Post: #1
Title: مابين حلاقة المارينز عند الأمريكان وحلاقةالكاريه في قديم الزمان في السودان.
Author: سودانوبس
Date: 05-28-2003, 07:30 PM
أتاريهو.أتاريهو أبهاتنا وحدودنا..في السودان في الستينات..دخلوا العولمة والألفية الثالثة من زمان ونحنا وما جايبين خبر..هسه حلاقة المارينز دي ما ياها الكاريه أو الكاري بتاع ابهاتنا اللي كان قاعدين يحلقوها لينا زمان..بالموس ديك اللي كان يكرشوها على الجلد...وكنا نهرب منها ..ومن علاقة الكاريه.الكاريه يا جماعة العرب العاربة والمستعربة الما حاضرين زمن العز... الكاريه هو زي حلاقة المارينز هسه..يقوم به أي واحد في القرية..يعني اي واحد ممكن يكون حلاق...وهو يخرتوا ليك الشعر بتاع راسك بالجنبات كلو ويخلوا ليك الفوق مقنطر لا فوق... وبمناسبة الحلاقة نحكي ليكم نكتة الحلاقة دي...قالوا في واحد من جهة الشمال ناس الطمبور.جاهو اللوتري وقع ليهو في امريكا.. فجأة بين عشية وضحاها لكي نفسو في نيوجرسي... وبعدين مشى يحلق .زعلى حسن حظوا لقي نفسو عند حلاق من اصل عربي.. والحلاق معلق صور كتيرة لأنواع حلاقة قاعدين يحلقوها الفنانين هناك.. الولد سأل عمو الحلاق..الصور دي شني المعلقا دي.قالوا ديل ناس مايكل جاكسون وفلان وفرتكان وعلان وأنواع حلاقتهم..ديل فنانيين...قالوا طيب غذا كان ديل فنانيين..حتي نحنا بي فنانيينا هناك في الحامداب..مالنا ومال فنانينهم نحن..أحلق لي ( عيسي بروي) وعيسي بروي هذا اقرع...
المهم الكاريه وما ادراكما الكاريه.زكنا قاعدين نهرب منو..( وين بنهرب) كنا قاعدين ندور حلاقة المدينة لمان نسافر.الجماعة كان يجوا يتفرجوا فيها لما نجي من الجامعة كنا.. ويقولوا ولد فلان جاكم حالق حلاقة الصعيد بقي ما كويس.ز وطبعاً حلاقة الكاريه .كان يقعدوك فوق حجر.. والصابون يخر بي تحت إضنيك.زصابونة فنيك يدعكوا ليك بيها قفاك.زلامن مسيمعك يوجعك من قوة صابونة الفنيك الحمره.. ولازم تطلع من حلاقة الكارية بي خمسة جرحات أو عشرة.زفي نهاية الحلاقة يعملوا ليك علي الجرحات صعوط.لزوم الحلاقة والرشاقة والأناقة واللباقة.. وقميصك بتاع الدمورية يكون باظ.. ما عليك إلا أن تجري البحر تنط فيهو وفي موية الدميرة العكرة.. كنا نهرب من حلاقة الكارية كثيراً في الطفولة..من المرحلة المتوسطة.دخلنا العولمة وبقينا نحلق حلاقة الصعيد.. كريمة وعطبرة والخرطوم.زنقعد فوق الكرسي بدل الحجر.. وكلونيا الشبراويشي 555 ومريلة فوق القميص الأفرنجي.. وبخاخات وبودرة..ويفركوا ليك راسك بعد ما تنتهي الحلاقة ويقولوا ليك نعيماً. وينتظر العشرة قروش بكل أدب وتواضع.. وخلال ذلك واثناء ذلك وبينما كانت تتجول ماكينة الحلاق.. أنت تتجول ببصرك في علي جنبات الصالون في صور ناس ليلي مراد.. وفريد الطرش..وثوار 24 وعشرين.. وصورة الزعيم ازهري يرفع العلم..وصورة جمال عبد الناصر..وقهوة الفيشاوي لأننا كنا معجبين بالمستورد والمعلب... هنا كان اثناء الحلاقة تمتع نظرك بهذه الأشياء.. وهناك واثناء حلاقة الكارية.ز يا إما تمتع نظرك بي عز مطلوقة.زأو حمارة عايرة.....وأنت تحلق في السهلة على الجهات الست..شمال يمين شرق غرب فوق تحت..كلو فاتح على الإطلاق..ومافي واحدي جات شايلة قفتا ونازلة الجرف إلا سلمت على الحاج...ومافي عجوز صعوتا كمل إلا جات شالت سفة من الحاج.. وكل مرة يتوقف عنك ويقعد يحكي مع الحريم...خاصة إذا كانت فاتنة جميلة..أو لابسة توب رسالة لندن..أو توب القوات المحمولة جواً..معليش يا جماعة دي موضة زمان .بس انا موش من ناس زمان.أنا ولد أم بارح...
المهم اتاريهو ناسنا من زمان كانوا قاعدين يحلقوا مارينز..ونحنا ماعارفين... واحد عمنا هنا فى الغربة.مشي حلق..وهو راجل دقة قديمة وملتحي وجهز الشنط.. وصبحان مسافر قري الشمال.. قلتا ليهو حلقتا قال لى اي..قلتا ليهو مالك ما خليت الهندي حلق ليك مارينز...قال هه..مارينز.. والله نزلتي للبلد يقولوا حمد فضيل جنا.يمسكوني يكتفوني....وتبقي حلاقة المارينز والكاريه
|
Post: #2
Title: Re: مابين حلاقة المارينز عند الأمريكان وحلاقةالكاريه في قديم الزمان في السو
Author: Abdalla Gaafar
Date: 05-28-2003, 08:07 PM
Parent: #1
سودانوبس
يديك العافية
بعد كلامك دا كلو تقول مازول قديم يبقي لي انت من زمن يحلقو الراس كلو ويخلو شعرة واحدة(قنبور) يمشو يحلقوها في الضريح وطبعا ياخوي حلاقة الموس مع النسوان البسلمن ديل راسك يطلع مشقق ودمو كابي في النهايةلكن زي ما قلت الكاري والمارينز واحدة
عجبني البوست جدا وقرجة فوق ليك عندو مشكلة مع حلاق هندي
لك التحية
عبدالله جعفر
|
Post: #3
Title: Re: مابين حلاقة المارينز عند الأمريكان وحلاقةالكاريه في قديم الزمان في السو
Author: سودانوبس
Date: 05-29-2003, 09:32 AM
Parent: #1
هل في زول ما بيعرف حلاقة الكاريه أو ما سمع بيها
|
Post: #4
Title: Re: مابين حلاقة المارينز عند الأمريكان وحلاقةالكاريه في قديم الزمان في السو
Author: سودانوبس
Date: 05-29-2003, 09:32 AM
Parent: #1
هل في زول ما بيعرف حلاقة الكاريه أو ما سمع بيها
|
Post: #5
Title: Re: مابين حلاقة المارينز عند الأمريكان وحلاقةالكاريه في قديم الزمان في السو
Author: قرشـــو
Date: 05-29-2003, 09:45 AM
Parent: #4
الاخ سودان وبس
لك تحياتى
والله ياخى ضحكتنى ضحك اصلو ما معقول
بينى وبينك ياها الكرى ذاتها ما تقول لى مارينز ولا مايكل جاكسن
بس الاولاد ياخى زودوها حبه والله يفقعوا مرارتك بى حلاقتهم العجيبة دى امكن لانهم بدوها شوية كريمات ويجوك شعرهم لامع ومسبسب وحالته حاله
يا سلام عليك ياخى والله ذكرتنا حاجات حلوه حلوه حلوه
الله يديك العافية
مع ودى
|
Post: #6
Title: Re: مابين حلاقة المارينز عند الأمريكان وحلاقةالكاريه في قديم الزمان في السو
Author: HOPELESS
Date: 05-29-2003, 09:58 AM
Parent: #5
السلام عليكم يا ناس زمان الفوق مني ديل كلكم بلا فرز
كيفك حالكم طيبين انشاء الله صوتي مسموع عندكم
اها بس انا قلت ادخل اشوف المارينز مالون .. لقيتكم انتو بتحكو عن زمانكم الزمااااااااان داك ... وطبعا حتقولو لي اي حاجه كانت جميله وكان وكان .. حتي جوز الحمام كان تلاته
بس اهو وبعترافكم براااكم وماتصلحوها .. كنتوا بتحلقوا الحلاقه دي ليه..؟
اااااه يا بابا ليه كدا بس
يعني لو كان الزمن داك في كاميرات.. كان في مفاهيم كتيره حتتغير .. بس ربك ستر
|
Post: #7
Title: Re: مابين حلاقة المارينز عند الأمريكان وحلاقةالكاريه في قديم الزمان في السو
Author: سودانوبس
Date: 05-29-2003, 09:39 PM
Parent: #1
عبد الغفار وهوب ليس...وقرشو...أحييكم يا سادة..والله اضفتوا للقصة رونق وطعم جديد
|
Post: #8
Title: Re: مابين حلاقة المارينز عند الأمريكان وحلاقةالكاريه في قديم الزمان في السو
Author: سودانوبس
Date: 06-21-2003, 02:11 PM
Parent: #1
نسايم الشمال
وبت الحلال
الزلال
ونخيلاً دندح ومال
وعيوناً متل الريال
تعال
وكم سفر الغربة طال
حلال
بي مال بلا مال
.........
سودانوبس
|
|