تعرف ياحبيب نوره كنت عايز أقول ليك أقعد في ال و ا طة وشيل الصبر .. لقيتك قاعد ما المسالة بتاعت المحركة بتاعت الأفلام وسلان الروح العارفة ديك لكن صدقني ما ح تخسر .. الحلقة دي جميلة جدا .. ووقعت في يدي بالصدفة الليلة وعجبتني.. قلنا نقسم معاكم
تمبوشتي انا حا أستغل الظروف دي وأشحدك أغنية مابين مريم الاخري و المجدلية جودلية شنو الجودلية تطير!! بس أنت ما تشحدني أيي حاجة عشان انا بابح حالياً عليك النبي خت لي لنك الحفظ هنا واللا في أيي مكان يعجبك
اللنك ده بالذات اليومين ديل ما بتخته يا حبيب نوره .. وما ح اشحدك اي شئ حسب ما جاء في عرضكم .. لكن ممكن في اي ملف تاني اعمل ليك الكود.. بس خليني اللاقي مريم دي ذاته .. يعني اقلب السيدهات دي باقي الليل ده والا بكره الصباح احسن ..؟ بكره احسن ما عندك مشكلة.
كتر ألف خيرك علي اللفته البارعة والله أول مرة نسمعها ... مانحن مقطوين في بلدّن طيره عجم والله يسهل ماندفن فيها ونرجع قويين ونصاح لبلدنا نموت بين أهلنا مستورين ونلقى من يبكي علينا
العزيز خالد علي .. مليون سلام رد الله غربتك لتنعم بكل ما هو جميل.. أحاول بقدر المستطاع توفير كل ما هو جميل وغير متوفر للعديد منا .. حلقات نجوم الغد دائما مميزة بما تقدمه من حلقات بمتابعة ورعاية المتخصصين وما يقدم فيه من دروس ورعاية موسيقية، تمحي بعض امية الموسيقى .. وتتساعد على تقويم الخامات الفنية المتوفرة ومتابعتها من المراحل الأولى ..
Quote: جد عافية وامالنا فيه ترد العافية للغنية السودانية الجادة
اتمنى معك يا خالد ان تتوفر كل الرعاية والمتابعة لهذا الجيل الصاعد بقوة وعلى رأسهم عافية حسن .. وزميلاتها.. فالساحة الفنية تعاني الكثير من الموات او الكساد الفني .. بي انعدام العديد من الذين قدموا الكثير ولم يحصدوا إلا السراب.. الأمل في هذه المجموعة التي اتمنى ان يحسن تشكيلها اكاديميا وبدون شك سنحصل على قيمة فنية كبيرة في مقبل الأيام..
يا ابو النيز .. اولا عليك الله الأمانة البي طرفكم .. اعملوا معاها اللازم .. ليك كل الصلاحيات .. البتغني دي يا ناذر اسمها حــرم بس ما عارف اسمها بالكامل .. ما شايفني مسردب ..؟ وكنت منتظر اشارات زي دي .. خامة صوت حرم القوية عاجباني شديد .. وحضوره ، لكن ملاحظ انها بتجيد اغاني الحماسة بشكل جميل جدا .. يعني زي حرم دي عادي في البلد ممكن تفرتق ليها حفلة بي اغنية واحده..
Post: #12 Title: Re: ..نجمــات .. نجــوم الغــد Author: محمد سنى دفع الله Date: 02-12-2007, 11:29 PM Parent: #10
| تــمــبــس العســـــل لكم أحــــبـــك والحب موصول ايام الحب وخلي بالك حنغير الفالنتاين الى المحلق وقيس ايه رايك ؟؟؟ كل الحولك لهم حبي دام صفانا
يا السني .. يا الشلت حلاة كل الحلوين.. مشتاقين .. طيب قول يناير ما جابك .. الفالنتاين ما بجيبك والله كل الشباب بيسالو عليك وفي حالة تأهب قصوى . . حن ياخ
حبيبنا جعفر اسماعيل .. يا مليون سلام.. ياخي سعيد جدا أنو الواحد يوصل بهجة لي ناس بتعرف تسمع زيكم وتحس الاشياء الجميلة بالجد نجوم الغد غيروا كتير في ( مودنا) الاصبح شكلو غريب ده ..
رشــاسالم السلام عليكم أول حاجة المكتب خطوتين من العمارة بتاعتكم .. قبل كم يوم قلت اجي اتغدى معاكم تاني قمت اتذكرته أنو بتكونوا في الشغل ... تتخيلي بعدين حمد الله على السلامة تااني .. وكنا مسافرين زاتو انحنا .. حركات الزرزرة دي ما تعمليها لينا من حسع دي
Quote: لما يصلونا بنديهم الامانة ومعاها كعك وحلاوة
كعك وحلاوة بس ؟؟ ما جبتي فسيخ ؟؟ . . والله الشوق مطــر يا رشا .. جهزي كعك قدر .. ( تلاتة انفــار ) في كيس كبير ده غير بتاع الشيالة
بترد الروح يا ناجي .. لكن برضو بتطلع الروووح عديل كــدا .. تعرف.. مزاجات الناس بقت واحده والا الحاصل شنو ما عارف .. عافية دي لقيته ادت ناس كتيرة جدا العافية إلا ( عمر الفاروق ) قال اصلو ما بتعرف تغني .. الكلام ده من بدري جدا ما عارف حسع كيف مع العمل الخاص الجديد ده .. . . بعدين أنت مرسل لي الحاجات دي مع رشـــا سالم ليييه .. اكيد ح تقول ( السيديهات ) دي حقته .. غايتو اعمل حساب انك ح ترسل مجموعة تاني
Post: #19 Title: Re: ..نجمــات .. نجــوم الغــد Author: حمد اسماعيل Date: 02-13-2007, 00:01 AM Parent: #13
تعرف يا علاء لو ما بتنزلو لينا الحاجات
دى هنا ما اظن نشوفه فى اى مكان تانى تتبارك ما تتشارك.
بعدين منو فى بيتكم غيرك انت و عمر بيمسك يدينو كده لما يقعد.
( زى الفى الصوره)
والله حيرتونى يا اولاد عم منصور, الله يخليكم و يديكم العافيه.
يا استاذ حمد .. والله الحاجات دي من قبل ما تنزل بنكون فارزين ليكم حقكم بي طرف .. صاحبك ده المرة الفاتت ممتحني في اغنيتين لحدي الآن ما لاقيهم لي خدر بشير ولي عبد المنعم حسيب .. تخيل بلاي الناس بقت شغاله ذكريات.. ليكم الله يا استاذ حمد .. نحن غايتو بندبر حالنا بي جاي جاي ..
Quote: بعدين منو فى بيتكم غيرك انت و عمر بيمسك يدينو كده لما يقعد
Post: #21 Title: Re: ..نجمــات .. نجــوم الغــد Author: الملك Date: 02-13-2007, 00:08 AM Parent: #13
Quote: .. عافية دي لقيته ادت ناس كتيرة جدا العافية إلا ( عمر الفاروق ) قال اصلو ما بتعرف تغني .. الكلام ده من بدري جدا ما عارف حسع كيف مع العمل الخاص الجديد ده .. .
"عمر الفاروق"
ده من زمن الجامعة ما بعرف يفرز بين" الفايف أستار" وكفتريا "عمال"
قال بعرف غنا قال
... ...
Quote: بعدين أنت مرسل لي الحاجات دي مع رشـــا سالم ليييه .. اكيد ح تقول ( السيديهات ) دي حقته .. غايتو اعمل حساب انك ح ترسل مجموعة تاني
اسمعنى انا تانى ما برسل كل مرة ارسل ليكم رسلت مع معتصم واسى مع رشا شغال بتاع "هدايا" انــــــــا
بعد كده حاشتغل هادئ على قولك
ما عندك فكرة تجى انت بعد ده السودان مع إنها فكرة "بيزنطية" على قولك
Quote: ده من زمن الجامعة ما بعرف يفرز بين" الفايف أستار" وكفتريا "عمال"
تعرف كان ما غير رايو في عافية دي .. انا بخسرو .. يازول انا من أول قلت ليك معتصم بيستنكحني .. ما سمعت كلامي بلاي السيديهات دي ريحته في البيت مافي .. غايتو رشا سالم الواحد بيتوسم فيها الخير كعك وسيديهات ده طبعا لو خلت استبزازه القديم . . خلينا يا ناجي من البيزنطيات دي .. لانها ح تدخل ليك جدليات وانا ما عايز افتح الباب ده بتتعب معاي
Quote: ياخ صوتها فيهو حنان أطنان و لا تملك إلا أن تحبه
العزيز واسبه.. عافيه من الأصوات المميزة الفريده .. زي ما قال لي واحد صاحبنا زي صوت عافية ده بيجي واحد بس في ( الكرتونة ) كل امنياتي ان تتم المتابعة الشديدة جدا للخامات الصوتية دي من قبل المتخصصين والمهتمين .. وان ينالوا الرعاية التامة.. البوست معاك اهديه لي معاذ حسن وكل رابطة المعجبين بي ( عافية ) على وجه الخصوص
Post: #20 Title: Re: ..نجمــات .. نجــوم الغــد Author: ناذر محمد الخليفة Date: 02-13-2007, 00:05 AM Parent: #1
تمبس ..
Quote: يا ابو النيز .. اولا عليك الله الأمانة البي طرفكم .. اعملوا معاها اللازم .. ليك كل الصلاحيات
Quote: أنا ما بقصر بس كيف نقنعو يبيت لزوم الشروحات
يا ابوالنيز الشروحات دي في البيت ما بتتم .. المسالة كلها مكتوبة نوته .. انت كمان اكتب في نفس السلم وبي منطق اسمع في محل ماكدونالدز قريب ليك ؟؟ بس قرط على كده .. والباقي صدقني اسهل من الموية
بعدين حكاية الزوغانات دي نحن مجربنها صدقني وعارفين الحاصل.. كان مسكته اقطع طوالي..
Post: #29 Title: Re: ..نجمــات .. نجــوم الغــد Author: Ahmed Abdallah Date: 02-13-2007, 00:44 AM Parent: #20
Quote: أنا ما بقصر بس كيف نقنعو يبيت لزوم الشروحات
قرقرقررررقر
ارجو ارجاع الامانات الى اهلها كما تم تسليمكم اياها و اهل نجد ادرى بها
Quote: يعني في السعوديه قطع شكـ اتنينات تمبس المصحيهو شنو ؟؟
حسع عملت تلاتة ياخـــدر .. برضو صاحي ليكم يــا اوباش صاحيين عشان نمتع الناس الزيك العايشين في غربة ديل والله بعد الأغنية المتعتك دي ياخــدر حقو تصرف لي راتب مستقطع بدل اي حاجة تجي علي بالك وبالمرة تكلم صاحبك بتاع المرة الفاتت تقول ليهو هنا في سجاير كتير الأولى .. دي عافية يا خــدر والله عندي ملف هنا فيهو حاجة للبلابل ( عشة صغيرة ) تسمعه وتسدد بس .. ياخي دي عملت شغل غريب جدا .. بس المشكلة الملف فيهو خلل والله كان اتصلح ولحقته نزلتو إلا تشوف ليك مكان تاني غير البورد ده .. . . أنعل شنووو..؟ ياخ انا بنزل الحاجات دي وبنتظر يتمو لي الباقي .. حسع المجموعة دي والله ما عارف لا اساميهن ولا الاغاني دي حقت منو .. والموضوع ده عامل لي دربكة ساعدوني ياخ اكتبو معاي الاغاني والحاجات القلتها دي .. .. عاجبني صوت التانية .. واسمها زاتو عاجبني
ازيّك ياتمبس , شنو الجفا والحلاوة دى! بكور .. ازيك ياحلوو بس انت البتختفي وتظهر زي شمس الخريف .. وكان عارفين الاصوات الجميلة دي بتطلعك .. ياخي ما كان والله لميناها اللمة دي والله ما نسيناك .. انت بتتنسي ؟
تسلم ياغباشي .. فعلا الفن السوداني لسه بخير .. بس محتاجين شوية نفض في كم حتة كدا أول حاجة خلينا ننتهي من الديناصورات المكنكشين في الغناء ده .. وبعديهم الترزية بتاعين اليومين ديل وبعداك الأمور بتتظبط واكيد نجوم الغد دي لو بس ادوها حببة كده من الاهتمام بنطلع بي مستقبل شكلو كويس
تماضر كيفنك ؟ عافية فعلا كلها عافية .. صوت وحضور وتغمص حالة وصلت بيها كل الكلام العايز يقولوا الشاعر والقالوهو الشباب الحلوين في الأوركسترا بعدما جمعت كل المعطيات الجميلة الحوالينه دي واخرجته بي إحساسه العالي جدا المتساوي مع جاذبيته حضور وصوت. ودائماً الشاذ بيكون واضح .. فعافية ماشاء الله شاذة جدا ومميزة .. التانية حـــرم الضقاله: أن ما عارف ( متربساها ) ليه .. مع اني لما سمعتها أول مرة في عمل ( حماسي ) مختلف أدتني نفس الإنطباع ده .. لانو فعلا الأغنية ديك بالذات محتاجة ليها شوية ( عين حمرة ) لزوم الإخراج ، عجبني فيها برضو التميز والتفرد بلونية مختلفة في الصوت القوي الله يخلي الأستاذة آمال النور والأستاذ محمد الصافي يف الدعم الفني الموسيقي .. وأكيد ح يطلعوا لينا بي جيل متفرد متمكن متشبع لانو كفاية خلاص السمعناهو كل السنين الصعبة الفاتت دي بعدما اتغيبت الكثير من العناصر المهمة واصبحت حتى النوته الموسيقية موجهة ضد الموسيقى نفسها.. طبعا قفشت الحجاب دي ما تصدر إلا منك .. كدي اديها صنة لحدي ما ننزل باقي الملفات وبعداك ( حجبيهو ) زي ما عايزه البوست ده ...
من منبرك يا تمبس اسمح لي بتحية المرهف عازف الكمان إسماعيل عبد الجبار لأنو راجل ما هين و يستاهل وقفة تجلة و إحترام .. و برضو التحية لمعاذ عازف الأورغن ... وعافي منك ياعافية بت حسن و الله يريح قلبك زي ما ريحتي قلوبنا ... يلا يا أبناء وبنات وطني ما فينا مين يرجع ورا و خليها تكون البداية الصاح و القومة ليك يا وطني
اضانك ما تقلت ولا حاجة ياتماضر .. ياخ اصوات البنات ديل فيهن حاجة غريبة جدا .. يكون ياربي دي حكاية الجينات دي قامت تاني من جديد والا شنو؟ فعلا الصوت ده فيهو حاجة من امبلينه السنوسني ومنى الخير وعشة الفلاتية.. الفنانات العظيمات بتاعات الزمن الجميل الفات .. كلنا أمل انو تاني نرجع نبتدي من جديد بي غناء مؤسس وحضور مشرف وثقة عالية في الامكانيات الصوتية .. بلاي تابعو المسالة دي بي التخصصية العلمية .. ونديهم ثقة اكتر في انو المجال قدامن مفتوح والفرصة متاحة لي كل جميل بيجي منهن..
العزيز غباشي ياسلام عليك وعلى تحيتك الجميلة للاستاذ غسماعيل عبد الجبار الما هين .. إسماعيل كمنجست على مستوى عالي من المهنية بالاضافة إلى احساسو المميز .. ده طبعا زائدا ( صوتو ) الجميل جدا القاعد يستخدموا مرات مرات عند حالات الطرب العالي جدا... عجبني في اسماعيل أنو كان معانا هنا في الرياض فترة من الزمن لكن تدارك الموقف بسرعة بعودتو وإلا لكان السودان فقد رقم مهم يضاف للأرقام المفقودة ونطمع في عودته لتعيد ترتيب الكثير .. اعتقد أنو اسماعيل عبد الجبار بصماتو واضحة في كل أعمال نجوم الغد من البدايات الأولى.. عبرك برسل أيضا التحايا لعازف الساكس ياسر .. ولمعاذ لهذا الثلاثي الهارموني ـ وياريت تستمر الصحوة الفنية دي وتتواصل بي نفس الهمة العالية دي..
Post: #43 Title: Re: ..نجمــات .. نجــوم الغــد Author: Abdelmuhsin Said Date: 02-13-2007, 02:28 AM Parent: #1
خــدر وتماضر .. انا لمبتي ولعت .. بنوم ليكم هنــا ده حسع دي اسعدتموني كلكم لابأس من بعض الفصحى .. ح ارجع ليكم بكره كان ربنا حيانا انا شغال بعد اربعة ساعات .. يعني انوم ليكم متين ؟؟ ياخي البوست ده بيذكرني ليه الأيام الزمان بتاعت التفاكر .. ح نتفاكر بكره في الموضوع ده .. ومسالة ام سلمةت دي ياتماضر عجبتني عديل كدا ادوني الفاتحة ياخ انا ماشي انوم
العزيز غباشي وعبد المحسن .. اشكركم شديد للمتابعة ونتلاقى بكره كان ربنا حيانا .. اسعدتموني انتو برضو
Quote: حرم ده جيل نكت الغنا من أعماقو و متلب تلبت حكاية خير دي متواضعة جدا
والله يامارشال قلت الكلام وما فضلت حاجة .. بعدين اللذ حاجة أنو ( بالليل خالص ) الغناء ده بيكون مركز يعني ما بي فهم ( سمع الليل بمحيهو النهار ) لكن الاصوات دي بالليل بتدي معنى تاني ..
دحين معاك عمر و معز متابعين معاك و مسطحين طبعا لأننا في البرد النجس ده بنعتمد على الساقط علينا من سماءاتكم/ن السخية و يعلم الله ما قادرين نفرز نجوم و نجمات الغد لي يوم ألليلة.. الله يزيد و يبارك,
نحن هسة طالعين مشوار مستعجلين و يادوب قدرنا نسمع و نطرب حقيقة للبنت المبدعة عافية و اللحن جميل شديد!
و دي مساهمة مننا و لو ما مكتوب إسمها ما كنا عرفناها.. طبعا نحن "الغد" عندنا موضوعو مختلف شوية من الغد حقكم ..و إسمه"الغد النوستالجيك"!..
هدية لكل محبي الجمال و ليك أولا و ليس أخير وأسقينا واصل:
Post: #48 Title: Re: ..نجمــات .. نجــوم الغــد Author: الشيخ إبراهيم الشيخ Date: 02-13-2007, 07:03 AM Parent: #47
تمبس الرجل الجميل
ياخي عش العصفور ده بفتش ليها لي زمن وقدر ما بكيت لناذر ود الخليفة عمل لي مجنون وقال يطرشو لكن الليلة ربنا يديك العافية فشيتني طب .
على فكرة عش العصفور كلمات المرهف الحلنقي وتلحين الدكتور أحمد المك .. شايفك متحير كنت من سؤال الاخ خدر.
تحياتي مجدداً يازول يا جميل ... وهل من مزيد منتظرين عشة صغيرة
وراجنك....
Post: #50 Title: Re: ..نجمــات .. نجــوم الغــد Author: عادل جبارة Date: 02-13-2007, 07:31 AM Parent: #48
الغالي ( عادل جبارة ) .. جميل ان تكون حضور في كل محافل الإبداع .. وأنت شخصية جميلة تحفل بكل القيم الجميلة شكرا ياعادل ... وكل نجوم الصحافة المضيئة في سماء الرياض
العزيز الشيخ .. تسلم يا أجمل .. وللصدفة العجيبة قناة النيل الأزرق واقفه عندنا من فترة وما اشتغلنا بيها كتير نسبة لي الجري وعدم تمكنا من متابعة التلفزيون بي صورة منتظمة . بالتالي حلقات نجوم الغد تحديدا فقدنا امكانية متابعته من فترة .. الصدفة هي الدلتني على المجموعة المميزة دي من خلال أعمال متفرقة .. ولقيت الباقي برضو في صدفة غريبة .. استمعت لي صوت عافية من الحلقة التنافسية السابقة .. ومن خلال الحلقة الذهبية ، لكن حلقة العيد ما حصل مرت علي .. ادهشتني فعلا عافية بالعمل الراقي للحلنقي .. وكونها تغني للحلنقي بي ثبات زي ده وحضور خرافي ده في حد ذاتو انجاز رهيب جدا .. واستمرارية جميلة بين جيل تجسد في عبقرية الحلنقي الاتغني ليهو العباقرة وردي .. ومحمد الأمين .. وعثمان حسين ـ والعديد من الذين وضعوا اسس قوية وراسخة في تاريخ الفن السوداني ـ وجيل بدا يشب الآن وسط زحمة من ( الملوثات ) يصعب فيها تحديد الهوية الموسيقية من نصوص مرتجله في اللحظة وأداء اقرب لي عروض السيرك .. ما غريب أن ( تفشك ) العافية كما ( فشتني ) انا القدامك ده ( وفشت ) الكتيرين ووصلتهم لي مستوى عالي من الطرب ـ ناذر الظاهر لي الحلقة دي ما كان متابعة لانو شايفو بيسال من الأسامي .. وشكرا ليك يا الشيخ لانو مديتني بأسم الملحن الأستاذ أحمد المك ... زي ما شايف طبعا خدر زنقني في الحته دي .. ودي من الأشياء الأساسية والضرورية جدا ياريت برضو لو قدرنا ركزنا عليها بجانب تركيزنا على المؤدي .. فهي منظومة متكاملة بتنتهي عند المتلقى البيستقبل العمل وبالتالي لابد من المعلومة تكون واصلاهو بشكل كامل. عشة صغيرة في معالجة لو ما اكتملت ح اضطر احذف منها المقاطع المعطوبة بالرغم من انها مفترض بدل ما يتحذف منها .. يلزمو العافية دي تغني عمره كلو .. علشان تسعد الدنيا دي بيصوته وبي حضورة ده ..
الأعزاء معز وعمر نحن ما بنعمل اسقاط وما بنسقط حاجة إلا لما تسقط حجرنا .. وهذا ما كان بالفعل عاملين كيف ياشباب .. مع الزيفة ؟ فكرة نجوم الغد بتعتمد على المواهب وهي محصورة في الغناء والشعر .. طبعا بي متابعة لصيقة من متخصصين حسب المجالات المذكورة ـ بتتم المنافسة في شكل مجموعات ويتم التصعيد للمراحل المتقدمة ... بدأت الفكرة تقريباً في العام 2005 أو العام 2004 وطيلة الفترة ( فرخت ) خامات طيبة جدا من الجنسين واصل فيهم من واصل ، واختفى الغلبو مواصلة المشوار ... إذا انتبهنا للفكرة بشكلها المبسط ده يا معز بنلقاها فرصة جميلة انو تخلق بدايات موفقه جدا لخامات صوتية يمكن بعداك صقلها بشكل اكاديمي ومعالجة بعض الشروخ . وممكن نخلق منهم جيل مبني على طرق علمية صحيحة تكفينا شر التخبط في الاستيعاب في المجالات الفنية المختلفة ده طبعا لو كانت الجهات المعنية بالمسالة دي بتعرف كيف تستثمر المواهب الزي دي ... واتقدمت ليهم في طبق من ذهب .. جميل أنو صوت عافية اتفقتو فيهو معاي وانتو ناس مزيكاتيه ودي صنعتكم .. تمشوا وتجوا بالسلامة وياريت يامعز تواصل معاي في الحوار الانقطع المرة الفاتت عن طرق بناية قاعده سليمة من خامات صوتية زي دي وامكانية دعمها للتواصل بشكل علمي يعني الاقتراحات .. شنو الممكن تتقدم في البوست ده وتضاف للمجموعة ... طبعا الفيديو المرفق للنجمة ريماز ميرغني وهي ايضا من إفرازات نجوم الغد وشكلت برضو حضور مميز من مجموعة من الصغار اذكر منهم ( سعد ، محمود عزالدين ، غسان الماحي ) .. شكرا للفيديو وفي انتظار النوستالجيك .. هناك العديد من الملفات ( الخطيرة ) جدا من نفس المجموعة والمجموعات الغير حالما تمت المعالجة ح انزله هنا.
Post: #49 Title: Re: ..نجمــات .. نجــوم الغــد Author: abas Date: 02-13-2007, 07:20 AM Parent: #1
الحبي تمبس
شفت القونين ديل امس
قوون مهند ابداع وقون علاء ابداع اكتر
البنت الاخيره دي ابداااااااااااع اكتر
وحرم زكرتك بي منو وحرم دي طبعا قول لي حمزاوي منكم من الحصاحيصا او قراها
شكرا يا مبدع
Post: #51 Title: Re: ..نجمــات .. نجــوم الغــد Author: احمد العربي Date: 02-13-2007, 07:33 AM Parent: #49
تمبس يا وريف اديك العافيه والنفس الجميل يازول يا خريف مودتي
Quote: البت دى متفاءلة ومتفاعلة مع الموسيقى والايقاع ومضمون الكلام ..وعندها حضور فنى عالى ..الله يديمها عليها موهبة وجمال...
البت التانية البتغنى زى كمال ترباس دى ...مستلبة ...مستلبة بالاداء "الرجالى" للغنا ..مع انه خامة صوتا قوية ورخيمة وفيها حلاوة ..بس
طمطم...سلام
طبعا كلامك جميل و حلو وتحليل راقى ..عن البنات ديل..عافية واصلا اسمها العافية.من الجزيرة بحر.وهى من ديم البساطاب جبل اوليا..نفس حى الهادى ود الجبل..وهى عروبية حقه واهل عوض, قريبة سيف مساعد يعنى بت مشايخ عشان تتعولم شالت الالف واللاف وحدثت اسم العافية والعازة الى عافية وعازة وامونة..وممكن بكرة تجى فطومة,,,حركة جديدة فى اقاع الاسماء مع الاحتفاظ بالاصل..
اما البت الثانية من الجزيرة الفوق..من حلة الضقالة ريفى الحصاحيصا..صوتها من البئة..وقد علق عليها الشاعر مهدى ..بانها بتخوف اولاد الحلة كلهم.. ويماثلها النعيم صاحب عرضة على الكرسى..وممكن ان يعرض فى عندما تغنى ناسى عجرم..
تمبس الا توافقنى الراى...بان نجوم الغد اغلبهم اهل عوض... شكرا لك وانت دائما ممتع كالعادة
Post: #53 Title: Re: ..نجمــات .. نجــوم الغــد Author: Dr. Abdalla Siddig Date: 02-13-2007, 09:12 AM Parent: #52
العزيز تمبس
صباحاتك عسل
نورت صباحنا
الله يديك العافيه
Post: #56 Title: Re: ..نجمــات .. نجــوم الغــد Author: حليمة محمد عبد الرحمن Date: 02-13-2007, 09:50 AM Parent: #53
هَيُ يا تمبس انت البوست دا فتحتو متين؟ والله شفتو هسع دي.. انت فتحتو من الصفحة التانية ولا غادي ولا شنو؟ الله يديك العافية من غير وبـ(الالف واللام).. العافية في كلتا الحالتين.. وشكرا على هذه المحطة الرائعة.. التي نتفيأ ظلالها بعد "الدافوري" في البوستات التانية.. والله رديت للواحد روحو بالغنا الجميل دا.. صحي شنو ظاهرة نجمات المستقبل من الجزيرة؟ كان قالوا من طابت كان بقول..اصلو الاخيرة دي ظاهرة ابداعية فريدة في تاريخ الادب السوداني.. والمغالتني اللي يمشي يدخل موقع ناس طابت.. يظهر انو الجزيرة جأأأأأأأأأأأتكم.. امسكوا الخشب.. على فكرة عافية بطحانية صر.. واسرتها تتميز بالشعر والغناء والاصوات الجميلة.. لي طلب اخير اول هو الفنانة بهاء عبد الكريم.. انا عارفة في ناس كتار ما سمعوا بيها.. عندها شريط اسمه الشوق.. والله دي من اروع الاصوات التي لم يسلط عليها الضوء كثيرا وهي فنانة شمالية الاب جنوبية الام وبتغني باللغتين العربية الخرطومية وعربي جوبا..بطريقة ما بتخلص عديييييييل.. تاني بعد ما تفتح بوست زي دا قول لينا عووووووك..
خــدر .. شكرا ياخ للحالة الاستثنائية دي .. حرم الضقالة .. وعافية المتعددة المواهب الفرقة الهارمونية ( ناجي ) تاج السر .. وطبعا انا اكتشفت اني قلت ليهو معاذ في رد من الردود .. وهو أخو الاستاذ ماهر تاج السر طبعا ( اخصائي ) الكيبورد وياسر عبد الرحمن اخطر ساكس .. والعبقري اسماعيل .. والمجموعة فعلا في انسجام تام وقادره انها تعمل حاجات كتيرة جميلة وليها الفضل برضو في ظهور نجوم الغد بالشكل المؤسس ده من خلال متابعة الحرف الموسيقي بطريقة علمية وخلق مساحات للغناء مريحة عن طريق المعرفة ببصمة صوت كل موهبة ومن ثم الكتابة ليها في مكانه الصحيح بعيداً عن التغول على الحرف الموسيقي في حالته العادية البعيدة عن النشاذ البيضر كثيراً بشكل الحرف على الآلة الموسيقية وبالتالي بيخلق خلل واضح جدا في السماع.. الحضور والأداء اللذيذ .. ده الشئ المتفقين عليهو كلنا وبنصم عليهو بالعشرة .. يعني ( فرش ) الاحساس الداخلي وتفاعلو مع الآلة والكلمة واللحن .. ودي أهم حاجة مطلوبة .. وطبعا زي ما عارف الفنان لو ما عندو المسالة دي .. معناته ما عندو الحبة..
Quote: الله يديك العافية من غير وبـ(الالف واللام).. العافية في كلتا الحالتين..
بلاي في زوول عاقل بيابا العافية .. آمين ياربي .. طبعا لفتي نظري لي حاجتين الأول مسالة المقارنة بتاعت طابت والملاحظة الذكية جدا عن المخزون الإبداعي فيها ولفترة طويلة كنت من المدمنين لموقع طابت ومن خلال متابعتي لي نجوم الغد من البدايات الأولى اتعاقب فيها اكتر من مشارك من طابت .. وبتذكر اول فائز من مجموعة الباب كان محمد موسى على ما اعتقد .. بي صوتو المميز جدا وحضورو بجانب الشابه ( مها) وبرضو على ما اعتقد من الجزيرة مدني لوما خذلتني الذاكرة .. دائما بيمر علي سؤال هل احيانا بتتفوق الموهبة والفطرة .. على الاكاديميات ؟؟ الحاجة التانية يا حليمة مسالة بهاء عوض الكريم .. ما عارف عندك خبر والا ما عندك انها بت حلتنــا في شارع الفيل بداية الهاشماب .. طبعا دي من الذاكرة القديمة . وفعلا بهاء ظهرت في فترة وغطست ... وكانت الفترة ديك الساحة مليانه بالكتير من الشابات ديل ومن نفس الحارة ( حنان بلوبلو وبهاء وبلقيس ومنى .. ومجموعة ) شكلو في وقتها نقله في ( غناء البنات ) بالاضافة للاعمال التانية لي شعراء مميزين وكانت بهاء فعلا ملتزمة بي طريقة غناء خاصة بيها وبي لونية محددة في كم عمل باللعامية عربي جوبا.. وبتذكر استضافة التلفزيون في حلقة .. إلا اناه فجأة اختفت ولي تاريخ اللحظة ما عارف عنها خبر ، وحسع رجعتيني لي ذكرى ايام زي دي .. وبحاول بقدر الامكان إني اللقى ليك ليها أي عمل .. وثقي تماما الفت انتباهك بي اكبر ( عووووووووك في الدنيا ) ...
Quote: على فكرة عافية بطحانية صر.. واسرتها تتميز بالشعر والغناء والاصوات الجميلة
عارفه ياحليمة امس كنت في حوار مع زول صاحبنا .. وذكرت ليهو انو اول مرة اشوف عافية دي بتغني ادتني احساس انها من الجبــل ما عارف ليه .. وربطت الكلام ده مع ربطي لي حوار قديم بيناتنا عن حبوبة الهادي والفن البيطلع من جزور الاسر .. يعني اقصد فن اساسا بيكون ممتد من الجينات ومتوارث .. والبطحانيين طبعا ناس شعر وفراسة ونظم قصيد.. ياريت لو تساعديني كمان بي ذكريات الجبل وعن الحبوبات الكتبن .. زي ( العوبة ) والحاجات الخطيرة التانية ..وقولي لي عوووك في البوست ده .. وما تدسي الحاجات يا حليمة دي فرصة كويسه نسلط الضوء على الحاجات المدسوسة دي.
العزيز ابوقوته كيفك ياهندسة ..؟ فعلا ببدأ ليك من الآخر معظم الأصوات المميزة لي نجوم الغد كانت من أهل العوض زي ما قلته وده طبعا بيضعفنا نحن في المركز ( ) وبرضو بعد يومين يا هندسة تخشو الغابة وتقولوا والله نحن مهمشين ( )... الملاحظة فعلا ذكية جدا ، والحالات اصبحت متكررة .. وإذا قلنا الناس بتحب لونية محددة من الغناء بنكون ما انصفنا لانو اسلوب ( حرم وطريقة الأداء بتختلف كتير من أسلوب عافية والاداء ) .. سعد الصغير نجم من نجوم الغد في الحلقات السابقة برضو اسلوبو منحصر في لونية مختلفة لكن بالمقابل ليهو ريماز ميرغني بي لونيه مختلفة تماما .. وهكذا المسالة في النهاية ما عايز أقول انها ليها علاقة بالبيئة البتساعد على التشكيل الفطري من المراحل الأولى سواء بي سماع الأصوات ، أو التأثر بي البيئة والطبيعة في تشكيل القيمة الجميلة لنوعية معينة من الربنا اختصاهم بي موهبة محددة .. جبل أولياء بتشبه لي طابت طوالي في المقارنة ولما اتذكر الجبل والهادي حامد وصوتو المميز بتذكر طوالي طابت واللونية والدرجة الواحده في الاصوات بين مختلف الفنانين ـ وبي نفس الطريقة درجة وطبقة صوت العديد من الفنانين من الشرق .. محمد البدري ، عادل مسلم ، ياسر بورتسودان ، سيدي دوشكا .... ده معناتو شنو . المسالة بتاعت جينات والا كمان في عناصر مخفية بتطلع في حتت الغناء ده بالذات ؟؟ طبعا يا هندسة كنت متمني احضر اي حلقة للمجموعة دي اثناء لحظات التقييم والاضافات من الاساتذة المتخصصين لانو ده الجانب المهم جدا في فكرة البرنامج ده بيفتح حتى للمشاهد منافذ كثيرة جدا للفهم الصحيح .. بي طريقة رغم انها بسيطة وفي شكل حوار هادي إلا انها كبيرة جدا في معناها ... استاذ ( مهدي محمد سعيد ) اتشرف بأني تتلمذت على يده في مدرسة وادي سيدنا الثانوية وهو على قيادتها .. من سنين ماضية وزمن جميل جدا .. وبالرغم من أنو ( صعب جدا ) وصارم كالسيف .. إلا أنو شاعر مرهف جدا ومربي من الطراز الأول .. وكونو يكون من ضمن المجموعة المهنية البتساهم في متابعة المواهب دي .. ده في حد ذاتو مكسب ليهم ومكسب لينا .
ياعبس .. ناس مهند ديل انا عندي قناعة برضو انهم كان مسكو المايك ده برضو بجيهو الغناء ـ ما في ناس كدا ربنا مديهم حاجات كتيرة ( الكفر والوتر ) متلازمات دائما.. القونين لحدي الآن ما شفتهم والله .. لكن شفت قونين تانيات ( ) فاهمني طبعا حمزاوي ياعبس غير ندي القلعة ما بقتنع ليك بالساهل .. لكن طالما حرم دي من الحصاحيصا ممكن يغير شوية في الخلطة .. تحياتي يا عبس .
عافية حسن .. نانسي عجاج اعتقد أن بامكان هاتين الفتاتين ان تحلقا بفننا إلى فضاءات رحبة وعذراً ان اقحمت نانسي هنا رغم انها ليست منهن في البرنامج لكنها تحمل صفة النجومية بادائها الرااائع.. وبمقدور عافية ونانسي ان تكونا نجمتين عربيتيتن لما تتمتعان به من ملكات عالية وطبقات صويتة قوية .. عافية حسن أدت اغنية يا حنيّن بثقة عالية لانتفاء المقارنة بين صاحب الأغنية والمقلد أو المؤدي ولاحساسها بانها تؤدي في عمل خاص صاغه شاعر ذو باع طويل تغنى له عمالقة الفن في البلاد وساهم بنسبة عالية في صياغة خارطة الغناء السوداني الا وهو الشاعر الفذ اسحاق الحلنقي ،، وتناول النص وأبدع فيه وتجلى الفنان احمد المك ووضعه في قالب لحني بديع وعصرت عافية فيه كل احساسها الفني ونتج عن ذلك عمل غاية في الروعة والجمال .. وتغنّت أيضاً وفي نفس الحلقة بجزء يسير من أغنية للفنانة الكبيرة فيروز وأظهرت ثقافة غنائية عالية و ابداع فني رفيع يؤهلها بأن تكون حقاً (نجمة اليوم وليس الغد) .. وفي الحقيقة ظهور برامج بهذه الشاكلة يبشّر بمستقبل ثقافي وفني واعد وجميل للسودان وليت القائمين على أمره يواصلوا بنفس القوة والحماس وبنفس القدر النجوم والنجمات وفي كل المجالات لابد من تواصل ومواكبة .. وفي اعتقادي أن الحلقة المعنية كانت بشرى بمواصلة مشوار النجوم بعد انقضاء حلقات التنافس ..
الشكر الوفير لقناة النيل الأزرق وبرنامج نجوم الغد ومعده ومقدمه الفنان بابكر الصديق
والشكر أجزله لك اخي الحبيييييب علاء الدين تمبس للتحليق بنا في تلك الفضاءات الراقية والخروج بنا من مساحات المدن الملوّثة بعوادم الخلافات والمشاحنات والمطاحنات .
العزيز أمير الجمري .. دائما كما اقول في كل مرة عن شباب الصحافة أهل فن وادب وذوق عالي ورفيع.. المساحة مشرعة للابداع يا امير وإن كانت حصرياً على نجمات النيل الأزرق المنظومة المتفردة .. والمحاولات الجادة لإعادة الترتيب ومعالجة الجراح القديمة للاغنية السودانية سواء بحركة تجديدة نفض غبار الماضي أو بإضافات مرحلية فيها من الاكاديمية أو المعرفة المكتسبة من المتخصصين .. نانسي عجاج + إضافة ايضا لهذه المجموعة ببصمتها الخاصة .. وإن كانت لي بعض الملاحظات من متلقي عادي جدا لي بعض الأعمال التي اعادت نشرها بتكنيك مختلف وما زلت اتابع بالقليل ما أن تيسر لي ذلك ..
Quote: وبمقدور عافية ونانسي ان تكونا نجمتين عربيتيتن لما تتمتعان به من ملكات عالية وطبقات صويتة قوية ..
ده كلام مفرح ياأمير وهدف متاح ومشروع ، الكثير في الساحة متواضع مقارنة بالاصوات الجميلة العندنا .. ولا اعتقد إن الامكانيات اصبحت هاجس أو جدار يقف بيننا وبين الميديا العالمية .. المهرجانات ، الفعاليات .. دونك تجربة الفنانة أسرار بابكر وحضوره في احدى المهرجانات وبقووووة واقتلعت الجائزة بكل اقتدار.. لماذا لا نعلن عن نفسنا حتى لو بالامكانات المتاحة إذا افترضنا هذه الجدلية العقيمة ..؟ كتابنا للغنية بكل ضروبها بخير ـ عاطفية ، اجتماعية .. إلخ .. ملحنين وموسيقيين بكامل التأهيل بوجود خامات مميزة من الشباب المؤهل والمتمكن والقادر على قيادة اضخم اوركسترا عالمية بكل اقتدار .. إذن ما المشكلة ؟؟ كنت اتمنى أني احضر الحلقة المميزة دي .. وكل الحلقات للمجموعة دي علي وجه التحديد لان الاضافات المميزة من المتخصصة آمال النور والاستاذ محمد الصافي في حد ذاته . حلقة مميزة بتعكس الوعي وبتدي امل في أنو في نقله نوعية وفي حماس لتغيير الكثير .. وكنت اتمنى استمع لي عافية بتغني لي فيروز .. لكن ما وصلني منك .. وصلني للحصل في الحلقة دي .. اسحق الحلنقي .. شاعر عظيم تغنى ليهو الكثير من اسطين الفن .. أن تبتدي ( عافية ) من النقطة الصعبة وتتجاوز وعورت التجربة اعتقد انو ده دليل ( عافية ).. وربنا يوفقه وتتجاوز كل الحدود الافتراضية المرسومة .. .. اكرر الشكر لقناة النيل الأزرق وللاستاذ بابكر الصديق ولمجموعة نجوم الغد .. الفعلن انتشلتنا من جو المشاحنات الإفتراضية .. واهدتنا دعاش من جوووه البلد.. والتحية ليك ياامير .. ومداخلتك العميقة جدا كما عودتني دائما
Post: #59 Title: Re: ..نجمــات .. نجــوم الغــد Author: أبو الحسين Date: 02-13-2007, 10:56 AM Parent: #1
عليك الله شوف غتاتة صاحبك تنقو يا تمبس...
دي ما وراني ليها عشان أضيفها لي معجباتي التويمات...
العزيز هاشم خلف الله .. مليون سلام يا حبيبنا .. ده مكسب كبير والله الشغل النضيف الفوقاني ده .. الواحد كان بضمن ليهو كل مرة عنائم زي دي .. ما بيكتر الغزوات ـ ويعبي مخلايتو
والله يا ابو الحسين كان راجي تنقــو يديك من الحاجات دي ... واطاتك صبحت تعرف اي حاجة تلقاها في الجهاز بتاع تنقو ده معناته انساها .. ( جيب من جوه ).. امشي شمالك شويتين يا ابوالحسين بعدما تقعد في الكمبيوتر ، ح تلقى نانسي عجاج ( وش ) وكان اخدت شمالك شويتين كمان .. بتلقى الحلقة بتاعت ( بازرعة + عثمان حسين+ سلمى سيد ).. بس الكلام ده بيني بينك ..
الريس أبوجهينة.. سلامات ياريس وأعجبني التشريح والتقسيم .. وزي ما شايف ياريس الأصوات دي بتقبل القسمة على أي رقم وبالرغم من أن كل صوت بختلف عن التاني إلا أنهم بتلاقو في نقطة ( الهدهدة ) دي وتحريك ( الجـــوه ) ( وردان الروح )
الحديث عن نجوم الغد يحتاج لوقفة خاصة و نفس عميق ،، فالجمال الذى منحه أبطال نجوم الغد و فى مقدمتهم قائد الأسطول بابكر صديق و معه الكوكبة الذهبية بقيادة الدكتورة آمال النور و زملائها و الفرقة الموسيقية و النجوم الصغار لا يحد على الأطلاق ،، نجوم الغد صدقونى هو إنتباهة و نسمة عبير فى صيف عقيم شديد الحرارة ،، نجوم الغد فى كل يوم يحلق بنا فى سموات جديدة ،، فبعد محمد عز الدين و نبوية الملاك و ريماز ميرغنى ،، تحلق بنا عافية حسن الله يديها العافية بالجد و حرم الدقالة و إيناس و هناك من الشباب أيضا قرع ود العباس المدهش ،،و لا ننسى سارة النور كذلك و غادة حسن صاحبة الآداء الفريد ،،
عافية حسن و حرم ،، هما من سيتركان بصمة فى مسيرة الغنا السودانى إذا ما قدر لهما مواصلة الأبداع ووجدا التعاون ،، التحية للرائع الحلنقى و أحمد المك و هما يتقدما الصفوف رعاية و أهتماما بهذه النجوم عبر عافية حسن ،،
أخوى الحبيب الشيخ إبراهيم الشيخ
شوف عينى عافية حسن دى كسرت فيك جنس ضلعة كبيرة خلاص صااااااااااااااااح
Post: #65 Title: Re: ..نجمــات .. نجــوم الغــد Author: الشيخ إبراهيم الشيخ Date: 02-13-2007, 12:55 PM Parent: #64
الطيب الخال كيفك يا حنين
Quote: أخوى الحبيب الشيخ إبراهيم الشيخ
شوف عينى عافية حسن دى كسرت فيك جنس ضلعة كبيرة خلاص صااااااااااااااااح
اسع في داعي للفضايح ده ياخال والله البت ماشاء الله غناية بالجد واخوك اي حاجة بتجي من جبل أولياء بحبهاخالص لانهم نعم الناس بتحبو بالجد
Quote: واخوك اي حاجة بتجي من جبل أولياء بحبهاخالص لانهم نعم الناس بتحبو بالجد
العزيز الشيخ إبراهيم الشيخ .. كل التحايا .. والله كلامك سمح أي حاجة ليها علاقة بالبحر وجبل أولياء أكيدد ما فيها كلام .. ( امسك من السمك – وأي حاجة تانية تخطر علي بالك ) لي معزة خاصة لي ناس الجبل ..
عزيزنا الطيب إسماعيل . الف شكر وليك كل التحايا .. وأنت من المتابعين بإهتمام لتجربة النجوم وكنت قبل أيام مريت على بعض كتابتك فيما يتعلق بالحلقة دي .. اقدر كل حروفك وهي في حد ذاته دفعة معنوية تضيف من إبداع النجوم الذين يحتاجون فعلا للمزيد من الرعاية وتكثيف الجهود عبر قنوات متخصصة تعمل على دعمهم بالشكل المطلوب .. ما هو واضح عن تجربة نجوم الغد يدعي إلى الوقوف والتأمل في المصير المنتظر لخامات جيدة مثل هذه الخامات الصوتية ـ معظم التجارب الشاركت في المجموعات المختلفة تنتهي بإنتهاء الفترة التنافسية ولا توجد هناك غستمرارية بشكل مؤسس ومدروس يضمن لهم الإضافة العلمية من المتخصصين في مجال الصوت والحرف الموسيقي وتمارين المهارة المطلوبة .. كانت تجربة نبوية الملاك الناجحة ، وصفوت الجيلي .. ثم الغياب التام لمعظم النجوم الذكرتهم .. ريماز ، محمد عزالدين ، وإلخ . تجربة عافية الحالية مع الأستاذ أحمد المك وهو يتبنى مشروع عافية هي تجربة جيدة ومحفزة للاستمرارية بالرغم من محدوديته وتركيزه على الفردية .. اتسأل أحيانا .. مع وجود العديد من المهتمين الموسيقيين من باحثين وحملة دكتوراة .. متواجدين بالسودان ماذا بعد ... وماذا قدمتم وما ستقدمون لهؤلاء المواهب نجوم الغد ... ؟
Post: #66 Title: Re: ..نجمــات .. نجــوم الغــد Author: ناذر محمد الخليفة Date: 02-13-2007, 01:29 PM Parent: #1
.
Quote: ناذر يا فنان ... مشتاقين و الله
بالأكتر يا حبيب وينك ما ماظاهر ؟!!
كوستاوي وخدر ....
أنا صراحة فوارق الزمن دي ما قاعد إشتغل بيها كتير .. دايما بقوا إنو التجاذب الروحي بعد الساعة إتناشر بتوقيت السودان يفترض يكون موحد في الوجدان ومتفاعل في زمن واحد بغض النظر عن إختلاف البقعة الجغرافية ..
فهمتو حاجة ؟؟!!
ولا انا !!!!!!!!
الشيخ ..
Quote: ياخي عش العصفور ده بفتش ليها لي زمن وقدر ما بكيت لناذر ود الخليفة عمل لي مجنون وقال يطرشو لكن الليلة ربنا يديك العافية فشيتني طب .
وحاتك اول مرة أسمع الغنية دي هنا وبركة الجابا ليك تمبس .!!
Post: #67 Title: Re: ..نجمــات .. نجــوم الغــد Author: ناصر الحاج Date: 02-13-2007, 03:46 PM Parent: #66
الاخ العزيز تمبس الاغاني جميلة خالص كلها خاصة الاولي اللحن جميل و المغنية تعرف حدود و امكانيات صوتها وهي تؤدي. خالص تحياتي ناصر
Post: #68 Title: Re: ..نجمــات .. نجــوم الغــد Author: خالد علي محجوب المنسي Date: 02-13-2007, 06:07 PM Parent: #67
Quote: رد الله غربتك لتنعم بكل ما هو جميل.. أحاول بقدر المستطاع توفير كل ما هو جميل وغير متوفر للعديد منا .. حلقات نجوم الغد دائما مميزة بما تقدمه من حلقات بمتابعة ورعاية المتخصصين وما يقدم فيه من دروس ورعاية موسيقية، تمحي بعض امية الموسيقى .. وتتساعد على تقويم الخامات الفنية المتوفرة ومتابعتها من المراحل الأولى ..
الفاضل الرائع تمبس جزاك ربي كل خير علي الدعوة الجميلة بقدر جمال روحك ولك مثلها مضعاف لينا طلبّن صغير وعلو يكون كما نحسب نود أن يرافق مثل هذه الأشياء الجميلة ( لينك الحفظ )
Quote: لينا طلبّن صغير وعلو يكون كما نحسب نود أن يرافق مثل هذه الأشياء الجميلة ( لينك الحفظ )
شكرا ياصديقي .. لكل دعواتك الجميلة .. وطلبك على العين والراس .. وآسف للتأخير في الرد وسأقوم بإدراج كل الملفات للحفظ .. وأعمل على تجهيز بقية الملفات الأخرى لتكتمل المجموعة .. أرجو أن تستمر مبدئيا في الاستماع للملفات .. وسأوافيك باللنكات المطلوبة
ناصر الحاج ... أمورك كيف ياناصر..؟ .. طبعا كل المجموعة بتجبرك على الاستماع للأداء الجميل والمريح الخالي من النشاذ الصوتي ( البيضرس ) .. وده بيعني مبدئياً ان الخامات الصوتية ممتازة .. وبي شوية عناية ومتابعة ، أكيد ح نصل مرحلة معقولة من الأحترافية مليون شكر ياناصر للمتابعة اللصيقة لكل العمليات الفنية..
صديقي .. جــون ( ودالعباسية ) كيفك يا صاحب .. صوت عافية ياجون حملني إلى ذكري ايام جميلة .. لصوت صديقة قديمة شبيه بصوت عافية إلا أنها كانت لا تحب الظهور خجولة تكتفي فقط باسعاد نفسها ومحيطها في مساحة ضيقة .. تركت الغناء أخيرا وتفرقت لأمور أخرى .. صوت عافية طالما هو متاح للجميع ووجدد هذا القبول ، لماذا لا نهتم بها كظاهرة تستحق الوقوف وتقديم الدعم المطلوب ..؟ .. الثلاثي الهارموني .. اسماعيل عبد الجبار وياسر وناجي : ثلاثي مميز منسجم موسيقيا بحس عالي ( وتكنيك ) مكتسب نتاج تمارين شاقة وقراءة لذاكرة الآلة الموسيقية.. هم أيضا ظاهرة فنية جديدة في كل التريو الثلاثي المنسجم ويشكلون فرقة موسيقية متكاملة.. ياسر يمتعني على آلة الساكس وفي التعامل معها بحرفنة إضافة إلى تكنيك راقي جدا يجبرك على المتابعة الدقيقة لكل نغمة يرسلها .. وهو كما ذكرت احساسو في السماء .. وآلة الساكس من ضمن الآلات النحاسية التي يصعب التعامل معها دون الإحساس العالي جدا..
ادينا أخبارك وأخبار الدنيا معاك وأخبار بي هناك ...
Post: #76 Title: Re: ..نجمــات .. نجــوم الغــد Author: الملك Date: 02-14-2007, 01:58 AM Parent: #1
واليوم 24 يا ناجي وما منك خبر .. أظن رصيدك أنت الراح فيها .. خــدر مافيش . وتماضر برضو مافيشة . وأنا كلما أقول انزل باقي الملفات دي .. تمسكني الحالة اياهــا..اقصد بالحالة إياهــا .. البتشبه حالتك تلك ( أعفي ) لي ياخ
Post: #78 Title: Re: ..نجمــات .. نجــوم الغــد Author: عمر الفاروق Date: 02-14-2007, 08:02 AM Parent: #1
تمبس وخدر وتماضر: بالمناسبة غلبني عديييييييييل وقدر ما اقول ما اتاوق بي هنا عشان اسيب العيش لي خبازينو لكن بيغلبني.. تعرف يا تمبس البت حرم دي(البت التانية) غناية اكتر من عافية وعافية غناية شديد (راجعوا بوست اول ما ظهرت عافية واخوكم قال ليكم عافية دي حا تضرب السوق).. حرم دي بتغني مرتاحة راحة ما عادية وممكن تطلع بي صوتا ده في اي مساحة وفي اي درجة والحبببببة ما بتجيها عكس عافية المرات كتيييييييييرة بتتعب شديد في العالي لأنو عافية دي خلقوها تغني في الهادئ والرايق ولو عايز بالجد تستمتع بي البت عافية دي اسمع " لو عايز تسيبنا جرب وانت سيبنا" .. حرم دي يا تماضر ظلمتيها ياخ البت ما خاشة في دور كمال ترباس البت حقيقة كانت متأثرة لي درجة كبييييييرة بي صوت ندى القلعة وهو بالمناسبة ما تقليد لي ندى القلعة لكن فيهو شي من صوت ندى خصوصاً في اغاني الحماسة .. طبعاً هي صوتها بكل تأكيد افضل واجمل بي كتييييييير من ندى القلعة لكن زي ما قلت ليك شكلها كانت بتسمع اغاني الحماسة من ندى القلعة .. بعدين انا شايف بقت في زي لخبطة بين الزول الرايق في غناهاو والزول الجامد .. البت حرم دي رايقة في الغنا وما جامدة وعندها احساس خفي كده لو ركزت فيهو بتحسو من جوووووووة .. بالجد انا بقرا الاحساس ده في كسرة عينها وهي بتغني .. ممكن شوييييييية كده عندها حبة خجل وده بيعكش نوع تربية معين جاية بيهو من البيت .. بي صراحة البت دي بحس فيها بساطة القرية وناس القرية ليي ما عارف.. عموماً وزي ما اتحديت في عافية دي زماااااااااان انا حالياً اراهن على البت حرم دي كمان .. بالمناسبة عافية حسن دي غناية شدييييييييد وماشة صاح جدا في طريقها الفني .. عندها عيب وااااااااااااااااااااحد بس لو حلتو بتكون ما عندها مشكلة .. ما بتعرف تلبس !!!! بتجي لابسة لبس زي الكأنها ماشة الجامعة ..
تخريمة : يا تمبس والله حرام عليييييييييييييييييييك .. انا بالعكس قلت ليكم البت الوحيدة البتعرف تغني هي عافية .. القلت ما بتعرف تغني ولحدي اسة ما مقتنع بيها هي البت التانية الإسمها سارة القاعدة معاهم في الطرف دي.. انت اظنك ملخبط والبخور ريحتو قامت بيك .. انتو مرة كتبتو عن سارة دي وانا جيت قلت ليكم انتبهو لي واحدة اسمها عافية وسيبكم من سارة دي.. كدي راجع الارشيف وشوف بوست بناديها .. يا حليلك يا تمبس ... احرق البخور ده حرقو الجيلي..
زمني دا كلو زول قراية بس لكن البوست دا استفزاني .. وفي واحدة في النجمات دي مافي زول خت بالو ليها ولا حتى تمبس ماعبرها مع إنها فلتة جد (مرة لقيتها بتغني في أغنية لزكي عبد الكريم)على ما اظن .. قلت للجماعة ياها دي بس .. لكن مامتذكر اسمها للأسف (وجه خجلان )
تمبس بالله البت دي غنت ليها أغنية من أغاني الغرب الحبيبة للقلب لو عندك عليك الخوة نزلها .. خلينا نشرب ونقارن
Post: #86 Title: Re: ..نجمــات .. نجــوم الغــد Author: عبدالله شمس الدين مصطفى Date: 02-15-2007, 08:45 AM Parent: #79
تمبس يا .... نقّاد.
رأيت عافية من كم يوم فى برنامج وليد زاكى الدين لكن فى آخر أغنيتها هذه ، بهرنى حضورها و أداءها و إندماجها و ذوبانها فى ما تؤديه من كلمات و الحان ، و طوالى ذكّرتنى بالرآئعة المليانة غُنا- هادية طلسم - و طبعاً إنتهت الأغنية و بدأت حسرتى على مواهب و براعم وطنى الذين يخبو نجمهم سريعاً لعدم وجود من يرعاهم و يأخذ بيدهم ، لا دولة ، و لا جهة ، و لا مؤسسة ، و لا حتى أفراد .
تفتكر ممكن يتعمل شنو أكثر من مجرد إستضافتهم من حين لآخر بالتلفزيون أو الإذاعة ، أو وقوعهم ضحايا لسماسرة الفن ، و طفيليو المغنا؟؟؟!!!!.
مفروض تكون فى جهة مسؤولة و مهتمة ، يا حليل قصر الشباب و الأطفال ، برغم كل شئ كان لفتة ذكية و بارعة ، و قد نجح فى رعاية و صقل الكثير من المبدعين ، ونجحت التجربة فى إيصال رسالتها .
بس ما عارف كيف ( الدبارة ) مع ناس المشروع الحضارى ديل ، الذين يعتقدون أن كل ضروب الفن رجسٌ من عمل الشيطان ، و لا يجتمع فى قلب المؤمن إثنان ، الغناء و ..... لكن أنا متفائل برغم عتامة المشهد الماثل الان ، و أنا صغير .... رأيت وروداً تنمو فى مقالب الزبالة ، و يبدو لى أن العالم ما زال فى طفولته الدآئمة تلك ، يعنى مثلما لا يتعب البعض من صناعة ( الكوش ).... لم تنسى الورود كيف تنمو ... و لو هناك .
شكراً تمبس الرائع . عوافى يا راجل يا جميل ، و الله يديك " العافية "
ياسلالام يا عبد الله شمس الدين ضربت في الأوتار الحساسة جدا .. واصبتني في ذكرى ..
Quote: مفروض تكون فى جهة مسؤولة و مهتمة ، يا حليل قصر الشباب و الأطفال ، برغم كل شئ كان لفتة ذكية و بارعة ، و قد نجح فى رعاية و صقل الكثير من المبدعين ، ونجحت التجربة فى إيصال رسالتها.
قصر الشباب والأطفال المؤسسة التعليمية الفريدة في نوعهــا هي أحدى المؤسسات التربوية التي اضافت الكثير للشباب والأطفال وفرخت وصغلت الكثير من الجيل المتواجد بالساحة الان .. كانت محطة قصر الشباب والأطفال من المحطات المميزة التي تقدم العلم النظري والعملي بإحترافية عالية جدا من رعاية الطفل وفق جدولة مدروسة يراعى فيها كل الجوانب النفسية ومعدلات الذكاء وعوامل الترفيه والجوانب الوطنية كانت بجانب الأكاديميات مساحة لصغل الموهبة بالطرق العلمية السليمة .. برنامج الطفل كان يخاطب وعي الطفل ويطوره بما يتوافق بسنه ، برنامج الشباب ايضا يسهم في تقديم السند اللازم وتأهيل الشاب ليكمل مشواره بمساعدة منهجية .. بالتغول على قصر الشباب والأطفال وإضعافه عن قصد وتحويله إلى دور لا علاقة لها بما قام من أجله .. فقدت الثقافة السودانية والطفل والشباب من الجنسين .. صرح عظيم جدا ساعد على بناء شريحة من الأمة في فترة زمنية بنظام تربوي سليم .. كلما أجد موهبة يا عبد الله متفرده في اي مجال .. احزن للمصير المحتوم المنتظر .. واتحسر على قصر الشباب والأطفال ..
Quote: بس ما عارف كيف ( الدبارة ) مع ناس المشروع الحضارى ديل ، الذين يعتقدون أن كل ضروب الفن رجسٌ من عمل الشيطان ، و لا يجتمع فى قلب المؤمن إثنان ، الغناء و ..... لكن أنا متفائل برغم عتامة المشهد الماثل الان ، و أنا صغير .... رأيت وروداً تنمو فى مقالب الزبالة ، و يبدو لى أن العالم ما زال فى طفولته الدآئمة تلك ، يعنى مثلما لا يتعب البعض من صناعة ( الكوش ).... لم تنسى الورود كيف تنمو ... و لو هناك.
ناس المشروع الحضاري يا عبد الله أول اسهام لهم في الجانب الثقافي علموا بقوة على استئصال كل ما يتعلق بالفن ـ تشكيل ، مسرح ، موسيقى .. عناصرهم المتشددة ساهمت بقدر كبير في تغييب الوعي الفني ومحاربته.. وإلى الان ما ذالت عناصرهم جاسمه في الكثير من المحافل الفنية بالرغم من عدم علاقتهم بالفن.. .. عافية واخواتها وكل الجيل الموهوب لا أدري ما هي اسهاماتنا التي سوف ننتشلهم بها من هذه الدوامة ، لكن فقط اطمح في أن تكون هناك ولو دار صغيرة لرعاية المواهب .. يتبناها زوي الخبرة والكفاءات العالية بالتعاون مع اصحاب الأمكانيات الضخمة وإن كان ليست بصورة طبق الأصل من قصر الشباب والأطفال ، لا تقل من الناحية العملية من تدريب وزرع روح وطنية .. الف شكر يا عبد الله لمداخلتك العميقة جدا ..
Quote: لكن البوست دا استفزاني .. وفي واحدة في النجمات دي مافي زول خت بالو ليها ولا حتى تمبس ماعبرها مع إنها فلتة جد (مرة لقيتها بتغني في أغنية لزكي عبد الكريم)على ما اظن .. قلت للجماعة ياها دي بس .. لكن مامتذكر اسمها للأسف (وجه خجلان )
مريود.. كيفك يازول ..؟ مشتاقين أول حاجة .. ومعليش ح انط من الناس ديل كلهم وارد ليك بالملف ده الزولة دي يا مريود برضو من ضمن المجموعة المرصودة في اللقاء ، بالاضافة لي البقيات .. بحاول انزل باقي الاعمال كلها.. بشكل تتابعي الاغنية المقصودة دي الظاهر لي .. في اغنية تانية بحاول برضو انزله مشتاقين تاني . ووين الحي بيك ...
Quote: طبعاً هي صوتها بكل تأكيد افضل واجمل بي كتييييييير من ندى القلعة لكن زي ما قلت ليك شكلها كانت بتسمع اغاني الحماسة من ندى القلعة ..
تعرف يا عمــر انا بقيت كلما أسمع أي عمل لي نجوم الغد يا أي نجم جديد طوالي ( بستحضرك ).. وبستحضر معاك ( البرازيل ) طبعا في المقطع الفوقاني ده بالذات عجبتني لاني كنت قاعد افتش لي العلاقة بين الصوت السامعة ده .. وطريقة الغناء .. الصوت بصمتو واضحة أنو خاص بيها لكن طريقة ( النهرة ) للمفردة هي الخاصة بي ندى القلعة والأدت تماضر نفس الأحساس بتاع الإسترجال المقصود بيهو في الطريقة ( الترباسية ).. من ناحية أخرى اتفق معاك أن حرم امكانياته الصوتية وانها بتغني بي راحة دي ما فيها شك عندي .. بس في حاجة واحده هنا شايفك زي عملت مقارنة بين صوت عافية وبين حرم في الامكانية الصوتية .. كل صوت ليهو محدودية بتعامل فيها ومدى محدد بيصل ليهو بينقطع فيهو ... في الحاد والغليظ بكل التصنيفات المعروفة .. يعني لو مسكنا درجة صوت عافية بتختلف من درجة حرم الصوتية .. وبالتالي المساحة الممكن تصل ليها عافية في حدود الدرجة الصوتية المخصصة ليها وتغني فيها بي هدوء..لا يمكن أن تغني فيها حرم .. يعني بإختصار ياعمر زي الفرق بين أبوداؤد وزيدان .. ابوداؤود بيمتع في الخط الخاص بيهو .. وزيدان نفس الطريقة .. علشان كدا مسالة العالي والواطي دي ما قادر اتعامل معاها كمقياس ممكن اطلع بيهو عيوب الدرجة الصوتية .. وزي ما قلت قبل كده التمرين الجاد المصاحب لي آلة البيانو .. بيجود الصوت الموسيقي وبيسهل للفنان معرفة أي امكانية صوتية بقيف فيها وما يتعداها بي أي نشاذ.. يضرس المستمع ويجي حانف ليك وشو يقول ليك انا قاعد ( أهرمن ) .
Quote: بي صراحة البت دي بحس فيها بساطة القرية وناس القرية ليي ما عارف..
.. فعلا حرم فيها طيبة وبساطة ما عادية هي نفس بساطة الناس الطيبين .. ثبتت المسالة دي بي أغنية الحماسة ودخلت في الشخصية وبالرغم من إنها برضو اجادت الأغنية العاطفية التانية ..
Quote: عموماً وزي ما اتحديت في عافية دي زماااااااااان انا حالياً اراهن على البت حرم دي كمان ..
ما عارف ياعمر لكن لو حرم حصرت نفسها في لونية محددة ياكا الخسرت التحدي وطلعت الطيش ..
Quote: بالمناسبة عافية حسن دي غناية شدييييييييد وماشة صاح جدا في طريقها الفني .. عندها عيب وااااااااااااااااااااحد بس لو حلتو بتكون ما عندها مشكلة .. ما بتعرف تلبس !!!! بتجي لابسة لبس زي الكأنها ماشة الجامعة ..
ياخي ديل كلهن انا حاسس بيهن ماشات الجامعة كان لبست توب ح تقول لابساهو بالشمال لييه .. كان لبست فستان طويل ح تجي تقول الزولة دي ماشة حفلة قايله نفسه ؟؟ والله انا عارفك .. كدي حاول اقترح ليك تصمييم محدد كده يتواكب مع ظهور عافية .. لانو بالجد شايف اللبس ده متناسق جدا مع شكلها العام ..
Quote: انت اظنك ملخبط والبخور ريحتو قامت بيك ..
عندي نزلة الأيامات دي يا عمر وحساسية في عيوني .. ياخ والله من ما قلت لي البرازيل يا عمر بقيت طوالي كل ما اتذكر لي حاجة حتى لو اتفقنا فيها طوالي ادخل ليك مسالة البرازيل دي .. واعنقد .. غايتو انا ما متذكر والله انك راهنت بي عافية .. لكن متذكر انك عندك حساسية مع صوت سارة النور ( طبعا ما راجعت البوست بتاع الحلقة الذهبية لسه) .. واللي هي كانت نجمة دورة من دورات نجوم الغد وفازت بالمركز الأول بعد كل المنافسات وبعد تقييمه من المتخصصين .. فما عارفك استندته لي شنو في إنها ما بتعرف تغني إلا تكون عنقده منك بس غايتو براجع الأرشيف واشوف كلامك ده ..
Quote: يا حليلك يا تمبس ... احرق البخور ده حرقو الجيلي..
Post: #87 Title: Re: ..نجمــات .. نجــوم الغــد Author: خالد تاج السر Date: 02-15-2007, 10:02 AM Parent: #1
تمبس والله انت نسمة جميلة في هذا المنبر روعة لا تضاهيها روعة ربنا يحفظك ويسهل لك كل الدروب التي تسير عليها
صديقي العزيز خالد تاج السر .. امين يارب .. وياريت اساهم بكل معرفة بسيطة في توصيل أي فكرة يستفيد منها غيري في هذه المساحة .. الف شكر مجددا يا خالد لعميق كلماتك
Post: #88 Title: Re: ..نجمــات .. نجــوم الغــد Author: معتصم دفع الله Date: 02-15-2007, 10:22 AM Parent: #1
العزيز الأستاذ الطيب شيقوق .. مليون سلام يا استاذنا .. وتقبل تحيات حميدة وطلال الذين يسالون عنك بشدة .. للاسف يا استاذ شيقوق لا امتلك اي تسجيلات لي نانسي عجاج .. لكن كلي وعد سأقوم باللازم حال توفر المادة الف شكر يا ابو الطيب عميق تحياتي للمعاك ..
حمداً لله علي السلامة يا معتصم أدوك عين يا ود دفع الله ___ يا هالك -تمبس- شكراً لغدكـ الجميل دوماً يا قول نابري، أنا فرحان بيك يا صاحب _____ ليكم مكاييل مودة من وحدة الأردب
استاذ حمزة سليمان كم اطربتنا عافية ورتبت دواخلنا بالصوت المتفرد .. وبلا شك فيها ملامح زمن جميل قادم بقوة فيه من خلاصة الماضي الذي فقدناه بفعل فاعل .. وحاضر ملي بامكانيات متعددة هذا المستقبل يجب أن يسهم فيه جميع من لهم علاقة بالوسط الفني عن طريق تقويم هذا الجيل الذي اتضحت ملامحه من خلال هذه الإسهامات والمشاركات من المواهب المتعددة التي تخطو بثبات نحو مستقبل فني مشرق..
صديقي الهالك دائما ود طيفور ... هكذا نصدر لك الفرح الجميل ليمنحك القليل من الدفء والطمانينة .. وعلشان تبطل مزازاة ليك كميات من الموده من معتصم .. ومني أنا وعودا حميدا بعد الكربنة بتاعت الكم يوم العملت لينا بيها زلزال دي ..
العزيزة سلمى صبحي .. لم يسعفني الحظ لاتابع حلقات نجوم الغد بالذات في الدورات الأخيرة .. لكن لقاء العيد حصلت عليه بالصدفة وتحسرت على عدم حضوري الحلقة في وقتها .. عافية حسن تغنت بعشة صغيرة للبلابل .. وعادت بنا إلى الزمن الجميل ( مرفق الملف ).. التحية عبرك لنجمات الغد يسطعن في سماء الوطن ابتسامة
Quote: تمبس يا جميل ، كتبت بوست عن البلابل به مناشدة خاصة لك ، رجاءً تفضل للمرور عليه . شكراً يا فنان. شمس
استاذنا عبد الله شمس الدين .. اولاص دعني اشكر لك كل اسهاماتك المميزة .. ويظهر انك على احتكاك بالوسط الفني من فترة طويلة .. علي العموم قمت كما ترى باللازم في البوست المعني .. وسأواصل متى ما توفر يل الزمن المناسب... لك الحب ..
... تبلدينــــا ...
Quote: شايفكـ مركز على الجنس اللطيف كدى خش على البقلد عثمان حسين داكـ ..
.. والله فعلا يا تنقــا .. لكن أعمل شنو لقيتن خمسة قدامي في عينالعدو وكل واحده فيهن بي خمسة تانيات .. اطربوني حد الشبع .. فكان لابد من طرح لجمال ده هنــا.. بعدين انت نايم في العسل .. ياخي البقلد عثمان حسين ده نزلو راكوبة زمان .. واصلو ماف مشكلة تاني ممكن نجيبو ليك ..
تمبس يا صاحبي سلام وشوق كثير وزمن طويل ، ولسه دروب عرفتك شاريها المحل دخلته البورد الليله زعلته وفرحته حد الاتنين زعلته لحزن طلال والضبح المستمر لبنات افكار البشر وحق الناس حتى في الحلم والتساوي قدام عرش الخالق الرازق .. دنيا !! وفرحته فرحته بي رجاء وادتني جرعة امل انو الكثير ممكن ... يالله ما اجمله هنا عندي مزاج ادردش معاك هنا .. ولقيت نجومك ساده خشم السما ضو وفرح ياالله يا تمبس .. ما احلاهم ما احلاهم زي ما قال ود المهدي ما احلاهم ، ما احلاهم شالوا معاي الهم بالجمله وهتفوا البحر البحر .. وبعد ما كبرت كراعي من الفرح .. الاتنين والله قريت الدوش في سري : وقفت على امل شارد ونازل من شعاع الروح واقف فوق امل ناهد وقفت معاك ظلال اشجار علي كل الحصل شاهد ... ***** يا نجمة صباح طلعت على كون في الدجى مسافر اذا كان لقياك انا الربحان وانا الخاسر ويا غيمة زمان آسر انت الفيك اصيل مخزون من بهجة وطلاوة روح يودي الزول محل ما يروح (ده الدوش في ليل المغنين) تمبس بنات زي فرحة صباح العيد فرح وجوهم يطفي نار اي وجع .. فنانات بي اصرار وفهم الجواهم من طرب يهزم مليون مشروع حضاري ... يالله قدر شنو الواحد مرات بحس انو الناس ديل سرقوا روح العباد وحجروهم .. لكن شوف العافيه الشاره سنابل خيره ، تطمن بي جد انو لو ذبحوا كل حاجه ما بقدروا على الروح ، روحنا الحلوه المليانه غنا .. زي البت دي اتولدت واثقه ومليانه فرح يكفي بلد ، شفته بتغني كيف زي الكانها عاصرت ابوداؤود وحسن عطيه والفلاتيه والتاج مصطفى وووووووو مليانه بي تيراب الفرح زي عايز تطير وتفر جنحاته في كل الدنيا . المزيكا ابدعوا فيها الشباب كمنجه وساكس واورغ وكانهم اوركسترا كامله .. يااخي مافي طريقه يعملوا مليون قنات نيل ازرق في البلد المليانه نجوم دي .. تمبس دايما لمن تعجبني حاجه منك بققول ليك يديك الفي نيتك ويخدر دربك المره دي يديك الفي نيتك والمافيها ويخضر كل حاجه حواليك يا جلاب الفرحه
الزول المن دورة مانعني ما نزوره يا بت عزاز الناس هيبة و خيول ونحاس امونة كاملة خلاص من القدم للرأس امونة لمن جات لابسة القلوب عاجات بضوي في الساحات فايتة درجات في الهيبة والنورا .
Quote: أظنك أتصوفت .. والله تكون قد عقدت العزم على دخول القفص قبل أن يصيح الديك ..
الجنرال محمد عبد الجليل.. اتصوفت وصاح ديك الشيخ في العقبة .. ، ده الجمال يا جنرال ( البطرطش ) ( وبدروش ) ( البدروش ) بالواحد.. خاصة لما يكون قاعد على الهبشة .. ( هبشة ) العقبة الفوق القبيل صاح فيها الديك دي. ليس على السكارى والدراويش حرج يا جنرال.. ليس عليهم حرج..
الصادق خليفة .. يديك العافية أنت كمان .. والدعوة دي مبروكة جدا الأيامات دي .. بالمناسبة البنية الغنت الغنية دي عرفت انو اسمها رفيعة .. عندنا ليها باقي شغل .. بس النقعد ليهو شوية ..
ياسلالام يا ايمن .. زي ما كأننا قاعدين بي هناك .. لا هم لا حزن لا ضيق لا خوف من بكره .. وياسلام على عافية لما تلون بي صوته لحظات أن تشتاق.. القــاك وين أكان الفرح قفل مسامات الضياع غناك الزمن ارشيف عشق وتر التراخي موشحات..؟ من غبت ما شرقت شمس .. والدهشة ساساق الدروب لا وين تمش؟ .. تعرف يا أيمن .. كتير لما كنت بشوف عمر الدوش بي كوووم البساطة المعهودة فيهو .. وهو ود حلة عادي زيي زيك كدا .. وصاحب ـ بيحس بي فرح اصحابو وبي آلم الغير ويتحسر لي بعادهم .. كنت بتسغرب بلاي الزول ده يطلع مو كل الكلام الصعب ده .. جيت لقيت الأصعب منو أبو سامر مصطفى سيد أحمد لما دخل كل الكلام في الصميم .. وترجمو بي لغة الإنسانية وخحتم عليهو بي صوت خرافي .. لما سمعت عافية .. لأول مرة بتغني للبلابل .. حست انو في زمن جميل بدا يرجع .. ايوة كتيرين نو بعد البلابل .. لي البلابل .. ايوة طربت ليهم ـ لكن عافية دي بالذات حالة تانية.. كمان تجي تعمله مع الحلنقي حتة واحده ؟؟ يا الله ياخ.. وما طالبني حلليفة يا أيمن لما اسمع عافية بستحضر كل الناس الجميلة .. عميري ، حسن عطية ، أبوداؤد ، الكاشف .. منى الخير ، الفلاتية ، ثنائي الجيل .... وكل ناس الزمن الجميل الفات .. اجمل ما في ذلك الجمال .. أنو عافية قدرت تجيبك .. وتردم كلام سمح زي ده يا أيمن .. ح أزيدك من العافية دي .. علشان كل ما تمر تعتر ليك ..
Quote: دايما لمن تعجبني حاجه منك بققول ليك يديك الفي نيتك ويخدر دربك المره دي يديك الفي نيتك والمافيها ويخضر كل حاجه حواليك
اميــن يارب .. تشكر ياصاحبي .. واعلفني بي رسائلك الجميلة في انتظارك انا..
يــا رجــاء .. يا حنينة .. يا عصفورة ... تصدقي ذكرتيني ايام ليها صفاء .. كل ما سمعناه هنــا .. وكل ما طلبناهو من أغاني .. وبوست التحدي الشهير للاشياء الجميلة .. ويوم العصيان .. وحضورك في كل إجتماعاتنا.. ووجودك في كل مساحة لنــا لبورداب الرياض خاصة .. لا اتحسر على تراكم الزمن على هذه السنوات الجميلة ، فهي فال وتعويزة ضد كل حاجة صعبة في الدنيا.. وجودك هنا أمتداد لتلك الأيام وحلاوتهــا .. فهي لا تقل عزوبة عن صوت ( عافية حسن )
تخريمة: علمتي لينا شنو في ( الاتنين )
Post: #118 Title: Re: ..نجمــات .. نجــوم الغــد Author: محمد الامين احمد Date: 02-23-2007, 08:34 PM Parent: #1
الأستاذة صابرين الصبــاغ.. مليون مراحب بيك في هذا المكان الفسيح .. وفي حضرة الجميلات صوت الغــد .. وكما تفضلتي .. دخلن من دون استئذان ـ مرورك يؤكد ذلك جميل أن تكوني معنــا يا استاذة كل الحب..
Post: #124 Title: Re: ..نجمــات .. نجــوم الغــد Author: عبد الدائم سيد أحمد Date: 02-24-2007, 11:11 AM Parent: #1
العزيز تمبس منذ سنين ليست بالقصيرة ادرت اذنى عن كل قادم وجديد لدنيا الفن وبالذات الاصوات النسائية لانها تصيبنى بالاحباط
ومن فترة ايضا" لاحظت البوست بتاعك دا وما دخلت فيهو لانى عرفت انك بتتكلم عن اصوات جديدة ومنذ فترة ايضا" بسمع الناس بتتكلم عن فنانة جديدة اسمها عافية ولكن لم اعر للامر اهتماما باعتبار انها ذى سابقاتها ولكن بالامس كانت المفاجأة بينما انا مسترخى واذا بقناة النيل الازرق تبث صوتيا" اغنية يا حنين ، استمعت للاغنية بكل حواسى الكلمات وايقنت انها لاسحق الحلنقى بمجرد ما سمعت كلمة عش وعصفور ، ونوار ، وحنية الاداء فكان اكثر من رائع عندها سألت من التى تغنى فقالو لي انها عافية يا سلام على الاداء والتميز والثقة والصوت الدافي اتمنى لها مشوار حافل بالابداع وعدم التسرع والابتعاد عن شى اسمه ( حنة العروس ) لانها مقبرة الفنانات .
ياعبد الدائم سيد أحمد .. من فترة طويلة كنت بعمل زيك كدا .. كلما اسمع لي صوت جديد طوالي بيكون Copy & Paste من القبليهو نفس التشنج وغناء الطير في الباقير . علشان كدا كنت بحبط زيك ( للمدرسة التشويهية.. الفتحوها الما بخافو الله في ( أضنين الناس ) .. )
Quote: وايقنت انها لاسحق الحلنقى بمجرد ما سمعت كلمة عش وعصفور ، ونوار ، وحنية الاداء فكان اكثر من رائع
..يلالا هنا يا عبد الدائم الواحد بيثق في كلامك شديد في كلام الزول البيسمع ويقارن في الحــال . البحس كلمات الشاعر ـ وتلحين الملحن ـ وبيدي المغني حقــو كامل من غير مجاملة . دي النوعية بتاعت الناس الإختفت وظهرت بعديها مجموعة بتاعت شيل اورغنك وتعال كورك لي .. ودي الجابت الناس بتاعين الـ Copy & Paste القلتهم ليك فوق ديل..
Quote: والابتعاد عن شى اسمه ( حنة العروس ) لانها مقبرة الفنانات .
وفي حاجة تانية يا عبد الدائم .. الإبتعاد عن الإستهلاك اليومي .. يعني مش بقصد تتطنقع على الناس .. لالا ، لكن في الاستهلاك الضار .. يعني في أي برنامج استهلاك ، في أي مناسبة إستهلاك في اي شنو ما عارف .. استهلاك .. مع الإبتعاد عن الإستهلاك ده برضو التمارين الشديدة المصحوبة بي منهجية .. أولاد الحلال وبنات الحلال في .. طالما الدولة ما قاعدة تطلع ليها ( مليم أحمر ) تقيف بيهو مع مواهب زي دي ..
ح اعتبر أنك متابع معاي يا عبد الدائم.. بشكل دائم.
Post: #125 Title: Re: ..نجمــات .. نجــوم الغــد Author: معتصم دفع الله Date: 02-24-2007, 11:23 AM Parent: #1
تامبا كيفك يا رفيق .. تعرف من الأشياء الكنت عايز أكتب عنها نجوم الغد وما وجده هذا البرنامج من نجاح كبير بشهادة الجميع .. هؤلاء النجوم فعلاً يحتاجون لرعاية كاملة لكي ينطلقوا فقد أثبتوا بالفعل أنهم نجوم للغد ويسلكون الدرب بثبات وثقة كبيرين لذلك أتمنى أن يتفاعل معها الجميع والقائمين على أمر الفن في بلادي حتى لا تكون التجربة كسابقاتها يكتب لها الموت سريعاً .. كثيراً ما شاهدنا نجوم تتلألاء في الدورات المدرسية وفي كثير من مراكز الشباب وفي مناطق كثيرة من بلادي ولكن دون رعاية تزكر ودون إهتمام لذلك لم يكتب لها الإستمرارية .. عجبني البوست جداً وأنت دوماً تتحفنا بالروائع وكل جميل ..
Quote: كثيراً ما شاهدنا نجوم تتلألاء في الدورات المدرسية وفي كثير من مراكز الشباب وفي مناطق كثيرة من بلادي ولكن دون رعاية تزكر ودون إهتمام لذلك لم يكتب لها الإستمرارية ..
العزيز أبوالدفاع .. الدول المتقدمة علمياً والتي لا تضع لشماعة الامكانيات حساب .. تهتم دائما بمثل هذه ( الخامات ) من خلال وضع برامج اكتشافية ومن ثم التركيز على المواهب المطلوبة ومتابعتها ورعايتها حتى ولو بالامكانيات المحدودة جدا .. كانت مراكز الشباب المختلفة والأندية ـ توفر خدمات تطويريه للجيل الناشئ .. تمت اعاقتها. الدورات المدرسية ولوقت قريب كانت تفرخ خامات ممتازة على مستوى كل الأقاليم تجد كانت الرعاية متوفرة ـ الآن التعامل معها يتم في شكل توجيه يخدم سياسات الدولة دون دراسة للحالة نفسها.. قديما: كانت هناك الرعاية من المراحل الأولية .. بحصص الفنون ، الموسيقى جنباً إلى جنب مع حصص التربية البدنية والرياضة .. والأكاديميات . تغيبت كل هذه المواد .. وتم تجاهلها بشكل متعمد .. .. هل تجربة نجوم الغد سوف تكون بمثابة نقطة يبدا بها التحول واسترجاع بعض مما فقد في المدارس ودور الشباب المختلفة ام ستكون مجرد ظاهرة وقتيه وتنتهي بانتهاء دورة البرنامج ؟؟ واصل يا صاحب فما تكتبه يجد كل العانية وأنت تتحسس مناطق الخلل.
Post: #131 Title: Re: ..نجمــات .. نجــوم الغــد Author: Alshafea Ibrahim Date: 02-25-2007, 10:31 AM Parent: #1
الزوول السمح تامبا وينك يا علاء مشتاقون ومشتاقون شنو أخباركم يا ناس الرياض ؟؟ اهاما عندك زيارة للبحر والشرقية ؟؟ لك تقديري دوما الشفيع
العزيز الشفيع .. سلامات يا محاربنا .. والله الشرقية .. مشتهنها عديل كدا .. لكن زي ما عارف الدوامة ياها .. والساقية لسه مدورة لكن القدم ليهو رافع .. ترقبنا قريبا جدا كل التحايا يا الشفيع..
Quote: طولنا منك ياخي لكن علي الأيمان بوستك دا بسطني وقلت بالله تمبس دا لسه في حركاته ديك???
والله يا اسامة الشوق مطــر بشكل .. وبسطتني نزلتك البلد .. بلاي شفت الدنيا دي سمحه كيف ؟؟ وناسها سمحين كيف ؟؟ والله يا اسامة البنيات ديل كلهن بسطتني زي بسطتك دي .. كل واحده مخصص ليها يوم للسمع .. والمقارنة اللقيته بتشبه امبلينه البتشبه ثنائي النغم البتشبه فاطنة الحاج . انا غايتو مستمتع متعة ما بعديها متعة .. زي البنيات ديل يااسامة بيدوا الواحد مساحة يتنفس كويس ويرتب نفسو من الفوضى الحوالينو دي .. ابقى طيب يازول .. وبركة الشفناك طيب ..
Quote: نغيب ونجي نلقاك عامل ده كله ومال بعد السامبل حا تعمل شنو ؟؟
خالده .. يــا خالده دائما.. طبعا بقولو الغاب جاب .. ومع ذلك وبالنسبة للسامبل .. قاعد استهلك الحواس الخمسة بي اقصى معدلاته حاليا ما عندي حل خلاف كدا الواحد يشم بس .. قاليك خسران حاجة
الاخtmbis شكرا على هذه العصافير التي تغني للعصافير والبلابل والجمال وهؤلاء ليسوا نجوم الغد بل نجوم اليوم واللحظة و الغد المسافر والغد الذي حضر فدائما ما اجد نفسي اهرب من العمل لبرهة لاردد مع هذه العصافير في غصنها الميال طربا وفي شجرة الالحان الشجية و ظلها الوارف تطريبا عذبا كالطفولة كالاحلام مع شكري و امتناني ابوهريرة
Post: #165 Title: Re: ..نجمــات .. نجــوم الغــد Author: علي طاهر Date: 03-03-2007, 01:37 AM Parent: #157
تمبس ما اروع ما تزرعه من فرح عبر هذا الموضوع في حنايانا... عافية بترد العافية فعلاً زي ما قال الملك .. و حرم صوتها قوي .. و لنا عودة لننهل من هذا الابداع ..
العزيز أبوهريرة زين العابدين .. هي مساحة نرتاح فيها بكل ونعبر بالصوت الجميل والنغم ... دائما افعل مثلك اهرب إلى هنا كلما ضاقت بي المساحة الخارجية .. احتاج إلى هذه الأصوات الدافئة لايتمد بها طاقتي .. الف شكر لك والتحية لهذه المجموعة من النجيمات ..
Quote: انا سامع صوت حنان النيل حايم في معظم الاصوات الجميلة دي سامعنوا معاي ولا انا فاقد حنان ساي ؟
ما فاقد حنان ولا حاجة يا ( صاحب عصام ) .. تعرف أمس بالليل جاتني نفس فكرتك دي .. والله برضو سامع حنان النيل في عافية .. في ( آلطـــــو ) حائم مش كدا والا دي حركات مني ساكت ..؟
العزيز اسامة .. طبعا لقيت رسالتك بي هناك .. ورديت ليك عليها .. الغناء السمح ده يا اسامة ما ممكن يمر ساكت .. النجمات ديل بيعملن في شئ ما عادي الغناء البغنن فيهو ده ما ساهل .. ديل مش بهزن بس .. ديل قلبن كل الموازين ونضفن الاضنين من الهرج الكان حاصل ده .. بس ياريت يهتموا بيهن شوية ويفتحو ليهم مجال كويس والبجي منهن اكيد حيكون كلو جميل .. ح ندعمك بي كل الموجود هنا .. ابقى قريب ما بنقصر معاك
Quote: لو المسألة دي ممكنة نتفاهم على طريقة الأرسال والذي منه..
كل حاجة ممكنة يا اسامة . بنجدع ليك في اي مكان يعجبك .. مع انو عندي فكرة بتاعت دعم للمجموعة دي كلها من البدايات .. في شكل مكتبة صوتية توثيقية لفكرة نجوم الغد لو لقينا لينا فرصة هنا في سودانيز .. وتكون دي بادرة كويسة وفي نفس الوقت مشروع دعــم باضعف الإيمان للمجموعات دي .. علشان نوثق ليهم وندعمهم لي قدام .. كان قدرت تشيل من بي هناك كان بها .. ولو ما قدرت بنوصل ليك .. وفي كل الأحوال طلباتك اوامر يا عظمــة.. أنت قايل نفسك ساهل ؟؟
Post: #178 Title: Re: ..نجمــات .. نجــوم الغــد Author: عماد محمود علي Date: 03-04-2007, 07:30 AM Parent: #177
أخي وصديقي الودود تمبس
يسعد صباحك رفيقي ، ، ،،
أنا عملت مداخلة في الصفحة الاولى بس شايفها ما نزلت ، طبعاً ده أكيد من الزول الزفت الاسمه جمري ده ، بكون غطس حجرها أصله دائماً مغطس حجري معاه ، على كل حال معليش يا جميل ودوماً على دروب السعادة نلتقي ، وخليكم كده مع كسير الثلج إنت والمعاك أبو شخيرة ده لحدي ما أمير ده يغطس حجركم الاثنين ، مش كده يا خالــدة ؟ وســـلام يا عسل .
Quote: طبعاً ده أكيد من الزول الزفت الاسمه جمري ده
.. أمير الأيامات دي يا عماد نحن مدنو حق الفيتو .. وحق أي حاجة .. يمسح يكتب ـ يجرح يداوي .. أصلو ما في حد يسألو .. المسالة دي طبعا ليها حد محدد .. كمان ما يقوم يشطــح .. من ناحية أخرى .. أمير ده أنتو حاسدنو ساكت في وجاهتو دي .. ( الكلام الفوق ده طبعا يا عماد فيما يتعلق بي تكسير التلج .. صاحبك ده كمان ما يقوم يصدق ).. .. .
حبيب نــورة تبرا من النــار يادوبك وقعت لي مريم دي .. أنا كنت فاكره حلقة من حلقات نجوم الغد الفاتتني .. ما عندك مشكلة ورين انزله ليك وين .. وبعدين برجع البيت اظبطه ليك .. لاني الان خارج البيت والأجهزة القاعد قدامه دي ما فيها برامج ملفات موسيقية ..
Post: #181 Title: Re: ..نجمــات .. نجــوم الغــد Author: عماد محمود علي Date: 03-04-2007, 11:52 AM Parent: #179
Quote: أمير ده أنتو حاسدنو ساكت في وجاهتو دي ..
ha ha ha ha ha ha ah
Post: #182 Title: Re: ..نجمــات .. نجــوم الغــد Author: عبد الدائم سيد أحمد Date: 03-04-2007, 01:36 PM Parent: #1
تامبا يبدو انى حاكون معاك دائما" استمعت الى الاغانى وحدة وحدة وحداااا ووجدت انى ظلمت نفسى وظلمت الاصوات الجميلة دى معاي ولفت انتباهى ثلاثة اصوات : عافية ورفيعة و انصاف فتحى
اولا" عافية تمتلك الحضور الجيد بالاضافة لاغنية يا حنين ذى عش العصفور اضافت لها الكثير ويكفى انها من كلمات الحلنقى برغم ذلك اجتازت مطب اغنية عشة صغيرة لان اغانى البلابل حينما تغنى تستنبط فى داخلك احساس البلابل ودا مش لمصلحة المقلد مهما كان صوته وممكن اقول عافية كالاتى : - الكلمات - اللحن - الصوت
ثانيا" رفيعة : لاول مرة اسمعها وفى رائي انها اجمل الاصوات مع ان الاغنية كلماتها بسيطة وممكن اقول رفيعة كالاتى : - الصوت - اللحن - الكلمات
ثالثا" انصاف فتحى : من غير مقدمات هى ام بلينة السنوسى الصغيرة ومشروع فنانة ناجحة بكل المقاييس وهى كالاتى : - الصوت - الكلمات - اللحن
العزيز عبد الدائم .. كلامك جميل جدا .. بس صدقني انا محتار وكويس انك قدرته تختار التلاتة اصوات دي وترسى ليك على بر .. ( عافية ، رفيعة ، إنصاف ) .. فعلا كل واحده ليها خاصية بتميزه عن التانية .. لكن بختلف معاك في حاجة صغيرة انهن بتلاقو التلاتة في مسالة الحضور الجيد .. ايوة عافية احيانا بيكون احساسه عالي وبتعبر حركياً لكن لاحظ لي رفيعه في التعبير الصوتي وإنصاف في رشاقته أمام المايك .. دي كلها عوامل نجاح اتلاقو فيها ووصلونا بيها.. بتفق معاك أنت في إنصاف أنو لونيته مستمداها من امبلينه السنوسني او على الأقل في تأثير واضح ، عافية فيها حاجة واضحة جدا من حنان النيل ـ رفيعة هي رفيعة .. طبعا دي اكتشافات بتتعمق لي كل فترة ، وكل ما اعيد الاستماع من جديد لكل الأعمال دي ... خلينا متابعين يا عبد الدائم ..
والله كــلامــك صـــاح ياالصحــافــة30 .... ما دام العامل البوست دة فنــاااان لازم يرفــع المعنويــات و خصـوصـــاً بعــد أن تم رفــع معنــويـاته من الزعيــم أول أمبــارح.... و مبروووك للهــلال...
تعرف يا تامبا بالرغم من إنو البوست دة ليهو مدة لكن أنا في المكتب ما بقدر أسمعو لأنو عاملين دي آكتفيتيد للريال بلاير... و كان غايزني شديد لكن الليلة مشيت لهندي صاحبي و من اللابتوب قدرت أسمع و حاجة روعة يا تامبا...
الأعزاء اصدقــاء الحرف الموسيقي .. والالحان الصحافة 30 وهيثم ود القوز .. اشكركم لرفع المعنويات وتشجيع الشباب .. ومطالبين اكثر ان نقف بجانب هذه المواهب وندعمها حتى ولو بأقل الأمكانيات المتاحة .. هذه فترة الان فترة جديدة ننتقل فيها من فترة زمنية كانت حافلة بكل أنواع التدهور الفني في ظل غياب العديد من الأعمدة والكثير من الطيور المهاجرة .. فلندعم هذا المشروع .. بكل ما لدينا من امكانيات .. .. تعرف يا هيثم: المعنويات والله مش في السماء بس .. الظاهر لي من يوم الأحد بالليل عملت ليها جناحات وطارت .. الشباب ديل والله طمنونا بالماتش الجميل ده .. ودخلةا فينا سعادة الواحد ليهو مية سنة ما مر بيها.. بعدين تعرف يا هيثم انا البرامج التشغيلية دي أهم عندي من الجهاز زاتو .. يعني بي صراحة الكمبيوتر خلاص كفاني من العديد من الأمور التانية .. أصبح تلفزيون .. مسجل ، راديو ، قب يبقى تلاجة غايتو علشان كدا لازم اول حاجة المداخل دي تكون مأمنة بالنسبة لي .. السمع والشوف ..
Quote: الأعزاء اصدقــاء الحرف الموسيقي .. والالحان الصحافة 30 وهيثم ود القوز ..
حبيبو تامبا لك الود قـواسيــب يا زارع الحرف الموسيقي بالمنبر...
Quote: تعرف يا هيثم: المعنويات والله مش في السماء بس .. الظاهر لي من يوم الأحد بالليل عملت ليها جناحات وطارت .. الشباب ديل والله طمنونا بالماتش الجميل ده .. ودخلةا فينا سعادة الواحد ليهو مية سنة ما مر بيها..
الكـلام يوم 17-03 في مباراة الرد بالقاهرة .. و إنت عارف حركات اللعيبة المصريين الإستفذاذية...
Quote: خلي يدك خفيفة ياهيثم الأمور دي ما توقفك ..
و منكـم نستفيــد بس من غير غتــاتــة و كد و يدك معانا...
Post: #186 Title: Re: ..نجمــات .. نجــوم الغــد Author: يوسف الولى Date: 03-07-2007, 07:38 AM Parent: #1
الاخ تمبس والناس المنتشيه معاى
عارف بالا ضافه لى اداء الشبات ديل المافى شك فى حلاوتو وروعتو لكن حقو نكون منصفين برضو...........
تخيل لو ان الفرقه المصاحبه كلها كانت مختزله فى اورغن ( اورغن بس ) كان الضجه الطالعه منو غيبت الاداء الرائع دا كلو وكنا انشغلنا مع اصابع العازف وكميه ( الكشكش ) الطالعه من السماعات لكن شوف معاى الكمجنه عامله شنو هنا دى زابطه الاداء بطريقه مبالغ فيها ادت فرصه للفنان يغنى وادتنا فرصه نسمع الكلام كويس ونقرا اللحن بى هداوه تتخيل بعد دا كلو حنقول شنو؟؟؟؟؟؟ من غير شك حنقول ياااااا سلاااااااااااااام زى ما قناها للعظام وردى والكابلى وبقيه العمالقه الفنان فرفور بزكاءه الفنى فطن للفلم دا .. قام سجل شرايطو كلها بى اركستر فشوفو النتيجه كانت شنو غايتو فى راىء المتواضع الفن السودانى تعطل مع ظهور اله الاورغن كاله واحده مصاحبه للفنان ويا ريت تسمعنا غنيه لى واحده منهم بى اورغن ونفس الغنيه نسمعا من نفس الشخص بالات مختلفه واحكم براك بعد ده
Post: #188 Title: Re: ..نجمــات .. نجــوم الغــد Author: الشيخ إبراهيم الشيخ Date: 03-07-2007, 01:29 PM Parent: #186
تمبس كيف حالك ياجميل
والله لي زمن داير ادخل على البوست ده واقول ليك فتش لينا السهرة بتاعت عافية - وحسين ده بس انت ما ساهل تاني بخليك براك وبرجاك بجاي كل يوم
بعدين والله رفيعة ده عندها نداوة صوت وتطريب مبهر والله ذكرتني ام بلينا السنوسي نادر في النساء عموماً التطريب لكن ده متفردة وزي ما قالو ليك الشباب حتكون حاجة ثانية لو لقت شوية رعاية واهتمام وتطوير للمقدرات المهولة الاصلاً موجودة فيها وربنا يبعدها هي والمعاها من ناس الشغالين تدمير في المواهب وعاملين فيها ( حافظنها )
تعرف أنا دائماً بتسائل ليه زي الشباب ديل ما يتم تبنيهم من قبل مبدعين حقيقيين زي وردي وعثمان حسين ومحمد الامين الموصلي وهنالك كثير من المبدعين علشان نخلق أجيال تكون امتداد حقيقي لارثنا من الفن الراقي ونربي في الشباب ديل الالتزام بالفن ورسالته من الاول خالص اكيد ح تطلع نتائج مبهرة
خصوصاً كما تحدث الشباب عن غياب المؤسسات التي تنمي مواهب الشباب وترعاهم رعاية حقيقية( ويا حليل القصر )( ومراكز الشباب)
والله ياتمبس ربنا يديك الفي مرادك ويسهل عليك كان بتفشنا من الورم المحل ما بنقبل نلقاه ده
عزيزنــا الشيخ إبراهيم الشيخ .. كل التحايا .. تابعت لك بوست مشابه تحدثت فيه عن نجوم الغد.. أو ربما اشرت في احد البوستات عن تجارب البعض من نجمات الغد قبل حصولي على هذه الأعمال بالصدفه ، ايضا هذا العمل الذي جمع عافية .. وحسين . زودني به بالصدفة أحد الأصدقاء المتابعين لسودانيزاونلاين الأخ ( فـــاروق ) .. وهو مهتم بفكرة نجوم الغد والمواهب وله اسهامات وراي اعجبني كثيرا .. له الشكر .. سهرة ( حسين وعافية ) كانت ضمن برنامج اعجبت بالاداء من عافية كالعادة مع بعض الملاحظات لحسين في طريقة الأداء المتكررة او اللونية المكررة بالساحة حاليا.. ايضا حسين يحتاج إلى الرعاية الكاملة لتوجيهه بالطريقة السليمة وهو في بداية الطريق .. بالنسبة لي رفيعة .. اتفق معاي الكثيرين جدا على صوتها المتفرد وقربه للراحلة امبلينه السنوسني وده شئ عظيم جدا بالرغم من أنو التقليد في حد ذاته ما مرغوب فيه لكن بما انها قدرت توصل هذا الكم الهائل من التطريب وملامسة الأماكن الحساسة اكيد ح تنجح .. شخصيا اطربني صوتها بقدر كبير جدا واكر الاستماع إليها بشكل متواصل .. نتفق في أن كل هذه المجموعة بشكلها الحالي تعتبر نقلة بما فيها من خامات جاهزة للتشكيل ومتوفرة فيهم كل المعيطات المطلوبة لخلق نجوم يشار إليهم .. من جهة تانية اتمنى مثلك ان يبتعد عن طريقهم المتخصصين في ( تعطيل المواهب ـ العاملين حافظنها ) وهم طبعا معروفين وساهموا كثير جدا في تدمير العديد من المواهب .. وبالمقابل يهتم بهم اصحاب المقدرات العالية للتطوير سواء كان من نواحي تخصصية اكاديمية أو دعم مادي يتمثل في توفير كل ما هو مطلوب من دور رعاية .. والآلات والمساعدات الأخرى ..
Quote: ديل ما يتم تبنيهم من قبل مبدعين حقيقيين زي وردي وعثمان حسين ومحمد الامين الموصلي وهنالك كثير من المبدعين علشان نخلق أجيال تكون امتداد حقيقي لارثنا من الفن الراقي ونربي في الشباب ديل الالتزام بالفن ورسالته من الاول خالص اكيد ح تطلع نتائج مبهرة
اتفق معاك في عملية تواصل الأجيال دي يا الشيخ ، لكن كما ترى ما حددتهم من اسماء ربما سلموا الراية للجيل الحالي باستثناء الموصلي واسهامته في خارج مساحة الوطن ـ ربما الاستفادة ايضا من الخبرات الحالية من الشباب بتخصصاتهم المختلفة من علم الالات والكتابة الجيدة للنصوص والألحان وعلم الصوت اعتقد انه سبكون له الأثر الكبير في تنمية هذه المواهب وتنمية قدراتهــا.. كما ترى تجربة نجوم الغد ساهم فيها العديد من الشباب سواء كان استاذ سعد الدين الطيب أو استاذة آمال النور ـ أو استاذ كمال يوسف ـ أو الاستاذ محمد الصافي .. شكرا يا الشيخ .. وح اعمل على متابعة المجموعة بكشل جيد وعكسها هنا مع مساهماتكم الجميلة التي تخدم هذا الإتجاه ..
العزيز يوسف الولي سلامات طبعا .. عندي رأي خاص جدا بعتبر فيه أن الأورغ هو آفة الموسيقى السودانية وساهم في تدهور الغناء بشكل واضح بالرغم من أنه إذا تم توظيفه بشكل سليم زي ما هو واضح هنا بنطلع بي نتائج جميلة وبيكون مكمل للحن وضابط للأداء بشكل جيد .. وزي ما عارف أن الأورغ من آلات الضبط الثابته الممكن تتوزن عليها كل الأوركسترا. إذا انتبهنا لي ظاهرة الأورغ وهيمنتو على الشكل العام للاوركسترا لكل مجموعة الوتريات والنحاسيات وإيقاعات ... بنجد الأورغ اقتحم الساحة في غياب الموسيقين المهرة .. وساعد ايضا ظهور التقنية العالية بتقدم علم الكمبيوتر ووسائل البرمجيات المختلفة وتقنية محاكات الأصوات وبالرغم من ذلك لعب الأورغ دور كبير في تدهور الموسيقى في الفترة الزمنية من بداية التسعينات .. إذا كنت محق .. مع ملاحظة استعمال الأورغ في فترات سابقة كآلة مصاحبة للتكوين الأوركسترالي .. أو منفرد .. بشكل جيد جدا .. الإنسجام الحاصل هنــا يا يوسف بين آلة الكمان ، والساكس ، والكيبورد .. هو انسجام تام بالإضافة إلى احترافية الثلاثي اسماعيل ، وناجي ، وياسر في مدى التعامل مع الآلة وتوظيفه بشكل سليم جدا وصل الفكرة والاحساس بعيد عن الاسقاطات الذكرناها فوق من نشاذ الآلة والأصوات المزعجة فنادر جدا أن أي مستعمل لي آلة الأورغ مصاحبا لفنان أن يوصل الاستماع بشكل جيد متلازم مع صوت الفنان ..
Quote: زى ما قناها للعظام وردى والكابلى وبقيه العمالقه الفنان فرفور بزكاءه الفنى فطن للفلم دا .. قام سجل شرايطو كلها بى اركستر فشوفو النتيجه كانت ش
.. تعرف يا يوسف قبل ساعات كنت بستمع لي تسجيل حديثث للاستاذ محمد وردي ولاحظت تطوير الأوركسترا ودعمها بالآت إضافية ربما تكون غير شكل أوركسترا وردي المعروفة مثلا .. الـ درمز ، والترامبول ، والكونقــا .. وعدد اتنين ترامبت بدل واحد في السابق كل هذه الآلات ادت شغل جميل جدا ربما انتبه الأستاذ وردي لضرورة اضافة الآت جديدة تحافظ على القيمة اللحنية وده طبعا مع مراعاة عدم اسقاط آلة الأورغ بل اضاف كيبورد تاني وطبعا كل آله بتقوم بعمل مختلف حسب شكل النوته الموسيقية ..
Quote: غايتو فى راىء المتواضع الفن السودانى تعطل مع ظهور اله الاورغن كاله واحده مصاحبه للفنان
..ان برضو مع رائك المتواضع ده .. وسبق سمعتو من الكثير جدا من الفنانين والمهتمين بالموسيقى وتطويره ..
Quote: ويا ريت تسمعنا غنيه لى واحده منهم بى اورغن ونفس الغنيه نسمعا من نفس الشخص بالات مختلفه واحكم براك بعد ده
.. بحاول يا يوسف اوفر النماذج دي لادعم بيها كلامك الجميل ده .. حتى تكتمل الصورة بوضوح
Post: #191 Title: Re: ..نجمــات .. نجــوم الغــد Author: يوسف الولى Date: 03-10-2007, 04:35 AM Parent: #1
اخى تمبس
سعيد جدا عشان راىء المتواضع وافق راىء ناس خبره زيكم
Quote: بنجد الأورغ اقتحم الساحة في غياب الموسيقين المهرة
لسه الناس شايفه تعلم العزف والموسيقى شغله فارغه وعدم موضوع زماااااااان كان عندى عود وبديت اتعلم اعزف عليهو ... يوم جيت لقيت ناس البيت ولعو بيهو صاج الكسره .... قالو الشىء دا شاغل الولد عن قرايتو مااستسلمته مشيت مركز شباب بحرى قلته ليهم عاوز اتعلم عزف العود.. قالو لى جيب عودك معاك ورسوم الف جنييه( دى كانت ماهيه موظف فى الزمن داك ) .. وبعد داك نشوف ليك زول يكون فاضى يعلمك .... تخيل طيروها لى فى راسى..... ونسيت الفكره شوف فى كم زول مر بنفس السيناريو بتاعى دا
Quote: لسه الناس شايفه تعلم العزف والموسيقى شغله فارغه وعدم موضوع زماااااااان كان عندى عود وبديت اتعلم اعزف عليهو ... العزيز يوسف الولي ..
سعيد مرة تانية أنك بتشاركني البوست وتعمل علي خلق مساحة للحوار .. تعــرف .. زمااان بتاعتك دي رجعتني برضو لي زمــااان بتاعتي . كان عندنا ( أورغن ) صغير جدا بيشتغل بي أربعة حجار بطارية صغار .. وAdabtor كانت المشكلة انو الأورغن ده لازم كل يوم يكون عند واحد فينا لاننا كنا مجموعة ـ طبعا ان بكتب ليك الآن وسامع صوت المقطوعة الكانت مسجلة في الأورغ المهم الفترة الكان بيكون فيها الجهاز عندي كنت بستغلها بشكل سئ جدا إزعاج بالنهــار شديد خالص ، وبالليل مافي حد بينوم بالساهل .. وفي النهاية قام الأورغن لحق ( عودك العاسو بيهو الكسرة ) وده كان اصرار لي أني ( اتعاند ) وابقى مزعج زيادة واتعلم آلة العود اصبحت المشكلة الاساسية انو مافي آلة .. فما وقفت عقبة في طريقنا قمنا نجرنا لينا جيتار بديل وعملنا فرقة جاز .. كمية من علب الصلصة .. وعلب اللبن ، دي مجموعة الايقاعات ـ ( مقدمة قزازة يفصل بينها والأخرى قصديرة سجاير) طبعا علشان تدي صوت مميز بعد النفخ . ودي كانت عبارة عن آلة الساكسفون والترامبول في وكت واحد .. طبعا بتقوم تتخيل النغمة وتضربة .. وللمفارقة العجيبة كانت النغمة بتجي طالعة زي ما هي .. والأغرب من كدا ولا واحد فينا ما طلع عازف .. اها لما كبرنا شوية مشينا قصر الشباب ومعاي اتنين من اعضاء الفرقة بتاعتي ديل انا طموحي كان محدود لاني عارف المافيا المسيطرة على قسم الموسيقى وقتها في قصر الشباب .. اتوجهت مباشرة للصالة الرياضية .. واصحابي الاتنين بعدما عملو المعاينة بتذكر الاستاذ ساقهم من يدهم ووقف بيهم في السور بتاع الطابق الخامس على الجهة المطلة على الصالة الرياضية .. وقال ليهم شايفين المكان داك .. في زول بيعلم كراتية امشو ليهو قولو ليهو مرسلنا ليك استاذ فلان .. فلاحظ يا يوسف بالرغم من قناعتي انو الموسيقى ما بيكتسبوها وانما هي موهبة وايقاع موزون بيكون داخل الشخص .. إلا انو احيانا الرغبة الأكيدة مع تنمية المهبة بواسطة شخص مدرب بتادي نتائج جيدة .. عندي تجربة غريبة جدا .. الآن احد عازفي فنــان كبير جدا في السودان .. هذا الشخص ما كان ليهو اي علاقة بالمزيكــا .. بعد فترة اغتنم ليهو آلة موسيقية .. ما تتخيل مقدار الإزعاج الكان بيعملو في الحلــة قدر كيف .. بعد فترة غبت انا عن السودان .. فجأة أول مرة اشوفو شفتو في التلفزيون مع هذا الفنان القمة .. اتذكرت الازعاج بتاعو الكرهنــا بيهو الحلة .. وموقعو الآن مع قمة الفن في السودان ... .. يوسف غايتو لو لحدي الآن ما اتعلمت العود من الزمن الكسرو ليك في راسك داك .. تكون بالغته وكان قدرت تعمل اي حاجة فيهو .. ياريت تسمعنا أي حاجة في البوست ده
Post: #193 Title: Re: ..نجمــات .. نجــوم الغــد Author: محمد الامين احمد Date: 03-11-2007, 08:29 AM Parent: #1
***
Post: #195 Title: Re: ..نجمــات .. نجــوم الغــد Author: عبد اللطيف بكري أحمد Date: 03-12-2007, 01:10 AM Parent: #1
وضــاح ومحمد الأمين .. شكرا يا شباب للدعم المتواصل للبوست ولنجمات الغــد .. .. عزيزنــا عبد اللطيف بكري .. والله للاسف الشديد .. فتشت ودورت على زوروني كل سنة مرة في نفس السهرة المعنية وللاسف الشديد ما لاقيها وما زال البحث مستمر .. وفي انتظار اصحــاب القلوب الرحيمة يدونــا دفره شوية .. مافي خيانات يا عبد اللطيف .. كان لميت فيها ح انزله طوالي هنــا بس اجتهد انت معانا كمان
Post: #198 Title: Re: ..نجمــات .. نجــوم الغــد Author: Dr. Abdalla Siddig Date: 03-20-2007, 10:48 AM Parent: #197
.
يدونــا دفره شوية ..