أحقد غنماية في العالم ..

أحقد غنماية في العالم ..


06-22-2008, 04:28 AM


  » http://sudaneseonline.com/cgi-bin/sdb/2bb.cgi?seq=msg&board=133&msg=1214849398&rn=0


Post: #1
Title: أحقد غنماية في العالم ..
Author: Emad Abdulla
Date: 06-22-2008, 04:28 AM


( منقول بتصرف , بعد إذن أحمد العربي و فيصل نوبي و .. جدي عليهو الرحمة ) ..
و الأغنية مهداة إلى : تمبس و دكين في محنة عشقهما الطراوة و الريدة الأم فكو .. و رجاهم للري .
و أيضاً بمناسبة إستشراء ( الهم ) العام و الغم الوارم .. و الزهج المكرضم .

.....
" اتسببت في نهاية أول حب في حياتي .. غنماية "
- المهاتما غندي -

كنت بدرس في الخرطوم الجديدة الثانوية .. و هي ( حبيبتي .. و ليست الغنماية ) بتدرس في الخرطوم الجديدة بنات .
يوم لقيتها كاتبه إسمها بقلم عريض جدا على وش الشنطة بتاعتها ( فالحبيبات أرعنات متهورات ) ..
زعلت طبعا لأنه كنا بنمشي من بيوتنا لحد المدرسة كداري , و الشوارع العالم مكسرة فيها في النواصي و تحت الشدر ..
يعني كل الأمة الهاملة كاحلة , و يقومو يقرو اسمها و يعرفوهو .. و تجيب لينا سمعة , صاح ؟؟
المهم .. حنبكتَ و غضبت لحبي الذي بقى هامل و حبيبتي التي بقت على كل لسان ..
فقلت ليها : يا حبيبتي , تجيني الليلة في البيت , عندي معاك موضوع حياة أو موت ..
( و كنت جادي .. زول بيحب و مجروح و الكرامة سايلة و ما داير أي مفاهمة ) ..
خافت بت الناس و طوالي المسا جات بيتنا , و البيت كان جالوص - لكن كان مزبل تمام التمام .. أخلص فيهو عمنا أحمد الزبال و ما قصر - ..
هي بيتهم سمح و مطرطش و عندهم عتبات زي سلم سلم كده .
في بيتنا مافي مكان أحب فيهو حبيبتي غير زقاق الغنم الكان بيننا و بين الجيران .. فيتنا ميتين متر و يعج بكمية ناس .
زقاق الحب عندنا ضيق و في نهايتو زريبة الغنم الفيها زي خمسة غنمايات , سخلتين و أمهاتن ..
الأم الكبيرة لونها بني كده وللا طوبي طوبي ما عارف .. لون أشتر و سخان ..
كانت غنماية بايخه و دمها تقيل .. و تمشي ليك بررررراحه .. شكلها أهبل , أسغل غنماية في العالم .
المهم الغنماية التافهة دي كان أظن عندها قحة شديدة - بتكون أزمة - في اليوم المهبب داك ..
جيت أنا و حبيبتي عشان أديها محاضرة في الأخلاق و كيفية مراعاة مشاعري أنا الحبيب الذي يكتب فيها الشعر و يباري القمرة من تمغرب الدنيا , و لغاية ما تختفي قمرة حبنا ورا حيطة ناس وقيع الله جيراننا , و هي تعمل عمايلها الما كويسة دي .
المهم .. و قفنا في الزقاق الضلمة داك قريب لبيت الغنم ..
- و قد شهد ذاك الزقاق تشابك أيدينا و رميشنا و كتيل عيوننا في الضلمة ديك , و كيف كل مرة أقول ليها : آآآآآآآه .. و كل مرة برضو هي تقول لي : و الله أنا زاتي , و نفضل كده نتوهوه معاينين لي بعض , معاينين معاينين معاينين زي ساعتين كده -
و طبعا الرمسنة دي وسط مسرح الريحة و البرطعة و الحاجات العجيبة .. حب أصلي .
فقام مع الحنفشة العشقية ديك و جرح قلبي الغائر و كرامتي التي هي في الواطـة .. ابتديت أسمع البنيه الدرس الحفظتو ( فقر و حنك بيش ) :
ليه تجرحي مشاعري كده ؟؟ راعي لخاطري .. أنا بغير .. أنا و الله بي حركاتك دي بقوم يوم أدقك .. و ...
( كُحك .. كُحُك ) إتهجمتَ .. أديتا صنّة .. وعملت ميت ..
تاني : كُحُك , كُحُك ..
إنا لله ..
الغنماية المتخلفة ابتدت السيمفونية الكُحية بتاعتها , طوالي اتحرجت جدا جدا ( والواحد في الحب بتحرج بسرعة ) ..
المهم الكحة استمرت و أنا أرفع في صوتي عشان أغطي بيهو على صوت الغنماية المتخلفة ديك ..
و بلغ حسي عنان السماء كواريكاً ..
ناس وقيع الله كوركو بالحيطة : هوووووووووي ده منو ده ؟ .. آآآآآ ؟؟
و الغنماية الحاقدة العيانة - الله لا كسبها - تزيد عليها العشراقة .. و تديها كحاااااك .. كحيييك .. كحك .. كحك ..
و أزيد أنا الكواريك و النبيحة .
تقوم بعد شوية الغنماية المخلوق الفضيحة الغبي , تقوم تتزنق كحة و تدخل في السيمفونية صوت تاني ..
أي و الله ..
صوت شين و مطرطر و بايخ بياخة و محرج , وبعد ده عندو ريحة ..
حبيبتي الحقارة ابتدت تتنخق ضحك و هي مدنقره راسها عشان ما أشوفها بتضحك ..
( كانت دايماً بتراعي مشاعري , راعاية كانت الله يطراها بالخير ) ..
زعلت , و طوالي حسيت بـ ( لا يسلم الشرف الرفيع من الأذى ) و انتفضت غضباً لحبي المراق سليقة ساكت ..
: تضحكي لأنه نحنا بروليتاريا كادحة و عندنا غنم ؟؟
أيوه عندنا غنم .. و أيوة غنمنا بيقحو و يظـ....ـطو .. أيوه نحنا فقرا ..
شغال أنا محاضرة في القيم الإنسانية النبيلة ( و الغنماية المنعولة - الله يكرم السامعين - شغالة فوق تحت .. كُحك .. طاط .. كُحك .. طاط .. كُحك .. طاط ) .
اتعقدت عقدة عمري في تلك الهنيهة المصيرية , فهرشت الحبيبة :
خلاص .. أنسيني .. أنسي قلبي الحباك .. وداعا أيها الحب , فرتقي ( وهي الهبلة الحقارة .. السمحة , ميته من الضحك ) .
حبيبتي مرقت بي جاي .. كرضمت ليك يدي وأديت الغنماية أم دلدوم بكل قوتي لمن نفسها اتقطع .. و قعدت جنبها أندب حبي الراح سمبلة ..
الغريبة بعد أم دلدوم ديك الكحة راحت منها .. !!!!!

و مضت حبيبتي شايلةً معاها حبي الأول و حطام قلبي و الحاجات ..
الله لا تاجر الغنم و لا عوضهم ..
فهم السبب في ضياع الحب في العالم .




..

Post: #2
Title: Re: أحقد غنماية في العالم ..
Author: Tagelsir Elmelik
Date: 06-22-2008, 04:38 AM
Parent: #1

ياخ حليمة من يوم شفناها كاتبة اسما فى الشنطة
ما جابت سيرة عنماية!!! بالله كان فى اركان نقاش فى زقاق الغنم؟؟
بتقيفو بى تكالات؟؟

Post: #3
Title: Re: أحقد غنماية في العالم ..
Author: Yassir Tayfour
Date: 06-22-2008, 04:51 AM
Parent: #2

عشان الحركات دي يا عماد زول ما بشبه معاناتي، صحبة ساكت ما بصاحبو خليك من زولة وأحبها كمان!
____
يا عماد الغنماية المُلحقة دي ما غنماية هامش ولا غنماية زرائب وبيوت جالوص.. دي غنماية عندها جواز سفر وبطاقة صحة وبتحب كمان..

Post: #6
Title: Re: أحقد غنماية في العالم ..
Author: Emad Abdulla
Date: 06-22-2008, 05:01 AM
Parent: #3


Quote: دي ما غنماية هامش ولا غنماية زرائب وبيوت جالوص
دي ما غنمايتنا يا ياسر ياخي ..
بتاعتنا بتمشي بررررررراحه ..
و الله غنمايتنا لو أخت ليك صورتها هنا , لو ماعملت ليكم شلل أطفال و تدرن في الكبد , أبوي ما جابني .


Post: #4
Title: Re: أحقد غنماية في العالم ..
Author: Emad Abdulla
Date: 06-22-2008, 04:53 AM
Parent: #2


Quote: بتقيفو بى تكالات؟؟
ده نظام تبخيس ( وقفات الحب ) يعني وللا كيف ؟
إنت زول حقّار بس ..
أقول ليك هي تاكلة على حيطة و ( أنا حيطة ) و يديننا متشابكات في لهفة ..
تقول لي تكالة ؟؟




Post: #5
Title: Re: أحقد غنماية في العالم ..
Author: وضاحة
Date: 06-22-2008, 04:54 AM
Parent: #1

Emad

احلى رومانسية احساس بكون جميل

تعرف يا عماد انت جربت الحب ورمانسية نفسى احب واجرب

ربنا يصبرني على ما ابتلاني

البيوت فلل والفرش ريش نعام والعربية كروزير والعطور بارسية ومافى احساس بالحب

( عيون مليانة دموع)

Post: #7
Title: Re: أحقد غنماية في العالم ..
Author: Emad Abdulla
Date: 06-22-2008, 05:05 AM
Parent: #5


Quote: ربنا يصبرني على ما ابتلاني
البيوت فلل والفرش ريش نعام والعربية كروزير والعطور بارسية ومافى احساس بالحب
ياخ أمشي بلا فقر معاك ..
تلقاكي حبيتي في بيت الجداد .



Post: #8
Title: Re: أحقد غنماية في العالم ..
Author: وضاحة
Date: 06-22-2008, 05:17 AM
Parent: #7

Quote: تلقاكي حبيتي في بيت الجداد .


يا ريت كنت جيت كتبت جداد حبنا

Post: #14
Title: Re: أحقد غنماية في العالم ..
Author: عماد محمود علي
Date: 06-22-2008, 09:34 AM
Parent: #7

Quote: و مضت حبيبتي شايلةً معاها حبي الأول و حطام قلبي و الحاجات ..
الله لا تاجر الغنم و لا عوضهم ..
فهم السبب في ضياع الحب في العالم .

( ياعمده إنت الغنماية دي ما عندها تيساً يسكتها ) تعرف يا عمدة بصراحة كده ... الغنمائة مي غلطانة ... إنت الغلطان ... يعني ماحبكت إلا جنب الزريبة دي .. ياخي إن شاء الله جوه الـ ..... بس هنا تبقى إنت الغلطان وماعندها أي ذنب الغنومة دي ... تبرى وتستبرى غنومتي دي .... قال حمبكانه قال .. أها خم وصر ... مع تحياتي للغنومة وإن شاء الله تكون شمت العافية ...


مودتي


عماد محمود

Post: #23
Title: Re: أحقد غنماية في العالم ..
Author: Emad Abdulla
Date: 06-22-2008, 12:56 PM
Parent: #14


يا عماد ..
عندك كلمة طيبة قولها ..
ما عندك أمسك خشمك عليك .

قال تيس قال !!!؟
كلام عجيب و غريب .




Post: #9
Title: Re: أحقد غنماية في العالم ..
Author: محمد أبوالعزائم أبوالريش
Date: 06-22-2008, 06:26 AM
Parent: #1

Quote: حب أصلي .


ياخ قوم بلا أصلي معاك ....

بعدين تعال ... تدي الغنماية أم دلدوم ليه؟ .. وكيف تجرؤ يا هذا؟ .... زريبتكم دي ما كان فيها "تيس" يدافع عن حريمو؟

Post: #24
Title: Re: أحقد غنماية في العالم ..
Author: Emad Abdulla
Date: 06-22-2008, 01:05 PM
Parent: #9


أبو العزايم ياخ براحه ..
Quote: زريبتكم دي ما كان فيها "تيس" يدافع عن حريمو؟
يعني كان ح يدافع أحسن من كلامك ده ؟؟
بعدين الزمن داك مافي حاجة متاحة لإحداث الأذى غير أم دلدوم ..
لا سم فيران و لا مسدسات .. و لا مؤتمر وطني .


Post: #10
Title: Re: أحقد غنماية في العالم ..
Author: عبدالله كع
Date: 06-22-2008, 07:11 AM
Parent: #1

عماد سلام حبيب

يا عمدة واقسم بالله العظيم اخوك ميت من الضحك عديل كدة ...
قصة ماثرة جدا جدا ومضحكه للدين
هههههههههههههههههههههههههههههههاي

يا حبا نفس الزقاق ( الحب ) عندنا.. نهايته بيت الغنم وصدقني نفس الغنمايه الكبيرة
اللونه طوبي .. جابتها الحاجه من البلد .. نفس المشيه العويرة وعندها ععتود والله كان
بياكل القطن حق المربته ودمو تقيل وتافه خالص .. وصعلوق صعلقه اجارك الله .
حبينا في الزقاق حب ماعدي .. بنفس الروئح الكحه الفوق و...
ـ،ـ،،ـــ،ــ بس زولتي كانت بلوتاريا يا حبا ما عندها الحنكش السحسحه عندهم الغنم
يعني با ختصار 90% حب في الزقاق ده زقاق الحب النهايته بيت الغنم


ــــــــــ
كميه وشوش ميته من الضحك

Post: #32
Title: Re: أحقد غنماية في العالم ..
Author: Emad Abdulla
Date: 06-22-2008, 05:19 PM
Parent: #10


كع ياخي أحيّ فيك روح التضامن و الأخوة و المودة ( الراضعة ) لبن أمها ..
شديت من أزري و رفعت لي راسي ياخ ..
أنا كنت قايلني ( الحبيب أبو ريحة ) براي ..
لقيتك صنديد و الله و قابض على ضنب القضية .

معاً نحو تأصيل حب الزقاقات لأجيالنا القادمات ..
معاً لمراحات بدون أصوات و روائح ..
معاً لحبيباتٍ يقدرن الهوى العذري .. و الحالة شديدة الأصالة للحبيب .
و يقبلن بالكفاف الذي توفره البيئة المعيزية .

ينصر دينك يا كع .


Post: #11
Title: Re: أحقد غنماية في العالم ..
Author: عزاز شامي
Date: 06-22-2008, 07:11 AM
Parent: #1

مشكلتك كانت جغرافية بس،

في حتت تانية،

الغنماية كانت حتكون (شاهد عيان) ...

Post: #33
Title: Re: أحقد غنماية في العالم ..
Author: Emad Abdulla
Date: 06-22-2008, 05:29 PM
Parent: #11


Quote: مشكلتك كانت جغرافية بس
طيب يا عزاز ..
ياهو ده العرفتي تقوليهو في شأن أزمة حياتي ؟؟
طيب و المشكلة التاريخية ؟؟
و الإجتماعية ؟ .. و الانسانية ؟ ..
Quote: في حتت تانية، الغنماية كانت حتكون ( شاهد عيان ) ...

أجل .. نعم .. بلى

.....
أريتا شهادة السرور كانت تكون ..
ثم الكلام على هنا ياخ ( و أشار لجهة القلب .. و الجيب ) .


Post: #12
Title: Re: أحقد غنماية في العالم ..
Author: عثمان دغيس
Date: 06-22-2008, 08:50 AM
Parent: #1

عمدة يا فنان ..
تعرف يا حبة ..
الغنماية دي هي الأدت حبكم طعمو ..
وبعدين ريحة المراح زااته ما ليها مؤول ..
هو بالله زول بيتم ميتين متر وفيهم ميتين زول .
البحب ليها شنو ..
قال كاتبه إسمها في ضهر شنطتها قال ...!

هي زاااته زولة تقشر بي إسمها دي يحبو ليها شنو ..؟!!؟!؟!
ولا كنت داخل علي طمع ؟؟؟!
أحب غنمايتكم ياخ .....!

Post: #13
Title: Re: أحقد غنماية في العالم ..
Author: عمران حسن صالح
Date: 06-22-2008, 09:10 AM
Parent: #12

Quote: شغال أنا محاضرة في القيم الإنسانية النبيلة ( و الغنماية المنعولة - الله يكرم السامعين - شغالة فوق تحت .. كُحك .. طاط .. كُحك .. طاط .. كُحك .. طاط ) .

..
ولد مفعوص ....

Post: #39
Title: Re: أحقد غنماية في العالم ..
Author: Emad Abdulla
Date: 06-22-2008, 05:47 PM
Parent: #13


Quote: ولد مفعوص
منو هو ؟؟
ما أنا الكحيت يا عمران ..
الله !!!
التي قامت بالكححان هي الغنماية ..
أقرا كويس ياخينا .


Post: #38
Title: Re: أحقد غنماية في العالم ..
Author: Emad Abdulla
Date: 06-22-2008, 05:39 PM
Parent: #12


Quote: عمدة يا فنان ..
تعرف يا حبة ..
الغنماية دي هي الأدت حبكم طعمو ..
وبعدين ريحة المراح زااته ما ليها مؤول ..
قمنا ؟؟
مؤول ؟؟ مسخرة منك دي يعني و كلام مسغفاتية ؟؟؟
الحب أبو طعم ده يسمنّا ..
حبنا كلو ريحة بس ..
تشم ريحة الحبيبة بي جاي يصيبك سهم الله بي جاي ..
حب ( انفة ) ياخ .. و نخرتو شامخة .

....
Quote: أحب غنمايتكم ياخ
حبها يا عثمان ..
عشان تلبلب


Post: #15
Title: Re: أحقد غنماية في العالم ..
Author: خالد عبد الله محمود
Date: 06-22-2008, 09:47 AM
Parent: #1

يا عمدة
سلامات

تعرف حبكم ده كان زي إتفاق التراضي الوطني محكوم عليه بالفشل من قبل ما يبدأ ما تظلم الغنماية ساكت!!



* كامل تضامني مع الغنماية و من دربي ده ماشي على بارجريت باردو

Post: #16
Title: Re: أحقد غنماية في العالم ..
Author: محمد سنى دفع الله
Date: 06-22-2008, 09:51 AM
Parent: #15


Post: #57
Title: Re: أحقد غنماية في العالم ..
Author: Emad Abdulla
Date: 06-23-2008, 03:54 PM
Parent: #16


سنسن ..
ما تغشك نظرة الإغراء الجنباوية دي ..
من عوارتها مرات بترضع نفسها ..
يقوموا يلبسوها ( بستلة ) .


.....
لو في طريقة الزول كان لبسها البستلة دي في محل الريحة المشرتمة ديك .
يسعد مساك يا أسطى السني .



Post: #41
Title: Re: أحقد غنماية في العالم ..
Author: Emad Abdulla
Date: 06-22-2008, 06:00 PM
Parent: #15


Quote: تعرف حبكم ده كان زي إتفاق التراضي الوطني
ظلمتنا يا خالد ..
و الكلام ده لو ما إنت زول أخو كنت قاضيتك عليهو ..
ده قذف علني و على رؤوس الأشهاد .


.....
بريجيت باردو ؟؟؟
لو شافت الغنماية دي كانت إفترعت ( الجمعية العالمية لحماية المحبين ) .


Post: #52
Title: Re: أحقد غنماية في العالم ..
Author: عماد محمود علي
Date: 06-23-2008, 11:27 AM
Parent: #41

الوجيه عمدة
Quote: قال تيس قال !!!؟
كلام عجيب و غريب .

ولا غريب ولا حاجة .. الغنماية دي هسع لو كان التيس قااااعد جنبها وجكسها ذي جكيسك ده كان جاتها كحه .. ماياها الغيرة زاااتها الخلتها تكحكح كده ...
Quote: الغريبة بعد أم دلدوم ديك الحكه راحت منها ...

ماراحت علشان أم دلدوم بتاعتك راحت بعدما فشت غيرتها والبنية شتت ومشت ، يعني تااااني تكح لي شنو !!!

وبرضو تقول لي التيس وما التيس ....

مودتي

عماد محمود

Post: #59
Title: Re: أحقد غنماية في العالم ..
Author: Emad Abdulla
Date: 06-23-2008, 04:07 PM
Parent: #52


Quote: الغنماية دي هسع لو كان التيس قااااعد جنبها وجكسها ذي جكيسك ده كان جاتها كحه
ما كان جاتها يا عماد ياخ ..
كان جاتها الطاوية حبالها ..
لبلبة و عفار و كواريك .


....
الحمدلله لم نكن من ملاك التيوس ..
كان ممكن التيس يتهور و يتغول على " كافة الإناث " في الزقاق داك ..
و قيل قد يفرط في التهور و يقُش الجنسين ..
الله كريم .. صاح ؟؟



Post: #65
Title: Re: أحقد غنماية في العالم ..
Author: عماد محمود علي
Date: 06-25-2008, 06:56 AM
Parent: #59

العمدة ...
Quote: و قيل قد يفرط في التهور و يقُش الجنسين ..
الله كريم .. صاح ؟؟

الله يجازي محنك .... ياخي دي بالغت فيها عديييييل كده ، كتلتني من الضحك .. قلت لي .... ههههههههه .
صاح .... وألفين صاح كمان . غايتو جنس غايتو ... وفعلاً الله كريم ....

مودتي


عماد محمود

Post: #17
Title: Re: أحقد غنماية في العالم ..
Author: انعام عبد الحفيظ
Date: 06-22-2008, 09:54 AM
Parent: #1

Quote: الغنماية المتخلفة ابتدت السيمفونية الكُحية بتاعتها , طوالي اتحرجت جدا جدا ( والواحد في الحب بتحرج بسرعة ) ..


Quote: حبيبتي الحقارة ابتدت تتنخق ضحك و هي مدنقره راسها عشان ما أشوفها بتضحك ..
( كانت دايماً بتراعي مشاعري , راعاية كانت الله يطراها بالخير ) ..
زعلت , و طوالي حسيت بـ ( لا يسلم الشرف الرفيع من الأذى )


Quote: خلاص .. أنسيني .. أنسي قلبي الحباك .. وداعا أيها الحب , فرتقي ( وهي الهبلة الحقارة .. السمحة , ميته من الضحك ) .


والله حب وحبيبات زمان ديل كانوا سمحين خلاص

Quote: حبيبتي مرقت بي جاي .. كرضمت ليك يدي وأديت الغنماية أم دلدوم بكل قوتي لمن نفسها اتقطع .. و قعدت جنبها أندب حبي الراح سمبلة ..
الغريبة بعد أم دلدوم ديك الكحة راحت منها .. !!!!!




الكحة راحت ما من أم دلدوم لكن أظنها

غنمايتك دي حاسدة وبقرانة بس

Post: #61
Title: Re: أحقد غنماية في العالم ..
Author: Emad Abdulla
Date: 06-23-2008, 04:21 PM
Parent: #17


إنعام ..!!!
Quote: حب وحبيبات زمان
إتصلحي معانا في الكلام يا زميلة ..
ناس زمان بتاع مين ؟؟
الكلام ده قريبات دي .. تلاتين أربعين سنة كده ..
Quote: غنمايتك دي حاسدة وبقرانة بس

Quote: مش شغلك




Post: #18
Title: Re: أحقد غنماية في العالم ..
Author: Khalid Osman Jaafar
Date: 06-22-2008, 09:55 AM
Parent: #1



سلام يا عماد وضيوفه

مبااااااااالغة

الحمد لله كنت في المكتب براي لمّا قريت القصة دي






Post: #62
Title: Re: أحقد غنماية في العالم ..
Author: Emad Abdulla
Date: 06-23-2008, 04:25 PM
Parent: #18


بختك الكنت براك ..
براك دي زمن زمان ما كانت موجودة ..
محل ما تمشي ناس ناس ناس ..
أو غنم .


تحياتي يا خالد



Post: #19
Title: Re: أحقد غنماية في العالم ..
Author: تماضر الخنساء حمزه
Date: 06-22-2008, 10:05 AM
Parent: #1

دي غيرة ساكت من الغنماية

Post: #20
Title: Re: أحقد غنماية في العالم ..
Author: Maysoon Nigoumi
Date: 06-22-2008, 10:11 AM
Parent: #1

lol
تاني
lol
يا عماد

Post: #21
Title: Re: أحقد غنماية في العالم ..
Author: rosemen osman
Date: 06-22-2008, 10:21 AM
Parent: #20

أها يا عماد بركة الله ورسول الله
فى كل زقاق تطلع ليك غنامية






أمرأة حاقدة

Post: #22
Title: Re: أحقد غنماية في العالم ..
Author: اسامه خليفه
Date: 06-22-2008, 11:13 AM
Parent: #1

الاح عماد


للغنم احقاد كما للمكوجيه احلام ...


كان عليك ان تطلق عليها غنماية حبنا علي وزن صرصوراية حبنا رغما عن حقدها ..


حقا انت الابداع كله....

كل التقدير....

Post: #25
Title: Re: أحقد غنماية في العالم ..
Author: Osman Musa
Date: 06-22-2008, 04:13 PM
Parent: #22



عماد ولايهمك دى
غنماية مابتستحى .
فى داعى تكشف حالكم ؟
وبعدين يعنى الواحد يحب وين؟
دى غنماية دكتاتورية شديد .

Post: #26
Title: Re: أحقد غنماية في العالم ..
Author: طارق جبريل
Date: 06-22-2008, 04:38 PM
Parent: #1


الله بيسألني يا عماد وقعت علي قفاي من الضحك
والله اولادي قايلني جنيت وفطيت سطر
ياخي حب البوليتارا دة لذيذ خلاص





Post: #27
Title: Re: أحقد غنماية في العالم ..
Author: حنين للبلد
Date: 06-22-2008, 04:49 PM
Parent: #1

عمدة

يا اخي اضحك الله سنك
ضحكتني لمن اتكلت على حيطة "حيطة مراح"

زمان كان في غنية حلمنتيش ماعارفة اتذكرتها من وين بي قصتك دي





التيس الشايل القلم

كتب في الحيطة احب الغنم

جات غنماية تتبسم


رافعة ضنيبها تقول علم


مامتذكرة باقي الحلمنتيش ده



لكن ظنيتك يا الجنى الغنماية دي عندها تار معاك...تكون حقرت ليها تيسها...ود الجيران قامت صرتها ليك "عفيت منها"



يعني انتوا قايلين براكم البتحبوا...وتتحبوا




"حنين للبلد في سعيها للإنضمم الى شلة"

Post: #29
Title: Re: أحقد غنماية في العالم ..
Author: خدر
Date: 06-22-2008, 04:58 PM
Parent: #27

Quote: كرضمت ليك يدي وأديت الغنماية أم دلدوم بكل قوتي لمن نفسها اتقطع .. و قعدت جنبها أندب حبي الراح سمبلة ..
الغريبة بعد أم دلدوم ديك الكحة راحت منها .. !!!!!


Post: #28
Title: Re: أحقد غنماية في العالم ..
Author: الطيب برير يوسف
Date: 06-22-2008, 04:56 PM
Parent: #1

حبي يا حب السجم
تاكل عليك حملي التقيل
تخذلني من قحة غنم
وين؟
في الزقاق..؟
يا إنت عيب
ما كان تقدّر ياخ تحن
شيل الفقر
زح الوهم
ابقالى تيس
لبلب نزق لامن تسكت ها البهم
لكن كمان معليش نقول
أصلو البحب جمب الزقاق
حبو بيضيع
في الريحة
في قحة غنم
-
مرثية وكدا

Post: #30
Title: Re: أحقد غنماية في العالم ..
Author: حنين للبلد
Date: 06-22-2008, 05:00 PM
Parent: #1

عماد




لو قلت ليك


قريت كلامك

ولي اسه ماقادرة اوقف نفسي من الضحك


لكن تصيح

هو محل غنمكم ده كان مربط ما اسمه زقاق

اسمه



حور


"حنين للبلد في سعيها للإنضمام الى شلة"

Post: #31
Title: Re: أحقد غنماية في العالم ..
Author: حنين للبلد
Date: 06-22-2008, 05:08 PM
Parent: #1

ود الصايم شابكنا

كااااااااااااااااااااك رغم انه مافهمت ليهاشيء



لكن يا عمدة تاني بس


مييييييييييييييييييييييييييع مع اضافة التقسيمة اللحنية

Post: #34
Title: Re: أحقد غنماية في العالم ..
Author: عبدالكريم الامين احمد
Date: 06-22-2008, 05:32 PM
Parent: #31

Quote: الله لا تاجر الغنم و لا عوضهم ..
فهم السبب في ضياع الحب في العالم .

حضرنا يا كبير
ولقيناك دوما عجييييييييب ياااخ..
وحليل غنماية حبوبتي السريرة ياااخ

Post: #35
Title: Re: أحقد غنماية في العالم ..
Author: معتصم ود الجمام
Date: 06-22-2008, 05:35 PM
Parent: #31

ام دلدوم ... ولا حقنة بنسلين دي الوقفت القحه دي
تسلم يا عمده ...

Post: #37
Title: Re: أحقد غنماية في العالم ..
Author: اساسي
Date: 06-22-2008, 05:38 PM
Parent: #31

Quote: البيت كان جالوص - لكن كان مزبل تمام التمام .. أخلص فيهو عمنا أحمد الزبال و ما قصر


ياخي تعرف الجماعة ديل كلهم وقعوا في الثدي الميت رضاعة وكانهم موعودين بالفطام نهاية الكتابة , وخلو اهم حاجة , انا اكتر حتة ريحتني ليك في الموضوع دا بيت الجالوص ومزبل جديد والمعلم الاشتغلوا اشتغل باخلاص وتفاني , ياخي بيوت الجالوص دي ليها سطوة ونكهات خاصة جدا , بيوت شامخة بالطريقة الصاح , بيت الجالوص وكانه الرحم يحتضن ساكنيه بحنية لا تجدها في سواه , عاين معاي واتذكر الحلة حلتكم وحلتان ولا اي حلة تلقي بيوتها الجالوصية هي البيوت التي يرتاح لها ابناء الحلة , تلقي نهاراتهم ومقيلتهم فيها تلقي حتي حفلات وداعهم و بارتياتهم الدكاكينية تقام فيها , اهلها لا محالة طيبون وكانما غمسوا في البشاشة , بيوت دائما ساترة حالها وساترة زائريها رغم انها تتحمل فوق طاقتها الا انها لا تكل ولا تئن , ابناء تلك البيوت دوما متفردين , الفنانين الرسامين الشطار والتفاتيح بنو تلك الديار الجالوصية . بخلاف تلك البيوت الاسمنتية والتي صدق المثل المصري فيها ( ايه ياخد الريح من البلاط)
ولا شي

Post: #40
Title: Re: أحقد غنماية في العالم ..
Author: عصام الجيلي
Date: 06-22-2008, 05:54 PM
Parent: #31

تعرف ياعمدة والله العظيم خليتني أضحك في الصلاة
ياخي مالبركة الماكانت غنمايتك حمار
تعرف ذكرتني وأحد صاحبنا كان بيحكي لي قال لي قبل كم سنة كدا
كنت جاءي من الخلا " الحواشة يعني" وراكب الحمار والساعة ديك كانت ساعة فطور
والطريق بجيبك بمدرسة البنات , وللتسودا البنات طالعات للفطور المهم
لقيت نفسي عامل تقاطع مع البنات وأنا راكب الحمار من غير قصد يعني
بعدين عند التقاطع قوم يالحمار أعمل نفس عملية الغنماية بتاعة عادل دي
وتعال شوف البنات من الضحك قعدن في الواطة .. وتعال شوف أخونا موسي من الخجلة
في الساعة ديك كان بيتمني لو الواطة تتشق وتبلعوا بعدين
نزل من الحمار وجاء راجع للبنات ويتحلف ويتقطع من الحليفة
علشان يوضح للبنات إنو الحمار هو العمل العملية الوسخة دي ..

Post: #36
Title: Re: أحقد غنماية في العالم ..
Author: شول اشوانق دينق
Date: 06-22-2008, 05:38 PM
Parent: #1

تصدق يا عماد إنت زول نصيبة (بالنا)
.
.
.
بعدين وين الرافة بالحيوان ياخ؟! ام دلدوم عديل كده ياخ ما بالغتا؟





إقتراح:
من مداخلتى ده وإنت طالع (لو إنت فى السودان) اول غنماية تقابلو فى الشارع يحلها الحلال... امسكها وعضيو فى اضانها... سمح ولو إنت ما فى السودان... عليك بتطبيق الإقتراح حال وصولك إلى السودان

تسلم كتير يا عماد ... ياخ خليتنى اضحك ذى المجنون

Post: #43
Title: Re: أحقد غنماية في العالم ..
Author: على محمد على بشير
Date: 06-22-2008, 06:23 PM
Parent: #36

Quote: غنمنا بيقحو و يظـ....ـطو .. أيوه نحنا فقرا ..


عزيزى القارئ

خت حرف الراء بعد الظاء
وشوف الراجل دا كان بيحب فى ياتو ظروف

جاتك نيله ياعماد .. انتا وحبيبتك وغنمايتكم الظراطه
مسختوا علينا الحب ولبن الماعز

Post: #44
Title: Re: أحقد غنماية في العالم ..
Author: خالد عويس
Date: 06-22-2008, 06:26 PM
Parent: #36


عماد

Quote: شغال أنا محاضرة في القيم الإنسانية النبيلة ( و الغنماية المنعولة - الله يكرم السامعين - شغالة فوق تحت .. كُحك .. طاط .. كُحك .. طاط .. كُحك .. طاط ) .
اتعقدت عقدة عمري في تلك الهنيهة المصيرية , فهرشت الحبيبة :
خلاص .. أنسيني .. أنسي قلبي الحباك .. وداعا أيها الحب , فرتقي ( وهي الهبلة الحقارة .. السمحة , ميته من الضحك ) .
حبيبتي مرقت بي جاي .. كرضمت ليك يدي وأديت الغنماية أم دلدوم بكل قوتي لمن نفسها اتقطع .. و قعدت جنبها أندب حبي الراح سمبلة ..
الغريبة بعد أم دلدوم ديك الكحة راحت منها .. !!!!!


غايتو لو اتفصلت من شغلي بي سببك بجيك طاير في عينك!!

ياخ انت ما لقيت مكان تحب فيهو إلا وسط الغنم؟؟
ياخي في (حب فوق هضبة الهرم)..(حب على النيل)..(خب على الدانوب) حاجات راقية وكدة، انت يا المصيبة تمشي تحب البت الحنكوشة أم بيتا مطرطش وفوقو زي السلالم سلالم كدة، في نص الغنم ؟؟ غايتو كويس وقفت لحد كدة وما كان في تيس كمان ..كان خربت اكتر من كدة.
زمااااان في القولد، ما زمااان خالص كمان، يعني زمان شوية ناس مكتب شنو كدة ما عارف قام جابوا ليهم (تيس أجنبي) يعني أشقر وعيونو خضر ومتربي في بلاد برررة، قالوا عشان يحسن بيهو النسل (طبعا ينطبق على الكائنات الهناك كلها بما في ذلك ..نحن) المهم.. الناس اتخمخمت جات من كل فج عميق العميان شايل المكسر، والنسوان متضاريات شوية..خجلانات يعني وكدة، عشان يشوفوا التيس الخواجة ..(مش خبير أجنبي؟) بعدين طبعا الصعاليك فاكرين انو الداهية ده خطيييير وممكن يستفيدو من (كخبير أجنبي) !!
غايتو حصلت جنس حاجات، وطلعت جنس اشاعات !!
انتوا منتظرين اكمل ليكم القصة ؟؟
خلو حمد فتحي يجي يكملها !!
اها فتناكم بي عافية !!!


Post: #42
Title: Re: أحقد غنماية في العالم ..
Author: عبدالفتاح أبوشيمة
Date: 06-22-2008, 06:08 PM
Parent: #1

Quote: و أيضاً بمناسبة إستشراء ( الهم ) العام و الغم الوارم .. و الزهج المكرضم .


يا أب سنّا بيضا؛ الله يبيّض سنونك أكثر.

والله في أجواء الغم والزهج مافيش كتابة أحسن من دي

والله أدوم أنواع الحب

هو الذي ينمو ويترعرع في البيئات البسيطة المتواضعة.

ولكن أحمد ربّك اللّي ما شافوك ناس الرفق بالحيوان.

ناس برجيت باردو.

الدلدوم دا كان خلصوه منّك بي ناس الأمم الما متحدة.

ثانيأً انت في حمّى الحب والغيرة نسيت أفضالها عليك وسبب وجودها في هذا البيت العامر بأهله؛

وغنمه؛ لكن لو كنت حصل رعيت الغنم زي الأنبياء كنت صبرت عليها وكنت جبت ليها الدكتور البيطري

وما كنت خرّبت على الحجة مشروع الأسر المنتجة.

الصبر الصبر كدا ضيعت على روحك غنماية ومعاها الحبيبة.

ختاماً أضحكك الله وأسعدك كما أضحكتنا.ً

Post: #45
Title: Re: أحقد غنماية في العالم ..
Author: عبدالله كع
Date: 06-22-2008, 08:34 PM
Parent: #1

يا عمدة هسي الساعه 10:23 م دقيقه بتوقيت الرياض
وانا لسه ميت من الضحك الحاصل ده من الصباح .. حرااام عليك
كل ما تزكر لي حاجه من سردك الذيذ اقعد في واطاة الله
واضحك لي جنس ضحك الله يجازيك يا حبا

- المهاتما غنديـــــ
معاك يا مان في مراح اكتر تقدم وحداثه

Post: #46
Title: Re: أحقد غنماية في العالم ..
Author: ريهان الريح الشاذلي
Date: 06-22-2008, 08:50 PM
Parent: #45

Quote: الغريبة بعد أم دلدوم ديك الكحة راحت منها .. !!!!!


كفارة ياخ اتاريها مشروقة ..

Post: #47
Title: Re: أحقد غنماية في العالم ..
Author: AMNA MUKHTAR
Date: 06-23-2008, 01:28 AM
Parent: #1

Quote: و قفنا في الزقاق الضلمة داك قريب لبيت الغنم ..



Quote: ( والواحد في الحب بتحرج بسرعة )



Quote: ( كانت دايماً بتراعي مشاعري , راعاية كانت الله يطراها بالخير ) ..

عشان كده أديتها بالجزمة...تستاهل...

Quote: .. كرضمت ليك يدي وأديت الغنماية أم دلدوم بكل قوتي لمن نفسها اتقطع .

قاسى....زى تيس الخلا

Post: #48
Title: Re: أحقد غنماية في العالم ..
Author: Rihab Khalifa
Date: 06-23-2008, 01:37 AM
Parent: #1

Quote: منقول بتصرف



اتصرفت في شنو يا عماد؟

---------
ماك نصيح، و مستلب كمان


Post: #49
Title: Re: أحقد غنماية في العالم ..
Author: Balla Musa
Date: 06-23-2008, 03:21 AM
Parent: #48

يا عماد

غنمايتكم أكيد تكون من جيل مابعد سبتمبر 83.

القحة دى كانت عبارة عن قراية تهمة الشروع فى الحب.

والظراط أكيد يكون النطق بالحكم .

ومادام القاضى أنثى أكيد يكون فى حكمها شبهة تحامل بسبب الغيرة.





____________________________________________

و يبدو أن الغنماية زى الفريك مابتقبل شريك.

Post: #50
Title: Re: أحقد غنماية في العالم ..
Author: Tragie Mustafa
Date: 06-23-2008, 04:20 AM
Parent: #49

غايتو يا عماد عبد الله
يجازي محنك يا يا بتاع المحن انت...
شوف بقصص زي دي عايزين تجرجروا عقال البورد الزي ناس خالد عويس
وتخلوهم يهضربوا زي هضربتكم دي


خاتيه انا عليك يا عماد؟؟؟
لما بقول لك انت اخطر من الامنجيه؟؟اها شوف كتلت قلوبنا كيف ونسيتنا
(التراضي) و التخاصم ودخول خليل وخورج مناوي وقعدته تضحك فينا...وكمان
على وشك تنطقنا..وتخلينا نرص ونقص زي قصك ورصك ده؟؟؟الله يسامحك
كتلتنا بالضحك....والبلومه بركه الفرت منك تنهرز فيها من الوقت داك؟؟؟
حليها ما حضرت عماد عبد الله بعد التعديل!!

Post: #51
Title: Re: أحقد غنماية في العالم ..
Author: صلاح أبودية
Date: 06-23-2008, 08:57 AM
Parent: #50

الظاهر دى غنماية ناس عباس صاحبى

كان عندهم غنماية حاقدة برضو

عباس كان بشرب السجاير فى بيت الغنم

وأول ما عباس يولع السجارة الغنماية تقعد تقح

وعباس ما عارف ...

ومرة أنا كنت واقف مع أبو عباس وأمو سمعنا الغنماية بتقح

أم عباس سألت أبو عباس : إنت الصوت ده شنو..؟

قال ليها ده ولدك بشرب السجاير فى مراح الغنم والغنماية عندها حساسية

من اليوم داك أم عباس بقت كل ما تسمع الغناية تقح تكورك بـ طول حسها

يا عباس ياولد أطفى السجارة ..!!

ولغاية هسى عباس ما عارف أمو بتعرف كيف إنو ولع السجارة...!!!

وقدر ما حاولت أنا أشرح ليهو إنو دى الغنماية الحاقدة دى ما صدقنى

التعديل لتصحيح خطأ إملائى

Post: #53
Title: Re: أحقد غنماية في العالم ..
Author: خالد عويس
Date: 06-23-2008, 02:18 PM
Parent: #51


يا تراجي غايتو انا كان عاقل ولا ما عاقل أي بوست لي عماد عبدالله ما بقبل منو لا جاي ولا جاي.
عماد ده زول كتاب شديد خلاص ولماح وساخر بلحيل
ما طالباني حليفة، امبارح قاعد في امانة الله في الـ(News room) في العربية، وقاعدة قدامي للتعتر ريما مكتبي مذيعة العربية (هو جعفر عباس براهو البيديهو الله ويصاقر ايمان بنورة)، أها هي بتجهز نشرتها، وانا غرقان في اخبار العراق وشي انفجار في بعقوبة وشي زيمبابوي، عمنا موغابي الأبى يفكها بي اخوي واخوك ده، اها فتحت البورد لقيت عماد عبدالله، دخلت، وبديت اقرأ، ابتسمت في البداية، بعد شوية بديت اضحك، بعد شوية لمن وصلت آخر كلامو، والغنماية تكح بي فوق وبي تحت، غلبني كلو كلو، قعدت اضحك والله لحد ما دموعي سالت.
وريما تعاين لي شذرا.
طبعا المصيبة كان سألتني انت بتضحك ليه؟
حتى (الترجمة) هنا ما بتجيب دخل، ولا حتفهم أصلا انا بتكلم عن شنو.
الزملاء والزميلات الحواليني كلهم قعدوا يتلفتوا ويعاينوا لي (شذرا)..
غايتو يكونوا قالوا الزول ده جا الليلة مسطول

الله لا كسبك يا عماد

Post: #54
Title: Re: أحقد غنماية في العالم ..
Author: Emad Abdulla
Date: 06-23-2008, 03:00 PM
Parent: #53


خالد يا صاحبي ..
تراجي دي الله مرقها من حبنا زمنها داك ..
ناس الشرق زرايب إبل ساااااكت ..
أقوم ألم ليك فيها أحبها ليك " حب الإبل " .. ده زي ضرب غرائب الإبل
رمسنة جنب الجمال ديك , أنا أغمض عيوني و تراجي بي راسها المطاول ده ..
كان لي يوم الليلة ده بطلت هامش و مركز و جلابة و غرابة ..
أبقى ليك " مركز " حياة حنانها زاتو ..
و كان عرفت الله واحد .

......
غايتو الجِمال بيكحو كيف اللاهو أعلم ..
لكن للضمان كده بنلبس كمامات عشان الريحة التانية ديك ..
و نطقطق في أصابع بعض .



ــــــ
مساء الخير يا صاحب ..
مفرح إنك هنا ..
ضد الشنا و القباحة .
و .. ( روحوا عن أنفسكم ساعةً بعد ساعة , فإن القلوب إذا كلّت .. عمِيَتْ ) .


Post: #55
Title: Re: أحقد غنماية في العالم ..
Author: محمد المرتضى حامد
Date: 06-23-2008, 03:18 PM
Parent: #54

الغنَم العواذِل ..

Post: #58
Title: Re: أحقد غنماية في العالم ..
Author: محمد الطيب حسن
Date: 06-23-2008, 03:56 PM
Parent: #55



متعك الله بالعافيه ياعماد
وجعلك دلدوما لكل غنمايه عندها كحه


Post: #63
Title: Re: أحقد غنماية في العالم ..
Author: صلاح أبودية
Date: 06-23-2008, 05:15 PM
Parent: #55

أحقاد إغنام

Post: #56
Title: Re: أحقد غنماية في العالم ..
Author: عبدالفتاح أبوشيمة
Date: 06-23-2008, 03:21 PM
Parent: #54

Quote: و .. ( روحوا عن أنفسكم ساعةً بعد ساعة , فإن القلوب إذا كلّت .. عمِيَتْ ) .






فوق


مرور بس

Post: #60
Title: Re: أحقد غنماية في العالم ..
Author: emad altaib
Date: 06-23-2008, 04:15 PM
Parent: #1

ــــــــــــ
Quote: ( و الغنماية المنعولة - الله يكرم السامعين - شغالة فوق تحت ..
كُحك .. طاط .. كُحك .. طاط .. كُحك .. طاط ) .




ما لها عندها (أب نيني) ؟!

الله يسلمك يا عماد ياخي

Post: #64
Title: Re: أحقد غنماية في العالم ..
Author: tayseer alnworani
Date: 06-25-2008, 06:39 AM
Parent: #60

Quote: - و قد شهد ذاك الزقاق تشابك أيدينا و رميشنا و كتيل عيوننا في الضلمة ديك , و كيف كل مرة أقول ليها : آآآآآآآه .. و كل مرة برضو هي تقول لي : و الله أنا زاتي , و نفضل كده نتوهوه معاينين لي بعض , معاينين معاينين معاينين زي ساعتين كده -
و طبعا الرمسنة دي وسط مسرح الريحة و البرطعة و الحاجات العجيبة .. حب أصلي

عماد
سلامات انت عارف الزولة دى ما حست بالفروق الطبقية دى الا لم وديتا زقاق الغنم بتكون تغش فى روحها ساكت و الله الناس ديل زينا والظروف بتصلح و هلمجرا تقوم انت يا الشليق ما تلقى ليك محل تحب فيه الا بيت الغنم و كمان الغنماية الحسادة قاتلاها .
غايتو طبقت فيك نظرية ما حصلت .

زى نظرية الكهرباء و المطرة فى الشوك.