نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 مالو العميد مالو البليد ...يا عزو لا
|
ويا عزو............لا عارفين ...... بالجد انا (مبسوط ) ومرتااااااااااااااااح ..لانى كنت مضاد للحموضة السياسية الكانت خانقة ناس كتاااااااااار وما لاقين ليهم دواء وعلاج وانفشو شوية .... بعد ما طلع علينا الاخ (عزوز ) بصيحته الشهيرة
( امسك ........عميد فى الامن عضوا بالمنبر ) ...سنة يا تنقا ......... والعجب ناس (نهار) وشلتو قامو هايجين وفى واحد تكرم بتوثيق عدد غير قليل من اعمدتى .. .. ما عارف ليه حذف عمود اطالب فيه باطلاق سراح العميد خالد وتانى تضامنت فيه مع الاخ بكرى اثناء اغلاق الموقع وكتيييييييييير لا يحصى لكن نهار طنشو .بالمناسبة اشكرك يا صديقى لانك منحتنى مساحة ترويج واعلان وتصدق لى ساعة ولا تلاتة ساعات تلفونى ما بطل يرن ...العاوز جواز سفر جديد ..العندو ولد ما مشى الخدمة الوطنية والعاوزنى اشوف وظيفة لقريبو ..والعاوزنى اشوف لاعبين جدد للمريخ وكمان مدرب .......والجماعة كلهم يا سعادتك يا (جدادتك ) ....ودا كوم والشلة بتاعة (الشيشة ) ديل قالوا عاوزين (تصديق ) عشان يختو الشيشة فى نص الشارع بتاع الشنقيطى وناس الديم جات ولانى عميد بحسب تعبير وصيحة الاخ عزو طبعا مافى (عسكرى ) يقدر يتطاول على فخامتى ! .......ودا كوم والرعب الملانى من اشاعة ناس المنبر دى كوم تانى طبعا لو انا صدقت ومشيت فى الهوجة دى بكون جبت لى نفسى مشكلة قانونية لانى بكون منتحل شخصية وتدى اقل حاجة ستة شهور سجن ومافيها لجان وبيانات ولا لجان محامين وبورد زى دا ينشط معاك تاكل نارك بس ......قمت يا شباب طوالى طلعت بيان (توضيحى ) بالتلفون طبعا لميت ليك فى كل الصحافيين البعرفهم ناس كورة صحافة تسالى صحافة حائطية صحافة سياسية ..يا جماعة فى زول فى سودانيز اون لاين قال انا عميد فى الامن – واحد صحبى فى جريدة الصحافة اتخلع قال لى يا محمد انت اخر الزمن بقيت بتاع سجائر اخضر – ويا جماعة الخير ومساكم الله بالخير انا هنا العبد الفقير لله اعلن لكم اننى (مدنى ) قح اخر عهدى بالعسكرية ايام الكديت ودى زاتو فشلت فيها لانى ما وصلت فيها رتبة (مساعد ) رغم انى كنت اطول زول فى الفصل وناس الكديت !
ولا اقول ليكم ...اهلنا قالو شوف العين ما بيرمى غزال .......العاوز ياخد منى موقف ويكش ويرفض الحوار والتواصل الانسانى السودانى البحت دا ... على اساس انى (عميد امن ) ...مااااااااااشى ... والنظرة ماشية وراك ..ومالو العميد مالو البليد ...لو كان دس الاسم والايميل ...اقلو نرتاح من الزول الشابكنا صور ( يا مولاى كما خلقتنى دا ) ......يا جماعة قولو للزول دا فى بوستات ولا اى طريقة تانية .......دا محمد حاااااااااااامد مش الرئيس كلينتون ... يعنى يحتشم شوية ويلم الصور دى لانها شينة ... وبتاعة ناس (مش ولابد ) بعدين الدنيا شتاء والستر والغطاء كويس ...سمح
وعموما ...يبقى الود للجميع وساظل احبكم من شتمنى ومن نصرنى وساكون ثقيل الدم وسابقى الى ان تنجلى الحقيقة وساشارك فى الحوار وكل مناشط هذا المنبر ما استطعت لذلك سبيلا وان فصلت او طردت او حجبت ساعتلى الجدران واديها طلة ...........
ويا عزو ........والله بالغتا .. طيب كان تقول حاجة معقولة شوية تليق بزول مولود فى السبعينات ........عارف ذكرتنى ...طرفة الحلفاوى قالو كان فى لواء فى الجيش جابوه جديد فى منطقة حلفا الجديدة بعدين مره وهو ماشى بالعربية صادف مزارع ماشى فى نفس الوجه فراح اللواء – لابس رسمى وكلو تمام – وقف وركب الحلفاوى ..اها لمن وصلو .. الحلفاوى نزل فى محلو القاصدو وقال للواء ..شكرا يا هدرت الصول ... طبعا اللواء انصدم ...وعاين كدا ..كدا وقال ...صول ...لا احسن امباشى ! ...عزو ...عميد يا مفترى ....دا انت طلعت اى كلام يا جدع ...........
|
|
 
|
|
|
|
|
| العنوان |
الكاتب |
Date |
| مالو العميد مالو البليد ...يا عزو لا | محمد حامد جمعه | 12-10-04, 10:44 AM |
 Re: مالو العميد مالو البليد ...يا عزو لا | Abdelaziz | 12-10-04, 11:14 AM |
| Re: مالو العميد مالو البليد ...يا عزو لا | محمد حامد جمعه | 12-10-04, 11:16 AM |
| Re: مالو العميد مالو البليد ...يا عزو لا | Shinteer | 12-10-04, 11:24 AM |
| Re: مالو العميد مالو البليد ...يا عزو لا | محمد حامد جمعه | 12-10-04, 11:26 AM |
 Re: مالو العميد مالو البليد ...يا عزو لا | خالد | 12-10-04, 02:29 PM |
| Re: مالو العميد مالو البليد ...يا عزو لا | محمد حامد جمعه | 12-10-04, 10:24 PM |
| Re: مالو العميد مالو البليد ...يا عزو لا | ابو الزيز | 12-10-04, 10:26 PM |
| Re: مالو العميد مالو البليد ...يا عزو لا | محمد حامد جمعه | 12-10-04, 10:30 PM |
| Re: مالو العميد مالو البليد ...يا عزو لا | ود الشيخ | 12-10-04, 10:39 PM |
| Re: مالو العميد مالو البليد ...يا عزو لا | محمد حامد جمعه | 12-10-04, 11:01 PM |
| Re: مالو العميد مالو البليد ...يا عزو لا | khider | 12-10-04, 11:16 PM |
| Re: مالو العميد مالو البليد ...يا عزو لا | محمد حامد جمعه | 12-10-04, 11:29 PM |
| Re: مالو العميد مالو البليد ...يا عزو لا | khider | 12-10-04, 11:40 PM |
| Re: مالو العميد مالو البليد ...يا عزو لا | محمد حامد جمعه | 12-11-04, 00:13 AM |
| Re: مالو العميد مالو البليد ...يا عزو لا | khider | 12-11-04, 00:31 AM |
| Re: مالو العميد مالو البليد ...يا عزو لا | khider | 12-11-04, 00:33 AM |
| Re: مالو العميد مالو البليد ...يا عزو لا | عمرو احمد | 12-11-04, 00:49 AM |
|
| |
محمد حامد جمعه
فيس بوك
تويتر
انستقرام
يوتيوب
بنتيريست