|
|
 وباء .. اسمه الأعلام الرياضي السوداني
|
اقسم .. أن لا شئ يصيبني بالغثيان مثلما تفعل كتابات بعض (الكتبة) الذين يسمون مجازا بالصحفيين الرياضيين.
طالعوا كل الذي يكتب في الانترنت و الصحف الرياضية و أن اردتم ان تبلغوا قمة الغثيان عليكم اذا بالفترة الرياضية - لكن فضلا - قبل الوجبات.
كيف للرياضة ان تتطور - بالذات - المدعوة كرة القدم في بلد الكم الف ميل اذا كان اعلامييها و صحفييها يتنابون سرد نفس العبارات السخيفة ويورثونها بعضهم البعض .. اشياء مثل المريخ يتوهج .. الهلال ينتفض .. القراقير يعلنون الحرب .. المدرب الفلاني ظهرت بصماته .. الفريق القومي يعلن الطوارئ .. حالة الأستنفار تسود الاتحاد .. الصواريخ تدك حصون نادي الايه ما تعرف .. الطوربيد .. المدفعجي .. صمام الأمان .. الديزل ..
تصيبني الدهشة و الذهول و انا اقرأ مثل هذه الأشياء ..
في أثناء فعاليات منافسة امم اوروبا السابقة كنت اطالع بعض التقارير و اخبار التغطية علي الانترنت ..
صدقوني ان منافسة الامم الأوروبية كلها ليس بها طوربيد واحد.
بل ان منتخبات اسبانيا و الدنمارك و هولندا و انجلترا ليس بها (برنس) واحد
.. فأرحمونا يرحمكم الله .. الصحافة الرياضية الحالية لا يمكن ان تكون رسالة يود القائمون علي امرها ان تسهم في الأرتقاء بنشاط .. لا يمكن
يتملكني احساس قوي ان - كل من يأنس في نفسه الكفاءة - يمكنه ان يكون صحفي رياضي (مطبوع).
بالله انظروا لرياضتنا و انظروا لكتاباتهم و قولوا لي ان كنتم تروا توافقا.
و كما قلت لكم (استمتعوا) بمشاهدة الاعلامي (الطائر) كمال حامد يوم الجمعة و الأيام التالية (برضو).
و من ثم آخر يدعي سيف الدين ذلك الذي لم يدرك منذ ان صار رتشارد قلبا لأسد اعلامنا الرياضي, لم يدرك ان رتشارد اسمه رتشاد جاستن و ليس جاتسن.
جهل بابسط الأشياء المتعلقة بالثقافة الرياضية الأساسية لأي فرد عادي و معلومات عامة مثل اسماء دول و مدن في هذا العالم تتواري خجلا ان سمعت كيف ينطقها مذيعونا.
عدم قبول عام فيما يقدم أو ما يطرح ..
قدم ايمن جادة المباراة النهائية لكأس العالم قبل الأخير في فرنسا فكانت محاضرة في الكرة و التاريخ و المعلومات العامة و اللغة العربية و يكتب احد الصحفيين اسمه مزمل لغة هي قمة في التدهور و الدعوة الي ان تنفر منها .
اتري ماذا كنا سنكتب ان كان - مثلا - منتخباتنا للكرة الطائرة و اليد و السلة ومجموعة من السباحين و والمناشط الأخري موجودة في اثينا الآن؟
ارحموا كرة القدم يا ايها المدعين و ارحمونا من لغط حديثكم و بصرونا اننا في الحضيض حتي لا يكون هدفكم ان تشحنوا المتلقي بالأكاذيب التي لا تغني من جوع يلتهم رياضتنا و ثقافتنا الرياضية
|
|
 
|
|
|
|
|
|
|
 Re: وباء .. اسمه الأعلام الرياضي السوداني (Re: omer ibrahim)
|
ياعمر سلام بالكوم
تعرف ياعمر الإعلام الرياضي في السودان هو تابلويد من نوع المكاواة والقعدة قدام الدكان أو تحت العمود, الفكرة بتاعت غلبناكم وبيضا ليهو وردمو وخماهو و سففو التراب وأداهو السلك وجبدو لمان سروالو نصل وباكاتكم الشينين ديل والديسكو بتاعنا وحتي روبيرو بسموهو الجعلي قالوا قلبو حار ... وقد الشبكة والشبكة طبعا مهتكة ياعمر وأي شوات بقدها مادايرا ليها منزول وقصة الليمونة الشاتة كتلت ليها شافع ولا الخرافة البتقول منزول ودوهو الصين ولا الغتحاد السوفيتي ما عارف عشان يعملوا ليهو عمليه في رجلو عشان يقللو قوتها الخطيرة التي بعجت بطن حارس مرمي إفريقي ومصارينو طلعت في السهله.
كان في شجرة في أواخر السبعينات لحدي بداية التمانينان بتلمو فيها العواطلجية ويتكلمو عن الكور وغالبا هلال مريخ والجماعة ديل مرضانين كورة موت أنا سمعت واحد منهم حافظ ال ستات بتاعت الهلال الكحلي المنقه بي لباس ابيض ده جابو سكرتير الهلال من روما والازرق الفيهو هلال كبير ده هدية من اولاد ملاح, وإنتو يامريخاب ياصهاينة ياعواليق عندكم شنو عاملين غستادكم الزي حفرة الدخان ده قالو زمان كان حوش بقر نحن دحيشنا كره النميري الكورة لحدي مالغاها والنقر الحاج المبدع عربيتو الكريسيدا شدة ما رهيبة ماتعرف تعاين ليهو ولا تعاين للكريسيدا السمح سيدا والدحيش شغال في لاركو ومحمد حسين كسلا دكتور انتو احسن زول عندكم فتحي فرج الله وهو سواق برينسة قام المريخابي زعل قاليهو ماذدا دا ما بتعرفو؟ كان شغال كمساري برضو ولا عتالي مازول هندسة وخريج جامعة...وهكذا هوي غنت يالقرقور مع شنو الهلب اليقلبك بنطون دردق بلا بريش بلا لما زولكم دا غير الجري ماعندو حاجة يفكوها ليهو قدام وينطلة كان لحقا بلبعا يا صابت يا ركنا في الكشافات.
أها ياعمر الإعلام الرياضي مبني علي كدة وهدفو الاساسي الإستثمار وتحقيق مبيعات كتيرة كل يوم فلذللك طريقهم الوحيد هو الإثارة وفكرة تقل المحلبية وزيد الشمار حبة والبرنس دة اصلو إسم منزل ودي كانت موضة زمان كل حاجه عندها أمير للشعر أمير وللغنا أمير وللعود أمير وفي الديمقراطية الأخيرة ناس الجبهة أطلقو إسم اميرسيدس علي ذلك السياسي القويم.
تعرف ياعمر أنا بدردش معاك في الموضوع ساكت كده, فأعذرني, الإعلام الرياضي ليه مايكون ركيك وعشوائي إذا كانت الإدارة الرياضية ذاتا عشوائية والعمتو كبيرة وجيبو كبير ببقا رئيس نادي وهو عمرو ما دقا ليهو كورة ولا بعرف الفاول من البنالتي ده يبقي رئيس نادي ليه وجاهة ولا شنو يعني والفريق القومي بتاعنا له بلموهو من الأقاليم وهلال مريخ قبل شهر كان شهرين من المقابلات الرسمية ويمشي يقابل منتخب القضارف ولا فريق الشاطي عطبرة ويغلبم تلاتة واربعة ويرجعو القرين فيلدج والهيلتوم وهنا تقول تلك الصحافة المعنية أن الفريق القومي سيذهب لأحراش أفريقيا لملاقة أسود الكاميرون ولا زامبيا, بلاهي نحن من زمن الأدغال الناس دي لو ماشافت إفريقيا بقت كيف وفاتتنا كية ما عاعارفين إنو الناس ديل تطوروا ووصلو كاس العالم واحترفو في اكبر الاندية الاوربية كارقام اساسية وشالو ميداليات اولمبية, حتي أرتريا جارتنا الحديثة النشأة اليلة شالت ميدالية في العاب القوي في أثينا ونحن وفدنا فيهو اربعة ولاخمسو منهم كمال حامد.
أنا بس عندي سؤال فرقنا القومية دي البحميها تعمل إحتكاك دولي شنو قبل البطولات القروش مافي برضو والشماعة بتاعت الإمكانيات القديمة دي, ده كلام مابنقبلو ومكرر كتير جدا
أقول ليك حاجة يا عمر السودان كل حاجة فيهو ماشا ساكت كده مافي علمية مافي تخطيط مافي سجم الرماد ذاتو وشكلنا حانقعد نتحسر كدة لي يوم الدين وانا كلما مرة اقول انا محتاج لي مرارتي دي شديد عشان كده حا انسى حاجه إسمها كورة سودانية وابقي علي ناس مانشستر وارسنال والريل والبارسا لكن كمان الواحد لما يشوف السودان لاعب بتجيهو الهوشة حقت الشدرة ديك ويصبح الإحباط دايرة مدورة زي الكفر اب بوز
اها نحنا بندعو معاك الإعلام والإدارة والدولة وكل الرياضيين السودانين يمارسو شوية علمية وإنضباط عشان الكورة تبقي كورة.
ودمت
| |
|
|
|
|
|
|
|
|
|
Re: وباء .. اسمه الأعلام الرياضي السوداني (Re: عبدالماجد فرح يوسف)
|
عبد الماجد كيف حالك ياخ؟
ياخ انا تعرف قصة العملية بتاعة منزول دي انا أول مرة اسمع بيها و أهو حاجة تضاف لرصيد المبالغات الموجودة ..
كان لي صاحب رحمه الله .. دايما يقول لي:
تعرف يا عمر انا اكتر شي بفقع مرراتي شنو؟ اقول ليهو شنو؟
يقول لي طبيخ الكوسة و قصة السودان هو مؤسس الاتحاد الأفريقي دي.
كلامك أكثر من صحيح فيما يختص بالصحفيين الرياضيين .. و كان ادوهم فرقة كدة .. ممكن تاني يوم من هلال مريخ تلقي عنوان كبير في جريدة رياضية عامل كدة
احييييي انا .. رشيناكم
يعني و الله ونسة الأخوان بتاعة المصطبة و الدكان دي ممكن تكون مستواها اعلي مما يكتب .. و اديك مثال
كتب مزمل الصحفي المشهور بأنتماءه للمريخ الآتي بعد مباراة المريخ و الهلال الأخيرة و التي اتمني - آسفا- ان تكون قد شاهدتها
عجبكو الهندسية و(ردموها المريخاب)
* استأنفت شركة عجبكو الهندسية نشاطاتها بعد توقفٍ لم يدم طويلاً.. لتعيد تخطيط شوارع العرضة شمال والمنطقة الصناعية وسوق العيش .. كما نقلت الشركة العريقة نشاطاتها إلى الأراضي الموزمبيقية قبل أيام ونجحت في تخطيط وإعادة رصف شارع قابيتو الاتخرب بيتو بالرغم من قصر الشارع المذكور وعدم مطابقته للمواصفات الفنية المعتمدة من الفيفا وبالرغم من المخالفات الكبيرة التي صاحبت اعتماد عطاء رصف الشارع المذكور!
* أمس سجلت عجبكو الهندسية للوجع والأذية لصاحبها الرجل الفضائي الخطير إنجازاً جديداً بإعادة رصف وتعبيد ثلاثة شوارع في منطقة القرقور (شمال وجنوب) في وقتٍ قياسي بالتزامن مع بداية أعمال رصف طريق (المعز- قابيتو) في الثغر الحبيب.. ولم يستغرق رصف الطريق المذكور أكثر من دقيقة واحدة فقط انفتح بعده على مصراعيه أمام آليات شركة هلال الساحل الهندسية التي نالت عطاءً فرعياً من عجبكو الهندسية قبل أيام من الآن!
* وبعد تسع دقائق فقط من بداية أعمال الردميات نجحت عجبكو الهندسية في أن تفتتح جسراً جوياً ضخماً لنقل معدات الردم وتعبيد الطريق السالك نحو منطقة فريق ريد مروراً بخور أبي عنجة دون الحاجة لأخذ الإذن من المعتمد القرقوري الجديد خضر طه الذي وصل من الإمارات قبل أيام من بداية العمل وصرح مؤكداً وعورة أراضي القرقور على آليات عجبكو الهندسية للوجع والأذية!
* وأثناء عملية إعادة رصف طرق منطقة (ردمونا المريخاب) بجوار فريق ريد ألقت القوات المرافقة لشركة عجبكو الهندسية القبض على واحد بلبوط (مدنكل) وبرفقته واحد عنتر (تايواني) وأيوب (صابر على الضرب).. وريتشارد (صيني الصنع) لتتصدر عجبكو الهندسية جدول ترتيب الشركات الأكثر إنجازاً في مجال رصف طرق الممتاز الذي أصبح معبداً بالكامل لسير المدرعات الحمراء بعد أن تعطلت الآليات الزرقاء في بداية موسم الخريف بسبب ضعف قدرات محركاتها الهلكانة التي أصابت كل متابعيها ب ( قلق) شديد و( وزرقة) في شرايين الرشيد المعطوبة!!
آخر الحقائق
* المابي الغلب يبقى عاشق (عجب) يا ناس!!
* وما الغرابة في أن يتألق العجب في مطلع رجب؟
* الهلال أصبح محتاجاً بشدة لتناول حبوب ( منع الغلب) .. يا عزيزي الرشيد على عمر!
* وطااااخ.. يا شجرابي العريس.. الكلام دخل حوش شهر العسل!
* وللمعلومية.. العريس شجرابي موجود حالياً بهيلتون بورتسودان.. تحت ضيافة عصام زرقة!!
* هذا إذا لم يأمر قلق بنقله على جناح السرعة إلى ( غرب الظلط) أو ( فيليب) ليقضي بقية أيام شهر البصل في (العشوائي الفاخر)!
* الحيدوسي زعلان من لقب الحاج يوسف.. لك العتبى حتى ترضى يا ضيفنا العزيز.. وآسفين ( برشة)!
* وعاد المريخ قطاراً يجر من خلفه العربات.. والرحمة والمغفرة لعاشق المريخ وفارسه الراحل صلاح سعيد الذي عودنا على كتابة هذه العبارة الجميلة كلما اعتلى المريخ صدارة إحدى البطولات!
* هاتريك للعجب.. والرابع لعلاء الدين.. والخامس للديزل.. دقر يا عين!
* والمباراة كانت في كرة القدم وليس كرة السلة!
* المريخاب رحبوا بالصديق العزيز خضر طه بعدد حروف اسمه.. ويا له من ترحيب ( حار)!
* هلال زرقة .. راح شمار في مرقة!!
* الهلال أخد حقو.. والقرقور من بعدو!
* في الخرطوم حر الضرب على حارس الموردة ريتشارد فخلع الجونتي ورفض الاستمرار.. وفي الثغر استبدلوا المعز كهربة بعد برشة عصام زرقة!!
* مسمار ونص.. ثم خمسة بدون زكريا والواد ميدو اللعاب.. المقارنة معدومة يا هلالاب!
* ابتداءً من التمرين المقبل ستتحول العرضة شمال إلى النجف الأشرف.. ويصبح الملعب الأزرق أكثر التهاباً من الصحن الحيدري عقب تصاعد شدة القصف وتوالي العمليات الانتحارية في العاصمة والثغر الحبيب!
*وتلألأت النجوم.. في سماء الخرطوم.. وعاد الهلال كالعرجون القديم في فضاء الثغر الحبيب!
* الصدارة حمراء والوصافة زرقاء .. بأمر العجب حبيبي!
* إذا استمرت المعطيات الحالية سنقترح نقل المريخ إلى الدوري الإيطالي.. والهلال إلى الدوري الصومالي!
* انتهى الصعب وتبقى الأصعب.. الخرطوم 3 أخطر من هلال نجم الدين وموردة عجبكو الرجمكو!
* مسمار من كهربة.. ومسمار من زرقة.. متعودة.. دايماً!!!!
* هل تسبب درمة في هدف زرقة؟
* مسمار تاني؟؟.. قدموا شكوى .. ونقترح أن تكون الشكوى ضد الحر والرطوبة!!
| |
|
|
|
|
|
|
|
|
|
Re: وباء .. اسمه الأعلام الرياضي السوداني (Re: omer ibrahim)
|
بالله الحالة وصلت كده؟
لا لا لا دا كلام فارغ واجوف وجد بزعل قال مسمار قال
وبعدين والله تقرا كلامو تقول كان البرازيل لاعبة مع الارجنتين مش الكتاحة والدافوري الشفناهو ده
بعدين ياعمر لاحظت العراضة وقعت من قوة مدفع البنالتي الشاتو صدام حسين ده والحكم قام شال الحديدة جدعا
يا خي في كاس العالم غيرو العرلضة كلها في خمسة دقايق
اها الامكانيلت التعبانة وصلت حد انو الاتحاد كلو ما عندو حق اللحام
وبعدين الزول ده اسلوبي متدني شديد بلبوط وكلام فارغ زي ده كيف يككتبو في جريده بيقرلها الناس خليك من انو ما ناقش اي حاجة في الكوره ولا استعمل كلمة واحدة عندها معني كروي
دا اعلام بتاع عواطلية مامؤهلين
كان في ناس كويسين يشهوك في صفحة الرياضة زمن ناس ابوشنب زمان لكن جد الحالة بقت مؤسفة وياناس البورد تعالو شوفو مزمل كتب شنو
ياخسارة الكوسة والاتحاد الافريقي يا عمر
| |
|
|
|
|
|
|
| |
عبدالماجد فرح يوسف
فيس بوك
تويتر
انستقرام
يوتيوب
بنتيريست