بطل المسرحية وقتها
اخوي ابوبكر منتظرك على محطة ودمدني نتقاسم الخريف وايام الفنون الجميلة
ومسرح الجزيرة والليالي الساهرة للفرق الغنائية والمسرحية
وتحية زروق عرضت على مسرح الجزيرة بديع فنوننها
بل قدمت معنا عرض على ساحة مارنجان مسرحا للأطفال في الشارع
وكانت تجربة متميزة
لكم محبتي

Post: #50
Title: Re: عــصــر،، تــحــيــة زروق ..
Author: سلمى الشيخ سلامة
Date: 01-12-2010, 09:30 AM
Parent: #49

تحية زروق
اسم منحوت فى اعلى الروح
البساطةفى كل شئ
الصوت الذى ما زال يتخللنى من خلال "خطوبة سهير، زهرة النرجس"
لاول مرة اقف امامها فى مكرفون الاذاعة العام 1989
كنت فى بداية مشوارى كمخرجة
ذاك يوم باهر
تغيبت ممثلة وكان على ان اقوم بدورها
دور صغير لكنه صعب حيث كان كوميديا
كانت تحية كلما بدات الحوار تضحك وكان الفنى رحمه الله ـ على ابراهيم ـ صديقا حميما لتحية
كلما ضحكت اوقف التسجيل وجعل ضحك
ادخلتنا فى موجة من الضحك
من جانبى كنت خائفة لانى اول مرة اقف معها فى عتبة واحدة
لكنها ازالت خوفى واصبحنا فى عداد الاصدقاء
تعلمت منها ان الممثل الكبير قدوة
بتواضعها اثملتناوسكرنا بصوتهاالعذب
لكما محبتى

Post: #52
Title: Re: عــصــر،، تــحــيــة زروق ..
Author: willeim andrea
Date: 01-12-2010, 11:20 AM
Parent: #50

حكي جميل عن زمن جميل


استاذنا السني ليك وللاستاذه تحيه زروق التحيه والاجلال ( كانت فعلا سابقه زمنه بمراحل)


محبتي لك ولكل جيل العمالقه


ياأأأأه فجاء رجع شريط الذكري

تلفزيون ابيض واسود

الماركه : تليمصر

اشتروهوا الاهل من دكاكين الجامع العتيق (جامع فاروق)

وفقره منقوله من المسرح القومي

عمل راقي يجاري المسرحيات المصريه زمن ابيض واسود في الاناقه والاداء


ياسلام ياخ ذكريات منعشه


محبتي واحترامي

Post: #54
Title: Re: عــصــر،، تــحــيــة زروق ..
Author: Abd-Elrhman sorkati
Date: 01-12-2010, 01:10 PM
Parent: #52

السني يا فنان

لك التحية والتجلة وأنت تنبش ماضيا حاضرا وتنبش شخصيات ساهمت كثيرا في تكوين وجدان الشعب السوداني



Post: #55
Title: Re: عــصــر،، تــحــيــة زروق ..
Author: محمد سنى دفع الله
Date: 01-15-2010, 03:19 PM
Parent: #54


الى كل من مرة من هنا
اليه اهديه ورودي

Post: #56
Title: Re: عــصــر،، تــحــيــة زروق ..
Author: khaleel
Date: 01-15-2010, 04:52 PM
Parent: #55

سني


نحن بنحب نسمع تحية زروق في الراديو


الله علي مسلسل الحراز والمطر لما يغني عركي اخر المواني


ومسلسل الدهباية في التلفزيون

ايام خلت

Post: #57
Title: Re: عــصــر،، تــحــيــة زروق ..
Author: BitAlhana
Date: 01-19-2010, 01:25 AM
Parent: #56

الاستاذ الفنان السني
أولا ماتقول قصرت معاكم أو دقيت طناش عشان حاجه
لكن أستاذه تحيه كانت في أمريكا في اجازه قصيره


و انا اسي اتكلمت مع الأستاذه تحيه زروق
ياخي أقول ليك كلام انا بحبها شديد والله
بحبها من جوه قلبي

راقيه رقيقه جميله محترمه
عارف استاذه تحيه دي نسيج فريد
اينما حلت تحيطها هاله من الضؤ و الالق و الوقار

تاني بحبها


اتونست معاها و قريت ليها الكلام ده كلللللللللللللللللللللو

حكت لي حاجات بتموت بي الضحك
و كل ما اقرأ ليها حاجه تعجبها تقول لي يا الله .... و الله كتر خيرهم

و قالت بالحرف الواحد انه السني دفع الله فنان حلو و جميل
(ابسط يا عم)

بتشكركم كل بوردابي خط كلمه في حقها....

و الويك ايند الجاي عزمت روحي عندها شاي و ح اصورها ليكم و ح انقل ليكم كلامها كله

استاذ السني الويك ايند ما بعيد مش كده؟؟؟؟

اي زول عنده سؤال يطرحه هنا...
و انا رقبتي سداده



ياخي انا بمووووووووووووووت فيها و الله
بت الهنا

Post: #58
Title: Re: عــصــر،، تــحــيــة زروق ..
Author: محمد سنى دفع الله
Date: 01-19-2010, 06:40 AM
Parent: #57

اعذروني ايها الساده والسيدات
ان انقل تحية خاصة لبت الهنا
ونقول لها الويك اند قريب مش بعيد
وكل واحد عندوسؤال يحضروا عشان الردود سوف تكون حاضرة
لكم معذرتي وشكري وتقديري ..

Post: #59
Title: Re: عــصــر،، تــحــيــة زروق ..
Author: ايمن التاج
Date: 01-19-2010, 07:06 AM
Parent: #58

يا سلام عليك يا محمد السني
ويا سلام على عصر تحيه زروق ، عصر المسرح والدراما السودانيه الجاده والمتطوره
يا ريت ..
يا ريت ترجع كل العصور دي تاني ونشوف عندنا مسرح نرفع بيهو راسنا فوق ..
التحيه للفنانه العملاقه تحيه زروق
وليك يا السني وانت بتوثق لي عصر ما ساهل
لك الود

Post: #60
Title: Re: عــصــر،، تــحــيــة زروق ..
Author: ismeil abbas
Date: 01-19-2010, 10:14 AM
Parent: #59

أخونا وألأستاذ/محمد السنى دفع الله..

تحية زروق من ألأسماء اللامعة فى المسرح والتمثيل...أحى فيها روح التضحية ولأخلاص لهذا الفن الجميل..من مبدعات بلادى لاشك..وأخريات كثر حملنا راية الفن ...لهن التحية والتجلة..


إنه العصر الذهبى.....

لك ولها وهى فى غربتها ألف تحية وللمتداخلين...

Post: #61
Title: Re: عــصــر،، تــحــيــة زروق ..
Author: عبدالأله زمراوي
Date: 01-19-2010, 10:40 AM
Parent: #60

Quote: ياسلام بك نغطي المساحة الأخرى لفنانتنا تحية
في البلاد البعيدة
وكيف عاملة في غربتها التي نزحت ايها من خلال سفلا الجفا
مودتي ومتابعينك
ومنتظرين افادتك


ماذا أقول عن تحية الإنسانة الرقيقة المتواضعة حد الدهشة؟

وهنالك "بت الهنا"، أدام الله هناءها، والتي ستتحفنا بإجابات الفنانة الكبيرة تحية زروق
وقد وددتُ أن يكون هذا البوست محطةً بكل ما يتعلق بفنها الباذخ وسيرتها
الذاتية، ويكون مدخلاً حقيقياً لتكريمها في سودانيزأونلاين وفي كل الأسافير
السودانية، تكريماً يليق بمآثرها وبشخصها العظيم.

تحية زروق من جيلٍ يحترم نفسه كثيراً. لقد عرفتها فنانةً متواضعة وفيها من
النيل سمرته ومن النخيل شموخها. تراها فلا تملك إلا أن تنحني لها إجلالاً، تُذكرك
بماض البلاد التليد ومستقبلها إن آمنت بتكرار التأريخ، فالوطن الذي أنجب
لنا تحية، حفيٌّ وقمينٌ بحبه.

خطوةٌ عمليةٌ تعقبها خطوات يا صديقي السني لنجعل من هذا الحدث (عصر تحية زروق)
ممكناً. لجنة مصغّرة للبت في أمر التكريم ونحن من خلفها بكل ما أوتينا
من قوة، ما دامت دولة الشر لا تُكرم إلا من يتغنى بأمجادها الزائفة...

لحجنة يترأسها الفنّان المسرحي محمد السني دفع الله ومعه الفنّان الآخر
عبدالرحمن نجدي، تبدأ أعمالها من الدوحة....

Post: #62
Title: Re: عــصــر،، تــحــيــة زروق ..
Author: BitAlhana
Date: 01-19-2010, 10:44 AM
Parent: #61

خليك فوق يا البوست

Post: #63
Title: Re: عــصــر،، تــحــيــة زروق ..
Author: نجوان
Date: 01-19-2010, 10:52 AM
Parent: #61

فــوق لتكريم روادنا..

التحية والتقدير للأستاذة تحية زروّق، كم هي قريبة للقلوب!
والتحية لكل إمرأة ورجل وقّعوا على سجل الإبداع ببلادي..


______
أسفي على دولة تتجاهل صانعي فنها وتاريخها..


______
شكرا أستاذ السني..

Post: #64
Title: Re: عــصــر،، تــحــيــة زروق ..
Author: محمد سنى دفع الله
Date: 01-19-2010, 09:52 PM
Parent: #63

الأخت اسماء عبد السلام
مـــدنـيـــة
استاذ السني سلامات

لية دائما بنقول ياحليل زمان ؟
وياحليل الزمن الجميل ؟؟

لية ما بنقدر نكون زي الجميلين ديل ؟
البمنع شنوووو ؟؟؟
كلامك صاح ولكنه الحنين للماضي
كل جيل بحن لايام ولت من عمره وده لايعني ان الجيل الحالي ما لذيذ وجميل بل بالعكس
الان هناك اشياء كثيرة رائعة في اجيال هذا الزمن
وبرضو حيجي يوم ويقولوا يا سلام على عصرنا
ولك عصر ماله وبهجته
تحياتي وامنياتي لك بزمن جميل وذكريات احلى

Post: #65
Title: Re: عــصــر،، تــحــيــة زروق ..
Author: محمد سنى دفع الله
Date: 01-21-2010, 06:28 AM
Parent: #64

تكوين لجنة لتكريم الفنانة
تحية زروق
بالدوحة
يوم المسرح العالمي 27 مارس 2010
الرجاء ترشيحاتكم ....

Post: #66
Title: Re: عــصــر،، تــحــيــة زروق ..
Author: Emad Ahmed
Date: 02-22-2010, 05:00 PM
Parent: #65

1345.jpg Hosting at Sudaneseonline.com



( تحـــــــية زروق )

Post: #67
Title: Re: عــصــر،، تــحــيــة زروق ..
Author: محمد فضل الله المكى
Date: 02-26-2010, 04:49 AM
Parent: #66

:
:
:يا السني

الموضوع دا ما خِلِص!





الباقي أجمل

Post: #68
Title: Re: عــصــر،، تــحــيــة زروق ..
Author: isam elzein
Date: 02-26-2010, 04:58 AM
Parent: #67

الأستاذ ود المكى

ليتك تتحفنا بالمزيد

لك تحياتى وأشواقى

Post: #69
Title: Re: عــصــر،، تــحــيــة زروق ..
Author: احلام وهبي
Date: 02-26-2010, 05:09 AM
Parent: #68


ياسلام عليكم كل يوم تعلمونا معنى الجمال
شكرا لكم ومنتظرين ياجنرال
وليك الاماني الندية تحية زروق الفنانة التي نتمنى ان نراهافي الدوحة

Post: #70
Title: Re: عــصــر،، تــحــيــة زروق ..
Author: محمد سنى دفع الله
Date: 02-26-2010, 06:42 AM
Parent: #69

وصلتني رسالة من حبيب الروح
الدكتور عزالدين هلالي الشاعر والكاتب والممثل الذي هجر التمثيل
للكتابة يؤكد ان مخرج اللحظات الاخيرة هو الفنان الراحل المقيم فينا
محمد رضا حسين .زله الشكر على التنبيه وله محبتنا الخالصة
من المعروف ان عزالدين من انجب فناني الكوميديا في السودان
ومثل مع تحية زروق مسرحية الرفض وكانت من الاعمال التي احدثت وقتها ضحة لموضوعها وطرقة عرضها
وعزالدين مثل مع تحية العديد من الاعمال التي تنمنى ان نجعله يرصدها لنا ونستكتبه عن تحية وعصرها
خاصة بمعرفتنابالدكتور وكتاباته السسيولوجية وتناوله للظواهر الدرامية وعلاقتها بالمجتمع وتغيراته
شكرا عزيزنا عزو ولك المحبة الخالصة

Post: #71
Title: Re: عــصــر،، تــحــيــة زروق ..
Author: محمد سنى دفع الله
Date: 02-26-2010, 10:06 AM
Parent: #70


Post: #72
Title: Re: عــصــر،، تــحــيــة زروق ..
Author: Emad Ahmed
Date: 03-03-2010, 01:43 PM
Parent: #71

فرطنا من قبل في ثروتنا القومية تحية زروق

فلانريد أن نفرط في هذا البوست التوثيقي القيم ..

واصل أستاذنا السني لكي نعطيها قليلا من ماتستحقه

عبر هذا السفر الاسفيري ..

Post: #73
Title: Re: عــصــر،، تــحــيــة زروق ..
Author: وليد عبد اللطيف
Date: 03-03-2010, 02:12 PM
Parent: #72

Quote: فرطنا من قبل في ثروتنا القومية تحية زروق

فلانريد أن نفرط في هذا البوست التوثيقي القيم ..

واصل أستاذنا السني لكي نعطيها قليلا من ماتستحقه

عبر هذا السفر الاسفيري ..

صديقي عماد عثمان(موثق المنبر الكبير )
ياخي كل ما امر من هنا
لم اجد اضافة عن هذه الفنانه
فياريت تشوف لينا سحارتك
وتعمل لها c.v عن حياتة الفنية
حتى تكون مرجع للناس من هنا ممكن الناس توضعها
مايكتب عنها في ارشيفة الخاص




عماد عثمان
ان منتظر زيارتك في البيت







--------------------
تحياتي لك وللاشتاذ السني دفع الله

Post: #74
Title: Re: عــصــر،، تــحــيــة زروق ..
Author: عبد الحميد البرنس
Date: 03-03-2010, 09:10 PM
Parent: #73

لا أزال بعد في المدرسة الإبتدائية حين بدا للبعض في تلك القرية الوادعة على ضفاف النيل الأبيض أن الله خلق أشياء جميلة في هذه الحياة. الأرض البكر.. ضوء القمر.. النهر.. التمر.. حلاوة طحنية.. الحمار المكادي.. البقرة الحلوب.. سمك البلطي.. بصات ودالجردة.. بطيخ الجروف على الضفة الأخرى.. مدائح البطحاني وتحية زروق.

Post: #75
Title: Re: عــصــر،، تــحــيــة زروق ..
Author: عبد الحميد البرنس
Date: 03-03-2010, 09:31 PM
Parent: #74

لا وقت أكثر ملاءمة لمعصية الله وطاعته في آن من الوقت الذي يذاع خلاله مسلسل (الدهابية). الأنفاس تُحبس داخل الحيشان. حركة السوق تهدأ تماما. العشاق لعلهم يختلسون قضمة من فاكهة لذة القُرب المحرمة. وأفكر الآن، أي سحر تنطوي عليه موهبة في ألق تحية زروق فإذا العالم غير العالم الذي عهدناه من قبل؟.











تحياتي.

Post: #76
Title: Re: عــصــر،، تــحــيــة زروق ..
Author: Magdi Algorashi
Date: 03-03-2010, 10:52 PM
Parent: #75

الفنان الجميل محمد سني دفع الله

لك كل الشوق وانت تستحضر ذاك الزمن الجميل

والايام الجميلة وسرح الخيال وهاجت الذكري وانت تتحفنا

بتلك الجميلة تحية زروق وذاك المشوار الذي يشدو القا وذكري

فواصل حتي يكون التوثيق لكل جميل خطت قدميه ذاك الصرح الذي يدعي

المسرح .

فياريت ياعزيزي ان يعرج قلمك هذا ليوثق لنا ايضا سيرة المرحوم الراحل العظيم

العميري واصل واصل لنجعل من هذا البوست مرجع توثيقي لكل الذين اثروا حياتنا فنا وادبا وثقافة

Post: #77
Title: Re: عــصــر،، تــحــيــة زروق ..
Author: بكري الصايغ
Date: 03-03-2010, 11:33 PM
Parent: #1

ياشباب الـمنبـر،
الأخـوات الـحبيبات الـحـبـوبات،
والاحـباء الـحـبوبييـن،

***- يوم 27 مارس من كل عام ده (اليوم العالـمي للمسـرح)،وفيه كل دول العالـم بتكرم فنانات وفنانيين الـمسارح ببلادها،وكـمان بتكرم فيه العاملات والعامليين بالمسارح وبتكـرمهم تكريـم يليق بـهم وكتعبيـر عن امتنانها لما يقومون به من اجـل رفعـة فن بلادهـم.

***- ومن دلوقت تعالوا كلنا نفكر كيف نكرم اخـونا السـنـي?. قـدامنا لسه 23 يوم وقبل مايجـيينا (يوم المسرح الدولي)!!!

***- اها ادونا اقتـراحاتكـم!!!

***- لكن ولكم مـوتي الخالصـة.
***- الوردة الحــمراء لصاحـب (البوسـت).

Post: #78
Title: Re: عــصــر،، تــحــيــة زروق ..
Author: محمد سنى دفع الله
Date: 03-04-2010, 06:01 AM
Parent: #77

تكوين لجنة لتكريم الفنانة
تحية زروق
بالدوحة
يوم المسرح العالمي 27 مارس 2010
الرجاء ترشيحاتكم ....

Post: #79
Title: Re: عــصــر،، تــحــيــة زروق ..
Author: HAYDER GASIM
Date: 03-04-2010, 06:54 AM
Parent: #78

تحية إنسانة ملء الكلمة ... وتفيض.

في لجاج هجرتنا إلى كندا, وكان كل شئ
من حولنا غريب, إلا أن وجود تحية بيننا
كان أهم عوامل إستتبابنا نفسيا. وفي
معيتها أحسسنا بأننا نسترد طعم إنسانيتنا
وسودانيتنا, وكثير من معاني وجودنا. فلها
التحية.

فيما تحية أكبر من ذلك وكثيرا, فهي تاريخ
بحاله. أتمنى أن نراه موثقا ومصورا وبكل
عطاءآت تلك المرأة الفريدة.

السنى ... إديك العافية,
ولأميرتنا تحية عاطر المنى.

... متابعين

Post: #80
Title: Re: عــصــر،، تــحــيــة زروق ..
Author: maia
Date: 03-04-2010, 07:26 AM
Parent: #78

التحية للفنانة القديرة تحية زروق ولك استاذ السني
هذا البوست يحمل كمية رائعة من ملامح زمن جميل كان فيها الفن السوداني رغم قلة الامكانيات الا انه فيهو ابداع حقيقي
اسم الفنانة تحية زروق بيدخلنا في ملامح ذلك الزمن والدهباية وتلفزيون السودان ايام عزه ومجده بعيدا عن تفاصيل الزمن الحسه
والاذاعة السودانية ايام روعتها ومجدها

لكم التحية وانتم تنثرون هذا الجمال

Post: #81
Title: Re: عــصــر،، تــحــيــة زروق ..
Author: عبد الدائم سيد أحمد
Date: 03-04-2010, 10:58 AM
Parent: #80

اغنية ضنين الوعد هى اغنيتها المفضلة
لو ما مصدقنى اسألها يا السنى
قالت كده فى حديث اذاعى قديم






كانت تعجبنى جدا فى مسلسل الدلالية عندما تجد والدتها مقتولة ( السرة عوضنين )
امى .... امى ... امى سجمى مالك .....
ثم تصرخ باعلى صوتها ......
مع تكبير وتثبيت لكامل وجهها على الشاشة وتبدأ كتابة اسماء الممثلين والطاقم
الفنى للمسلسل


تخريمة :
ذكرت الفنانة فتحية محمد احمد بخفها دمهما المعهودة انا هى اصغر سنا" من تحية زروق

Post: #82
Title: Re: عــصــر،، تــحــيــة زروق ..
Author: بكري الصايغ
Date: 03-04-2010, 11:51 AM
Parent: #1

ياشباب الـمنبـر،
الأخـوات الـحبيبات الـحـبـوبات،
والاحـباء الـحـبوبييـن،

***- يوم 27 مارس من كل عام ده (اليوم العالـمي للمسـرح)،وفيه كل دول العالـم بتكرم فنانات وفنانيين الـمسارح ببلادها،وكـمان بتكرم فيه العاملات والعامليين بالمسارح وبتكـرمهم تكريـم يليق بـهم وكتعبيـر عن امتنانها لما يقومون به من اجـل رفعـة فن بلادهـم.

***- ومن دلوقت تعالوا كلنا نفكر كيف نكرم الأستاذة تـحـية زروق واخـونا السـنـي?.... قـدامنا لسه 23 يوم وقبل مايجـيينا (يوم المسرح الدولي)!!!

***- اها ادونا اقتـراحاتكـم!!!

***- لكن ولكم مـوتي الخالصـة.


Post: #83
Title: Re: عــصــر،، تــحــيــة زروق ..
Author: بكري الصايغ
Date: 03-18-2010, 10:50 PM
Parent: #1


27 مـارس : اليوم العالـمي للـمسـرح
------------------------------------

لنعمل معآ لتكريـم:
--------------------
1- الاخـت سلمـي سـلامـة،
2- الاخـت سـلمي الشيـخ سـلامة،
3- محمد سنى دفع الله.

( اتـمنـي الااكون قد نسيت اختآ او اخآ في القائـمة اعلاه ).

Post: #84
Title: Re: عــصــر،، تــحــيــة زروق ..
Author: بكري الصايغ
Date: 03-18-2010, 10:55 PM
Parent: #1

27 مـارس : اليوم العالـمي للـمسـرح
--------------------------------------
لنعمل معآ لتكريـم:

1- الاخـت سـلمي الشيـخ سـلامة،
2- الاخـت تحية زروق،
3- الأخ محمد سنى دفع الله.

( اتـمنـي الااكون قد نسيت اختآ او اخآ في القائـمة اعلاه ).

Post: #85
Title: Re: عــصــر،، تــحــيــة زروق ..
Author: بكري الصايغ
Date: 03-27-2010, 01:10 AM
Parent: #84

1- الاخـت سـلمي الشيـخ سـلامة،
2- الاخـت تحية زروق،
3- الأخ محمد سنى دفع الله.

( اتـمنـي الااكون قد نسيت اختآ او اخآ في القائـمة اعلاه ممن عملوا بالمسرح السوداني).

كل سنة وانتو طيبيين شـديد،
وألف ألف شكر علي ماقدمتموه لنا من وعي افراح ولـحظات جـميلة.
واعاد الله عليكم 27 مارس وانتم في اوج الصـحة وتمام العافية.

Post: #86
Title: Re: عــصــر،، تــحــيــة زروق ..
Author: بكري الصايغ
Date: 03-27-2010, 03:39 PM
Parent: #85

- الاخـت سـلمي الشيـخ سـلامة،
2- الاخـت تحية زروق،
3- الأخ محمد سنى دفع الله.

( اتـمنـي الااكون قد نسيت اختآ او اخآ في القائـمة اعلاه ممن عملوا بالمسرح السوداني).

كل سنة وانتو طيبيين شـديد،
وألف ألف شكر علي ماقدمتموه لنا من وعي افراح ولـحظات جـميلة.
واعاد الله عليكم 27 مارس وانتم في اوج الصـحة وتمام العافية.