Post: #1
Title: لحظاتنا الندية / على بابك
Author: Al-Masafaa
Date: 08-26-2002, 11:04 AM
على بابك نهارات الصبر .. واقفات
بداية الدنيا هن واقفات
وكم ولهان وكم طائر
بعد نتـّف جناحو وراك
لملم حر ندامتو .. وفات
قطع شامة هواك من قلبو
إلاّ هواك نبت تانى
وعلى بابك وقف تانى
غمايم شاقة حضن الليل
مسافر فيها وحدانى .. وبدون جنحين
يغنيك الهنا .. المافى
ويغنيلك رهافة حِسو
يفنى على جليد آمال
ويحلم بالشتا الدافى
وقدر ما يمشى فى سور الزمن خطوات
يلاقى خطى السنين واقفات
يلاقى هواك نبت تانى
وعلى بابك وقف تانى
وملا الساحات
=========================================================
فى خاطرى لحظاتنا الندية
وإنتى ساعة المغربية
قعدتك جنبى وعيونك .. سارحة فى الدنيا البهية
وخوفنا من سفراً بودى
للمسافات القصية
وسكة الزول البسافر
وقلبو عشرة .. على البنية
*******
كنت جد .. ناوى الرحيل
إلاّ شايل ذكرى منِّك
خفت فى الغربة البعيدة
المسافات يبعدنك
العيون الشايلة سيرتك
بكرة يبكن .. ويفقدنك
والأماسى الحالمة .. ترحل
والمشاوير يتعبنك
********
شفتى كيف
لما الشمس لمت نوافير الشعاع
والضفاف بعدت كتير
والريح ملت .. جوف الشراع
كيف هناك بدت الضفاف
تتلاشى فى زمن الضياع
وإنتى ساعة المغربية ..
وخايفة من كلمة وداع
|
Post: #2
Title: Re: لحظاتنا الندية / على بابك
Author: cola
Date: 08-26-2002, 11:17 AM
Parent: #1
ياسلام عليك يالمسافة وانت تتحفنا بالروائع
المذيد يارائع
|
Post: #4
Title: Re: لحظاتنا الندية / على بابك
Author: Al-Masafaa
Date: 08-26-2002, 11:23 AM
Parent: #2
شكرا كولا و القصائد للكتيابي و مدني النخلي علي التوالي و هم اصحاب الابداع الحقيقي فلهم التحية
|
Post: #3
Title: Re: لحظاتنا الندية / على بابك
Author: Foolish beat
Date: 08-26-2002, 11:20 AM
Parent: #1
علي بابك
محطات الصبر واقفات
ليت عمري عندما يقف الصبر على بابك و أظل امني النفس بأن تنتهي إليك كل المسافات القوادم و الرحيل
Al-Masafaa
رائع مصطفى و الكتيابي
رائع أنت
|
Post: #6
Title: Re: لحظاتنا الندية / على بابك
Author: Al-Masafaa
Date: 08-26-2002, 11:30 AM
Parent: #3
مصطفى سيدأحمد
يا من وهبتنا الحس ،،، والأحساس
غيم الأمل الشارد ... متمدد أنت فى كل شبر فى
هذه الأرض ( التغطت بالتعب ) ،،،،،،،،،صوتك ( الطالع
من نفس طورية ضامّة الطـين ) ........( ومن دمـعـة وجع
طوّل ) .. سيظــل خــالـداً فى وجــــدان هذا الشعب الذى
غنيته هــماً .... وقـضيـة ... وعندما تكون الكلـــمة بحجـم
نقلا عن موقع الراحل
مـعـاناة جـيل وبـمــرارة الواقـع ...الفجـيعة - يبقى المغنى
الحـقـيـقى مـن يتمسـك بشـــرف الكلمة .. ونقولها للتاريخ
أننا ( بعد المشاوير... البقت ممدودة فى نبض التعب) ......
.. عدنا - ووجدناك - حافظاً للوداد زمناً صعب.
**************************
مصطفى
لا مهرب من الحزن إلاّ إلى صوتك .. ولا مفر من صــوتك
إلاّ إلى الحزن ... ذلـــك الذى ( لا يتخير الدمع ثيـــاباً كى
يسمى ....فى القواميس ... بكاء )
فأنت ،،،( آخر الخيول
فرس الرهان الماكبا
وهج الشموس .. الإشتعال
وإنكسار المستحيل .. شقيتو بى سيل الحروف
الطالعة دابا .. من الصدف ... مجرى البحر
تيارو والموج ،،، الرجوع
أديتو حيل مدّو الزمان كان إنحسر
غيرت فى الزمن الملامح
طعم الكلام ... لون الغنا ...
طبع البذور ... كيميا التراب
طقس المطر)
*********************************
أوغـلـنا فى أعـماق ( مشاعـرك المرهفة ) .. فأمتلكت
قلـوبـنا المـثقـلة بجـراحات جيل رضع الهزيمة من أثداء
الساسة المتاجرون بأكسجين العافية .. ورغيف الخبز !
أتيتنا ( فارساً يشق صمت المتاهة .. الطال)
وعدتنا ( بى حكاوى الشوق ..
وبى شمساً وراها .. منال )
ولكن ...
ـــ أليس بعد الإشـراق .. إلاّ أفولٌ حزين!؟
فلتعلم ... أن جـبروت الأرض ــ بـعـدك ــ قد طال طيـور
السماء .. فطالبها بإبراز جـواز سفر .. فى ترحالها نحو
شموس الإستواء،،
ــــ أولم تكن تعلم ،،، يا شاهد زمن البكاء
.... ( أن الوطن متسعٌ كالسماء
وضيقٌ .. كالكفن )...
نقلا عن موقع
www.geocities.com/sudanesemustafa/nora.html
|
Post: #5
Title: Re: لحظاتنا الندية / على بابك
Author: Abomihyar
Date: 08-26-2002, 11:27 AM
Parent: #1
أشرعة ومجاديف .. ومراكب
ضفاف، وشواطئ ووداع
هو الكتيابي ملاح السودان التائه لله دره، ودرك أيها الغواص
|
Post: #7
Title: Re: لحظاتنا الندية / على بابك
Author: Al-Masafaa
Date: 08-26-2002, 11:36 AM
Parent: #5
أقراك مرّة صاح
عكس إحتشادك فى الحضور
هل غاب معاك وعى الطريق
.. أم بيكى زكـّانى الزمن
ماشيك .. وعارفك يا حريق ..
فى يوم غماماتك .. بجن
فرهد غيابك .. أغنيات
ظلت أراضى اللقيا بور
بلقاكى يا كل الطيور ..
مسجونة والحرية .. سور
وبلقاكى بيناتنا الثبات
وبيناتنا شمس البكرة فى لحظة .. مخاض
*******
طول الوجع رشـّح مواطن العافية .. فيك
خلانى أرجع وأبتديك
وأقراكى من كل الجهات
ومابين أقابلك .. ومشتهيك .. كان حلمك الأول
.. ترفْ
وكنتى الصبية الغايبة
فى زحمة حجا .. وكلمة شرف
كنتى الزوايا الميتة .. فى متحف خزف
كنتى الوصايا العشرة .. واللون الشحيح
*********
سميت مساحاتتك حكر
.. كل البيحلمو ا بى الشمس
هجـّرت من واقعك .. عبث
سكـّنت فيك ..ضد السكون
كل اللى كان ممكن .. يكون
وطارت ضفيرتك ليل غنا
جدلة صبُر .. وطولة نفس
*******
ومابين أقابلك وجيت عليك
كان عندى ليك بس نحنّ .. والجرح الثرى
وخيبة أمل أم الشهيد
فى الكلمة .. والوجه الجديد
وكان إحتقان نبض الزمن
نومة طفل .. فوق الدّمن
... يا صاحية بى الحاصل علىْ
يا نايمة عن فقرى البليد
سميت منافيك الوطن
.. صبحت مناحاتك ..
... نشيد
شعر عاطف خيري
|
Post: #8
Title: Re: لحظاتنا الندية / على بابك
Author: almohndis
Date: 05-19-2003, 11:40 AM
Parent: #7
المساء ها قد عادت
لحظتك النديه
|
Post: #9
Title: Re: لحظاتنا الندية / على بابك
Author: Al-Masafaa
Date: 05-22-2003, 07:49 AM
Parent: #8
الله يندي لحظاتك يا باشمهندز
|
|