نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 لكم محبي مصطفى....مرثيه من السودان...شعر: الأستاذه.نايله فزع
|
اليكم...
محبي وأصدقاء الراحل المقيم: مصطفى سيد أحمد...
كرنفالات حزن
مرثيه لسان حال السودان
لأبنها البار
الراحل المقيم : مصطفى سيد أحمد
شعر الأستاذه : نايله فزع
بعد الفقد صابني الوهن
ربوعي غطاها الحزن
حواسي أعياها التعب
غنيت وكان صوتك رقيق
دفقه رحيق
يغرس أمل
أحيان يكون ممزوج غضب
وفنك عجب
اشعلت نيران الحماس
أحييت التراث
الفي حاضرنا وماضينا أنكتب
ونسيت كمان انك مغني
سقيت عمرنا بهجه وطرب
من يوم فارق ديارنا ورحل
غطاها الحزن صابها المحل
بس حبي كان ليهو زاد
وكان دوام حافظ الوداد
قال غناوي..
ردد حكاوي..
خلد تاريخآ ما قالو راوي
سجل مشاهد
الزمن كان ليهو شاهد
عدد لي مآثر
بي حبي كان دايمآ بفاخر
حبه لي ترابي فاق الوصف
ما بنحكي ما بنوصف
بعدك خلاص جف المداد
شاخ الحرف
والمغنى ذاتو قبل رحيلو
خش وعرف
أداه من نبعو الغزيز
قال ليهو بس أغرف........غرف
بعدك خلاص
مسخ الغنى
مسخ العزف
حباك جيل...
حباك جيل..
يا الأنت شامخ كالنخيل
والنيل انسكب ليك سلسبيل
ما أنت يا نغمي الجميل
قدرك جليل
وفنك أصيل
من بدري ....لازم تنخطف
أشتقت ليك..
أشتقت ليك..
شوق أم لى صغيرها
شوق غريبآ فارق دياره
وقاسى من الغربه وهجيرها
شوق عريسآ للفال
ورشه ضريره
شوق عروسآ لي حبيب
يلمع هلالو
ورابط الحريره
شوق فريقآ للسيره
وغنوات العديله
شوق بنيتآ زايد حياها
يترقص في الدايره
بخطواتها مهيله
ما أنت كنت غناها كنت نورها
يا عاشق الحرف
يا مطوع لي كلماتو التقيله
يا صاحب اللحن المجلجل
في بواديها ونيلها
ما أنت شمس عزتها
في حاضرها وقبيلها
ما أنت فارس حوبتها
يا ضو القبيله
غنيت كلامآ زي الحجا
تقول الغنى بيك انتهى
وبيك ابتدا
بس ريدتك لي
كانت فريده مؤكده
وعلت رايتي بي غناك
كل العالم شافها وأكدها
وقت الغيبه طالت
وبفى ماليها حد
وقت مرضك طال
طال شوق السواقي
انسكب دموع
كاويات لخد
سالني منك الجروف
وينو عاشقنا
عاشق الحروف
جالب السعد
يمه.......وينو بلبلنا المغرد
حيعيش بعيد عننا للأبد..؟؟؟
قلت ليهم .لا.لا.لآ
\دا عاشق ترابي
اختار غناي وأصطفى
عانى وقاسى كثير علشانا
ما قال شبع ....ما قال كفى
دندن عوده ونايه الحزين
على آلمه وجرحو انكفى
ملأ الكون بي روايع
ما قالها زول
ما بقدر أوصفها
بس جانا هادم اللذات
سكت النغم بريقو اختفى
يوم جابو النعش
شفت كرنفالات حزن
والفرح من ربوعنا أختفى
حزنوا النيل والقمر
قالوا أخبار
كئيبه ومؤسفه
كل الخلوق كانت لرجوعك
مشتاقه ومتلهفه
ما عشانهم فارقت الحياه
اللينه ........المترفه
وغنيت كلام مليان صدق
مليان وفا
انسكب في وجدانا مشاعر جميله ومرهفه
بعدك خلاص ...عقرت
وعقر النغم
عشيه رحيلك
يا مصطفى.........
|
|
 
|
|
|
|
|
| |
mahdy alamin
فيس بوك
تويتر
انستقرام
يوتيوب
بنتيريست