الاداء الدرامى فى اغنيات مصطفى سيد احمد – عمنا الحاج ود عجبنا كنموذج

عمنا الحاج ود عجبنا
يا زمن حظر التجول
----------------
كلمات الفرجونى
**************

عمنا الحاج ود عجبنا ..
فى الفريق ياهو الركيزة
هو البشيل حمل الرباعة
وعندو كلمة على الجماعة
فى الطريق باقيلنا .. تاية
وكل طيب ليهو غاية
للضعيف تلقاهو ساند
يقهر الكعب المعاند
وللضيوف ديوانو فاتح ..
ديل يقوموا وديل ينزلو
*******************
يا ولد ضوو الرتياين
وجيهو الديوان فراشو
والاباريق والتباريق
وافرشو الفرشة الكبيرة
واضبحو الحمل المدوعل
***********
عمنا الحاج ود عجبنا
من سنين أيام جهلتو
ديمة فى دعوات صلاتو
بسأل المولى السلامة
وسترة الحال .. والكرامة
عمنا الحاج ود عجبنا
فى ليلة من ذات الليالى
فى زمن حظر التجول
جاهو ضيف فوق راس حداشر
رحب الحاج بيهو .. جداً
فرّشولو .. ونزلوهو ..
وكاسو للعشا .. ما أتلقالو
ما الرغيف ممحوق .. مقصّر
والبلد فى حال معسِّر
وعمنا الحاج فى مبادئو
واجبة الضيف زى فريضة
وهسة ضاقت بى العريضة
ضيفو كيف يترك عشاهو.؟
من ده زايد إختشاهو
وجاتو فكرة..!!!
يمشى للفرن المجاور
ولى رجال العيش .. يشاور
بس عشا الضيف .. يا جماعة
ضيفى نازل .. ليهو ساعة
شاكلوهو ودفروهو ونهروهو .. وجاتو دورية الطوارى
وأمسى بايت فى الحراسة
وناسو جنـّوا ..
للصباح ما عرفوا حاجة
وجاهم الخبر المأكد
ود عجبنا فى الحراسة ..
و ماشى محكمة الطوارى
*********************
ناسو .. أولادو .. وبناتو
عرفوا حالو .. وبدرى فاتوا
فاتو محكمة الطوارى
فيها فى نص الخلايق
شافوا حالاً ماهو لايق
عمنا الحاج بى جلالو ..
فوقو حس السوط مولول
فوق قفاهو .. فوق سنونو
وفوق رجولو..
ومرة فوق فِججاً حشاهن
أصلو ما قايل بهونن ..
حتى كان لو نزلن هجاين
إلاّ لكن الليالى ..
هى البترْخِص كل غالى
*************
حاكمو الولد المنصّب ..
كتفو بالدبّور .. مقصّب
إنت يا حاج يا مخالف
زول مخرّف وعقلو تالف
إنت يا زول ماكا دارى ؟
ذِلة الناس فى الطوارى؟
أجلدوهو .. وغرموهو ..
ونفذوا الحكم البهينو ..
شان يفتِّح تانى عينو..


************
تسمع السوط ليهو خاوية
وفوق قفا الحاج صيحتو داوية
كل جلدة جبل مزلة
فوق ضمير الحاج وقلبو
كل كرباج الف علة
وفجأة .. رفع الحاج عيونو
شاف بنات ولدو .. وبناتو
كلهن واقفات يعاينن
دمعتن فى العين ترقرِق
ووجعتن فى الجوف تحرّق
والحزن ليهن مغرق
دا النجوم الفى سماهن
دا الزمان الكان حماهن
كل سوط نازل عليهو
من شعاع الضو .. عماهن
عمك الحاج دمعو .. سرّب
وسيلو فوق أشنابو .. زرّف
تم حكمو .. وراح بيوتو
نفسو مكسورة .. وذليلة
كيف ملاقاة الحليلة
وصحوة الروح العليلة
فى البيوت الجوّة .. غادى
عمك الحاج .. ما أعتيادى
وفوقو متلمِّين جماعتو
والسكيلى ضرب .. حزاينى
وقالوا ناداهو المنادى
فارق الدنيا المهينة
يقطع الذلّة .. وسنينة
فوق فراش ودعجبنا
بسمع الزول البوصى
أقفلوا الحوش يا جماعة
وطفّوا أنوار الرتاين
داك حرس حظر التجول ..
من بعيد ليكم بعاين ...
يا زمن حظر التجول