بصراحة كدا...حنان بلو بلو أحلى من ندى القلعة...!!

بصراحة كدا...حنان بلو بلو أحلى من ندى القلعة...!!


04-19-2008, 06:37 AM


  » http://sudaneseonline.com/cgi-bin/sdb/2bb.cgi?seq=msg&board=160&msg=1208583431&rn=0


Post: #1
Title: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 06:37 AM



لكن صوت ندى القلعة..أحلى..!!


Post: #2
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 06:42 AM
Parent: #1



لم أشفق في حياتي على أحد..كما أشفقت على مذيعة هارموني (( هدى عمر ))...و هي تحاور الأستاذة/ حنان بلو بلو..كما كانت تناديها...
في سهرة ..كان حجم الإعلان عنها لا يتناسب على الإطلاق و ما قُدِمَ.



Post: #3
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 06:48 AM
Parent: #2



بدأت السهرة في تمام العاشرة مساءاً..تماماً كما وعدت هارموني..
إستهلت حنان السهرة بحديثها عن أصل لقب بلو بلو..ثم بدأت الغناء بصحبة فرقة وضح تماماً نظامها و ترتيبها و حسن أداءها لبروفات تقيلة قبل السهرة..
كان أفراد الفرقة في كامل أناقتهم و حُسن هندامهم..و كانت المفاجأة الجميلة هي إدخال فرقة راقصة لتصاحب الفرقة الموسيقية و حنان..
لفتة جميلة و مميزة.


Post: #5
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 06:52 AM
Parent: #3



تحية خاصة لعازف الساكسفون.



Post: #6
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 07:02 AM
Parent: #5




فشلت المذيعة في إستخراج أي جُمَل مفيدة من ضيفتها..
فكانت تكتفي ب (( ح تغني لينا شنو يا حبيبة و قريبة إلى القلب و العين ))..!!!
كنت أتوقع السؤال التقليدي (( موقف طريف مرٌ بيك ))..
لكن خابت ظنوني..!!


Post: #64
Title: Re: بصراحة كدا...حنان بلو بلو أحلى من ندى القلعة...!!
Author: نهي محسن أبوراس
Date: 04-20-2008, 06:34 AM
Parent: #6

الحبيبة ممكونة
كيفنك ياأحلي زولة؟؟
مشتاقين والله

Quote: فشلت المذيعة في إستخراج أي جُمَل مفيدة من ضيفتها..
فكانت تكتفي ب (( ح تغني لينا شنو يا حبيبة و قريبة إلى القلب و العين ))..!!!
كنت أتوقع السؤال التقليدي (( موقف طريف مرٌ بيك ))..
لكن خابت ظنوني..!!




بالغتي عديل كده

Post: #8
Title: Re: بصراحة كدا...حنان بلو بلو أحلى من ندى القلعة...!!
Author: عمران حسن صالح
Date: 04-19-2008, 07:05 AM
Parent: #2

ست الدار عندي (وزيرة الداخلية) ليس لها (شغلة) منذ أسبوع إلا أن أجهز شريط جديد للتسجيل ...
وحاول شوف (الهد) حق الفيديو شكلوا كده بقى يوسخ ..
(هم) مالم ليهم كم يوم واقفين ناس هارموني ديل ... سهرة بلوبلو نسوهـا ولا شنو ؟؟؟
كرهتونـا يا ناس هارموني (قريباً .. قريباً ) لمتين يعني ؟؟؟؟
وصار موال يومي ....
وأنا يا ممكونة صرت مترقباً معها ( هذه البلبلة) ...ومتذكراً (سَكنا) ليها وهي في ربيعها ..
ودون (تطويل ) في الحكي ..
أُحبطت تماماً (مثلك) ... وعذرت نفسي أيضاً إذ أن عشر سنوات (جفاف) كافية لأن تكون (مسطح) وما متابع وين الناس وصلوا ..
(لأن بلوبلو لم تصل لأي مكان جديد) ..
وبررت لوزيرة داخليتنا بأن بلوبلو كانت ( تفعل) ما لم يفعله أحد قبلها .. وسبب لها شٌهرة ليس لها علاقة (بالفن) ..
بل بدرجة ميلانها (وتمايلها) ..
وعندما خفت حِدَة الميلان (والتمايل) .. بسبب ذهاب (ربيعها) ...
...
...
تلاشت .....

Post: #4
Title: Re: بصراحة كدا...حنان بلو بلو أحلى من ندى القلعة...!!
Author: منى على الحسن
Date: 04-19-2008, 06:51 AM
Parent: #1

ممكنونة سلام وشوق

والله بيني وبينك لا ذاك ولا هذا ...بل ( على قولة الاستاذة منى )

حنان + ندى صوت السلخة كلو صريخ في صريخ ...بس الزيط من الله ساكت

الاصوات الحلوة زهرمان + هاجر كباشي ...ديل جد بمتلكوا طبقات صوت فيها

تطريب عالي ...

لكن يا ممكونة نقول شنو ؟؟؟؟؟ في اللسان ست جارتو

Post: #29
Title: Re: بصراحة كدا...حنان بلو بلو أحلى من ندى القلعة...!!
Author: عماد محمود علي
Date: 04-19-2008, 11:52 AM
Parent: #4

الاخت الكريمة الفاضلة / ممكونة ...
Quote: ندي القلعة اسمح..

Quote: بصراحة كدا...حنان بلو بلو أحلى من ندى القلعة

وبصراحة أكثر نادية عثمان مختار أجمل وأحلى منهم الاثنين ....

Post: #7
Title: Re: بصراحة كدا...حنان بلو بلو أحلى من ندى القلعة...!!
Author: الزوول
Date: 04-19-2008, 07:03 AM
Parent: #1

السلام عليكم
الممكونة
انت اليومين ديل بالعة حبوب صراحة؟
عرفنا الحبش
جابت ليها بلو بلو؟؟
يبدو
انه موسم الهجرة الى الشرق
واللا يمكن بلو بلو فيها شيء من الحبش
غايتو انا ما عندي اعتراض
الا على لقبها بلو بلو
البيذكرني تان تان ده
............
تخريمة
مشتاقين


.............................
وما الناس إلا هالك وأبن هالك *** وذو نسب في الهالكين عريق

Post: #9
Title: Re: بصراحة كدا...حنان بلو بلو أحلى من ندى القلعة...!!
Author: رشا سالم
Date: 04-19-2008, 07:20 AM
Parent: #7

ممكونة الحبيبة..

والله تباري النسوان ديل وتحاولي تسوي من الفسيخ شربات,الا تجيك

حموضة في المخيخ الايسر..ياخ ديل كانو بيغنو اغاني البنات اللذيذة دي

وكانو كويسين في امانة الله..قامو يتشوبرو عايزين يغنو

اغاني فيها قصص ومعاني..والمشكلة الاغاني علي شاكلة

(اتفقنا؟) بتاعت ندي القلعة ديك..معاها مدة اصبع

ورسمة حنة لزوم الاشارة وكدا..

ولو حاولو يغنو اغاني جادة ما بتجي مع الكاراكتر بتاعهم

المهم يا ستي نرجع لموضوع السماحة

ندي القلعة اسمح..

Post: #10
Title: Re: بصراحة كدا...حنان بلو بلو أحلى من ندى القلعة...!!
Author: عمران حسن صالح
Date: 04-19-2008, 07:20 AM
Parent: #7

وكلامكـ صااااااااااااح يا منى ...
وبس قارنـــوا !!!!!!!!!!!!!



Post: #11
Title: Re: بصراحة كدا...حنان بلو بلو أحلى من ندى القلعة...!!
Author: رشا سالم
Date: 04-19-2008, 07:32 AM
Parent: #10

شكرا يا عمران علي الصوت الجميل..

طبعا هاجر كباشي دي عندها صوت جميل جدا

وبشهادة الفنانة المبدعة اصالة..

وما بتميل للاداء الاستعراضي زي ندي وحنان ست البوست..

بس المشكلة you can not give first impression ,second time

ولانو بداياتها كانت في اغاني البنات وبيوت الصبحيات,لسه

الناس منمطنها وما وصلت لمستوي الفنانات الصاعدات

الاشتهرو عن طريق برنامج نجوم الغد زي ناس عافية

واسرار..

تعديل حرفين وطوبة..

Post: #12
Title: Re: بصراحة كدا...حنان بلو بلو أحلى من ندى القلعة...!!
Author: عصام عبد الحفيظ
Date: 04-19-2008, 07:41 AM
Parent: #11

Quote: تحية خاصة لعازف الساكسفون.




والتحية لعبده ساكس
لقد استمتعت بعزفه وكانت حنان
تتماوج وتتراقص بجمال تحسد عليه


وخنان دائما تبحث عن الجديد والمبتكر
وهو من اجمل البرامج التى قدمت
من قناة هارمونى


واصحى يا صديقنا الجعيلى

Post: #14
Title: Re: بصراحة كدا...حنان بلو بلو أحلى من ندى القلعة...!!
Author: الحاج حمد الحاج
Date: 04-19-2008, 07:47 AM
Parent: #7

Quote: كان أفراد الفرقة في كامل أناقتهم و حُسن هندامهم..و كانت المفاجأة الجميلة هي إدخال فرقة راقصة لتصاحب الفرقة الموسيقية و حنان..
لفتة جميلة و مميزة

Quote: تحية خاصة لعازف الساكسفون.

Quote: فشلت المذيعة في إستخراج أي جُمَل مفيدة من ضيفتها..


ممكونة
تحليل تمام و في محلو و أضيف الى فشل المذيعة أن الاخراج كان تعبان و ركز على الصورة الجانبية للعازفين اكتر و حرم المشاهدين من لقطات جميلة خاصة في طفل صغير كان ماشي على حنان بلوبلو و هو يرقص في لقطة جميلة و لكن!! الاخراج
واحد صاحبي علق على طريقة جلوس المذيعة و قال : ياخي ديل ما بدربوهم على الاوتكيت دي قاعدة زي طريقة الركاب المتقابيلن في بوكس (أصلو رباطابي)

Post: #13
Title: Re: بصراحة كدا...حنان بلو بلو أحلى من ندى القلعة...!!
Author: فيصل نوبي
Date: 04-19-2008, 07:41 AM
Parent: #1

ممنونة
صباحاتكـ و ضيوفكـ بنكهة القهوة
ممكن أشاركـ !!













_
حجة كولن كولن

Post: #15
Title: Re: بصراحة كدا...حنان بلو بلو أحلى من ندى القلعة...!!
Author: Hussein Mallasi
Date: 04-19-2008, 08:02 AM
Parent: #13

Quote: حنان + ندى صوت السلخة كلو صريخ في صريخ

من الواضح أن صوت أمال النور قد سقط سهواً !

Post: #16
Title: Re: بصراحة كدا...حنان بلو بلو أحلى من ندى القلعة...!!
Author: Ahmed musa
Date: 04-19-2008, 08:42 AM
Parent: #1

والله جنس حسادة !!!!!!!!!!!

Post: #17
Title: Re: بصراحة كدا...حنان بلو بلو أحلى من ندى القلعة...!!
Author: Manar Mahsoub
Date: 04-19-2008, 09:03 AM
Parent: #1

العزيزة ممكونة...تحليلك فى السلك ...

احى معاك الفرقة الموسيقية ...

اما بلوبلو فكانت سخلية الصوت ...

و واضح انو كان فى تنافس بينها و بين ندى القلعة فى ستايل الثوب و طقم الدهب مع الاكسسوار ...

و مع هارمونى انت قريب من العين و قريب من القلب

بلوبلو من يومها تجيد الرقيص اما الغناء فهى بعيدة شديد ...لكن للاسف اول ما تبدا فى الشىء البتجيدو يقوم سيد الكاميرا يزحها بعيد و مرات يجيب باقى رقصة كده .... طيب عاملين معاها لقاء ليه ؟؟؟ اوع بس عشان نسمع صوتها !!!

نرجع لموضوع البوست انا معاكى بلوبلو احلى من ندى القلعة ...!!!

Post: #18
Title: Re: بصراحة كدا...حنان بلو بلو أحلى من ندى القلعة...!!
Author: سوسن عبد الله
Date: 04-19-2008, 09:25 AM
Parent: #17

سلام ممكونة...
البركة في تحليلكم لأنو ما شفنا الحلقة.
ويا منار محسوب طوالي انا بتفوتني الحاجات دي
بالله المرة الجاية قولو عووووك .

Post: #19
Title: Re: بصراحة كدا...حنان بلو بلو أحلى من ندى القلعة...!!
Author: عمران حسن صالح
Date: 04-19-2008, 09:47 AM
Parent: #18

الأخت الزميلة / رشا
لك الود والتحيات ...
وبعد إذن ممكوني ......
..........
Quote: بس المشكلة you can not give first impression ,second time

وهذه مشكلة صديقي الفنان الأكثر من رائع ولا يعرفه أحد ( عوض أحمد عمر ) ...
ليتنا نستخدم (إضنينا) فقط للحُكم في هذه الحالة .....

Post: #20
Title: Re: بصراحة كدا...حنان بلو بلو أحلى من ندى القلعة...!!
Author: Manar Mahsoub
Date: 04-19-2008, 09:58 AM
Parent: #1

العزيزة سوسن بركة النومتى و احسن تسمعى التحليل الممكونى بيديك احساس انو الحلقة كانت حلوة...

Post: #21
Title: Re: بصراحة كدا...حنان بلو بلو أحلى من ندى القلعة...!!
Author: Ahmed musa
Date: 04-19-2008, 10:35 AM
Parent: #1

قالو القليب حِرِق وحرقوه بالنار حرِق يا ناس ود الغرب

Post: #22
Title: Re: بصراحة كدا...حنان بلو بلو أحلى من ندى القلعة...!!
Author: Ahmed musa
Date: 04-19-2008, 10:44 AM
Parent: #1

وكانت حنان تتماوج وتتراقص بجمال تحسد عليه
على قول عصام عبدالحفيظ الماخمج


Post: #23
Title: Re: بصراحة كدا...حنان بلو بلو أحلى من ندى القلعة...!!
Author: حمزاوي
Date: 04-19-2008, 10:45 AM
Parent: #1


الاخت ممكونة
مسكاقمي
السهرة تم الاعداد لها من قبل المطربة حنان بلوبلو بأن تكون رائعة وفريدة ويبدو انها بذلت مجهود في عمل البروفا وتنظيم الرقصات مع الفرق المشاركة ولكن مخرج الاغاني لم يردنا نتمتع باداء المطربة حنان ولا برقصات الفرق المشاركة في الرقصات فكان تركيزه في العازفين وبعض لقطات للحضور ابعدنا عن التجاوب والاندماج مع السهرة ... حقيقة المخرج كان سبب رئيسي في تشويه السهرة انا ما عارف هو معجب بالعازفين ولا شنو لدرجة اننا لم نتأمل في الراقصات في اغنية كولن كولي وكذلك اغنية ياناس الغرب ولم نندمج في السهرة فحولت الى قناة الشروق فكملت باقي السهرة ... يا ناس هارموني شوفوا لينا حل مع المخرجين حقكم .

Post: #24
Title: Re: بصراحة كدا...حنان بلو بلو أحلى من ندى القلعة...!!
Author: Ahmed musa
Date: 04-19-2008, 10:53 AM
Parent: #1

Quote: ولكن مخرج الاغاني لم يردنا نتمتع باداء المطربة حنان ولا برقصات الفرق المشاركة في الرقصات فكان تركيزه في العازفين وبعض لقطات للحضور ابعدنا عن التجاوب والاندماج مع السهرة ... حقيقة المخرج كان سبب رئيسي في تشويه السهرة انا ما عارف هو معجب بالعازفين ولا شنو


والله يا حمزاوي هو دي المشكلة (المخرج) يبدو إنوا تربية التلفزيون القومي ...بخاف من الرقيص ... وتميز حنان هو في رقصاته ... ده إسلوبها ... وتأكيداً لكده جابت معاها كاست رقيص ... لكن يبدو إنوا المخرج شغال مع الجعيلي وخايف من (محمد حاتم) !!!!

Post: #25
Title: Re: بصراحة كدا...حنان بلو بلو أحلى من ندى القلعة...!!
Author: الزبير صالح الزبير
Date: 04-19-2008, 11:06 AM
Parent: #1

Quote: لكن صوت ندى القلعة..أحلى..!!


والله بالغتي شن جاب لجاب يبدو انك ما كنتي مركزة كويس امبارح.


تخريمة : ندي القلعة دي ما قلت ليكم جارتنا في الحلة وما بنرضي فيها.

تخريمة تانية : صحي يا جماعة ندي القلعة حفلتها بالتوب بسعر وبدونة بسعر تاني .....هكذا سمعت فارجو تصحيحي لو غلطان و المعلومة الجاتني غلط

Post: #26
Title: Re: بصراحة كدا...حنان بلو بلو أحلى من ندى القلعة...!!
Author: فيصل نوبي
Date: 04-19-2008, 11:09 AM
Parent: #1

سلام جاكم ( يا قول حسن شطة )
دي اول اغنية في اللقاء (صوت فقط) نسبة لضيق الوقت *..
*بنت اختي الصغيرة عاملةغلبة شديدة و ما عايزة تسمع بلوبلو (متفقة مع ملاسي) !!


ما بيلاقيني (كلمات و ألحان الراحل "عوض جبريل")

إضغط للتشغيل(لضمان تواجدملاسي في البوست )





_
ممكونة
هنا برضو كان في حبش ؛ وأخشي ان يكون هذا هو سر"
" بصراحة كدا...حنان بلو بلو أحلى من ندى القلعة...!! "

Post: #27
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 11:26 AM
Parent: #1

Quote: وبررت لوزيرة داخليتنا بأن بلوبلو كانت ( تفعل) ما لم يفعله أحد قبلها .. وسبب لها شٌهرة ليس لها علاقة (بالفن) ..
بل بدرجة ميلانها (وتمايلها) ..
وعندما خفت حِدَة الميلان (والتمايل) .. بسبب ذهاب (ربيعها) ...
...
...
تلاشت .....



اتفق معاك يا عمران في إنو شهرة بلو بلو كانت في إنها أتت بما لم تأتي به الأوائل..
و زي ما هي قالت في اللقاء..ستايلي كان مختلف...!!!!!!!!!!!!

لكني أختلف معاك في خفة حدة الميلان و ذهاب الربيع..
فالسنون لم تزيد بلو بلو إلا بريقاً و جمالاً ..و...ميلاناً..!!
--

حب كتير لوزيرة داخليتك من ممكونة وزيرة الدفاع!



Post: #28
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 11:32 AM
Parent: #27

Quote: حنان + ندى صوت السلخة كلو صريخ في صريخ ...بس الزيط من الله ساكت

الاصوات الحلوة زهرمان + هاجر كباشي ...ديل جد بمتلكوا طبقات صوت فيها

تطريب عالي ...


العزيزة منى..
شوق شديد و الله...
يا ستي كلامك صاح..الصيت و لا الغِنى..

لكن بختلف معاك في صوت ندى القلعة..
ندى صوتها جميل و عميق و أداءها لأغاني الحماسة و السيرة لا يُعلى عليه..

أسمحي لي أضم (( سميرة دنيا)) لقائمة الفنانات..الغير سخليات!!!



Post: #31
Title: Re: بصراحة كدا...حنان بلو بلو أحلى من ندى القلعة...!!
Author: Hussein Mallasi
Date: 04-19-2008, 12:33 PM
Parent: #28

Quote: (المخرج) يبدو إنوا تربية التلفزيون القومي
Quote: شغال مع الجعيلي وخايف من (محمد حاتم) !!!!


Post: #30
Title: Re: بصراحة كدا...حنان بلو بلو أحلى من ندى القلعة...!!
Author: امير عوض الجمري
Date: 04-19-2008, 12:24 PM
Parent: #1

Quote: تحية خاصة لعازف الساكسفون.

نعم والله يا ممكونة التحية ليهو .. والله يلعن الحاجة والعوذ

Post: #32
Title: Re: بصراحة كدا...حنان بلو بلو أحلى من ندى القلعة...!!
Author: sama7
Date: 04-19-2008, 12:56 PM
Parent: #1

غايتو يا ممكونة ظلمتى مقدمة البرنامج

غايتو دى لو أنا كان زمااااااااااان حردت

بشهد ليها غايتو إنها did her best لكن مساخة ردود مسيز بلو ما حصلت

زى البتقول ليها ما تسألينى كتير وزاته هى أحسن تغنى وترقص بس عشان ما كلامة


بس يا جماعة كانت موت أحمر و رقاصة رقيص

واللقاء كان ممتع بإسلوبها فى الغناء والرقيص ومصاحبة الفرقة

بعدين فى كل الأحوال she has a unique style ونجحت فى دى

Post: #33
Title: Re: بصراحة كدا...حنان بلو بلو أحلى من ندى القلعة...!!
Author: M A Muhagir
Date: 04-19-2008, 01:05 PM
Parent: #1

you are just biased





......................
دا هظار
ما تقومى تزعلى

Post: #34
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 01:52 PM
Parent: #1

Quote: وبصراحة أكثر نادية عثمان مختار أجمل وأحلى منهم الاثنين




مافي شك في ذلك....
نادية عثمان ..شاعرة و صحفية و مذيعة متمكنة..
حلوة قلباً و قالباً..و ذات حضور قوي.

التحية و التقدير ليها..
و لكل ناس هارموني.



Post: #35
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 02:00 PM
Parent: #34

Quote: غايتو انا ما عندي اعتراض
الا على لقبها بلو بلو
البيذكرني تان تان ده


الزووول الوسيم..الفي طبعو دايماً هادي..
سلام و شوق شديد..

أنا زااااتي كنت زيٌك كدا.....
لكن بعد حكت إنها كانت بتغني نشيد في جنة الأطفال إسمو (( يا بلو بلو ))..
و غنت كمان مقطع منو..

غفرتَ ليها!




Post: #36
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 02:13 PM
Parent: #35

Quote: ياخ ديل كانو بيغنو اغاني البنات اللذيذة دي

وكانو كويسين في امانة الله..قامو يتشوبرو عايزين يغنو

اغاني فيها قصص ومعاني..والمشكلة الاغاني علي شاكلة

(اتفقنا؟) بتاعت ندي القلعة ديك..معاها مدة اصبع

ورسمة حنة لزوم الاشارة وكدا..

ولو حاولو يغنو اغاني جادة ما بتجي مع الكاراكتر بتاعهم


كيفك يا رشا..و كيف البنوتة الحلوة..؟
يعني ما نتلاقى إلا في الأعراس و الصبحيات ...؟!!

--

يا ستي رأيك الفوق دا عجبني جداً جداً..
لكن و الله بلو بلو أمبارح غنت أغاني..كلماتها و ألحانها كويسة..
لكن وسط الصرٌيخ و السخلنة..ما بتقدري تفرزي المضارع من الفاعل و المفعول به..!
--

عليك الله ما عجبتك اللوحة الراقصة لود الغرب...؟!!!



Post: #37
Title: Re: بصراحة كدا...حنان بلو بلو أحلى من ندى القلعة...!!
Author: سلمى الشيخ سلامة
Date: 04-19-2008, 02:52 PM
Parent: #36

الاخت الحبيبة ممكونة
تحياتى
حين ظهرت حنان بلوبلو
كانت اول فنانة تدخل عنصر الاستعراض الى مجال الاغنية
خاصة اغانى البنات
قبلها كانت المغنيات لا يلجان الى الاستعراض الفنى
وكان ذلك فى اوائل الثمانينات
قبل عقدين او يزيد
ولها وهج خاص بها
استقبلته الاقلام الصحفية بكثير من النقد غير المنطقى وكثيرا
كتبت عنها ووجهت بنقد غير منقطع وبكثير من الاجحاف
فى حق فنانة آمنت بفنها
واثبتت لكل من استمع اليها انها فنانة من طراز غير تقليدى
وهذا هو سر استمرارها
حنان بلوبلو او هكذا اسماها الفنان الراحل اسماعيل عبد المعين
ظلت لاعوام طويلة فى تصورنا احد ملامح الغناء الاستعراضى
وهى رغم كل ما تعرضت له من انتقادات ثابرت ان يكون لها تفردها
رغم انى لم اشاهد الحلقة المذكورة
لكنى اشهد ان الفنانة حنان لها طابع خاص سيميزها ابدا
وكل من جاءت بعدها حاولت ان تكون فى مستوى حنان
لما تميزت به من اداء استعراضى مكنتها منه ملامحها وقوامها الرشيق
وما زلت اجد ان الفنانة حنان بلوبلو كما ذكرت فى مقال كتبته العام 83 فى صحيفة الايام
انها فنانة ظهرت فى غير مكانها وغير زمانها
فلها ولك التحية

Post: #38
Title: Re: بصراحة كدا...حنان بلو بلو أحلى من ندى القلعة...!!
Author: عمر الفاروق
Date: 04-19-2008, 03:19 PM
Parent: #1

يا جماعة ما تتكلموا ساي عليكم الله
حنان بلوبلو إمكن امبارح ما ارضت الطموح لكن يا جماعة إنتو بتتكلموا عن زولة بتغني من سنة 81 يعني قريب ال25 سنة وفي رواية ربع القرن ونيف (يا سلاااااام على نيف دي)..
حنان بلوبلو أثر فيها تشدد الإنقاذ في ايامها الأولى ومحاربة الغناء والفنّانين ..
بالله الما شاف حنان ايام الديموقراطية ما يجي يتكلم ساي
حنان بلوبلو عرفت التوب قريييييب ده ويا حليل بلو بلو بي الكردان والكرسي جابر وصورتها الفوتوغرافية موجودة في كل قزاز أمامي للحافلات بالقرب من السبحة المتدلية من المراية الأمامية للسواق !!
حنان بلو بلو أفضل من يرقص على هذه البسيطة ويا سلااااااااام عليها لمن كانت بتجدع المايك وراها يلتقطه بتاع الدونب ولا الطبلة ولا الساون وبعد داك حت بي الطريقة الصاح !!!
حنان بلو بلو إمكن صوتها بقا حاد شوية لكن زمان لمن تغني ليك سابا ..سابييينا ..سابوأووي ..أنا أيي ..وي أني .. (ماف زول يسألني معناهو شنو الكلام ده بس كانت أغنية في السلك)..
حنان بلو بلو ياما قدّونا بيها المغتربين الجايين من الخليج فكان بالإضافة للهبهان والقرنفل والسيجنال تو يأتي الفيديو مع شرايط هوغ هوغان للمصارعة وشريطين تلاتة حفلات لحنان بلوبلو كنا نحضرها نهاراً بعد إغلاق الغرفة وتشغيل المروحة وإغلاق النور و ورش الأوشة مع حبة ند (هووووي والله ما بسطل)..
وفيما بعد ظهرت منافسة لها تدعى عوضية عز الدين لم تدوم طويلا..
زمان في العباسية في مقولة بتقول ليك حدثين أوووووعك تفوتهم :
عيد ميلاد حنان ..وظار زيدان !!
بلو بلو جميلة وغناها جميل وهو لون من ألون الغناء اللي ما ممكن نقارنو بي غنا عثمان حسين مرووقوفا عند ناس الخالدي ..
بلو بلو حاجة كده براها ما بيعرفوها إلا أولاد أمدرمان ..
ولو ما مصدقني أسألو تمبس..

Post: #39
Title: Re: بصراحة كدا...حنان بلو بلو أحلى من ندى القلعة...!!
Author: مريم بنت الحسين
Date: 04-19-2008, 03:35 PM
Parent: #1

سهرة عجيبه..
اتغظته من المخرج لما دايره اطق.. وحردته غيرته القناة..كان في فيلم the body guard شغال في MBC4.... عليكم الله موش احسن من المغصه.

بنت الحسين

Post: #40
Title: Re: بصراحة كدا...حنان بلو بلو أحلى من ندى القلعة...!!
Author: نادية عثمان
Date: 04-19-2008, 04:20 PM
Parent: #39

ممكونة ياعسلنا سلامات

بصراحة حنان بلوبلو كانت نجمة ليلة الجمعة في هارموني .. واعادتنا لي (السودان القديم) البنعرفوا داك !!

كنت بقول ياااااااااارب السهرة دي ماتفوت ممكونة عشان تجي تكتب لينا تحليلها الراقي وقد كان ان استجاب المولي دعائي وهاأنتي هاهنا (تفنّدي) الشغلة ( حتة حتة) !!

واصلي ونحنا بنقرأ ياحبيبة ..

Post: #41
Title: Re: بصراحة كدا...حنان بلو بلو أحلى من ندى القلعة...!!
Author: فيصل نوبي
Date: 04-19-2008, 04:43 PM
Parent: #1

مساء مع شاي بالنعناع ..
وسلام مربع للحلوين..






_
سؤال
هل الراقصات ناجشيات أم سودانيات !!

Post: #42
Title: Re: بصراحة كدا...حنان بلو بلو أحلى من ندى القلعة...!!
Author: abubakr
Date: 04-19-2008, 05:07 PM
Parent: #1

ممكونة الممنونة (كما يقول وليدنا فيصل نوبي ) التحايا ....
جاوزنا التلاتين سنة بعادا من البلد وبالتالي استماع الي الغنا مباشرة وبكثرة امر لم يتوفر لي كثيرا فلذا عندما اتت اغاني واغاني كنت شديد الالتصاق بها.. الوقت حيث اعيش لا يسمح لي بكثير من سعة لاستمع الي اغاني باستمرار الا ما تيسر ولكن احاول المواكبة وخصوصا في الاستماع الي الاصوات النسائية لقلتها عمومااو لعدم افساح مجال اوسع لها وهروبا من كشكول الاسامي الذي لا حصر له من المغنيين الذكور بحيث ضاعت بينهم اصوات قوية وجميلةواختلط الحابل بالنابل ... لم استمع الي برنامج حنان ولكن اتذكر انني استمعت او شاهدت لها تسجيلا في الثمانينات وكانت اول صوت نسائي استعراضي ولذا ارتبط غناؤها عندي ليس بحلاوة وقوة صوتها ولكن بالاستعراض الغنائي الذي لم يكن معروفا في السودان والغناء الاستعراضي عموما ليس الصوت وحلاوته هو العنصر الاساسي فيه ....مؤخرا استمعت لندي القلعة وهي تمتلك صوتا قويا مميزا مخارج الحروف فيه واضحة وواثقة وامكاناته عالية واحيانا اشعر بانه صوت بدوي لا يحتاج الي مايكروفون.. ندي كذلك كحنان خلقت لها طابعا مميزا وهو اسلوب غنائها واستعراضها بازيائها المتناسقة الالوان وخضاب يدها والحلي الكثيرة الممميزة التي تتجمل بها .. اي انها اتت باستعراض اخر ولكن لا يعلو علي امكانات صوتها... عموما المغنيات في بلادنا واللاتي التزمن بالثوب السوداني كلباس اعطاهن تميزا عن كل الاصوات التي تزعجك بتنافر الوان وتصاميم كم هائل من القطع في ازيائهن ....التلفزيون يخاطب الانسان من محوريين مهميين الصوت والصورة وليس كالمذياع صوت فقط فلذا المظهر العام للمغنية او المغني يؤثر في قبولنا لهن او لهم ....وندي وسميرة وهاجروحنان (غاب عن ذاكرتي اسم او اسميين) واللاتي التزمن بثوب سوداني تمكن من ان ينجحن في اختيار الوانه اضاف الي قبولهن لدي الجمهور بحيث لم يزعجنه (اي الجمهور) ب CHOCOLATE BOX من الالوان .. واخيرا معك في ان صوت ندي هو الاجمل والاقوي والاوضح وتتميز ندي كذلك بوافر من اغانيها الخاصة فهي ليست مقلدة ولا مرددة "كربون" ..

Post: #43
Title: Re: بصراحة كدا...حنان بلو بلو أحلى من ندى القلعة...!!
Author: نجوان
Date: 04-19-2008, 07:20 PM
Parent: #42

ممكونة..

كيفك يا فردة..

أتفق معاك.. ومع سلمى الشيخ سلامة.. عمر الفاروق .. والباش..
وأشكر نوبي على الصوت والنغم..

بلوبلو.. فنانة إستعراضية زيّها زي برتني سبيرز .. جانيت جاكسون
وباولا عبدول.. (وشئ من شاكيرا في الحقيقة).. الصوت والأداء ليس من نقاط القوى لديهن..
وحتى ملك البوب مايكل جاكسون.. إمكاناته الصوتية ضئيلة جدا مقارنة برقصه وحضوره الإستعراضي..

ما كل فنانة عندنا من مدرسة الفلاتية ومنى الخير..
فيروز.. أو الست أم كلثوم..

حنان ستظل رائدة الفن الإستعراضي النسائي في السودان..
في حقبة صعبة من تاريخ السودان..
وستظل حبيبة الكل ..

وهي الآن تحاول إستعادة حلمها بفن إستعراضي.. وبمشاركة فرقة أيضا..
بتسخيل أو بغيره.. عاشت بلوبلو!!
you go girl


_____
ده حالتو السهرة فاتتني

Post: #76
Title: Re: بصراحة كدا...حنان بلو بلو أحلى من ندى القلعة...!!
Author: نادية عثمان
Date: 04-21-2008, 06:25 PM
Parent: #42

فيصل نوبي جا ماشي بي جاي ؟

Post: #44
Title: Re: بصراحة كدا...حنان بلو بلو أحلى من ندى القلعة...!!
Author: منى على الحسن
Date: 04-19-2008, 07:30 PM
Parent: #1

Quote: من الواضح أن صوت أمال النور قد سقط سهواً !


بالغت يا ملاسي اش جاب لي جاب

العبقرية امال النور خريجة معهد الموسيقي تقارنا بي ديل

والله حرام ....يكفيها شرفا اختارا الموسيقار محمد وردي من ضمن المجموعة الادت معاهو بعض الحفلات

وردي كونو يختار دي براها شهادة ...حتى رجعتو الاخيرة رغم كثرة الاصوات برضو اختارا ضمن المجموعة

امال صوتا اوبرالي وليس سخلة تصرخ ....

من هنا احي النجمة آمال النور ...رغم انها مقلة جدا في انتاجها

اتمنى يا ملاسي تسمع لي آمال اداء فردي حتعرف قدر شنو الانسانة دي صوتا جميل

الاخ عمران تشكرات على اغنية هاجر شفته الفرق بعد السما للأرض ....

الزولة دي صوتا رائع وفيهو خامات عجيبة لما تغني مرات بحس بالطرب في العصب الجواني...




Post: #45
Title: Re: بصراحة كدا...حنان بلو بلو أحلى من ندى القلعة...!!
Author: فيصل نوبي
Date: 04-19-2008, 07:31 PM
Parent: #1

دي غايتو العديلة زاتها
باكر الصباح شوفو زول يتم ليكم الصبحية






_
رسالة طاشة ..
يومين فاتو لا حس لا خبر .. معقولة بس !!

Post: #53
Title: Re: بصراحة كدا...حنان بلو بلو أحلى من ندى القلعة...!!
Author: عمران حسن صالح
Date: 04-19-2008, 09:32 PM
Parent: #45

عفواً حدث خطأ في ترتيب المدُاخلة ...
تم تحويلها حسب الترتيب الصحيح !!!!

Post: #46
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 08:58 PM
Parent: #1

Quote: الاخت الحبيبة ممكونة
تحياتى
حين ظهرت حنان بلوبلو
كانت اول فنانة تدخل عنصر الاستعراض الى مجال الاغنية
خاصة اغانى البنات
قبلها كانت المغنيات لا يلجان الى الاستعراض الفنى
وكان ذلك فى اوائل الثمانينات
قبل عقدين او يزيد
ولها وهج خاص بها
استقبلته الاقلام الصحفية بكثير من النقد غير المنطقى وكثيرا
كتبت عنها ووجهت بنقد غير منقطع وبكثير من الاجحاف
فى حق فنانة آمنت بفنها
واثبتت لكل من استمع اليها انها فنانة من طراز غير تقليدى
وهذا هو سر استمرارها
حنان بلوبلو او هكذا اسماها الفنان الراحل اسماعيل عبد المعين
ظلت لاعوام طويلة فى تصورنا احد ملامح الغناء الاستعراضى
وهى رغم كل ما تعرضت له من انتقادات ثابرت ان يكون لها تفردها
رغم انى لم اشاهد الحلقة المذكورة
لكنى اشهد ان الفنانة حنان لها طابع خاص سيميزها ابدا
وكل من جاءت بعدها حاولت ان تكون فى مستوى حنان
لما تميزت به من اداء استعراضى مكنتها منه ملامحها وقوامها الرشيق
وما زلت اجد ان الفنانة حنان بلوبلو كما ذكرت فى مقال كتبته العام 83 فى صحيفة الايام
انها فنانة ظهرت فى غير مكانها وغير زمانها
فلها ولك التحية


يا خوانا بعد إذنكم/ن..دايرة أرد على سلمى دي لسببين..
الأول..إني بحبها لله ف لله...
التاني..إنها قايمة من عيا...ربنا يواليها بعافيتو..
و.. ما بتقدر تقيف في الصف!
--

كلامك حلو جداً يا سلمى عن حنان..و يبدو إنك على علاقة وثيقة معاها..
أنا شخصياً لم أرى حنان بلو بلو إلا في حفلات..
و عادةً بتكون العجاجة قايمة و الرجال مغطين السباتة..
و الناس جاية كلها تتفرج في رقيص حنان....مافي زول/ة بيتذكر الغُنا.
سهرة أمبارح دي رجعتني لأيام جميلة و مناسبات حلوة..
لكن..
لو حضرتي السهرة كنتي ح تعرفي أنا بتكلم عن شنو..
زي ما قالوا الناس هنا..المخرج بوٌظ الشغلانة...
فكانت الكاميرا تدور حول الحضور..الغير منفعلين على الإطلاق بالأغاني...
بينما حنان بترقص بكل تفاني في إستعراضات وضح جيداً كمية البروفات العملتها ليها..
الصوت..كان حلو في أغاني...و مزعج للغاية في أغاني..
في حتة الكلام كانت حنان من أنصار (( خير الكلام ما قلٌ..و دلٌ ))...
و يشهد الله المذيعة بذلت جهد خرافي عشان تطلع منها بأي معلومة..و..فشلت.

لكن أطمئنك يا سلمى...حنان ما زالت بكامل بهائها و جمالها و رشاقتها..
كان ما أحلى من زمان كمان.



Post: #47
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 09:07 PM
Parent: #46

Quote: والتحية لعبده ساكس
لقد استمتعت بعزفه وكانت حنان
تتماوج وتتراقص بجمال تحسد عليه


و التحية الحارة لدبلوماسية حنان..
فقد حاولت قناة هارموني الإصطياد في الماء العكر..
فجاء في إعلان السهرة..سؤال ل حنان عن حقيقة خلافها مع ندى القلعة..

و كان رد حنان ...أحلى ما في السهرة ..
حينما قالت أن ندى أختها و لا توجد خلافات..يوجد فقط مغرضين..
ثم وجٌهت تحية خاصة لندى القلعة...


يا ريت لو كل الناس زيٌك يا حنان..
ما كانت إنتعشت موضة الصُحف الصفراء.



Post: #49
Title: Re: بصراحة كدا...حنان بلو بلو أحلى من ندى القلعة...!!
Author: فيصل نوبي
Date: 04-19-2008, 09:15 PM
Parent: #47

ممنونة
Quote: و كان رد حنان ...أحلى ما في السهرة ..
حينما قالت أن ندى أختها و لا توجد خلافات..يوجد فقط مغرضين..
ثم وجٌهت تحية خاصة لندى القلعة...
عارفه هنا ده في وقفة طويلةممكن تسمعيها هنا










_
الاغنية دي (رد حنان علي ندي في أغنيةالشريف مبسوط مني) بصورة واضحة جدا.. دون إغراض ..

Post: #48
Title: Re: بصراحة كدا...حنان بلو بلو أحلى من ندى القلعة...!!
Author: نجوان
Date: 04-19-2008, 09:14 PM
Parent: #46

وبعدين يا جماعة..


هو اي فنان لازم يتكلم في التلفزيون أو الإذاعة؟
في فّنانين كده لم يخلقوا للكلام أبدا
خلوهم يغنوا ويرقصوا ويطربوا نفسهم ويطربونا..
كفاية كلام ترباس يومداك!

_____
والبعرف يتكلم ذاتو لمّا يلمّوا فيهو مذيعين الأيام ديل
بيطّيروا ليه الكلام من راسه..

_____
وهو غير الكلام الكتير ده الجايب لينا الكفوة شنو؟

Post: #51
Title: Re: بصراحة كدا...حنان بلو بلو أحلى من ندى القلعة...!!
Author: فيصل نوبي
Date: 04-19-2008, 09:27 PM
Parent: #48

Quote: وهو غير الكلام الكتير ده الجايب لينا الكفوة شنو؟














_
الشلاقة و التنظير برضو

Post: #55
Title: Re: بصراحة كدا...حنان بلو بلو أحلى من ندى القلعة...!!
Author: نجوان
Date: 04-19-2008, 09:47 PM
Parent: #51

Quote: الشلاقة و التنظير برضو
آآخ.. نسيت ديل والله يا نوبي!

Post: #50
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 09:20 PM
Parent: #1


الأخ العزيز الحاج حمد الحاج..
تحية كبيرة ليك و لكل ناس بحري..

و من ناس بحري..
لناس الغرب...






التحية و التقدير لصاحب الفيديو كليب على يوتيوب.



Post: #54
Title: Re: بصراحة كدا...حنان بلو بلو أحلى من ندى القلعة...!!
Author: mamkouna
Date: 04-19-2008, 09:37 PM
Parent: #50



الأخ العزيز..فيصل نوبي..
ياخي أنا عااااااااااجزة عن الشُكر..للأغاني..
النجاشية و...السودانية..!!
--
بالنسبة لخلاف ندى و حنان..
إنت قايل الدبلوماسية هي شنو..؟؟
الدبلوماسية يا سيدي إنك تلف حول المشكلة..
و ما تدي فرصة لناس قلنا و قالوا..
لذلك أسجل صوت إعجاب تاني ليها.
---

و ...
تقديراً لمجهوداتك معانا..
ليكَ و لصاحب/ة الرسالة الطاشة..
في إهداء خاااااااااااص...
كولن..كولن..كولن..كولن..






التحية برضو لسيد الغنية في يوتيوب.



Post: #52
Title: Re: بصراحة كدا...حنان بلو بلو أحلى من ندى القلعة...!!
Author: لؤى
Date: 04-19-2008, 09:29 PM
Parent: #1



Quote:
بصراحة كدا...حنان بلو بلو أحلى من ندى القلعة...!!
ــ
لكن صوت ندى القلعة..أحلى..!!
ــ
لم أشفق في حياتي على أحد..كما أشفقت على مذيعة هارموني (( هدى عمر ))...
ــ
تحية خاصة لعازف الساكسفون
ــ
(( ح تغني لينا شنو يا حبيبة و قريبة إلى القلب و العين ))..!!!
ــ
ست الدار عندي (وزيرة الداخلية) ليس لها (شغلة) منذ أسبوع إلا أن أجهز شريط جديد للتسجيل ...
وحاول شوف (الهد) حق الفيديو شكلوا كده بقى يوسخ ..
(هم) مالم ليهم كم يوم واقفين ناس هارموني ديل ... سهرة بلوبلو نسوهـا ولا شنو ؟؟؟
ــ
وبصراحة أكثر نادية عثمان مختار أجمل وأحلى منهم الاثنين ....
ــ
والله تباري النسوان ديل وتحاولي تسوي من الفسيخ شربات,الا تجيك
حموضة في المخيخ الايسر
ــ
تعديل حرفين وطوبة..
ــ
وخنان
ــ
ياخي ديل ما بدربوهم على الاوتكيت دي قاعدة زي طريقة الركاب المتقابيلن في بوكس
ــ
من الواضح أن صوت أمال النور قد سقط سهواً !
ــ
اما بلوبلو فكانت سخلية الصوت ...
ــ
العزيزة سوسن بركة النومتى
ــ
*بنت اختي الصغيرة عاملةغلبة شديدة و ما عايزة تسمع بلوبلو (متفقة مع ملاسي) !!
ــ
بشهد ليها غايتو إنها did her best لكن مساخة ردود مسيز بلو ما حصلت
ــ
you are just biased
ــ
لكن وسط الصرٌيخ و السخلنة..ما بتقدري تفرزي المضارع من الفاعل و المفعول به..!
ــ
يا جماعة ما تتكلموا ساي عليكم الله
حنان بلوبلو إمكن امبارح ما ارضت الطموح لكن يا جماعة إنتو بتتكلموا عن زولة بتغني من سنة 81 يعني قريب ال25 سنة وفي رواية ربع القرن ونيف (يا سلاااااام على نيف دي)..
حنان بلوبلو أثر فيها تشدد الإنقاذ في ايامها الأولى ومحاربة الغناء والفنّانين ..
بالله الما شاف حنان ايام الديموقراطية ما يجي يتكلم ساي
حنان بلوبلو عرفت التوب قريييييب ده ويا حليل بلو بلو بي الكردان والكرسي جابر وصورتها الفوتوغرافية موجودة في كل قزاز أمامي للحافلات بالقرب من السبحة المتدلية من المراية الأمامية للسواق !!
حنان بلو بلو أفضل من يرقص على هذه البسيطة ويا سلااااااااام عليها لمن كانت بتجدع المايك وراها يلتقطه بتاع الدونب ولا الطبلة ولا الساون وبعد داك حت بي الطريقة الصاح !!!
حنان بلو بلو إمكن صوتها بقا حاد شوية لكن زمان لمن تغني ليك سابا ..سابييينا ..سابوأووي ..أنا أيي ..وي أني .. (ماف زول يسألني معناهو شنو الكلام ده بس كانت أغنية في السلك)..
حنان بلو بلو ياما قدّونا بيها المغتربين الجايين من الخليج فكان بالإضافة للهبهان والقرنفل والسيجنال تو يأتي الفيديو مع شرايط هوغ هوغان للمصارعة وشريطين تلاتة حفلات لحنان بلوبلو كنا نحضرها نهاراً بعد إغلاق الغرفة وتشغيل المروحة وإغلاق النور و ورش الأوشة مع حبة ند (هووووي والله ما بسطل)..
وفيما بعد ظهرت منافسة لها تدعى عوضية عز الدين لم تدوم طويلا..
زمان في العباسية في مقولة بتقول ليك حدثين أوووووعك تفوتهم :
عيد ميلاد حنان ..وظار زيدان !!
بلو بلو جميلة وغناها جميل وهو لون من ألون الغناء اللي ما ممكن نقارنو بي غنا عثمان حسين مرووقوفا عند ناس الخالدي ..
بلو بلو حاجة كده براها ما بيعرفوها إلا أولاد أمدرمان ..
ولو ما مصدقني أسألو تمبس..
ــ
سهرة عجيبه..
اتغظته من المخرج لما دايره اطق.. وحردته غيرته القناة..كان في فيلم the body guard شغال في MBC4.... عليكم الله موش احسن من المغصه.
ــ
بصراحة حنان بلوبلو كانت نجمة ليلة الجمعة في هارموني .. واعادتنا لي (السودان القديم) البنعرفوا داك !!
ــ
هل الراقصات ناجشيات أم سودانيات !!
ــ
ده حالتو السهرة فاتتني
ــ
يا خوانا بعد إذنكم/ن..دايرة أرد على سلمى دي لسببين..
الأول..إني بحبها لله ف لله...
التاني..إنها قايمة من عيا...ربنا يواليها بعافيتو..
و.. ما بتقدر تقيف في الصف!
ــ
و عادةً بتكون العجاجة قايمة و الرجال مغطين السباتة..



ممكونة
إزّيّك

غايتو البوست دا أطرف بوست يلاقيني الليلة
تعليقات لطيفة وساخرة ومضحكة لدرجة
قطّعتوا مصاريني




تحاياي

ـــــ
أنا في البعيد مشتاق لهمسة من الوطن يا نسمة


Post: #56
Title: Re: بصراحة كدا...حنان بلو بلو أحلى من ندى القلعة...!!____ وأمال النور ستهم يا (سحس) ........
Author: عمران حسن صالح
Date: 04-19-2008, 09:47 PM
Parent: #52

ممكوني إزيك من جديد ...
حسين شكلو فخخ البوست بتاعك (وشات ضفاري ) .....
Quote: حنان + ندى صوت السلخة كلو صريخ في صريخ
فرد حسين :
Quote: من الواضح أن صوت أمال النور قد سقط سهواً !
وفاولات زي دي ما بنفوته في حق (الجميلين ) الزي أمال النور ..
عشان كده هدية ليهو (يمكن ما سمع بي زي الشغـــل ده ) .....


أمــــــــــــــــــــــال النور " والحزن القديم "

Post: #60
Title: Re: بصراحة كدا...حنان بلو بلو أحلى من ندى القلعة...!!
Author: إسماعيل حميم
Date: 04-19-2008, 10:19 PM
Parent: #52






ست الدار
الممكونة سلام
تعرفي جيت داخل البيت لقيت الزولة البتغي
قلت والله يا ناس الفضائيات كل يوم جايبين لينا واحدة شكل
إمكن بعد أغنيتين وفواصل كلمتين من دي ومن دي
وما فهمت حاجة!!!!
أكان يجيبو ليك الأسم مكتوب
بلاي أسمها حنان عبدالله
لحدي اللحظات الأولى من قراءة الاسم ما شفت "بلو بلو"
لمن وقع الاسم كامل على عيني
تسألت دا الكبر ولا الزمن إتغير ولا الحاصل شنو؟؟؟

على كل ليست هي حنان الثمانينيات كما ذكر "ود الفاروق"
لا في الشكل
ولا في الصوت
ولا في الاداء

غايتو البوست الذ من الحلقة بي مراحل

مرفق
مودتي

إسماعيل حميم



.

Post: #57
Title: Re: بصراحة كدا...حنان بلو بلو أحلى من ندى القلعة...!!
Author: ASHRAF TAHA
Date: 04-19-2008, 09:48 PM
Parent: #1

ترددت كثيرا قبل أن أدخل
فالعنوان (فاضي)
ولكني تعشمت كتير
من بوست الكابلي
وقولت البت دي أضانا نضيفا
أها
فتحت البوست ونط لي المشغل:
DFX ForRealNetworks
وقلتا دي معناتا ربة للصباح
ويا ريتا
كان على الأقل ربينا
لكن لا الماونتين ديو
لا بلابل الدوح
التوبيك
زي كأنك تجي راجع بالليل
والدكاكين والمطاعم قافلة
وما تلقى ليك
إلا سلطة سودا
تاكولا وتخت جنبك قربة موية
من الحرقان بليل ال cet ده
أقول ليك شنو؟
وزعي أندروس ك(بروموشن)
الله قادر بس

Post: #58
Title: Re: بصراحة كدا...حنان بلو بلو أحلى من ندى القلعة...!!
Author: عمران حسن صالح
Date: 04-19-2008, 09:55 PM
Parent: #57

مُداخلة مكررة ............

Post: #59
Title: Re: بصراحة كدا...حنان بلو بلو أحلى من ندى القلعة...!!
Author: لؤى
Date: 04-19-2008, 10:15 PM
Parent: #58


Post: #61
Title: Re: بصراحة كدا...حنان بلو بلو أحلى من ندى القلعة...!!
Author: وجدي الكردي
Date: 04-19-2008, 10:21 PM
Parent: #59

يا بلوبلو صوتك جميل
حنان بلولو تحكى:
وحمادة مالو..(بوّظ أعصاب الخليجيين)..خليك من ناس هنا..!

الله يقطع الإشاعات..كتلتني مع اللحو في شارع مدني..!

دقّ الباب وجانا دي كنّا بنغنيها لــ (السادة الضباط)..لكن ناس قريعتي راحت بقوا يغنوها لي (سيد العدة)..!

ــــــــ
حوار: حسام الدين ميرغنى
(سنة ياولد) و(حمادة دا)، إغنيات طغت على الساحة منتصف الثمانينات (ولا على كيف اى زول)، وهكذا اغناني (تم تم) راقصة لا تجعل لك مزعة لحم فى سكون، من فرط (الجبجبة) بالطبع..!
وبلوبلو كانت ايضا تغنى (بهوى العيون السودا) و(ألمنى حنان) للراحل سيد خليفة، فتجيد وتبدع كما تفعل فى (حمادة دا)، أو (هل تدرى يانعسان) لحسن عطية بإتقان، حتى خال كثير من الجمهور انها ( حقت حنان)..!
نالت بلوبلو صيتا فى ذاكرة الاغنيات الفنية السودانية والتصقت بذكر الطرب التصاق اللون الابيض بالارز، والرقص الجميل بحنان. وانا ابحث عن بيتها فى حى المهندسين الامدرمانى لأسالها: (كنتى وين .. ووين بلدك وطربك وبعض رقصك)؟!
لم (يجهجنى) البحث عنها كثيراً، فأول (سيد دكان) سألته وصف لى بيتها ذو الباب البنى، طرقته ثم ولجت.
كانت حنان كعادتها بسيطة العبارات تتحدث وهى تضع صراحتها على المنضدة التى تحكرت فى وسطها تفاصيل جبنة حلوة أم بخور..!
(1)
* نبدا ياحنان من ورا شوية، الهاشماب، طفولتك وتفاصيلك الصغيرة هناك؟!
ـــ سكنت فيها جنب دار الرياضة امدرمان، جوارنا شيخ جدو الادريسى وشيخ النيل، مرة مرة كنت بمشى أخش دار الرياضة وأتعب ناس البيت بالبحث عنى، قريت فى مدرسة الموردة (أ)، حسى سموها أم عطية، درّستنى ست زينب سالم، وقرن معاى ناس بهاء عبد الكريم ونجاة ادريس الفنانات، ونجاة دى هى الودتنى (جنة الاطفال) عشان نسجل أناشيد للتلفزيون.
* متين الكلام ده؟!
ـــ فى السبعينات كدة، سجلنا نشيد (اسمعوا قصة طة) ويا (بلوبلو).
* عشان كدة لقبوك بلوبلو؟!
ـــ أيوة، بسبب النشيد دا بقى اسمى (حنان بلوبلو) كانت كلماتو بتقول:
(يا بلوبلو صوتك جميل
لحنك بديع يابلوبلو
مرحب حباب يابلوبلو
طابت حياتك بالسرور يابلوبلو)..!
* طيّب، انتى حياتك طابت مع الطرب كيف بعد ذاك؟!
ـــ بقيت أغنى فى مناسبات الحلة فى سن مبكرة وسط اعتراض شديد من اهلى، دقوني كتير، بس حبى للفن ادانى اصرار أواصل، عمرى كان عشرة سنين بس.
* والرقيص كيف؟!
ـــ كنت بتعلموا قدام المراية، ولامن أهلي يشوفونو كانوا بغطوها منى بالملاية عشان ما أرقص..!
إتذكر كان زيدان وسمية حسن بجو يغنو فى الحلة، وكنت بقول لناس بيتنا: والله حيجى يوم الناس تصفق لى وتتطلع فى الحيطة عشان تتفرج على غناى زى ناس زيدان ديل..!
* وبعدين؟!
ـــ مشيت مركز شباب امدرمان وعمرى كان 14 سنة، سجلت العضوية بصحبة (بشير جابر وكمال ترباس).. وترباس دفع لى قروش العضوية، مدير المركز كان محمد على عباس، وعم حسن الطيب كان ماسك شعبة الموسيقى واول تعاون لى كان مع الراحل عوض جبريل.
* بديتي معاهو بي ياتو عمل؟!
ـــ غنيت ليهو: (ودعنى وقال لى مسافر.. ولى ايام مابلاقينى). عوض جبريل ادانى ليهو ملحن وجاهز. بعدها كونت فرقة خاصة وكان معاى من العازفين: أب شيبة، وإسماعيل أب راس.
* وبعدين؟!
ـــ عملت شريط كاسيت تسجيل عادى سنة 83 ، صادف أيام مهرجان الخرطوم الدولى، ودا السبب لى شهرة كبيرة وقتها.
* كيف؟!
ـــ الشريط إشتهر والناس بقت تسأل عن فنانة اسمها بلوبلو، ومن ديك وعيك..!
وأردفت حنان: لكن الشريط الصاح كان بتاع حمادة دا..!
* لكنك قلتى فيهو (حمادة بوظ اعصابنا)، مش صعبة شوية الحتة دى؟!
ـــ الحتة ياتها؟!
* حكاية (بوظ) دى؟
ـــ لا، دى عبارة مستخدمة فى المجتمع عادى، وحتى لو فى زول خلعك ساكت مش بتقول ليهو بوظت أعصابنا؟!
قلت لها: بنعم..
ردت: طيب مالك؟!
وواصلت حنان: الاغنية دى من العجايب، مشهورة بره البلد دي اكتر من هنا، لمّا أمشى الخليج، الخليجين بطلبوا منى اغنى ليهم حمادة (أتلف) أعصابنا..!
* طيّب .. حنان أول فنانة تجاهر بالرقص على خشبة المسرح، أليس كذلك؟!
ـــ طيب المشكلة وين، دا فن استعراضي وهو جزء من الفنون وعندو مدارس عديل، أيوة انا يمكن اكون اول واحدة تغنى وترقص، وبالمناسبة (حمادة دا) الاغنية حسى عمرها بالضبط 21 سنة، يعنى حمادة ذاتو يكون كبر وعرس..!
* تتذكرى اول اجر ليك كان كم؟!
ـــ 100 جنيه، لكنها كانت بتفش الغبينة.
* سنة 88 إتكسر منتزة (السي لاند) بسببك فى بورتسودان..صاح؟!
ـــ وانت القال ليك الكلام منو؟!
* قلت لها: أنا كنت حاضر الحفلة دي..!
ـــ قالت: الحفلة ديك عمرى ما بنساها، الجمهور من كترتو فرتق المنتزه حيطة حيطة، وبورتسودان عندى بالدنيا، بحبها وبحب حفلاتها واحسن لى من فرنسا ذاتو، كل شهرين لازم ازورها، قريب دا مشيت هناك ولقيتها بقت أجمل من الجمال..!
* إختفيتي بداية التسعينات، مشيتى وين ؟!
ـــ كنت فى مصر وعملت أشرطة كاسيت مع محمود عبدالعزيز وفرفور. يعني عملت 12 شريط براى من (حب العنب) وإنت ماشى..!
* قعدتى كم في القاهرة؟
ـــ زي سنتين كده، وجيت لقيت ليك الساحة الفنية (مستفة بالفنانات) وما فيها النفس.
* ولقيتى الغناء جاط؟!
ـــ فعلا هابط، اضرب ليك مثل بأغنية (حنانة) المعروفة دى، زمان كنا بنغيها للضباط:
(جنابو الريد اذانا
بى كابو حيّانا
ياسيدة علوية.. الساكنة المرغنية
اقيف دورية للشرطة العسكرية)!
ـــ حسى سامعهم بقولوا شنو؟!
* لم انكر، فقد سمعت أغنية (حنّانة) كثيرا، وربما فرطقت فيها اصابعى ..ربما، اجبتها: أيوة.
قالت بلولو: حسى ناس قريعتي ديل قاعدين يغنوها كده:
(دق الباب وجانا
أنا جريت ليهو حفيانة
لقيتو سيد العدة
وقالوا امو مجنونة).
عليك الله زول امو مجنونة يحبوه كيفن؟!
* وانتو دوركم شنو ..انتو ما كبار الشغلة دى ؟!
ـــ النصيحة، فى فنانات صوتهن كويس وبقبلن توجيهنا، لكن فى واحدات ماشغالات بينا الشغلة.
* طيب يا حنان، صوت لفت انتباهك؟!
ـــ أسرار بابكر، بالطبع...
* صحيح غنيتى حمادة دا فى إذاعة مونت كارلو؟!
ـــ فعلاً، إستضافونى فى فرنسا على الهواء مباشرة، وطلبها احد الخليجيين.. هم بقولوا (أتلف) بدل (بوّظ)، والمذيع لبنانى أصر اغنيها، وغنيتها ونالت رضا المستمعين.
* اغنيه لفنان عاجباك؟!
ـــ هل تدرى يانعسان لحسن عطية، واتذكر مرة مشى حسن عطية حفلة فى كسلا، الجمهور طلبها منو، قالو ليهو غنى لينا اغنية حنان بلوبلو (يانعسان).. قال ليهم دى غنيتى، بس هى بتغنيها أكتر منى.!
* الشهرة متعبة يا حنان؟!
ـــ متعبة وما متعبة .. بتعرفك على ناس، وبتحرمك من ناس..
* ورجعتى تانى لحكاية الرقيص القديم بعد غيبة؟!
ـــ قلت ليك ده إستعراض، حاليا كونت فرقة استعراضية بصطحبها فى مناسبات الافراح فقط.
* مكسبك من الفن شنو؟!
ـــ محبة الناس.
* وخسارتك؟!
ـــ تلفتت كمن تتفادى أن يسمعها أحد: نبيشة الناس..!
* والشائعات؟!
ـــ اخذت نفسا عميقا وردت، كتلتنى كم مرة، وآخر مرة قالوا حنان ماتت مع اللحو فى حادث بطريق مدنى..!
* حنان وين من التلفزيون؟!
ـــ ممنوعة من اللمس، الغريبة حفلات دعم التلفزيون اول زول بجوهو بلوبلو ، وبغنى ليهم الا شاشتهم دى مانعنى من وصالا..!
* والسبب؟!
ـــ كان عرفت كلمنى، أنا ذانا ما عارفة.


* نص حوار نشرته صحيفة حكايات في عدد اليوم السبت

Post: #62
Title: Re: بصراحة كدا...حنان بلو بلو أحلى من ندى القلعة...!!
Author: bashir adam abdalla
Date: 04-20-2008, 01:08 AM
Parent: #1

لكنما بوست يجنن


Post: #63
Title: Re: بصراحة كدا...حنان بلو بلو أحلى من ندى القلعة...!!
Author: Ahmed Yousif Abu Harira
Date: 04-20-2008, 06:17 AM
Parent: #62

المذيعة كانت مكيفاني جدا:

- أها حتغني لينا شنو ؟
- حغني ليكم اغنية تم تم
- الاغنية اسمها تم تم؟


واصلت عادي ..لا خجلت ولا حاجة

Post: #66
Title: Re: بصراحة كدا...حنان بلو بلو أحلى من ندى القلعة...!!
Author: Shamael Elnoor
Date: 04-20-2008, 07:14 AM
Parent: #63

والله يبدو انو السودان كلو حضر السهرة دى لكن مافيها اعلانات ليه ؟؟؟ الشركات دقست!!



بلو بلو تمارس الفن منذ تاشرات عمرها وهى اول وآخر فنانة استعراضية سودانية جمعت بين الجمال السودانى وخفة الروح والرقص الابداعي ،، لكن جات الحكومة وشريعتها بتاعة 93 انتهت نهائي من نشاط حنان ولا حتى فى الساحة الغنائية ناهيك عن الرقص ،، حنان صاحبة "الكرسي جابر"
والله الزولة دى فنانة جدا من ناحية الأداء والرقص لكن الصوت والاغانى ربما تكون متواضعة لكنها ما اكثر تواضعا من ندى القعلة التى اخذت شهرة وعظمة فى الفاضي
المذيعة مهما اجتهدت ما كان ح تقدر تطلع من حنان اى جملة مفيدة ، حنان كانت متحفظة فى اجاباتها لدرجة التوتر ، لكن عجبنى ردها على الخلاف بينها وبين ندى القعلة ،،اتقططططططططططعت فى الاجابة،،

فلترجع حنان الاولى بقصة الشعر المردجات والفستان الاسود والكرسي جابر

شكرا هارمونى على اعادة زكريات الايام الجميلة ،، لكن يا الجعيلي ماااااااااااا اظن يمشوها ليك ساكت دي

Post: #67
Title: Re: بصراحة كدا...حنان بلو بلو أحلى من ندى القلعة...!!
Author: عبدالله كع
Date: 04-20-2008, 07:20 AM
Parent: #63

مكنونه.....

المزيعه شديده - بلوبلو زي الليل - وندي القلعه قنبلة

ولكن ...............



-
Quote: أها حتغني لينا شنو ؟
- حغني ليكم اغنية تم تم
- الاغنية اسمها تم تم؟


واصلت عادي ..لا خجلت ولا حاجة


انا برضو واصلت عادي .... بس خجلته من حاجات تانيه حامياني

Post: #65
Title: Re: بصراحة كدا...حنان بلو بلو أحلى من ندى القلعة...!!
Author: عبدالله كع
Date: 04-20-2008, 07:03 AM
Parent: #1

مكنونه سلامات .

من عام 1980 الي 2008

احلي 7 اصواته نسائيه في السودان 3

اسرار بابكر وحنان النيل

وبس.......

ــــــــــ

ما اكذب عليك حنان بلو بلو زكينا حفلاته في الخرطوم كلو

لانها اتت بشي جديد (الكشف )

Post: #68
Title: بصراحة ... حنان بلوبلو أحلى من ندى القلعة ..
Author: Mohiedin Sir El Khatim
Date: 04-20-2008, 07:33 AM
Parent: #1

Quote: المذيعة كانت مكيفاني جدا:

- أها حتغني لينا شنو ؟
- حغني ليكم اغنية تم تم
- الاغنية اسمها تم تم؟


واصلت عادي ..لا خجلت ولا حاجة


لا تعليق ....

Post: #69
Title: Re: بصراحة ... حنان بلوبلو أحلى من ندى القلعة ..
Author: mohmmed said ahmed
Date: 04-20-2008, 08:08 AM
Parent: #68

حذف للتكرار

Post: #70
Title: Re: بصراحة ... حنان بلوبلو أحلى من ندى القلعة ..
Author: mohmmed said ahmed
Date: 04-20-2008, 08:08 AM
Parent: #68

حذف للتكرار

Post: #71
Title: Re: بصراحة ... حنان بلوبلو أحلى من ندى القلعة ..
Author: mohmmed said ahmed
Date: 04-20-2008, 08:08 AM
Parent: #68

الاخ ابوحريرة
فتحت البوست عشان اعلق على قصة تم تم

ولقيتك سبقتنى ليك الشكر

بالله المذيعة الطيرة

دى ما عارفا التم تم ايقاع ولا اسم اغنية

وقادانا
ومتشالقا حديث عن الغنا وكلام خارم بارم

غايتو الزول الاختار المذيعة دى
داير ليهو شحطة بصوت عنج معطون فى القطران من شهر

Post: #72
Title: Re: بصراحة كدا...حنان بلو بلو أحلى من ندى القلعة...!!
Author: منى على الحسن
Date: 04-20-2008, 10:05 AM
Parent: #1

ممكونة ...سلامات

احكي قصة عن بلو بلو ...لما كان ليها شنة ورنة

كان جارنا واحد من الارزقية الفي الديمقراطية تاجر دقيق

ليهو ضل لما سموا الدقيق بي اسمو مرة عندو طهور ولدو

جاب حنان بلو بلو ...والحفلة بدت من عصرا بدري

ومن مسكت المكرفون وبدت تغني اتذكر اغنية مابلاقيني حبيب قلبي ريدو ما ليني

الكان الشارع كلو الناس بدت تجري الرجال كبار وصغار من الزاوية وجري علي الحلفة

وامي مدت راسها يا اولاد بتجروا مالكم قالوا ليها حاجة بلو بلو في الحي ما سامعة ..

قامت امي ردت وحات الله قايلة في انقلاب اصلا الرجال ديل ما بجريهم الا الشديد القوي

انا ما شفتهم جروا الا ايام الانتفاضة وهسي لي حنان بلو بلو شفو المحن ديل يا اخواني

واذكر مشينا الحلفةالقى الناس حتاهو قرض ما افضل عاقل ما اتهزا والمهم في الموضوع كان

القروش حتوها فوقها حت واتذكر عندهم قريبهم مغترب جاي من السعودية شايل الدولارات دي رزم كبها فيها

كانت بترقص والقروش كانت مفرشة في السجادة ...يا حليل زمن الاغتراب ما مش زي ناس قريعتي راحت انا

وصحبتي نحنا هسي غنماية مانقدر ننقط فيها...زمن والله دنيا ...

Post: #73
Title: Re: بصراحة كدا...حنان بلو بلو أحلى من ندى القلعة...!!
Author: الحاج حمد الحاج
Date: 04-20-2008, 10:37 AM
Parent: #72

Quote: الأخ العزيز الحاج حمد الحاج..
تحية كبيرة ليك و لكل ناس بحري..

و من ناس بحري..
لناس الغرب...

تسلمي يا ممكونة..

الملاحظة ان كثير من المتداخلين شاركوني الرأي انو المخرج تسبب في تشويه السهرة رغم أن جهد كبير بذل في الاعداد لها.

Post: #74
Title: Re: بصراحة كدا...حنان بلو بلو أحلى من ندى القلعة...!!
Author: sanaa gaffer
Date: 04-20-2008, 07:30 PM
Parent: #1

Quote: يا حليل زمن الاغتراب ما مش زي ناس قريعتي راحت انا

وصحبتي نحنا هسي غنماية مانقدر ننقط فيها...زمن والله دنيا ...



يا ممكونة ازيك ... ليكي وحشة .. ودائما مواضيعك بتلم الناس الحلوة ...


انتي يا منينة سيرة الكاشف اخوك دي مالك جايباها ؟؟!! ...

ما تخليها مستورة .. مش قالوا الصيت ولا الغنى ؟؟ !! ...

انا شخصيا ما باحب حنان بلوبلو ... ولا ندى القلعة .. غناهم ما فيهو اي تطريب ..

ممكن احضر عشان اتفرج على التياب والاكسسوارات وآخر تقاليع الحنة ...

لكن غنا ؟؟ مستحيل ... ياخي الطرب دة ليهو ناسو ..وبنياتنا ديل ما زولات طرب .. زولات هجيج ساكت ...

لكن مؤمنة باختلاف الاراء التي تمنع بوار السلع ..

Post: #75
Title: Re: بصراحة كدا...حنان بلو بلو أحلى من ندى القلعة...!!
Author: Mannan
Date: 04-21-2008, 07:29 AM
Parent: #1

بوست كارب .. دخلت ومرقت منو وبطاريتى ملانة... ما اروع صوت أمال النور.. صوتها ملائكى...
شكرا ممكونة على البوست الجميل ده...
نورالدين منان

Post: #77
Title: Re: بصراحة كدا...حنان بلو بلو أحلى من ندى القلعة...!!
Author: خالد حامد الجزولي
Date: 04-22-2008, 09:16 AM
Parent: #75

بصراحة كدة وبدون أي مجاملة بلوبلو أحلى وأجمل وصوتها مليء بالطرب وماخد شوية من أسممها
لا اقول ذلك لانها موردابية أو قرقورة ولدت وتربت بهذا الحي العريق (الهاشماب) انحيازاً لهاولكنها الحقيقة
السهرة للأسف لم أشاهدها لاني كنت مع البودي جارد على الام بي سي 4 ولكن حتماً ستعاد وساعتها سوف نكتب باسهاب عنها
محبتي

Post: #78
Title: Re: بصراحة كدا...حنان بلو بلو أحلى من ندى القلعة...!!
Author: عثمان دغيس
Date: 04-22-2008, 10:48 AM
Parent: #1

غايتو حنان سمممممممممممحة ورقااااااااااااااااااااااااصة ..
لكن ندى يعني سميحة ما عندها عوجة إلا دمها تقيل ولتخة وفاكاها في نفسها ...

والإتنين كفنانات ما يساون بتاع باركشن حريف ...!
مع إحترامي لكل العازفين والفنانين ...









__________________________
أما المخرج ...

فده الله يلمني فيهو عشان أعضيه فوق صنقوعه ..
ده شنو ده ياخ ...

Post: #79
Title: Re: بصراحة كدا...حنان بلو بلو أحلى من ندى القلعة...!!
Author: Hussein Mallasi
Date: 04-22-2008, 05:29 PM
Parent: #78

Quote: اتمنى يا ملاسي تسمع لي آمال اداء
فردي حتعرف قدر شنو الانسانة دي صوتا جميل

كل ما اسمع توجيهات امال النور لنجوم الغد أتساءل:
أليست هي أولى بها !!

______
امال النور خير مثال لتحكم
السياسة بأذواق المستمعين!

Post: #80
Title: Re: بصراحة كدا...حنان بلو بلو أحلى من ندى القلعة...!!
Author: Hussein Mallasi
Date: 04-22-2008, 06:56 PM
Parent: #79




الصورة تم التقاطها في حفل زفاف والدة:




Post: #81
Title: Re: بصراحة كدا...حنان بلو بلو أحلى من ندى القلعة...!!
Author: خالد علي محجوب المنسي
Date: 04-22-2008, 07:15 PM
Parent: #80

الممكونة وصابرا والله يصبرك
تحياتنا طيبات ... سلااام
والله قمة من الروعة بوستاتك .. والله دوماً بقول ممكونة دي
بس ممكونة بالروائع والجمال جواها ولم تجد مساحة تبرزها ...

هارموني دي مني ؟ مذيعة ؟ولا فنانة ؟ ولا قناة تلفزيونية؟ للأسف بتخجل
ما بتجي عندنا هنا ...

تحياتي ومودتي ممكونة الشاي والسكر رسلتهم وصلو ؟؟

Post: #82
Title: Re: بصراحة كدا...حنان بلو بلو أحلى من ندى القلعة...!!
Author: رشا سالم
Date: 04-27-2008, 04:55 PM
Parent: #80

Quote: الصورة تم التقاطها في حفل زفاف والدة:


الله يجازي محنك يا ملاسي ..طلعت الصورة دي من وين?

Post: #83
Title: Re: بصراحة كدا...حنان بلو بلو أحلى من ندى القلعة...!!
Author: نادية عثمان
Date: 04-27-2008, 05:54 PM
Parent: #82

ماعرفتي الحصل لي بلوبلو ياممكونة ؟!! ( وش حزين ) !!

Post: #84
Title: Re: بصراحة كدا...حنان بلو بلو أحلى من ندى القلعة...!!
Author: Osama Mohammed
Date: 04-27-2008, 06:07 PM
Parent: #1

Quote: قالت بلولو: حسى ناس قريعتي ديل قاعدين يغنوها كده:
(دق الباب وجانا
أنا جريت ليهو حفيانة
لقيتو سيد العدة
وقالوا امو مجنونة).
عليك الله زول امو مجنونة يحبوه كيفن؟!


دي اكتر حاجة عجتبني ...

لكن بوست تٌحفة......