Post: #1
Title: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-09-2006, 07:35 PM
ما المعنى والمضمون لـ (نجم الاغنية السودانية) والمعايير التي بموجبها حاز عبد الكريم أبو طالب على هذا اللقب !!
ومن هي (وجدان بحري) حتى تحوز على لقب (نجمة الأغنية السودانية) !! ومن منكم سمع بها أو بـ إنجازاتها وإضافاتها للأغنية السودانية حتى تحوز على هذا اللقب ؟!!
ومن هو مالك او مدير فندق كاليفورنيا الذي يتلاعب بإضفاء القاب غير حقيقية لمدعي الفن وخداع المتلقي بالقاب قد تسئ للفن السوداني من اجل فقط كسب أرباح لا يستحقها لفندقه ؟؟!!
|
Post: #2
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: عبد المنعم سليمان
Date: 12-09-2006, 08:02 PM
Parent: #1
ناذر
ازيييك
يا اخوي ديل منو وفي شنو ؟!!
شفت البوستر ده ذكرني ببعض الفنادق في منطقة ديرة بدبي وتحديدا (دوار جمال عبدالناصر)
تلقي مداخل الفنادق ال- نجمه ديك معلقه صور زي دي واحد شامي ما عنده شنب وواحده ما شامية
ما عندها ضنب وبقولوا ليك فنان الشباب والفنانة الاستعراضية !! مره اخوك دخل لقا الناس هناك
عجيبة وغريبة كلهم بكتبوا ارقام وبرموها !! اخوك من كترة السحوبات في دبي قايلهم عاملين
سحب علي رقاصة !! بعد شوية اشوف ليك واحد شنبو كبير عكس الفنان بشيل الارقام وبديها للفنانة
الاستعراضية !! طلعت الحكاية كلها ارقام تلفونات وبمعرفة مدير الفندق لتسهيل الليلة الحمراء
مع الفنانة الاستعراضية الرقاصة بت الرقاص !!
ما بخت في ذمتي وانحنا اصحاب مشروع حضاري وما بنسمح بكده في دولتنا الحمد لله عندنا الاتوسات
والقزاز المظلل لقضاء الحاجه (ديك) !! الا قول لي انت فندق كاليفورنيا دا وين ؟؟
والطالب دا منو والبت البتشبة لي البنات البقيفوا جنب اوزون دي مني ؟؟
يا اخوي والله انا قاعد اساهر لي فترة في الجهاز دا عشان ما ارجع للبتاع داك !! لكن الجماعة
ديل بتوع كاليفورنيا شكلهم حيرجعونا تاااني .. الله يستر .
شنكلك : اليومين ديل شغال ود البشير وبالعكس
تركب ؟
منعم
|
Post: #3
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: هشام مدنى
Date: 12-09-2006, 08:09 PM
Parent: #1
سعر التذكرة (((5 دينار)))للفرد الواحد!!!!!...
تحياتى لك يا ود القبائل
|
Post: #4
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: Moawia Mohammed
Date: 12-09-2006, 08:24 PM
Parent: #1
والله يا ناذر يا خوي وجدان دي ما سمعت بيها لكن أبوطالب دا اتخيل لي لاعب كوره قديم كورتو فكت واعتزل , غايتو الا يكون بعد جدع الكداره مسك ليهو مايك في اطار سبل كسب العيش في السودان.
|
Post: #5
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 02:35 AM
Parent: #1
عبد المنعم ..
Quote: مره اخوك دخل لقا الناس هناك
عجيبة وغريبة كلهم بكتبوا ارقام وبرموها !! اخوك من كترة السحوبات في دبي قايلهم عاملين
سحب علي رقاصة !! |
أنا مافي شي حارقني إلا المتاجرة بي الالقاب الغنائية برة السودان .. دي إنتهازية ما بعدها إنتهازية وضحك على الذقون وإستكراد ليهو ماقبلو وما بعدو ..
Quote: والطالب دا منو والبت البتشبة لي البنات البقيفوا جنب اوزون دي مني ؟؟
|
زي لمن يجونا في المناسبات فنانين الكبريهات والبارات بتاعين مصر ونحن في السودان طبعا عندنا عقدة إسمها المصريين .. نشوف الدعايات (النجم المصري) أو (العندليب المصري) وألقاب زي دي .. يقومو السودانيين يشتروا التذاكر ويتدافروا في الحفلات مع إنو نفس الفنان دا لو عمل حفلتو في القاهرة أو أي حتة في مصر ناس فرقتو ما بيحضرو خليك من الجماهير !!
Quote: شنكلك : اليومين ديل شغال ود البشير وبالعكس
تركب ؟
|
عبد المنعم أختاني بالله .. أنا جنس محنك دي ما بقدر عليها ..
|
Post: #6
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 02:37 AM
Parent: #1
الخال هشام ..
مفاجأة سعيد جداً إني أشوفك الليلة في بوستي دا !!
أخبارك وأخبار الإبن محمد ؟ إنشالله قام بالعافية ؟؟
Quote: سعر التذكرة (((5 دينار)))للفرد الواحد!!!!!...
تحياتى لك يا ود القبائل |
الخمسة دينار بحريني بتساوي كم بالسوداني ؟!!
|
Post: #7
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 02:40 AM
Parent: #1
معاوية ..
| Quote: والله يا ناذر يا خوي وجدان دي ما سمعت بيها لكن أبوطالب دا اتخيل لي لاعب كوره قديم كورتو فكت واعتزل , غايتو الا يكون بعد جدع الكداره مسك ليهو مايك في اطار سبل كسب العيش في السودان. |
ما عندنا مشكلة مع ابو طالب أو وجدان إنو يغنو في فندق كالفورنيا أو دالاس ..
بس مشكلتنا هسي في اللقب دا (نجوم الأغنية السودانية) !!
معقولة بس ؟!!!!!!!
داير لي خمسة بس من الجماعة يقولوا لي إنهم سمعوا أو إستمعوا لي وجدان دي !!
|
Post: #8
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ريهان الريح الشاذلي
Date: 12-10-2006, 02:50 AM
Parent: #7
| Quote: داير لي خمسة بس من الجماعة يقولوا لي إنهم سمعوا أو إستمعوا لي وجدان دي !! |
يعميني عمي السددن بيوتن ...
|
Post: #9
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: عبده عبدا لحميد جاد الله
Date: 12-10-2006, 03:20 AM
Parent: #8
العزيز ناذر ..سلامات
Quote: داير لي خمسة بس من الجماعة يقولوا لي إنهم سمعوا أو إستمعوا لي وجدان دي !!
|
يطرشنا طرش القبور،،، ما سمعنا بوجدان الا صاحبها دا كان لاعب كورة .
|
Post: #10
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 03:20 AM
Parent: #1
ريهان ..
| Quote: يعميني عمي السددن بيوتن ... |
وأنا متأكد ما في زول حا يجي يقول بيعرف وجدان دي أو إسهاماتا شنو عشان نقول عليها نجمة الأغنية السودانية !!
|
Post: #12
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: Hussein Mallasi
Date: 12-10-2006, 03:32 AM
Parent: #10
انت الوحيد السمعت بيها يا ناذر .. و الدليل .. بحري.
|
Post: #11
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 03:30 AM
Parent: #1
عبدو ....
| Quote: يطرشنا طرش القبور،،، ما سمعنا بوجدان الا صاحبها دا كان لاعب كورة . |
أنا القدامك دا والله متضهب في كل حتة فيها فنانات وفنانين بحكم المهنة بعرف أكتر من 250 فنانة في الخرطوم بس وما سمعت بي (نجمة الأغنية السودانية) دي !!
عبد الكريم فنان أمكن شوية معروف لكن أصلو ما ممكن يكون (نجم أغنية سودانية) زي ما مكتوب في الإعلان دا !!
|
Post: #13
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 03:37 AM
Parent: #1
ملاسي ..
| Quote: انت الوحيد السمعت بيها يا ناذر .. و الدليل .. بحري. |
بحري دي قريتا في المداخلات المكتوبة في البوست بتاع الإعلان الأصلي !!
|
Post: #15
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: Elmuez
Date: 12-10-2006, 03:50 AM
Parent: #1
يا ناذر مواضيع السطو في الغنا السوداني كتيرة
و قدامك إنت شخصيا البيحصل من سنة 89
و بتعرف تماما من هم نجوم الفن هناك! NOW
يا حليل الفنانين البيكسروا العناقريب
ثم أنه "نجوم الأغنية السودانية" في الخارج تعني الذين يقدمونها و يتعاطوا معها في الغربة و
ليس مبتدعيها,
إنتو بيكون مستفذكم إغراق المجتمع السوداني بي حواصل العولمة و مناتيج الفضائيات, أها أقدروا
عليها , و في دي نحن معاكم , بس حا نمشي وين !..
|
Post: #16
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 08:12 AM
Parent: #1
معز ..
Quote: ثم أنه "نجوم الأغنية السودانية" في الخارج تعني الذين يقدمونها و يتعاطوا معها في الغربة و
ليس مبتدعيها,
|
تعرف في النقطة دي أنا لمن كنت في غربة طويلة برة البلد كنت بغني في مناسبات السودانيين وغيرم وأكاد أكون الفنان الوحيد الهناك بمشي وأغني في كل الإحتفالات (يعني ما نجم من نجوم الغناء السوداني برضو) ..
الشعرني إني نجم إنو صحفية من جريدة deccan herald جات كايساني وجاتني لحدي البيت عشان لقاء صحفي مع (سفير الاغنية السودانية في الهند) وأنا خالف رجلي وبجاوب و(بفتي) في العارفو والما عارفو وكمان أفتيت ليها في الاغنية الافريقية والغربية عامل ليها فيها ولا عبد الكريم الكابلي!! وعرجت على السياسة ما ريحت لا حكومة لا معارضة وإتكلمت عن الحرب في جنوب السودان ورؤيتي الخاصة للحل والبت مخلوعة من (غزارة علمي) وطلعت من البيت فرحانة بالسبق الصحفي الكبير وبعد تلاتة يوم نشرت المقابلة في نص صفحة كاملة في الجريدة !!
صنفرة :
والله أنزل ليك المقابلة دي ما تقول الزول دا ناذر خليفة المضبلن قدامك في البورد دا !! أنا زااتي صدقت نفسي وبقيت عامل فيها ولا عبد القادر سالم !!!
|
Post: #17
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: nazar hussien
Date: 12-10-2006, 10:16 AM
Parent: #16
Quote: تعرف في النقطة دي أنا لمن كنت في غربة طويلة برة البلد كنت بغني في مناسبات السودانيين وغيرم وأكاد أكون الفنان الوحيد الهناك بمشي وأغني في كل الإحتفالات (يعني ما نجم من نجوم الغناء السوداني برضو) ..
الشعرني إني نجم إنو صحفية من جريدة deccan herald جات كايساني وجاتني لحدي البيت عشان لقاء صحفي مع (سفير الاغنية السودانية في الهند) وأنا خالف رجلي وبجاوب و(بفتي) في العارفو والما عارفو وكمان أفتيت ليها في الاغنية الافريقية والغربية عامل ليها فيها ولا عبد الكريم الكابلي!! وعرجت على السياسة ما ريحت لا حكومة لا معارضة وإتكلمت عن الحرب في جنوب السودان ورؤيتي الخاصة للحل والبت مخلوعة من (غزارة علمي) وطلعت من البيت فرحانة بالسبق الصحفي الكبير وبعد تلاتة يوم نشرت المقابلة في نص صفحة كاملة في الجريدة !!
|
هو الصحفيين البنشروا في غير ديكان هيرالد شوية يا ناذر...؟؟؟؟
لو كان وجدان بحري جات قالت انا نجمة غناء سوداني يكون سؤالك في محلة..
والله مش كدة...يا زول نحن في الغربة دي اي زول بيعرف يغني ببقي لينا نجم غناء سوداني
وبنسكسك فيه لا الصباح....لاننا ما بنقدر نطول نجوم سماء الغناء السوداني ديك...
تذاكركم بتطلع معانا غالية يا ناذر...والخمسة دندور دي اي زول بيقدر عليها...
والدندور هو اسم الدلع للدينار هنا عشان نفرقو من اخوه الفي السودان...
|
Post: #18
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: mulhim
Date: 12-10-2006, 10:37 AM
Parent: #17
ابو النيذ صديقى ..
والنجم الفى الكفر فى يناير ...
| Quote: وأنا خالف رجلي وبجاوب و(بفتي) |
انت يا ناذر كم مرّة يكلموك فى مسئلة الفتوى دى!!؟
مافى عظة ...
فتك بعافية وموعدنا يناير ...يا نجم
نزار حسين ... ود حلتنا ...
والله كلامك ياهو زاتو ونحن كمان حالتنا اصعب ...يعنى لو جات وجدان الحزام بتكون نجمة الصباح زاتو
ولا النجمه ام ضنب ...
اكيد رفعت كلمك مواعيدى فى نهاية يناير ... ولا ما عملها يكون بالغ ..
وللضمان دى دعوة من هسا ... وشد حيلك والنجوم كلهم بكونوا فى وتسكسك لما بعد الصباح...
والسلام....
|
Post: #19
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: خالد عبد الله محمود
Date: 12-10-2006, 10:44 AM
Parent: #17
الأخ / ناذر
و الله يا ناذر أنا وجدان بحري دي يطرشني ما سمعت بيها أبداً لكن أبوطالب دة زول فنان و صوتوا جميل جداً و طالماً هي بقت لدرجة ناس نادر خضر بقوا فنانين الشباب بقت كتيرة على أبوطالب؟
بالعكس أبو طالب من أميز الفنانين الموجودين في الساحة حالياً و ربما يكون أجملهم صوتاً ( مع أنو عندي رأي خاص في الناس البغنو بالأورغن ديل)
دمت بخير
|
Post: #20
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: عبد المنعم سليمان
Date: 12-10-2006, 10:54 AM
Parent: #1
Quote: والمعايير التي بموجبها حاز عبد الكريم أبو طالب على هذا اللقب !!
ومن هي (وجدان بحري) |
نفس المعايير ال خلت نافع وعبدالرحيم يكونوا نجوم السياسه !!
الحال من بعضه يا ناذر اخوي
منعم
|
Post: #21
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 01:06 PM
Parent: #1
نزار حسين ..
Quote: هو الصحفيين البنشروا في غير ديكان هيرالد شوية يا ناذر...؟؟؟؟
لو كان وجدان بحري جات قالت انا نجمة غناء سوداني يكون سؤالك في محلة..
والله مش كدة... |
هي طبعا ما قالت كدة ولا حا تقول وأنا ما بلوما لكن بلوم الناس العملوة الإعلان دا لأني متأكد لو سألتهم وقلت ليهم أدوني غنيتين لي وجدان وغنيتين لي أبو طالب حا يقعدو يتلفتو !!
قال نجوم الأغنية السودانية قال !!!
شنكل :
الصحفية العملتني سفير الاغنية السودانية ديك هندية وما ناقشا أبو النوم ولا حتى عارفة السودان وين زاتو ؟!! لكن العملو الإعلان دا اكيد ما هنود وناقشين الحاصل !!
|
Post: #22
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 01:09 PM
Parent: #1
ملهم ..
Quote: فتك بعافية وموعدنا يناير ...يا نجم
|
ما تقفل على دي كتير لأني قلت ليك إحتمال كبير أكون طاع في الكفر ودي حتة بيحكما المزاج العام وجماخير الديوم والحلة الجديدة !!
شنكل :
لكن بالشايفو قدامي دا إحتمال كبر وجدان بحري (نجمة الأغنية السودانية) هي الحا تطلع في الكفر الشهر الجايي طالما البوهية بتاعتا رشوها ليها من البحرين !!
|
Post: #23
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 01:11 PM
Parent: #1
خالد ..
Quote: لكن أبوطالب دة زول فنان و صوتوا جميل جداً و طالماً هي بقت لدرجة ناس نادر خضر بقوا فنانين الشباب بقت كتيرة على أبوطالب؟
بالعكس أبو طالب من أميز الفنانين الموجودين في الساحة حالياً و ربما يكون أجملهم صوتاً ( مع أنو عندي رأي خاص في الناس البغنو بالأورغن ديل)
|
أنا أبو طالب دة من المعجبين بيهو من شريطو الاول الطلعو في أول التسعينات الإسمو (جنى الجدي) بس كمان نجم الأغنية السودانية دي كتيرة شوية !!
|
Post: #24
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 01:13 PM
Parent: #1
عبد المنعم ..
Quote: نفس المعايير ال خلت نافع وعبدالرحيم يكونوا نجوم السياسه !!
|
ناس نافع ديل مفروضين علينا كسر رقبة وأهو دا قدرنا نسوي شنو ؟!!
لكن كمان ناس تفرض علينا ألقابا وأذواقا الخاصة دي ما بنكسر ليها رقبتنا تاني ..
|
Post: #25
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: mulhim
Date: 12-10-2006, 01:41 PM
Parent: #24
ابو النيذ ...اها جاتك حاله من حالات الافتاء ...
Quote: ما تقفل على دي كتير لأني قلت ليك إحتمال كبير أكون طاع في الكفر ودي حتة بيحكما المزاج العام وجماخير الديوم والحلة الجديدة !!
شنكل :
لكن بالشايفو قدامي دا إحتمال كبر وجدان بحري (نجمة الأغنية السودانية) هي الحا تطلع في الكفر الشهر الجايي طالما البوهية بتاعتا رشوها ليها من البحرين !! |
مع انه كلامنا كان اتفاق اوريك متين البرنامج تورينى الكفر والطالع فيه ...
لكن للضمان ...
الفيك اتعرفت ..
وسيبتك برضو بكل العافية...
|
Post: #26
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: محمود ريحان
Date: 12-10-2006, 02:05 PM
Parent: #25
هو مفهوم النجم عندك شنو يانادر
|
Post: #27
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 02:11 PM
Parent: #1
محمود ريحان ..
| Quote: هو مفهوم النجم عندك شنو يانادر |
مفهوم النجم حاف ولا مفهوم (نجم الاغنية السودانية) !!؟؟؟
|
Post: #28
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: القلب النابض
Date: 12-10-2006, 02:24 PM
Parent: #27
(نجوم الأغنية السودانية) !!
ناذر
ديل نجوم الضهر ..
|
Post: #29
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: عماد شمت
Date: 12-10-2006, 02:43 PM
Parent: #27
الاخ ناذر تحيه واحترام
انا برضو ما سمعت بي الفنانه وجدان ..لكن ابوطالب سمعته وشاهدته في الفضائيه السودانيه
و له اعمال خاصة به, واعتقد ده اجتهاديجعله فنان, وما اعتقد عنده مشكلة في الصوت.
امامسألة النجوميه ممكن يكون نجم من نجوم المجتمع طالما اعتلي المسرح وامامه جمهور
واعتقد برضو له معجبين ومعجبات بفنه...(انا لي 15 سنة بره السودان)ومتابعتي للفن ضعيفه
وسمعت بعض من الفنانيين الجدد ومنهم من يطرب ومنهم من لا يطرب وايضا هذا ليس بحكم مني
لآختلاف الاذواق ...
تسلم من كل سوء اخ ناذر ...
|
Post: #30
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: عمر الفاروق
Date: 12-10-2006, 02:54 PM
Parent: #1
للذين لا يعرفون وجدان بحري فهي واحدة من مطربات الزمن الجميل ..
هي في نفس مرتبة شروق ونانسي عجاج ولكن لا تنطبق عليها مقولة (نفس الملامح والشبه)..
وجدان بحري واحدة من المطربات اللائي سينتشلن غناء البنات من الوحل وتقديمه للعالم ..
وجدان بحري وريثة امبلينة السنوسي وعائشة الفلاتية وثنائي النغم بل والبلابل..
وجدان بحري لها من الاعمال الفنية ما يجعلها في مصاف مطربات بلادي من الزمن الجميل ..
فهي تتغنى بالملحمة الغنائية النسائية المشهورة (راجل المرا ده حلو حلا) ..
وهي التي اضافت هذا الكوبلي في الاغنية مشاركة في حقوق التأليف:
انا بنادي بي غادي ..
انا بذكرو الماضي..
وانا بجيبو بي القاضي ..
وبري يا الدكوة حلوة حلا ..
ولا ننسى لها اجتهادها الموسيقي بإدخالها لمقطوعة القرد ورقصة النبق..
ويكفينا فخراً أنها تغنت برائعة الاستاذة علوية مصالح " شن قولك يا بشير"
واضافت فيها هذا المقطع المعبر:
اخدر طويل شنبك غزير ..شن قولك ..
جعلي وطويل بري يا جميل شن قولك ..
وشن قولك يا بشير
انت هناي وانت وغناي .. شن قولك
املي ورجاي تفضل معاي وشن قولك يا بشير..
ودقولك وفي الصحافة شن قولك ..
صفقة ..صفقة ..صفقة..
ويا عيني عليها في غناء الحزين ..فعندما تغني لك وجدان بحري حزايني فلا تستمع لا الى فيروز ولا ام كلثوم ..
فها هي وجدان بحري توصف لنا كيف تباكت لرجوعها لمحبوبها قائلة :
القصيرة المربوعة ..جات تبكي بي دموعا
وجات تسعى لي رجوعا .. وانا كشفت موضوعا..
وحناااااااااااااانة النسى أهلو ما نسانا..
وهاي هي تتحدث عن الخيانة في اروع وصفاتها :
الخاينة الجاسوسة .. في الحِلّة مدسوسة ..
في بحري مدسوسة ..بجيب مجروس وادوسا ..
حيييييييييييييييييييييييييييييييييييييييي..
اخي ناذر :
لك ان تعرف ان وجدان بحري وحنان باكمبا وامال بابور وزبيدة الانقاذ وعوضية عذاب وندى القوز وتهاني جلكسات كلهن من نجوم فننا السوداني..
اما عن عبد الكريم ابو طالب فهو رمز من رموز الطرب الجميل..فرائعته وملحمته الغنائية (جنى الجدي) والتي قال فيها :
جنى الجدي .. تعمل كدي ..
فهي كافية لأن تجعلها يتصدر التوب توينتي لمدة عام كامل وربما وصلت مبيعات اسطوانته لهذا العام فقط اكثر من سبعطاشر اسطوانة منها تسعة اشتراها الاصدقاء..
ولا تنسى ان ابو طالب كفر ووتر فهو كان كابتن فريق العباسية وزامل حسن مصطفى شقيق الريح كاريكا وايضاً زامل اللاعب هشام المقيم الان في امريكا ..
تخريمة :
ضع خط تحت الكلمة الشاذة :
شروق - وجدان بحري - فاطنة الجمكو - نانسي عجاج - منى الخير ..
|
Post: #31
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: Hussein Mallasi
Date: 12-10-2006, 03:04 PM
Parent: #30
Quote: ضع خط تحت الكلمة الشاذة :
شروق - وجدان بحري - فاطنة الجمكو - نانسي عجاج - منى الخير .. |
شروق - وجدان بحري - فاطنة الجمكو - نانسي عجاج - منى الخير ..
|
Post: #32
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: عمر الفاروق
Date: 12-10-2006, 03:09 PM
Parent: #1
والله ووالله ووالله يا حسين يا ملاسي انت زول ما طبيعي..
تعرف اي إجابة غير دي كنت حا تتطلع زول عادي 
وخصوصاً لو كان ختيت الخط تحت منى الخير ..
يا زول مبروك إجابة صحيحة شيل ليك صندوق ..
وأوووووووووعا من الفاضي..
|
Post: #33
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 03:34 PM
Parent: #1
القلب
Quote: (نجوم الأغنية السودانية) !!
ناذر
ديل نجوم الضهر .. |
|
Post: #34
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 03:37 PM
Parent: #1
عمر الفاروق ..
Quote: اخي ناذر :
لك ان تعرف ان وجدان بحري وحنان باكمبا وامال بابور وزبيدة الانقاذ وعوضية عذاب وندى القوز وتهاني جلكسات كلهن من نجوم فننا السوداني..
|
أي ما قلنا حاجة .. بس حدهم يكون جو الخرطوم وضواحيها لكن ما يطلعو برة البلد يجيبو لينا السمعة والشماتة لمن الناس يسمعوهم على أساس هم (نجوم الأغنية السودانية) !!
شنكل :
وبعد دا لمن يجي نبل شعيل يقول الغنا السوداني عبارة عن تهريج نقعد نتشنج ونزعل ؟!
|
Post: #35
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-10-2006, 03:42 PM
Parent: #1
عماد شمت ..
Quote: امامسألة النجوميه ممكن يكون نجم من نجوم المجتمع طالما اعتلي المسرح وامامه جمهور
واعتقد برضو له معجبين ومعجبات بفنه...( |
انا بعتقد في فرق كبير لمن تقول فلان دا نجم وهو بيغني جوة السودان . ولمن تقول فلان دا نجم من نجوم الاغنية السودانية وهو بيغني برة السودان .. لأنو بكل تأكيد لو سمعو واحد من الاجانب حا يضع في إعتبارو إنو الأغاني والموسيقى البيأديها الفنان دا هي خلاصة الأغنيات السودانية أو من أرقى ما وصلت ليهو الغنية السودانية .!!
|
Post: #36
Title: Re: هل هؤلاء هم فعلاً نجوم الأغنية السودانية ! أم هو تضليلاً لجني أكبر قدر من الأرباح ؟!!
Author: ناذر محمد الخليفة
Date: 12-11-2006, 08:01 AM
Parent: #1
تسلم يا ملاسي ..
|
|