|
|
 ما هو أبعد من حزن ندى الواشنطوني ( قصيدة جديدة)
|
ما هو أبعد من حزن ندى الواشنطوني
____________________________________ شعر : محمد عبد القادر سبيل
اهداء الى الزميلة ندى امين مع كامل احترامي واعتذاري لما سببته لها من سوء فهم ولغط
قالت من مهجرها في الغرب:
Quote:  آه يا بلد، و مزيداً من الأحزان)
وقالت: (الحزن اصله شفاف وجميل يا محمد ! ) |
يا ست ندى
يا ست ندى
كل الحكاية وباختصار
انت الحُزُن .. جديد عليك
عشان كدا
فرحانة بيو !!..
بتزغرتي وتتباختي
شارّة السحاب فوق السما
وطاوية المدى
والحزن دا ..
أنا وانا
أحّيْ أنا ! .
زي الخواجية اللقت لاجئ حليو
فرحانة بيو !.
متحزمة ومتلزمة
ومتصورة ومتأزمة
مالية الجرايد والوكالات والروادي
ومجلس الأمن
تتصوروا !!
هو الوحيد زعلانة ليو
وما مستعدة تضحي بيو
Oh my dear
They are savage!
I can’t believe
I will never
leave them at all
I will revege, how so ever
I will never
وكل الحكاية وباختصار
بنْجُوس بعيو
محظوظ لقى البعطف عليو
وليد شقي واخوانو ألف !
منشول وسط طوفان وليدات ملغيين في اي ظرف
هو الوحيد
شاف الحليب والعندليب
وبقى يختشي
والله شوفة عيني دي
بقى يختشي
وبقى ينتشي تتصورو !؟
طبعا ومال!
بتهشتكو وبتبشتكو وتدللو
زي حبة الاسود جديد ما اجملو
تمبوشة ( واوو) بتقبّلو
عاد بشبه الحزن النبيل وجنِس شبه.. ما بسألو!
بتقمّزو وتهمّزو
وتغسّلوا وتقطّعو وتخللو !
Oh my dear
I will never
leave them at all
I will never
وأنا وأنا
حزنانة ليو
يا يمة ما حزن الهنا
ويا يابا ما لاجئ السرور
فرق الخواجات غنوا ليو
فرق الزنوج
وبنات كِدا (!)
وحزن شديييد
وبيرقصوا ويتفدّعو
وكمان : حباب
الجاب عذاب نِتهَنّا بيو!
ونتلمّ ليو
والمِتلو دا
يا ست ندا
لو بس كبِر
من قبل ما تاخدو القشار / السيدة
هنا عند أهلنا بغّنو ليو:
(( قول ليّا يا طير الخداري
قول ليّا وحياة حبنا
وين رسايلك يا حليلا
وين عيونك مننا))
وبرقصن سمحات شديد
مش اي زول
ما ود تمام عاد من مدن
(شن المدن!!؟)
يتلموا فوقو يعاينو ليهو
يباركوا لأمّو وابوهو
كمان حباب الغاب وجاب
( كان جاب تراب)
ضَيْ القبيلة وسيّدا
ومقددا
زيك منو؟
أمل البنات.. عديل كدا
وبيت العدَل
فوق ما نزل
قسمة ونصيب
لما القلب نقّط عسل
ما عرفن الحاصل شنو
ولا عرفن المعيار شنو
وهل العزاب
زولاً غريب ما مننا ؟
ما شافن الحاصل هناك
ولا فهمن الحاصل هنا
وهل السجم ، كيل الرماد
وهل التراب
ديل ناس غُراب ..
ما مننا؟
واللهِ ما جايبين خبر
قاعدين ترا ..
طول العمر
قاعدين وشبعانين عِرا
صانين وفي بالم سؤال
بس فت سؤال:
ليش الخواجات وكت يجوهم بحزنوا؟
وليش بصرّوا يصوّروا ويتناضموا
ويتناضموا ..
ويتناضموا؟
بس فت سؤال:
من وين بجيبو مروّتم ؟
واللاي صحي
تعيش كتير بتشوف كتير
وما شافو شي !
تتخيلي يا ست ندى
ما شافوا حتى ولا كدا (!؟)
الليلة لو شافوا المصيبة تهون عليك
ما شافوا واشنطون عشان ما يعرفوا
حزن الشتا غير الخريف
وانو الخريف شيتاً كعب!!
ما عرفو دا !
لكنهم بتساءلوا :
حزن الخواجات دا عشان شنو؟
والصور البصرّوا عليها ياربي
على شان شنو؟
صوَرُم بشوفوها الأمم
والعالمين
بس الا هم !
استغفر الله العظيم
قاعدين
ولا عارفين وكالات المحنّة المطلقة
مالُم كدا؟!:
Save children
HRال..
Red crossوال
( ما تزعلي ، اصلو الكلام جاب الكلام )
قاعدين هناك مترحمنين
طز في الحياة
أو في الهدوم
أو في النعال
ظز في الحفا
وخلاس كفى
ما بيبكو الا في يوم فرح
أو يوم وفاة
ماكلين حزُن
ساكنين وشربانين حزن
حايمين معاو
وبحامو ليو
وكل شي
مالو الحزن؟
حزن شنو البسوو ليو راس وقعر؟!
وهات يا صور
وانا وانا
حزن شنو؟
ماياهو دا( )؟
" وفجأة طلعت هناك ريحة مسك أو سوسنة"
طلع الحزن من قلبنا
زول اعتيادي وزينا
ما منّو خوف
لا بتاع كدا
لابتاع كدا
مرات صحي
امكن بيزهج مننا
بنقعد حداو ونحنّسو
ونكسب رضاو ونونّسو
ونحسسو انو الحياة
كتير قليلا بينتهي
اهي دي الحياة يا عمنا
عمّك حزن دا قديم خلاس !
في الحتة دي
ناس قالوا مولود في الضهاري وغنتسو
ناس اللواري بلخبتو
شالو الكلام وشتتو
ناس في الشمال فاتوا الجنوب
ناس في الشرق أدّوا الغرب
ناس قالوا اصلاً اجنبي
جدو انجليزي وطهّرو المهدى الكبير وزوّجو
ناس قالوا لأ ، وألف لأ !
علي الطلاق ما زوجو
بس طهّرو وادّا الطريقة وأمّنو
" ناس المسالمة الأسلموا"
أها لمّو فيو ناس الغُنا
يا حوْلتَن..
علمو سف السعوط
بوّظوهو وعلموهو القيل وقال
والانفعال
" طلعت كمان في اللحظة دي ريحة مسك، أو حنة ساي"
قام بب عِشق بت من هناي
من اب سعد
لاكين شنو؟
غزال حقول
مافوقو قول
والانجليزي كمان صبوح
وحافظ البقرة وتبارك والمعوذتين ونوح !
وشيل ودُق
شيل يا خواجة
وشيل ودُق
يا ليلة هوي وياتومي هوي
قنّب يبوح
انا ما بنوم
انا مستعد
بس ما عدا ..
وقام واعدااااااا
ويا ليلة هوييييييي
"ما البت سغيرة وجاهلة ما سمعت كدا"
ريحة البخور يا غربتي
وريحة الحزن جات من بعيد
والمطرة جات
شايلة البروق
والريح دي وووووووووووووو
الريح تئن جوّة الشقوق
جوة الشدر
جوة القلوب
ومافي زول شاف العجاجة من الضُلمة
الليلة ووب
يا يابا ووووووووووووووووب
طرَطاخ طراخ
بُمبُم بُبم
يا المهدي هوووي
الدخاخين في السما
ريحة التراب .. ليل العمى
ركّت صقور في اللحظة دي
السمبرية اتذكرت
أحدٌ أحدْ
احدٌ احد
موية العيون اتعكّرت
وزهور كتييييرة حدا البحر
دعكت عيونا وفتّحت
والبرتكانة ادّردقت فوق البرش
غيمة الخريف ما دافقت ودار تنكرش
وحتى الشمش
معبورة لامِن خنّقت
* يا زول امِشْ !
- يا ناس شنو؟!
* برِطانيا جات
- برطانيا جاتتتتت؟ وأعمل شنو؟
*تعمل شنو؟ ما تجري بس
الناس جرو
والماجرو زي الجراد جت انتهو !!
حوش الخليفة الناس تبِش
ما باقي نُفّاخ نار هناك
طرُطوط طُطووووط
كورد كتشنر
لورد كتشنر
كركون سلاح :
Let us salute British crown
Let us salute Gordon Brown
We should never forget at all
Never forgive at all
We shold revenge ,how so ever
في اللحظة دي وقع العسل من الجبل
و الروح عسل
البيت عسل
و الحب عسل
ظز في الحياة ، طُز من هنا لامِن هناك
طُز في البلد ال بالهظار .. هبّوتا طار
وقف الخواجة وصنّ زييين
صحي يمشي وين ؟
وطهارتو دي يوديها وين ؟
وبت اب سعد؟
وام جكّو والحمى ام برد؟
يا المهدي هووووووي
الدار خلا
الراجمات ، الساحقات والماحقات
الناس جرو وما تلفّتو
أها عرّسا ، ما عرّسا
الله اعلم بالحصل
لاكين أكيد جابتلو جد الحزن دا
شايف عيونو كُتر كتُر؟
اسود شديد لاكين عيونو عيون كديس
تتصوري يا ست ندا
في ناس كدا
بالشكل دا ؟
للحظة دي
قاعدييين ومستنين يموتو وكل شي
كان بمجاعة
بالحرب
أو ببتاعة
قاعدين ومستنين تمام
امريكا برضو يجوز تجي
شان تنقِذُم بقنبلة
امريكا برضو من الفرص
الممكنة
ادّخّلت ما ادّخلت
زي العراق ما اتحررت
امريكا هووووي ادّخلي
عاد الحقي وعاد افزعي
الراجمات المهلكات
الطائرات القاتلات
الساحقات
والماحقات
ظز في الحياة
Set them free
Save children!
زي العراق يا سيّدة
زي الخواجية اللقت لاجئ حليو
بتزازي بيو
وتحرشو وتلمّعو وتورنشو
حايقول شنو وما يقول شنو
أوعك تغير أو تتمتم في الكلام
تقيف كدا وتبوح اسف
ما تقرّب ايدك من نخرتك ياقرف!
سيب المخاخيت زي ما هي
خلي البريق في نظرتك
حتى الضبابين زي ماهي
بعدين هناك في فندقك
بنحممك ونسممك التشتهي
ادينا ساعة نصورك
ونحررك
هناSTOP
كمِرات تقيف لمن نشوف
دايرين قماري تقوقي فوق شجرة تبلدي
وغيمة تلدي
مطر سُغار
جنيات غزال عز الخريف
دايرين ( من الارشيف) فطيس
زول طلطميس
ماليو علاقة بأي شي
كان دا السبت كان الخميس
لازم تقول انا مغتصَب !
وبرضو باعوني العرب
I will never
Give up at all
I will revenge
How so ever
طارت فراشة اللحظة دي
السمبرية اتذكرت
وزهور كتيرة اتلخبتت
الساعة كم؟
لبست هدوما وفرْتكت
والبرتكانة ادّردقت وادّردقت وادّردقت
وغيمة الحريقة بتنكرش
أهو دا الحزن الغيرو غِش
شفتِ الفرق يا ست ندا؟
ديل كم حزُن؟!.
والباقي كم؟
وأذكّرك:
في كل مرة من الحزُن
ناس من أهلنا مع العِدَا
ناس من لحممممنا ودمّمممنا
بالشكل دا
الحزن بس هو الوحيد في صفنا
شفتِ كيف؟
أهي الحكاية وباختصار
انت الحزُن جديد عليك .. عشان كدا ! .
ابوظبي في 18/12/2004
|
|
 
|
|
|
|
|
| العنوان |
الكاتب |
Date |
| ما هو أبعد من حزن ندى الواشنطوني ( قصيدة جديدة) | محمد عبدالقادر سبيل | 12-19-04, 00:57 AM |
 Re: ما هو أبعد من حزن ندى الواشنطوني ( قصيدة جديدة) | إيمان أحمد | 12-19-04, 01:16 AM |
 Re: ما هو أبعد من حزن ندى الواشنطوني ( قصيدة جديدة) | haleem | 12-19-04, 01:33 AM |
| Re: ما هو أبعد من حزن ندى الواشنطوني ( قصيدة جديدة) | عمر الفاروق شيخ الدين | 12-19-04, 02:18 AM |
| Re: ما هو أبعد من حزن ندى الواشنطوني ( قصيدة جديدة) | محمد اشرف | 12-19-04, 03:42 AM |
| Re: ما هو أبعد من حزن ندى الواشنطوني ( قصيدة جديدة) | Ibrahim Algrefwi | 12-19-04, 04:03 AM |
| Re: ما هو أبعد من حزن ندى الواشنطوني ( قصيدة جديدة) | خضر عطا المنان | 12-19-04, 04:12 AM |
| Re: ما هو أبعد من حزن ندى الواشنطوني ( قصيدة جديدة) | Ishraga Mustafa | 12-19-04, 04:28 AM |
| Re: ما هو أبعد من حزن ندى الواشنطوني ( قصيدة جديدة) | Salwa Seyam | 12-19-04, 05:26 AM |
| Re: ما هو أبعد من حزن ندى الواشنطوني ( قصيدة جديدة) | Nada Amin | 12-19-04, 09:17 AM |
| Re: ما هو أبعد من حزن ندى الواشنطوني ( قصيدة جديدة) | NEWSUDANI | 12-19-04, 09:48 AM |
| Re: ما هو أبعد من حزن ندى الواشنطوني ( قصيدة جديدة) | kamalabas | 12-19-04, 10:02 AM |
 Re: ما هو أبعد من حزن ندى الواشنطوني ( قصيدة جديدة) | luai | 12-19-04, 10:12 AM |
| Re: ما هو أبعد من حزن ندى الواشنطوني ( قصيدة جديدة) | Hisham Amin | 12-19-04, 10:16 AM |
| Re: ما هو أبعد من حزن ندى الواشنطوني ( قصيدة جديدة) | Ishraga Mustafa | 12-19-04, 10:31 AM |
| Re: ما هو أبعد من حزن ندى الواشنطوني ( قصيدة جديدة) | luai | 12-19-04, 11:09 AM |
| Re: ما هو أبعد من حزن ندى الواشنطوني ( قصيدة جديدة) | Ishraga Mustafa | 12-19-04, 12:05 PM |
| Re: ما هو أبعد من حزن ندى الواشنطوني ( قصيدة جديدة) | kamalabas | 12-20-04, 09:36 PM |
| Re: ما هو أبعد من حزن ندى الواشنطوني ( قصيدة جديدة) | محمد عبدالقادر سبيل | 12-20-04, 10:31 PM |
| Re: ما هو أبعد من حزن ندى الواشنطوني ( قصيدة جديدة) | abuguta | 12-20-04, 11:49 PM |
| Re: ما هو أبعد من حزن ندى الواشنطوني ( قصيدة جديدة) | Ishraga Mustafa | 12-21-04, 00:11 AM |
| Re: ما هو أبعد من حزن ندى الواشنطوني ( قصيدة جديدة) | محمد عبدالقادر سبيل | 12-21-04, 00:55 AM |
| Re: ما هو أبعد من حزن ندى الواشنطوني ( قصيدة جديدة) | Ishraga Mustafa | 12-21-04, 01:32 PM |
| Re: ما هو أبعد من حزن ندى الواشنطوني ( قصيدة جديدة) | Hafiz Bashir | 12-21-04, 00:11 AM |
| Re: ما هو أبعد من حزن ندى الواشنطوني ( قصيدة جديدة) | kamalabas | 12-21-04, 09:06 AM |
 Re: ما هو أبعد من حزن ندى الواشنطوني ( قصيدة جديدة) | Nada Amin | 12-21-04, 09:29 AM |
| Re: ما هو أبعد من حزن ندى الواشنطوني ( قصيدة جديدة) | Adil Isaac | 12-21-04, 09:45 AM |
| Re: ما هو أبعد من حزن ندى الواشنطوني ( قصيدة جديدة) | Bashasha | 12-21-04, 11:15 AM |
| Re: ما هو أبعد من حزن ندى الواشنطوني ( قصيدة جديدة) | Deng | 12-21-04, 02:04 PM |
| Re: ما هو أبعد من حزن ندى الواشنطوني ( قصيدة جديدة) | عبدالماجد فرح يوسف | 12-21-04, 02:26 PM |
| Re: ما هو أبعد من حزن ندى الواشنطوني ( قصيدة جديدة) | معتصم دفع الله | 12-21-04, 02:57 PM |
| Re: ما هو أبعد من حزن ندى الواشنطوني ( قصيدة جديدة) | Ishraga Mustafa | 12-21-04, 03:19 PM |
| Re: ما هو أبعد من حزن ندى الواشنطوني ( قصيدة جديدة) | Ishraga Mustafa | 12-21-04, 04:09 PM |
| Re: ما هو أبعد من حزن ندى الواشنطوني ( قصيدة جديدة) | abuguta | 12-21-04, 08:34 PM |
| Re: ما هو أبعد من حزن ندى الواشنطوني ( قصيدة جديدة) | ياسر مكاوي | 12-21-04, 09:39 PM |
| Re: ما هو أبعد من حزن ندى الواشنطوني ( قصيدة جديدة) | أحمد أمين | 12-23-04, 03:12 PM |
| Re: ما هو أبعد من حزن ندى الواشنطوني ( قصيدة جديدة) | بشري الطيب | 12-24-04, 02:53 AM |
| Re: ما هو أبعد من حزن ندى الواشنطوني ( قصيدة جديدة) | شرير والبرتقاله | 12-28-04, 02:09 AM |
| Re: ما هو أبعد من حزن ندى الواشنطوني ( قصيدة جديدة) | Elawad Eltayeb | 12-28-04, 04:07 AM |
| Re: ما هو أبعد من حزن ندى الواشنطوني ( قصيدة جديدة) | Abdel Aati | 12-28-04, 04:26 AM |
|
| |
محمد عبدالقادر سبيل
فيس بوك
تويتر
انستقرام
يوتيوب
بنتيريست