Post: #1
Title: تلاجات LG اكبر خدعة
Author: محمد الامين محمد
Date: 10-14-2009, 11:56 AM
اكبر خدعة ثلاجات LG
الضمان لعام لكن في هذا العام ستذهب الي يتاع التصليح اكتر من خمسة مرات
|
Post: #2
Title: Re: تلاجات LG اكبر خدعة
Author: معتصم الطاهر
Date: 10-14-2009, 12:04 PM
Parent: #1
الاخ محمد الامين
الكلام دا فيهو دعاية و دعاية مضادة .. وكلام قانوني كبير
|
Post: #3
Title: Re: تلاجات LG اكبر خدعة
Author: مزمل خيرى
Date: 10-14-2009, 08:08 PM
Parent: #1
| Quote: الضمان لعام لكن في هذا العام ستذهب الي يتاع التصليح اكتر من خمسة مرات |
دى مافهمناها.. كيف يعنى عندو ضمان ويمشى للتصليح .؟؟
طيب فائدة الضمان شنو .؟؟
مش الضمان على الاعطال برضو .؟
:
:
:
كدى دى يفهموها كيف يامحمد ياخوى.. ممكن توضح كمان .؟
|
Post: #4
Title: Re: تلاجات LG اكبر خدعة
Author: BitAlhana
Date: 10-15-2009, 06:18 AM
Parent: #3
خبر الشوم و الروم
|
Post: #5
Title: Re: تلاجات LG اكبر خدعة
Author: haroon diyab
Date: 10-15-2009, 06:22 AM
Parent: #4
محمد الامين
سلام ياعمكـ
ده كلام شنو يازول.....؟
حسع وحاتك عندي واحدة جديدة
في الكرتونة......
اها نفتحه ونستعمله
ولا نأكل باسطة.....؟
ارجو الافادة يااستاذنا .
سلامات
|
Post: #6
Title: Re: تلاجات LG اكبر خدعة
Author: عوض محمد احمد
Date: 10-15-2009, 06:54 AM
Parent: #5
الاخ مزمل خيرى
سلام و مودة
Quote: دى مافهمناها.. كيف يعنى عندو ضمان ويمشى للتصليح .؟؟
طيب فائدة الضمان شنو .؟؟
مش الضمان على الاعطال برضو .؟ |
للاسف تجربتى مع ال جى تدعم كلام الاخ مجمد الامين
بالطبع هم بصلحوها ليك فى ورشتهم لكن تخيل كمية التلتلة و الرهق جراء عملية ترحيل التلاجة خضوضا اذا
كانت من الحجم الكبير او كنت تسكن فى شقة فى الدور الخامس و يتكرر الامر كل شهرين!
|
Post: #7
Title: Re: تلاجات LG اكبر خدعة
Author: هشام المجمر
Date: 10-15-2009, 07:01 AM
Parent: #6
ثلاجتى لم يتعدى عمرها العامين و تعطلت ثلاثة مرات فى احداها مكثت 14 يوما فى الورشة من آخر رمضان الفات و استلمتها قبل ايام
الجماعة ما قصروا لمن شالوا التلاجة جابو لى وحدة استاند باى بنصف حجم الاولى غايتو اضطرينا للتعايش معها اسبوعين
اها حسع الثلاجة كويسة و متوقع تظل كده طال ما فصل الشتاء موجود
بصراحة ما بنصحكم بيها
|
Post: #8
Title: Re: تلاجات LG اكبر خدعة
Author: Mutafa Gasim
Date: 10-15-2009, 07:32 AM
Parent: #7
حسي الثلاجة ما عندها حقوق !! وهل هي عضو في المنبر ؟ من اجل ان ترد علي الكلام ده؟و هل البنبر ده هو المكان الصحيح عشان تسأل منها ؟
مسكينة يا ثلاجة,, نكلم لها بكري يديها باسويرد تجي تدافع عن نفسها !!!
| Quote: بصراحة ما بنصحكم بيها |
|
Post: #9
Title: Re: تلاجات LG اكبر خدعة
Author: علاء الدين يوسف علي محمد
Date: 10-15-2009, 07:44 AM
Parent: #8
محمد الأمين
نصحية ليك و للعايزين يشتروا أجهزة في السودان:
التلاجات الواقفة كولدير
الراقدة ليبهر
التلفزيونات و و المكيفات الفريون و الإسبلِت و الشاشات إل جي
|
Post: #10
Title: Re: تلاجات LG اكبر خدعة
Author: البحيراوي
Date: 10-15-2009, 07:45 AM
Parent: #8
الأخ محمد الأمين وضيوفه بالبوست
تحياتي - لدي سؤال أين موقع هذا الضمان من الكرة الأرضية يعني في ياتو بلد .
حيث تجربتي من أل جي في غاية الروعة لدي تلاجة شحنتها من كوريا مباشرةً حالياً ليها تسعة سنين ما مرقت من المطبخ يعلم الله .
هل لموقع الوكيل وثفاقته العامة في قضايا الوكاله والضمان علاقة بالأمر. حيث حكي لي إخوة من كوريا ذات مرة وجدوا ثلاجة مرمية في مكان ما حول منزلهم ودخلوها وبها رقم تسلسلي فإتصلوا بالوكيل وأعطوة الرقم التسلسلي فجاءهم بعد كم ساعة صلحها ليهم وشال منهم بتاع القطعة المعطوبة فقط وتسهل. ودي كانت تلاجة أل جي.
بحيراوي
|
Post: #11
Title: Re: تلاجات اكبر خدعة
Author: Sheikh Eldin Ismail
Date: 10-15-2009, 08:12 AM
Parent: #7
سلام للجميع
ليس دفاعا عن ال LG ولكن عندى ثلاجه LG وتعمل بصوره جيده منذ 5 سنوات وفى السودان كمان
|
Post: #12
Title: Re: تلاجات اكبر خدعة
Author: ismeil abbas
Date: 10-15-2009, 09:15 AM
Parent: #11
Quote: اكبر خدعة ثلاجات LG
الضمان لعام لكن في هذا العام ستذهب الي يتاع التصليح اكتر من خمسة مرات |
ألأخ/محمد ألأمين..السلام عليكم..
قد تكون هناك حالات فردية لايمكن ان نحكم عليها..
وهذه شركة كبيرة من المؤكد أنها تخاف على سمعتها فى السوق ولا يمكن ان تكون بهذا السوء المطروح..
الحمدالله ما عندى ثلاجة ال جى..نستعمل كولدير وناشونال .....
تقديرى......
|
Post: #13
Title: Re: تلاجات اكبر خدعة
Author: ismeil abbas
Date: 10-15-2009, 09:16 AM
Parent: #11
Quote: اكبر خدعة ثلاجات LG
الضمان لعام لكن في هذا العام ستذهب الي يتاع التصليح اكتر من خمسة مرات |
ألأخ/محمد ألأمين..السلام عليكم..
قد تكون هناك حالات فردية لايمكن ان نحكم عليها..
وهذه شركة كبيرة من المؤكد أنها تخاف على سمعتها فى السوق ولا يمكن ان تكون بهذا السوء المطروح..
الحمدالله ما عندى ثلاجة ال جى..نستعمل كولدير وناشونال .....
تقديرى......
|
Post: #14
Title: Re: تلاجات اكبر خدعة
Author: هشام المجمر
Date: 10-15-2009, 09:32 AM
Parent: #13
يا جماعة الخير
شئ عادى جدا أن نتكلم عن تجاربنا مع منتج معين
العالم كله يعرف جمعيات و ثقافة حماية المستهلك إلا نحن
ما نمارسه هنا هو ضرب من نشاط غير منظم و غير منهجى يصب فى خانة حماية المستهلك
جمعيات حماية المستهلك فى الدول المتقدمة بيجيها " فيد باك" من المستخدمين و هى تعرف كيف تعمل الاحصائيات و تعرف نسبة الاعطاب و نوعها التى يمكن ان لا تتجاوز الرقم المتعارف عليه واذا تجاوزته تقوم هذه الجمعيات بالاتصال فورا بهذه الشركات وغن لم تفعل شيئا ترفع قضايا ضد الشركات فى المحاكم لذلك نسمع بين فترة واخرى ان شركة كذا و كذا سحب المنتج الفلانى من السوق لوجود عيب محدد به و آخر هذه الاخبار سحب شركة تايوتا لحوالى 4 مليون سيارة من السوق الامريكى لوجود مشكلة فنية بها.
لذلك تجد المنتجات التى تباع فى الدول المتقدمة ذات جودة مختلفة يعنى لو اشتريت تلاجة إل جى من كوريا أو من أمريكا لا يمكن أن تكون شبه الثلاجة التى تباع فى السودان لسببين:
1- فى كل الدول المتقدمة او قل المحترمة تكون هماك مواصفات فنية محددة لكل البضائع التى تدخل اسواقها خاصة السلع المعمرة مثل الثلاجات
2- وجود جمعيات حماية المستهلك التى لا ترحم الشركات خاصة الكبيرة منها
3- وجود القوانين التجارية و المدنية القوية التى تضمن تعويضات كبيرة فى حالة المنتجب المعيب و ما يسببه من حوادث او ضيق لبنى البشر مع ارتباط ذلك بشركات تأمين قوية.
عندنا فى السودان او دول المحيط انت وحظك و بس.
|
Post: #15
Title: Re: تلاجات اكبر خدعة
Author: Ali bas
Date: 10-15-2009, 10:12 AM
Parent: #14
والله أنا يا جماعة بقيف مع رأى الأخ هشام المجمر.. لكن برضو التجارب مهمة.. أعتقد أنو التلاجات المستوردة دى ما مصنوعة لجو السودان الحار ولقطوعات الكهرباء المتكررة ولذلك بيكون فيها عطل وما بتقدر تتأقلم على جونا.. والله أنا قبل 3 سنوات قررت أشترى تلاجة واقفة! (ياقول الأخ علاء الدين يوسف) وعندي مشكلة لمن ادور اشترى لى حاجة بسأل ستماية نفر عن تلاجاتم عاملة كيف..؟ أكثر زول جاوبني صاح هو واحد بتاع تلاجات فى ام درمان شارع العدني! قال لى يا ابن عمي اشترى ليك كولدير 12 قدم باب واحد.. طبعا الوقت داك بابين كولدير مافى.. ولا أعرف نوعيتها.. قال لى: والله يا خى بنتي اتزوجت قريب أشترت ليها تلاجة إل جى .. التلاجة دى بقوا ينوموها معاهم فى اوضة النوم لأنو الأوضة الوحيدة الفيها مكيف.. وما بتشتغل كويس إلا فى جو بارد.. ياخى دى تلاجات دى.. كولدير دى.. مصنوعة أسلاكها برة.. وشبكها الحديد برة.. أقل تهوية بتظبط معاك.. فى ربة منزل قالت لى: والله كولدير زيها مافى لكن فيها عيب واحد.. إنو كل مرة بتحتاج تسيح التلج بتاع الفريزة.. لأنها بتمسك تلج تقيل لمان باب الفريزة ما تقدر تفتحو أو تقفلو.. قلت بسيطة.. اشتريتها.. شغالة كويس والله.. استهلاكها للكهرباء معقول جدا.. وما فى داعي تخت قصادها مكيف.. إلا طبعا الناس بتاعين الشقق الماخمج العندهم اسبليت وكده.. العيب بتاع أنك كلو شهر شهرين كده توقفها وتسيحها ما زال فى.. لكن أعطال مافى..
|
Post: #16
Title: Re: تلاجات اكبر خدعة
Author: Tabaldina
Date: 10-15-2009, 10:41 AM
Parent: #15
..
.
Quote: التلاجات الواقفة كولدير
الراقدة ليبهر
التلفزيونات و و المكيفات الفريون و الإسبلِت و الشاشات إل جي |
LCD سامسونج وبس :)
___________
غايتو يا علاء لو عملت البيت
كلو سامسونج من الغسالة للاسبيلت
صدقنى انت الكسبان ..
|
Post: #17
Title: Re: تلاجات اكبر خدعة
Author: Ali bas
Date: 10-15-2009, 10:48 AM
Parent: #16
يا الأخ تبلدينا..
ياخي والله فى زول قال لى ال إل سي دي عامة يعني مش بتاع سامسونج براهو.. مع الجو الحار ما بينفع! قال لى أنو لأنو كريستال سائل بقوم يتجمد كده وما بيكون كويس.. أرجو أن تفيدنا بتجربتك خاصة إذا كان محل التلفزيون بتاعك ما مكندش أو عادي يعنى! بعدين ياخى أنت اشتريت كم بوصة ؟ شايف ناس سامسونج ديل عارضين ليهم واجد كده 32 بوصة وقال بألف و400 بالجديد والله أنا غلطان؟
|
Post: #19
Title: Re: تلاجات اكبر خدعة
Author: omer osman
Date: 10-15-2009, 11:01 AM
Parent: #17
Quote: محمد الأمين
نصحية ليك و للعايزين يشتروا أجهزة في السودان:
التلاجات الواقفة كولدير
الراقدة ليبهر
التلفزيونات و و المكيفات الفريون و الإسبلِت و الشاشات إل جي
|
ما كان تتمها ياعلاء الدين ........ والعربات ميتسوبيشي (لانسر/اوت لاندر/باجيرو .......الخ)
|
Post: #20
Title: Re: تلاجات اكبر خدعة
Author: Tabaldina
Date: 10-15-2009, 11:16 AM
Parent: #17
..
.
سلام يا على
Quote: يا الأخ تبلدينا..
ياخي والله فى زول قال لى ال إل سي دي عامة يعني مش بتاع سامسونج براهو..
مع الجو الحار ما بينفع! قال لى أنو لأنو كريستال سائل بقوم يتجمد كده وما بيكون كويس.. |
الشعب السودانى دا شعب .. غريب وعجيب .. وما بحب المخاطرة
ويقوم بنظر وبقطع من راسو سااى
من 3 سنوات تجى تقول داير تشترى عربية فل اتومتيك
الناس كلها تكورك فيك ؟ لا .. اوعاك .. ما كويسه .. والاتمتيك بجهجهك ..
حسي الاتوميتك مالى البلد واغلى من المانيول زاتوو
اها موضوع LCD نفس القصة ..
تجى تشتريهو يقول ليك سائل وبتجمد والكلام الفارغ دا
ودا كلام سااى ..
وانا تجربتى مع السامسونج فى التلفزيون والغسالة والLCD
وطبعا فى فرق بين شاشة البلازما وLCD ( البلازما ناهيك عن المسائل الفنية لكن عايز ليها
هوول حدادى مدادى عشان تقعد بعيد ومسافة يعى )
عموما قبل 8 شهور سامسونج كانت مقدمة اوفر
الـ 32 بوصة بـ 1800 وال 37 بوصة بـ 2200
وكان الفرق شاسع بينها وبين LG ( سعر 37 بوصة من LG بـ 3200 )
طبعا فرق شاسع واعتقد المووضوع كان موضوع تارغيت لازم يحصلو وكيل السامسونج
عموما انا خضت تجربتها السامونج 37 بوصة من 8 شهور وانت عارف جو السودان
سخانه وغبار والتكيف مش ولا بد وبصراحة معاى 4 من الشباب
وللان مافى زول اشتكى من عطل والشاشات دى حارقة تششش ..
واسمع نصيحتى وابقي على السامسونج من سعر وتكيف مع الجو وتجربة
والوان ..
_____________
بس انو 32 بوصة حسي بـ 1400 .. ما اظن
اتاكد منها يمكن سكند هاند ولا حاجة :)
|
Post: #18
Title: Re: تلاجات اكبر خدعة
Author: محمد عبدالله مختار
Date: 10-15-2009, 11:00 AM
Parent: #15
محمد الامين كيف الحال ..
والله ال جي دي ما جربتها .. لكن عندي تجربة معا ليبهر 12 قدم باب واحد .. ما شاء الله ما حصل عملت أي حركات ، بعدين ما بتجمع تلج كتير على جوانب الفريزر .. طبعاً ده ما حكم لكن دي -تجربة شخصية-
بالنسبة لتلاجات ال جي يبدو لي انو المشكلة انها ما اتصممت لجو السودان .. يعني ممكن تنفع في المناطق الفيها رطوبة وجوها معتدل او في تكييف في المنزل ، عشان كده مفترض الشركة تعمل مصنع في السودان وتكون المنتجات مصممة ومصنعة خصيصاً للسودان ، بالطريقة دي حتكون كسبت السوق واحترام الزباين .. غير كده الشركة حتغامر بي سمعته..
|
Post: #21
Title: Re: تلاجات اكبر خدعة
Author: Ali bas
Date: 10-15-2009, 12:20 PM
Parent: #18
والله يا تبلدينا كلامك صاح.. البلازما ده قالوا لى أصلو لمبة ويمكن تحرق.. لكن عايز أسألك فى غرفة 4 فى 4 كيف بتخت تلفزيون 32 بوصة إل سي دي..!! برضو داير هول كبيرة ولا شنو؟ تصور قالوا لى العربية الفل اوتوماتيك دى مشكلة لانو الأوتوماتيك جربوكس ما بينفع مع غبار السودان؟ قالوا إنو صيانتو برضو مشكلة.. حكيت لواحد عندو أوتوماتيك أكسنت قعد يضحك.. قال لى الغبار البدخلوا شنو.. أصلو غربال؟ ضحكت.. لكن والله واحدة قالت لى: أمشي مركز صيانة اسمو تبيان تلقى الأوتوماتيك دى واقفة صف ما قادرين يصينوها عشان بايظة.. ولله فى خلقه شؤون!
|
Post: #25
Title: Re: تلاجات اكبر خدعة
Author: محمد الامين محمد
Date: 10-15-2009, 12:55 PM
Parent: #14
| Quote: 1- فى كل الدول المتقدمة او قل المحترمة تكون هماك مواصفات فنية محددة لكل البضائع التى تدخل اسواقها خاصة السلع المعمرة مثل الثلاجات |
مشكلة تلاجات ال جي تاتي بعيب في التصنيع مواسير الغاز تاتي داخل التلاجة وهذا يتعارض مع الجو الحار في السودان عكس باقي التلاجات
|
Post: #24
Title: Re: تلاجات LG اكبر خدعة
Author: محمد الامين محمد
Date: 10-15-2009, 12:39 PM
Parent: #7
تQuote:
ثلاجتى لم يتعدى عمرها العامين و تعطلت ثلاثة مرات فى احداها مكثت 14 يوما فى الورشة من آخر رمضان الفات و استلمتها قبل ايام
الجماعة ما قصروا لمن شالوا التلاجة جابو لى وحدة استاند باى بنصف حجم الاولى غايتو اضطرينا للتعايش معها اسبوعين
اها حسع الثلاجة كويسة و متوقع تظل كده طال ما فصل الشتاء موجود
بصراحة ما بنصحكم |
تعرف انا اشترتيها وطلعت بايظة
مشيت لي بتاع المحل استخرج لي كرت ضمان وقال لي اضرب ليهم
ضربت ليهم مية مرة وبعد شكلة الجماعة جو شالوها
وخسرت كل مابداخل التلاجة وقتها كنت عريس كرت
بعد الف يوم و مليون تلفون قال لي تعال شيل تلاجتك من اخر بحري وقالوا الاادفع بتاع التصليح رفضت ادفع اجرت لي بوكس رجعت التلاجة
تاني خسرت
ضربت تلفون قعدو بنظروا لي خلي المفتاح الفوق في واحد والتاني في 2
يفتحالله
قال لي جيبها لينا في بحري في اخر الدنيا
طوالي مشيت لي بتاع التلاجات وجاء عمل معاينة قال المكنة ضربت احسن تشوف ليك مكنة جديدة
مشيت اشتريت مكنة جديدددددددة كرت وركبتها
بعد برضو الغار اتسرب
تاني عبيت غاز
بعدها وقفت عن التبريد
وصارت عبارة عن سخاااااااااااااااان
|
Post: #23
Title: Re: تلاجات LG اكبر خدعة
Author: محمد الامين محمد
Date: 10-15-2009, 12:26 PM
Parent: #6
Quote: للاسف تجربتى مع ال جى تدعم كلام الاخ مجمد الامين
بالطبع هم بصلحوها ليك فى ورشتهم لكن تخيل كمية التلتلة و الرهق جراء عملية ترحيل التلاجة خضوضا اذا
كانت من الحجم الكبير او كنت تسكن فى شقة فى الدور الخامس و يتكرر الامر كل شهرين! |
دة كلو حاصل علي بتاع ارفع ونزل كان جاب لي تلاجة جديدة
|
Post: #22
Title: Re: تلاجات LG اكبر خدعة
Author: محمد الامين محمد
Date: 10-15-2009, 12:24 PM
Parent: #5
Quote: محمد الامين
سلام ياعمكـ
ده كلام شنو يازول.....؟
حسع وحاتك عندي واحدة جديدة
في الكرتونة......
اها نفتحه ونستعمله
ولا نأكل باسطة.....؟
ارجو الافادة يااستاذنا .
سلامات |
اكل باسطة احسن
|
|